༨. སུ་མ་ནཱ་ཝེ་ལི༹་ཡ་ཏྠེ་ར་ཨ་པ་དཱ་ནཾ

༦༤. ‘‘ཝེ་སྶ་བྷུ་སྶ བྷ་ག་ཝ་ཏོ, ལོ་ཀ་ཛེ་ཊྛ་སྶ ཏཱ་དི་ནོ;

ས་བྦེ ཛ་ནཱ ས་མཱ་ག་མྨ, མ་ཧཱ་པཱུ་ཛཾ ཀ་རོ་ནྟི ཏེ.

༦༥. ‘‘སུ་དྷཱ་ཡ པི་ཎྜཾ ཀ་ཏྭཱ་ན, ཨཱ་ཝེ་ལ༹ཾ སུ་མ་ནཱ་ཡ་ཧཾ;

སཱི་ཧཱ་ས་ན་སྶ པུ་ར་ཏོ, ཨ་བྷི་རོ་པེ་ས་ཧཾ ཏ་དཱ.

༦༦. ‘‘ས་བྦེ ཛ་ནཱ ས་མཱ་ག་མྨ, པེ་ཀྑ་ནྟི པུ་པྥ་མུ་ཏྟ་མཾ;

ཀེ་ནི་དཾ པཱུ་ཛི་ཏཾ པུ་པྥཾ, བུ་དྡྷ་སེ་ཊྛ་སྶ ཏཱ་དི་ནོ.

༦༧. ‘‘ཏེ་ན ཙི་ཏྟ་པྤ་སཱ་དེ་ན, ནི་མྨཱ་ནཾ ཨུ་པ་པ་ཛྫ་ཧཾ;

ཨ་ནུ་བྷོ་མི [ཨ་ནུ་བྷོ་སིཾ (སཱི.)] ས་ཀཾ ཀ་མྨཾ, པུ་བྦེ སུ་ཀ་ཏ་མ་ཏྟ་ནོ.

༦༨. ‘‘ཡཾ ཡཾ ཡོ་ནུ་པ་པ་ཛྫཱ་མི, དེ་ཝ་ཏྟཾ ཨ་ཐ མཱ་ནུ་སཾ;

ས་བྦེ་སཱ་ནཾ པི་ཡོ ཧོ་མི, པུ་པྥ་པཱུ་ཛཱ་ཡི་དཾ ཕ་ལཾ.

༦༩. ‘‘ནཱ་བྷི་ཛཱ་ནཱ་མི ཀཱ་ཡེ་ན, ཝཱ་ཙཱ་ཡ ཨུ་ད ཙེ་ཏ་སཱ;

སཾ་ཡ་ཏཱ་ནཾ ཏ་པ་སྶཱི་ནཾ, ཀ་ཏཾ ཨ་ཀྐོ་སི་ཏཾ མ་ཡཱ.

༧༠. ‘‘ཏེ་ན སུ་ཙ་རི་ཏེ་ནཱ་ཧཾ, ཙི་ཏྟ་སྶ པ་ཎི་དྷཱི་ཧི ཙ;

ས་བྦེ་སཾ པཱུ་ཛི་ཏོ ཧོ་མི, ཨ་ན་ཀྐོ་ས་སྶི་དཾ ཕ་ལཾ.

༧༡. ‘‘ཨི་ཏོ ཨེ་ཀཱ་ད་སེ ཀ་པྤེ, ས་ཧ་སྶཱ་རོ་སི ཁ་ཏྟི་ཡོ;

ས་ཏྟ་ར་ཏ་ན་ས་མྤ་ནྣོ, ཙ་ཀྐ་ཝ་ཏྟཱི མ་ཧ་བྦ་ལོ.

༧༢. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.

ཨི་ཏྠཾ སུ་དཾ ཨཱ་ཡ་སྨཱ སུ་མ་ནཱ་ཝེ་ལི༹་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.

སུ་མ་ནཱ་ཝེ་ལི༹་ཡ་ཏྠེ་ར་སྶཱ་པ་དཱ་ནཾ ཨ་ཊྛ་མཾ.