༧. ནི་གྒུ་ཎྜི་པུ་པྥི་ཡ་ཏྠེ་ར་ཨ་པ་དཱ་ནཾ
༣༩. ‘‘ཡ་དཱ དེ་ཝོ དེ་ཝ་ཀཱ་ཡཱ, ཙ་ཝ་ཏེ ཨཱ་ཡུ་ས་ངྑ་ཡཱ;
ཏ་ཡོ ས་དྡཱ ནི་ཙྪ་ར་ནྟི, དེ་ཝཱ་ནཾ ཨ་ནུ་མོ་ད་ཏཾ.
༤༠. ‘‘‘ཨི་ཏོ བྷོ སུ་ག་ཏིཾ ག་ཙྪ, མ་ནུ་སྶཱ་ནཾ ས་ཧ་བྱ་ཏཾ;
མ་ནུ་སྶ་བྷཱུ་ཏོ ས་དྡྷ་མྨེ, ལ་བྷ ས་དྡྷཾ ཨ་ནུ་ཏྟ་རཾ.
༤༡. ‘‘‘སཱ ཏེ ས་དྡྷཱ ནི་ཝི་ཊྛཱ་སྶ, མཱུ་ལ་ཛཱ་ཏཱ པ་ཏི་ཊྛི་ཏཱ;
ཡཱ་ཝ་ཛཱི་ཝཾ ཨ་སཾ་ཧཱི་རཱ, ས་དྡྷ་མྨེ སུ་པྤ་ཝེ་དི་ཏེ.
༤༢. ‘‘‘ཀཱ་ཡེ་ན ཀུ་ས་ལཾ ཀ་ཏྭཱ, ཝཱ་ཙཱ་ཡ ཀུ་ས་ལཾ བ་ཧུཾ;
མ་ན་སཱ ཀུ་ས་ལཾ ཀ་ཏྭཱ, ཨ་བྱཱ་པ་ཛྫཾ ནི་རཱུ་པ་དྷིཾ.
༤༣. ‘‘‘ཏ་ཏོ ཨོ་པ་དྷི་ཀཾ པུ་ཉྙཾ, ཀ་ཏྭཱ དཱ་ནེ་ན ཏཾ བ་ཧུཾ;
ཨ་ཉྙེ་པི མ་ཙྩེ ས་དྡྷ་མྨེ, བྲ་ཧྨ་ཙ་རི་ཡེ ནི་ཝེ་ས་ཡ’.
༤༤. ‘‘ཨི་མཱ་ཡ ཨ་ནུ་ཀ་མྤཱ་ཡ, དེ་ཝཱ་དེ་ཝཾ ཡ་དཱ ཝི་དཱུ;
ཙ་ཝ་ནྟཾ ཨ་ནུ་མོ་ད་ནྟི, ཨེ་ཧི དེ་ཝ པུ་ན་པྤུ་ནཾ [དེ་ཝ་པུ་རཾ པུ་ན (སཱི.)].
༤༥. ‘‘སཾ་ཝེ་གོ མེ [སཾ་ཝི་གྒོ་ཧཾ (སྱཱ.)] ཏ་དཱ ཨཱ་སི, དེ་ཝ་ས་ངྒྷེ ས་མཱ་ག་ཏེ;
ཀཾ་སུ ནཱ་མ ཨ་ཧཾ ཡོ་ནིཾ, ག་མི་སྶཱ་མི ཨི་ཏོ ཙུ་ཏོ.
༤༦. ‘‘མ་མ སཾ་ཝེ་ག་མ་ཉྙཱ་ཡ, ས་མ་ཎོ བྷཱ་ཝི་ཏི་ནྡྲི་ཡོ;
མ་མུ་དྡྷ་རི་ཏུ་ཀཱ་མོ སོ, ཨཱ་ག་ཙྪི མ་མ ས་ནྟི་ཀཾ.
༤༧. ‘‘སུ་མ་ནོ ནཱ་མ ནཱ་མེ་ན, པ་དུ་མུ་ཏྟ་ར་སཱ་ཝ་ཀོ;
ཨ་ཏྠ་དྷ་མྨཱ་ནུ་སཱ་སི་ཏྭཱ, སཾ་ཝེ་ཛེ་སི མ་མཾ ཏ་དཱ.
དྭཱ་ད་ས་མཾ བྷཱ་ཎ་ཝཱ་རཾ.
༤༨. ‘‘ཏ་སྶཱ་ཧཾ ཝ་ཙ་ནཾ སུ་ཏྭཱ, བུ་དྡྷེ ཙི་ཏྟཾ པ་སཱ་ད་ཡིཾ;
ཏཾ དྷཱི་རཾ ཨ་བྷི་ཝཱ་དེ་ཏྭཱ, ཏ་ཏྠ ཀཱ་ལཾ་ཀ་ཏོ ཨ་ཧཾ.
༤༩. ‘‘ཨུ་པ་པ་ཛྫིཾ ས [ཨུ་པ་པ་ཛྫི་སྶཾ (སཱི.)] ཏ་ཏྠེ་ཝ, སུ་ཀྐ་མཱུ་ལེ་ན ཙོ་དི་ཏོ;
ཝ་ས་ནྟོ མཱ་ཏུ་ཀུ་ཙྪི་མྷི, པུ་ན དྷཱ་རེ་ཏི མཱ་ཏུ་ཡཱ.
༥༠. ‘‘ཏ་མྷཱ ཀཱ་ཡཱ ཙ་ཝི་ཏྭཱ་ན, ཏི་ད་སེ ཨུ་པ་པ་ཛྫ་ཧཾ;
ཨེ་ཏྠ་ནྟ་རེ ན པ་སྶཱ་མི, དོ་མ་ན་སྶ་མ་ཧཾ ཏ་དཱ.
༥༡. ‘‘ཏཱ་ཝ་ཏིཾ་སཱ ཙ་ཝི་ཏྭཱ་ན, མཱ་ཏུ་ཀུ་ཙྪིཾ ས་མོ་ཀྐ་མིཾ;
ནི་ཀྑ་མི་ཏྭཱ་ན ཀུ་ཙྪི་མྷཱ, ཀ་ཎྷ་སུ་ཀྐཾ ཨ་ཛཱ་ན་ཧཾ.
༥༢. ‘‘ཛཱ་ཏི་ཡཱ ས་ཏྟ་ཝ་སྶོ་ཝ [ཛཱ་ཏི་ཡཱ ས་ཏྟ་ཝ་སྶེ་ན (སྱཱ.)], ཨཱ་རཱ་མཾ པཱ་ཝི་སིཾ ཨ་ཧཾ;
གོ་ཏ་མ་སྶ བྷ་ག་ཝ་ཏོ, ས་ཀྱ་པུ་ཏྟ་སྶ ཏཱ་དི་ནོ.
༥༣. ‘‘ཝི་ཏྠཱ་རི་ཀེ [ཝི་ཏྠཱ་རི་ཏེ (སཱི. ཀ.)] པཱ་ཝ་ཙ་ནེ, བཱ་ཧུ་ཛ་ཉྙ་མྷི སཱ་ས་ནེ;
ཨ་དྡ་སཾ སཱ་ས་ན་ཀ་རེ, བྷི་ཀྑ་ཝོ ཏ་ཏྠ ས་ཏྠུ་ནོ.
༥༤. ‘‘སཱ་ཝ་ཏྠི ནཱ་མ ན་ག་རཾ, རཱ་ཛཱ ཏ་ཏྠཱ་སི ཀོ་ས་ལོ;
ར་ཐེ་ན ནཱ་ག་ཡུ་ཏྟེ་ན, ཨུ་པེ་སི བོ་དྷི་མུ་ཏྟ་མཾ.
༥༥. ‘‘ཏ་སྶཱ་ཧཾ ནཱ་གཾ དི་སྭཱ་ན, པུ་བྦ་ཀ་མྨཾ ཨ་ནུ་སྶ་རིཾ;
ཨ་ཉྫ་ལིཾ པ་གྒ་ཧེ་ཏྭཱ་ན, ས་མ་ཡཾ ཨ་ག་མཱ་ས་ཧཾ.
༥༦. ‘‘ཛཱ་ཏི་ཡཱ ས་ཏྟ་ཝ་སྶོ་ཝ, པ་བྦ་ཛིཾ ཨ་ན་གཱ་རི་ཡཾ;
ཡོ སོ བུ་དྡྷཾ ཨུ་པ་ཊྛཱ་སི, ཨཱ་ན་ནྡོ ནཱ་མ སཱ་ཝ་ཀོ.
༥༧. ‘‘ག་ཏི་མཱ དྷི་ཏི་མཱ ཙེ་ཝ, ས་ཏི་མཱ ཙ བ་ཧུ་སྶུ་ཏོ;
ར་ཉྙོ ཙི་ཏྟཾ པ་སཱ་དེ་ནྟོ, ནི་ཡྻཱ་དེ་སི མ་ཧཱ་ཛུ་ཏི.
༥༨. ‘‘ཏ་སྶཱ་ཧཾ དྷ་མྨཾ སུ་ཏྭཱ་ན, པུ་བྦ་ཀ་མྨཾ ཨ་ནུ་སྶ་རིཾ;
ཏ་ཏྠེ་ཝ ཋི་ཏ་ཀོ ས་ནྟོ, ཨ་ར་ཧ་ཏྟ་མ་པཱ་པུ་ཎིཾ.
༥༩. ‘‘ཨེ་ཀཾ་སཾ ཙཱི་ཝ་རཾ ཀ་ཏྭཱ, སི་རེ ཀ་ཏྭཱ་ན ཨ་ཉྫ་ལིཾ;
ས་མྦུ་དྡྷཾ ཨ་བྷི་ཝཱ་དེ་ཏྭཱ, ཨི་མཾ ཝཱ་ཙཾ ཨུ་དཱི་ར་ཡིཾ.
༦༠. ‘‘‘པ་དུ་མུ་ཏྟ་ར་བུ་དྡྷ་སྶ, དྭི་པ་དི་ནྡ་སྶ ས་ཏྠུ་ནོ;
ནི་གྒུ་ཎྜི་པུ་པྥཾ པ་གྒ་ཡ྄ཧ, སཱི་ཧཱ་ས་ནེ ཋ་པེ་ས་ཧཾ.
༦༡. ‘‘‘ཏེ་ན ཀ་མྨེ་ན དྭི་པ་དི་ནྡ, ལོ་ཀ་ཛེ་ཊྛ ན་རཱ་ས་བྷ;
པ་ཏྟོ་མྷི ཨ་ཙ་ལཾ ཋཱ་ནཾ, ཧི་ཏྭཱ ཛ་ཡ་པ་རཱ་ཛ་ཡཾ’.
༦༢. ‘‘པ་ཉྩ་ཝཱི་ས་ས་ཧ་སྶ་མྷི, ཀ་པྤཱ་ནཾ མ་ནུ་ཛཱ་དྷི་པཱ;
ཨ་བྦུ་ད་ནི་ར་བྦུ་དཱ་ནི, ཨ་ཊྛ་ཊྛཱ་སིཾ་སུ ཁ་ཏྟི་ཡཱ.
༦༣. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ནི་གྒུ་ཎྜི་པུ་པྥི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ནི་གྒུ་ཎྜི་པུ་པྥི་ཡ་ཏྠེ་ར་སྶཱ་པ་དཱ་ནཾ ས་ཏྟ་མཾ.