༤. ཡ་ཉྙ་སཱ་མི་ཀ་ཏྠེ་ར་ཨ་པ་དཱ་ནཾ
༡༧. ‘‘ཛཱ་ཏི་ཡཱ ས་ཏྟ་ཝ་སྶོ་ཧཾ, ཨ་ཧོ་སིཾ མ་ནྟ་པཱ་ར་གཱུ;
ཀུ་ལ་ཝ་ཏྟཾ [ཀུ་ལ་ཝཾ་སཾ (སཱི. སྱཱ.)] ཨ་དྷཱ་རེ་སིཾ, ཡ་ཉྙོ ཨུ་སྶཱ་ཧི་ཏོ མ་ཡཱ.
༡༨. ‘‘ཙུ་ལླཱ་སཱི་ཏི་ས་ཧ་སྶཱ་ནི, པ་སཱུ ཧ་ཉྙ་ནྟི མེ ཏ་དཱ;
སཱ་ར་ཐ་མྦྷུ་པ་ནཱི་ཏཱ་ནི [ཏཱ་ར་སྨཱི་ཧི ཨུ་པ་ནཱི་ཏཱ་ནི (ཀ.), སཱ་ར་སྨིཾ་ཧི ཨུ་པ་ནཱི་ཏཱ་ནི (སྱཱ.)], ཡ་ཉྙ་ཏྠཱ་ཡ ཨུ་པ་ཊྛི་ཏཱ.
༡༩. ‘‘ཨུ་ཀྐཱ་མུ་ཁ་པ་ཧ་ཊྛོ་ཝ, ཁ་དི་ར་ངྒཱ་ར་ས་ནྣི་བྷོ;
ཨུ་ད་ཡ་ནྟོ་ཝ སཱུ་རི་ཡོ, པུ་ཎྞ་མཱ་ཡེ་ཝ [པུ་ཎྞ་མཱ་སེ་ཝ (སཱི.)] ཙ་ནྡི་མཱ.
༢༠. ‘‘སི་དྡྷ་ཏྠོ ས་བྦ་སི་དྡྷ་ཏྠོ, ཏི་ལོ་ཀ་མ་ཧི་ཏོ ཧི་ཏོ;
ཨུ་པ་ག་ནྟྭཱ་ན ས་མྦུ་དྡྷོ, ཨི་དཾ ཝ་ཙ་ན་མ་བྲ་ཝི.
༢༡. ‘‘‘ཨ་ཧིཾ་སཱ ས་བྦ་པཱ་ཎཱི་ནཾ, ཀུ་མཱ་ར མ་མ རུ་ཙྩ་ཏི;
ཐེ་ཡྻཱ ཙ ཨ་ཏི་ཙཱ་རཱ ཙ, མ་ཛྫ་པཱ་ནཱ ཙ ཨཱ་ར་ཏི.
༢༢. ‘‘‘ར་ཏི ཙ ས་མ་ཙ་རི་ཡཱ་ཡ, བཱ་ཧུ་ས་ཙྩཾ ཀ་ཏ་ཉྙུ་ཏཱ;
དི་ཊྛེ དྷ་མྨེ པ་ར་ཏྠ ཙ, དྷ་མྨཱ ཨེ་ཏེ པ་སཾ་སི་ཡཱ.
༢༣. ‘‘‘ཨེ་ཏེ དྷ་མྨེ བྷཱ་ཝ་ཡི་ཏྭཱ, ས་བྦ་ས་ཏྟ་ཧི་ཏེ ར་ཏོ [ཧི་ཏེ་སི་ཏོ (ཀ.)];
བུ་དྡྷེ ཙི་ཏྟཾ པ་སཱ་དེ་ཏྭཱ, བྷཱ་ཝེ་ཧི མ་གྒ་མུ་ཏྟ་མཾ’.
༢༤. ‘‘ཨི་དཾ ཝ་ཏྭཱ་ན ས་བྦ་ཉྙཱུ, ལོ་ཀ་ཛེ་ཊྛོ ན་རཱ་ས་བྷོ;
མ་མེ་ཝཾ ཨ་ནུ་སཱ་སི་ཏྭཱ, ཝེ་ཧཱ་སཾ ཨུ་གྒ་ཏོ ག་ཏོ.
༢༥. ‘‘པུ་བྦེ ཙི་ཏྟཾ ཝི་སོ་དྷེ་ཏྭཱ, པ་ཙྪཱ ཙི་ཏྟཾ པ་སཱ་ད་ཡིཾ;
ཏེ་ན ཙི་ཏྟ་པྤ་སཱ་དེ་ན, ཏུ་སི་ཏཾ ཨུ་པ་པ་ཛྫ་ཧཾ.
༢༦. ‘‘ཙ་ཏུ་ནྣ་ཝུ་ཏི་ཏོ ཀ་པྤེ, ཡ་དཱ ཙི་ཏྟཾ པ་སཱ་ད་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་ས་ཉྙཱ་ཡི་དཾ ཕ་ལཾ.
༢༧. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ ཡ་ཉྙ་སཱ་མི་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཡ་ཉྙ་སཱ་མི་ཀ་ཏྠེ་ར་སྶཱ་པ་དཱ་ནཾ ཙ་ཏུ་ཏྠཾ.