༡. སེ་རེ་ཡྻ་ཀ་ཏྠེ་ར་ཨ་པ་དཱ་ནཾ
༡. ‘‘ཨ་ཛ྄ཛྷཱ་ཡ་ཀོ མ་ནྟ་དྷ་རོ, ཏི་ཎྞཾ ཝེ་དཱ་ན པཱ་ར་གཱུ;
ཨ་བྦྷོ་ཀཱ་སེ ཋི་ཏོ ས་ནྟོ, ཨ་དྡ་སཾ ལོ་ཀ་ནཱ་ཡ་ཀཾ.
༢. ‘‘སཱི་ཧཾ ཡ་ཐཱ ཝ་ན་ཙ་རཾ, བྱ་གྒྷ་རཱ་ཛཾ་ཝ ནི་ཏྟ་སཾ;
ཏི་དྷཱ་པ་བྷི་ནྣ་མཱ་ཏ་ངྒཾ, ཀུ་ཉྫ་རཾ་ཝ མ་ཧེ་སི་ནཾ.
༣. ‘‘སེ་རེ་ཡྻ་ཀཾ ག་ཧེ་ཏྭཱ་ན, ཨཱ་ཀཱ་སེ ཨུ་ཀྑི་པིཾ [ནི་ཀྑི་པིཾ (ཀ.)] ཨ་ཧཾ;
བུ་དྡྷ་སྶ ཨཱ་ནུ་བྷཱ་ཝེ་ན, པ་རི་ཝཱ་རེ་ནྟི ས་བྦ་སོ [ས་བྦ་ཏོ (སཱི.)].
༤. ‘‘ཨ་དྷི་ཊྛ་ཧི མ་ཧཱ་ཝཱི་རོ, ས་བྦ་ཉྙཱུ ལོ་ཀ་ནཱ་ཡ་ཀོ;
ས་མ་ནྟཱ པུ་པྥ་ཙྪ་ད་ནཱ, ཨོ་ཀི་རིཾ་སུ ན་རཱ་ས་བྷཾ.
༥. ‘‘ཏ་ཏོ སཱ པུ་པྥ་ཀ་ཉྩུ་ཀཱ, ཨ་ནྟོ་ཝ་ཎྚཱ བ་ཧི་མུ་ཁཱ;
ས་ཏྟཱ་ཧཾ ཚ་ད་ནཾ ཀ་ཏྭཱ, ཏ་ཏོ ཨ་ནྟ་ར་དྷཱ་ཡ་ཐ.
༦. ‘‘ཏ་ཉྩ ཨ་ཙྪ་རི་ཡཾ དི་སྭཱ, ཨ་བྦྷུ་ཏཾ ལོ་མ་ཧཾ་ས་ནཾ;
བུ་དྡྷེ ཙི་ཏྟཾ པ་སཱ་དེ་སིཾ, སུ་ག་ཏེ ལོ་ཀ་ནཱ་ཡ་ཀེ.
༧. ‘‘ཏེ་ན ཙི་ཏྟ་པྤ་སཱ་དེ་ན, སུ་ཀྐ་མཱུ་ལེ་ན ཙོ་དི་ཏོ;
ཀ་པྤཱ་ནཾ ས་ཏ་ས་ཧ་སྶཾ, དུ་གྒ་ཏིཾ ནུ་པ་པ་ཛྫ་ཧཾ.
༨. ‘‘པ་ནྣ་ར་ས་ས་ཧ་སྶ་མྷི, ཀ་པྤཱ་ནཾ པ་ཉྩ་ཝཱི་ས་ཏི;
ཝཱི་ཏ་མ་ལཱ [ཙི་ཏྟ་མཱ་ལཱ (སཱི.), ཝི་ལཱ་མཱ་ལཱ (སྱཱ.)] ས་མཱ་ནཱ ཙ, ཙ་ཀྐ་ཝ་ཏྟཱི མ་ཧ་བྦ་ལཱ.
༩. ‘‘པ་ཊི་ས་མྦྷི་དཱ ཙ་ཏ་སྶོ, ཝི་མོ་ཀྑཱ་པི ཙ ཨ་ཊྛི་མེ;
ཚ་ལ༹་བྷི་ཉྙཱ ས་ཙྪི་ཀ་ཏཱ, ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ སེ་རེ་ཡྻ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
སེ་རེ་ཡྻ་ཀ་ཏྠེ་ར་སྶཱ་པ་དཱ་ནཾ པ་ཋ་མཾ.