༢. པུ་པྥ་ཐཱུ་པི་ཡ་ཏྠེ་ར་ཨ་པ་དཱ་ནཾ
༡༠. ‘‘ཧི་མ་ཝ་ནྟ་སྶཱ་ཝི་དཱུ་རེ, ཀུ་ཀྐུ་རོ ནཱ་མ [ཀུ་ཀྐུ་ཊོ ནཱ་མ (སཱི.)] པ་བྦ་ཏོ;
ཝེ་མ་ཛ྄ཛྷེ ཏ་སྶ ཝ་ས་ཏི, བྲཱ་ཧྨ་ཎོ མ་ནྟ་པཱ་ར་གཱུ.
༡༡. ‘‘པ་ཉྩ སི་སྶ་ས་ཧ་སྶཱ་ནི, པ་རི་ཝཱ་རེ་ནྟི མཾ ས་དཱ;
པུ་བྦུ་ཊྛཱ་ཡཱི ཙ ཏེ ཨཱ་སུཾ, མ་ནྟེ་སུ ཙ ཝི་སཱ་ར་དཱ.
༡༢. ‘‘བུ་དྡྷོ ལོ་ཀེ ས་མུ་པྤ་ནྣོ, ཏཾ ཝི་ཛཱ་ནཱ་ཐ ནོ བྷ་ཝཾ;
ཨ་སཱི་ཏི་བྱ་ཉྫ་ནཱ་ན་སྶ, བཱ་ཏྟིཾ་ས་ཝ་ར་ལ་ཀྑ་ཎཱ.
༡༣. ‘‘བྱཱ་མ་པྤ་བྷོ ཛི་ན་ཝ་རོ, ཨཱ་དི་ཙྩོ་ཝ ཝི་རོ་ཙ་ཏི;
སི་སྶཱ་ནཾ ཝ་ཙ་ནཾ སུ་ཏྭཱ, བྲཱ་ཧྨ་ཎོ མ་ནྟ་པཱ་ར་གཱུ.
༡༤. ‘‘ཨ་སྶ་མཱ ཨ་བྷི་ནི་ཀྑ་མྨ, དི་སཾ པུ་ཙྪ་ཏི སི་སྶ་ཀེ [བྲཱ་ཧྨ་ཎོ (སྱཱ.)];
ཡ་མྷི དེ་སེ མ་ཧཱ་ཝཱི་རོ, ཝ་ས་ཏི ལོ་ཀ་ནཱ་ཡ་ཀོ.
༡༥. ‘‘ཏཱ་ཧཾ དི་སཾ ན་མ་སྶི་སྶཾ, ཛི་ནཾ ཨ་པྤ་ཊི་པུ་གྒ་ལཾ;
ཨུ་ད་གྒ་ཙི་ཏྟོ སུ་མ་ནོ, པཱུ་ཛེ་སིཾ ཏཾ ཏ་ཐཱ་ག་ཏཾ.
༡༦. ‘‘ཨེ་ཐ སི་སྶཱ ག་མི་སྶཱ་མ, ད་ཀྑི་སྶཱ་མ ཏ་ཐཱ་ག་ཏཾ;
ཝ་ནྡི་ཏྭཱ ས་ཏྠུ་ནོ པཱ་དེ, སོ་སྶཱ་མ ཛི་ན་སཱ་ས་ནཾ.
༡༧. ‘‘ཨེ་ཀཱ་ཧཾ ཨ་བྷི་ནི་ཀྑ་མྨ, བྱཱ་དྷིཾ པ་ཊི་ལ་བྷིཾ ཨ་ཧཾ;
བྱཱ་དྷི་ནཱ པཱི་ལི༹་ཏོ ས་ནྟོ, སཱ་ལཾ ཝཱ་ས་ཡི་ཏུཾ ག་མིཾ.
༡༨. ‘‘ས་བྦེ སི་སྶེ ས་མཱ་ནེ་ཏྭཱ, ཨ་པུ་ཙྪིཾ ཏེ ཏ་ཐཱ་ག་ཏཾ;
ཀཱི་དི་སཾ ལོ་ཀ་ནཱ་ཐ་སྶ, གུ་ཎཾ པ་ར་མ་བུ་དྡྷི་ནོ.
༡༩. ‘‘ཏེ མེ པུ་ཊྛཱ ཝི་ཡཱ་ཀཾ་སུ, ཡ་ཐཱ ད་སྶཱ་ཝི་ནོ ཏ་ཐཱ;
ས་ཀྐ་ཙྩཾ བུ་དྡྷ་སེ་ཊྛཾ ཏཾ, དེ་སེ་སུཾ [ད་སྶེ་སུཾ (སཱི. སྱཱ.)] མ་མ ས་མྨུ་ཁཱ.
༢༠. ‘‘ཏེ་སཱ་ཧཾ ཝ་ཙ་ནཾ སུ་ཏྭཱ, ས་ཀཾ ཙི་ཏྟཾ པ་སཱ་ད་ཡིཾ;
པུ་པྥེ་ཧི ཐཱུ་པཾ ཀ་ཏྭཱ་ན, ཏ་ཏྠ ཀཱ་ལ་ངྐ་ཏོ ཨ་ཧཾ.
༢༡. ‘‘ཏེ མེ ས་རཱི་རཾ ཛྷཱ་པེ་ཏྭཱ, ཨ་ག་མུཾ བུ་དྡྷ་ས་ནྟི་ཀཾ;
ཨ་ཉྫ་ལིཾ པ་གྒ་ཧེ་ཏྭཱ་ན, ས་ཏྠཱ་ར་མ་བྷི་ཝཱ་ད་ཡུཾ.
༢༢. ‘‘པུ་པྥེ་ཧི ཐཱུ་པཾ ཀ་ཏྭཱ་ན, སུ་ག་ཏ་སྶ མ་ཧེ་སི་ནོ;
ཀ་པྤཱ་ནཾ ས་ཏ་ས་ཧ་སྶཾ, དུ་གྒ་ཏིཾ ནུ་པ་པ་ཛྫ་ཧཾ.
༢༣. ‘‘ཙ་ཏྟཱ་ལཱི་ས་ས་ཧ་སྶ་མྷི, ཀ་པྤེ སོ་ལ༹་ས ཁ་ཏྟི་ཡཱ;
ནཱ་མེ་ན་གྒི་ས་མཱ ནཱ་མ, ཙ་ཀྐ་ཝ་ཏྟཱི མ་ཧ་བྦ་ལཱ.
༢༤. ‘‘ཝཱི་ས་ཀ་པྤ་ས་ཧ་སྶ་མྷི, རཱ་ཛཱ་ནོ ཙ་ཀྐ་ཝ་ཏྟི་ནོ;
གྷ་ཏཱ་ས་ན་ས་ནཱ་མཱ་ཝ, ཨ་ཊྛ་ཏྟིཾ་ས མ་ཧཱི་པ་ཏཱི.
༢༥. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ པུ་པྥ་ཐཱུ་པི་ཡོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
པུ་པྥ་ཐཱུ་པི་ཡ་ཏྠེ་ར་སྶཱ་པ་དཱ་ནཾ དུ་ཏི་ཡཾ.