༩. པ་ཙྩུ་པ་ཊྛཱ་ན་ས་ཉྙ་ཀ་ཏྠེ་ར་ཨ་པ་དཱ་ནཾ

༧༢. ‘‘ཨ་ཏྠ་ད་སྶི་མྷི སུ་ག་ཏེ, ནི་བྦུ་ཏེ ས་མ་ན་ནྟ་རཱ;

ཡ་ཀྑ་ཡོ་ནིཾ ཨུ་པ་པ་ཛྫིཾ, ཡ་སཾ པ་ཏྟོ ཙ་ཧཾ ཏ་དཱ.

༧༣. ‘‘དུ་ལླ་དྡྷཾ ཝ་ཏ མེ ཨཱ་སི, དུ་པྤ་བྷཱ་ཏཾ དུ་རུ་ཊྛི་ཏཾ;

ཡཾ མེ བྷོ་གེ ཝི་ཛྫ་མཱ་ནེ, པ་རི་ནི་བྦཱ་ཡི ཙ་ཀྑུ་མཱ.

༧༤. ‘‘མ་མ ས་ངྐ་པྤ་མ་ཉྙཱ་ཡ, སཱ་ག་རོ ནཱ་མ སཱ་ཝ་ཀོ;

མ་མུ་དྡྷ་རི་ཏུ་ཀཱ་མོ སོ, ཨཱ་ག་ཙྪི མ་མ ས་ནྟི་ཀཾ.

༧༥. ‘‘ཀིཾ ནུ སོ་ཙ་སི མཱ བྷཱ་ཡི, ཙ་ར དྷ་མྨཾ སུ་མེ་དྷ་ས;

ཨ་ནུ་པྤ་དི་ནྣཱ བུ་དྡྷེ་ན, ས་བྦེ་སཾ བཱི་ཛ་ས་མྤ་དཱ.

༧༦. ‘‘སོ ཙེ པཱུ་ཛེ་ཡྻ ས་མྦུ་དྡྷཾ, ཏི་ཊྛ་ནྟཾ ལོ་ཀ་ནཱ་ཡ་ཀཾ;

དྷཱ་ཏུཾ སཱ་ས་པ་མ་ཏྟ་མྤི, ནི་བྦུ་ཏ་སྶཱ་པི པཱུ་ཛ་ཡེ.

༧༧. ‘‘ས་མེ ཙི་ཏྟ་པྤ་སཱ་ད་མྷི, ས་མཾ པུ་ཉྙཾ མ་ཧ་གྒ་ཏཾ;

ཏ་སྨཱ ཐཱུ་པཾ ཀ་རི་ཏྭཱ་ན, པཱུ་ཛེ་ཧི ཛི་ན་དྷཱ་ཏུ་ཡོ.

༧༨. ‘‘སཱ་ག་ར་སྶ ཝ་ཙོ སུ་ཏྭཱ, བུ་དྡྷ་ཐཱུ་པཾ ཨ་ཀཱ་ས་ཧཾ;

པ་ཉྩ་ཝ་སྶེ པ་རི་ཙ་རིཾ, མུ་ནི་ནོ ཐཱུ་པ་མུ་ཏྟ་མཾ.

༧༩. ‘‘ཏེ་ན ཀ་མྨེ་ན དྭི་པ་དི་ནྡ, ལོ་ཀ་ཛེ་ཊྛ ན་རཱ་ས་བྷ;

ས་མྤ་ཏྟིཾ ཨ་ནུ་བྷོ་ཏྭཱ་ན, ཨ་ར་ཧ་ཏྟ་མ་པཱ་པུ་ཎིཾ.

༨༠. ‘‘བྷཱུ་རི་པ་ཉྙཱ ཙ ཙ་ཏྟཱ་རོ, ས་ཏྟ་ཀ་པྤ་ས་ཏེ ཨི་ཏོ;

ས་ཏྟ་ར་ཏ་ན་ས་མྤ་ནྣཱ, ཙ་ཀྐ་ཝ་ཏྟཱི མ་ཧ་བྦ་ལཱ.

༨༡. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.

ཨི་ཏྠཾ སུ་དཾ ཨཱ་ཡ་སྨཱ པ་ཙྩུ་པ་ཊྛཱ་ན་ས་ཉྙ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.

པ་ཙྩུ་པ་ཊྛཱ་ན་ས་ཉྙ་ཀ་ཏྠེ་ར་སྶཱ་པ་དཱ་ནཾ ན་ཝ་མཾ.