༡༠. ཛཱ་ཏི་པཱུ་ཛ་ཀ་ཏྠེ་ར་ཨ་པ་དཱ་ནཾ

༨༢. ‘‘ཛཱ་ཡ་ནྟ་སྶ ཝི་པ་སྶི་སྶ, ཨཱ་ལོ་ཀོ ཝི་པུ་ལོ ཨ་ཧུ;

པ་ཐ་ཝཱི ཙ པ་ཀ་མྤི་ཏྠ, ས་སཱ་ག་རཱ ས་པ་བྦ་ཏཱ.

༨༣. ‘‘ནེ་མི་ཏྟཱ ཙ ཝི་ཡཱ་ཀཾ་སུ, བུ་དྡྷོ ལོ་ཀེ བྷ་ཝི་སྶ་ཏི;

ཨ་གྒོ ཙ ས་བྦ་ས་ཏྟཱ་ནཾ, ཛ་ན་ཏཾ ཨུ་དྡྷ་རི་སྶ་ཏི.

༨༤. ‘‘ནེ་མི་ཏྟཱ་ནཾ སུ་ཎི་ཏྭཱ་ན, ཛཱ་ཏི་པཱུ་ཛ་མ་ཀཱ་ས་ཧཾ;

ཨེ་དི་སཱ པཱུ་ཛ་ནཱ ན་ཏྠི, ཡཱ་དི་སཱ ཛཱ་ཏི་པཱུ་ཛ་ནཱ.

༨༥. ‘‘ས་ངྑ་རི་ཏྭཱ་ན [སཾ་ཧ་རི་ཏྭཱ་ན (སཱི. སྱཱ.), ས་ངྐ་རི་ཏྭཱ་ན (ཀ.)]

ཀུ་ས་ལཾ, ས་ཀཾ ཙི་ཏྟཾ པ་སཱ་ད་ཡིཾ.

ཛཱ་ཏི་པཱུ་ཛཾ ཀ་རི་ཏྭཱ་ན, ཏ་ཏྠ ཀཱ་ལ་ངྐ་ཏོ ཨ་ཧཾ.

༨༦. ‘‘ཡཾ ཡཾ ཡོ་ནུ་པ་པ་ཛྫཱ་མི, དེ་ཝ་ཏྟཾ ཨ་ཐ མཱ་ནུ་སཾ;

ས་བྦེ ས་ཏྟེ ཨ་བྷི་བྷོ་མི, ཛཱ་ཏི་པཱུ་ཛཱ་ཡི་དཾ ཕ་ལཾ.

༨༧. ‘‘དྷཱ་ཏི་ཡོ མཾ ཨུ་པ་ཊྛ་ནྟི, མ་མ ཙི་ཏྟ་ཝ་སཱ་ནུ་གཱ;

ན ཏཱ ས་ཀྐོ་ནྟི ཀོ་པེ་ཏུཾ, ཛཱ་ཏི་པཱུ་ཛཱ་ཡི་དཾ ཕ་ལཾ.

༨༨. ‘‘ཨེ་ཀ་ན་ཝུ་ཏི་ཏོ ཀ་པྤེ, ཡཾ པཱུ་ཛ་མ་ཀ་རིཾ ཏ་དཱ;

དུ་གྒ་ཏིཾ ནཱ་བྷི་ཛཱ་ནཱ་མི, ཛཱ་ཏི་པཱུ་ཛཱ་ཡི་དཾ ཕ་ལཾ.

༨༩. ‘‘སུ་པཱ་རི་ཙ་རི་ཡཱ ནཱ་མ, ཙ་ཏུ་ཏྟིཾ་ས ཛ་ནཱ་དྷི་པཱ;

ཨི་ཏོ ཏ་ཏི་ཡ་ཀ་པྤ་མྷི, ཙ་ཀྐ་ཝ་ཏྟཱི མ་ཧ་བྦ་ལཱ.

༩༠. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.

ཨི་ཏྠཾ སུ་དཾ ཨཱ་ཡ་སྨཱ ཛཱ་ཏི་པཱུ་ཛ་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.

ཛཱ་ཏི་པཱུ་ཛ་ཀ་ཏྠེ་ར་སྶཱ་པ་དཱ་ནཾ ད་ས་མཾ.

མ་ཧཱ་པ་རི་ཝཱ་ར་ཝ་གྒོ དྭཱ་ད་ས་མོ.