༡. མ་ཧཱ་པ་རི་ཝཱ་ར་ཀ་ཏྠེ་ར་ཨ་པ་དཱ་ནཾ
༡. ‘‘ཝི་པ་སྶཱི ནཱ་མ བྷ་ག་ཝཱ, ལོ་ཀ་ཛེ་ཊྛོ ན་རཱ་ས་བྷོ;
ཨ་ཊྛ་ས་ཊྛི་ས་ཧ་སྶེ་ཧི, པཱ་ཝི་སི བ་ནྡྷུ་མཾ ཏ་དཱ.
༢. ‘‘ན་ག་རཱ ཨ་བྷི་ནི་ཀྑ་མྨ, ཨ་ག་མཾ དཱི་པ་ཙེ་ཏི་ཡཾ;
ཨ་དྡ་སཾ ཝི་ར་ཛཾ བུ་དྡྷཾ, ཨཱ་ཧུ་ཏཱི་ནཾ པ་ཊི་གྒ་ཧཾ.
༣. ‘‘ཙུ་ལླཱ་སཱི་ཏི་ས་ཧ་སྶཱ་ནི, ཡ་ཀྑཱ མ་ཡ྄ཧཾ ཨུ་པ་ནྟི་ཀེ;
ཨུ་པ་ཊྛ་ཧ་ནྟི ས་ཀྐ་ཙྩཾ [མཾ ནི་ཙྩཾ (ཀ.)], ཨི་ནྡཾ་ཝ ཏི་ད་སཱ ག་ཎཱ.
༤. ‘‘བྷ་ཝ་ནཱ ཨ་བྷི་ནི་ཀྑ་མྨ, དུ་སྶཾ པ་གྒ་ཡ྄ཧ་ཧཾ ཏ་དཱ;
སི་ར་སཱ ཨ་བྷི་ཝཱ་དེ་སིཾ, ཏ་ཉྩཱ་དཱ་སིཾ མ་ཧེ་སི་ནོ.
༥. ‘‘ཨ་ཧོ བུ་དྡྷོ ཨ་ཧོ དྷ་མྨོ, ཨ་ཧོ ནོ ས་ཏྠུ ས་མྤ་དཱ;
བུ་དྡྷ་སྶ ཨཱ་ནུ་བྷཱ་ཝེ་ན, ཝ་སུ་དྷཱ་ཡཾ པ་ཀ་མྤ་ཐ.
༦. ‘‘ཏ་ཉྩ ཨ་ཙྪ་རི་ཡཾ དི་སྭཱ, ཨ་བྦྷུ་ཏཾ ལོ་མ་ཧཾ་ས་ནཾ;
བུ་དྡྷེ ཙི་ཏྟཾ པ་སཱ་དེ་མི, དྭི་པ་དི་ནྡ་མྷི ཏཱ་དི་ནེ.
༧. ‘‘སོ་ཧཾ ཙི་ཏྟཾ པ་སཱ་དེ་ཏྭཱ, དུ་སྶཾ ད་ཏྭཱ་ན ས་ཏྠུ་ནོ;
ས་ར་ཎ་ཉྩ ཨུ་པཱ་ག་ཙྪིཾ, སཱ་མ་ཙྩོ ས་པ་རི་ཛྫ་ནོ.
༨. ‘‘ཨེ་ཀ་ན་ཝུ་ཏི་ཏོ ཀ་པྤེ, ཡཾ ཀ་མྨ་མ་ཀ་རིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, བུ་དྡྷ་པཱུ་ཛཱ་ཡི་དཾ ཕ་ལཾ.
༩. ‘‘ཨི་ཏོ པ་ནྣ་ར་སེ ཀ་པྤེ, སོ་ལ༹་སཱ་སུཾ སུ་ཝཱ་ཧ་ནཱ [སོ་ལ༹་སཱ་སིཾ་སུ ཝཱ་ཧ་ནོ (སྱཱ.)];
ས་ཏྟ་ར་ཏ་ན་ས་མྤ་ནྣཱ, ཙ་ཀྐ་ཝ་ཏྟཱི མ་ཧ་བྦ་ལཱ.
༡༠. ‘‘པ་ཊི་ས་མྦྷི་དཱ ཙ་ཏ་སྶོ, ཝི་མོ་ཀྑཱ་པི ཙ ཨ་ཊྛི་མེ;
ཚ་ལ༹་བྷི་ཉྙཱ ས་ཙྪི་ཀ་ཏཱ, ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨཱ་ཡ་སྨཱ མ་ཧཱ་པ་རི་ཝཱ་ར་ཀོ ཐེ་རོ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
མ་ཧཱ་པ་རི་ཝཱ་ར་ཀ་ཏྠེ་ར་སྶཱ་པ་དཱ་ནཾ པ་ཋ་མཾ.