༥. ས་མཱ་དྷི་སུ་ཏྟ་ཝ་ཎྞ་ནཱ

༥. པ་ཉྩ་མེ ས་མཱ་དྷིནྟི ཨི་དཾ བྷ་ག་ཝཱ ཏེ བྷི་ཀྑཱུ ཙི་ཏྟེ་ཀ་གྒ་ཏཱ་ཡ པ་རི་ཧཱ་ཡ་ནྟེ དི་སྭཱ, ‘‘ཙི་ཏྟེ་ཀ་གྒ་ཏཾ ལ་བྷ་ནྟཱ་ནཾ ཨི་མེ་སཾ ཀ་མྨ་ཊྛཱ་ནཾ ཕཱ་ཏིཾ ག་མི་སྶ་ཏཱི’’ཏི ཉ་ཏྭཱ ཨཱ་ཧ. ཨ་བྷི་ན་ནྡ་ཏཱིཏི པ་ཏྠེ་ཏི. ཨ་བྷི་ཝ་ད་ཏཱིཏི ཏཱ་ཡ ཨ་བྷི་ན་ནྡ་ནཱ་ཡ ‘‘ཨ་ཧོ པི་ཡཾ ཨི་ཊྛཾ ཀ་ནྟཾ མ་ནཱ་པ’’ནྟི ཝ་ད་ཏི. ཝཱ་ཙཾ ཨ་བྷི་ན་ནྡ་ནྟོ་པི ཙ ཏཾ ཨཱ་ར་མྨ་ཎཾ ནི་སྶཱ་ཡ ཨེ་ཝཾ ལོ་བྷཾ ཨུ་པྤཱ་དེ་ནྟོ ཨ་བྷི་ཝ་ད་ཏི་ཡེ་ཝ ནཱ་མ. ཨ་ཛ྄ཛྷོ་སཱ་ཡ ཏི་ཊྛ་ཏཱིཏི གི་ལི་ཏྭཱ པ་རི་ནི་ཊྛ་པེ་ཏྭཱ ག་ཎྷཱ་ཏི. ཡཱ རཱུ་པེ ན་ནྡཱིཏི ཡཱ སཱ རཱུ་པེ བ་ལ་ཝ་པ་ཏྠ་ནཱ་ས་ངྑཱ་ཏཱ ན་ནྡཱི. ཏ་དུ་པཱ་དཱ་ནནྟི ཏཾ ག་ཧ་ཎ་ཊྛེ་ན ཨུ་པཱ་དཱ་ནཾ. ནཱ་བྷི་ན་ནྡ་ཏཱིཏི ན པ་ཏྠེ་ཏི. ནཱ་བྷི་ཝ་ད་ཏཱིཏི པ་ཏྠ་ནཱ་ཝ་སེ་ན ན ‘‘ཨི་ཊྛཾ ཀ་ནྟ’’ནྟི ཝ་ད་ཏི. ཝི་པ་སྶ་ནཱ་ཙི་ཏྟེ་ན ཙེ་ཏ་སཱ ‘‘ཨ་ནི་ཙྩཾ དུ་ཀྑ’’ནྟི ཝ་ཙཱི་བྷེ་དཾ ཀ་རོ་ནྟོ་པི ནཱ་བྷི་ཝ་ད་ཏི་ཡེ་ཝ. པ་ཉྩ་མཾ.