༡༠. ས་ཛ྄ཛྷཱ་ཡ་སུ་ཏྟ་ཝ་ཎྞ་ནཱ

༢༣༠. ད་ས་མེ ཡཾ སུ་དནྟི ནི་པཱ་ཏ་མ་ཏྟཾ. ས་ཛ྄ཛྷཱ་ཡ་བ་ཧུ་ལོཏི ནི་སྶ་ར་ཎ་པ་རི་ཡ་ཏྟི་ཝ་སེ་ན ས་ཛ྄ཛྷཱ་ཡ་ན་ཏོ བ་ཧུ་ཏ་རཾ ཀཱ་ལཾ ས་ཛ྄ཛྷཱ་ཡ་ནྟོ. སོ ཀི་ར ཨཱ་ཙ་རི་ཡ་སྶ དི་ཝཱ་ཊྛཱ་ནཾ ས་མྨ་ཛྫི་ཏྭཱ ཨཱ་ཙ་རི་ཡཾ ཨུ་དི་ཀྑ་ནྟོ ཏི་ཊྛ་ཏི. ཨ་ཐ ནཾ ཨཱ་ག་ཙྪ་ནྟཾ དི་སྭཱ་ཝ པ་ཙྩུ་གྒ་ནྟྭཱ པ་ཏྟ་ཙཱི་ཝ་རཾ པ་ཊི་གྒ་ཧེ་ཏྭཱ པ་ཉྙ་ཏྟཱ་ས་ནེ ནི་སི་ནྣ་སྶ ཏཱ་ལ་ཝ་ཎྚ་ཝཱ་ཏཾ ད་ཏྭཱ པཱ་ནཱི་ཡཾ ཨཱ་པུ་ཙྪི་ཏྭཱ པཱ་དེ དྷོ་ཝི་ཏྭཱ ཏེ་ལཾ མ་ཀྑེ་ཏྭཱ ཝ་ནྡི་ཏྭཱ ཋི་ཏོ ཨུ་དྡེ་སཾ ག་ཧེ་ཏྭཱ ཡཱ་ཝ སཱུ་རི་ཡ་ཏྠ་ངྒ་མཱ ས་ཛ྄ཛྷཱ་ཡཾ ཀ་རོ་ཏི. སོ ནྷཱ་ན་ཀོ་ཊྛ་ཀེ ཨུ་ད་ཀཾ ཨུ་པ་ཊྛ་པེ་ཏྭཱ ཨ་ངྒཱ་ར་ཀ་པ་ལླེ ཨ་གྒིཾ ཀ་རོ་ཏི. ཨཱ་ཙ་རི་ཡ་སྶ ནྷ་ཏྭཱ ཨཱ་ག་ཏ་སྶ པཱ་དེ་སུ ཨུ་ད་ཀཾ པུ་ཉྪི་ཏྭཱ པི་ཊྛི་པ་རི་ཀ་མྨཾ ཀ་ཏྭཱ ཝ་ནྡི་ཏྭཱ ཨུ་དྡེ་སཾ ག་ཧེ་ཏྭཱ པ་ཋ་མ་ཡཱ་མེ ས་ཛ྄ཛྷཱ་ཡཾ ཀ་ཏྭཱ མ་ཛ྄ཛྷི་མ་ཡཱ་མེ ས་རཱི་རཾ ས་མ་སྶཱ་སེ་ཏྭཱ པ་ཙྪི་མ་ཡཱ་མེ ཨུ་དྡེ་སཾ ག་ཧེ་ཏྭཱ ཡཱ་ཝ ཨ་རུ་ཎུ་གྒ་མ་ནཱ ས་ཛ྄ཛྷཱ་ཡཾ ཀ་ཏྭཱ ནི་རུ་དྡྷ་ས་དྡཾ ཁ་ཡ་ཏོ ས་མྨ་ས་ཏི. ཏ་ཏོ སེ་སཾ ཨུ་པཱ་དཱ་ཡ་རཱུ་པཾ བྷཱུ་ཏ་རཱུ་པཾ ནཱ་མ་རཱུ་པ་ནྟི པ་ཉྩ་སུ ཁ་ནྡྷེ་སུ ཝི་པ་སྶ་ནཾ ཝ་ཌྜྷེ་ཏྭཱ ཨ་ར་ཧ་ཏྟཾ པཱ་པུ་ཎི. ཨ་པྤོ་སྶུ་ཀྐོཏི ཨུ་དྡེ་ས་གྒ་ཧ་ཎེ ཙ ས་ཛ྄ཛྷཱ་ཡ་ཀ་ར་ཎཱི་ཡེ ཙ ནི་རུ་སྶུ་ཀྐོ. ས་ངྐ་སཱ་ཡ་ཏཱིཏི ཡ་སྶ དཱ་ནི ཨ་ཏྠཱ་ཡ ཨ་ཧཾ ས་ཛ྄ཛྷཱ་ཡཾ ཀ་རེ་ཡྻཾ, སོ མེ ཨ་ཏྠོ མ་ཏྠ་ཀཾ པ་ཏྟོ. ཀིཾ མེ ཨི་དཱ་ནི ས་ཛ྄ཛྷཱ་ཡེ་ནཱ་ཏི ཕ་ལ་ས་མཱ་པ་ཏྟི་སུ་ཁེ་ན ཀཱ་ལཾ ཨ་ཏི་ཝ་ཏྟེ་ཏི. ཨ་ཛ྄ཛྷ་བྷཱ་སཱིཏི, ‘‘ཀིཾ ནུ ཁོ ཨ་སྶ ཐེ་ར་སྶ ཨ་ཕཱ་སུ་ཀཾ ཛཱ་ཏཾ, ཨུ་དཱ་ཧུ་སྶ ཨཱ་ཙ་རི་ཡ་སྶ? ཀེ་ན ནུ ཁོ ཀཱ་ར་ཎེ་ན པུ་བྦེ ཝི་ཡ མ་དྷུ་ར་སྶ་རེ་ན ན ས་ཛ྄ཛྷཱ་ཡ་ཏཱི’’ཏི? ཨཱ་ག་ནྟྭཱ ས་ནྟི་ཀེ ཋི་ཏཱ ཨ་བྷཱ་སི.

དྷ་མྨ་པ་དཱ་ནཱིཏི ཨི་དྷ ས་བྦ་མྤི བུ་དྡྷ་ཝ་ཙ་ནཾ ཨ་དྷི་པྤེ་ཏཾ. ནཱ་དྷཱི་ཡ་སཱིཏི ན ས་ཛ྄ཛྷཱ་ཡ་སི. ནཱ་དི་ཡ་སཱི་ཏི ཝཱ པཱ་ཋོ, ན ག་ཎྷཱ་སཱི་ཏི ཨ་ཏྠོ. པ་སཾ་སནྟི དྷ་མྨ་བྷཱ་ཎ་ཀོ པ་སཾ་སཾ ལ་བྷ་ཏི, ཨཱ་བྷི་དྷ་མྨི་ཀོ སུ་ཏྟ་ནྟི་ཀོ ཝི་ན་ཡ་དྷ་རོ་ཏི་སྶ པ་སཾ་སི་ཏཱ བྷ་ཝ་ནྟི. ཝི་རཱ་གེ་ནཱཏི ཨ་རི་ཡ་མ་གྒེ་ན. ཨ་ཉྙཱ་ཡཱཏི ཛཱ་ནི་ཏྭཱ. ནི་ཀྑེ་པ་ནནྟི ཏ་སྶ དི་ཊྛ་སུ་ཏཱ་དི་ནོ ཝི་སྶ་ཛྫ་ནཾ ས་ནྟོ ཝ་ད་ནྟཱི་ཏི དཱི་པེ་ཏི, ན བུ་དྡྷ་ཝ་ཙ་ན་སྶ. ཨེ་ཏྟཱ་ཝ་ཏཱ ‘‘ཐེ་རོ བུ་དྡྷ་ཝ་ཙ་ནཾ ན ཝི་སྶ་ཛྫཱ་པེ་ཏཱི’’ཏི ན ནི་ཙྩ་ཀཱ་ལཾ ས་ཛ྄ཛྷཱ་ཡ་ནྟེ་ནེ་ཝ བྷ་ཝི་ཏ་བྦཾ, ས་ཛ྄ཛྷཱ་ཡི་ཏྭཱ པ་ན – ‘‘ཨེ་ཏྟ་ཀ་སྶཱ་ཧཾ ཨ་ཏྠ་སྶ ཝཱ དྷ་མྨ་སྶ ཝཱ ཨཱ་དྷཱ་རོ བྷ་ཝི་ཏུཾ ས་མ་ཏྠོ’’ཏི ཉ་ཏྭཱ ཝ་ཊྚ་དུ་ཀྑ་སྶ ཨ་ནྟ་ཀི་རི་ཡཱ་ཡ པ་ཊི་པ་ཛྫི་ཏ་བྦཾ. ད་ས་མཾ.