༨. སུ་ད་ཏྟ་སུ་ཏྟ་ཝ་ཎྞ་ནཱ
༢༤༢. ཨ་ཊྛ་མེ ཀེ་ན་ཙི་དེ་ཝ ཀ་ར་ཎཱི་ཡེ་ནཱཏི ཝཱ་ཎི་ཛྫ་ཀ་མྨཾ ཨ་དྷི་པྤེ་ཏཾ. ཨ་ནཱ་ཐ་པི་ཎྜི་ཀོ ཙ རཱ་ཛ་ག་ཧ་སེ་ཊྛི ཙ ཨ་ཉྙ་མ་ཉྙཾ བྷ་གི་ནི་པ་ཏི་ཀཱ ཧོ་ནྟི. ཡ་དཱ རཱ་ཛ་ག་ཧེ ཨུ་ཊྛཱ་ན་ཀ་བྷ་ཎྜ་ཀཾ མ་ཧ་གྒྷཾ ཧོ་ཏི, ཏ་དཱ རཱ་ཛ་ག་ཧ་སེ་ཊྛི ཏཾ ག་ཧེ་ཏྭཱ པ་ཉྩ་ས་ཀ་ཊ་ས་ཏེ་ཧི སཱ་ཝ་ཏྠིཾ ག་ནྟྭཱ ཡོ་ཛ་ན་མ་ཏྟེ ཋི་ཏོ ཨ་ཏྟ་ནོ ཨཱ་ག་ཏ་བྷཱ་ཝཾ ཛཱ་ནཱ་པེ་ཏི. ཨ་ནཱ་ཐ་པི་ཎྜི་ཀོ པ་ཙྩུ་གྒ་ནྟྭཱ ཏ་སྶ མ་ཧཱ་ས་ཀྐཱ་རཾ ཀ་ཏྭཱ ཨེ་ཀ་ཡཱ་ནཾ ཨཱ་རོ་པེ་ཏྭཱ སཱ་ཝ་ཏྠིཾ པ་ཝི་ས་ཏི. སོ ས་ཙེ བྷ་ཎྜཾ ལ་ཧུ་ཀཾ ཝི་ཀྐཱི་ཡ་ཏི, ཝི་ཀྐི་ཎཱ་ཏི. ནོ ཙེ, བྷ་གི་ནི་གྷ་རེ ཋ་པེ་ཏྭཱ པ་ཀྐ་མ་ཏི. ཨ་ནཱ་ཐ་པི་ཎྜི་ཀོ་པི ཏ་ཐེ་ཝ ཀ་རོ་ཏི. སྭཱ་ཡཾ ཏ་དཱ་པི ཏེ་ནེ་ཝ ཀ་ར་ཎཱི་ཡེ་ན ཨ་ག་མཱ་སི. ཏཾ ས་ནྡྷཱ་ཡེ་ཏཾ ཝུ་ཏྟཾ.
ཏཾ དི་ཝ་སཾ པ་ན རཱ་ཛ་ག་ཧ་སེ་ཊྛི ཡོ་ཛ་ན་མ་ཏྟེ ཋི་ཏེ་ན ཨ་ནཱ་ཐ་པི་ཎྜི་ཀེ་ན ཨཱ་ག་ཏ་བྷཱ་ཝ་ཛཱ་ན་ན་ཏྠཾ པེ་སི་ཏཾ པ་ཎྞཾ ན སུ་ཎི, དྷ་མྨ་སྶ་ཝ་ན་ཏྠཱ་ཡ ཝི་ཧཱ་རཾ ཨ་ག་མཱ་སི. སོ དྷ་མྨ་ཀ་ཐཾ སུ་ཏྭཱ སྭཱ་ཏ་ནཱ་ཡ བུ་དྡྷ་པྤ་མུ་ཁཾ བྷི་ཀྑུ་ས་ངྒྷཾ ནི་མ་ནྟེ་ཏྭཱ ཨ་ཏྟ་ནོ གྷ་རེ ཨུ་དྡྷ་ན་ཁ་ཎཱ་པ་ན་དཱ་རུ་ཕཱ་ལ་ནཱ་དཱི་ནི ཀཱ་རེ་སི. ཨ་ནཱ་ཐ་པི་ཎྜི་ཀོ་པི ‘‘ཨི་དཱ་ནི མ་ཡ྄ཧཾ པ་ཙྩུ་གྒ་མ་ནཾ ཀ་རི་སྶ་ཏི, ཨི་དཱ་ནི ཀ་རི་སྶ་ཏཱི’’ཏི གྷ་ར་དྭཱ་རེ་པི པ་ཙྩུ་གྒ་མ་ནཾ ཨ་ལ་བྷི་ཏྭཱ ཨ་ནྟོ་གྷ་རཾ པ་ཝི་ཊྛོ པ་ཊི་ས་ནྠཱ་ར་མྤི ན བ་ཧུཾ ཨ་ལ་ཏྠ. ‘‘ཀིཾ, མ་ཧཱ་སེ་ཊྛི, ཀུ་ས་ལཾ དཱ་ར་ཀ་རཱུ་པཱ་ནཾ? ན་སི མ་གྒེ ཀི་ལ་ནྟོ’’ཏི? ཨེ་ཏྟ་ཀོ་ཝ པ་ཊི་ས་ནྠཱ་རོ ཨ་ཧོ་སི. སོ ཏ་སྶ མ་ཧཱ་བྱཱ་པཱ་རཾ དི་སྭཱ, ‘‘ཀིཾ ནུ ཏེ, ག་ཧ་པ་ཏི, ཨཱ་ཝཱ་ཧོ ཝཱ བྷ་ཝི་སྶ་ཏཱི’’ཏི? ཁ་ནྡྷ་ཀེ (ཙཱུ་ལ༹་ཝ. ༣༠༤) ཨཱ་ག་ཏ་ན་ཡེ་ནེ་ཝ ཀ་ཐཾ པ་ཝ་ཏྟེ་ཏྭཱ ཏ་སྶ མུ་ཁ་ཏོ བུ་དྡྷ་ས་དྡཾ སུ་ཏྭཱ པ་ཉྩ་ཝ་ཎྞཾ པཱི་ཏིཾ པ་ཊི་ལ་བྷི. སཱ ཏ་སྶ སཱི་སེ་ན ཨུ་ཊྛཱ་ཡ ཡཱ་ཝ པཱ་ད་པི་ཊྛི་ཡཱ, པཱ་ད་པི་ཊྛི་ཡཱ ཨུ་ཊྛཱ་ཡ ཡཱ་ཝ སཱི་སཱ ག་ཙྪ་ཏི, ཨུ་བྷ་ཏོ ཨུ་ཊྛཱ་ཡ མ་ཛ྄ཛྷེ ཨོ་ས་ར་ཏི, མ་ཛ྄ཛྷེ ཨུ་ཊྛཱ་ཡ ཨུ་བྷ་ཏོ ག་ཙྪ་ཏི. སོ པཱི་ཏི་ཡཱ ནི་ར་ནྟ་རཾ ཕུ་ཊྛོ, ‘‘བུ་དྡྷོ་ཏི ཏྭཾ, ག་ཧ་པ་ཏི, ཝ་དེ་སི? བུ་དྡྷོ ཏཱ་ཧཾ, ག་ཧ་པ་ཏི, ཝ་དཱ་མཱི’’ཏི ཨེ་ཝཾ ཏི་ཀྑ་ཏྟུཾ པུ་ཙྪི་ཏྭཱ, ‘‘གྷོ་སོ་པི ཁོ ཨེ་སོ དུ་ལླ་བྷོ ལོ་ཀ་སྨིཾ ཡ་དི་དཾ བུ་དྡྷོ’’ཏི ཨཱ་ཧ. ཨི་དཾ ས་ནྡྷཱ་ཡ ཝུ་ཏྟཾ ‘‘ཨ་སྶོ་སི ཁོ ཨ་ནཱ་ཐ་པི་ཎྜི་ཀོ, ག་ཧ་པ་ཏི, བུ་དྡྷོ ཀི་ར ལོ་ཀེ ཨུ་པྤ་ནྣོ’’ཏི.
ཨེ་ཏ་ད་ཧོ་སི ཨ་ཀཱ་ལོ ཁོ ཨ་ཛྫཱཏི སོ ཀི་ར ཏཾ སེ་ཊྛིཾ པུ་ཙྪི, ‘‘ཀུ་ཧིཾ ག་ཧ་པ་ཏི ས་ཏྠཱ ཝི་ཧ་ར་ཏཱི’’ཏི? ཨ་ཐ་སྶ སོ – ‘‘བུ་དྡྷཱ ནཱ་མ དུ་རཱ་ས་དཱ ཨཱ་སཱི་ཝི་ས་ས་དི་སཱ ཧོ་ནྟི, ས་ཏྠཱ སི་ཝ་ཐི་ཀཱ་ཡ ཝ་ས་ཏི, ན ས་ཀྐཱ ཏ་ཏྠ ཏུ་མྷཱ་དི་སེ་ཧི ཨི་མཱ་ཡ ཝེ་ལཱ་ཡ ག་ནྟུ’’ནྟི ཨཱ་ཙི་ཀྑི. ཨ་ཐ་སྶ ཨེ་ཏ་ད་ཧོ་སི. བུ་དྡྷ་ག་ཏཱ་ཡ ས་ཏི་ཡཱ ནི་པ་ཛྫཱིཏི ཏཾ་དི་ཝ་སཾ ཀི་ར་སྶ བྷ་ཎྜ་ས་ཀ་ཊེ་སུ ཝཱ ཨུ་པ་ཊྛཱ་ཀེ་སུ ཝཱ ཙི་ཏྟ་མྤི ན ཨུ་པྤ་ཛྫི, སཱ་ཡ་མཱ་ས་མྤི ན ཨ་ཀཱ་སི, ས་ཏྟ་བྷཱུ་མི་ཀཾ པ་ན པཱ་སཱ་དཾ ཨཱ་རུ་ཡ྄ཧ སུ་པ་ཉྙ་ཏྟཱ་ལ་ངྐ་ཏ་ཝ་ར་ས་ཡ་ནེ ‘‘བུ་དྡྷོ བུ་དྡྷོ’’ཏི ས་ཛ྄ཛྷཱ་ཡཾ ཀ་རོ་ནྟོ་ཝ ནི་པ་ཛྫི་ཏྭཱ ནི་དྡཾ ཨོ་ཀྐ་མི. ཏེ་ན ཝུ་ཏྟཾ ‘‘བུ་དྡྷ་ག་ཏཱ་ཡ ས་ཏི་ཡཱ ནི་པ་ཛྫཱི’’ཏི.
ར་ཏྟི་ཡཱ སུ་དཾ ཏི་ཀྑ་ཏྟུཾ ཨུ་ཊྛཱ་སི པ་བྷཱ་ཏ་ནྟི མ་ཉྙ་མཱ་ནོཏི པ་ཋ་མ་ཡཱ་མེ ཏཱ་ཝ ཝཱི་ཏི་ཝ་ཏྟེ ཨུ་ཊྛཱ་ཡ བུ་དྡྷཾ ཨ་ནུ་སྶ་རི, ཨ་ཐ་སྶ བ་ལ་ཝ་པྤ་སཱ་དོ ཨུ་ད་པཱ་དི, པཱི་ཏི་ཨཱ་ལོ་ཀོ ཨ་ཧོ་སི, ས་བྦ་ཏ་མཾ ཝི་ག་ཙྪི, དཱི་པ་ས་ཧ་སྶུ་ཛྫ་ལཾ ཝི་ཡ ཙ་ནྡུ་ཊྛཱ་ནཾ སཱུ་རི་ཡུ་ཊྛཱ་ནཾ ཝི་ཡ ཙ ཛཱ་ཏཾ. སོ ‘‘པ་པཱ་དཾ ཨཱ་པ་ནྣོ ཝ་ཏ་མྷི, སཱུ་རི་ཡོ ཨུ་གྒ་ཏོ’’ཏི ཨུ་ཊྛཱ་ཡ ཨཱ་ཀཱ་ས་ཏ་ལེ ཋི་ཏཾ ཙ་ནྡཾ ཨུ་ལློ་ཀེ་ཏྭཱ ‘‘ཨེ་ཀོ་ཝ ཡཱ་མོ ག་ཏོ, ཨ་ཉྙེ དྭེ ཨ་ཏྠཱི’’ཏི པུ་ན པ་ཝི་སི་ཏྭཱ ནི་པ་ཛྫི. ཨེ་ཏེ་ནུ་པཱ་ཡེ་ན མ་ཛ྄ཛྷི་མ་ཡཱ་མཱ་ཝ་སཱ་ནེ་པི པ་ཙྪི་མ་ཡཱ་མཱ་ཝ་སཱ་ནེ་པཱི་ཏི ཏི་ཀྑ་ཏྟུཾ ཨུ་ཊྛཱ་སི. པ་ཙྪི་མ་ཡཱ་མཱ་ཝ་སཱ་ནེ པ་ན བ་ལ་ཝ་པ་ཙྩཱུ་སེ་ཡེ་ཝ ཨུ་ཊྛཱ་ཡ ཨཱ་ཀཱ་ས་ཏ་ལཾ ཨཱ་ག་ནྟྭཱ མ་ཧཱ་དྭཱ་རཱ་བྷི་མུ་ཁོ་ཝ ཨ་ཧོ་སི, ས་ཏྟ་བྷཱུ་མི་ཀ་དྭཱ་རཾ ས་ཡ་མེ་ཝ ཝི་ཝ་ཊཾ ཨ་ཧོ་སི. སོ པཱ་སཱ་དཱ ཨོ་རུ་ཡ྄ཧ ཨ་ནྟ་ར་ཝཱི་ཐིཾ པ་ཊི་པ་ཛྫི.
ཝི་ཝ་རིཾ་སཱུཏི ‘‘ཨ་ཡཾ མ་ཧཱ་སེ་ཊྛི ‘བུ་དྡྷུ་པ་ཊྛཱ་ནཾ ག་མི་སྶཱ་མཱི’ཏི ནི་ཀྑ་ནྟོ, པ་ཋ་མ་ད་སྶ་ནེ་ནེ་ཝ སོ་ཏཱ་པ་ཏྟི་ཕ་ལེ པ་ཏི་ཊྛཱ་ཡ ཏི་ཎྞཾ ར་ཏ་ནཱ་ནཾ ཨ་གྒུ་པ་ཊྛཱ་ཀོ ཧུ་ཏྭཱ ཨ་ས་དི་སཾ ས་ངྒྷཱ་རཱ་མཾ ཀ་ཏྭཱ ཙཱ་ཏུ་དྡི་ས་སྶ ཨ་རི་ཡ་ག་ཎ་སྶ ཨ་ནཱ་ཝ་ཊ་དྭཱ་རོ བྷ་ཝི་སྶ་ཏི, ན ཡུ་ཏྟ་མ་སྶ དྭཱ་རཾ པི་ད་ཧི་ཏུ’’ནྟི ཙི་ནྟེ་ཏྭཱ ཝི་ཝ་རིཾ་སུ. ཨ་ནྟ་ར་དྷཱ་ཡཱིཏི རཱ་ཛ་ག་ཧཾ ཀི་ར ཨཱ་ཀི་ཎྞ་མ་ནུ་སྶཾ ཨ་ནྟོ་ན་ག་རེ ན་ཝ ཀོ་ཊི་ཡོ, བ་ཧི་ན་ག་རེ ན་ཝཱ་ཏི ཏཾ ཨུ་པ་ནི་སྶཱ་ཡ ཨ་ཊྛཱ་ར་ས མ་ནུ་སྶ་ཀོ་ཊི་ཡོ ཝ་ས་ནྟི. ཨ་ཝེ་ལཱ་ཡ མ་ཏ་མ་ནུ་སྶེ བ་ཧི ནཱི་ཧ་རི་ཏུཾ ཨ་ས་ཀྐོ་ནྟཱ ཨ་ཊྚཱ་ལ་ཀེ ཋ་ཏྭཱ བ་ཧི་དྭཱ་རེ ཁི་པ་ནྟི. མ་ཧཱ་སེ་ཊྛི ན་ག་ར་ཏོ བ་ཧི་ནི་ཀྑ་ནྟ་མ་ཏྟོ་ཝ ཨ་ལླ་ས་རཱི་རཾ པཱ་དེ་ན ཨ་ཀྐ་མི, ཨ་པ་ར་མྤི པི་ཊྛི་པཱ་དེ་ན པ་ཧ་རི. མ་ཀྑི་ཀཱ ཨུ་པྤ་ཏི་ཏྭཱ པ་རི་ཀི་རིཾ་སུ. དུ་གྒ་ནྡྷོ ནཱ་ས་པུ་ཊཾ ཨ་བྷི་ཧ་ནི. བུ་དྡྷ་པྤ་སཱ་དོ ཏ་ནུ་ཏྟཾ ག་ཏོ. ཏེ་ན་སྶ ཨཱ་ལོ་ཀོ ཨ་ནྟ་ར་དྷཱ་ཡི, ཨ་ནྡྷ་ཀཱ་རོ པཱ་ཏུ་ར་ཧོ་སི. ས་དྡ་མ་ནུ་སྶཱ་ཝེ་སཱིཏི ‘‘སེ་ཊྛི་སྶ ཨུ་སྶཱ་ཧཾ ཛ་ནེ་སྶཱ་མཱི’’ཏི སུ་ཝ་ཎྞ་ཀི་ངྐི་ཎི་ཀཾ གྷ་ཊྚེ་ནྟོ ཝི་ཡ མ་དྷུ་ར་སྶ་རེ་ན ས་དྡཾ ཨ་ནུ་སྶཱ་ཝེ་སི.
ས་ཏཾ ཀ་ཉྙཱ་ས་ཧ་སྶཱ་ནཱིཏི པུ་རི་མ་པ་དཱ་ནི་པི ཨི་མི་ནཱ་ཝ ས་ཧ་སྶ་པ་དེ་ན ས་དྡྷིཾ ས་མྦ་ནྡྷ་ནཱི་ཡཱ་ནི. ཡ་ཐེ་ཝ ཧི ས་ཏཾ ཀ་ཉྙཱ་ས་ཧ་སྶཱ་ནི, ས་ཏཾ ས་ཧ་སྶཱ་ནི ཧ་ཏྠཱི, ས་ཏཾ ས་ཧ་སྶཱ་ནི ཨ་སྶཱ, ས་ཏཾ ས་ཧ་སྶཱ་ནི ར་ཐཱ་ཏི ཨ་ཡ་མེ་ཏྠ ཨ་ཏྠོ. ཨི་ཏི ཨེ་ཀེ་ཀ་ས་ཏ་ས་ཧ་སྶ་མེ་ཝ དཱི་པི་ཏཾ. པ་ད་ཝཱི་ཏི་ཧཱ་ར་སྶཱཏི པ་ད་ཝཱི་ཏི་ཧཱ་རོ ནཱ་མ ས་མ་ག་མ་ནེ དྭི་ནྣཾ པ་དཱ་ནཾ ཨ་ནྟ་རེ མུ་ཊྛི་ར་ཏ་ན་མ་ཏྟཾ. ཀ་ལཾ ནཱ་གྒྷ་ནྟི སོ་ལ༹་སིནྟི ཏཾ ཨེ་ཀཾ པ་ད་ཝཱི་ཏི་ཧཱ་རཾ སོ་ལ༹་ས་བྷཱ་གེ ཀ་ཏྭཱ ཏ་ཏོ ཨེ་ཀོ ཀོ་ཊྛཱ་སོ པུ་ན སོ་ལ༹་ས་དྷཱ, ཏ་ཏོ ཨེ་ཀོ སོ་ལ༹་ས་དྷཱ་ཏི ཨེ་ཝཾ སོ་ལ༹་ས ཝཱ་རེ སོ་ལ༹་ས་དྷཱ བྷི་ནྣ་སྶ ཨེ་ཀོ ཀོ་ཊྛཱ་སོ སོ་ལ༹་སི་ཀ་ལཱ ནཱ་མ, ཏཾ སོ་ལ༹་སི་ཀ་ལཾ ཨེ་ཏཱ་ནི ཙ་ཏྟཱ་རི ས་ཏ་ས་ཧ་སྶཱ་ནི ན ཨ་གྒྷ་ནྟི. ཨི་དཾ ཝུ་ཏྟཾ ཧོ་ཏི – ས་ཏཾ ཧ་ཏྠི་ས་ཧ་སྶཱ་ནི ས་ཏཾ ཨ་སྶ་ས་ཧ་སྶཱ་ནི ས་ཏཾ ར་ཐ་ས་ཧ་སྶཱ་ནི ས་ཏཾ ཀ་ཉྙཱ་ས་ཧ་སྶཱ་ནི, ཏཱ ཙ ཁོ ཨཱ་མུ་ཀྐ་མ་ཎི་ཀུ་ཎྜ་ལཱ ས་ཀ་ལ་ཛ་མྦུ་དཱི་པ་རཱ་ཛ་དྷཱི་ཏ་རོ ཝཱ་ཏི ཨི་མ་སྨཱ ཨེ་ཏྟ་ཀཱ ལཱ་བྷཱ ཝི་ཧཱ་རཾ ག་ཙྪ་ནྟ་སྶ ཏ་སྨིཾ སོ་ལ༹་སི་ཀ་ལ་ས་ངྑཱ་ཏེ པ་དེ་སེ པ་ཝ་ཏྟ་ཙེ་ཏ་ནཱ་ཝ ཨུ་ཏྟ་རི་ཏ་རཱ་ཏི. ཨི་དཾ པ་ན ཝི་ཧཱ་ར་ག་མ་ནཾ ཀ་སྶ ཝ་སེ་ན ག་ཧི་ཏ་ནྟི? ཝི་ཧཱ་རཾ ག་ནྟྭཱ ཨ་ན་ནྟ་རཱ་ཡེ་ན སོ་ཏཱ་པ་ཏྟི་ཕ་ལེ པ་ཏི་ཊྛ་ཧ་ནྟ་སྶ. ‘‘ག་ནྡྷ་མཱ་ལཱ་དཱི་ཧི པཱུ་ཛཾ ཀ་རི་སྶཱ་མི, ཙེ་ཏི་ཡཾ ཝ་ནྡི་སྶཱ་མི, དྷ་མྨཾ སོ་སྶཱ་མི, དཱི་པ་པཱུ་ཛཾ ཀ་རི་སྶཱ་མི, ས་ངྒྷཾ ནི་མ་ནྟེ་ཏྭཱ དཱ་ནཾ ད་སྶཱ་མི, སི་ཀྑཱ་པ་དེ་སུ ཝཱ ས་ར་ཎེ་སུ ཝཱ པ་ཏི་ཊྛ་ཧི་སྶཱ་མཱི’’ཏི ག་ཙྪ་ཏོ་པི ཝ་སེ་ན ཝ་ཊྚ་ཏི་ཡེ་ཝ.
ཨ་ནྡྷ་ཀཱ་རོ ཨ་ནྟ་ར་དྷཱ་ཡཱིཏི སོ ཀི་ར ཙི་ནྟེ་སི – ‘‘ཨ་ཧཾ ཨེ་ཀ་ཀོ་ཏི ས་ཉྙཾ ཀ་རོ་མི, ཨ་ནུ་ཡུ་ཏྟཱ་པི མེ ཨ་ཏྠི, ཀ་སྨཱ བྷཱ་ཡཱ་མཱི’’ཏི སཱུ་རོ ཨ་ཧོ་སི. ཨ་ཐ་སྶ བ་ལ་ཝཱ བུ་དྡྷ་པྤ་སཱ་དོ ཨུ་ད་པཱ་དི. ཏ་སྨཱ ཨ་ནྡྷ་ཀཱ་རོ ཨ་ནྟ་ར་དྷཱ་ཡཱི་ཏི. སེ་ས་ཝཱ་རེ་སུ་པི ཨེ་སེ་ཝ ན་ཡོ. ཨ་པི་ཙ པུ་ར་ཏོ པུ་ར་ཏོ ག་ཙྪ་ནྟོ བྷིཾ་ས་ན་ཀེ སུ་སཱ་ན་མ་གྒེ ཨ་ཊྛི་ཀ་ས་ངྑ་ལི་ཀ་ས་མཾ་ས་ལོ་ཧི་ཏ་ནྟི་ཨཱ་དཱི་ནི ཨ་ནེ་ཀ་ཝི་དྷཱ་ནི ཀུ་ཎ་པཱ་ནི ཨ་དྡ་ས. སོ་ཎ་སི་ངྒཱ་ལཱ་དཱི་ནཾ ས་དྡཾ ཨ་སྶོ་སི. ཏཾ ས་བྦཾ པ་རི་སྶ་ཡཾ པུ་ན་པྤུ་ནཾ བུ་དྡྷ་ག་ཏཾ པ་སཱ་དཾ ཝ་ཌྜྷེ་ཏྭཱ མ་དྡ་ནྟོ ཨ་ག་མཱ་སི་ཡེ་ཝ.
ཨེ་ཧི སུ་ད་ཏྟཱཏི སོ ཀི་ར སེ་ཊྛི ག་ཙྪ་མཱ་ནོ་ཝ ཙི་ནྟེ་སི – ‘‘ཨི་མ་སྨིཾ ལོ་ཀེ བ་ཧཱུ པཱུ་ར་ཎ་ཀ་སྶ་པཱ་ད་ཡོ ཏི་ཏྠི་ཡཱ ‘མ་ཡཾ བུ་དྡྷཱ མ་ཡཾ བུ་དྡྷཱ’ཏི ཝ་ད་ནྟི, ཀ་ཐཾ ནུ ཁོ ཨ་ཧཾ ས་ཏྠུ བུ་དྡྷ་བྷཱ་ཝཾ ཛཱ་ནེ་ཡྻ’’ནྟི? ཨ་ཐ་སྶ ཨེ་ཏ་ད་ཧོ་སི – ‘‘མ་ཡ྄ཧཾ གུ་ཎ་ཝ་སེ་ན ཨུ་པྤ་ནྣཾ ནཱ་མཾ མ་ཧཱ་ཛ་ནོ ཛཱ་ནཱ་ཏི, ཀུ་ལ་ད་ཏྟི་ཡཾ པ་ན མེ ནཱ་མཾ ཨ་ཉྙ་ཏྲ མ་ཡཱ ན ཀོ་ཙི ཛཱ་ནཱ་ཏི. ས་ཙེ བུ་དྡྷོ བྷ་ཝི་སྶ་ཏི, ཀུ་ལ་ད་ཏྟི་ཀ་ནཱ་མེ་ན མཾ ཨཱ་ལ་པི་སྶ་ཏཱི’’ཏི. ས་ཏྠཱ ཏ་སྶ ཙི་ཏྟཾ ཉ་ཏྭཱ ཨེ་ཝ་མཱ་ཧ.
པ་རི་ནི་བྦུ་ཏོཏི ཀི་ལེ་ས་པ་རི་ནི་བྦཱ་ནེ་ན པ་རི་ནི་བྦུ་ཏོ. ཨཱ་ས་ཏྟི་ཡོཏི ཏ་ཎྷཱ་ཡོ. ས་ནྟིནྟི ཀི་ལེ་ས་ཝཱུ་པ་ས་མཾ. པ་པྤུ་ཡྻཱཏི པ་ཏྭཱ. ཨི་ད་ཉྩ པ་ན ཝ་ཏྭཱ ས་ཏྠཱ ཏ་སྶ ཨ་ནུ་པུ་བྦི་ཀ་ཐཾ ཀ་ཐེ་ཏྭཱ མ་ཏྠ་ཀེ ཙ་ཏྟཱ་རི ས་ཙྩཱ་ནི པ་ཀཱ་སེ་སི. སེ་ཊྛི དྷ་མྨ་དེ་ས་ནཾ སུ་ཏྭཱ སོ་ཏཱ་པ་ཏྟི་ཕ་ལེ པ་ཏི་ཊྛཱ་ཡ བུ་དྡྷ་པྤ་མུ་ཁཾ བྷི་ཀྑུ་ས་ངྒྷཾ ནི་མ་ནྟེ་ཏྭཱ པུ་ན་དི་ཝ་ས་ཏོ པ་ཊྛཱ་ཡ མ་ཧཱ་དཱ་ནཾ དཱ་ཏུཾ ཨཱ་ར་བྷི. བི་མྦི་སཱ་རཱ་ད་ཡོ སེ་ཊྛི་སྶ སཱ་ས་ནཾ པེ་སེ་ནྟི – ‘‘ཏྭཾ ཨཱ་ག་ནྟུ་ཀོ, ཡཾ ན་པྤ་ཧོ་ཏི, ཏཾ ཨི་ཏོ ཨཱ་ཧ་རཱ་པེ་ཧཱི’’ཏི. སོ ‘‘ཨ་ལཾ ཏུ་མྷེ བ་ཧུ་ཀི་ཙྩཱ’’ཏི ས་བྦེ པ་ཊི་ཀྑི་པི་ཏྭཱ པ་ཉྩ་ཧི ས་ཀ་ཊ་ས་ཏེ་ཧི ཨཱ་ནཱི་ཏ་ཝི་བྷ་ཝེ་ན ས་ཏྟཱ་ཧཾ མ་ཧཱ་དཱ་ནཾ ཨ་དཱ་སི. དཱ་ན་པ་རི་ཡོ་སཱ་ནེ ཙ བྷ་ག་ཝ་ནྟཾ སཱ་ཝ་ཏྠི་ཡཾ ཝ་སྶཱ་ཝཱ་སཾ པ་ཊི་ཛཱ་ནཱ་པེ་ཏྭཱ རཱ་ཛ་ག་ཧ་སྶ ཙ སཱ་ཝ་ཏྠི་ཡཱ ཙ ཨ་ནྟ་རེ ཡོ་ཛ་ནེ ཡོ་ཛ་ནེ ས་ཏ་ས་ཧ་སྶཾ ད་ཏྭཱ པ་ཉྩ་ཙ་ཏྟཱ་ལཱི་ས ཝི་ཧཱ་རེ ཀཱ་རེ་ནྟོ སཱ་ཝ་ཏྠིཾ ག་ནྟྭཱ ཛེ་ཏ་ཝ་ན་མ་ཧཱ་ཝི་ཧཱ་རཾ ཀཱ་རེ་ཏྭཱ བུ་དྡྷ་པྤ་མུ་ཁ་སྶ བྷི་ཀྑུ་ས་ངྒྷ་སྶ ནི་ཡྻཱ་དེ་སཱི་ཏི. ཨ་ཊྛ་མཾ.