༡. ཨི་ནྡ་ཀ་སུ་ཏྟ་ཝ་ཎྞ་ནཱ
༢༣༥. ཡ་ཀྑ་སཾ་ཡུ་ཏྟ་སྶ པ་ཋ་མེ ཨི་ནྡ་ཀ་སྶཱཏི ཨི་ནྡ་ཀཱུ་ཊ་ནི་ཝཱ་སི་ནོ ཡ་ཀྑ་སྶ. ཡ་ཀྑ་ཏོ ཧི ཀཱུ་ཊེ་ན, ཀཱུ་ཊ་ཏོ ཙ ཡ་ཀྑེ་ན ནཱ་མཾ ལ་དྡྷཾ. རཱུ་པཾ ན ཛཱི་ཝ་ནྟི ཝ་ད་ནྟཱིཏི ཡ་དི བུ་དྡྷཱ རཱུ་པཾ ཛཱི་ཝ་ནྟི ན ཝ་ད་ནྟི, ཡ་དི རཱུ་པཾ ས་ཏྟོ པུ་གྒ་ལོ་ཏི ཨེ་ཝཾ ན ཝ་ད་ནྟཱི་ཏི ཨ་ཏྠོ. ཀ་ཐཾ ནྭ་ཡནྟི ཀ་ཐཾ ནུ ཨ་ཡཾ? ཀུ་ཏ་སྶ ཨ་ཊྛཱི་ཡ་ཀ་པི་ཎྜ་མེ་ཏཱིཏི ཨ་སྶ ས་ཏྟ་སྶ ཨ་ཊྛི་ཡ་ཀ་པི་ཎྜ་ཉྩ ཀུ་ཏོ ཨཱ་ག་ཙྪ་ཏི? ཨེ་ཏྠ ཙ ཨ་ཊྛི་གྒ་ཧ་ཎེ་ན ཏཱི་ཎི ཨ་ཊྛི་ས་ཏཱ་ནི, ཡ་ཀ་པི་ཎྜ་གྒ་ཧ་ཎེ་ན ན་ཝ མཾ་ས་པེ་སི་ས་ཏཱ་ནི ག་ཧི་ཏཱ་ནི. ཡ་དི རཱུ་པཾ ན ཛཱི་ཝོ, ཨ་ཐ་སྶ ཨི་མཱ་ནི ཙ ཨ་ཊྛཱི་ནི ཨི་མཱ ཙ མཾ་ས་པེ་སི་ཡོ ཀུ་ཏོ ཨཱ་ག་ཙྪ་ནྟཱི་ཏི པུ་ཙྪ་ཏི. ཀ་ཐཾ ནྭ་ཡཾ ས་ཛྫ་ཏི ག་བྦྷ་ར་སྨིནྟི ཀེ་ན ནུ ཀཱ་ར་ཎེ་ན ཨ་ཡཾ ས་ཏྟོ མཱ་ཏུ་ཀུ་ཙྪི་སྨིཾ ས་ཛྫ་ཏི ལ་གྒ་ཏི, ཏི་ཊྛ་ཏཱི་ཏི? པུ་གྒ་ལ་ཝཱ་དཱི ཀི་རེ་ས ཡ་ཀྑོ, ‘‘ཨེ་ཀ་པྤ་ཧཱ་རེ་ནེ་ཝ ས་ཏྟོ མཱ་ཏུ་ཀུ་ཙྪི་སྨིཾ ནི་བྦ་ཏྟ་ཏཱི’’ཏི ག་ཧེ་ཏྭཱ ག་བྦྷ་སེ་ཡྻ་ཀ་ས་ཏྟ་སྶ མཱ་ཏཱ མ་ཙྪ་མཾ་སཱ་དཱི་ནི ཁཱ་ད་ཏི, ས་བྦཱ་ནི ཨེ་ཀ་ར་ཏྟི་ཝཱ་སེ་ན པ་ཙི་ཏྭཱ ཕེ་ཎཾ ཝི་ཡ ཝི་ལཱི་ཡ་ནྟི. ཡ་དི རཱུ་པཾ ས་ཏྟོ ན བྷ་ཝེ་ཡྻ, ཨེ་ཝ་མེ་ཝ ཝི་ལཱི་ཡེ་ཡྻཱ་ཏི ལ་དྡྷི་ཡཱ ཨེ་ཝ་མཱ་ཧ. ཨ་ཐ་སྶ བྷ་ག་ཝཱ – ‘‘ན མཱ་ཏུ་ཀུ་ཙྪི་སྨིཾ ཨེ་ཀ་པྤ་ཧཱ་རེ་ནེ་ཝ ནི་བྦ་ཏྟ་ཏི, ཨ་ནུ་པུ་བྦེ་ན པ་ན ཝ་ཌྜྷ་ཏཱི’’ཏི ད་སྶེ་ནྟོ པ་ཋ་མཾ ཀ་ལ་ལཾ ཧོ་ཏཱིཏི་ཨཱ་དི་མཱ་ཧ. ཏ་ཏྠ པ་ཋ་མནྟི པ་ཋ་མེ་ན པ་ཊི་ས་ནྡྷི་ཝི་ཉྙཱ་ཎེ་ན ས་དྡྷིཾ ཏི་སྶོ་ཏི ཝཱ ཕུ་སྶོ་ཏི ཝཱ ནཱ་མཾ ན་ཏྠི, ཨ་ཐ ཁོ ཏཱི་ཧི ཛཱ་ཏི་ཨུ་ཎྞཾ་སཱུ་ཧི ཀ་ཏ་སུ་ཏྟ་གྒེ ས་ཎྛི་ཏ་ཏེ་ལ་བི་ནྡུ་པྤ་མཱ་ཎཾ ཀ་ལ་ལཾ ཧོ་ཏི, ཡཾ ས་ནྡྷཱ་ཡ ཝུ་ཏྟཾ –
‘‘ཏི་ལ་ཏེ་ལ་སྶ ཡ་ཐཱ བི་ནྡུ, ས་པྤི་མ་ཎྜོ ཨ་ནཱ་ཝི་ལོ;
ཨེ་ཝཾ ཝ་ཎྞ་པྤ་ཊི་བྷཱ་གཾ, ཀ་ལ་ལཾ ས་མྤ་ཝུ་ཙྩ་ཏཱི’’ཏི.
ཀ་ལ་ལཱ ཧོ་ཏི ཨ་བྦུ་དནྟི ཏ་སྨཱ ཀ་ལ་ལཱ ས་ཏྟཱ་ཧ་ཙྩ་ཡེ་ན མཾ་ས་དྷོ་ཝ་ན་ཨུ་ད་ཀ་ཝ་ཎྞཾ ཨ་བྦུ་དཾ ནཱ་མ ཧོ་ཏི, ཀ་ལ་ལ་ནྟི ནཱ་མཾ ཨ་ནྟ་ར་དྷཱ་ཡ་ཏི. ཝུ་ཏྟ་མྤི ཙེ་ཏཾ –
‘‘ས་ཏྟཱ་ཧཾ ཀ་ལ་ལཾ ཧོ་ཏི, པ་རི་པ་ཀྐཾ ས་མཱུ་ཧ་ཏཾ;
ཝི་ཝ་ཊྚ་མཱ་ནཾ ཏ་བྦྷཱ་ཝཾ, ཨ་བྦུ་དཾ ནཱ་མ ཛཱ་ཡ་ཏཱི’’ཏི.
ཨ་བྦུ་དཱ ཛཱ་ཡ་ཏེ པེ་སཱིཏི ཏ་སྨཱ་པི ཨ་བྦུ་དཱ ས་ཏྟཱ་ཧ་ཙྩ་ཡེ་ན ཝི་ལཱི་ན་ཏི་པུ་ས་དི་སཱ པེ་སི ནཱ་མ ས་ཉྫཱ་ཡ་ཏི. སཱ མ་རི་ཙ་ཕཱ་ཎི་ཏེ་ན དཱི་པེ་ཏ་བྦཱ. གཱ་མ་དཱ་རི་ཀཱ ཧི སུ་པ་ཀྐཱ་ནི མ་རི་ཙཱ་ནི ག་ཧེ་ཏྭཱ སཱ་ཊ་ཀ་ནྟེ བྷ་ཎྜི་ཀཾ ཀ་ཏྭཱ པཱི་ལེ༹་ཏྭཱ མ་ཎྜཾ ཨཱ་དཱ་ཡ ཀ་པཱ་ལེ པ་ཀྑི་པི་ཏྭཱ ཨཱ་ཏ་པེ ཋ་པེ་ནྟི, ཏཾ སུ་ཀྑ་མཱ་ནཾ ས་བྦ་བྷཱ་གེ་ཧི མུ་ཙྩ་ཏི. ཨེ་ཝ་རཱུ་པཱ པེ་སི ཧོ་ཏི, ཨ་བྦུ་ད་ནྟི ནཱ་མཾ ཨ་ནྟ་ར་དྷཱ་ཡ་ཏི. ཝུ་ཏྟ་མྤི ཙེ་ཏཾ –
‘‘ས་ཏྟཱ་ཧཾ ཨ་བྦུ་དཾ ཧོ་ཏི, པ་རི་པ་ཀྐཾ ས་མཱུ་ཧ་ཏཾ;
ཝི་ཝ་ཊྚ་མཱ་ནཾ ཏ་བྦྷཱ་ཝཾ, པེ་སི ནཱ་མ པ་ཛཱ་ཡ་ཏཱི’’ཏི.
པེ་སི ནི་བྦ་ཏྟ་ཏཱི གྷ་ནོཏི ཏ་ཏོ པེ་སི་ཏོ ས་ཏྟཱ་ཧ་ཙྩ་ཡེ་ན ཀུ་ཀྐུ་ཊ་ཎྜ་ས་ཎྛཱ་ནོ གྷ་ནོ ནཱ་མ མཾ་ས་པི་ཎྜོ ནི་བྦ་ཏྟ་ཏི, པེ་སཱི་ཏི ནཱ་མཾ ཨ་ནྟ་ར་དྷཱ་ཡ་ཏི. ཝུ་ཏྟ་མྤི ཙེ་ཏཾ –
‘‘ས་ཏྟཱ་ཧཾ པེ་སི བྷ་ཝ་ཏི, པ་རི་པ་ཀྐཾ ས་མཱུ་ཧ་ཏཾ;
ཝི་ཝ་ཊྚ་མཱ་ནཾ ཏ་བྦྷཱ་ཝཾ, གྷ་ནོ་ཏི ནཱ་མ ཛཱ་ཡ་ཏི.
‘‘ཡ་ཐཱ ཀུ་ཀྐུ་ཊི་ཡཱ ཨ་ཎྜཾ, ས་མ་ནྟཱ པ་རི་མ་ཎྜ་ལཾ;
ཨེ་ཝཾ གྷ་ན་སྶ ས་ཎྛཱ་ནཾ, ནི་བྦ་ཏྟཾ ཀ་མྨ་པ་ཙྩ་ཡཱ’’ཏི.
གྷ་ནཱ པ་སཱ་ཁཱ ཛཱ་ཡ་ནྟཱིཏི པ་ཉྩ་མེ ས་ཏྟཱ་ཧེ དྭི་ནྣཾ ཧ་ཏྠ་པཱ་དཱ་ནཾ སཱི་ས་སྶ ཙ་ཏྠཱ་ཡ པ་ཉྩ པཱི་ལ༹་ཀཱ ཛཱ་ཡ་ནྟི, ཡཾ ས་ནྡྷཱ་ཡེ་ཏཾ ཝུ་ཏྟཾ ‘‘པ་ཉྩ་མེ, བྷི་ཀྑ་ཝེ, ས་ཏྟཱ་ཧེ པ་ཉྩ པཱི་ལ༹་ཀཱ ས་ཎྛ་ཧ་ནྟི ཀ་མྨ་ཏོ’’ཏི.
ཨི་ཏོ པ་རཾ ཚ་ཊྛ་ས་ཏྟ་མཱ་དཱི་ནི ས་ཏྟཱ་ཧཱ་ནི ཨ་ཏི་ཀྐ་མྨ དེ་ས་ནཾ ས་ངྑི་པི་ཏྭཱ དྭཱ་ཙ་ཏྟཱ་ལཱི་སེ ས་ཏྟཱ་ཧེ པ་རི་ཎ་ཏ་ཀཱ་ལཾ ག་ཧེ་ཏྭཱ ད་སྶེ་ནྟོ ཀེ་སཱཏི་ཨཱ་དི་མཱ་ཧ. ཏ་ཏྠ ཀེ་སཱ ལོ་མཱ ན་ཁཱ་པི ཙཱཏི དྭཱ་ཙ་ཏྟཱ་ལཱི་སེ ས་ཏྟཱ་ཧེ ཨེ་ཏཱ་ནི ཛཱ་ཡ་ནྟི.
ཏེ་ན སོ ཏ་ཏྠ ཡཱ་པེ་ཏཱིཏི ཏ་སྶ ཧི ནཱ་བྷི་ཏོ ཨུ་ཊྛི་ཏོ ནཱ་ལོ༹ མཱ་ཏུ ཨུ་ད་ར་པ་ཊ་ལེ་ན ཨེ་ཀཱ་བ་དྡྷོ ཧོ་ཏི, སོ ཨུ་པྤ་ལ་ད་ཎྜ་ཀོ ཝི་ཡ ཚི་དྡོ, ཏེ་ན ཨཱ་ཧཱ་ར་ར་སོ སཾ་ས་རི་ཏྭཱ ཨཱ་ཧཱ་ར་ས་མུ་ཊྛཱ་ན་རཱུ་པཾ ས་མུ་ཊྛཱ་པེ་ཏི. ཨེ་ཝཾ སོ ད་ས མཱ་སེ ཡཱ་པེ་ཏི. མཱ་ཏུ་ཀུ་ཙྪི་ག་ཏོ ན་རོཏི མཱ་ཏུ་ཡཱ ཏི་རོ་ཀུ་ཙྪི་ག་ཏོ, ཀུ་ཙྪི་ཡཱ ཨ་བྦྷ་ནྟ་ར་ག་ཏོ་ཏི ཨ་ཏྠོ. ཨི་ཏི བྷ་ག་ཝཱ ‘‘ཨེ་ཝཾ ཁོ, ཡ་ཀྑ, ཨ་ཡཾ ས་ཏྟོ ཨ་ནུ་པུ་བྦེ་ན མཱ་ཏུ་ཀུ་ཙྪི་ཡཾ ཝ་ཌྜྷ་ཏི, ན ཨེ་ཀ་པྤ་ཧཱ་རེ་ནེ་ཝ ནི་བྦ་ཏྟ་ཏཱི’’ཏི ད་སྶེ་ཏི. པ་ཋ་མཾ.