༢. ནི་མོ་ཀྑ་སུ་ཏྟ་ཝ་ཎྞ་ནཱ

༢. ཨི་དཱ་ནི དུ་ཏི་ཡ་སུ་ཏྟ་ཏོ པ་ཊྛཱ་ཡ པ་ཋ་མ་མཱ་ག་ཏ་ཉྩ ཨུ་ཏྟཱ་ན་ཏྠ་ཉྩ པ་ཧཱ་ཡ ཡཾ ཡཾ ཨ་ནུ་ཏྟཱ་ནཾ, ཏཾ ཏ་དེ་ཝ ཝ་ཎྞ་ཡི་སྶཱ་མ. ཛཱ་ནཱ་སི ནོཏི ཛཱ་ནཱ་སི ནུ. ནི་མོ་ཀྑནྟི་ཨཱ་དཱི་ནི མ་གྒཱ་དཱི་ནཾ ནཱ་མཱ་ནི. མ་གྒེ་ན ཧི ས་ཏྟཱ ཀི་ལེ་ས་བ་ནྡྷ་ན་ཏོ ནི་མུ་ཙྩ་ནྟི, ཏ་སྨཱ མ་གྒོ ས་ཏྟཱ་ནཾ ནི་མོ་ཀྑོཏི ཝུ་ཏྟོ. ཕ་ལ་ཀྑ་ཎེ པ་ན ཏེ ཀི་ལེ་ས་བ་ནྡྷ་ན་ཏོ པ་མུ་ཏྟཱ, ཏ་སྨཱ ཕ་ལཾ ས་ཏྟཱ་ནཾ པ་མོ་ཀྑོཏི ཝུ་ཏྟཾ. ནི་བྦཱ་ནཾ པ་ཏྭཱ ས་ཏྟཱ་ནཾ ས་བྦ་དུ་ཀྑཾ ཝི་ཝི་ཙྩ་ཏི, ཏ་སྨཱ ནི་བྦཱ་ནཾ ཝི་ཝེ་ཀོཏི ཝུ་ཏྟཾ. ས་བྦཱ་ནི ཝཱ ཨེ་ཏཱ་ནི ནི་བྦཱ་ན་སྶེ་ཝ ནཱ་མཱ་ནི. ནི་བྦཱ་ན་ཉྷི པ་ཏྭཱ ས་ཏྟཱ ས་བྦ་དུ་ཀྑ་ཏོ ནི་མུ་ཙྩ་ནྟི པ་མུ་ཙྩ་ནྟི ཝི་ཝི་ཙྩ་ནྟི, ཏ་སྨཱ ཏ་དེ་ཝ ‘‘ནི་མོ་ཀྑོ པ་མོ་ཀྑོ ཝི་ཝེ་ཀོ’’ཏི ཝུ་ཏྟཾ. ཛཱ་ནཱ་མི ཁྭཱ་ཧནྟི ཛཱ་ནཱ་མི ཁོ ཨ་ཧཾ. ཨ་ཝ་དྷཱ་ར་ཎ་ཏྠོ ཁོ་ཀཱ་རོ. ཨ་ཧཾ ཛཱ་ནཱ་མི་ཡེ་ཝ. ས་ཏྟཱ་ནཾ ནི་མོ་ཀྑཱ་དི་ཛཱ་ན་ན་ཏྠ་མེ་ཝ ཧི མ་ཡཱ ས་མ་ཏིཾ་ས པཱ་ར་མི་ཡོ པཱུ་རེ་ཏྭཱ ས་བྦ་ཉྙུ་ཏ་ཉྙཱ་ཎཾ པ་ཊི་ཝི་དྡྷ་ནྟི སཱི་ཧ་ནཱ་དཾ ན་ད་ཏི. བུ་དྡྷ་སཱི་ཧ་ནཱ་དཾ ནཱ་མ ཀི་ར ཨེ་ཏཾ སུ་ཏྟཾ.

ན་ནྡཱི་བྷ་ཝ་པ་རི་ཀྑ་ཡཱཏི ན་ནྡཱི་མཱུ་ལ་ཀ་སྶ ཀ་མྨ་བྷ་ཝ་སྶ པ་རི་ཀྑ་ཡེ་ན. ན་ནྡི་ཡཱ ཙ བྷ་ཝ་སྶ ཙཱ་ཏི་པི ཝ་ཊྚ་ཏི. ཏ་ཏྠ ཧི པུ་རི་མ་ན་ཡེ ན་ནྡཱི་བྷ་ཝེ་ན ཏི་ཝི་དྷ་ཀ་མྨཱ་བྷི་ས་ངྑཱ་ར་ཝ་སེ་ན ས་ངྑཱ་ར་ཀྑ་ནྡྷོ ག་ཧི་ཏོ, ས་ཉྙཱ་ཝི་ཉྙཱ་ཎེ་ཧི ཏཾ་ས་མྤ་ཡུ་ཏྟཱ ཙ དྭེ ཁ་ནྡྷཱ. ཏེ་ཧི པ་ན ཏཱི་ཧི ཁ་ནྡྷེ་ཧི ས་མྤ་ཡུ་ཏྟཱ ཝེ་ད་ནཱ ཏེ་སཾ ག་ཧ་ཎེ་ན ག་ཧི་ཏཱ་ཝཱ་ཏི ཨ་ནུ་པཱ་དི་ཎྞ་ཀཱ་ནཾ ཙ་ཏུ་ནྣཾ ཨ་རཱུ་པ་ཀྑ་ནྡྷཱ་ནཾ ཨ་པྤ་ཝ་ཏྟི་ཝ་སེ་ན ས་ཨུ་པཱ་དི་སེ་སཾ ནི་བྦཱ་ནཾ ཀ་ཐི་ཏཾ ཧོ་ཏི. ཝེ་ད་ནཱ་ནཾ ནི་རོ་དྷཱ ཨུ་པ་ས་མཱཏི ཨུ་པཱ་དི་ཎྞ་ཀ་ཝེ་ད་ནཱ་ནཾ ནི་རོ་དྷེ་ན ཙ ཨུ་པ་ས་མེ་ན ཙ. ཏ་ཏྠ ཝེ་ད་ནཱ་ག་ཧ་ཎེ་ན ཏཾ་ས་མྤ་ཡུ་ཏྟཱ ཏ་ཡོ ཁ་ནྡྷཱ ག་ཧི་ཏཱ་ཝ ཧོ་ནྟི, ཏེ་སཾ ཝ་ཏྠཱ་ར་མྨ་ཎ་ཝ་སེ་ན རཱུ་པ་ཀྑ་ནྡྷོ་པི. ཨེ་ཝཾ ཨི་མེ་སཾ ཨུ་པཱ་དི་ཎྞ་ཀཱ་ནཾ པ་ཉྩ་ནྣཾ ཁ་ནྡྷཱ་ནཾ ཨ་པྤ་ཝ་ཏྟི་ཝ་སེ་ན ཨ་ནུ་པཱ་དི་སེ་སཾ ནི་བྦཱ་ནཾ ཀ་ཐི་ཏཾ ཧོ་ཏི. དུ་ཏི་ཡ་ན་ཡེ པ་ན ན་ནྡི་གྒ་ཧ་ཎེ་ན ས་ངྑཱ་ར་ཀྑ་ནྡྷོ ག་ཧི་ཏོ, བྷ་ཝ་གྒ་ཧ་ཎེ་ན ཨུ་པ་པ་ཏྟི་བྷ་ཝ་ས་ངྑཱ་ཏོ རཱུ་པ་ཀྑ་ནྡྷོ, ས་ཉྙཱ་དཱི་ཧི ས་རཱུ་པེ་ནེ་ཝ ཏ་ཡོ ཁ་ནྡྷཱ. ཨེ་ཝཾ ཨི་མེ་སཾ པ་ཉྩ་ནྣཾ ཁ་ནྡྷཱ་ནཾ ཨ་པྤ་ཝ་ཏྟི་ཝ་སེ་ན ནི་བྦཱ་ནཾ ཀ་ཐི་ཏཾ ཧོ་ཏཱི་ཏི ཝེ་དི་ཏ་བྦཾ. ཨི་མ་མེ་ཝ ཙ ན་ཡཾ ཙ་ཏུ་ནི་ཀཱ་ཡི་ཀ་བྷ་ཎྜི་ཀ་ཏྠེ་རོ རོ་ཙེ་ཏི. ཨི་ཏི ནི་བྦཱ་ན་ཝ་སེ་ནེ་ཝ བྷ་ག་ཝཱ དེ་ས་ནཾ ནི་ཊྛཱ་པེ་སཱི་ཏི.

ནི་མོ་ཀྑ་སུ་ཏྟ་ཝ་ཎྞ་ནཱ ནི་ཊྛི་ཏཱ.