༩. མ་ཊྛ་ཀུ་ཎྜ་ལཱི་ཝི་མཱ་ན་ཝ་ཎྞ་ནཱ
ཨ་ལ་ངྐ་ཏོ མ་ཊྛ་ཀུ་ཎྜ་ལཱིཏི མ་ཊྛ་ཀུ་ཎྜ་ལཱི་ཝི་མཱ་ནཾ. ཏ་སྶ ཀཱ ཨུ་པྤ་ཏྟི? བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ. ཏེ་ན ས་མ་ཡེ་ན སཱ་ཝ་ཏྠི་ཝཱ་སཱི ཨེ་ཀོ བྲཱ་ཧྨ་ཎོ ཨ་དྡྷོ མ་ཧ་དྡྷ་ནོ མ་ཧཱ་བྷོ་གོ ཨ་སྶ་དྡྷོ ཨ་པྤ་ས་ནྣོ མི་ཙྪཱ་དི་ཊྛི་ཀོ ཀ་སྶ་ཙི ཀི་ཉྩི ན དེ་ཏི, ཨ་དཱ་ན་ཏོ ཨེ་ཝ ‘‘ཨ་དི་ནྣ་པུ་བྦ་ཀོ’’ཏི པ་ཉྙཱ་ཡི་ཏྠ. སོ མི་ཙྪཱ་དི་ཊྛི་བྷཱ་ཝེ་ན ཙ ལུ་དྡྷ་བྷཱ་ཝེ་ན ཙ ཏ་ཐཱ་ག་ཏཾ ཝཱ ཏ་ཐཱ་ག་ཏ་སཱ་ཝ་ཀཾ ཝཱ ད་ཊྛུ་མྤི ན ཨི་ཙྪ་ཏི. མ་ཊྛ་ཀུ་ཎྜ་ལཾ ནཱ་མ ཨ་ཏྟ་ནོ པུ་ཏྟ་ཉྩ སི་ཀྑཱ་པེ་སི ‘‘ཏཱ་ཏ, ཏ་ཡཱ ས་མ་ཎོ གོ་ཏ་མོ ཏ་སྶ སཱ་ཝ་ཀཱ ཙ ན ཨུ་པ་ས་ངྐ་མི་ཏ་བྦཱ ན ད་ཊྛ་བྦཱ’’ཏི. སོ་པི ཏ་ཐཱ ཨ་ཀཱ་སི. ཨ་ཐ་སྶ པུ་ཏྟོ གི་ལཱ་ནོ ཨ་ཧོ་སི, བྲཱ་ཧྨ་ཎོ དྷ་ན་ཀྑ་ཡ་བྷ་ཡེ་ན བྷེ་ས་ཛྫཾ ན ཀཱ་རེ་སི, རོ་གེ པ་ན ཝ་ཌྜྷི་ཏེ་ཝ ཝེ་ཛྫེ པ་ཀྐོ་སི་ཏྭཱ ད་སྶེ་སི. ཝེ་ཛྫཱ ཏ་སྶ ས་རཱི་རཾ ཨོ་ལོ་ཀེ་ཏྭཱ ‘‘ཨ་ཏེ་ཀི་ཙྪོ’’ཏི ཏཾ ཉ་ཏྭཱ ཨ་པ་ཀྐ་མིཾ་སུ. བྲཱ་ཧྨ་ཎོ ‘‘པུ་ཏྟེ ཨ་བྦྷ་ནྟ་རེ མ་ཏེ ནཱི་ཧ་ར་ཎཾ དུ་ཀྑ’’ནྟི པུ་ཏྟཾ བ་ཧི་དྭཱ་ར་ཀོ་ཊྛ་ཀེ ནི་པ་ཛྫཱ་པེ་སི.
བྷ་ག་ཝཱ ར་ཏྟི་ཡཱ པ་ཙྩཱུ་ས་ས་མ་ཡེ མ་ཧཱ་ཀ་རུ་ཎཱ་ས་མཱ་པ་ཏྟི་ཏོ ཝུ་ཊྛཱ་ཡ ལོ་ཀཾ ཝོ་ལོ་ཀེ་ནྟོ ཨ་དྡ་ས མ་ཊྛ་ཀུ་ཎྜ་ལཱི་མཱ་ཎ་ཝཾ ཁཱི་ཎཱ་ཡུ་ཀཾ ཏ་ད་ཧེ་ཝ ཙ་ཝ་ན་དྷ་མྨཾ, ནི་ར་ཡ་སཾ་ཝ་ཏྟ་ནི་ཀ་ཉྩ་སྶ ཀ་མྨཾ ཀ་ཏོ་ཀཱ་སཾ. ‘‘ས་ཙེ པ་ནཱ་ཧཾ ཏ་ཏྠ ག་མི་སྶཱ་མི, སོ མ་ཡི ཙི་ཏྟཾ པ་སཱ་དེ་ཏྭཱ དེ་ཝ་ལོ་ཀེ ནི་བྦ་ཏྟི་ཏྭཱ པི་ཏ་རཾ ཨཱ་ལཱ༹་ཧ་ནེ རོ་ད་མཱ་ནཾ ཨུ་པ་ག་ནྟྭཱ སཾ་ཝེ་ཛེ་སྶ་ཏི, ཨེ་ཝཾ སོ ཙ ཏ་སྶ པི་ཏཱ ཙ མ་མ ས་ནྟི་ཀཾ ཨཱ་ག་མི་སྶ་ཏི, མ་ཧཱ་ཛ་ན་ཀཱ་ཡོ ས་ནྣི་པ་ཏི་སྶ་ཏི ཏ་ཏྠ མ་ཡཱ དྷ་མྨེ དེ་སི་ཏེ མ་ཧཱ་དྷ་མྨཱ་བྷི་ས་མ་ཡོ བྷ་ཝི་སྶ་ཏཱི’’ཏི ཨེ་ཝཾ པ་ན ཉ་ཏྭཱ པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ མ་ཧ་ཏཱ བྷི་ཀྑུ་ས་ངྒྷེ་ན ས་དྡྷིཾ སཱ་ཝ་ཏྠིཾ པི་ཎྜཱ་ཡ པ་ཝི་ཊྛོ མ་ཊྛ་ཀུ་ཎྜ་ལཱི་མཱ་ཎ་ཝ་སྶ པི་ཏུ གེ་ཧ་ས་མཱི་པེ ཋ་ཏྭཱ ཚ་བྦ་ཎྞ་བུ་དྡྷ་རཾ་སི་ཡོ ཝི་སྶ་ཛྫེ་སི. ཏཱ དི་སྭཱ མཱ་ཎ་ཝོ ‘‘ཀི་མེ་ཏ’’ནྟི ཨི་ཏོ ཙི་ཏོ ཙ ཝི་ལོ་ཀེ་ནྟོ ཨ་དྡ་ས བྷ་ག་ཝ་ནྟཾ ད་ནྟཾ གུ་ཏྟཾ ས་ནྟི་ནྡྲི་ཡཾ དྭ་ཏྟིཾ་སཱ་ཡ མ་ཧཱ་པུ་རི་ས་ལ་ཀྑ་ཎེ་ཧི ཨ་སཱི་ཏི་ཡཱ ཨ་ནུ་བྱ་ཉྫ་ནེ་ཧི བྱཱ་མ་པྤ་བྷཱ་ཡ ཀེ་ཏུ་མཱ་ལཱ་ཡ ཙ ཝི་ཛྫོ་ཏ་མཱ་ནཾ ཨ་ནུ་པ་མཱ་ཡ བུ་དྡྷ་སི་རི་ཡཱ ཨ་ཙི་ནྟེ་ཡྻེ་ན བུ་དྡྷཱ་ནུ་བྷཱ་ཝེ་ན ཝི་རོ་ཙ་མཱ་ནཾ. དི་སྭཱ ཏ་སྶ ཨེ་ཏ་ད་ཧོ་སི ‘‘བུ་དྡྷོ ནུ ཁོ བྷ་ག་ཝཱ ཨི་དྷཱ་ནུ་པྤ་ཏྟོ, ཡ་སྶཱ་ཡཾ རཱུ་པ་ས་མྤ་དཱ ཨ་ཏྟ་ནོ ཏེ་ཛ་སཱ སཱུ་རི་ཡ་མྤི ཨ་བྷི་བྷ་ཝ་ཏི, ཀ་ནྟ་བྷཱ་ཝེ་ན ཙ་ནྡི་མཾ, ཨུ་པ་ས་ནྟ་བྷཱ་ཝེ་ན ས་བྦེ་པི ས་མ་ཎ་བྲཱ་ཧྨ་ཎེ, ཨུ་པ་ས་མེ་ན ནཱ་མ ཨེ་ཏྠེ་ཝ བྷ་ཝི་ཏ་བྦཾ, ཨ་ཡ་མེ་ཝ ཙ མ་ཉྙེ ཨི་མ་སྨིཾ ལོ་ཀེ ཨ་གྒ་པུ་གྒ་ལོ, མ་མེ་ཝ ཙ ཨ་ནུ་ཀ་མྤཱ་ཡ ཨི་དྷཱ་ནུ་པྤ་ཏྟོ’’ཏི བུ་དྡྷཱ་ར་མྨ་ཎཱ་ཡ པཱི་ཏི་ཡཱ ནི་ར་ནྟ་རཾ ཕུ་ཊ་ས་རཱི་རོ ཨ་ན་པྤ་ཀཾ པཱི་ཏི་སོ་མ་ན་སྶཾ པ་ཊི་སཾ་ཝེ་དེ་ནྟོ པ་ས་ནྣ་ཙི་ཏྟོ ཨ་ཉྫ་ལིཾ པ་གྒ་ཡ྄ཧ ནི་པ་ཛྫི. ཏཾ དི་སྭཱ བྷ་ག་ཝཱ ‘‘ཨ་ལཾ ཨི་མ་སྶ ཨེ་ཏྟ་ཀེ་ན ས་གྒཱུ་པ་པ་ཏྟི་ཡཱ’’ཏི པ་ཀྐཱ་མི.
སོ་པི ཏཾ པཱི་ཏི་སོ་མ་ན་སྶཾ ཨ་ཝི་ཛ་ཧ་ནྟོ་ཝ ཀཱ་ལཾ ཀ་ཏྭཱ ཏཱ་ཝ་ཏིཾ་སེ་སུ དྭཱ་ད་ས་ཡོ་ཛ་ནི་ཀེ ཝི་མཱ་ནེ ནི་བྦ་ཏྟི. པི་ཏཱ པ་ན་སྶ ས་རཱི་ར་ས་ཀྐཱ་རཾ ཀ་རི་ཏྭཱ དུ་ཏི་ཡ་དི་ཝ་སེ པ་ཙྩཱུ་ས་ཝེ་ལཱ་ཡཾ ཨཱ་ལཱ༹་ཧ་ནཾ ག་ནྟྭཱ ‘‘ཧཱ ཧཱ མ་ཊྛ་ཀུ་ཎྜ་ལི, ཧཱ ཧཱ མ་ཊྛ་ཀུ་ཎྜ་ལཱི’’ཏི པ་རི་དེ་ཝ་མཱ་ནོ ཨཱ་ལཱ༹་ཧ་ནཾ ཨ་ནུ་པ་རི་ཀྐ་མ་ནྟོ རོ་ད་ཏི. དེ་ཝ་པུ་ཏྟོ ཨ་ཏྟ་ནོ ཝི་བྷ་ཝ་ས་མྤ་ཏྟིཾ ཨོ་ལོ་ཀེ་ཏྭཱ ‘‘ཀུ་ཏོ ནུ ཁོ ཨ་ཧཾ ཨི་དྷཱ་ག་ཏོ ཀི་ཉྩ ཀ་མྨཾ ཀ་ཏྭཱ’’ཏི ཨུ་པ་དྷཱ་རེ་ནྟོ ཨ་ཏྟ་ནོ པུ་རི་མ་ཏྟ་བྷཱ་ཝཾ ཉ་ཏྭཱ ཏ་ཏྠ ཙ མ་ར་ཎ་ཀཱ་ལེ བྷ་ག་ཝ་ཏི པ་ཝ་ཏྟི་ཏཾ ཙི་ཏྟ་པྤ་སཱ་དཾ མ་ནོ་ཧ་རཾ ཨ་ཉྫ་ལི་ཀ་ར་ཎ་མ་ཏྟཾ དི་སྭཱ ‘‘ཨ་ཧོ མ་ཧཱ་ནུ་བྷཱ་ཝཱ བུ་དྡྷཱ བྷ་ག་ཝ་ནྟོ’’ཏི སཱ་ཏི་ས་ཡཾ ཏ་ཐཱ་ག་ཏེ ས་ཉྫཱ་ཏ་པྤ་སཱ་ད་བ་ཧུ་མཱ་ནོ ‘‘ཨ་དི་ནྣ་པུ་བྦ་ཀ་བྲཱ་ཧྨ་ཎོ ནུ ཁོ ཀིཾ ཀ་རོ་ཏཱི’’ཏི ཨུ་པ་དྷཱ་རེ་ནྟོ ཨཱ་ལཱ༹་ཧ་ནེ རོ་ད་མཱ་ནཾ དི་སྭཱ ‘‘ཨ་ཡཾ མ་ཡ྄ཧཾ པུ་བྦེ བྷེ་ས་ཛྫ་མ་ཏྟ་མྤི ཨ་ཀ་ཏྭཱ ཨི་དཱ་ནི ནི་ར་ཏྠ་ཀཾ ཨཱ་ལཱ༹་ཧ་ནེ རོ་ད་ཏི, ཧ་ནྡ ནཾ སཾ་ཝེ་ཛེ་ཏྭཱ ཀུ་ས་ལེ པ་ཏི་ཊྛཱ་པེ་སྶཱ་མཱི’’ཏི དེ་ཝ་ལོ་ཀ་ཏོ ཨཱ་ག་ནྟྭཱ མ་ཊྛ་ཀུ་ཎྜ་ལཱི་རཱུ་པེ་ན རོ་ད་མཱ་ནོ ‘‘ཧཱ ཧཱ ཙ་ནྡ, ཧཱ ཧཱ སཱུ་རི་ཡཱ’’ཏི བཱ་ཧཱ པ་གྒ་ཡ྄ཧ ཀ་ནྡ་ནྟོ པི་ཏུ ས་མཱི་པེ ཨ་ཊྛཱ་སི. ཨ་ཐ ནཾ བྲཱ་ཧྨ་ཎོ ‘‘ཨ་ཡཾ མ་ཊྛ་ཀུ་ཎྜ་ལཱི ཨཱ་ག་ཏོ’’ཏི ཙི་ནྟེ་ཏྭཱ གཱ་ཐཱ་ཡ ཨ་ཛ྄ཛྷ་བྷཱ་སི –
༡༢༠༧. ‘‘ཨ་ལ་ངྐ་ཏོ མ་ཊྛ་ཀུ་ཎྜ་ལཱི, མཱ་ལ་དྷཱ་རཱི ཧ་རི་ཙ་ནྡ་ནུ་སྶ་དོ;
བཱ་ཧཱ པ་གྒ་ཡ྄ཧ ཀ་ནྡ་སི, ཝ་ན་མ་ཛ྄ཛྷེ ཀིཾ དུ་ཀྑི་ཏོ ཏུ་ཝ’’ནྟི.
ཏ་ཏྠ ཨ་ལ་ངྐ་ཏོཏི ཝི་བྷཱུ་སི་ཏོ. མ་ཊྛ་ཀུ་ཎྜ་ལཱིཏི ས་རཱི་ར་པྤ་དེ་ས་སྶ ཨ་གྷཾ་ས་ན་ཏྠཾ མཱ་ལཱ་ལ་ཏཱ་ད་ཡོ ཨ་ད་སྶེ་ཏྭཱ མ་ཊྛཱ་ཀཱ་རེ་ནེ་ཝ ཀ་ཏ་ཀུ་ཎྜ་ལོ. ཨ་ཐ ཝཱ མ་ཊྛ་ཀུ་ཎྜ་ལཱིཏི ཝི་སུ་དྡྷ་ཀུ་ཎྜ་ལོ, ཏཱ་པེ་ཏྭཱ ཛཱ་ཏི་ཧི་ངྒུ་ལི་ཀཱ་ཡ མ་ཛྫི་ཏྭཱ དྷོ་ཝི་ཏྭཱ སཱུ་ཀ་ར་ལོ་མེ་ན མ་ཛྫི་ཏ་ཀུ་ཎྜ་ལོ་ཏི ཨ་ཏྠོ. མཱ་ལ་དྷཱ་རཱིཏི མཱ་ལཾ དྷཱ་རེ་ནྟོ, པི་ལ༹་ནྡྷི་ཏ་མཱ་ལོ་ཏི ཨ་ཏྠོ. ཧ་རི་ཙ་ནྡ་ནུ་སྶ་དོཏི ར་ཏྟ་ཙ་ནྡ་ནེ་ན ས་བྦ་སོ ཨ་ནུ་ལི་ཏྟ་ག་ཏྟོ. ཀིནྟི པུ་ཙྪཱ་ཝ་ཙ་ནཾ. དུ་ཀྑི་ཏོཏི དུ་ཀྑ་པྤ་ཏྟོ. ཀིཾ་དུ་ཀྑི་ཏོཏི ཝཱ ཨེ་ཀ་མེ་ཝ པ་དཾ, ཀེ་ན དུ་ཀྑེ་ན དུ་ཀྑི་ཏོ་ཏི ཨ་ཏྠོ.
ཨ་ཐ ནཾ དེ་ཝ་པུ་ཏྟོ ཨཱ་ཧ –
༡༢༠༨. ‘‘སོ་ཝ་ཎྞ་མ་ཡོ པ་བྷ་སྶ་རོ, ཨུ་པྤ་ནྣོ ར་ཐ་པ་ཉྫ་རོ མ་མ;
ཏ་སྶ ཙ་ཀྐ་ཡུ་གཾ ན ཝི་ནྡཱ་མི, ཏེ་ན དུ་ཀྑེ་ན ཛ་ཧཱ་མི ཛཱི་ཝི་ཏ’’ནྟི.
ཨ་ཐ ནཾ བྲཱ་ཧྨ་ཎོ ཨཱ་ཧ –
༡༢༠༩. ‘‘སོ་ཝ་ཎྞ་མ་ཡཾ མ་ཎི་མ་ཡཾ, ལོ་ཧི་ཏ་ཀ་མ་ཡཾ ཨ་ཐ རཱུ་པི་ཡ་མ་ཡཾ;
ཨཱ་ཙི་ཀྑ མེ བྷ་དྡ་མཱ་ཎ་ཝ, ཙ་ཀྐ་ཡུ་གཾ པ་ཊི་པཱ་ད་ཡཱ་མི ཏེ’’ཏི.
ཏཾ སུ་ཏྭཱ མཱ་ཎ་ཝོ ‘‘ཨ་ཡཾ པུ་ཏྟ་སྶ བྷེ་ས་ཛྫཾ ཨ་ཀ་ཏྭཱ པུ་ཏྟ་པ་ཏི་རཱུ་པ་ཀཾ མཾ དི་སྭཱ རོ་ད་ནྟོ ‘སུ་ཝ་ཎྞཱ་དི་མ་ཡཾ ར་ཐ་ཙ་ཀྐཾ ཀ་རོ་མཱི’ཏི ཝ་ད་ཏི, ཧོ་ཏུ ནི་གྒ་ཎྷི་སྶཱ་མི ན’’ནྟི ཙི་ནྟེ་ཏྭཱ ‘‘ཀཱི་ཝ མ་ཧ་ནྟཾ མེ ཙ་ཀྐ་ཡུ་གཾ ཀ་རི་སྶ་སཱི’’ཏི ཝ་ཏྭཱ ‘‘ཡཱ་ཝ མ་ཧ་ནྟཾ ཨཱ་ཀ་ངྑ་སཱི’’ཏི ཝུ་ཏྟེ ‘‘ཙ་ནྡི་མ་སཱུ་རི་ཡེ་ཧི མེ ཨ་ཏྠོ, ཏེ མེ དེ་ཧཱི’’ཏི ཡཱ་ཙ་ནྟོ –
༡༢༡༠. ‘‘སོ མཱ་ཎ་ཝོ ཏ་སྶ པཱ་ཝ་དི, ཙ་ནྡ་སཱུ་རི་ཡཱ ཨུ་བྷ་ཡེ་ཏྠ དི་སྶ་རེ;
སོ་ཝ་ཎྞ་མ་ཡོ ར་ཐོ མ་མ, ཏེ་ན ཙ་ཀྐ་ཡུ་གེ་ན སོ་བྷ་ཏཱི’’ཏི.
ཨ་ཐ ནཾ བྲཱ་ཧྨ་ཎོ ཨཱ་ཧ –
༡༢༡༡. ‘‘བཱ་ལོ ཁོ ཏྭཾ ཨ་སི མཱ་ཎ་ཝ, ཡོ ཏྭཾ པ་ཏྠ་ཡ་སེ ཨ་པ་ཏྠི་ཡཾ;
མ་ཉྙཱ་མི ཏུ་ཝཾ མ་རི་སྶ་སི, ན ཧི ཏྭཾ ལ་ཙྪ་སི ཙ་ནྡ་སཱུ་རི་ཡེ’’ཏི.
ཨ་ཐ ནཾ མཱ་ཎ་ཝོ ‘‘ཀིཾ པ་ན པ་ཉྙཱ་ཡ་མཱ་ན་སྶ་ཏྠཱ་ཡ རོ་ད་ནྟོ བཱ་ལོ ཧོ་ཏི, ཨུ་དཱ་ཧུ ཨ་པ་ཉྙཱ་ཡ་མཱ་ན་སྶཱ’’ཏི ཝ་ཏྭཱ –
༡༢༡༢. ‘‘ག་མ་ནཱ་ག་མ་ན་མྤི དི་སྶ་ཏི, ཝ་ཎྞ་དྷཱ་ཏུ ཨུ་བྷ་ཡ་ཏྠ ཝཱི་ཐི་ཡཱ;
པེ་ཏོ ཀཱ་ལ་ཀ་ཏོ ན དི་སྶ་ཏི, ཀོ ནི་དྷ ཀ་ནྡ་ཏཾ བཱ་ལྱ་ཏ་རོ’’ཏི.
ཏཾ སུ་ཏྭཱ བྲཱ་ཧྨ་ཎོ ‘‘ཡུ་ཏྟཾ ཨེ་ས ཝ་ད་ཏཱི’’ཏི ས་ལླ་ཀྑེ་ཏྭཱ –
༡༢༡༣. ‘‘ས་ཙྩཾ ཁོ ཝ་དེ་སི མཱ་ཎ་ཝ, ཨ་ཧ་མེ་ཝ ཀ་ནྡ་ཏཾ བཱ་ལྱ་ཏ་རོ;
ཙ་ནྡཾ ཝི་ཡ དཱ་ར་ཀོ རུ་དཾ, པེ་ཏཾ ཀཱ་ལ་ཀ་ཏཱ་བྷི་པ་ཏྠ་ཡི’’ནྟི. –
ཝ་ཏྭཱ ཏ་སྶ ཀ་ཐཱ་ཡ ནི་སྶོ་ཀོ ཧུ་ཏྭཱ མཱ་ཎ་ཝ་སྶ ཐུ་ཏིཾ ཀ་རོ་ནྟོ ཨི་མཱ གཱ་ཐཱ ཨ་བྷཱ་སི –
༡༢༡༤. ‘‘ཨཱ་དི་ཏྟཾ ཝ་ཏ མཾ ས་ནྟཾ, གྷ་ཏ་སི་ཏྟཾ་ཝ པཱ་ཝ་ཀཾ;
ཝཱ་རི་ནཱ ཝི་ཡ ཨོ་སི་ཉྩཾ, ས་བྦཾ ནི་བྦཱ་པ་ཡེ ད་རཾ.
༡༢༡༥. ‘‘ཨ་བྦ་ཧཱི ཝ་ཏ མེ ས་ལླཾ, སོ་ཀཾ ཧ་ད་ཡ་ནི་སྶི་ཏཾ;
ཡོ མེ སོ་ཀ་པ་རེ་ཏ་སྶ, པུ་ཏྟ་སོ་ཀཾ ཨ་པཱ་ནུ་དི.
༡༢༡༦. ‘‘སྭཱ་ཧཾ ཨ་བྦཱུ་ལ༹ྷ་ས་ལློ་སྨི, སཱི་ཏི་བྷཱུ་ཏོ་སྨི ནི་བྦུ་ཏོ;
ན སོ་ཙཱ་མི ན རོ་དཱ་མི, ཏ་ཝ སུ་ཏྭཱ་ན མཱ་ཎ་ཝཱ’’ཏི.
༡༢༠༨-༡༠. ཏ་ཏྠ ར་ཐ་པ་ཉྫ་རོཏི ར་ཐཱུ་པ་ཏྠཾ. ན ཝི་ནྡཱ་མཱིཏི ན ལ་བྷཱ་མི. བྷ་དྡ་མཱ་ཎ་ཝཱཏི ཨཱ་ལ་པ་ནཾ. པ་ཊི་པཱ་ད་ཡཱ་མཱིཏི ས་མྤཱ་དེ་ཏྭཱ ད་དཱ་མི, མཱ ཙ་ཀྐ་ཡུ་གཱ་བྷཱ་ཝེ་ན ཛཱི་ཝི་ཏཾ ཛ་ཧཱི་ཏི ཨ་དྷི་པྤཱ་ཡོ. ཨུ་བྷ་ཡེ་ཏྠ དི་སྶ་རེཏི ཨུ་བྷོ་པི ཨེ་ཏྠ ཙ་ནྡ་སཱུ་རི་ཡཱ ཨཱ་ཀཱ་སེ དི་སྶ་ནྟི. ཡ-ཀཱ་རོ པ་ད་ས་ནྡྷི་ཀ་རོ, ཨུ་བྷ་ཡེ ཨེ་ཏྠཱ་ཏི ཝཱ པ་ད་ཝི་བྷཱ་གོ.
༡༢༡༢. ག་མ་ནཱ་ག་མ་ནནྟི དི་ཝ་སེ དི་ཝ་སེ ཨོ་ག་མ་ནུ་གྒ་མ་ན་ཝ་སེ་ན ཙ་ནྡ་སཱུ་རི་ཡཱ་ནཾ ག་མ་ནཾ ཨཱ་ག་མ་ན་ཉྩ དི་སྶ་ཏི. ‘‘ག་མ་ནོ་ག་མ་ན’’ནྟི་པི པཱ་ལི༹, ཨུ་གྒ་མ་ནཾ ཨོ་ག་མ་ན་ཉྩཱ་ཏི ཨ་ཏྠོ. ཝ་ཎྞ་དྷཱ་ཏཱུཏི སཱི་ཏི་བྷཱ་ཝ་ཝི་སི་ཊྛཱ ཀ་ནྟ་བྷཱ་ཝ་བྷཱ་སུ་རཱ, ཨུ་ཎྷ་བྷཱ་ཝ་ཝི་སི་ཊྛཱ ཏི་ཀྑ་བྷཱ་ཝ་བྷཱ་སུ་རཱ ཙ ཝ་ཎྞ་ནི་བྷཱ. ཨུ་བྷ་ཡ་ཏྠཱཏི ཙ་ནྡེ སཱུ་རི་ཡེ ཙཱ་ཏི དྭཱི་སུ་པི ཝ་ཎྞ་དྷཱ་ཏུ དི་སྶ་ཏཱི་ཏི ཡོ་ཛེ་ཏ་བྦཾ. ཝཱི་ཐི་ཡཱཏི པ་ཝ་ཏྟ་ན་ཝཱི་ཐི་ཡཾ ཨཱ་ཀཱ་སེ, ནཱ་ག་ཝཱི་ཐི་ཡཱ་དི་ཝཱི་ཐི་ཡཾ ཝཱ. ‘‘ཨུ་བྷ་ཡེ་ཏྠཱ’’ཏི་པི པཱ་ཋོ, ཨུ་བྷ་ཡེ ཨེ་ཏྠཱ་ཏི པ་ད་ཝི་ས་ནྡྷི. བཱ་ལྱ་ཏ་རོཏི བཱ་ལ་ཏ་རོ ཨ་ཏི་ས་ཡེ་ན བཱ་ལོ.
༡༢༡༣. ཨི་མཾ པ་ན ཀ་ཐཾ སུ་ཏྭཱ ‘‘ཨ་ལ་བྦྷ་ནཱི་ཡ་ཝ་ཏྠུཾ ཝ་ཏཱ་ཧཾ པ་ཏྠེ་ཏྭཱ ཀེ་ཝ་ལཾ སོ་ཀ་གྒི་ནཱ ཌ་ཡ྄ཧཱ་མི, ཀིཾ མེ ནི་ར་ཏྠ་ཀེ་ན ཨ་ན་ཡ་བྱ་ས་ནེ་ནཱ’’ཏི པ་ཊི་ས་ངྑཱ་ནེ ཨ་ཊྛཱ་སི. ཨ་ཐ དེ་ཝ་པུ་ཏྟོ མ་ཊྛ་ཀུ་ཎྜ་ལཱི་རཱུ་པཾ པ་ཊི་སཾ་ཧ་རི་ཏྭཱ ཨ་ཏྟ་ནོ དི་བྦ་རཱུ་པེ་ནེ་ཝ ཨ་ཊྛཱ་སི. བྲཱ་ཧྨ་ཎོ པ་ན ཏཾ ཨ་ནོ་ལོ་ཀེ་ཏྭཱ མཱ་ཎ་ཝ་ཝོ་ཧཱ་རེ་ནེ་ཝ ཝོ་ཧ་ར་ནྟོ ‘‘ས་ཙྩཾ ཁོ ཝ་དེ་སི མཱ་ཎ་ཝཱ’’ཏི་ཨཱ་དི་མཱ་ཧ. ཏ་ཏྠ ཙ་ནྡཾ ཝི་ཡ དཱ་ར་ཀོ རུ་དནྟི ཙ་ནྡཾ ཨ་བྷི་པ་ཏྠ་ཡཾ རུ་ད་ནྟོ དཱ་ར་ཀོ ཝི་ཡཱ་ཏི ཨ་ཏྠོ. ཀཱ་ལ་ཀ་ཏཱ་བྷི་པ་ཏྠ་ཡིནྟི ཀཱ་ལ་ཀ་ཏཾ ཨ་བྷི་པ་ཏྠ་ཡིཾ. ‘‘ཨ་བྷི་པ་ཏྠ་ཡ’’ནྟི་པི པཱ་ཋོ.
༡༢༡༤-༥. ཨཱ་དི་ཏྟནྟི སོ་ཀ་གྒི་ནཱ ཨཱ་དི་ཏྟཾ. ནི་བྦཱ་པ་ཡེ ད་རནྟི ནི་བྦཱ་པ་ཡི ད་ར་ཐཾ སོ་ཀ་པ་རི་ལཱ༹་ཧཾ. ཨ་བྦ་ཧཱིཏི ཨུ་དྡྷ་རི.
ཨ་ཐ བྲཱ་ཧྨ་ཎོ སོ་ཀཾ ཝི་ནོ་དེ་ཏྭཱ ཨ་ཏྟ་ནོ ཨུ་པ་དེ་ས་དཱ་ཡ་ཀཾ དི་བྦ་རཱུ་པེ་ན ཋི་ཏཾ དི་སྭཱ ‘‘ཀོ ནཱ་མ ཏྭ’’ནྟི པུ་ཙྪ་ནྟོ –
༡༢༡༧. ‘‘དེ་ཝ་ཏཱ ནུ་སི ག་ནྡྷ་བྦོ, ཨ་དུ ས་ཀྐོ པུ་རི་ནྡ་དོ;
ཀོ ཝཱ ཏྭཾ ཀ་སྶ ཝཱ པུ་ཏྟོ, ཀ་ཐཾ ཛཱ་ནེ་མུ ཏཾ མ་ཡ’’ནྟི. –
ཨཱ་ཧ. སོ་པི ཏ་སྶ –
༡༢༡༨. ‘‘ཡ་ཉྩ ཀ་ནྡ་སི ཡ་ཉྩ རོ་ད་སི, པུ་ཏྟཾ ཨཱ་ལཱ༹་ཧ་ནེ ས་ཡཾ ད་ཧི་ཏྭཱ;
སྭཱ་ཧཾ ཀུ་ས་ལཾ ཀ་རི་ཏྭཱ ཀ་མྨཾ, ཏི་ད་སཱ་ནཾ ས་ཧ་བྱ་ཏཾ ག་ཏོ’’ཏི. –
ཨ་ཏྟཱ་ནཾ ཀ་ཐེ་སི. ཏ་ཏྠ ཡ་ཉྩ ཀ་ནྡ་སི ཡ་ཉྩ རོ་ད་སཱིཏི ཡཾ ཏ་ཝ པུ་ཏྟཾ མ་ཊྛ་ཀུ་ཎྜ་ལིཾ ཨུ་དྡི་སྶ རོ་ད་སི, ཨ་སྶཱུ་ནི མུ་ཉྩ་སི.
ཨ་ཐ ནཾ བྲཱ་ཧྨ་ཎོ ཨཱ་ཧ –
༡༢༡༩. ‘‘ཨ་པྤཾ ཝཱ བ་ཧུཾ ཝཱ ནཱ་དྡ་སཱ་མ, དཱ་ནཾ ད་ད་ནྟ་སྶ ས་ཀེ ཨ་གཱ་རེ;
ཨུ་པོ་ས་ཐ་ཀ་མྨཾ ཝཱ ཏཱ་དི་སཾ, ཀེ་ན ཀ་མྨེ་ན ག་ཏོ་སི དེ་ཝ་ལོ་ཀ’’ནྟི.
ཏ་ཏྠ ‘‘ཨུ་པོ་ས་ཐ་ཀ་མྨཾ ཝཱ ཏཱ་དི་སཾ ནཱ་དྡ་སཱ་མཱ’’ཏི ཡོ་ཛ་ནཱ.
ཨ་ཐ ནཾ མཱ་ཎ་ཝོ ཨཱ་ཧ –
༡༢༢༠. ‘‘ཨཱ་བཱ་དྷི་ཀོ་ཧཾ དུ་ཀྑི་ཏོ གི་ལཱ་ནོ, ཨཱ་ཏུ་ར་རཱུ་པོ་མྷི ས་ཀེ ནི་ཝེ་ས་ནེ;
བུ་དྡྷཾ ཝི་ག་ཏ་ར་ཛཾ ཝི་ཏི་ཎྞ་ཀ་ངྑཾ, ཨ་དྡ་ཀྑིཾ སུ་ག་ཏཾ ཨ་ནོ་མ་པ་ཉྙཾ.
༡༢༢༡. ‘‘སྭཱ་ཧཾ མུ་དི་ཏ་མ་ནོ པ་ས་ནྣ་ཙི་ཏྟོ, ཨ་ཉྫ་ལིཾ ཨ་ཀ་རིཾ ཏ་ཐཱ་ག་ཏ་སྶ;
ཏཱ་ཧཾ ཀུ་ས་ལཾ ཀ་རི་ཏྭཱ་ན ཀ་མྨཾ, ཏི་ད་སཱ་ནཾ ས་ཧ་བྱ་ཏཾ ག་ཏོ’’ཏི.
༡༢༢༠-༢༡. ཏ་ཏྠ ཨཱ་བཱ་དྷི་ཀོཏི ཨཱ་བཱ་དྷ་ས་མ་ངྒཱི. དུ་ཀྑི་ཏོཏི ཏེ་ནེ་ཝ ཨཱ་བཱ་དྷི་ཀ་བྷཱ་ཝེ་ན ཛཱ་ཏ་དུ་ཀྑོ. གི་ལཱ་ནོཏི གི་ལཱ་ཡ་མཱ་ནོ་ཏི ཨ་ཏྠོ. ཨཱ་ཏུ་ར་རཱུ་པོཏི དུ་ཀྑ་ཝེ་ད་ནཱ་བྷི་ཏུ་ནྣ་ཀཱ་ཡོ. ཝི་ག་ཏ་ར་ཛནྟི ཝི་ག་ཏ་རཱ་གཱ་དི་ར་ཛཾ. ཝི་ཏི་ཎྞ་ཀ་ངྑནྟི ས་བྦ་སོ སཾ་ས་ཡཱ་ནཾ ས་མུ་ཙྪི་ནྣ་ཏྟཱ ཏི་ཎྞ་ཝི་ཙི་ཀི་ཙྪཾ. ཨ་ནོ་མ་པ་ཉྙནྟི པ་རི་པུ་ཎྞ་པ་ཉྙཾ, ས་བྦ་ཉྙུ་ནྟི ཨ་ཏྠོ. ཨ་ཀ་རིནྟི ཨ་ཀཱ་སིཾ. ཏཱ་ཧནྟི ཏཾ ཨ་ཧཾ.
ཨེ་ཝཾ ཏ་སྨིཾ ཀ་ཐེ་ནྟེ་ཡེ་ཝ བྲཱ་ཧྨ་ཎ་སྶ ས་ཀ་ལ་ས་རཱི་རཾ པཱི་ཏི་ཡཱ པ་རི་པཱུ་རི. སོ ཏཾ པཱི་ཏིཾ པ་ཝེ་དེ་ནྟོ –
༡༢༢༢. ‘‘ཨ་ཙྪ་རི་ཡཾ ཝ་ཏ ཨ་བྦྷུ་ཏཾ ཝ་ཏ,
ཨ་ཉྫ་ལི་ཀ་མྨ་སྶ ཨ་ཡ་མཱི་དི་སོ ཝི་པཱ་ཀོ;
ཨ་ཧ་མྤི མུ་དི་ཏ་མ་ནོ པ་ས་ནྣ་ཙི་ཏྟོ,
ཨ་ཛྫེ་ཝ བུ་དྡྷཾ ས་ར་ཎཾ ཝ་ཛཱ་མཱི’’ཏི. – ཨཱ་ཧ;
ཏ་ཏྠ ཨ་ན་བྷི་ཎྷ་པྤ་ཝ་ཏྟི་ཏཱ་ཡ ཨ་ཙྪ་རཾ པ་ཧ་རི་ཏུཾ ཡོ་གྒ་ནྟི ཨ་ཙྪ་རི་ཡཾ, ཨ་བྷཱུ་ཏ་པུ་བྦ་ཏཱ་ཡ ཨ་བྦྷུ་ཏཾ. ཨུ་བྷ་ཡེ་ན་པི ཝི་མྷ་ཡཱ་ཝ་ཧ་ཏཾ་ཡེ་ཝ ད་སྶེ་ཏྭཱ ‘‘ཨ་ཧ་མྤི མུ་དི་ཏ་མ་ནོ པ་ས་ནྣ་ཙི་ཏྟོ, ཨ་ཛྫེ་ཝ བུ་དྡྷཾ ས་ར་ཎཾ ཝ་ཛཱ་མཱི’’ཏི ཨཱ་ཧ.
ཨ་ཐ ནཾ དེ་ཝ་པུ་ཏྟོ ས་ར་ཎ་ག་མ་ནེ སཱི་ལ་ས་མཱ་དཱ་ནེ ཙ ནི་ཡོ་ཛེ་ནྟོ –
༡༢༢༣. ‘‘ཨ་ཛྫེ་ཝ བུ་དྡྷཾ ས་ར་ཎཾ ཝ་ཛཱ་ཧི, དྷ་མྨ་ཉྩ ས་ངྒྷ་ཉྩ པ་ས་ནྣ་ཙི་ཏྟོ;
ཏ་ཐེ་ཝ སི་ཀྑཱ་ཡ པ་དཱ་ནི པ་ཉྩ, ཨ་ཁ་ཎྜ་ཕུ་ལླཱ་ནི ས་མཱ་དི་ཡ་སྶུ.
༡༢༢༤. ‘‘པཱ་ཎཱ་ཏི་པཱ་ཏཱ ཝི་ར་མ་སྶུ ཁི་པྤཾ, ལོ་ཀེ ཨ་དི་ནྣཾ པ་རི་ཝ་ཛྫ་ཡ་སྶུ;
ཨ་མ་ཛྫ་པོ མཱ ཙ མུ་སཱ བྷ་ཎཱ་ཧི, ས་ཀེ་ན དཱ་རེ་ན ཙ ཧོ་ཧི ཏུ་ཊྛོ’’ཏི. –
གཱ་ཐཱ་དྭ་ཡ་མཱ་ཧ.
༡༢༢༣. ཏ་ཏྠ ཏ་ཐེ་ཝཱཏི ཡ་ཐཱ པ་ས་ནྣ་ཙི་ཏྟོ ‘‘ས་མྨཱ་ས་མྦུ་དྡྷོ བྷ་ག་ཝཱ’’ཏི བུ་དྡྷཾ ས་ར་ཎཾ ཝ་ཛེ་སི, ཏ་ཐེ་ཝ ‘‘སྭཱ་ཀྑཱ་ཏོ དྷ་མྨོ, སུ་པྤ་ཊི་པ་ནྣོ ས་ངྒྷོ’’ཏི པ་ས་ནྣ་ཙི་ཏྟོ དྷ་མྨ་ཉྩ ས་ངྒྷ་ཉྩ ས་ར་ཎཾ ཝ་ཛཱ་ཧི. ཡ་ཐཱ ཝཱ པ་ས་ནྣ་ཙི་ཏྟོ ར་ཏ་ན་ཏྟ་ཡཾ ས་ར་ཎཾ ཝ་ཛེ་སི, ཏ་ཐེ་ཝ ‘‘ཨ་ཡཾ ཨེ་ཀཾ་ས་ཏོ དི་ཊྛེ་ཝ དྷ་མྨེ ཨ་བྷི་ས་མྤ་རཱ་ཡ་ཉྩ ཧི་ཏ་སུ་ཁཱ་ཝ་ཧོ’’ཏི པ་ས་ནྣ་ཙི་ཏྟོ སི་ཀྑཱ་ཡ ཨ་དྷི་སཱི་ལ་སི་ཀྑཱ་ཡ པ་དཱ་ནི ཀོ་ཊྛཱ་ས་བྷཱུ་ཏཱ་ནི ཨ་དྷི་ཙི་ཏྟ་ཨ་དྷི་པ་ཉྙཱ་སི་ཀྑཱ་ཡ ཝཱ ཨུ་པཱ་ཡ་བྷཱུ་ཏཱ་ནི པ་ཉྩ་སཱི་ལཱ་ནི ཨ་ཝི་ཀོ་པ་ན་ཏོ ཙ ཨ་སཾ་ཀི་ལི་སྶ་ན་ཏོ ཙ ཨ་ཁ་ཎྜ་ཕུ་ལླཱ་ནི ས་མཱ་དི་ཡ་སྶུ, ས་མཱ་དཱ་ཡ ཝ་ཏྟ་སྶཱུ་ཏི ཨ་ཏྠོ.
ཨེ་ཝཾ དེ་ཝ་པུ་ཏྟེ་ན ས་ར་ཎ་ག་མ་ནེ སཱི་ལ་ས་མཱ་དཱ་ནེ ཙ ནི་ཡོ་ཛི་ཏོ བྲཱ་ཧྨ་ཎོ ཏ་སྶ ཝ་ཙ་ནཾ སི་ར་སཱ ས་མྤ་ཊི་ཙྪ་ནྟོ –
༡༢༢༥. ‘‘ཨ་ཏྠ་ཀཱ་མོ་སི མེ ཡ་ཀྑ, ཧི་ཏ་ཀཱ་མོ་སི དེ་ཝ་ཏེ;
ཀ་རོ་མི ཏུ་ཡ྄ཧཾ ཝ་ཙ་ནཾ, ཏྭཾ་སི ཨཱ་ཙ་རི་ཡོ མ་མཱ’’ཏི. –
གཱ་ཐཾ ཝ་ཏྭཱ ཏ་ཏྠ པ་ཏི་ཊྛ་ཧ་ནྟོ –
༡༢༢༦. ‘‘ཨུ་པེ་མི ས་ར་ཎཾ བུ་དྡྷཾ, དྷ་མྨ་ཉྩཱ་པི ཨ་ནུ་ཏྟ་རཾ;
ས་ངྒྷ་ཉྩ ན་ར་དེ་ཝ་སྶ, ག་ཙྪཱ་མི ས་ར་ཎཾ ཨ་ཧཾ.
༡༢༢༧. ‘‘པཱ་ཎཱ་ཏི་པཱ་ཏཱ ཝི་ར་མཱ་མི ཁི་པྤཾ, ལོ་ཀེ ཨ་དི་ནྣཾ པ་རི་ཝ་ཛྫ་ཡཱ་མི;
ཨ་མ་ཛྫ་པོ ནོ ཙ མུ་སཱ བྷ་ཎཱ་མི, ས་ཀེ་ན དཱ་རེ་ན ཙ ཧོ་མི ཏུ་ཊྛོ’’ཏི. –
གཱ་ཐཱ་དྭ་ཡ་མཱ་ཧ. ཏ་མྤི སུ་ཝི་ཉྙེ་ཡྻ་མེ་ཝ.
ཏ་ཏོ དེ་ཝ་པུ་ཏྟོ ‘‘ཀ་ཏཾ མ་ཡཱ བྲཱ་ཧྨ་ཎ་སྶ ཀ་ཏྟ་བྦ་ཡུ་ཏྟ་ཀཾ, ཨི་དཱ་ནི ས་ཡ་མེ་ཝ བྷ་ག་ཝ་ནྟཾ ཨུ་པ་ས་ངྐ་མི་སྶ་ཏཱི’’ཏི ཏ་ཏྠེ་ཝ ཨ་ནྟ་ར་དྷཱ་ཡི. བྲཱ་ཧྨ་ཎོ་པི ཁོ བྷ་ག་ཝ་ཏི ས་ཉྫཱ་ཏ་པ་སཱ་ད་བ་ཧུ་མཱ་ནོ དེ་ཝ་ཏཱ་ཡ ཙ ཙོ་དི་ཡ་མཱ་ནོ ‘‘ས་མ་ཎཾ གོ་ཏ་མཾ ཨུ་པ་ས་ངྐ་མི་སྶཱ་མཱི’’ཏི ཝི་ཧཱ་རཱ་བྷི་མུ་ཁོ ག་ཙྪ་ཏི. ཏཾ དི་སྭཱ མ་ཧཱ་ཛ་ནོ ‘‘ཨ་ཡཾ བྲཱ་ཧྨ་ཎོ ཨེ་ཏྟ་ཀཾ ཀཱ་ལཾ ཏ་ཐཱ་ག་ཏཾ ཨ་ནུ་པ་ས་ངྐ་མི་ཏྭཱ ཨ་ཛྫ པུ་ཏྟ་སོ་ཀེ་ན ཨུ་པ་ས་ངྐ་མ་ཏི, ཀཱི་དི་སཱི ནུ ཁོ དྷ་མྨ་དེ་ས་ནཱ བྷ་ཝི་སྶ་ཏཱི’’ཏི ཏཾ ཨ་ནུ་བ་ནྡྷི.
བྲཱ་ཧྨ་ཎོ བྷ་ག་ཝ་ནྟཾ ཨུ་པ་ས་ངྐ་མི་ཏྭཱ པ་ཊི་ས་ནྠཱ་རཾ ཀ་ཏྭཱ ཨེ་ཝ་མཱ་ཧ ‘‘ས་ཀྐཱ ནུ ཁོ བྷོ གོ་ཏ་མ ཀི་ཉྩི དཱ་ནཾ ཨ་ད་ཏྭཱ སཱི་ལཾ ཝཱ ཨ་ར་ཀྑི་ཏྭཱ ཀེ་ཝ་ལཾ ཏུ་མྷེ་སུ པ་སཱ་ད་མ་ཏྟེ་ན ས་གྒེ ནི་བྦ་ཏྟི་ཏུ’’ནྟི. ‘‘ན་ནུ, བྲཱ་ཧྨ་ཎ, ཨ་ཛྫ པ་ཙྩཱུ་ས་ཝེ་ལཱ་ཡཾ མ་ཊྛ་ཀུ་ཎྜ་ལི་ནཱ དེ་ཝ་པུ་ཏྟེ་ན ཨ་ཏྟ་ནོ དེ་ཝ་ལོ་ཀཱུ་པ་པ་ཏྟི་ཀཱ་ར་ཎཾ ཏུ་ཡ྄ཧཾ ཀ་ཐི་ཀ’’ནྟི བྷ་ག་ཝཱ ཨ་ཝོ་ཙ. ཏ་སྨིཾ ཁ་ཎེ མ་ཊྛ་ཀུ་ཎྜ་ལཱི་དེ་ཝ་པུ་ཏྟོ ས་ཧ ཝི་མཱ་ནེ་ན ཨཱ་ག་ནྟྭཱ དི་སྶ་མཱ་ན་རཱུ་པོ ཝི་མཱ་ན་ཏོ ཨོ་རུ་ཡ྄ཧ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨ་ཉྫ་ལིཾ པ་གྒ་ཡ྄ཧ ཨེ་ཀ་མ་ནྟཾ ཨ་ཊྛཱ་སི. ཨ་ཐ བྷ་ག་ཝཱ ཏ་སྶཾ པ་རི་ས་ཏི ཏེ་ན དེ་ཝ་པུ་ཏྟེ་ན ཀ་ཏ་སུ་ཙ་རི་ཏཾ ཀ་ཐེ་ཏྭཱ པ་རི་སཱ་ཡ ཙི་ཏྟ་ཀ་ལླ་ཏཾ ཉ་ཏྭཱ སཱ་མུ་ཀྐཾ་སི་ཀཾ དྷ་མྨ་དེ་ས་ནཾ ཨ་ཀཱ་སི. དེ་ས་ནཱ་པ་རི་ཡོ་སཱ་ནེ དེ་ཝ་པུ་ཏྟོ ཙ བྲཱ་ཧྨ་ཎོ ཙ ས་ནྣི་པ་ཏི་ཏ་པ་རི་སཱ ཙཱ་ཏི ཙ་ཏུ་རཱ་སཱི་ཏི་ཡཱ པཱ་ཎ་ས་ཧ་སྶཱ་ནཾ དྷ་མྨཱ་བྷི་ས་མ་ཡོ ཨ་ཧོ་སཱི་ཏི.
མ་ཊྛ་ཀུ་ཎྜ་ལཱི་ཝི་མཱ་ན་ཝ་ཎྞ་ནཱ ནི་ཊྛི་ཏཱ.