༨. ཨ་ནེ་ཀ་ཝ་ཎྞ་ཝི་མཱ་ན་ཝ་ཎྞ་ནཱ
ཨ་ནེ་ཀ་ཝ་ཎྞཾ ད་ར་སོ་ཀ་ནཱ་ས་ནནྟི ཨ་ནེ་ཀ་ཝ་ཎྞ་ཝི་མཱ་ནཾ. ཏ་སྶ ཀཱ ཨུ་པྤ་ཏྟི? བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ. ཏེ་ན ས་མ་ཡེ་ན ཨཱ་ཡ་སྨཱ མ་ཧཱ་མོ་གྒ་ལླཱ་ནོ ཧེ་ཊྛཱ ཝུ་ཏྟ་ན་ཡེ་ན དེ་ཝ་ཙཱ་རི་ཀཾ ཙ་ར་ནྟོ ཏཱ་ཝ་ཏིཾ་ས་བྷ་ཝ་ནཾ ཨ་ག་མཱ་སི. ཨ་ཐ ནཾ ཨ་ནེ་ཀ་ཝ་ཎྞོ དེ་ཝ་པུ་ཏྟོ དི་སྭཱ ས་ཉྫཱ་ཏ་གཱ་ར་ཝ་བ་ཧུ་མཱ་ནོ ཨུ་པ་ས་ངྐ་མི་ཏྭཱ ཨ་ཉྫ་ལིཾ པ་གྒ་ཡ྄ཧ ཨ་ཊྛཱ་སི. ཐེ་རོ –
༡༡༩༩. ‘‘ཨ་ནེ་ཀ་ཝ་ཎྞཾ ད་ར་སོ་ཀ་ནཱ་ས་ནཾ, ཝི་མཱ་ན་མཱ་རུ་ཡ྄ཧ ཨ་ནེ་ཀ་ཙི་ཏྟཾ;
པ་རི་ཝཱ་རི་ཏོ ཨ་ཙྪ་རཱ་ས་ངྒ་ཎེ་ན, སུ་ནི་མྨི་ཏོ བྷཱུ་ཏ་པ་ཏཱི་ཝ མོ་ད་སི.
༡༢༠༠. ‘‘ས་མ་སྶ་མོ ན་ཏྠི ཀུ་ཏོ པ་ནུ་ཏྟ་རོ, ཡ་སེ་ན པུ་ཉྙེ་ན ཙ ཨི་དྡྷི་ཡཱ ཙ;
ས་བྦེ ཙ དེ་ཝཱ ཏི་ད་ས་ག་ཎཱ ས་མེ་ཙྩ, ཏཾ ཏཾ ན་མ་སྶ་ནྟི ས་སིཾ་ཝ དེ་ཝཱ;
ཨི་མཱ ཙ ཏེ ཨ་ཙྪ་རཱ་ཡོ ས་མ་ནྟ་ཏོ, ན་ཙྩ་ནྟི གཱ་ཡ་ནྟི པ་མོ་ད་ཡ་ནྟི.
༡༢༠༡. ‘‘དེ་ཝི་དྡྷི་པ་ཏྟོ་སི མ་ཧཱ་ནུ་བྷཱ་ཝོ,
མ་ནུ་སྶ་བྷཱུ་ཏོ ཀི་མ་ཀཱ་སི པུ་ཉྙཾ;
ཀེ་ནཱ་སི ཨེ་ཝཾ ཛ་ལི་ཏཱ་ནུ་བྷཱ་ཝོ,
ཝ་ཎྞོ ཙ ཏེ ས་བྦ་དི་སཱ པ་བྷཱ་ས་ཏཱི’’ཏི. –
ཨ་དྷི་ག་ཏ་ས་མྤ་ཏྟི་ཀི་ཏྟ་ན་མུ་ཁེ་ན ཀ་ཏ་ཀ་མྨཾ པུ་ཙྪི. ཏཾ ད་སྶེ་ཏུཾ –
༡༢༠༢. ‘‘སོ དེ་ཝ་པུ་ཏྟོ ཨ་ཏྟ་མ་ནོ…པེ…ཡ་སྶ ཀ་མྨ་སྶི་དཾ ཕ་ལ’’ནྟི. –
ཝུ་ཏྟཾ. སོ་པི –
༡༢༠༣. ‘‘ཨ་ཧཾ བྷ་ད་ནྟེ ཨ་ཧུ་ཝཱ་སི པུ་བྦེ, སུ་མེ་དྷ་ནཱ་མ་སྶ ཛི་ན་སྶ སཱ་ཝ་ཀོ;
པུ་ཐུ་ཛྫ་ནོ ཨ་ན་ནུ་བོ་དྷོ་ཧ་མ་སྨི, སོ ས་ཏྟ ཝ་སྶཱ་ནི པ་རི་བྦ་ཛི་སྶ་ཧཾ.
༡༢༠༤. ‘‘སོ་ཧཾ སུ་མེ་དྷ་སྶ ཛི་ན་སྶ ས་ཏྠུ་ནོ, པ་རི་ནི་བྦུ་ཏ་སྶོ་གྷ་ཏི་ཎྞ་སྶ ཏཱ་དི་ནོ;
ར་ཏ་ནུ་ཙྩ་ཡཾ ཧེ་མ་ཛཱ་ལེ་ན ཚ་ནྣཾ, ཝ་ནྡི་ཏྭཱ ཐཱུ་པ་སྨིཾ མ་ནཾ པ་སཱ་ད་ཡིཾ.
༡༢༠༥. ‘‘ན མཱ་སི དཱ་ནཾ ན ཙ མ་ཏྠི དཱ་ཏུཾ, པ་རེ ཙ ཁོ ཏ་ཏྠ ས་མཱ་ད་པེ་སིཾ;
པཱུ་ཛེ་ཐ ནཾ པཱུ་ཛ་ནཱི་ཡ་སྶ དྷཱ་ཏུཾ, ཨེ་ཝཾ ཀི་ར ས་གྒ་མི་ཏོ ག་མི་སྶ་ཐ.
༡༢༠༦. ‘‘ཏ་དེ་ཝ ཀ་མྨཾ ཀུ་ས་ལཾ ཀ་ཏཾ མ་ཡཱ,
སུ་ཁ་ཉྩ དི་བྦཾ ཨ་ནུ་བྷོ་མི ཨ་ཏྟ་ནཱ;
མོ་དཱ་མ་ཧཾ ཏི་ད་ས་ག་ཎ་སྶ མ་ཛ྄ཛྷེ,
ན ཏ་སྶ པུ་ཉྙ་སྶ ཁ་ཡ་མྤི ཨ་ཛ྄ཛྷ་ག’’ནྟི. – ཀ་ཐེ་སི;
ཨི་ཏོ ཀི་ར ཏིཾ་ས་ཀ་པྤ་ས་ཧ་སྶེ སུ་མེ་དྷོ ནཱ་མ ས་མྨཱ་ས་མྦུ་དྡྷོ ལོ་ཀེ ཨུ་པྤ་ཛྫི་ཏྭཱ ས་དེ་ཝ་ཀཾ ལོ་ཀཾ ཨེ་ཀོ་བྷཱ་སཾ ཀ་ཏྭཱ ཀ་ཏ་བུ་དྡྷ་ཀི་ཙྩོ པ་རི་ནི་བྦུ་ཏོ, མ་ནུ་སྶེ་ཧི ཙ བྷ་ག་ཝ་ཏོ དྷཱ་ཏུཾ ག་ཧེ་ཏྭཱ ར་ཏ་ན་ཙེ་ཏི་ཡེ ཀ་ཏེ ཨ་ཉྙ་ཏ་རོ པུ་རི་སོ ས་ཏྠུ སཱ་ས་ནེ པ་བྦ་ཛི་ཏྭཱ ས་ཏྟ ཝ་སྶཱ་ནི བྲ་ཧྨ་ཙ་རི་ཡཾ ཙ་རི་ཏྭཱ ཨ་ན་ཝ་ཊྛི་ཏ་ཙི་ཏྟ་ཏཱ་ཡ ཀུ་ཀྐུ་ཙྩ་ཀོ ཧུ་ཏྭཱ ཨུ་པྤ་བྦ་ཛི. ཨུ་པྤ་བྦ་ཛི་ཏོ ཙ སཾ་ཝེ་ག་བ་ཧུ་ལ་ཏཱ་ཡ དྷ་མྨ་ཙྪ་ནྡ་ཝ་ནྟ་ཏཱ་ཡ ཙ ཙེ་ཏི་ཡ་ངྒ་ཎེ ས་མྨ་ཛྫ་ན་པ་རི་བྷ་ཎྜཱ་དཱི་ནི ཀ་རོ་ནྟོ ནི་ཙྩ་སཱི་ལ་ཨུ་པོ་ས་ཐ་སཱི་ལཱ་ནི ར་ཀྑ་ནྟོ དྷ་མྨཾ སུ་ཎ་ནྟོ ཨ་ཉྙེ ཙ པུ་ཉྙ་ཀི་རི་ཡཱ་ཡ ས་མཱ་ད་པེ་ནྟོ ཝི་ཙ་རི. སོ ཨཱ་ཡུ་པ་རི་ཡོ་སཱ་ནེ ཀཱ་ལ་ཀ་ཏོ ཏཱ་ཝ་ཏིཾ་སེ་སུ ནི་བྦ་ཏྟི. སོ པུ་ཉྙ་ཀ་མྨ་སྶ ཨུ་ལཱ༹་ར་བྷཱ་ཝེ་ན མ་ཧེ་ས་ཀྑོ མ་ཧཱ་ནུ་བྷཱ་ཝོ ས་ཀྐཱ་དཱི་ཧི དེ་ཝ་ཏཱ་ཧི ས་ཀྐ་ཏ་པཱུ་ཛི་ཏོ ཧུ་ཏྭཱ ཏ་ཏྠ ཡཱ་ཝ་ཏཱ་ཡུ་ཀཾ ཋ་ཏྭཱ ཏ་ཏོ ཙུ་ཏོ ཨ་པ་རཱ་པ་རཾ དེ་ཝ་མ་ནུ་སྶེ་སུ སཾ་ས་ར་ནྟོ ཨི་མ་སྨིཾ བུ་དྡྷུ་པྤཱ་དེ ཏ་སྶེ་ཝ ཀ་མྨ་སྶ ཝི་པཱ་ཀཱ་ཝ་སེ་སེ་ན ཏཱ་ཝ་ཏིཾ་ས་བྷ་ཝ་ནེ ནི་བྦ་ཏྟི, ‘‘ཨ་ནེ་ཀ་ཝ་ཎྞོ’’ཏི ནཾ དེ་ཝ་ཏཱ ས་ཉྫཱ་ནིཾ་སུ. ཏཾ ས་ནྡྷཱ་ཡ ཝུ་ཏྟཾ ‘‘ཨ་ཐ ནཾ ཨ་ནེ་ཀ་ཝ་ཎྞོ དེ་ཝ་པུ་ཏྟོ…པེ… ན ཏ་སྶ པུ་ཉྙ་སྶ ཁ་ཡ་མྤི ཨ་ཛ྄ཛྷ་ག་ནྟི ཀ་ཐེ་སཱི’’ཏི.
༡༡༩༩. ཏ་ཏྠ ཨ་ནེ་ཀ་ཝ་ཎྞནྟི ནཱི་ལ་པཱི་ཏཱ་དི་ཝ་སེ་ན ཝི་ཝི་དྷ་ཝ་ཎྞ་ཏཱ་ཡ ཨ་ན་ནྟ་ར་ཝི་མཱ་ནཱ་དཱི་ནཾ ཝི་ཝི་དྷ་ས་ཎྛཱ་ན་ཏཱ་ཡ ཙ ནཱ་ནཱ་ཝི་དྷ་ཝ་ཎྞཾ. ད་ར་སོ་ཀ་ནཱ་ས་ནནྟི སཱི་ཏ་ལ་བྷཱ་ཝེ་ན ད་ར་ཐ་པ་རི་ལཱ༹་ཧཱ་ནཾ ཝི་ནོ་ད་ན་ཏོ མ་ནུ་ཉྙ་ཏཱ་ཡ ད་སྶ་ནཱི་ཡ་ཏཱ་ཡ ཙ སོ་ཀ་སྶ ཨ་ནོ་ཀཱ་ས་ཏོ ད་ར་སོ་ཀ་ནཱ་ས་ནཾ. ཨ་ནེ་ཀ་ཙི་ཏྟནྟི ནཱ་ནཱ་ཝི་དྷ་ཙི་ཏྟ་རཱུ་པཾ. སུ་ནི་མྨི་ཏོ བྷཱུ་ཏ་པ་ཏཱི་ཝཱཏི ཏཱ་ཝ་ཏིཾ་ས་ཀཱ་ཡི་ཀོ་པི ཨུ་ལཱ༹་ར་དི་བྦ་བྷོ་ག་ཏཱ་ཡ སུ་ནི་མྨི་ཏ་དེ་ཝ་རཱ་ཛཱ ཝི་ཡ མོ་ད་སི ཏུ་སྶ་སི ཨ་བྷི་ར་མ་སི.
༡༢༠༠. ས་མ་སྶ་མོཏི ས་མོ ཨེ་ཝ ཧུ་ཏྭཱ ས་མོ, ནི་བྦ་རི་ཡཱ་ཡེ་ན ས་དི་སོ ཏེ ཏུ་ཡ྄ཧཾ ན་ཏྠི, ཀུ་ཏོ པ་ན ཀེ་ན ཀཱ་ར་ཎེ་ན ཨུ་ཏྟ་རི ཨ་དྷི་ཀོ ཀོ ནཱ་མ སི་ཡཱ. ཀེ་ན པ་ན ས་མ་ཏཱ ཨུ་ཏྟ་རི་ཏ་ར་ཏཱ ཙཱ་ཏི ཨཱ་ཧ ‘‘ཡ་སེ་ན པུ་ཉྙེ་ན ཙ ཨི་དྡྷི་ཡཱ ཙཱ’’ཏི. ཏ་ཏྠ ཡ་སེ་ནཱཏི པ་རི་ཝཱ་རེ་ན. ཨི་དྡྷི་ཡཱཏི ཨཱ་ནུ་བྷཱ་ཝེ་ན. ཡ་སེ་ནཱཏི ཝཱ ཨི་སྶ་རི་ཡེ་ན, ཨི་དྡྷི་ཡཱཏི དེ་ཝི་དྡྷི་ཡཱ. ཡ་སེ་ནཱཏི ཝཱ ཝི་བྷ་ཝ་ས་མྤ་ཏྟི་ཡཱ, ཨི་དྡྷི་ཡཱཏི ཡ་ཐི་ཙྪི ཏ་སྶ ཀཱ་མ་གུ་ཎ་སྶ ཨི་ཛ྄ཛྷ་ནེ་ན. ཡ་སེ་ནཱཏི ཝཱ ཀི་ཏྟི་གྷོ་སེ་ན, ཨི་དྡྷི་ཡཱཏི ས་མི་དྡྷི་ཡཱ. པུ་ཉྙེ་ནཱཏི ཏ་ཏྠ ཏ་ཏྠ ཝུ་ཏྟཱ་ཝ་སི་ཊྛ་པུ་ཉྙ་ཕ་ལེ་ན, པུ་ཉྙ་ཀ་མྨེ་ནེ་ཝ ཝཱ.
‘‘ས་བྦེ ཙ དེ་ཝཱ’’ཏི སཱ་མ་ཉྙ་ཏོ ག་ཧི་ཏ་མ་ཏྠཾ ‘‘ཏི་ད་ས་ག་ཎཱ’’ཏི ཨི་མི་ནཱ ཝི་སེ་སེ་ཏྭཱ ཝུ་ཏྟཾ. ཨེ་ཀ་ཙྩ་སྶ པ་ཙྩེ་ཀཾ ནི་པ་ཙྩ་ཀཱ་རཾ ཀ་རོ་ནྟཱ་པི པ་མུ་དི་ཏཱ ན ཀ་རོ་ནྟི, ན ཨེ་ཝ་མེ་ཏ་སྶ. ཨེ་ཏ་སྶ པ་ན པ་མུ་དི་ཏཱ་པི ཀ་རོ་ནྟི་ཡེ་ཝཱ་ཏི ད་སྶེ་ཏུཾ ‘‘ས་མེ་ཙྩཱ’’ཏི ཝུ་ཏྟཾ. ཏཾ ཏནྟི ཏཾ ཏྭཾ. ས་སིཾ་ཝ དེ་ཝཱཏི ཡ་ཐཱ ནཱ་མ སུ་ཀྐ་པ་ཀྑ་པཱ་ཊི་པ་དི་ཡཾ དི་སྶ་མཱ་ནཾ ས་སིཾ ཙ་ནྡཾ མ་ནུ་སྶཱ དེ་ཝཱ ཙ ཨཱ་ད་ར་ཛཱ་ཏཱ ན་མ་སྶ་ནྟི, ཨེ་ཝཾ ཏཾ ས་བྦེ་པི ཏི་ད་ས་ག་ཎཱ ན་མ་སྶ་ནྟཱི་ཏི ཨ་ཏྠོ.
༡༢༠༣. བྷ་ད་ནྟེཏི ཐེ་རཾ གཱ་ར་ཝ་བ་ཧུ་མཱ་ནེ་ན ས་མུ་དཱ་ཙ་ར་ཏི. ཨ་ཧུ་ཝཱ་སིནྟི ཨ་ཧོ་སིཾ. པུ་བྦེཏི པུ་རི་མ་ཛཱ་ཏི་ཡཾ. སུ་མེ་དྷ་ནཱ་མ་སྶ ཛི་ན་སྶ སཱ་ཝ་ཀོཏི སུ་མེ་དྷོ་ཏི ཨེ་ཝཾ པཱ་ཀ་ཊ་ནཱ་མ་སྶ ས་མྨཱ་ས་མྦུ་དྡ་སྶ སཱ་ས་ནེ པ་བྦ་ཛི་ཏ་བྷཱ་ཝེ་ན སཱ་ཝ་ཀོ. པུ་ཐཱུ་ཛྫ་ནོཏི ཨ་ན་རི་ཡོ. ཏ་ཏྠཱ་པི ས་ཙྩཱ་ནཾ ཨ་ནུ་བོ་དྷ་མ་ཏྟ་སྶཱ་པི ཨ་བྷཱ་ཝེ་ན ཨ་ན་ནུ་བོ་དྷོ. སོ ས་ཏྟ ཝ་སྶཱ་ནི པ་རི་བྦ་ཛི་སྶ་ཧནྟི སོ ཨ་ཧཾ ས་ཏྟ སཾ་ཝ་ཙྪ་རཱ་ནི པ་བྦ་ཛྫཱ་གུ་ཎ་མ་ཏྟེ་ན ཝི་ཙ་རིཾ, ཨུ་ཏྟ་རི་མ་ནུ་སྶ་དྷ་མྨཾ ནཱ་དྷི་ག་ཙྪི་ནྟི ཨ་དྷི་པྤཱ་ཡོ.
༡༢༠༤. ར་ཏ་ནུ་ཙྩ་ཡནྟི མ་ཎི་ཀ་ན་ཀཱ་དི་ར་ཏ་ནེ་ཧི ཨུ་ཙྩི་ཏཾ ཨུ་སྶི་ཏ་ར་ཏ་ན་ཙེ་ཏི་ཡཾ. ཧེ་མ་ཛཱ་ལེ་ན ཚ་ནྣནྟི ས་མ་ནྟ་ཏོ ཨུ་པ་རི ཙ ཀ་ཉྩ་ན་ཛཱ་ལེ་ན པ་ཊི་ཙྪཱ་དི་ཏཾ. ཝ་ནྡི་ཏྭཱཏི པ་ཉྩ་པ་ཏི་ཊྛི་ཏེ་ན ཏ་ཏྠ ཏ་ཏྠ པ་ཎཱ་མཾ ཀ་ཏྭཱ. ཐཱུ་པ་སྨིཾ མ་ནཾ པ་སཱ་ད་ཡིནྟི ‘‘ས་བྦ་ཉྙུ་གུ་ཎཱ་དྷི་ཊྛཱ་ནཱ་ཡ ཝ་ཏ དྷཱ་ཏུ་ཡཱ ཨ་ཡཾ ཐཱུ་པོ’’ཏི ཐཱུ་པ་སྨིཾ ཙི་ཏྟཾ པ་སཱ་དེ་སིཾ.
༡༢༠༥. ན མཱ་སི དཱ་ནནྟི མེ མ་ཡཱ ཀ་ཏཾ དཱ་ནཾ ནཱ་སི ནཱ་ཧོ་སི. ཀ་སྨཱ པ་ན? ན ཙ མེ་ཏྠི དཱ་ཏུནྟི མེ མ་མ པ་རི་གྒ་ཧ་བྷཱུ་ཏཾ དཱ་ནཾ དཱ་ཏུཾ ན ཨ་ཏྠི, ན ཀི་ཉྩི དེ་ཡྻ་ཝ་ཏྠུ ཝི་ཛྫ་ཏི, པ་རེ ཙ ཁོ ས་ཏྟེ ཏ་ཏྠ དཱ་ནེ ས་མཱ་ད་པེ་སིཾ. ‘‘པ་རེ་ས་ཉྩ ཏ་ཏྠ ས་མཱ་ད་པེ་སི’’ནྟི ཙ པ་ཋ་ནྟི, ཏ་ཏྠ པ་རེ་སནྟི ཨུ་པ་ཡོ་ག་ཏྠེ སཱ་མི་ཝ་ཙ་ནཾ ད་ཊྛ་བྦཾ. པཱུ་ཛེ་ཐ ནནྟི་ཨཱ་དི ས་མཱ་ད་པ་ནཱ་ཀཱ་ར་ད་སྶ་ནཾ, ཏཾ དྷཱ་ཏུ་ནྟི ཡོ་ཛ་ནཱ. ཨེ་ཝཾ ཀི་རཱཏི ཀི་ར-ས་དྡོ ཨ་ནུ་སྶ་ཝ་ཏྠོ.
༡༢༠༦. ན ཏ་སྶ པུ་ཉྙ་སྶ ཁ་ཡ་མྤི ཨ་ཛ྄ཛྷ་གནྟི ཏ་སྶ ཏ་དཱ སུ་མེ་དྷཾ བྷ་ག་ཝ་ནྟཾ ཨུ་དྡི་སྶ ཀ་ཏ་སྶ པུ་ཉྙ་ཀ་མྨ་སྶ པ་རི་ཀྑ་ཡཾ ནཱ་དྷི་ག་ཙྪིཾ, ཏ་སྶེ་ཝ ཀ་མྨ་སྶ ཝི་པཱ་ཀཱ་ཝ་སེ་སཾ པ་ཙྩ་ནུ་བྷོ་མཱི་ཏི ད་སྶེ་ཏི. ཡཾ པ་ནེ་ཏྠ ན ཝུ་ཏྟཾ, ཏཾ ཧེ་ཊྛཱ ཝུ་ཏྟ་ན་ཡ་ཏྟཱ སུ་ཝི་ཉྙེ་ཡྻ་མེ་ཝཱ་ཏི ད་ཊྛ་བྦཾ.
ཨ་ནེ་ཀ་ཝ་ཎྞ་ཝི་མཱ་ན་ཝ་ཎྞ་ནཱ ནི་ཊྛི་ཏཱ.