༧. ཀ་ཎྜ་ཀ་ཝི་མཱ་ན་ཝ་ཎྞ་ནཱ
པུ་ཎྞ་མཱ་སེ ཡ་ཐཱ ཙ་ནྡོཏི ཀ་ཎྜ་ཀ་ཝི་མཱ་ནཾ. ཏ་སྶ ཀཱ ཨུ་པྤ་ཏྟི? བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ. ཏེ་ན ཙ ས་མ་ཡེ་ན ཨཱ་ཡ་སྨཱ མ་ཧཱ་མོ་གྒ་ལླཱ་ནོ ཧེ་ཊྛཱ ཝུ་ཏྟ་ན་ཡེ་ནེ་ཝ དེ་ཝ་ཙཱ་རི་ཀཾ ཙ་ར་ནྟོ ཏཱ་ཝ་ཏིཾ་ས་བྷ་ཝ་ནཾ ག་ཏོ. ཏ་སྨིཾ ཁ་ཎེ ཀ་ཎྜ་ཀོ དེ་ཝ་པུ་ཏྟོ ས་ཀ་བྷ་ཝ་ན་ཏོ ནི་ཀྑ་མི་ཏྭཱ དི་བྦ་ཡཱ་ནཾ ཨ་བྷི་རུ་ཧི་ཏྭཱ མ་ཧ་ནྟེ་ན པ་རི་ཝཱ་རེ་ན མ་ཧ་ཏི་ཡཱ དེ་ཝི་དྡྷི་ཡཱ ཨུ་ཡྻཱ་ནཾ ག་ཙྪ་ནྟོ ཨཱ་ཡ་སྨ་ནྟཾ མ་ཧཱ་མོ་གྒ་ལླཱ་ནཾ དི་སྭཱ ས་ཉྫཱ་ཏ་གཱ་ར་ཝ་བ་ཧུ་མཱ་ནོ ས་ཧ་སཱ ཡཱ་ན་ཏོ ཨོ་རུ་ཡ྄ཧ ཐེ་རཾ ཨུ་པ་ས་ངྐ་མི་ཏྭཱ པ་ཉྩ་པ་ཏི་ཊྛི་ཏེ་ན ཝ་ནྡི་ཏྭཱ སི་ར་སྨིཾ ཨ་ཉྫ་ལིཾ པ་གྒ་ཡ྄ཧ ཨ་ཊྛཱ་སི. ཨ་ཐ ནཾ ཐེ་རོ –
༡༡༧༡. ‘‘པུ་ཎྞ་མཱ་སེ ཡ་ཐཱ ཙ་ནྡོ, ན་ཀྑ་ཏྟ་པ་རི་ཝཱ་རི་ཏོ;
ས་མ་ནྟཱ ཨ་ནུ་པ་རི་ཡཱ་ཏི, ཏཱ་ར་ཀཱ་དྷི་པ་ཏཱི ས་སཱི.
༡༡༧༢. ‘‘ཏ་ཐཱུ་པ་མཾ ཨི་དཾ བྱ་མྷཾ, དི་བྦཾ དེ་ཝ་པུ་ར་མྷི ཙ;
ཨ་ཏི་རོ་ཙ་ཏི ཝ་ཎྞེ་ན, ཨུ་ད་ཡ་ནྟོ་ཝ རཾ་སི་མཱ.
༡༡༧༣. ‘‘ཝེ་ལཱུ༹་རི་ཡ་སུ་ཝ་ཎྞ་སྶ, ཕ་ལི་ཀཱ རཱུ་པི་ཡ་སྶ ཙ;
མ་སཱ་ར་ག་ལླ་མུ་ཏྟཱ་ཧི, ལོ་ཧི་ཏ་ངྒ་མ་ཎཱི་ཧི ཙ.
༡༡༧༤. ‘‘ཙི་ཏྲཱ མ་ནོ་ར་མཱ བྷཱུ་མི, ཝེ་ལཱུ༹་རི་ཡ་སྶ ས་ནྠ་ཏཱ;
ཀཱུ་ཊཱ་གཱ་རཱ སུ་བྷཱ ར་མྨཱ, པཱ་སཱ་དོ ཏེ སུ་མཱ་པི་ཏོ.
༡༡༧༥. ‘‘ར་མྨཱ ཙ ཏེ པོ་ཀྑ་ར་ཎཱི, པུ་ཐུ་ལོ་མ་ནི་སེ་ཝི་ཏཱ;
ཨ་ཙྪོ་ད་ཀཱ ཝི་པྤ་ས་ནྣཱ, སོ་ཎྞ་ཝཱ་ལུ་ཀ་ས་ནྠ་ཏཱ.
༡༡༧༦. ‘‘ནཱ་ནཱ་པ་དུ་མ་ས་ཉྪ་ནྣཱ, པུ་ཎྜ་རཱི་ཀ་ས་མོ་ཏ་ཏཱ;
སུ་ར་བྷིཾ ས་མྤ་ཝཱ་ཡ་ནྟི, མ་ནུ་ཉྙཱ མཱ་ཏུ་ཏེ་རི་ཏཱ.
༡༡༧༧. ‘‘ཏ་སྶཱ ཏེ ཨུ་བྷ་ཏོ པ་སྶེ, ཝ་ན་གུ་མྦཱ སུ་མཱ་པི་ཏཱ;
ཨུ་པེ་ཏཱ པུ་པྥ་རུ་ཀྑེ་ཧི, ཕ་ལ་རུ་ཀྑེ་ཧི ཙཱུ་བྷ་ཡཾ.
༡༡༧༨. ‘‘སོ་ཝ་ཎྞ་པཱ་དེ པ་ལླ་ངྐེ, མུ་དུ་ཀེ གོ་ན་ཀ་ཏྠ་ཏེ;
ནི་སི་ནྣཾ དེ་ཝ་རཱ་ཛཾ་ཝ, ཨུ་པ་ཏི་ཊྛ་ནྟི ཨ་ཙྪ་རཱ.
༡༡༧༩. ‘‘ས་བྦཱ་བྷ་ར་ཎ་ས་ཉྪ་ནྣཱ, ནཱ་ནཱ་མཱ་ལཱ་ཝི་བྷཱུ་སི་ཏཱ;
ར་མེ་ནྟི ཏཾ མ་ཧི་དྡྷི་ཀཾ, ཝ་ས་ཝ་ཏྟཱི་ཝ མོ་ད་སི.
༡༡༨༠. ‘‘བྷེ་རི་ས་ངྑ་མུ་དི་ངྒཱ་ཧི, ཝཱི་ཎཱ་ཧི པ་ཎ་ཝེ་ཧི ཙ;
ར་མ་སི ར་ཏི་ས་མྤ་ནྣོ, ན་ཙྩ་གཱི་ཏེ སུ་ཝཱ་དི་ཏེ.
༡༡༨༡. ‘‘དི་བྦཱ ཏེ ཝི་ཝི་དྷཱ རཱུ་པཱ, དི་བྦཱ ས་དྡཱ ཨ་ཐོ ར་སཱ;
ག་ནྡྷཱ ཙ ཏེ ཨ་དྷི་པྤེ་ཏཱ, ཕོ་ཊྛ་བྦཱ ཙ མ་ནོ་ར་མཱ.
༡༡༨༢. ‘‘ཏ་སྨིཾ ཝི་མཱ་ནེ པ་ཝ་རེ, དེ་ཝ་པུ་ཏྟ མ་ཧ་པྤ་བྷོ;
ཨ་ཏི་རོ་ཙ་སི ཝ་ཎྞེ་ན, ཨུ་ད་ཡ་ནྟོ་ཝ བྷཱ་ཎུ་མཱ.
༡༡༨༣. ‘‘དཱ་ན་སྶ ཏེ ཨི་དཾ ཕ་ལཾ, ཨ་ཐོ སཱི་ལ་སྶ ཝཱ པ་ན;
ཨ་ཐོ ཨ་ཉྫ་ལི་ཀ་མྨ་སྶ, ཏཾ མེ ཨ་ཀྑཱ་ཧི པུ་ཙྪི་ཏོ’’ཏི. –
ཨ་དྷི་ག་ཏ་ས་མྤ་ཏྟི་ཀི་ཏྟ་ན་མུ་ཁེ་ན ཀ་ཏ་ཀ་མྨཾ པུ་ཙྪི.
༡༡༨༤. ‘‘སོ དེ་ཝ་པུ་ཏྟོ ཨ་ཏྟ་མ་ནོ, མོ་གྒ་ལླཱ་ནེ་ན པུ་ཙྪི་ཏོ;
པ་ཉྷཾ པུ་ཊྛོ ཝི་ཡཱ་ཀཱ་སི, ཡ་སྶ ཀ་མྨ་སྶི་དཾ ཕ་ལཾ’’.
༡༡༨༥. ‘‘ཨ་ཧཾ ཀ་པི་ལ་ཝ་ཏྠུ་སྨིཾ, སཱ་ཀི་ཡཱ་ནཾ པུ་རུ་ཏྟ་མེ;
སུ་དྡྷོ་ད་ན་སྶ པུ་ཏྟ་སྶ, ཀ་ཎྜ་ཀོ ས་ཧ་ཛོ ཨ་ཧཾ.
༡༡༨༦. ‘‘ཡ་དཱ སོ ཨ་ཌྜྷ་ར་ཏྟཱ་ཡཾ, བོ་དྷཱ་ཡ མ་བྷི་ནི་ཀྑ་མི;
སོ མཾ མུ་དཱུ་ཧི པཱ་ཎཱི་ཧི, ཛཱ་ལི་ཏ་མྦ་ན་ཁེ་ཧི ཙ.
༡༡༨༧. ‘‘ས་ཏྠིཾ ཨཱ་ཀོ་ཊ་ཡི་ཏྭཱ་ན, ཝ་ཧ ས་མྨཱ་ཏི ཙ་བྲ་ཝི;
‘ཨ་ཧཾ ལོ་ཀཾ ཏཱ་ར་ཡི་སྶཾ, པ་ཏྟོ ས་མྦོ་དྷི་མུ་ཏྟ་མཾ’.
༡༡༨༨. ‘‘ཏཾ མེ གི་རཾ སུ་ཎ་ནྟ་སྶ, ཧཱ་སོ མེ ཝི་པུ་ལོ ཨ་ཧུ;
ཨུ་ད་གྒ་ཙི་ཏྟོ སུ་མ་ནོ, ཨ་བྷི་སཱི་སིཾ ཏ་དཱ ཨ་ཧཾ.
༡༡༨༩. ‘‘ཨ་བྷི་རཱུ་ལ༹ྷ་ཉྩ མཾ ཉ་ཏྭཱ, ས་ཀྱ་པུ་ཏྟཾ མ་ཧཱ་ཡ་སཾ;
ཨུ་ད་གྒ་ཙི་ཏྟོ མུ་དི་ཏོ, ཝ་ཧི་སྶཾ པུ་རི་སུ་ཏྟ་མཾ.
༡༡༩༠. ‘‘པ་རེ་སཾ ཝི་ཛི་ཏཾ ག་ནྟྭཱ, ཨུ་གྒ་ཏ་སྨིཾ དི་ཝཱ་ཀ་རེ;
མ་མཾ ཚ་ནྣ་ཉྩ ཨོ་ཧཱ་ཡ, ཨ་ན་པེ་ཀྑོ སོ ཨ་པ་ཀྐ་མི.
༡༡༩༡. ‘‘ཏ་སྶ ཏ་མྦ་ན་ཁེ པཱ་དེ, ཛི་ཝ྄ཧཱ་ཡ པ་རི་ལེ་ཧི་སཾ;
ག་ཙྪ་ནྟ་ཉྩ མ་ཧཱ་ཝཱི་རཾ, རུ་ད་མཱ་ནོ ཨུ་དི་ཀྑི་སཾ.
༡༡༩༢. ‘‘ཨ་ད་སྶ་ནེ་ན་ཧཾ ཏ་སྶ, ས་ཀྱ་པུ་ཏྟ་སྶ སི་རཱི་མ་ཏོ;
ཨ་ལ་ཏྠཾ ག་རུ་ཀཱ་བཱ་དྷཾ, ཁི་པྤཾ མེ མ་ར་ཎཾ ཨ་ཧུ.
༡༡༩༣. ‘‘ཏ་སྶེ་ཝ ཨཱ་ནུ་བྷཱ་ཝེ་ན, ཝི་མཱ་ནཾ ཨཱ་ཝ་སཱ་མི་དཾ;
ས་བྦ་ཀཱ་མ་གུ་ཎོ་པེ་ཏཾ, དེ་ཝོ དེ་ཝ་པུ་ར་མྷི་ཝ.
༡༡༩༤. ‘‘ཡ་ཉྩ མེ ཨ་ཧུ་ཝཱ ཧཱ་སོ, ས་དྡཾ སུ་ཏྭཱ་ན བོ་དྷི་ཡཱ;
ཏེ་ནེ་ཝ ཀུ་ས་ལ་མཱུ་ལེ་ན, ཕུ་སི་སྶཾ ཨཱ་ས་ཝ་ཀྑ་ཡཾ.
༡༡༩༥. ‘‘ས་ཙེ ཧི བྷ་ནྟེ ག་ཙྪེ་ཡྻཱ་སི, ས་ཏྠུ བུ་དྡྷ་སྶ ས་ནྟི་ཀེ;
མ་མཱ་པི ནཾ ཝ་ཙ་ནེ་ན, སི་ར་སཱ ཝ་ཛྫཱ་སི ཝ་ནྡ་ནཾ.
༡༡༩༦. ‘‘ཨ་ཧ་མྤི ད་ཊྛུཾ ག་ཙྪི་སྶཾ, ཛི་ནཾ ཨ་པྤ་ཊི་པུ་གྒ་ལཾ;
དུ་ལླ་བྷཾ ད་སྶ་ནཾ ཧོ་ཏི, ལོ་ཀ་ནཱ་ཐཱ་ན ཏཱ་དི་ན’’ནྟི. –
སོ་པི ཨ་ཏྟ་ནཱ ཀ་ཏ་ཀ་མྨཾ ཀ་ཐེ་སི. ཨ་ཡ་ཉྷི ཨ་ན་ནྟ་རེ ཨ་ཏྟ་བྷཱ་ཝེ ཨ་མྷཱ་ཀཾ བོ་དྷི་ས་ཏྟེ་ན ས་ཧ་ཛཱ་ཏོ ཀ་ཎྜ་ཀོ ཨ་སྶ་རཱ་ཛཱ ཨ་ཧོ་སི. སོ ཨ་བྷི་ནི་ཀྑ་མ་ན་ས་མ་ཡེ ཨ་བྷི་རུ་ལ༹ྷོ ཏེ་ནེ་ཝ ར་ཏྟཱ་ཝ་སེ་སེ་ན ཏཱི་ཎི ར་ཛྫཱ་ནི མ་ཧཱ་པུ་རི་སཾ ཨ་ཏི་ཀྐ་མཱ་པེ་ཏྭཱ ཨ་ནོ་མཱ་ན་དཱི་ཏཱི་རཾ ས་མྤཱ་པེ་སི. ཨ་ཐ སོ མ་ཧཱ་ས་ཏྟེ་ན སཱུ་རི་ཡེ ཨུ་གྒ་ཏེ གྷ་ཊི་ཀཱ་ར་མ་ཧཱ་བྲ་ཧྨུ་ནཱ ཨུ་པ་ནཱི་ཏཱ་ནི པ་ཏྟ་ཙཱི་ཝ་རཱ་ནི ག་ཧེ་ཏྭཱ པ་བྦ་ཛི་ཏྭཱ ཚ་ནྣེ་ན ས་དྡྷིཾ ཀ་པི་ལ་ཝ་ཏྠུཾ ཨུ་དྡི་སྶ ཝི་སྶ་ཛྫི་ཏོ. སི་ནེ་ཧ་བྷཱ་རི་ཀེ་ན ཧ་ད་ཡེ་ན མ་ཧཱ་པུ་རི་ས་སྶ པཱ་དེ ཨ་ཏྟ་ནོ ཛི་ཝ྄ཧཱ་ཡ ལེ་ཧི་ཏྭཱ པ་སཱ་ད་སོ་མྨཱ་ནི ཨ་ཀྑཱི་ནི ཨུ་མྨཱི་ལེ་ཏྭཱ ཡཱ་ཝ ད་སྶ་ན་པ་ཐཱ ཨོ་ལོ་ཀེ་ནྟོ ད་སྶ་ནཱུ་པ་ཙཱ་རཾ པ་ན ཨ་ཏི་ཀྐ་ནྟེ ལོ་ཀ་ནཱ་ཐེ ‘‘ཨེ་ཝཾ་ཝི་དྷཾ ནཱ་མ ལོ་ཀ་གྒ་ནཱ་ཡ་ཀཾ མ་ཧཱ་པུ་རི་སཾ ཨ་ཧཾ ཝ་ཧིཾ, ས་ཕ་ལཾ ཝ་ཏ མེ ས་རཱི་རཾ ཨ་ཧོ་སཱི’’ཏི པ་ས་ནྣ་མཱ་ན་སོ ཧུ་ཏྭཱ པུ་ན ཙི་ར་ཀཱ་ལཾ ས་ངྒ་ཏ་སྶ པེ་མ་སྶ ཝ་སེ་ན ཝི་ཡོ་ག་དུ་ཀྑཾ ཨ་ས་ཧ་ནྟོ བྷཱ་ཝི་ནི་ཡཱ དི་བྦ་ས་མྤ་ཏྟི་ཡཱ ཝ་སེ་ན དྷ་མྨ་ཏཱ་ཡ ཙོ་དི་ཡ་མཱ་ནོ ཀཱ་ལཾ ཀ་ཏྭཱ ཏཱ་ཝ་ཏིཾ་ས་བྷ་ཝ་ནེ ནི་བྦ་ཏྟི. ཏཾ ས་ནྡྷཱ་ཡ ཝུ་ཏྟཾ ‘‘པུ་ཎྞ་མཱ་སེ ཡ་ཐཱ ཙ་ནྡོ…པེ… ཨ་ཧཾ ཀ་པི་ལ་ཝ་ཏྠུ་སྨི’’ནྟི་ཨཱ་དི.
༡༡༧༡. ཏ་ཏྠ པུ་ཎྞ་མཱ་སེཏི པུ་ཎྞ་མཱ་སི་ཡཾ སུ་ཀྐ་པ་ཀྑེ པ་ནྣ་ར་སི་ཡཾ. ཏཱ་ར་ཀཱ་དྷི་པ་ཏཱིཏི ཏཱ་ར་ཀཱ་ནཾ ཨ་དྷི་པ་ཏི. ས་སཱིཏི ས་ས་ལ་ཉྪ་ན་ཝཱ. ‘‘ཏཱ་ར་ཀཱ་དྷི་པ དི་སྶ་ཏཱི’’ཏི ཀེ་ཙི པ་ཋ་ནྟི, ཏེ་སཾ ཏཱ་ར་ཀཱ་དྷི་པཱ་ཏི ཨ་ཝི་བྷ་ཏྟི་ཀ་ནི་དྡེ་སོ, ཏཱ་ར་ཀཱ་ནཾ ཨ་དྷི་པོ ཧུ་ཏྭཱ དི་སྶ་ཏི ཨ་ནུ་པ་རི་ཡཱ་ཏི ཙཱ་ཏི ཡོ་ཛ་ནཱ ཀཱ་ཏ་བྦཱ.
༡༡༧༢. དི་བྦཾ དེ་ཝ་པུ་ར་མྷི ཙཱཏི དེ་ཝ་པུ་ར་སྨི་མྤི དི་བྦཾ. ཡ་ཐཱ མ་ནུ་སྶཱ་ནཾ ཋཱ་ན་ཏོ དེ་ཝ་པུ་རཾ ཨུ་ཏྟ་མཾ, ཨེ་ཝཾ དེ་ཝ་པུ་ར་ཏོ ཙཱ་པི ཨི་དཾ ཏ་ཝ ཝི་མཱ་ནཾ ཨུ་ཏྟ་མ་ནྟི ད་སྶེ་ཏི. ཏེ་ནཱ་ཧ ‘‘ཨ་ཏི་རོ་ཙ་ཏི ཝ་ཎྞེ་ན, ཨུ་ད་ཡ་ནྟོ་ཝ རཾ་སི་མཱ’’ཏི, ཨུ་གྒ་ཙྪ་ནྟོ སཱུ་རི་ཡོ ཝི་ཡཱ་ཏི ཨ་ཏྠོ.
༡༡༧༣. ཝེ་ལཱུ༹་རི་ཡ་སུ་ཝ་ཎྞ་སྶཱཏི ཝེ་ལུ༹་རི་ཡེ་ན སུ་ཝ་ཎྞེ་ན ཙ ཨི་དཾ བྱ་མྷཾ ནི་མྨི་ཏ་ནྟི ཝ་ཙ་ན་སེ་སེ་ན ཡོ་ཛ་ནཱ. ཕ་ལི་ཀཱཏི ཕ་ལི་ཀ་མ་ཎི་ནཱ.
༡༡༧༥. པོ་ཀྑ་ར་ཎཱིཏི པོ་ཀྑ་ར་ཎི་ཡོ.
༡༡༧༧-༨. ཏ་སྶཱཏི ཏ་སྶཱ པོ་ཀྑ་ར་ཎི་ཡཱ. ཝ་ན་གུ་མྦཱཏི ཨུ་ཡྻཱ་ནེ སུ་པུ་པྥ་ག་ཙྪེ ས་ནྡྷཱ་ཡ ཝ་ད་ཏི. དེ་ཝ་རཱ་ཛཾ་ཝཱཏི ས་ཀྐཾ ཝི་ཡ. ཨུ་པ་ཏི་ཊྛ་ནྟཱིཏི ཨུ་པ་ཊྛཱ་ནཾ ཀ་རོ་ནྟི.
༡༡༧༩. ས་བྦཱ་བྷ་ར་ཎ་ས་ཉྪ་ནྣཱཏི ས་བྦེ་ཧི ཨི་ཏྠཱ་ལ་ངྐཱ་རེ་ཧི པ་ཊི་ཙྪཱ་དི་ཏཱ, ས་བྦ་སོ ཝི་བྷཱུ་སི་ཏ་ས་རཱི་རཱ་ཏི ཨ་ཏྠོ. ཝ་ས་ཝ་ཏྟཱི་ཝཱཏི ཝ་ས་ཝ་ཏྟི་དེ་ཝ་རཱ་ཛཱ ཝི་ཡ.
༡༡༨༠. བྷེ་རི་ས་ངྑ་མུ་དི་ངྒཱ་ཧཱིཏི ལི་ངྒ་ཝི་པ་ལླཱ་སེ་ན ཝུ་ཏྟཾ, བྷེ་རཱི་ཧི ཙ ས་ངྑེ་ཧི ཙ མུ་དི་ངྒེ་ཧི ཙཱ་ཏི ཡོ་ཛ་ནཱ. ར་ཏི་ས་མྤ་ནྣོཏི དི་བྦཱ་ཡ ར་ཏི་ཡཱ ས་མ་ངྒཱི་བྷཱུ་ཏོ. ན་ཙྩ་གཱི་ཏེ སུ་ཝཱ་དི་ཏེཏི ན་ཙྩེ ཙ གཱི་ཏེ ཙ སུ་ནྡ་རེ ཝཱ་དི་ཏེ ཙ, ན་ཙྩ་ནེ ཙ གཱ་ཡ་ནེ ཙ སུ་ནྡ་རེ ཝཱ་དི་ཏེ ཙ ཧེ་ཏུ་བྷཱུ་ཏེ. ནི་མི་ཏྟ་ཏྠེ ཧི ཨེ་ཏཾ བྷུ་མྨཾ, པ་ཝ་ཏྟི་ཏེ་ཏི ཝཱ ཝ་ཙ་ན་སེ་སོ.
༡༡༨༡. དི་བྦཱ ཏེ ཝི་ཝི་དྷཱ རཱུ་པཱཏི དེ་ཝ་ལོ་ཀ་པ་རི་ཡཱ་པ་ནྣཱ ནཱ་ན་པྤ་ཀཱ་རཱ ཙ་ཀྑུ་ཝི་ཉྙེ་ཡྻཱ རཱུ་པཱ ཏུ་ཡ྄ཧཾ ཨ་དྷི་པྤེ་ཏཱ ཡ་ཐཱ་དྷི་པྤེ་ཏཱ མ་ནོ་ར་མཱ ཝི་ཛྫ་ནྟཱི་ཏི ཀི་རི་ཡཱ་པ་དཾ ཨཱ་ནེ་ཏྭཱ ཡོ་ཛེ་ཏ་བྦཾ. དི་བྦཱ ས་དྡཱཏི་ཨཱ་དཱི་སུ་པི ཨེ་སེ་ཝ ན་ཡོ.
༡༡༨༥. ཀ་ཎྜ་ཀོ ས་ཧ་ཛོ ཨ་ཧནྟི ཨེ་ཏྠ ཨ་ཧནྟི ནི་པཱ་ཏ་མ་ཏྟཾ. ‘‘ཨ་ཧཱུ’’ཏི ཀེ་ཙི པ་ཊྛ་ནྟི, ཀ་ཎྜ་ཀོ ནཱ་མ ཨ་སྶ་རཱ་ཛཱ མ་ཧཱ་ས་ཏྟེ་ན ས་ཧ ཨེ་ཀ་སྨིཾ་ཡེ་ཝ དི་ཝ་སེ ཛཱ་ཏ་ཏྟཱ ས་ཧ་ཛོ ཨ་ཧོ་སི་ནྟི ཨ་ཏྠོ.
༡༡༨༦. ཨ་ཌྜྷ་ར་ཏྟཱ་ཡནྟི ཨ་ཌྜྷ་ར་ཏྟི་ཡཾ, མ་ཛ྄ཛྷི་མ་ཡཱ་མ་ས་མ་ཡེ་ཏི ཨ་ཏྠོ. བོ་དྷཱ་ཡ མ་བྷི་ནི་ཀྑ་མཱིཏི མ-ཀཱ་རོ པ་ད་ས་ནྡྷི་ཀ་རོ, ཨ་བྷི་ས་མྦོ་དྷི་ཨ་ཏྠཾ མ་ཧཱ་བྷི་ནི་ཀྑ་མ་ནཾ ནི་ཀྑ་མཱི་ཏི ཨ་ཏྠོ. མུ་དཱུ་ཧི པཱ་ཎཱི་ཧཱིཏི མུ་དུ་ཧ་ཏྠ་ཏཾ མ་ཧཱ་པུ་རི་ས་ལ་ཀྑ་ཎཾ ཝ་ད་ཏི. ཛཱ་ལི་ཏ་མྦ་ན་ཁེ་ཧཱིཏི ཛཱ་ལ་ཝ་ནྟེ་ཧི ཨ་བྷི་ལོ་ཧི་ཏ་ན་ཁེ་ཧི. ཏེ་ན ཛཱ་ལ་ཧ་ཏྠ་ཏཾ མ་ཧཱ་པུ་རི་ས་ལ་ཀྑ་ཎཾ ཏ་མྦ་ན་ཁ་ཏཾ ཨ་ནུ་བྱ་ཉྫ་ན་ཉྩ ད་སྶེ་ཏི.
༡༡༨༧. ས་ཏྠི ནཱ་མ ཛ་ངྒྷཱ, ཨི་དྷ པ་ན ས་ཏྠི་ནོ ཨཱ་ས་ནྣ་ཊྛཱ་ན་བྷཱུ་ཏོ ཨཱུ་རུ་པྤ་དེ་སོ ‘‘ས་ཏྠཱི’’ཏི ཝུ་ཏྟོ. ཨཱ་ཀོ་ཊ་ཡི་ཏྭཱ་ནཱཏི ཨ་པྤོ་ཋེ་ཏྭཱ. ‘‘ཝ་ཧ ས་མྨཱ’’ཏི ཙ་བྲ་ཝཱིཏི ‘‘ས་མྨ ཀ་ཎྜ་ཀ, ཨ་ཛྫེ་ཀ་ར་ཏྟིཾ མཾ ཝ་ཧ, མ་ཡ྄ཧཾ ཨོ་པ་ཝུ་ཡ྄ཧཾ ཧོ་ཧཱི’’ཏི ཙ ཀ་ཐེ་སི. ཝ་ཧ་ནེ པ་ན པ་ཡོ་ཛ་ནཾ ཏ་དཱ མ་ཧཱ་ས་ཏྟེ་ན ད་སྶི་ཏཾ ཝ་ད་ནྟོ ‘‘ཨ་ཧཾ ལོ་ཀཾ ཏཱ་ར་ཡི་སྶཾ, པ་ཏྟོ ས་མྦོ་དྷི་མུ་ཏྟ་མ’’ནྟི ཨཱ་ཧ. ཏེ་ན ‘‘ཨ་ཧཾ ཨུ་ཏྟ་མཾ ཨ་ནུ་ཏྟ་རཾ ས་མྨཱ་ས་མྦོ་དྷིཾ པ་ཏྟོ ཨ་དྷི་ག་ཏོ ཧུ་ཏྭཱ ས་དེ་ཝ་ཀཾ ལོ་ཀཾ སཾ་སཱ་ར་མ་ཧོ་གྷ་ཏོ ཏཱ་ར་ཡི་སྶཱ་མི, ཏ་སྨཱ ན་ཡི་དཾ ག་མ་ནཾ ཡཾ་ཀི་ཉྩཱི་ཏི ཙི་ནྟེ་ཡྻཱ་སཱི’’ཏི ག་མ་ནེ པ་ཡོ་ཛ་ན་སྶ ཨ་ནུ་ཏྟ་ར་བྷཱ་ཝཾ ད་སྶེ་ཏི.
༡༡༨༨-༩. ཧཱ་སོཏི ཏུ་ཊྛི. ཝི་པུ་ལོཏི མ་ཧཱ་ཨུ་ལཱ༹་རོ. ཨ་བྷི་སཱི་སིནྟི ཨཱ་སི་སིཾ ཨི་ཙྪིཾ ས་མྤ་ཊི་ཙྪིཾ. ཨ་བྷི་རཱུ་ལ༹ྷ་ཉྩ མཾ ཉ་ཏྭཱ, ས་ཀྱ་པུ་ཏྟཾ མ་ཧཱ་ཡ་སནྟི པ་ཏྠ་ཊ་ཝི་པུ་ལ་ཡ་སཾ ས་ཀྱ་རཱ་ཛ་པུ་ཏྟཾ མ་ཧཱ་ས་ཏྟཾ མཾ ཨ་བྷི་རུ་ཡ྄ཧ ནི་སི་ནྣཾ ཛཱ་ནི་ཏྭཱ. ཝ་ཧི་སྶནྟི ནེ་སིཾ.
༡༡༩༠-༩༡. པ་རེ་སནྟི པ་ར་རཱ་ཛཱུ་ནཾ. ཝི་ཛི་ཏནྟི དེ་སཾ པ་ར་ར་ཛྫཾ. ཨོ་ཧཱ་ཡཱཏི ཝི་སྶ་ཛྫི་ཏྭཱ. ཨ་པ་ཀྐ་མཱིཏི ཨ་པ་ཀྐ་མི་ཏུཾ ཨཱ་ར་བྷི. ‘‘པ་རི་བྦ་ཛཱི’’ཏི ཙ པ་ཋ་ནྟི. པ་རི་ལེ་ཧི་སནྟི པ་རི་ཏོ ལེ་ཧིཾ. ཨུ་དི་ཀྑི་སནྟི ཨོ་ལོ་ཀེ་སིཾ.
༡༡༩༢-༣. ག་རུ་ཀཱ་བཱ་དྷནྟི ག་རུ་ཀཾ བཱ་ལ༹ྷཾ ཨཱ་བཱ་དྷཾ, མ་ར་ཎ་ནྟི་ཀཾ དུ་ཀྑ་ནྟི ཨ་ཏྠོ. ཏེ་ནཱ་ཧ ‘‘ཁི་པྤཾ མེ མ་ར་ཎཾ ཨ་ཧཱུ’’ཏི. སོ ཧི ཨ་ནེ་ཀཱ་སུ ཛཱ་ཏཱི་སུ མ་ཧཱ་ས་ཏྟེ་ན ད་ལ༹ྷ་བྷ་ཏྟི་ཀོ ཧུ་ཏྭཱ ཨཱ་ག་ཏོ, ཏ་སྨཱ ཝི་ཡོ་ག་དུ་ཀྑཾ ས་ཧི་ཏུཾ ནཱ་ས་ཀྑི, ‘‘ས་མྨཱ་ས་མྦོ་དྷིཾ ཨ་དྷི་ག་ནྟུཾ ནི་ཀྑ་ནྟོ’’ཏི པ་ན སུ་ཏྭཱ ནི་རཱ་མི་སཾ ཨུ་ལཱ༹་རཾ པཱི་ཏི་སོ་མ་ན་སྶ་ཉྩ ཨུ་པྤ་ཛྫི, ཏེ་ན མ་ར་ཎཱ་ན་ནྟ་རཾ ཏཱ་ཝ་ཏིཾ་སེ་སུ ནི་བྦ་ཏྟི, ཨུ་ལཱ༹་རཱ ཙ་སྶ དི་བྦ་ས་མྤ་ཏྟི་ཡོ པཱ་ཏུ་ར་ཧེ་སུཾ. ཏེ་ན ཝུ་ཏྟཾ ‘‘ཏ་སྶེ་ཝ ཨཱ་ནུ་བྷཱ་ཝེ་ནཱ’’ཏི, ཋཱ་ན་ག་ཏ་སྶ པ་སཱ་ད་མ་ཡ་པུ་ཉྙ་སྶ བ་ལེ་ན. དེ་ཝོ དེ་ཝ་པུ་ར་མྷི་ཝཱཏི ཏཱ་ཝ་ཏིཾ་ས་བྷ་ཝ་ནེ ས་ཀྐོ དེ་ཝ་རཱ་ཛཱ ཝི་ཡ.
༡༡༩༤. ཡ་ཉྩ མེ ཨ་ཧུ་ཝཱ ཧཱ་སོ, ས་དྡཾ སུ་ཏྭཱ་ན བོ་དྷི་ཡཱཏི ‘‘པ་ཏྟོ ས་མྦོ་དྷི་མུ་ཏྟ་མ’’ནྟི པ་ཋ་མ་ཏ་རཾ བོ་དྷི་ས་དྡཾ སུ་ཏྭཱ ཏ་དཱ མ་ཡ྄ཧཾ ཧཱ་སོ ཨ་ཧུ, ཡཾ ཧཱ་ས་སྶ བྷ་ཝ་ནཾ སུ་སྶ་ནཾ, ཏེ་ནེ་ཝ ཀུ་ས་ལ་མཱུ་ལེ་ན ཏེ་ནེ་ཝ ཀུ་ས་ལ་བཱི་ཛེ་ན ཕུ་སི་སྶནྟི ཕུ་སི་སྶཱ་མི པཱ་པུ་ཎི་སྶཱ་མི.
༡༡༩༥. ཨེ་ཝཾ དེ་ཝ་པུ་ཏྟོ ཡ་ཐཱ་དྷི་ག་ཏཱ་ཡ ཨ་ནཱ་ག་ཏཱ་ཡ བྷ་ཝ་ས་མྤ་ཏྟི་ཡཱ ཀཱ་ར་ཎ་བྷཱུ་ཏཾ ཨ་ཏྟ་ནོ ཀུ་ས་ལ་ཀ་མྨཾ ཀ་ཐེ་ནྟོ ཨི་དཱ་ནི ཨ་ཏྟ་ནཱ བྷ་ག་ཝ་ཏོ ས་ནྟི་ཀཾ ག་ནྟུ་ཀཱ་མོ་པི པུ་རེ་ཏ་རཾ ཐེ་རེ་ན ས་ཏྠུ ཝ་ནྡ་ནཾ པེ་སེ་ནྟོ ‘‘ས་ཙེ’’ཏི གཱ་ཐ་མཱ་ཧ. ཏ་ཏྠ ས་ཙེ ག་ཙྪེ་ཡྻཱ་སཱིཏི ཡ་དི ག་མི་སྶ་སི. ‘‘ས་ཙེ ག་ཙྪ་སཱི’’ཏི ཀེ་ཙི པ་ཋ་ནྟི, སོ ཨེ་ཝ་ཏྠོ. མ་མཱ་པི ནཾ ཝ་ཙ་ནེ་ནཱཏི ན ཀེ་ཝ་ལཾ ཏ་ཝ ས་བྷཱ་ཝེ་ནེ་ཝ, ཨ་ཐ ཁོ མ་མཱ་པི ཝ་ཙ་ནེ་ན བྷ་ག་ཝ་ནྟཾ. ཝ་ཛྫཱ་སཱིཏི ཝ་དེ་ཡྻཱ་སི, མ་མཱ་པི སི་ར་སཱ ཝ་ནྡ་ནནྟི ཡོ་ཛ་ནཱ.
༡༡༩༦. ཡ་དི་པི དཱ་ནི ཝ་ནྡ་ན་ཉྩ པེ་སེ་མི, པེ་སེ་ཏྭཱ ཨེ་ཝ པ་ན ན ཏི་ཊྛཱ་མཱི་ཏི ད་སྶེ་ནྟོ ཨཱ་ཧ ‘‘ཨ་ཧ་མྤི ད་ཊྛུཾ ག་ཙྪི་སྶཾ, ཛི་ནཾ ཨ་པྤ་ཊི་པུ་གྒ་ལ’’ནྟི. ག་མ་ནེ པ་ན ད་ལ༹ྷ་ཏ་རཾ ཀཱ་ར་ཎཾ ད་སྶེ་ཏུཾ ‘‘དུ་ལླ་བྷཾ ད་སྶ་ནཾ ཧོ་ཏི, ལོ་ཀ་ནཱ་ཐཱ་ན ཏཱ་དི་ན’’ནྟི ཨཱ་ཧ.
༡༡༩༧. ‘‘སོ ཀ་ཏ་ཉྙཱུ ཀ་ཏ་ཝེ་དཱི, ས་ཏྠཱ་རཾ ཨུ་པ་ས་ངྐ་མི;
སུ་ཏྭཱ གི་རཾ ཙ་ཀྑུ་མ་ཏོ, དྷ་མྨ་ཙ་ཀྑུཾ ཝི་སོ་དྷ་ཡི.
༡༡༩༨. ‘‘ཝི་སོ་དྷེ་ཏྭཱ དི་ཊྛི་ག་ཏཾ, ཝི་ཙི་ཀི་ཙྪཾ ཝ་ཏཱ་ནི ཙ;
ཝ་ནྡི་ཏྭཱ ས་ཏྠུ་ནོ པཱ་དེ, ཏ་ཏྠེ་ཝ་ནྟ་ར་དྷཱ་ཡ་ཐཱ’’ཏི. –
ཨི་མཱ དྭེ གཱ་ཐཱ ས་ངྒཱི་ཏི་ཀཱ་རེ་ཧི ཋ་པི་ཏཱ.
༡༡༩༧. ཏ་ཏྠ སུ་ཏྭཱ གི་རཾ ཙ་ཀྑུ་མ་ཏོཏི པ་ཉྩ་ཧི ཙ་ཀྑཱུ་ཧི ཙ་ཀྑུ་མ་ཏོ ས་མྨཱ་ས་མྦུ་དྡྷ་སྶ ཝ་ཙ་ནཾ སུ་ཏྭཱ. དྷ་མྨ་ཙ་ཀྑུནྟི སོ་ཏཱ་པ་ཏྟི་མ་གྒཾ. ཝི་སོ་དྷ་ཡཱིཏི ཨ་དྷི་ག་ཙྪི. ཨ་དྷི་ག་མོ་ཡེ་ཝ ཧི ཏ་སྶ ཝི་སོ་དྷ་ནཾ.
༡༡༩༨. ཝི་སོ་དྷེ་ཏྭཱ དི་ཊྛི་ག་ཏནྟི དི་ཊྛི་ག་ཏཾ ས་མུ་གྒྷཱ་ཏེ་ཏྭཱ. ཝི་ཙི་ཀི་ཙྪཾ ཝ་ཏཱ་ནི ཙཱཏི སོ་ལ༹་ས་ཝ་ཏྠུ་ཀཾ ཨ་ཊྛ་ཝ་ཏྠུ་ཀ་ཉྩ ཝི་ཙི་ཀི་ཙྪ་ཉྩ ‘‘སཱི་ལ་བྦ་ཏེ་ཧི སུ་དྡྷཱི’’ཏི པ་ཝ་ཏྟ་ན་ཀ་སཱི་ལ་བྦ་ཏ་པ་རཱ་མཱ་སེ ཙ ཝི་སོ་དྷ་ཡཱི་ཏི ཡོ་ཛ་ནཱ. ཏ་ཏྠ ཧི ས་ཧ པ་རི་ཡཱ་ཡེ་ཧི ཏ་ཐཱ པ་ཝ་ཏྟཱ པ་རཱ་མཱ་སཱ ‘‘ཝ་ཏཱ་ནཱི’’ཏི ཝུ་ཏྟཾ. སེ་སཾ ཝུ་ཏྟ་ན་ཡ་མེ་ཝ.
ཀ་ཎྜ་ཀ་ཝི་མཱ་ན་ཝ་ཎྞ་ནཱ ནི་ཊྛི་ཏཱ.