༥. ཨ་མྦ་ཝི་མཱ་ན་ཝ་ཎྞ་ནཱ
ཨུ་ཙྩ་མི་དཾ མ་ཎི་ཐཱུ་ཎནྟི ཨ་མྦ་ཝི་མཱ་ནཾ. ཏ་སྶ ཀཱ ཨུ་པྤ་ཏྟི? བྷ་ག་ཝཱ རཱ་ཛ་ག་ཧེ ཝི་ཧ་ར་ཏི ཝེ་ལུ༹་ཝ་ནེ. ཏེ་ན ས་མ་ཡེ་ན རཱ་ཛ་ག་ཧེ ཨ་ཉྙ་ཏ་རོ དུ་གྒ་ཏ་པུ་རི་སོ པ་རེ་སཾ བྷ་ཏྟ་ཝེ་ཏ་ན་བྷ་ཏོ ཧུ་ཏྭཱ ཨ་མྦ་ཝ་ནཾ ར་ཀྑ་ཏི. སོ ཨེ་ཀ་དི་ཝ་སཾ ཨཱ་ཡ་སྨ་ནྟཾ སཱ་རི་པུ་ཏྟཾ གི་མྷ་ས་མ་ཡེ སཱུ་རི་ཡཱ་ཏ་པ་ས་ནྟ་ཏྟེ ཨུ་ཎྷ་ཝཱ་ལི་ཀཱ་ནི་པྤཱི་ལི༹་ཏེ ཝི་པྥ་ནྡ་མཱ་ན་མ་རཱི་ཙི་ཛཱ་ལ་ཝི་ཏྠ་ཏེ བྷཱུ་མི་པྤ་དེ་སེ ཏ་སྶ ཨ་མྦཱ་རཱ་མ་སྶ ཨ་ཝི་དཱུ་རེ་ན མ་གྒེ་ན སེ་དཱ་ག་ཏེ་ན ག་ཏྟེ་ན ག་ཙྪ་ནྟཾ དི་སྭཱ ས་ཉྫཱ་ཏ་གཱ་ར་ཝ་བ་ཧུ་མཱ་ནོ ཨུ་པ་ས་ངྐ་མི་ཏྭཱ ཨེ་ཝ་མཱ་ཧ ‘‘མ་ཧཱ ཨ་ཡཾ, བྷ་ནྟེ, གྷ་མྨ་པ་རི་ལཱ༹་ཧོ, ཨ་ཏི་ཝི་ཡ པ་རི་སྶ་ནྟ་རཱུ་པོ ཝི་ཡ དི་སྶ་ཏི, སཱ་དྷུ, བྷ་ནྟེ, ཨ་ཡྻོ ཨི་མཾ ཨ་མྦཱ་རཱ་མཾ པ་ཝི་སི་ཏྭཱ མུ་ཧུ་ཏྟཾ ཝི་སྶ་མི་ཏྭཱ ཨ་དྡྷཱ་ན་པ་རི་སྶ་མཾ པ་ཊི་ཝི་ནོ་དེ་ཏྭཱ ག་ཙྪ་ཐ ཨ་ནུ་ཀ་མྤཾ ཨུ་པཱ་དཱ་ཡཱ’’ཏི. ཐེ་རོ ཝི་སེ་ས་ཏོ ཏ་སྶ ཙི་ཏྟ་པྤ་སཱ་དཾ པ་རི་བྲཱུ་ཧེ་ཏུ་ཀཱ་མོ ཏཾ ཨཱ་རཱ་མཾ པ་ཝི་སི་ཏྭཱ ཨ་ཉྙ་ཏ་ར་སྶ ཨ་མྦ་རུ་ཀྑ་སྶ མཱུ་ལེ ནི་སཱི་དི.
པུ་ན སོ པུ་རི་སོ ཨཱ་ཧ ‘‘ས་ཙེ, བྷ་ནྟེ, ནྷཱ་ཡི་ཏུ་ཀཱ་མ་ཏྠ, ཨ་ཧཾ ཨི་ཏོ ཀཱུ་པ་ཏོ ཨུ་ད་ཀཾ ཨུ་དྡྷ་རི་ཏྭཱ ཏུ་མྷེ ནྷཱ་པེ་སྶཱ་མི, པཱ་ནཱི་ཡ་ཉྩ ད་སྶཱ་མཱི’’ཏི. ཐེ་རོ་པི ཨ་དྷི་ཝཱ་སེ་སི ཏུ་ཎྷཱི་བྷཱ་ཝེ་ན. སོ ཀཱུ་པ་ཏོ ཨུ་ད་ཀཾ ཨུ་དྡྷ་རི་ཏྭཱ པ་རི་སྶཱ་ཝེ་ཏྭཱ ཐེ་རཾ ནྷཱ་པེ་སི, ནྷཱ་པེ་ཏྭཱ ཙ ཧ་ཏྠ་པཱ་དེ དྷོ་ཝི་ཏྭཱ ནི་སི་ནྣ་སྶ པཱ་ནཱི་ཡཾ ཨུ་པ་ནེ་སི. ཐེ་རོ པཱ་ནཱི་ཡཾ པི་ཝི་ཏྭཱ པ་ཊི་པྤ་སྶ་དྡྷ་ད་ར་ཐོ ཏ་སྶ པུ་རི་ས་སྶ ཨུ་ད་ཀ་དཱ་ནེ ཙེ་ཝ ནྷཱ་པ་ནེ ཙ ཨ་ནུ་མོ་ད་ནཾ ཝ་ཏྭཱ པ་ཀྐཱ་མི. ཨ་ཐ སོ པུ་རི་སོ ‘‘གྷ་མྨཱ་བྷི་ཏ་ཏྟ་སྶ ཝ་ཏ ཐེ་ར་སྶ གྷ་མྨ་པ་རི་ལཱ༹་ཧཾ པ་ཊི་པྤ་སྶ་མྦྷེ་སིཾ, བ་ཧུཾ ཝ་ཏ མ་ཡཱ པུ་ཉྙཾ པ་སུ་ཏ’’ནྟི ཨུ་ལཱ༹་ར་པཱི་ཏི་སོ་མ་ན་སྶཾ པ་ཊི་སཾ་ཝེ་དེ་སི. སོ ཨ་པ་ར་བྷཱ་གེ ཀཱ་ལཾ ཀ་ཏྭཱ ཏཱ་ཝ་ཏིཾ་སེ་སུ ཨུ་པྤ་ཛྫི. ཏཾ ཨཱ་ཡ་སྨཱ མ་ཧཱ་མོ་གྒ་ལླཱ་ནོ ཨུ་པ་ས་ངྐ་མི་ཏྭཱ ཨི་མཱ་ཧི གཱ་ཐཱ་ཧི ཀ་ཏ་པུ་ཉྙཾ པུ་ཙྪི.
༡༡༤༦. ‘‘ཨུ་ཙྩ་མི་དཾ མ་ཎི་ཐཱུ་ཎཾ ཝི་མཱ་ནཾ, ས་མ་ནྟ་ཏོ དྭཱ་ད་ས ཡོ་ཛ་ནཱ་ནི;
ཀཱུ་ཊཱ་གཱ་རཱ ས་ཏྟ་ས་ཏཱ ཨུ་ལཱ༹་རཱ, ཝེ་ལུ༹་རི་ཡ་ཐ་མྦྷཱ རུ་ཙ་ཀ་ཏྠ་ཏཱ སུ་བྷཱ.
༡༡༤༧. ‘‘ཏ་ཏྠ་ཙྪ་སི པི་ཝ་སི ཁཱ་ད་སི ཙ, དི་བྦཱ ཙ ཝཱི་ཎཱ པ་ཝ་ད་ནྟི ཝ་གྒུཾ;
དི་བྦཱ ར་སཱ ཀཱ་མ་གུ་ཎེ་ཏྠ པ་ཉྩ, ནཱ་རི་ཡོ ཙ ན་ཙྩ་ནྟི སུ་ཝ་ཎྞ་ཚ་ནྣཱ.
༡༡༤༨. ‘‘ཀེ་ན ཏེ་ཏཱ་དི་སོ ཝ་ཎྞོ…པེ…
ཝ་ཎྞོ ཙ ཏེ ས་བྦ་དི་སཱ པ་བྷཱ་ས་ཏཱི’’ཏི.
༡༡༥༠. ‘‘སོ དེ་ཝ་པུ་ཏྟོ ཨ་ཏྟ་མ་ནོ…པེ…
ཡ་སྶ ཀ་མྨ་སྶི་དཾ ཕ་ལཾ’’.
༡༡༥༡. ‘‘གི་མྷཱ་ནཾ པ་ཙྪི་མེ མཱ་སེ, པ་ཏ་པ་ནྟེ དི་ཝ་ངྐ་རེ;
པ་རེ་སཾ བྷ་ཏ་ཀོ པོ་སོ, ཨ་མྦཱ་རཱ་མ་མ་སི་ཉྩ་ཏི.
༡༡༥༢. ‘‘ཨ་ཐ ཏེ་ནཱ་ག་མཱ བྷི་ཀྑུ, སཱ་རི་པུ་ཏྟོ་ཏི ཝི་སྶུ་ཏོ;
ཀི་ལ་ནྟ་རཱུ་པོ ཀཱ་ཡེ་ན, ཨ་ཀི་ལ་ནྟོ་ཝ ཙེ་ཏ་སཱ.
༡༡༥༣. ‘‘ཏ་ཉྩ དི་སྭཱ་ན ཨཱ་ཡ་ནྟཾ, ཨ་ཝོ་ཙཾ ཨ་མྦ་སི་ཉྩ་ཀོ;
སཱ་དྷུ ཏཾ བྷ་ནྟེ ནྷཱ་པེ་ཡྻཾ, ཡཾ མ་མ་སྶ སུ་ཁཱ་ཝ་ཧཾ.
༡༡༥༤. ‘‘ཏ་སྶ མེ ཨ་ནུ་ཀ་མྤཱ་ཡ, ནི་ཀྑི་པི པ་ཏྟ་ཙཱི་ཝ་རཾ;
ནི་སཱི་དི རུ་ཀྑ་མཱུ་ལ་སྨིཾ, ཚཱ་ཡཱ་ཡ ཨེ་ཀ་ཙཱི་ཝ་རོ.
༡༡༥༥. ‘‘ཏ་ཉྩ ཨ་ཙྪེ་ན ཝཱ་རི་ནཱ, པ་ས་ནྣ་མཱ་ན་སོ ན་རོ;
ནྷཱ་པ་ཡཱི རུ་ཀྑ་མཱུ་ལ་སྨིཾ, ཚཱ་ཡཱ་ཡ ཨེ་ཀ་ཙཱི་ཝ་རཾ.
༡༡༥༦. ‘‘ཨ་མྦོ ཙ སི་ཏྟོ ས་མ་ཎོ ཙ ནྷཱ་པི་ཏོ,
མ་ཡཱ ཙ པུ་ཉྙཾ པ་སུ་ཏཾ ཨ་ན་པྤ་ཀཾ;
ཨི་ཏི སོ པཱི་ཏི་ཡཱ ཀཱ་ཡཾ, ས་བྦཾ ཕ་ར་ཏི ཨ་ཏྟ་ནོ.
༡༡༥༧. ‘‘ཏ་དེ་ཝ ཨེ་ཏྟ་ཀཾ ཀ་མྨཾ, ཨ་ཀཱ་སིཾ ཏཱ་ཡ ཛཱ་ཏི་ཡཱ;
པ་ཧཱ་ཡ མཱ་ནུ་སཾ དེ་ཧཾ, ཨུ་པ་པ་ནྣོ་མྷི ན་ནྡ་ནཾ.
༡༡༥༨. ‘‘ན་ནྡ་ནེ ཙ ཝ་ནེ ར་མྨེ, ནཱ་ནཱ་དི་ཛ་ག་ཎཱ་ཡུ་ཏེ;
ར་མཱ་མི ན་ཙྩ་གཱི་ཏེ་ཧི, ཨ་ཙྪ་རཱ་ཧི པུ་ར་ཀྑ་ཏོ’’ཏི. –
སོ་པི ཏ་སྶ ཨི་མཱ་ཧི གཱ་ཐཱ་ཧི བྱཱ་ཀཱ་སི.
༡༡༥༡. ཏ་ཏྠ གི་མྷཱ་ནཾ པ་ཙྪི་མེ མཱ་སེཏི ཨཱ་སཱ་ལ༹ྷི་མཱ་སེ. པ་ཏ་པ་ནྟེཏི ཨ་ཏི་ཝི་ཡ དི་པྤ་ནྟེ, ས་བྦ་སོ ཨུ་ཎྷཾ ཝི་སྶ་ཛྫེ་ནྟེ་ཏི ཨ་ཏྠོ. དི་ཝ་ངྐ་རེཏི དི་ཝཱ་ཀ་རེ, ཨ་ཡ་མེ་ཝ ཝཱ པཱ་ཋོ. ཨ་སི་ཉྩ་ཏཱིཏི སི་ཉྩ་ཏི, -ཀཱ་རོ ནི་པཱ་ཏ་མ་ཏྟཾ, སི་ཉྩ་ཏི ཨ་མྦ་རུ་ཀྑ་མཱུ་ལེ་སུ དྷུ་ཝཾ ཛ་ལ་སེ་ཀཾ ཀ་རོ་ཏཱི་ཏི ཨ་ཏྠོ. ‘‘ཨ་སི་ཉྩ་ཐཱ’’ཏི ཙ པཱ་ཋོ, སི་ཉྩི་ཏྠཱ་ཏི ཨ་ཏྠོ. ‘‘ཨ་སི་ཉྩ་ཧ’’ནྟི ཙ པ་ཋ་ནྟི, པ་རེ་སཾ བྷ་ཏ་ཀོ པོ་སོ ཧུ་ཏྭཱ ཏ་དཱ ཨ་མྦཱ་རཱ་མཾ ཨ་སི་ཉྩིཾ ཨ་ཧ་ནྟི ཨ་ཏྠོ.
༡༡༥༢. ཏེ་ནཱཏི ཡེ་ན དི་སཱ་བྷཱ་གེ་ན སོ ཨ་མྦཱ་རཱ་མོ, ཏེ་ན ཨ་ག་མཱ ཨ་ག་ཉྪི. ཨ་ཀི་ལ་ནྟོ་ཝ ཙེ་ཏ་སཱཏི ཙེ་ཏོ་དུ་ཀྑ་སྶ མ་གྒེ་ནེ་ཝ པ་ཧཱི་ན་ཏྟཱ ཙེ་ཏ་སཱ ཨ་ཀི་ལ་ནྟོ་པི ས་མཱ་ནོ ཀི་ལ་ནྟུ་རཱུ་པོ ཀཱ་ཡེ་ན ཏེ་ན མ་གྒེ་ན ཨ་ག་མཱ་ཏི ཡོ་ཛ་ནཱ.
༡༡༥༣-༤. ཨ་ཝོ་ཙཾ ཨ་ཧཾ ཏ་དཱ ཨ་མྦ་སི་ཉྩ་ཀོ ཧུ་ཏྭཱ་ཏི ཡོ་ཛ་ནཱ. ཨེ་ཀ་ཙཱི་ཝ་རོཏི ནྷཱ་ཡི་ཏུ་ཀཱ་མོ་ཏི ཨ་དྷི་པྤཱ་ཡོ.
༡༡༥༦. ཨི་ཏཱིཏི ཨེ་ཝཾ ‘‘ཨ་མྦོ ཙ སི་ཏྟོ, ས་མ་ཎོ ཙ ནྷཱ་པི་ཏོ, མ་ཡཱ ཙ པུ་ཉྙཾ པ་སུ་ཏཾ ཨ་ན་པྤ་ཀཾ, ཨེ་ཀེ་ནེ་ཝ པ་ཡོ་གེ་ན ཏི་ཝི་དྷོ་པི ཨ་ཏྠོ སཱ་དྷི་ཏོ’’ཏི ཨི་མི་ནཱ་ཀཱ་རེ་ན པ་ཝ་ཏྟཱ་ཡ པཱི་ཏི་ཡཱ སོ པུ་རི་སོ ཨ་ཏྟ་ནོ ས་བྦཾ ཀཱ་ཡཾ ཕ་ར་ཏི, ནི་ར་ནྟ་རཾ ཕུ་ཊཾ ཀ་རོ་ཏཱི་ཏི ཡོ་ཛ་ནཱ. ཨ་ཏཱི་ཏ་ཏྠེ ཙེ་ཏཾ ཝ་ཏྟ་མཱ་ན་ཝ་ཙ་ནཾ, ཕ་རཱི་ཏི ཨ་ཏྠོ.
༡༡༥༧. ཏ་དེ་ཝ ཨེ་ཏྟ་ཀཾ ཀ་མྨནྟི ཏཾ ཨེ་ཏྟ་ཀཾ ཨེ་ཝཾ པཱ་ནཱི་ཡ་དཱ་ན་མ་ཏྟ་ཀཾ ཀ་མྨཾ ཨ་ཀཱ་སིཾ, ཏཱ་ཡ ཏ་སྶཾ ཛཱ་ཏི་ཡཾ ཨ་ཉྙཾ ནཱ་ནུ་སྶ་རཱ་མཱི་ཏི ཨ་དྷི་པྤཱ་ཡོ. ཏེ་སཾ ཝུ་ཏྟ་ན་ཡ་མེ་ཝ.
ཨ་མྦ་ཝི་མཱ་ན་ཝ་ཎྞ་ནཱ ནི་ཊྛི་ཏཱ.