༡༡. སུ་ནི་ཀྑི་ཏྟ་ཝི་མཱ་ན་ཝ་ཎྞ་ནཱ
ཨུ་ཙྩ་མི་དཾ མ་ཎི་ཐཱུ་ཎཾ ཝི་མཱ་ནནྟི སུ་ནི་ཀྑི་ཏྟ་ཝི་མཱ་ནཾ. ཏ་སྶ ཀཱ ཨུ་པྤ་ཏྟི? བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ. ཏེ་ན ས་མ་ཡེ་ན ཨཱ་ཡ་སྨཱ མ་ཧཱ་མོ་གྒ་ལླཱ་ནོ ཧེ་ཊྛཱ ཝུ་ཏྟ་ན་ཡེ་ནེ་ཝ དེ་ཝ་ཙཱ་རི་ཀཾ ཙ་ར་ནྟོ ཏཱ་ཝ་ཏིཾ་ས་བྷ་ཝ་ནཾ ཨུ་པ་ག་ཏོ. ཏ་སྨི་ཉྩ ཁ་ཎེ ཨ་ཉྙ་ཏ་རོ དེ་ཝ་པུ་ཏྟོ ཨ་ཏྟ་ནོ ཝི་མཱ་ན་དྭཱ་རེ ཋི་ཏོ ཨཱ་ཡ་སྨ་ནྟཾ མ་ཧཱ་མོ་གྒ་ལླཱ་ནཾ དི་སྭཱ ས་ཉྫཱ་ཏ་གཱ་ར་ཝ་བ་ཧུ་མཱ་ནོ ཨུ་པ་ས་ངྐ་མི་ཏྭཱ པ་ཉྩ་པ་ཏི་ཊྛི་ཏེ་ན ཝ་ནྡི་ཏྭཱ ཨ་ཉྫ་ལིཾ པ་གྒ་ཡ྄ཧ ཨ་ཊྛཱ་སི.
སོ ཀི་ར ཨ་ཏཱི་ཏེ ཀ་སྶ་པ་ས་མྨཱ་ས་མྦུ་དྡྷེ པ་རི་ནི་བྦུ་ཏེ ཏ་སྶ ས་རཱི་ར་དྷཱ་ཏུ་ཡོ པ་ཀྑི་པི་ཏྭཱ ཡོ་ཛ་ནི་ཀེ ཀ་ན་ཀ་ཐཱུ་པེ ཙ ཀ་ཏེ ཙ་ཏ་སྶོ པ་རི་སཱ ཀཱ་ལེ་ན ཀཱ་ལཾ ཨུ་པ་ས་ངྐ་མི་ཏྭཱ ག་ནྡྷ་པུ་པྥ་དྷཱུ་པཱ་དཱི་ཧི ཙེ་ཏི་ཡེ པཱུ་ཛཾ ཀ་རོ་ནྟི, ཏ་ཏྠ ཨ་ཉྙ་ཏ་རོ ཨུ་པཱ་ས་ཀོ ཨ་ཉྙེ་སུ པུ་པྥ་པཱུ་ཛཾ ཀ་ཏྭཱ ག་ཏེ་སུ ཏེ་ཧི པཱུ་ཛི་ཏ་ཊྛཱ་ནེ དུ་ནྣི་ཀྑི་ཏྟཱ་ནི པུ་པྥཱ་ནི དི་སྭཱ ཏ་ཏྠེ་ཝ ཏཱ་ནི ས་མྨ་དེ་ཝ ཋ་པེ་ནྟོ ས་ནྣི་ཝེ་ས་ཝ་སེ་ན ད་སྶ་ནཱི་ཡཾ པཱ་སཱ་དི་ཀཾ ཝི་བྷ་ཏྟི་ཝི་སེ་ས་ཡུ་ཏྟཾ པུ་པྥ་པཱུ་ཛཾ ཨ་ཀཱ་སི. ཀ་ཏྭཱ ཙ པ་ན ཨེ་ཏཾ ཨཱ་ར་མྨ་ཎཾ ག་ཎྷ་ནྟོ ས་ཏྠུ གུ་ཎེ ཨ་ནུ་སྶ་རི་ཏྭཱ པ་ས་ནྣ་ཙི་ཏྟོ ཏཾ པུ་ཉྙཾ ཧ་ད་ཡེ ཋ་པེ་སི.
སོ ཨ་པ་ར་བྷཱ་གེ ཀཱ་ལཾ ཀ་ཏྭཱ ཏ་སྶེ་ཝ ཀ་མྨ་སྶ ཨཱ་ནུ་བྷཱ་ཝེ་ན ཏཱ་ཝ་ཏིཾ་ས་བྷ་ཝ་ནེ དྭཱ་ད་ས་ཡོ་ཛ་ནི་ཀེ ཀ་ན་ཀ་ཝི་མཱ་ནེ ནི་བྦ་ཏྟི, མ་ཧཱ་ནུ་བྷཱ་ཝོ མ་ཧཱ ཙ་སྶ པ་རི་ཝཱ་རོ ཨ་ཧོ་སི. ཏཾ ས་ནྡྷཱ་ཡ ཝུ་ཏྟཾ ‘‘ཏ་སྨི་ཉྩ ཁ་ཎེ ཨ་ཉྙ་ཏ་རོ དེ་ཝ་པུ་ཏྟོ…པེ… ཨ་ཊྛཱ་སཱི’’ཏི. ཨ་ཐ ནཾ ཨཱ་ཡ་སྨཱ མ་ཧཱ་མོ་གྒ་ལླཱ་ནོ ཡ་ཐཱ་ལ་དྡྷ་ས་མྤ་ཏྟི་ཀི་ཏྟ་ན་མུ་ཁེ་ན ཀ་ཏ་སུ་ཙ་རི་ཏ་ཀ་མྨཾ ཨི་མཱ་ཧི གཱ་ཐཱ་ཧི པུ་ཙྪི –
༡༢༨༢. ‘‘ཨུ་ཙྩ་མི་དཾ མ་ཎི་ཐཱུ་ཎཾ ཝི་མཱ་ནཾ, ས་མ་ནྟ་ཏོ དྭཱ་ད་ས་ཡོ་ཛ་ནཱ་ནི;
ཀཱུ་ཊཱ་གཱ་རཱ ས་ཏྟ་ས་ཏཱ ཨུ་ལཱ༹་རཱ, ཝེ་ལུ༹་རི་ཡ་ཐ་མྦྷཱ རུ་ཙ་ཀ་ཏྠ་ཏཱ སུ་བྷཱ.
༡༢༨༣. ‘‘ཏ་ཏྠ་ཙྪ་སི པི་ཝ་སི ཁཱ་ད་སི ཙ, དི་བྦཱ ཙ ཝཱི་ཎཱ པ་ཝ་ད་ནྟི ཝ་གྒུཾ;
དི་བྦཱ ར་སཱ ཀཱ་མ་གུ་ཎེ་ཏྠ པ་ཉྩ, ནཱ་རི་ཡོ ཙ ན་ཙྩ་ནྟི སུ་ཝ་ཎྞ་ཚ་ནྣཱ.
༡༢༨༤. ‘‘ཀེ་ན ཏེ་ཏཱ་དི་སོ ཝ་ཎྞོ, ཀེ་ན ཏེ ཨི་དྷ མི་ཛ྄ཛྷ་ཏི;
ཨུ་པྤ་ཛྫ་ནྟི ཙ ཏེ བྷོ་གཱ, ཡེ ཀེ་ཙི མ་ན་སོ པི་ཡཱ.
༡༢༨༥. ‘‘པུ་ཙྪཱ་མི ཏཾ དེ་ཝ མ་ཧཱ་ནུ་བྷཱ་ཝ, མ་ནུ་སྶ་བྷཱུ་ཏོ ཀི་མ་ཀཱ་སི པུ་ཉྙཾ;
ཀེ་ནཱ་སི ཨེ་ཝཾ ཛ་ལི་ཏཱ་ནུ་བྷཱ་ཝོ, ཝ་ཎྞོ ཙ ཏེ ས་བྦ་དི་སཱ པ་བྷཱ་ས་ཏཱི’’ཏི.
སོ་པི ཏ་སྶ ཨ་ཏྟ་ནོ ཀ་ཏ་ཀ་མྨཾ ཨི་མཱ་ཧི གཱ་ཐཱ་ཧི ཀ་ཐེ་སི. ཏཾ ད་སྶེ་ནྟཱ ས་ངྒཱི་ཏི་ཀཱ་རཱ ཨཱ་ཧཾ་སུ –
༡༢༨༦. ‘‘སོ དེ་ཝ་པུ་ཏྟོ ཨ་ཏྟ་མ་ནོ, མོ་གྒ་ལླཱ་ནེ་ན པུ་ཙྪི་ཏོ;
པ་ཉྷཾ པུ་ཊྛོ ཝི་ཡཱ་ཀཱ་སི, ཡ་སྶ ཀ་མྨ་སྶི་དཾ ཕ་ལཾ’’.
༡༢༨༧. ‘‘དུ་ནྣི་ཀྑི་ཏྟཾ མཱ་ལཾ སུ་ནི་ཀྑི་པི་ཏྭཱ, པ་ཏི་ཊྛ་པེ་ཏྭཱ སུ་ག་ཏ་སྶ ཐཱུ་པེ;
མ་ཧི་དྡྷི་ཀོ ཙ་མྷི མ་ཧཱ་ནུ་བྷཱ་ཝོ, དི་བྦེ་ཧི ཀཱ་མེ་ཧི ས་མ་ངྒི་བྷཱུ་ཏོ.
༡༢༨༨. ‘‘ཏེ་ན མེ་ཏཱ་དི་སོ ཝ་ཎྞོ, ཏེ་ན མེ ཨི་དྷ མི་ཛ྄ཛྷ་ཏི;
ཨུ་པྤ་ཛྫ་ནྟི ཙ མེ བྷོ་གཱ, ཡེ ཀེ་ཙི མ་ན་སོ པི་ཡཱ.
༡༢༨༩. ‘‘ཨ་ཀྑཱ་མི ཏེ བྷི་ཀྑུ མ་ཧཱ་ནུ་བྷཱ་ཝ, མ་ནུ་སྶ་བྷཱུ་ཏོ ཡ་མ་ཧཾ ཨ་ཀཱ་སིཾ;
ཏེ་ན་མྷི ཨེ་ཝཾ ཛ་ལི་ཏཱ་ནུ་བྷཱ་ཝོ, ཝ་ཎྞོ ཙ མེ ས་བྦ་དི་སཱ པ་བྷཱ་ས་ཏཱི’’ཏི.
༡༢༨༧. ཏ་ཏྠ དུ་ནྣི་ཀྑི་ཏྟཾ མཱ་ལནྟི ཙེ་ཏི་ཡེ པཱུ་ཛཱ་ཀ་ར་ཎ་ཊྛཱ་ནེ ནི་ར་ནྟ་ར་ཊྛ་པ་ནཱ་དི་ནཱ ར་ཙ་ནཱ་ཝི་སེ་སེ་ན ཨ་ཊྛ་པེ་ཏྭཱ ཡ་ཐཱ་ནི་ཀྑི་ཏྟ་ཏཱ་ཡ ན སུ་ཊྛུ ནི་ཀྑི་ཏྟཾ, ཝཱ་ཏེ་ན ཝཱ པ་ཧ་རི་ཏྭཱ དུ་ནྣི་ཀྑི་ཏྟཾ པུ་པྥཾ. སུ་ནི་ཀྑི་པི་ཏྭཱཏི སུ་ཊྛུ ནི་ཀྑི་པི་ཏྭཱ ར་ཙ་ནཱ་ཝི་སེ་སེ་ན ད་སྶ་ནཱི་ཡཾ པཱ་སཱ་དི་ཀཾ ཀ་ཏྭཱ ནི་ཀྑི་པི་ཡ. པ་ཏི་ཊྛ་པེ་ཏྭཱཏི ཝི་བྷ་ཏྟི་ཝི་སེ་སཱ་དི་ཝ་སེ་ན པུ་པྥཾ པ་ཏི་ཊྛཱ་པེ་ཏྭཱ. ཏཾ ཝཱ པུ་པྥཾ ནི་ཀྑི་པ་ནྟོ ས་ཏྠུ ཙེ་ཏི་ཡཾ ཨུ་དྡི་སྶ མ་མ ས་ནྟཱ་ནེ ཀུ་ས་ལ་དྷ་མྨཾ པ་ཏི་ཊྛཱ་པེ་ཏྭཱ་ཏི ཨེ་ཝཾ ཨེ་ཏྠ ཨ་ཏྠོ ད་ཊྛ་བྦོ. སེ་སཾ ཝུ་ཏྟ་ན་ཡ་མེ་ཝ.
ཨེ་ཝཾ དེ་ཝ་པུ་ཏྟེ་ན ཨ་ཏྟ་ནོ སུ་ཙ་རི་ཏ་ཀ་མྨེ པ་ཀཱ་སི་ཏེ ཐེ་རོ ཏ་སྶ དྷ་མྨཾ དེ་སེ་ཏྭཱ ཨཱ་ག་ནྟྭཱ བྷ་ག་ཝ་ཏོ ཏ་མ་ཏྠཾ ནི་ཝེ་དེ་སི. བྷ་ག་ཝཱ ཏཾ ཨ་ཊྛུ་པྤ་ཏྟིཾ ཀ་ཏྭཱ ས་མྤ་ཏྟ་མ་ཧཱ་ཛ་ན་སྶ དྷ་མྨཾ དེ་སེ་སི. དེ་ས་ནཱ མ་ཧཱ་ཛ་ན་སྶ སཱ་ཏྠི་ཀཱ ཨ་ཧོ་སཱི་ཏི.
སུ་ནི་ཀྑི་ཏྟ་ཝི་མཱ་ན་ཝ་ཎྞ་ནཱ ནི་ཊྛི་ཏཱ.
ཨི་ཏི པ་ར་མ་ཏྠ་དཱི་པ་ནི་ཡཱ ཁུ་དྡ་ཀ-ཨ་ཊྛ་ཀ་ཐཱ་ཡ ཝི་མཱ་ན་ཝ་ཏྠུ་སྨིཾ
ཨེ་ཀཱ་ད་ས་ཝ་ཏྠུ་པ་ཊི་མ་ཎྜི་ཏ་སྶ ས་ཏྟ་མ་སྶ
སུ་ནི་ཀྑི་ཏྟ་ཝ་གྒ་སྶ ཨ་ཏྠ་ཝ་ཎྞ་ནཱ ནི་ཊྛི་ཏཱ.
ནི་ཊྛི་ཏཱ ཙ པུ་རི་ས་ཝི་མཱ་ན་ཝ་ཎྞ་ནཱ.
ནི་ག་མ་ན་ཀ་ཐཱ
ཨེ་ཏྟཱ་ཝ་ཏཱ ཙ –
དེ་ཝ་ཏཱ་ནཾ ཝི་མཱ་ནཱ་དི-ས་མྤ་ཏྟིཾ ཏ་སྶ ཀཱ་ར་ཎཾ;
པ་ཀཱ་ས་ཡ་ནྟཱི ས་ཏྟཱ་ནཾ, ས་བྦ་ལོ་ཀ་ཧི་ཏཱ་ཝ་ཧཱ.
ཨ་པྤ་ཀཱ་ན་མྤི ཀཱ་རཱ་ནཾ, ཡཱ ཝི་བྷཱ་ཝེ་ཏི དེ་ས་ནཱ;
ཨུ་ལཱ༹་ར་ཕ་ལ་ཏཾ ཙི་ཏྟ-ཁེ་ཏྟ་ས་མྤ་ཏྟི་ཡོ་ག་ཏོ.
ཡཾ ཀ་ཐཱ་ཝ་ཏྠུ་ཀུ་ས་ལཱ, སུ་པ་རི་ཉྙཱ་ཏ་ཝ་ཏྠུ་ཀཱ;
ཝི་མཱ་ན་ཝ་ཏྠུཨི་ཙྩེ་ཝ, ས་ངྒཱ་ཡིཾ་སུ མ་ཧེ་ས་ཡོ.
ཏ་སྶ ཨ་ཏྠཾ པ་ཀཱ་སེ་ཏུཾ, པོ་རཱ་ཎ་ཊྛ་ཀ་ཐཱ་ན་ཡཾ;
ས་ནྣི་སྶཱ་ཡ ས་མཱ་ར་དྡྷཱ, ཨ་ཏྠ་སཾ་ཝ་ཎྞ་ནཱ མ་ཡཱ.
ཡཱ ཏ་ཏྠ པ་ར་མ་ཏྠཱ་ནཾ, ཏ་ཏྠ ཏ་ཏྠ ཡ་ཐཱ་ར་ཧཾ;
པ་ཀཱ་ས་ནཱ པ་ར་མ་ཏྠ-དཱི་པ་ནཱི ནཱ་མ ནཱ་མ་ཏོ.
ས་མྤ་ཏྟཱ པ་རི་ནི་ཊྛཱ་ནཾ, ཨ་ནཱ་ཀུ་ལ་ཝི་ནི་ཙྪ་ཡཱ;
སཱ ས་ཏྟ་ར་ས་མ་ཏྟཱ་ཡ, པཱ་ལི༹་ཡཱ བྷཱ་ཎ་ཝཱ་ར་ཏོ.
ཨི་ཏི ཏཾ ས་ངྑ་རོ་ནྟེ་ན, ཡཾ ཏཾ ཨ་དྷི་ག་ཏཾ མ་ཡཱ;
པུ་ཉྙཾ ཏ་སྶཱ་ནུ་བྷཱ་ཝེ་ན, ལོ་ཀ་ནཱ་ཐ་སྶ སཱ་ས་ནཾ.
ཨོ་གཱ་ཧེ་ཏྭཱ ཝི་སུ་དྡྷཱ་ཡ, སཱི་ལཱ་དི་པ་ཊི་པ་ཏྟི་ཡཱ;
ས་བྦེ་པི དེ་ཧི་ནོ ཧོ་ནྟུ, ཝི་མུ་ཏྟི་ར་ས་བྷཱ་གི་ནོ.
ཙི་རཾ ཏི་ཊྛ་ཏུ ལོ་ཀ་སྨིཾ, ས་མྨཱ་ས་མྦུ་དྡྷ་སཱ་ས་ནཾ;
ཏ་སྨིཾ ས་གཱ་ར་ཝཱ ནི་ཙྩཾ, ཧོ་ནྟུ ས་བྦེ་པི པཱ་ཎི་ནོ.
ས་མྨཱ ཝ་སྶ་ཏུ ཀཱ་ལེ་ན, དེ་ཝོ་པི ཛ་ག་ཏཱི་པ་ཏི;
ས་དྡྷ་མྨ་ནི་ར་ཏོ ལོ་ཀཾ, དྷ་མྨེ་ནེ་ཝ པ་སཱ་ས་ཏཱུ་ཏི.
ཨི་ཏི བ་ད་ར་ཏི་ཏྠ་ཝི་ཧཱ་ར་ཝཱ་སི་ནཱ ཨཱ་ཙ་རི་ཡ་དྷ་མྨ་པཱ་ལེ་ན
ཀ་ཏཱ་ཡ
པ་ར་མ་ཏྠ་དཱི་པ་ནི་ཡཱ ཁུ་དྡ་ཀ-ཨ་ཊྛ་ཀ་ཐཱ་ཡ
ཝི་མཱ་ན་ཝ་ཏྠུ་ཨ་ཏྠ་ཝ་ཎྞ་ནཱ ནི་ཊྛི་ཏཱ.
ཝི་མཱ་ན་ཝ་ཏྠུ-ཨ་ཊྛ་ཀ་ཐཱ ས་མ་ཏྟཱ.