༡༠. (ཨུ་ཏྟ་ར) པཱ་ཡཱ་སི་ཝི་མཱ་ན་ཝ་ཎྞ་ནཱ

ཡཱ དེ་ཝ་རཱ་ཛ་སྶ ས་བྷཱ སུ་དྷ་མྨཱཏི ཨུ་ཏྟ་ར་ཝི་མཱ་ནཾ. ཏ་སྶ ཀཱ ཨུ་པྤ་ཏྟི? བྷ་ག་ཝ་ཏི པ་རི་ནི་བྦུ་ཏེ དྷཱ་ཏུ་ཝི་བྷཱ་གེ ཙ ཀ་ཏེ ཏ་ཏྠ ཏ་ཏྠ ཐཱུ་པེ་སུ པ་ཏི་ཊྛཱ་པི་ཡ་མཱ་ནེ་སུ དྷ་མྨ་ཝི་ན་ཡཾ ས་ངྒཱ་ཡི་ཏུཾ ཨུ་ཙྩི་ནི་ཏྭཱ ག་ཧི་ཏེ་སུ མ་ཧཱ་ཀ་སྶ་པ་པྤ་མུ་ཁེ་སུ མ་ཧཱ་ཐེ་རེ་སུ ཡཱ་ཝ ཝ་སྶཱུ་པ་ག་མ་ནཱ ཨ་ཉྙེ་སུ ཙ ཐེ་རེ་སུ ཨ་ཏྟ་ནོ ཨ་ཏྟ་ནོ པ་རི་སཱ་ཡ ས་དྡྷིཾ ཏ་ཏྠ ཏ་ཏྠ ཝ་ས་ནྟེ་སུ ཨཱ་ཡ་སྨཱ ཀུ་མཱ་ར་ཀ་སྶ་པོ པ་ཉྩ་ཧི བྷི་ཀྑུ་ས་ཏེ་ཧི ས་དྡྷིཾ སེ་ཏ་བྱ་ན་ག་རཾ ག་ནྟྭཱ སིཾ་ས་པཱ་ཝ་ནེ ཝ་སི. ཨ་ཐ པཱ་ཡཱ་སི རཱ་ཛ་ཉྙོ ཐེ་ར་སྶ ཏ་ཏྠ ཝ་ས་ན་བྷཱ་ཝཾ སུ་ཏྭཱ མ་ཧ་ཏཱ ཛ་ན་ཀཱ་ཡེ་ན པ་རི་ཝུ་ཏོ ཏཾ ཨུ་པ་ས་ངྐ་མི་ཏྭཱ པ་ཊི་ས་ནྠཱ་རཾ ཀ་ཏྭཱ ནི་སི་ནྣོ ཨ་ཏྟ་ནོ དི་ཊྛི་ག་ཏཾ པ་ཝེ་དེ་སི. ཨ་ཐ ནཾ ཐེ་རོ ཙ་ནྡི་མ་སཱུ་རི་ཡཱུ་དཱ་ཧ་ར་ཎཱ་དཱི་ཧི པ་ར་ལོ་ཀ་སྶ ཨ་ཏྠི་བྷཱ་ཝཾ པ་ཀཱ་སེ་ནྟོ ཨ་ནེ་ཀ་ཝི་ཧི་ཏ་ཧེ་ཏཱུ་པ་མཱ་ལ་ངྐ་ཏཾ དི་ཊྛི་ག་ཎྛི་ཝི་ནི་ཝེ་ཋ་ནཾ ནཱ་ནཱ་ན་ཡ་ཝི་ཙི་ཏྟཾ པཱ་ཡཱ་སི་སུ་ཏྟཾ (དཱི. ནི. ༢.༤༠༦ ཨཱ་ད་ཡོ) དེ་སེ་ཏྭཱ ཏཾ དི་ཊྛི་ས་མྤ་དཱ་ཡཾ པ་ཏི་ཊྛཱ་པེ་སི.

སོ ཝི་སུ་དྡྷ་དི་ཊྛི་ཀོ ཧུ་ཏྭཱ ས་མ་ཎ་བྲཱ་ཧྨ་ཎ་ཀ་པ་ཎ་དྡྷི་ཀཱ་དཱི་ནཾ དཱ་ནཾ དེ་ནྟོ ཨ་ནུ་ལཱ༹་ར་ཛ྄ཛྷཱ་ས་ཡ་ཏཱ་ཡ ལཱུ་ཁཾ ཨ་དཱ་སི གྷཱ་ས་ཙྪཱ་ད་ན་མ་ཏྟཾ ཀ་ཎཱ་ཛ་ཀཾ བི་ལ་ངྒ་དུ་ཏི་ཡཾ སཱ་ཎཱ་ནི ཙ ཝ་ཏྠཱ་ནི. ཨེ་ཝཾ པ་ན ཨ་ས་ཀྐ་ཙྩ་དཱ་ནཾ ད་ཏྭཱ ཀཱ་ཡ་སྶ བྷེ་དཱ ཧཱི་ན་ཀཱ་ཡཾ ཨུ་པ་པ་ཛྫི ཙཱ་ཏུ་མ་ཧཱ་རཱ་ཛི་ཀཱ་ནཾ ས་ཧ་བྱ་ཏཾ. ཏ་སྶ པ་ན ཀི་ཙྩཱ་ཀི་ཙྩེ་སུ ཡུ་ཏྟ་པྤ་ཡུ་ཏྟོ ཨུ་ཏྟ་རོ ནཱ་མ མཱ་ཎ་ཝོ ཨ་ཧོ་སི དཱ་ནེ བྱཱ་ཝ་ཊོ. སོ ས་ཀྐ་ཙྩ་དཱ་ནཾ ད་ཏྭཱ ཏཱ་ཝ་ཏིཾ་ས་ཀཱ་ཡཾ ཨུ་པ་པ་ནྣོ, ཏ་སྶ དྭཱ་ད་ས་ཡོ་ཛ་ནི་ཀཾ ཝི་མཱ་ནཾ ནི་བྦ་ཏྟི. སོ ཀ་ཏ་ཉྙུ་ཏཾ ཝི་བྷཱ་ཝེ་ནྟོ ས་ཧ ཝི་མཱ་ནེ་ན ཀུ་མཱ་ར་ཀ་སྶ་པ་ཏྠེ་རཾ ཨུ་པ་ས་ངྐ་མི་ཏྭཱ ཝི་མཱ་ན་ཏོ ཨོ་རུ་ཡ྄ཧ པ་ཉྩ་པ་ཏི་ཊྛི་ཏེ་ན ཝ་ནྡི་ཏྭཱ ཨ་ཉྫ་ལིཾ པ་གྒ་ཡ྄ཧ ཨ་ཊྛཱ་སི. ཏཾ ཐེ་རོ –

༡༡༠༨. ‘‘ཡཱ དེ་ཝ་རཱ་ཛ་སྶ ས་བྷཱ སུ་དྷ་མྨཱ, ཡ་ཏྠ་ཙྪ་ཏི དེ་ཝ་ས་ངྒྷོ ས་མ་གྒོ;

ཏ་ཐཱུ་པ་མཾ ཏུ་ཡ྄ཧ་མི་དཾ ཝི་མཱ་ནཾ, ཨོ་བྷཱ་ས་ཡཾ ཏི་ཊྛ་ཏི ཨ་ནྟ་ལི་ཀྑེ.

༡༡༠༩. ‘‘དེ་ཝི་དྡྷི་པ་ཏྟོ་སི མ་ཧཱ་ནུ་བྷཱ་ཝོ…པེ…

ཝ་ཎྞོ ཙ ཏེ ས་བྦ་དི་སཱ པ་བྷཱ་ས་ཏཱི’’ཏི. – གཱ་ཐཱ་ཧི པ་ཊི་པུ་ཙྪི;

༡༡༡༠. ‘‘སོ དེ་ཝ་པུ་ཏྟོ ཨ་ཏྟ་མ་ནོ…པེ… ཡ་སྶ ཀ་མྨ་སྶི་དཾ ཕ་ལཾ’’.

༡༡༡༡. ‘‘ཨ་ཧཾ མ་ནུ་སྶེ་སུ མ་ནུ་སྶ་བྷཱུ་ཏོ, ར་ཉྙོ པཱ་ཡཱ་སི་སྶ ཨ་ཧོ་སིཾ མཱ་ཎ་ཝོ;

ལ་དྡྷཱ དྷ་ནཾ སཾ་ཝི་བྷཱ་གཾ ཨ་ཀཱ་སིཾ, པི་ཡཱ ཙ མེ སཱི་ལ་ཝ་ནྟོ ཨ་ཧེ་སུཾ;

ཨ་ནྣ་ཉྩ པཱ་ན་ཉྩ པ་ས་ནྣ་ཙི་ཏྟོ, ས་ཀྐ་ཙྩ དཱ་ནཾ ཝི་པུ་ལཾ ཨ་དཱ་སིཾ.

༡༡༡༢. ‘‘ཏེ་ན མེ་ཏཱ་དི་སོ ཝ་ཎྞོ…པེ…

ཝ་ཎྞོ ཙ མེ ས་བྦ་དི་སཱ པ་བྷཱ་ས་ཏཱི’’ཏི. –

སོ དེ་ཝ་པུ་ཏྟོ ཏ་སྶ ཨི་མཱ་ཧི གཱ་ཐཱ་ཧི བྱཱ་ཀཱ་སི.

༡༡༠༨. ཏ་ཏྠ དེ་ཝ་རཱ་ཛ་སྶཱཏི ས་ཀྐ་སྶ. ས་བྷཱ སུ་དྷ་མྨཱཏི ཨེ་ཝཾ་ནཱ་མ་ཀཾ ས་ནྠཱ་གཱ་རཾ. ཡ་ཏྠཱཏི ཡ་སྶཾ ས་བྷཱ་ཡཾ. ཨ་ཙྪ་ཏཱིཏི ནི་སཱི་ད་ཏི. དེ་ཝ་ས་ངྒྷོཏི ཏཱ་ཝ་ཏིཾ་ས་དེ་ཝ་ཀཱ་ཡོ. ས་མ་གྒོཏི ས་ཧི་ཏོ ས་ནྣི་པ་ཏི་ཏོ.

༡༡༡༡. པཱ་ཡཱ་སི་སྶ ཨ་ཧོ་སིཾ མཱ་ཎ་ཝོཏི པཱ་ཡཱ་སི་རཱ་ཛ་ཉྙ་སྶ ཀི་ཙྩཱ་ཀི་ཙྩ་ཀ་རོ ད་ཧ་ར་ཏཱ་ཡ མཱ་ཎ་ཝོ, ནཱ་མེ་ན པ་ན ཨུ་ཏྟ་རོ ནཱ་མ ཨ་ཧོ་སིཾ. སཾ་ཝི་བྷཱ་གཾ ཨ་ཀཱ་སིནྟི ཨ་ཧ་མེ་ཝ ཨ་བྷུ་ཉྫི་ཏྭཱ ཡ་ཐཱ་ལ་དྡྷཾ དྷ་ནཾ དཱ་ན་མུ་ཁེ པ་རི་ཙྩ་ཛ་ན་ཝ་སེ་ན སཾ་ཝི་བྷ་ཛ་ནཾ ཨ་ཀཱ་སིཾ. ཨ་ནྣ་ཉྩ པཱ་ན་ཉྩ པ་རི་ཙྩ་ཛ་ནྟོ་ཏི ཝ་ཙ་ན་སེ་སོ. ཨ་ཐ ཝཱ དཱ་ནཾ ཝི་པུ་ལཾ ཨ་དཱ་སིཾ. ཀ་ཐཾ? ས་ཀྐ་ཙྩཾ. ཀཱི་དི་སཾ? ཨ་ནྣ་ཉྩ པཱ་ན་ཉྩཱཏི ཡོ་ཛེ་ཏ་བྦཾ.

(ཨུ་ཏྟ་ར) པཱ་ཡཱ་སི་ཝི་མཱ་ན་ཝ་ཎྞ་ནཱ ནི་ཊྛི་ཏཱ.

ཨི་ཏི པ་ར་མ་ཏྠ་དཱི་པ་ནི་ཡཱ ཁུ་དྡ་ཀ-ཨ་ཊྛ་ཀ་ཐཱ་ཡ ཝི་མཱ་ན་ཝ་ཏྠུ་སྨིཾ

ད་ས་ཝ་ཏྠུ་པ་ཊི་མ་ཎྜི་ཏ་སྶ ཚ་ཊྛ་སྶ པཱ་ཡཱ་སི་ཝ་གྒ་སྶ

ཨ་ཏྠ་ཝ་ཎྞ་ནཱ ནི་ཊྛི་ཏཱ.