༩. ས་དྷཱ་ཡ་མཱ་ན་སུ་ཏྟ་ཝ་ཎྞ་ནཱ

༤༩. ན་ཝ་མེ མཱ་ཎ་ཝ་ཀཱཏི ཏ་རུ་ཎཱ. པ་ཋ་མེ ཡོ་བྦ་ནེ ཋི་ཏཱ བྲཱ་ཧྨ་ཎ་ཀུ་མཱ་ར་ཀཱ ཨི་དྷཱ་དྷི་པྤེ་ཏཱ.

ས་དྷཱ་ཡ་མཱ་ན་རཱུ་པཱཏི ཨུ་པྤ་ཎྜ་ན་ཛཱ་ཏི་ཀཾ ཝ་ཙ་ནཾ ས་ནྡྷཱ་ཡ ཝུ་ཏྟཾ. ཨ་ཉྙེ་སཾ ཨུ་པྤ་ཎྜེ་ནྟཱ ས་དྷ་ནྟི, ཏ་ད་ཏྠ་ཝ་ཙ་ན་སཱི་ལཱ་ཏི ཨ་ཏྠོ. ཏ་སྶཱ་ཡཾ ཝ་ཙ་ན་ཏྠོ – ས་དྷ་ནཾ ས་དྷོ, ཏཾ ཨཱ་ཙི་ཀྑ་ནྟཱི་ཏི ས་དྷ་ཡ་མཱ་ནཱ་ཏི ཝ་ཏྟ་བྦེ དཱི་གྷཾ ཀ་ཏྭཱ ‘‘ས་དྷཱ་ཡ་མཱ་ནཱ’’ཏི ཝུ་ཏྟཾ. ཨ་ཐ ཝཱ ཝི་སེ་ས་ཏོ ས་སེ་དྷེ ཝི་ཡ ཨ་ཏྟཱ་ནཾ ཨཱ་ཝ་ད་ནྟཱི་ཏི ས་དྷཱ་ཡ་མཱ་ནཱ. ཏེ ཨེ་ཝཾ ས་བྷཱ་ཝ་ཏཱ་ཡ ‘‘ས་དྷཱ་ཡ་མཱ་ན་རཱུ་པཱ’’ཏི ཝུ་ཏྟཾ. ‘‘ས་དྡཱ་ཡ་མཱ་ན་རཱུ་པཱ’’ཏི་པི པཱ་ཋོ, ཨུ་ཙྩཱ་ས་དྡ་མ་ཧཱ་ས་དྡཾ ཀ་རོ་ནྟཱ་ཏི ཨ་ཏྠོ. བྷ་ག་ཝ་ཏོ ཨ་ཝི་དཱུ་རེ ཨ་ཏི་ཀྐ་མ་ནྟཱིཏི བྷ་ག་ཝ་ཏོ ས་ཝ་ན་ཝི་ས་ཡེ ཏཾ ཏཾ མུ་ཁཱ་རུ་ལ༹ྷཾ ཝ་ད་ནྟཱ ཨ་ཏི་ཡ་ནྟི.

ཨེ་ཏ་མ་ཏྠཾ ཝི་དི་ཏྭཱཏི ཨེ་ཏཾ ཏེ་སཾ ཝཱ་ཙཱ་ཡ ཨ་ས་ཉྙ་ཏ་བྷཱ་ཝཾ ཛཱ་ནི་ཏྭཱ ཏ་ད་ཏྠ་དཱི་པ་ཀཾ དྷ་མྨ་སཾ་ཝེ་ག་ཝ་སེ་ན ཨི་མཾ ཨུ་དཱ་ནཾ ཨུ་དཱ་ནེ་སི.

ཏ་ཏྠ པ་རི་མུ་ཊྛཱཏི ད་ནྡྷཱ མུ་ཊྛ་སྶ་ཏི་ནོ. པ་ཎྜི་ཏཱ་བྷཱ་སཱཏི པ་ཎྜི་ཏ་པ་ཏི་རཱུ་པ་ཀཱ ‘‘ཀེ ཨ་ཉྙེ ཛཱ་ན་ནྟི, མ་ཡ་མེ་ཝེ་ཏྠ ཛཱ་ནཱ་མཱ’’ཏི ཏ་སྨིཾ ཏ་སྨིཾ ཨ་ཏྠེ ཨ་ཏྟཱ་ན་མེ་ཝ ཛཱ་ན་ནྟཾ ཀ་ཏྭཱ ས་མུ་དཱ་ཙ་ར་ཎ་ཏོ. ཝཱ་ཙཱ་གོ་ཙ་ར་བྷཱ་ཎི་ནོཏི ཡེ་སཾ ཝཱ་ཙཱ ཨེ་ཝ གོ་ཙ་རོ ཝི་ས་ཡོ, ཏེ ཝཱ་ཙཱ་གོ་ཙ་ར་བྷཱ་ཎི་ནོ, ཝཱ་ཙཱ་ཝ་ཏྠུ་མ་ཏྟ་སྶེ་ཝ བྷཱ་ཎི་ནོ ཨ་ཏྠ་སྶ ཨ་པ་རི་ཉྙཱ་ཏ་ཏྟཱ. ཨ་ཐ ཝཱ ཝཱ་ཙཱ་ཡ ཨ་གོ་ཙ་རཾ ཨ་རི་ཡཱ་ནཾ ཀ་ཐཱ་ཡ ཨ་ཝི་ས་ཡཾ མུ་སཱ་ཝཱ་དཾ བྷ་ཎ་ནྟཱི་ཏི ཝཱ་ཙཱ་གོ་ཙ་ར་བྷཱ་ཎི་ནོ. ཨ་ཐ ཝཱ ‘‘གོ་ཙ་ར་བྷཱ་ཎི་ནོ’’ཏི ཨེ་ཏྠ ཨཱ་ཀཱ་ར་སྶ ར་སྶ་བྷཱ་ཝོ ཀ་ཏོ. ཝཱ་ཙཱ་གོ་ཙ་རཱ, ན ས་ཏི་པ་ཊྛཱ་ནཱ་དི་གོ་ཙ་རཱ བྷཱ་ཎི་ནོ་ཝ. ཀ་ཐཾ བྷཱ་ཎི་ནོ? ཡཱ་ཝི་ཙྪ་ནྟི མུ་ཁཱ་ཡཱ་མཾ ཨ་ཏྟ་ནོ ཡཱ་ཝ མུ་ཁཱ་ཡཱ་མཾ ཡཱ་ཝ མུ་ཁ་པྤ་སཱ་ར་ཎཾ ཨི་ཙྪ་ནྟི, ཏཱ་ཝ པ་སཱ་རེ་ཏྭཱ བྷཱ་ཎི་ནོ, པ་རེ་སུ གཱ་ར་ཝེ་ན, ཨ་ཏྟ་ནོ ཨ་ཝི་ས་ཡ་ཏཱ་ཡ ཙ མུ་ཁ་ས་ངྐོ་ཙཾ ན ཀ་རོ་ནྟཱི་ཏི ཨ་ཏྠོ. ཨ་ཐ ཝཱ ཝཱ་ཙཱ་གོ་ཙ་རཱ ཨེ་ཝ ཧུ་ཏྭཱ བྷཱ་ཎི་ནོ, ས་ཡཾ ཨ་ཛཱ་ནི་ཏྭཱ པ་ར་པ་ཏྟི་ཀཱ ཨེ་ཝ ཧུ་ཏྭཱ ཝ་ཏྟཱ་རོ་ཏི ཨ་ཏྠོ. ཏ་ཏོ ཨེ་ཝ ཡཱ་ཝི་ཙྪ་ནྟི མུ་ཁཱ་ཡཱ་མཾ ཡེ་ན ཝ་ཙ་ནེ་ན སཱ་ཝེ་ཏ་བྦཱ, ཏཾ ཨ་ཙི་ནྟེ་ཏྭཱ ཡཱ་ཝ་དེ་ཝ ཨ་ཏྟ་ནོ མུ་ཁ་པྤ་སཱ་ར་ཎ་མ་ཏྟཾ ཨི་ཙྪ་ནྟཱི་ཏི ཨ་ཏྠོ. ཡེ་ན ནཱི་ཏཱ ན ཏཾ ཝི་དཱུཏི ཡེ་ན མུ་ཊྛ་སྶ་ཙྩཱ་དི་ནཱ ནི་ལླ་ཛྫ་བྷཱ་ཝཾ པ་ཎྜི་ཏ་མཱ་ནཱི་བྷཱ་ཝ་ཉྩ ནཱི་ཏཱ ‘‘མ་ཡ་མེ་ཝཾ བྷ་ཎཱ་མཱ’’ཏི, ཏཾ ཏ་ཐཱ ཨ་ཏྟ་ནོ བྷ་ཎ་ནྟ་སྶ ཀཱ་ར་ཎཾ ན ཝི་དཱུ, ཨ་ཝི་དྡ་སུ་ནོ ཨ་སཱུ་རཱ ན ཛཱ་ན་ནྟཱི་ཏི ཨ་ཏྠོ.

ན་ཝ་མ་སུ་ཏྟ་ཝ་ཎྞ་ནཱ ནི་ཊྛི་ཏཱ.