༡༡. ཛ་ཏུ་ཀ་ཎྞི་སུ་ཏྟ་ཝ་ཎྞ་ནཱ

༡༡༠༣-༤. སུ་ཏྭཱ་ན་ཧནྟི ཛ་ཏུ་ཀ་ཎྞི་སུ་ཏྟཾ. ཏ་ཏྠ སུ་ཏྭཱ་ན་ཧཾ ཝཱི་ར་མ་ཀཱ་མ་ཀཱ་མིནྟི ཨ་ཧཾ ‘‘ཨི་ཏི་པི སོ བྷ་ག་ཝཱ’’ཏི་ཨཱ་དི་ནཱ ན་ཡེ་ན ཝཱི་རཾ ཀཱ་མཱ་ནཾ ཨ་ཀཱ་མ་ན་ཏོ ཨ་ཀཱ་མ་ཀཱ་མིཾ བུ་དྡྷཾ སུ་ཏྭཱ. ཨ་ཀཱ་མ་མཱ་ག་མནྟི ནི་ཀྐཱ་མཾ བྷ་ག་ཝ་ནྟཾ པུ་ཙྪི་ཏུཾ ཨཱ་ག་ཏོ་མྷི. ས་ཧ་ཛ་ནེ་ཏྟཱཏི ས་ཧ་ཛཱ་ཏ་ས་བྦ་ཉྙུ་ཏ་ཉྙཱ་ཎ་ཙ་ཀྑུ. ཡ་ཐཱ་ཏ་ཙྪནྟི ཡ་ཐཱ་ཏ་ཐཾ. བྲཱུ་ཧི མེཏི པུ་ན ཡཱ་ཙ་ནྟོ བྷ་ཎ་ཏི. ཡཱ་ཙ་ནྟོ ཧི ས་ཧ་སྶ་ཀྑ་ཏྟུ་མྤི བྷ་ཎེ་ཡྻ, ཀོ པ་ན ཝཱ་དོ དྭི་ཀྑ་ཏྟུཾ. ཏེ་ཛཱི ཏེ་ཛ་སཱཏི ཏེ་ཛེ་ན ས་མ་ནྣཱ་ག་ཏོ ཏེ་ཛ་སཱ ཨ་བྷི་བྷུ་ཡྻ. ཡ་མ་ཧཾ ཝི་ཛ་ཉྙཾ ཛཱ་ཏི་ཛ་རཱ་ཡ ཨི་དྷ ཝི་པྤ་ཧཱ་ནནྟི ཡ་མ་ཧཾ ཛཱ་ཏི་ཛ་རཱ་ནཾ པ་ཧཱ་ན་བྷཱུ་ཏཾ དྷ་མྨཾ ཨི་དྷེ་ཝ ཛཱ་ནེ་ཡྻཾ.

༡༡༠༥-༧. ཨ་ཐ་སྶ བྷ་ག་ཝཱ ཏཾ དྷ་མྨ་མཱ་ཙི་ཀྑ་ནྟོ ཏི་སྶོ གཱ་ཐཱ་ཡོ ཨ་བྷཱ་སི. ཏ་ཏྠ ནེ་ཀྑ་མྨཾ ད་ཊྛུ ཁེ་མ་ཏོཏི ནི་བྦཱ་ན་ཉྩ ནི་བྦཱ་ན་གཱ་མི་ནི་ཉྩ པ་ཊི་པ་དཾ ‘‘ཁེ་མ’’ནྟི དི་སྭཱ. ཨུ་གྒ་ཧི་ཏནྟི ཏ་ཎྷཱ་དི་ཊྛི་ཝ་སེ་ན ག་ཧི་ཏཾ. ནི་ར་ཏྟཾ ཝཱཏི ནི་ར་སྶི་ཏ་བྦཾ ཝཱ, མུ་ཉྩི་ཏ་བྦ་ནྟི ཝུ་ཏྟཾ ཧོ་ཏི. མཱ ཏེ ཝི་ཛྫི་ཏྠཱཏི མཱ ཏེ ཨ་ཧོ་སི. ཀི་ཉྩ་ནནྟི རཱ་གཱ་དི་ཀི་ཉྩ་ནཾ ཝཱ་པི ཏེ མཱ ཝི་ཛྫི་ཏྠ. པུ་བྦེཏི ཨ་ཏཱི་ཏེ ས་ངྑཱ་རེ ཨཱ་ར་བྦྷ ཨུ་པྤ་ནྣ་ཀི་ལེ་སཱ. བྲཱ་ཧྨ་ཎཱཏི བྷ་ག་ཝཱ ཛ་ཏུ་ཀ་ཎྞིཾ ཨཱ་ལ་པ་ཏི. སེ་སཾ ས་བྦ་ཏྠ པཱ་ཀ་ཊ་མེ་ཝ.

ཨེ་ཝཾ བྷ་ག་ཝཱ ཨི་མ་མྤི སུ་ཏྟཾ ཨ་ར་ཧ་ཏྟ་ནི་ཀཱུ་ཊེ་ནེ་ཝ དེ་སེ་སི. དེ་ས་ནཱ་པ་རི་ཡོ་སཱ་ནེ ཙ པུ་བྦ་ས་དི་སོ ཨེ་ཝ དྷ་མྨཱ་བྷི་ས་མ་ཡོ ཨ་ཧོ་སཱི་ཏི.

པ་ར་མ་ཏྠ་ཛོ་ཏི་ཀཱ་ཡ ཁུ་དྡ་ཀ-ཨ་ཊྛ་ཀ་ཐཱ་ཡ

སུ་ཏྟ་ནི་པཱ་ཏ-ཨ་ཊྛ་ཀ་ཐཱ་ཡ ཛ་ཏུ་ཀ་ཎྞི་སུ་ཏྟ་ཝ་ཎྞ་ནཱ ནི་ཊྛི་ཏཱ.