༧. རཱ་ཛ་པུ་ཏྟ་པེ་ཏ་ཝ་ཏྠུ་ཝ་ཎྞ་ནཱ
པུ་བྦེ ཀ་ཏཱ་ནཾ ཀ་མྨཱ་ནནྟི ཨི་དཾ ས་ཏྠཱ ཛེ་ཏ་ཝ་ནེ ཝི་ཧ་ར་ནྟོ རཱ་ཛ་པུ་ཏྟ་པེ་ཏཾ ཨཱ་ར་བྦྷ ཀ་ཐེ་སི. ཏ་ཏྠ ཡོ སོ ཨ་ཏཱི་ཏེ ཀི་ཏ་ཝ་སྶ ནཱ་མ ར་ཉྙོ པུ་ཏྟོ ཨ་ཏཱི་ཏེ པ་ཙྩེ་ཀ་བུ་དྡྷེ ཨ་པ་ར་ཛ྄ཛྷི་ཏྭཱ བ་ཧཱུ་ནི ཝ་སྶ་ས་ཧ་སྶཱ་ནི ནི་ར་ཡེ པ་ཙྩི་ཏྭཱ ཏ་སྶེ་ཝ ཀ་མྨ་སྶ ཝི་པཱ་ཀཱ་ཝ་སེ་སེ་ན པེ་ཏེ་སུ ཨུ་པྤ་ནྣོ. སོ ཨི་དྷ ‘‘རཱ་ཛ་པུ་ཏྟ་པེ་ཏོ’’ཏི ཨ་དྷི་པྤེ་ཏོ. ཏ་སྶ ཝ་ཏྠུ ཧེ་ཊྛཱ སཱ་ཎ་ཝཱ་སི་པེ་ཏ་ཝ་ཏྠུ་མྷི ཝི་ཏྠཱ་ར་ཏོ ཨཱ་ག་ཏ་མེ་ཝ, ཏ་སྨཱ ཏ་ཏྠ ཝུ་ཏྟ་ན་ཡེ་ནེ་ཝ ག་ཧེ་ཏ་བྦཾ. ས་ཏྠཱ ཧི ཏ་དཱ ཐེ་རེ་ན ཨ་ཏྟ་ནོ ཉཱ་ཏི་པེ་ཏཱ་ནཾ པ་ཝ་ཏྟི་ཡཱ ཀ་ཐི་ཏཱ་ཡ ‘‘ན ཀེ་ཝ་ལཾ ཏ་ཝ ཉཱ་ཏ་ཀཱ་ཡེ་ཝ, ཨ་ཐ ཁོ ཏྭ་མྤི ཨི་ཏོ ཨ་ན་ནྟ་རཱ་ཏཱི་ཏེ ཨ་ཏྟ་བྷཱ་ཝེ པེ་ཏོ ཧུ་ཏྭཱ མ་ཧཱ་དུ་ཀྑཾ ཨ་ནུ་བྷ་ཝཱི’’ཏི ཝ་ཏྭཱ ཏེ་ན ཡཱ་ཙི་ཏོ –
༧༥༣. ‘‘པུ་བྦེ ཀ་ཏཱ་ནཾ ཀ་མྨཱ་ནཾ, ཝི་པཱ་ཀོ མ་ཐ་ཡེ མ་ནཾ;
རཱུ་པེ ས་དྡེ ར་སེ ག་ནྡྷེ, ཕོ་ཊྛ་བྦེ ཙ མ་ནོ་ར་མེ.
༧༥༤. ‘‘ཨི་ཙྩཾ གཱི་ཏཾ ར་ཏིཾ ཁི་ཌྜཾ, ཨ་ནུ་བྷུ་ཏྭཱ ཨ་ན་པྤ་ཀཾ;
ཨུ་ཡྻཱ་ནེ པ་རི་ཙ་རི་ཏྭཱ, པ་ཝི་ས་ནྟོ གི་རི་བྦ་ཛཾ.
༧༥༥. ‘‘ཨི་སིཾ སུ་ནེ་ཏྟ་མ་དྡ་ཀྑི, ཨ་ཏྟ་ད་ནྟཾ ས་མཱ་ཧི་ཏཾ;
ཨ་པྤི་ཙྪཾ ཧི་རི་ས་མྤ་ནྣཾ, ཨུ་ཉྪེ པ་ཏྟ་ག་ཏེ ར་ཏཾ.
༧༥༦. ‘‘ཧ་ཏྠི་ཀྑ་ནྡྷ་ཏོ ཨོ་རུ་ཡ྄ཧ, ལ་དྡྷཱ བྷ་ནྟེ་ཏི ཙཱ་བྲ་ཝི;
ཏ་སྶ པ་ཏྟཾ ག་ཧེ་ཏྭཱ་ན, ཨུ་ཙྩཾ པ་གྒ་ཡ྄ཧ ཁ་ཏྟི་ཡོ.
༧༥༧. ‘‘ཐ་ཎྜི་ལེ པ་ཏྟཾ བྷི་ནྡི་ཏྭཱ, ཧ་ས་མཱ་ནོ ཨ་པ་ཀྐ་མི;
ར་ཉྙོ ཀི་ཏ་ཝ་སྶཱ་ཧཾ པུ་ཏྟོ, ཀིཾ མཾ བྷི་ཀྑུ ཀ་རི་སྶ་སི.
༧༥༨. ‘‘ཏ་སྶ ཀ་མྨ་སྶ ཕ་རུ་ས་སྶ, ཝི་པཱ་ཀོ ཀ་ཊུ་ཀོ ཨ་ཧུ;
ཡཾ རཱ་ཛ་པུ་ཏྟོ ཝེ་དེ་སི, ནི་ར་ཡ་མྷི ས་མ་པྤི་ཏོ.
༧༥༩. ‘‘ཚ་ལེ༹་ཝ ཙ་ཏུ་རཱ་སཱི་ཏི, ཝ་སྶཱ་ནི ན་ཧུ་ཏཱ་ནི ཙ;
བྷུ་སཾ དུ་ཀྑཾ ནི་ག་ཙྪི་ཏྠོ, ནི་ར་ཡེ ཀ་ཏ་ཀི་བྦི་སོ.
༧༦༠. ‘‘ཨུ་ཏྟཱ་ནོ་པི ཙ པ་ཙྩི་ཏྠ, ནི་ཀུ་ཛྫོ ཝཱ་མ་ད་ཀྑི་ཎོ;
ཨུ་དྡྷཾ་པཱ་དོ ཋི་ཏོ ཙེ་ཝ, ཙི་རཾ བཱ་ལོ ཨ་པ་ཙྩ་ཐ.
༧༦༡. ‘‘བ་ཧཱུ་ནི ཝ་སྶ་ས་ཧ་སྶཱ་ནི, པཱུ་གཱ་ནི ན་ཧུ་ཏཱ་ནི ཙ;
བྷུ་སཾ དུ་ཀྑཾ ནི་ག་ཙྪི་ཏྠོ, ནི་ར་ཡེ ཀ་ཏ་ཀི་བྦི་སོ.
༧༦༢. ‘‘ཨེ་ཏཱ་དི་སཾ ཁོ ཀ་ཊུ་ཀཾ, ཨ་པྤ་དུ་ཊྛ་པྤ་དོ་སི་ནཾ;
པ་ཙྩ་ནྟི པཱ་པ་ཀ་མྨ་ནྟཱ, ཨི་སི་མཱ་ས་ཛྫ སུ་བྦ་ཏཾ.
༧༦༣. ‘‘སོ ཏ་ཏྠ བ་ཧུ་ཝ་སྶཱ་ནི, ཝེ་ད་ཡི་ཏྭཱ བ་ཧུཾ དུ་ཁཾ;
ཁུ་པྤི་པཱ་ས་ཧ་ཏོ ནཱ་མ, པེ་ཏོ ཨཱ་སི ཏ་ཏོ ཙུ་ཏོ.
༧༦༤. ‘‘ཨེ་ཏ་མཱ་དཱི་ན་ཝཾ ཉ་ཏྭཱ, ཨི་སྶ་ར་མ་ད་ས་མྦྷ་ཝཾ;
པ་ཧཱ་ཡ ཨི་སྶ་ར་མ་དཾ, ནི་ཝཱ་ཏ་མ་ནུ་ཝ་ཏྟ་ཡེ.
༧༦༥. ‘‘དི་ཊྛེ་ཝ དྷ་མྨེ པཱ་སཾ་སོ, ཡོ བུ་དྡྷེ་སུ ས་གཱ་ར་ཝོ;
ཀཱ་ཡ་སྶ བྷེ་དཱ ས་པྤ་ཉྙོ, ས་གྒཾ སོ ཨུ་པ་པ་ཛྫ་ཏཱི’’ཏི. –
ཨི་དཾ པེ་ཏ་ཝ་ཏྠུཾ ཀ་ཐེ་སི.
༧༥༣. ཏ་ཏྠ པུ་བྦེ ཀ་ཏཱ་ནཾ ཀ་མྨཱ་ནཾ, ཝི་པཱ་ཀོ མ་ཐ་ཡེ མ་ནནྟི པུ་རི་མཱ་སུ ཛཱ་ཏཱི་སུ ཀ་ཏཱ་ནཾ ཨ་ཀུ་ས་ལ་ཀ་མྨཱ་ནཾ ཕ་ལཾ ཨུ་ལཱ༹་རཾ ཧུ་ཏྭཱ ཨུ་པྤ་ཛྫ་མཱ་ནཾ ཨ་ནྡྷ་བཱ་ལཱ་ནཾ ཙི་ཏྟཾ མ་ཐ་ཡེ་ཡྻ ཨ་བྷི་བྷ་ཝེ་ཡྻ, པ་རེ་སཾ ཨ་ན་ཏྠ་ཀ་ར་ཎ་མུ་ཁེ་ན ཨ་ཏྟ་ནོ ཨ་ཏྠཾ ཨུ་པྤཱ་དེ་ཡྻཱ་ཏི ཨ་དྷི་པྤཱ་ཡོ.
ཨི་དཱ་ནི ཏཾ ཙི་ཏྟ་མ་ཐ་ནཾ ཝི་ས་ཡེ་ན ས་དྡྷིཾ ད་སྶེ་ཏུཾ ‘‘རཱུ་པེ ས་དྡེ’’ཏི་ཨཱ་དི ཝུ་ཏྟཾ. ཏ་ཏྠ རཱུ་པེཏི རཱུ་པ་ཧེ་ཏུ, ཡ་ཐི་ཙྪི་ཏ་སྶ མ་ནཱ་པི་ཡ་སྶ རཱུ་པཱ་ར་མྨ་ཎ་སྶ པ་ཊི་ལཱ་བྷ་ནི་མི་ཏྟ་ནྟི ཨ་ཏྠོ. ས་དྡེཏི་ཨཱ་དཱི་སུ་པི ཨེ་སེ་ཝ ན་ཡོ.
༧༥༤. ཨེ་ཝཾ སཱ་དྷཱ་ར་ཎ་ཏོ ཝུ་ཏྟ་མ་ཏྠཾ ཨ་སཱ་དྷཱ་ར་ཎ་ཏོ ནི་ཡ་མེ་ཏྭཱ ད་སྶེ་ནྟོ ‘‘ན་ཙྩཾ གཱི་ཏ’’ནྟི་ཨཱ་དི་མཱ་ཧ. ཏ་ཏྠ ར་ཏིནྟི ཀཱ་མ་ར་ཏིཾ. ཁི་ཌྜནྟི ས་ཧཱ་ཡ་ཀཱ་དཱི་ཧི ཀེ་ལི༹ཾ. གི་རི་བྦ་ཛནྟི རཱ་ཛ་ག་ཧཾ.
༧༥༥. ཨི་སིནྟི ཨ་སེ་ཀྑཱ་ནཾ སཱི་ལ་ཀྑ་ནྡྷཱ་དཱི་ནཾ ཨེ་ས་ན་ཊྛེ་ན ཨི་སིཾ. སུ་ནེ་ཏྟནྟི ཨེ་ཝཾ་ནཱ་མ་ཀཾ པ་ཙྩེ་ཀ་བུ་དྡྷཾ. ཨ་ཏྟ་ད་ནྟནྟི ཨུ་ཏྟ་མེ་ན ད་མ་ཐེ་ན ད་མི་ཏ་ཙི་ཏྟཾ. ས་མཱ་ཧི་ཏནྟི ཨ་ར་ཧ་ཏྟ་ཕ་ལ་ས་མཱ་དྷི་ནཱ ས་མཱ་ཧི་ཏཾ. ཨུ་ཉྪེ པ་ཏྟ་ག་ཏེ ར་ཏནྟི ཨུ་ཉྪེ་ན བྷི་ཀྑཱ་ཙཱ་རེ་ན ལ་དྡྷེ པ་ཏྟ་ག་ཏེ པ་ཏྟ་པ་རི་ཡཱ་པ་ནྣེ ཨཱ་ཧཱ་རེ ར་ཏཾ ས་ནྟུ་ཊྛཾ.
༧༥༦. ལ་དྡྷཱ, བྷ་ནྟེ་ཏི ཙཱ་བྲ་ཝཱིཏི ‘‘ཨ་པི, བྷ་ནྟེ, བྷི་ཀྑཱ ལ་དྡྷཱ’’ཏི ཝི་སྶཱ་ས་ཛ་ན་ན་ཏྠཾ ཀ་ཐེ་སི. ཨུ་ཙྩཾ པ་གྒ་ཡ྄ཧཱཏི ཨུ་ཙྩ་ཏ་རཾ ཀ་ཏྭཱ པ་ཏྟཾ ཨུ་ཀྑི་པི་ཏྭཱ.
༧༥༧. ཐ་ཎྜི་ལེ པ་ཏྟཾ བྷི་ནྡི་ཏྭཱཏི ཁ་ར་ཀ་ཋི་ནེ བྷཱུ་མི་པྤ་དེ་སེ ཁི་པ་ནྟོ པ་ཏྟཾ བྷི་ནྡི་ཏྭཱ. ཨ་པ་ཀྐ་མཱིཏི ཐོ་ཀཾ ཨ་པ་ས་ཀྐི. ཨ་པ་ས་ཀྐ་ནྟོ ཙ ‘‘ཨ་ཀཱ་ར་ཎེ་ནེ་ཝ ཨ་ནྡྷ་བཱ་ལོ མ་ཧ་ནྟཾ ཨ་ན་ཏྠཾ ཨ་ཏྟ་ནོ ཨ་ཀཱ་སཱི’’ཏི ཀ་རུ་ཎཱ་ཡ་ན་ཝ་སེ་ན ཨོ་ལོ་ཀེ་ནྟཾ པ་ཙྩེ་ཀ་བུ་དྡྷཾ རཱ་ཛ་པུ་ཏྟོ ཨཱ་ཧ ‘‘ར་ཉྙོ ཀི་ཏ་ཝ་སྶཱ་ཧཾ པུ་ཏྟོ, ཀིཾ མཾ བྷི་ཀྑུ ཀ་རི་སྶ་སཱི’’ཏི.
༧༥༨. ཕ་རུ་ས་སྶཱཏི དཱ་རུ་ཎ་སྶ. ཀ་ཊུ་ཀོཏི ཨ་ནི་ཊྛོ. ཡནྟི ཡཾ ཝི་པཱ་ཀཾ. ས་མ་པྤི་ཏོཏི ཨ་ལླཱི་ནོ.
༧༥༩. ཚ་ལེ༹་ཝ ཙ་ཏུ་རཱ་སཱི་ཏི, ཝ་སྶཱ་ནི ན་ཧུ་ཏཱ་ནི ཙཱཏི ཨུ་ཏྟཱ་ནོ ནི་པ་ནྣོ ཙ་ཏུ་རཱ་སཱི་ཏི་ཝ་སྶ་ས་ཧ་སྶཱ་ནི, ནི་ཀུ་ཛྫོ, ཝཱ་མ་པ་སྶེ་ན, ད་ཀྑི་ཎ་པ་སྶེ་ན, ཨུ་དྡྷཾ་པཱ་དོ, ཨོ་ལ་མྦི་ཀོ, ཡ་ཐཱ་ཋི་ཏོ ཙཱ་ཏི ཨེ་ཝཾ ཚ ཙ་ཏུ་རཱ་སཱི་ཏི་ས་ཧ་སྶཱ་ནི ཝ་སྶཱ་ནི ཧོ་ནྟི. ཏེ་ནཱ་ཧ –
༧༦༠. ‘‘ཨུ་ཏྟཱ་ནོ་པི ཙ པ་ཙྩི་ཏྠ, ནི་ཀུ་ཛྫོ ཝཱ་མ་ད་ཀྑི་ཎོ;
ཨུ་དྡྷཾ་པཱ་དོ ཋི་ཏོ ཙེ་ཝ, ཙི་རཾ བཱ་ལོ ཨ་པ་ཙྩ་ཐཱ’’ཏི.
ཏཱ་ནི པ་ན ཝ་སྶཱ་ནི ཡ་སྨཱ ཨ་ནེ་ཀཱ་ནི ན་ཧུ་ཏཱ་ནི ཧོ་ནྟི, ཏ་སྨཱ ཝུ་ཏྟཾ ‘‘ན་ཧུ་ཏཱ་ནཱི’’ཏི. བྷུ་སཾ དུ་ཀྑཾ ནི་ག་ཙྪི་ཏྠོཏི ཨ་ཏི་ཝི་ཡ དུ་ཀྑཾ པཱ་པུ་ཎི.
༧༦༡. པཱུ་གཱ་ནཱིཏི ཝ་སྶ་ས་མཱུ་ཧེ, ཨི་དྷ པུ་རི་མ་གཱ་ཐཱ་ཡ ཙ ཨ་ཙྩ་ནྟ་སཾ་ཡོ་གེ ཨུ་པ་ཡོ་ག་ཝ་ཙ་ནཾ ད་ཊྛ་བྦཾ.
༧༦༢. ཨེ་ཏཱ་དི་སནྟི ཨེ་ཝ་རཱུ་པཾ. ཀ་ཊུ་ཀནྟི ཨ་ཏི་དུ་ཀྑཾ, བྷཱ་ཝ་ན་པཾ་ས་ཀ་ནི་དྡེ་སོ་ཡཾ ‘‘ཨེ་ཀ་མ་ནྟཾ ནི་སཱི་དཱི’’ཏི་ཨཱ་དཱི་སུ ཝི་ཡ. ཨ་པྤ་དུ་ཊྛ་པྤ་དོ་སི་ནཾ ཨི་སིཾ སུ་བྦ་ཏཾ ཨཱ་ས་ཛྫ ཨཱ་སཱ་དེ་ཏྭཱ པཱ་པ་ཀ་མྨ་ནྟཱ པུ་གྒ་ལཱ ཨེ་ཝ་རཱུ་པཾ ཀ་ཊུ་ཀཾ ཨ་ཏི་ཝི་ཡ དུ་ཀྑཾ པ་ཙྩ་ནྟཱི་ཏི ཡོ་ཛ་ནཱ.
༧༦༣. སོཏི སོ རཱ་ཛ་པུ་ཏྟ་པེ་ཏོ. ཏ་ཏྠཱཏི ནི་ར་ཡེ. ཝེ་ད་ཡི་ཏྭཱཏི ཨ་ནུ་བྷ་ཝི་ཏྭཱ. ནཱ་མཱཏི བྱ་ཏྟ་པཱ་ཀ་ཊ་བྷཱ་ཝེ་ན. ཏ་ཏོ ཙུ་ཏོཏི ནི་ར་ཡ་ཏོ ཙུ་ཏོ. སེ་སཾ ཝུ་ཏྟ་ན་ཡ་མེ་ཝ.
ཨེ་ཝཾ བྷ་ག་ཝཱ རཱ་ཛ་པུ་ཏྟ་པེ་ཏ་ཀ་ཐཱ་ཡ ཏ་ཏྠ ས་ནྣི་པ་ཏི་ཏཾ མ་ཧཱ་ཛ་ནཾ སཾ་ཝེ་ཛེ་ཏྭཱ ཨུ་པ་རི ས་ཙྩཱ་ནི པ་ཀཱ་སེ་སི. ས་ཙྩ་པ་རི་ཡོ་སཱ་ནེ བ་ཧཱུ སོ་ཏཱ་པ་ཏྟི་ཕ་ལཱ་དཱི་ནི ས་མྤཱ་པུ་ཎིཾ་སཱུ་ཏི.
རཱ་ཛ་པུ་ཏྟ་པེ་ཏ་ཝ་ཏྠུ་ཝ་ཎྞ་ནཱ ནི་ཊྛི་ཏཱ.