༨. གཱུ་ཐ་ཁཱ་ད་ཀ་པེ་ཏ་ཝ་ཏྠུ་ཝ་ཎྞ་ནཱ

གཱུ་ཐ་ཀཱུ་པ་ཏོ ཨུ་གྒ་ནྟྭཱཏི ཨི་དཾ ས་ཏྠ་རི ཛེ་ཏ་ཝ་ནེ ཝི་ཧ་ར་ནྟེ ཨེ་ཀཾ གཱུ་ཐ་ཁཱ་ད་ཀ་པེ་ཏཾ ཨཱ་ར་མྦྷ ཝུ་ཏྟཾ. སཱ་ཝ་ཏྠི་ཡཱ ཀི་ར ཨ་ཝི་དཱུ་རེ ཨ་ཉྙ་ཏ་ར་སྨིཾ གཱ་མ་ཀེ ཨེ་ཀོ ཀུ་ཊུ་མྦི་ཀོ ཨ་ཏྟ་ནོ ཀུ་ལཱུ་པ་ཀཾ བྷི་ཀྑུཾ ཨུ་དྡི་སྶ ཝི་ཧཱ་རཾ ཀཱ་རེ་སི. ཏ་ཏྠ ནཱ་ནཱ་ཛ་ན་པ་ད་ཏོ བྷི་ཀྑཱུ ཨཱ་ག་ནྟྭཱ པ་ཊི་ཝ་སིཾ་སུ. ཏེ དི་སྭཱ མ་ནུ་སྶཱ པ་ས་ནྣ་ཙི་ཏྟཱ པ་ཎཱི་ཏེ་ན པ་ཙྩ་ཡེ་ན ཨུ་པ་ཊྛ་ཧིཾ་སུ. ཀུ་ལཱུ་པ་ཀོ བྷི་ཀྑུ ཏཾ ཨ་ས་ཧ་མཱ་ནོ ཨི་སྶཱ་པ་ཀ་ཏོ ཧུ་ཏྭཱ ཏེ་སཾ བྷི་ཀྑཱུ་ནཾ དོ་སཾ ཝ་ད་ནྟོ ཀུ་ཊུ་མྦི་ཀཾ ཨུ་ཛ྄ཛྷཱ་པེ་སི. ཀུ་ཊུ་མྦི་ཀོ ཏེ བྷི་ཀྑཱུ ཀུ་ལཱུ་པ་ཀ་ཉྩ པ་རི་བྷ་ཝ་ནྟོ པ་རི་བྷཱ་སི. ཨ་ཐ ཀུ་ལཱུ་པ་ཀོ ཀཱ་ལཾ ཀ་ཏྭཱ ཏ་སྨིཾ་ཡེ་ཝ ཝི་ཧཱ་རེ ཝ་ཙྩ་ཀུ་ཊི་ཡཾ པེ་ཏོ ཧུ་ཏྭཱ ནི་བྦ་ཏྟི, ཀུ་ཊུ་མྦི་ཀོ པ་ན ཀཱ་ལཾ ཀ་ཏྭཱ ཏ་སྶེ་ཝ ཨུ་པ་རི པེ་ཏོ ཧུ་ཏྭཱ ནི་བྦ་ཏྟི. ཨ་ཐཱ་ཡ་སྨཱ མ་ཧཱ་མོ་གྒ་ལླཱ་ནོ ཏཾ དི་སྭཱ པུ་ཙྪ་ནྟོ –

༧༦༦. ‘‘གཱུ་ཐ་ཀཱུ་པ་ཏོ ཨུ་གྒ་ནྟྭཱ, ཀོ ན དཱི་ནོ པ་ཏི་ཊྛ་སི;

ནི་སྶཾ་ས་ཡཾ པཱ་པ་ཀ་མྨ་ནྟོ, ཀིཾ ནུ ས་དྡ་ཧ་སེ ཏུ་ཝ’’ནྟི. –

གཱ་ཐ་མཱ་ཧ. ཏཾ སུ་ཏྭཱ པེ་ཏོ –

༧༦༧. ‘‘ཨ་ཧཾ བྷ་ད་ནྟེ པེ་ཏོ་མྷི, དུ་གྒ་ཏོ ཡ་མ་ལོ་ཀི་ཀོ;

པཱ་པ་ཀ་མྨཾ ཀ་རི་ཏྭཱ་ན, པེ་ཏ་ལོ་ཀཾ ཨི་ཏོ ག་ཏོ’’ཏི. –

གཱ་ཐཱ་ཡ ཨ་ཏྟཱ་ནཾ ཨཱ་ཙི་ཀྑི. ཨ་ཐ ནཾ ཐེ་རོ –

༧༦༨. ‘‘ཀིཾ ནུ ཀཱ་ཡེ་ན ཝཱ་ཙཱ་ཡ, མ་ན་སཱ དུ་ཀྐ་ཊཾ ཀ་ཏཾ;

ཀི་སྶ་ཀ་མྨ་ཝི་པཱ་ཀེ་ན, ཨི་དཾ དུ་ཀྑཾ ནི་ག་ཙྪ་སཱི’’ཏི. –

གཱ་ཐཱ་ཡ ཏེ་ན ཀ་ཏ་ཀ་མྨཾ པུ་ཙྪི. སོ པེ་ཏོ –

༧༦༩. ‘‘ཨ་ཧུ ཨཱ་ཝཱ་སི་ཀོ མ་ཡ྄ཧཾ, ཨི་སྶུ་ཀཱི ཀུ་ལ་མ་ཙྪ་རཱི;

ཨ་ཛ྄ཛྷཱ་སི་ཏོ མ་ཡ྄ཧཾ གྷ་རེ, ཀ་ད་རི་ཡོ པ་རི་བྷཱ་ས་ཀོ.

༧༧༠. ‘‘ཏ་སྶཱ་ཧཾ ཝ་ཙ་ནཾ སུ་ཏྭཱ, བྷི་ཀྑ་ཝོ པ་རི་བྷཱ་སི་སཾ;

ཏ་སྶ་ཀ་མྨ་ཝི་པཱ་ཀེ་ན, པེ་ཏ་ལོ་ཀཾ ཨི་ཏོ ག་ཏོ’’ཏི. –

དྭཱི་ཧི གཱ་ཐཱ་ཧི ཨ་ཏྟ་ནཱ ཀ་ཏ་ཀ་མྨཾ ཀ་ཐེ་སི.

༧༦༩. ཏ་ཏྠ ཨ་ཧུ ཨཱ་ཝཱ་སི་ཀོ མ་ཡ྄ཧནྟི མ་ཡ྄ཧཾ ཨཱ་ཝཱ་སེ མ་ཡཱ ཀ་ཏ་ཝི་ཧཱ་རེ ཨེ་ཀོ བྷི་ཀྑུ ཨཱ་ཝཱ་སི་ཀོ ནི་བ་དྡྷ་ཝ་ས་ན་ཀོ ཨ་ཧོ་སི. ཨ་ཛ྄ཛྷཱ་སི་ཏོ མ་ཡ྄ཧཾ གྷ་རེཏི ཀུ་ལཱུ་པ་ཀ་བྷཱ་ཝེ་ན མ་མ གེ་ཧེ ཏ་ཎྷཱ་བྷི་ནི་ཝེ་ས་ཝ་སེ་ན ཨ་བྷི་ནི་ཝི་ཊྛོ.

༧༧༠. ཏ་སྶཱཏི ཏ་སྶ ཀུ་ལཱུ་པ་ཀ་བྷི་ཀྑུ་སྶ. བྷི་ཀྑ་ཝོཏི བྷི་ཀྑཱུ. པ་རི་བྷཱ་སི་སནྟི ཨ་ཀྐོ་སིཾ. པེ་ཏ་ལོ་ཀཾ ཨི་ཏོ ག་ཏོཏི ཨི་མི་ནཱ ཨཱ་ཀཱ་རེ་ན པེ་ཏ་ཡོ་ནིཾ ཨུ་པ་ག་ཏོ པེ་ཏ་བྷཱུ་ཏོ.

ཏཾ སུ་ཏྭཱ ཐེ་རོ ཨི་ཏ་ར་སྶ ག་ཏིཾ པུ་ཙྪ་ནྟོ –

༧༧༡. ‘‘ཨ་མི་ཏྟོ མི་ཏྟ་ཝ་ཎྞེ་ན, ཡོ ཏེ ཨཱ་སི ཀུ་ལཱུ་པ་ཀོ;

ཀཱ་ཡ་སྶ བྷེ་དཱ དུ་པྤ་ཉྙོ, ཀིཾ ནུ པེ་ཙྩ ག་ཏིཾ ག་ཏོ’’ཏི. –

གཱ་ཐ་མཱ་ཧ. ཏ་ཏྠ མི་ཏྟ་ཝ་ཎྞེ་ནཱཏི མི་ཏྟ་པ་ཊི་རཱུ་པེ་ན མི་ཏྟ་པ་ཊི་རཱུ་པ་ཏཱ་ཡ.

པུ་ན པེ་ཏོ ཐེ་ར་སྶ ཏ་མ་ཏྠཾ ཨཱ་ཙི་ཀྑ་ནྟོ –

༧༧༢. ‘‘ཏ་སྶེ་ཝཱ་ཧཾ པཱ་པ་ཀ་མྨ་སྶ, སཱི་སེ ཏི་ཊྛཱ་མི མ་ཏྠ་ཀེ;

སོ ཙ པ་ར་ཝི་ས་ཡཾ པ་ཏྟོ, མ་མེ་ཝ པ་རི་ཙཱ་ར་ཀོ.

༧༧༣. ‘‘ཡཾ བྷ་ད་ནྟེ ཧ་ད་ནྟ་ཉྙེ, ཨེ་ཏཾ མེ ཧོ་ཏི བྷོ་ཛ་ནཾ;

ཨ་ཧ་ཉྩ ཁོ ཡཾ ཧ་དཱ་མི, ཨེ་ཏཾ སོ ཨུ་པ་ཛཱི་ཝ་ཏཱི’’ཏི. – གཱ་ཐཱ་དྭ་ཡ་མཱ་ཧ;

༧༧༢. ཏ་ཏྠ ཏ་སྶེ་ཝཱཏི ཏ་སྶེ་ཝ མ་ཡ྄ཧཾ པུ་བྦེ ཀུ་ལཱུ་པ་ཀ་བྷི་ཀྑུ་བྷཱུ་ཏ་སྶ པེ་ཏ་སྶ. པཱ་པ་ཀ་མྨ་སྶཱཏི པཱ་པ་ས་མཱ་ཙཱ་ར་སྶ. སཱི་སེ ཏི་ཊྛཱ་མི མ་ཏྠ་ཀེཏི སཱི་སེ ཏི་ཊྛཱ་མི, ཏི་ཊྛ་ནྟོ ཙ མ་ཏྠ་ཀེ ཨེ་ཝ ཏི་ཊྛཱ་མི, ན སཱི་ས་པྤ་མཱ་ཎེ ཨཱ་ཀཱ་སེ་ཏི ཨ་ཏྠོ. པ་ར་ཝི་ས་ཡཾ པ་ཏྟོཏི མ་ནུ་སྶ་ལོ་ཀཾ ཨུ་པཱ་དཱ་ཡ པ་ར་ཝི་ས་ཡ་བྷཱུ་ཏཾ པེ་ཏྟི་ཝི་ས་ཡཾ པ་ཏྟོ. མ་མེ་ཝཱཏི མ་ཡ྄ཧཾ ཨེ་ཝ པ་རི་ཙཱ་ར་ཀོ ཨ་ཧོ་སཱི་ཏི ཝ་ཙ་ན་སེ་སོ.

༧༧༣. ཡཾ བྷ་ད་ནྟེ ཧ་ད་ནྟ་ཉྙེཏི བྷ་ད་ནྟེ, ཨ་ཡྻ མ་ཧཱ་མོ་གྒ་ལཱ་ན, ཏ་སྶཾ ཝ་ཙྩ་ཀུ་ཊི་ཡཾ ཡཾ ཨ་ཉྙེ ཨུ་ཧ་ད་ནྟི ཝ་ཙྩཾ ཨོ་སྶ་ཛ་ནྟི. ཨེ་ཏཾ མེ ཧོ་ཏི བྷོ་ཛ་ནནྟི ཨེ་ཏཾ ཝ་ཙྩཾ མ་ཡ྄ཧཾ དི་ཝ་སེ དི་ཝ་སེ བྷོ་ཛ་ནཾ ཧོ་ཏི. ཡཾ ཧ་དཱ་མཱིཏི ཏཾ པ་ན ཝ་ཙྩཾ ཁཱ་དི་ཏྭཱ ཡ་མྤ་ཧཾ ཝ་ཙྩཾ ཀ་རོ་མི. ཨེ་ཏཾ སོ ཨུ་པ་ཛཱི་ཝ་ཏཱིཏི ཨེ་ཏཾ མ་མ ཝ་ཙྩཾ སོ ཀུ་ལཱུ་པ་ཀ་པེ་ཏོ དི་ཝ་སེ དི་ཝ་སེ ཁཱ་ད་ན་ཝ་སེ་ན ཨུ་པ་ཛཱི་ཝ་ཏི, ཨ་ཏྟ་བྷཱ་ཝཾ ཡཱ་པེ་ཏཱི་ཏི ཨ་ཏྠོ.

ཏེ་སུ ཀུ་ཊུ་མྦི་ཀོ པེ་ས་ལེ བྷི་ཀྑཱུ ‘‘ཨེ་ཝཾ ཨཱ་ཧཱ་ར་པ་རི་བྷོ་ག་ཏོ ཝ་རཾ ཏུ་མྷཱ་ཀཾ གཱུ་ཐ་ཁཱ་ད་ན’’ནྟི ཨ་ཀྐོ་སི. ཀུ་ལཱུ་པ་ཀོ པ་ན ཀུ་ཊུ་མྦི་ཀ་མྤི ཏ་ཐཱ་ཝ་ཙ་ནེ ས་མཱ་ད་པེ་ཏྭཱ ས་ཡཾ ཏ་ཐཱ ཨ་ཀྐོ་སི, ཏེ་ན་སྶ ཏ་ཏོ་པི པ་ཊི་ཀུ་ཊྛ་ཏ་རཱ ཛཱི་ཝི་ཀཱ ཨ་ཧོ་སི. ཨཱ་ཡ་སྨཱ མ་ཧཱ་མོ་གྒ་ལླཱ་ནོ ཏཾ པ་ཝ་ཏྟིཾ བྷ་ག་ཝ་ཏོ ཨཱ་རོ་ཙེ་སི. བྷ་ག་ཝཱ ཏ་མ་ཏྠཾ ཨ་ཊྛུ་པྤ་ཏྟིཾ ཀ་ཏྭཱ ཨུ་པ་ཝཱ་དེ ཨཱ་དཱི་ན་ཝཾ ད་སྶེ་ཏྭཱ ས་མྤ་ཏྟ་པ་རི་སཱ་ཡ དྷ་མྨཾ དེ་སེ་སི. སཱ དེ་ས་ནཱ མ་ཧཱ་ཛ་ན་སྶ སཱ་ཏྠི་ཀཱ ཨ་ཧོ་སཱི་ཏི.

གཱུ་ཐ་ཁཱ་ད་ཀ་པེ་ཏ་ཝ་ཏྠུ་ཝ་ཎྞ་ནཱ ནི་ཊྛི་ཏཱ.