༦. ཀུ་མཱ་ར་པེ་ཏ་ཝ་ཏྠུ་ཝ་ཎྞ་ནཱ
སཱ་ཝ་ཏྠི ནཱ་མ ན་ག་རནྟི ཨི་དཾ ས་ཏྠཱ ཛེ་ཏ་ཝ་ནེ ཝི་ཧ་ར་ནྟོ དྭེ པེ་ཏེ ཨཱ་ར་བྦྷ ཀ་ཐེ་སི. སཱ་ཝ་ཏྠི་ཡཾ ཀི་ར ཀོ་ས་ལ་ར་ཉྙོ དྭེ པུ་ཏྟཱ པཱ་སཱ་དི་ཀཱ པ་ཋ་མ་ཝ་ཡེ ཋི་ཏཱ ཡོ་བྦ་ན་མ་ད་མ་ཏྟཱ པ་ར་དཱ་ར་ཀ་མྨཾ ཀ་ཏྭཱ ཀཱ་ལཾ ཀ་ཏྭཱ པ་རི་ཁཱ་པི་ཊྛེ པེ་ཏཱ ཧུ་ཏྭཱ ནི་བྦ་ཏྟིཾ་སུ. ཏེ ར་ཏྟི་ཡཾ བྷེ་ར་ཝེ་ན ས་དྡེ་ན པ་རི་དེ་ཝིཾ་སུ. མ་ནུ་སྶཱ ཏཾ སུ་ཏྭཱ བྷཱི་ཏ་ཏ་སི་ཏཱ ‘‘ཨེ་ཝཾ ཀ་ཏེ ཨི་དཾ ཨ་ཝ་མ་ངྒ་ལཾ ཝཱུ་པ་ས་མྨ་ཏཱི’’ཏི བུ་དྡྷ་པྤ་མུ་ཁ་སྶ བྷི་ཀྑུ་ས་ངྒྷ་སྶ མ་ཧཱ་དཱ་ནཾ ད་ཏྭཱ ཏཾ པ་ཝ་ཏྟིཾ བྷ་ག་ཝ་ཏོ ཨཱ་རོ་ཙེ་སུཾ. བྷ་ག་ཝཱ ‘‘ཨུ་པཱ་ས་ཀཱ ཏ་སྶ ས་དྡ་སྶ ས་ཝ་ནེ་ན ཏུ་མྷཱ་ཀཾ ན ཀོ་ཙི ཨ་ནྟ་རཱ་ཡོ’’ཏི ཝ་ཏྭཱ ཏ་སྶ ཀཱ་ར་ཎཾ ཨཱ་ཙི་ཀྑི་ཏྭཱ ཏེ་སཾ དྷ་མྨཾ དེ་སེ་ཏུཾ –
༧༤༦. ‘‘སཱ་ཝ་ཏྠི ནཱ་མ ན་ག་རཾ, ཧི་མ་ཝ་ནྟ་སྶ པ་སྶ་ཏོ;
ཏ་ཏྠ ཨཱ་སུཾ དྭེ ཀུ་མཱ་རཱ, རཱ་ཛ་པུ་ཏྟཱ་ཏི མེ སུ་ཏཾ.
༧༤༧. ‘‘ས་མྨ་ཏྟཱ ར་ཛ་ནཱི་ཡེ་སུ, ཀཱ་མ་སྶཱ་དཱ་བྷི་ན་ནྡི་ནོ;
པ་ཙྩུ་པྤ་ནྣ་སུ་ཁེ གི་དྡྷཱ, ན ཏེ པ་སྶིཾ་སུ་ནཱ་ག་ཏཾ.
༧༤༨. ‘‘ཏེ ཙུ་ཏཱ ཙ མ་ནུ་སྶ་ཏྟཱ, པ་ར་ལོ་ཀཾ ཨི་ཏོ ག་ཏཱ;
ཏེ་དྷ གྷོ་སེ་ནྟྱ་དི་སྶ་ནྟཱ, པུ་བྦེ དུ་ཀྐ་ཊ་མ་ཏྟ་ནོ.
༧༤༩. ‘‘བ་ཧཱུ་སུ ཝ་ཏ ས་ནྟེ་སུ, དེ་ཡྻ་དྷ་མྨེ ཨུ་པ་ཊྛི་ཏེ;
ནཱ་ས་ཀྑི་མྷཱ ཙ ཨ་ཏྟཱ་ནཾ, པ་རི་ཏྟཾ ཀཱ་ཏུཾ སུ་ཁཱ་ཝ་ཧཾ.
༧༥༠. ‘‘ཀིཾ ཏ་ཏོ པཱ་པ་ཀཾ ཨ་སྶ, ཡཾ ནོ རཱ་ཛ་ཀུ་ལཱ ཙུ་ཏཱ;
ཨུ་པ་པ་ནྣཱ པེ་ཏྟི་ཝི་ས་ཡཾ, ཁུ་པྤི་པཱ་ས་ས་མ་པྤི་ཏཱ.
༧༥༡. ‘‘སཱ་མི་ནོ ཨི་དྷ ཧུ་ཏྭཱ་ན, ཧོ་ནྟི ཨ་སཱ་མི་ནོ ཏ་ཧིཾ;
བྷ་མ་ནྟི ཁུ་པྤི་པཱ་སཱ་ཡ, མ་ནུ་སྶཱ ཨུ་ནྣ་ཏོ་ན་ཏཱ.
༧༥༢. ‘‘ཨེ་ཏ་མཱ་དཱི་ན་ཝཾ ཉ་ཏྭཱ, ཨི་སྶ་ར་མ་ད་ས་མྦྷ་ཝཾ;
པ་ཧཱ་ཡ ཨི་སྶ་ར་མ་དཾ, བྷ་ཝེ ས་གྒ་ག་ཏོ ན་རོ;
ཀཱ་ཡ་སྶ བྷེ་དཱ ས་པྤ་ཉྙོ, ས་གྒཾ སོ ཨུ་པ་པ་ཛྫ་ཏཱི’’ཏི – གཱ་ཐཱ ཨ་བྷཱ་སི;
༧༤༦. ཏ་ཏྠ ཨི་ཏི མེ སུ་ཏནྟི ན ཀེ་ཝ་ལཾ ཨ་ཏྟ་ནོ ཉཱ་ཎེ་ན དི་ཊྛ་མེ་ཝ, ཨ་ཐ ཁོ ལོ་ཀེ པཱ་ཀ་ཊ་བྷཱ་ཝེ་ན ཨེ་ཝཾ མ་ཡཱ སུ་ཏ་ནྟི ཨ་ཏྠོ.
༧༤༧. ཀཱ་མ་སྶཱ་དཱ་བྷི་ན་ནྡི་ནོཏི ཀཱ་མ་གུ་ཎེ་སུ ཨ་སྶཱ་ད་ཝ་སེ་ན ཨ་བྷི་ན་ནྡ་ན་སཱི་ལཱ. པ་ཙྩུ་པྤ་ནྣ་སུ་ཁེ གི་དྡྷཱཏི ཝ་ཏྟ་མཱ་ན་སུ་ཁ་མ་ཏྟེ གི་དྡྷཱ ག་ཐི་ཏཱ ཧུ་ཏྭཱ. ན ཏེ པ་སྶིཾ་སུ་ནཱ་ག་ཏནྟི དུ་ཙྩ་རི་ཏཾ པ་ཧཱ་ཡ སུ་ཙ་རི་ཏཾ ཙ་རི་ཏྭཱ ཨ་ནཱ་ག་ཏཾ ཨཱ་ཡ་ཏིཾ དེ་ཝ་མ་ནུ་སྶེ་སུ ལ་དྡྷ་བྦཾ སུ་ཁཾ ཏེ ན ཙི་ནྟེ་སུཾ.
༧༤༨. ཏེ་དྷ གྷོ་སེ་ནྟྱ་དི་སྶ་ནྟཱཏི ཏེ པུ་བྦེ རཱ་ཛ་པུ་ཏྟ་བྷཱུ་ཏཱ པེ་ཏཱ ཨི་དྷ སཱ་ཝ་ཏྠི་ཡཱ ས་མཱི་པེ ཨ་དི་སྶ་མཱ་ན་རཱུ་པཱ གྷོ་སེ་ནྟི ཀ་ནྡ་ནྟི. ཀིཾ ཀ་ནྡ་ནྟཱི་ཏི ཨཱ་ཧ ‘‘པུ་བྦེ དུ་ཀྐ་ཊ་མ་ཏྟ་ནོ’’ཏི.
༧༤༩. ཨི་དཱ་ནི ཏེ་སཾ ཀ་ནྡ་ན་སྶ ཀཱ་ར་ཎཾ ཧེ་ཏུ་ཏོ ཙ ཕ་ལ་ཏོ ཙ ཝི་བྷ་ཛི་ཏྭཱ ད་སྶེ་ཏུཾ ‘‘བ་ཧཱུ་སུ ཝ་ཏ ས་ནྟེ་སཱུ’’ཏི་ཨཱ་དི ཝུ་ཏྟཾ.
ཏ་ཏྠ བ་ཧཱུ་སུ ཝ་ཏ ས་ནྟེ་སཱུཏི ཨ་ནེ་ཀེ་སུ ད་ཀྑི་ཎེ་ཡྻེ་སུ ཝི་ཛྫ་མཱ་ནེ་སུ. དེ་ཡྻ་དྷ་མྨེ ཨུ་པ་ཊྛི་ཏེཏི ཨ་ཏྟ་ནོ ས་ནྟ་ཀེ དཱ་ཏ་བྦ་དེ་ཡྻ་དྷ་མྨེ་པི ས་མཱི་པེ ཋི་ཏེ, ལ་བྦྷ་མཱ་ནེ་ཏི ཨ་ཏྠོ. པ་རི་ཏྟཾ སུ་ཁཱ་ཝ་ཧནྟི ཨ་པྤ་མ་ཏྟ་ཀ་མྤི ཨཱ་ཡ་ཏིཾ སུ་ཁཱ་ཝ་ཧཾ པུ་ཉྙཾ ཀ་ཏྭཱ ཨ་ཏྟཱ་ནཾ སོ་ཏྠིཾ ནི་རུ་པ་དྡ་ཝཾ ཀཱ་ཏུཾ ནཱ་ས་ཀྑི་མྷཱ ཝ་ཏཱ་ཏི ཡོ་ཛ་ནཱ.
༧༥༠. ཀིཾ ཏ་ཏོ པཱ་པ་ཀཾ ཨ་སྶཱཏི ཏ་ཏོ པཱ་པ་ཀཾ ལཱ་མ་ཀཾ ནཱ་མ ཀིཾ ཨ་ཉྙཾ ཨ་སྶ སི་ཡཱ. ཡཾ ནོ རཱ་ཛ་ཀུ་ལཱ ཙུ་ཏཱཏི ཡེ་ན པཱ་པ་ཀ་མྨེ་ན མ་ཡཾ རཱ་ཛ་ཀུ་ལ་ཏོ ཙུ་ཏཱ ཨི་དྷ པེ་ཏྟི་ཝི་ས་ཡཾ ཨུ་པ་པ་ནྣཱ པེ་ཏེ་སུ ནི་བྦ་ཏྟཱ ཁུ་པྤི་པཱ་ས་ས་མ་པྤི་ཏཱ ཝི་ཙ་རཱ་མཱ་ཏི ཨ་ཏྠོ.
༧༥༡. སཱ་མི་ནོ ཨི་དྷ ཧུ་ཏྭཱ་ནཱཏི ཨི་དྷ ཨི་མ་སྨིཾ ལོ་ཀེ ཡ་སྨིཾ་ཡེ་ཝ ཋཱ་ནེ པུ་བྦེ སཱ་མི་ནོ ཧུ་ཏྭཱ ཝི་ཙ་ར་ནྟི, ཏ་ཧིཾ ཏ་སྨིཾ་ཡེ་ཝ ཋཱ་ནེ ཧོ་ནྟི ཨ་སྶཱ་མི་ནོ. མ་ནུ་སྶཱ ཨུ་ནྣ་ཏོ་ན་ཏཱཏི མ་ནུ་སྶ་ཀཱ་ལེ སཱ་མི་ནོ ཧུ་ཏྭཱ ཀཱ་ལ་ཀ་ཏཱ ཀ་མྨ་ཝ་སེ་ན ཨོ་ན་ཏཱ བྷ་མ་ནྟི ཁུ་པྤི་པཱ་སཱ་ཡ, པ་སྶ སཾ་སཱ་ར་པ་ཀ་ཏི་ནྟི ད་སྶེ་ཏི.
༧༥༢. ཨེ་ཏ་མཱ་དཱི་ན་ཝཾ ཉ་ཏྭཱ, ཨི་སྶ་ར་མ་ད་ས་མྦྷ་ཝནྟི ཨེ་ཏཾ ཨི་སྶ་རི་ཡ་མ་ད་ཝ་སེ་ན ས་མྦྷཱུ་ཏཾ ཨ་པཱ་ཡཱུ་པ་པ་ཏྟི་ས་ངྑཱ་ཏཾ ཨཱ་དཱི་ན་ཝཾ དོ་སཾ ཉ་ཏྭཱ པ་ཧཱ་ཡ ཨི་སྶ་རི་ཡ་མ་དཾ པུ་ཉྙ་པྤ་སུ་ཏོ ཧུ་ཏྭཱ. བྷ་ཝེ ས་གྒ་ག་ཏོ ན་རོཏི ས་གྒཾ དེ་ཝ་ལོ་ཀཾ ག་ཏོ་ཡེ་ཝ བྷ་ཝེ་ཡྻ.
ཨི་ཏི ས་ཏྠཱ ཏེ་སཾ པེ་ཏཱ་ནཾ པ་ཝ་ཏྟིཾ ཀ་ཐེ་ཏྭཱ ཏེ་ཧི མ་ནུ་སྶེ་ཧི ཀ་ཏཾ དཱ་ནཾ ཏེ་སཾ པེ་ཏཱ་ནཾ ཨུ་དྡི་སཱ་པེ་ཏྭཱ ས་མྤ་ཏྟ་པ་རི་སཱ་ཡ ཨ་ཛ྄ཛྷཱ་ས་ཡཱ་ནུ་རཱུ་པཾ དྷ་མྨཾ དེ་སེ་སི. སཱ དེ་ས་ནཱ མ་ཧཱ་ཛ་ན་སྶ སཱ་ཏྠི་ཀཱ ཨ་ཧོ་སཱི་ཏི.
ཀུ་མཱ་ར་པེ་ཏ་ཝ་ཏྠུ་ཝ་ཎྞ་ནཱ ནི་ཊྛི་ཏཱ.