༡༤. བྷོ་ག་སཾ་ཧ་ར་ཎ་པེ་ཏི་ཝ་ཏྠུ་ཝ་ཎྞ་ནཱ

མ་ཡཾ བྷོ་གེ སཾ་ཧ་རི་མྷཱཏི ཨི་དཾ བྷོ་ག་སཾ་ཧ་ར་ཎ་པེ་ཏི་ཝ་ཏྠུ. ཏ་སྶ ཀཱ ཨུ་པྤ་ཏྟི? བྷ་ག་ཝ་ཏི ཝེ་ལུ༹་ཝ་ནེ ཝི་ཧ་ར་ནྟེ རཱ་ཛ་ག་ཧེ ཀི་ར ཙ་ཏ་སྶོ ཨི་ཏྠི་ཡོ མཱ་ན་ཀཱུ་ཊཱ་དི་ཝ་སེ་ན ས་པྤི་མ་དྷུ་ཏེ་ལ་དྷ་ཉྙཱ་དཱི་ཧི ཝོ་ཧཱ་རཾ ཀ་ཏྭཱ ཨ་ཡོ་ནི་སོ བྷོ་གེ སཾ་ཧ་རི་ཏྭཱ ཛཱི་ཝ་ནྟི. ཏཱ ཀཱ་ཡ་སྶ བྷེ་དཱ པ་རཾ མ་ར་ཎཱ བ་ཧི་ན་ག་རེ པ་རི་ཁཱ་པི་ཊྛེ པེ་ཏི་ཡོ ཧུ་ཏྭཱ ནི་བྦ་ཏྟིཾ་སུ. ཏཱ ར་ཏྟི་ཡཾ དུ་ཀྑཱ་བྷི་བྷཱུ་ཏཱ –

༨༠༡. ‘‘མ་ཡཾ བྷོ་གེ སཾ་ཧ་རི་མྷཱ, ས་མེ་ན ཝི་ས་མེ་ན ཙ;

ཏེ ཨ་ཉྙེ པ་རི་བྷུ་ཉྫ་ནྟི, མ་ཡཾ དུ་ཀྑ་སྶ བྷཱ་གི་ནཱི’’ཏི. –

ཝི་པྤ་ལ་པ་ནྟི་ཡོ བྷེ་ར་ཝེ་ན མ་ཧཱ་ས་དྡེ་ན ཝི་ར་ཝིཾ་སུ. མ་ནུ་སྶཱ ཏཾ སུ་ཏྭཱ བྷཱི་ཏ་ཏ་སི་ཏཱ ཝི་བྷཱ་ཏཱ་ཡ ར་ཏྟི་ཡཱ བུ་དྡྷ་པྤ་མུ་ཁ་སྶ བྷི་ཀྑུ་ས་ངྒྷ་སྶ མ་ཧཱ་དཱ་ནཾ ས་ཛྫེ་ཏྭཱ ས་ཏྠཱ་རཾ བྷི་ཀྑུ་ས་ངྒྷ་ཉྩ ནི་མ་ནྟེ་ཏྭཱ པ་ཎཱི་ཏེ་ན ཁཱ་ད་ནཱི་ཡེ་ན བྷོ་ཛ་ནཱི་ཡེ་ན པ་རི་ཝི་སི་ཏྭཱ བྷ་ག་ཝ་ནྟཾ བྷུ་ཏྟཱ་ཝིཾ ཨོ་ནཱི་ཏ་པ་ཏྟ་པཱ་ཎིཾ ཨུ་པ་ནི་སཱི་དི་ཏྭཱ ཏཾ པ་ཝ་ཏྟིཾ ནི་ཝེ་དེ་སུཾ. བྷ་ག་ཝཱ ‘‘ཨུ་པཱ་ས་ཀཱ ཏེ་ན ཝོ ས་དྡེ་ན ཀོ་ཙི ཨ་ནྟ་རཱ་ཡོ ན་ཏྠི, ཙ་ཏ་སྶོ པ་ན པེ་ཏི་ཡོ དུ་ཀྑཱ་བྷི་བྷཱུ་ཏཱ ཨ་ཏྟ་ནཱ དུ་ཀྐ་ཊཾ ཀ་མྨཾ ཀ་ཐེ་ཏྭཱ པ་རི་དེ་ཝ་ན་ཝ་སེ་ན ཝི་སྶ་རེ་ན ཝི་ར་ཝ་ནྟི་ཡོ –

‘‘མ་ཡཾ བྷོ་གེ སཾ་ཧ་རི་མྷཱ, ས་མེ་ན ཝི་ས་མེ་ན ཙ;

ཏེ ཨ་ཉྙེ པ་རི་བྷུ་ཉྫ་ནྟི, མ་ཡཾ དུ་ཀྑ་སྶ བྷཱ་གི་ནཱི’’ཏི. –

ཨི་མཾ གཱ་ཐ་མཱ་ཧཾ་སཱུ་ཏི ཨ་ཝོ་ཙ.

ཏ་ཏྠ བྷོ་གེཏི པ་རི་བྷུ་ཉྫི་ཏ་བྦ་ཊྛེ་ན ‘‘བྷོ་གཱ’’ཏི ལ་དྡྷ་ནཱ་མེ ཝ་ཏྠཱ་བྷ་ར་ཎཱ་དི་ཀེ ཝི་ཏྟཱུ་པ་ཀ་ར་ཎ་ཝི་སེ་སེ. སཾ་ཧ་རི་མྷཱཏི མ་ཙྪེ་ར་མ་ལེ་ན པ་རི་ཡཱ་དི་ནྣ་ཙི་ཏྟཱ ཀ་སྶ་ཙི ཀི་ཉྩི ཨ་ད་ཏྭཱ ས་ཉྩི་ནི་མྷ. ས་མེ་ན ཝི་ས་མེ་ན ཙཱཏི ཉཱ་ཡེ་ན ཙ ཨ་ཉྙཱ་ཡེ་ན ཙ, ཉཱ་ཡ་པ་ཏི་རཱུ་པ་ཀེ་ན ཝཱ ཨ་ཉྙཱ་ཡེ་ན ཏེ བྷོ་གེ ཨ་མྷེ་ཧི སཾ་ཧ་རི་ཏེ ཨི་དཱ་ནི ཨ་ཉྙེ པ་རི་བྷུ་ཉྫ་ནྟི. མ་ཡཾ དུ་ཀྑ་སྶ བྷཱ་གི་ནཱིཏི མ་ཡཾ པ་ན ཀ་སྶ་ཙི་པི སུ་ཙ་རི་ཏ་སྶ ཨ་ཀ་ཏ་ཏྟཱ དུ་ཙྩ་རི་ཏ་སྶ ཙ ཀ་ཏ་ཏྟཱ ཨེ་ཏ་ར་ཧི པེ་ཏ་ཡོ་ནི་པ་རི་ཡཱ་པ་ནྣ་སྶ མ་ཧ་ཏོ དུ་ཀྑ་སྶ བྷཱ་གི་ནི་ཡོ བྷ་ཝཱ་མ, མ་ཧཱ་དུ་ཀྑཾ ཨ་ནུ་བྷ་ཝཱ་མཱ་ཏི ཨ་ཏྠོ.

ཨེ་ཝཾ བྷ་ག་ཝཱ ཏཱ་ཧི པེ་ཏཱི་ཧི ཝུ་ཏྟཾ གཱ་ཐཾ ཝ་ཏྭཱ ཏཱ་སཾ པ་ཝ་ཏྟིཾ ཀ་ཐེ་ཏྭཱ ཏཾ ཨ་ཊྛུ་པྤ་ཏྟིཾ ཀ་ཏྭཱ ས་མྤ་ཏྟ་པ་རི་སཱ་ཡ དྷ་མྨཾ དེ་སེ་ཏྭཱ ཨུ་པ་རི ས་ཙྩཱ་ནི པ་ཀཱ་སེ་སི, ས་ཙྩ་པ་རི་ཡོ་སཱ་ནེ བ་ཧཱུ སོ་ཏཱ་པ་ཏྟི་ཕ་ལཱ་དཱི་ནི པཱ་པུ་ཎིཾ་སཱུ་ཏི.

བྷོ་ག་སཾ་ཧ་ར་ཎ་པེ་ཏི་ཝ་ཏྠུ་ཝ་ཎྞ་ནཱ ནི་ཊྛི་ཏཱ.