༡༣. ཨ་ཀྑ་རུ་ཀྑ་པེ་ཏ་ཝ་ཏྠུ་ཝ་ཎྞ་ནཱ

ཡཾ ད་དཱ་ཏི ན ཏཾ ཧོ་ཏཱིཏི ཨི་དཾ ཨ་ཀྑ་དཱ་ཡ་ཀ་པེ་ཏ་ཝ་ཏྠུ. ཏ་སྶ ཀཱ ཨུ་པྤ་ཏྟི? བྷ་ག་ཝ་ཏི སཱ་ཝ་ཏྠི་ཡཾ ཝི་ཧ་ར་ནྟེ ཨ་ཉྙ་ཏ་རོ སཱ་ཝ་ཏྠི་ཝཱ་སཱི ཨུ་པཱ་ས་ཀོ ས་ཀ་ཊེ་ཧི བྷ་ཎྜ་སྶ པཱུ་རེ་ཏྭཱ ཝ་ཎི་ཛྫཱ་ཡ ཝི་དེ་སཾ ག་ནྟྭཱ ཏ་ཏྠ ཨ་ཏྟ་ནོ བྷ་ཎྜཾ ཝི་ཀྐི་ཎི་ཏྭཱ པ་ཊི་བྷ་ཎྜཾ ས་ཀ་ཊེ་སུ ཨཱ་རོ་པེ་ཏྭཱ སཱ་ཝ་ཏྠིཾ ཨུ་དྡི་སྶ མ་གྒཾ པ་ཊི་པ་ཛྫི. ཏ་སྶ མ་གྒཾ ག་ཙྪ་ནྟ་སྶ ཨ་ཊ་ཝི་ཡཾ ཨེ་ཀ་སྶ ས་ཀ་ཊ་སྶ ཨ་ཀྑོ བྷི་ཛྫི. ཨ་ཐ ཨ་ཉྙ་ཏ་རོ པུ་རི་སོ རུ་ཀྑ་ག་ཧ་ཎ་ཏྠཾ ཀུ་ཋཱ་རི་ཕ་ར་སུཾ གཱ་ཧཱ་པེ་ཏྭཱ ཨ་ཏྟ་ནོ གཱ་མ་ཏོ ནི་ཀྑ་མི་ཏྭཱ ཨ་ར་ཉྙེ ཝི་ཙ་ར་ནྟོ ཏཾ ཋཱ་ནཾ པ་ཏྭཱ ཏཾ ཨུ་པཱ་ས་ཀཾ ཨ་ཀྑ་བྷ་ཉྫ་ནེ་ན དོ་མ་ན་སྶ་པྤ་ཏྟཾ དི་སྭཱ ‘‘ཨ་ཡཾ ཝཱ་ཎི་ཛོ ཨ་ཀྑ་བྷ་ཉྫ་ནེ་ན ཨ་ཊ་ཝི་ཡཾ ཀི་ལ་མ་ཏཱི’’ཏི ཨ་ནུ་ཀ་མྤཾ ཨུ་པཱ་དཱ་ཡ རུ་ཀྑ་ད་ཎྜཾ ཚི་ནྡི་ཏྭཱ ད་ལ༹ྷཾ ཨ་ཀྑཾ ཀ་ཏྭཱ ས་ཀ་ཊེ ཡོ་ཛེ་ཏྭཱ ཨ་དཱ་སི.

སོ ཨ་པ་རེ་ན ས་མ་ཡེ་ན ཀཱ་ལཾ ཀ་ཏྭཱ ཏ་སྨིཾ་ཡེ་ཝ ཨ་ཊ་ཝི་པ་དེ་སེ བྷུ་མྨ་དེ་ཝ་ཏཱ ཧུ་ཏྭཱ ནི་བྦ་ཏྟོ. ཨ་ཏྟ་ནོ ཀ་མྨཾ པ་ཙྩ་ཝེ་ཀྑི་ཏྭཱ ར་ཏྟི་ཡཾ ཏ་སྶ ཨུ་པཱ་ས་ཀ་སྶ གེ་ཧཾ ག་ནྟྭཱ གེ་ཧ་དྭཱ་རེ ཋ་ཏྭཱ –

༨༠༠. ‘‘ཡཾ ད་དཱ་ཏི ན ཏཾ ཧོ་ཏི, དེ་ཐེ་ཝ དཱ་ནཾ ད་ཏྭཱ ཨུ་བྷ་ཡཾ ཏ་ར་ཏི;

ཨུ་བྷ་ཡཾ ཏེ་ན དཱ་ནེ་ན ག་ཙྪ་ཏི, ཛཱ་ག་ར་ཐ མཱ པ་མ་ཛྫ་ཐཱ’’ཏི. –

གཱ་ཐ་མཱ་ཧ. ཏ་ཏྠ ཡཾ ད་དཱ་ཏི ན ཏཾ ཧོ་ཏཱིཏི ཡཾ དེ་ཡྻ་དྷ་མྨཾ དཱ་ཡ་ཀོ དེ་ཏི, ན ཏ་དེ་ཝ པ་ར་ལོ་ཀེ ཏ་སྶ དཱ་ན་སྶ ཕ་ལ་བྷཱ་ཝེ་ན ཧོ་ཏི, ཨ་ཐ ཁོ ཨ་ཉྙཾ བ་ཧུཾ ཨི་ཊྛཾ ཀ་ནྟཾ ཕ་ལཾ ཧོ་ཏི་ཡེ་ཝ. ཏ་སྨཱ དེ་ཐེ་ཝ དཱ་ནནྟི ཡ་ཐཱ ཏ་ཐཱ དཱ་ནཾ དེ་ཐ ཨེ་ཝ. ཏ་ཏྠ ཀཱ་ར་ཎ་མཱ་ཧ ‘‘ད་ཏྭཱ ཨུ་བྷ་ཡཾ ཏ་ར་ཏཱི’’ཏི, དཱ་ནཾ ད་ཏྭཱ དི་ཊྛ་དྷ་མྨི་ཀ་མྤི ས་མྤ་རཱ་ཡི་ཀ་མྤི དུ་ཀྑཾ ཨ་ན་ཏྠ་ཉྩ ཨ་ཏི་ཀྐ་མ་ཏི. ཨུ་བྷ་ཡཾ ཏེ་ན དཱ་ནེ་ན ག་ཙྪ་ཏཱིཏི དི་ཊྛ་དྷ་མྨི་ཀཾ ས་མྤ་རཱ་ཡི་ཀ་ཉྩཱ་ཏི ཨུ་བྷ་ཡ་མྤི སུ་ཁཾ ཏེ་ན དཱ་ནེ་ན ཨུ་པ་ག་ཙྪ་ཏི པཱ་པུ་ཎཱ་ཏི, ཨ་ཏྟ་ནོ པ་རེ་ས་ཉྩ ཧི་ཏ་སུ་ཁ་ཝ་སེ་ནཱ་པི ཨ་ཡ་མ་ཏྠོ ཡོ་ཛེ་ཏ་བྦོ. ཛཱ་ག་ར་ཐ མཱ པ་མ་ཛྫ་ཐཱཏི ཨེ་ཝཾ ཨུ་བྷ་ཡཱ་ན་ཏྠ་ནི་ཝཱ་ར་ཎཾ ཨུ་བྷ་ཡ་ཧི་ཏ་སཱ་དྷ་ནཾ དཱ་ནཾ ས་མྤཱ་དེ་ཏུཾ ཛཱ་ག་ར་ཐ, དཱ་ནཱུ་པ་ཀ་ར་ཎཱ་ནི ས་ཛྫེ་ཏྭཱ ཏ་ཏྠ ཙ ཨ་པྤ་མ་ཏྟཱ ཧོ་ཐཱ་ཏི ཨ་ཏྠོ. ཨཱ་ད་ར་ད་སྶ་ན་ཏྠཾ ཙེ་ཏྠ ཨཱ་མེ་ཌི་ཏ་ཝ་སེ་ན ཝུ་ཏྟཾ.

ཝཱ་ཎི་ཛོ ཨ་ཏྟ་ནོ ཀི་ཙྩཾ ཏཱི་རེ་ཏྭཱ པ་ཊི་ནི་ཝ་ཏྟི་ཏྭཱ ཨ་ནུ་ཀྐ་མེ་ན སཱ་ཝ་ཏྠིཾ པ་ཏྭཱ དུ་ཏི་ཡ་དི་ཝ་སེ ས་ཏྠཱ་རཾ ཨུ་པ་ས་ངྐ་མི་ཏྭཱ ཝ་ནྡི་ཏྭཱ ཨེ་ཀ་མ་ནྟཾ ནི་སི་ནྣོ ཏཾ པ་ཝ་ཏྟིཾ བྷ་ག་ཝ་ཏོ ཨཱ་རོ་ཙེ་སི. ས་ཏྠཱ ཏ་མ་ཏྠཾ ཨ་ཊྛུ་པྤ་ཏྟིཾ ཀ་ཏྭཱ ས་མྤ་ཏྟ་པ་རི་སཱ་ཡ དྷ་མྨཾ དེ་སེ་སི. སཱ དེ་ས་ནཱ མ་ཧཱ་ཛ་ན་སྶ སཱ་ཏྠི་ཀཱ ཨ་ཧོ་སཱི་ཏི.

ཨ་ཀྑ་རུ་ཀྑ་པེ་ཏ་ཝ་ཏྠུ་ཝ་ཎྞ་ནཱ ནི་ཊྛི་ཏཱ.