༡༢. ཨ་མྦ་ཝ་ན་པེ་ཏ་ཝ་ཏྠུ་ཝ་ཎྞ་ནཱ
ཨ་ཡ་ཉྩ ཏེ པོ་ཀྑ་ར་ཎཱི སུ་ར་མྨཱཏི ཨི་དཾ ས་ཏྠ་རི སཱ་ཝ་ཏྠི་ཡཾ ཝི་ཧ་ར་ནྟེ ཨ་མྦ་པེ་ཏཾ ཨཱ་ར་བྦྷ ཝུ་ཏྟཾ. སཱ་ཝ་ཏྠི་ཡཾ ཀི་ར ཨ་ཉྙ་ཏ་རོ ག་ཧ་པ་ཏི པ་རི་ཀྑཱི་ཎ་བྷོ་གོ ཨ་ཧོ་སི. ཏ་སྶ བྷ་རི་ཡཱ ཀཱ་ལ་མ་ཀཱ་སི, ཨེ་ཀཱ དྷཱི་ཏཱ་ཡེ་ཝ ཧོ་ཏི. སོ ཏཾ ཨ་ཏྟ་ནོ མི་ཏྟ་སྶ གེ་ཧེ ཋ་པེ་ཏྭཱ ཨི་ཎ་ཝ་སེ་ན ག་ཧི་ཏེ་ན ཀ་ཧཱ་པ་ཎ་ས་ཏེ་ན བྷ་ཎྜཾ ག་ཧེ་ཏྭཱ ས་ཏྠེ་ན ས་དྡྷིཾ ཝ་ཎི་ཛྫཱ་ཡ ག་ཏོ, ན ཙི་རེ་ནེ་ཝ མཱུ་ལེ་ན ས་ཧ ཨུ་ད་ཡ་བྷཱུ་ཏཱ་ནི པ་ཉྩ ཀ་ཧཱ་པ་ཎ་ས་ཏཱ་ནི ལ་བྷི་ཏྭཱ ས་ཏྠེ་ན ས་ཧ པ་ཊི་ནི་ཝ་ཏྟི. ཨ་ནྟ་རཱ་མ་གྒེ ཙོ་རཱ པ་རི་ཡུ་ཊྛཱ་ཡ ས་ཏྠཾ པཱ་པུ་ཎིཾ་སུ, ས་ཏྠི་ཀཱ ཨི་ཏོ ཙི་ཏོ ཙ པ་ལཱ་ཡིཾ་སུ. སོ པ་ན ག་ཧ་པ་ཏི ཨ་ཉྙ་ཏ་ར་སྨིཾ ག་ཙྪེ ཀ་ཧཱ་པ་ཎེ ནི་ཀྑི་པི་ཏྭཱ ཨ་ཝི་དཱུ་རེ ནི་ལཱི་ཡི. ཙོ་རཱ ཏཾ ག་ཧེ་ཏྭཱ ཛཱི་ཝི་ཏཱ ཝོ་རོ་པེ་སུཾ. སོ དྷ་ན་ལོ་བྷེ་ན ཏ་ཏྠེ་ཝ པེ་ཏོ ཧུ་ཏྭཱ ནི་བྦ་ཏྟི.
ཝཱ་ཎི་ཛཱ སཱ་ཝ་ཏྠིཾ ག་ནྟྭཱ ཏ་སྶ དྷཱི་ཏུ་ཡཱ ཏཾ པ་ཝ་ཏྟིཾ ཨཱ་རོ་ཙེ་སུཾ. སཱ པི་ཏུ མ་ར་ཎེ་ན ཨཱ་ཛཱི་ཝི་ཀཱ་བྷ་ཡེ་ན ཙ ཨ་ཏི་ཝི་ཡ ས་ཉྫཱ་ཏ་དོ་མ་ན་སྶཱ བཱ་ལ༹ྷཾ པ་རི་དེ་ཝི. ཨ་ཐ ནཾ སོ པི་ཏུ ས་ཧཱ་ཡོ ཀུ་ཊུ་མྦི་ཀོ ‘‘ཡ་ཐཱ ནཱ་མ ཀུ་ལཱ་ལ་བྷཱ་ཛ་ནཾ ས་བྦཾ བྷེ་ད་ན་པ་རི་ཡ་ནྟཾ, ཨེ་ཝ་མེ་ཝ ས་ཏྟཱ་ནཾ ཛཱི་ཝི་ཏཾ བྷེ་ད་ན་པ་རི་ཡ་ནྟཾ. མ་ར་ཎཾ ནཱ་མ ས་བྦ་སཱ་དྷཱ་ར་ཎཾ ཨ་པྤ་ཊི་ཀཱ་ར་ཉྩ, ཏ་སྨཱ མཱ ཏྭཾ པི་ཏ་རི ཨ་ཏི་བཱ་ལ༹ྷཾ སོ་ཙི, མཱ པ་རི་དེ་ཝི, ཨ་ཧཾ ཏེ པི་ཏཱ, ཏྭཾ མ་ཡ྄ཧཾ དྷཱི་ཏཱ, ཨ་ཧཾ ཏ་ཝ པི་ཏུ ཀི་ཙྩཾ ཀ་རོ་མི, ཏྭཾ པི་ཏུ་ནོ གེ་ཧེ ཝི་ཡ ཨི་མ་སྨིཾ གེ་ཧེ ཨ་ཝི་མ་ནཱ ཨ་བྷི་ར་མ་སྶཱུ’’ཏི ཝ་ཏྭཱ ས་མ་སྶཱ་སེ་སི. སཱ ཏ་སྶ ཝ་ཙ་ནེ་ན པ་ཊི་པྤ་སྶ་དྡྷ་སོ་ཀཱ པི་ཏ་རི ཝི་ཡ ཏ་སྨིཾ ས་ཉྫཱ་ཏ་གཱ་ར་ཝ་བ་ཧུ་མཱ་ནཱ ཨ་ཏྟ་ནོ ཀ་པ་ཎ་བྷཱ་ཝེ་ན ཏ་སྶ ཝེ་ཡྻཱ་ཝ་ཙྩ་ཀཱ་རི་ནཱི ཧུ་ཏྭཱ ཝ་ཏྟ་མཱ་ནཱ པི་ཏ་རཾ ཨུ་དྡི་སྶ མ་ཏ་ཀི་ཙྩཾ ཀཱ་ཏུ་ཀཱ་མཱ ཡཱ་གུཾ པ་ཙི་ཏྭཱ མ་ནོ་སི་ལཱ་ཝ་ཎྞཱ་ནི སུ་པ་རི་པ་ཀྐཱ་ནི མ་དྷུ་རཱ་ནི ཨ་མྦ་ཕ་ལཱ་ནི ཀཾ་ས་པཱ་ཏི་ཡཾ ཋ་པེ་ཏྭཱ ཡཱ་གུཾ ཨ་མྦ་ཕ་ལཱ་ནི ཙ དཱ་སི་ཡཱ གཱ་ཧཱ་པེ་ཏྭཱ ཝི་ཧཱ་རཾ ག་ནྟྭཱ ས་ཏྠཱ་རཾ ཝ་ནྡི་ཏྭཱ ཨེ་ཝ་མཱ་ཧ – ‘‘བྷ་ག་ཝཱ མ་ཡ྄ཧཾ ད་ཀྑི་ཎཱ་ཡ པ་ཊི་གྒ་ཧ་ཎེ་ན ཨ་ནུ་གྒ་ཧཾ ཀ་རོ་ཐཱ’’ཏི. ས་ཏྠཱ མ་ཧཱ་ཀ་རུ་ཎཱ་ཡ ས་ཉྩོ་དི་ཏ་མཱ་ན་སོ ཏ་སྶཱ མ་ནོ་ར་ཐཾ པཱུ་རེ་ནྟོ ནི་ས་ཛྫཱ་ཀཱ་རཾ ད་སྶེ་སི. སཱ ཧ་ཊྛ་ཏུ་ཊྛཱ པ་ཉྙ་ཏྟ་ཝ་ར་བུ་དྡྷཱ་ས་ནེ ཨ་ཏྟ་ནཱ ཨུ་པ་ནཱི་ཏཾ སུ་ཝི་སུ་དྡྷ་ཝ་ཏྠཾ ཨ་ཏྠ་རི་ཏྭཱ ཨ་དཱ་སི, ནི་སཱི་དི བྷ་ག་ཝཱ པ་ཉྙ་ཏྟེ ཨཱ་ས་ནེ.
ཨ་ཐ སཱ བྷ་ག་ཝ་ཏོ ཡཱ་གུཾ ཨུ་པ་ནཱ་མེ་སི, པ་ཊི་གྒ་ཧེ་སི བྷ་ག་ཝཱ ཡཱ་གུཾ. ཨ་ཐ ས་ངྒྷཾ ཨུ་དྡི་སྶ བྷི་ཀྑཱུ་ན་མྤི ཡཱ་གུཾ ད་ཏྭཱ པུ་ན དྷོ་ཏ་ཧ་ཏྠཱ ཨ་མྦ་ཕ་ལཱ་ནི བྷ་ག་ཝ་ཏོ ཨུ་པ་ནཱ་མེ་སི, བྷ་ག་ཝཱ ཏཱ་ནི པ་རི་བྷུ་ཉྫི. སཱ བྷ་ག་ཝ་ནྟཾ ཝ་ནྡི་ཏྭཱ ཨེ་ཝ་མཱ་ཧ – ‘‘ཡཱ མེ, བྷ་ནྟེ, པ་ཙྩ་ཏྠ་ར་ཎ་ཡཱ་གུ་ཨ་མྦ་ཕ་ལ་དཱ་ན་ཝ་སེ་ན པ་ཝ་ཏྟཱ ད་ཀྑི་ཎཱ, སཱ མེ པི་ཏ་རཾ པཱ་པུ་ཎཱ་ཏཱུ’’ཏི. བྷ་ག་ཝཱ ‘‘ཨེ་ཝཾ ཧོ་ཏཱུ’’ཏི ཝ་ཏྭཱ ཨ་ནུ་མོ་ད་ནཾ ཨ་ཀཱ་སི. སཱ བྷ་ག་ཝ་ནྟཾ ཝ་ནྡི་ཏྭཱ པ་ད་ཀྑི་ཎཾ ཀ་ཏྭཱ པ་ཀྐཱ་མི. ཏཱ་ཡ ད་ཀྑི་ཎཱ་ཡ ས་མུ་དྡི་ཊྛ་མ་ཏྟཱ་ཡ སོ པེ་ཏོ ཨ་མྦ་ཝ་ན་ཨུ་ཡྻཱ་ན་ཝི་མཱ་ན་ཀ་པྤ་རུ་ཀྑ་པོ་ཀྑ་ར་ཎི་ཡོ མ་ཧ་ཏི་ཉྩ དི་བྦ་ས་མྤ་ཏྟིཾ པ་ཊི་ལ་བྷི.
ཨ་ཐ ཏེ ཝཱ་ཎི་ཛཱ ཨ་པ་རེ་ན ས་མ་ཡེ་ན ཝ་ཎི་ཛྫཱ་ཡ ག་ཙྪ་ནྟཱ ཏ་མེ་ཝ མ་གྒཾ པ་ཊི་པ་ནྣཱ པུ་བྦེ ཝ་སི་ཏ་ཊྛཱ་ནེ ཨེ་ཀ་ར་ཏྟིཾ ཝཱ་སཾ ཀ་པྤེ་སུཾ. ཏེ དི་སྭཱ སོ ཝི་མཱ་ན་པེ་ཏོ ཨུ་ཡྻཱ་ན་ཝི་མཱ་ནཱ་དཱི་ཧི ས་དྡྷིཾ ཏེ་སཾ ཨ་ཏྟཱ་ནཾ ད་སྶེ་སི. ཏེ ཝཱ་ཎི་ཛཱ ཏཾ དི་སྭཱ ཏེ་ན ལ་དྡྷ་ས་མྤ་ཏྟིཾ པུ་ཙྪ་ནྟཱ –
༧༩༦. ‘‘ཨ་ཡ་ཉྩ ཏེ པོ་ཀྑ་ར་ཎཱི སུ་ར་མྨཱ, ས་མཱ སུ་ཏི་ཏྠཱ ཙ མ་ཧོ་ད་ཀཱ ཙ;
སུ་པུ་པྥི་ཏཱ བྷ་མ་ར་ག་ཎཱ་ནུ་ཀི་ཎྞཱ, ཀ་ཐཾ ཏ་ཡཱ ལ་དྡྷཱ ཨ་ཡཾ མ་ནུ་ཉྙཱ.
༧༩༧. ‘‘ཨི་ད་ཉྩ ཏེ ཨ་མྦ་ཝ་ནཾ སུ་ར་མྨཾ, ས་བྦོ་ཏུ་ཀཾ དྷཱ་ར་ཡ་ཏེ ཕ་ལཱ་ནི;
སུ་པུ་པྥི་ཏཾ བྷ་མ་ར་ག་ཎཱ་ནུ་ཀི་ཎྞཾ, ཀ་ཐཾ ཏ་ཡཱ ལ་དྡྷ་མི་དཾ ཝི་མཱ་ན’’ནྟི. –
ཨི་མཱ དྭེ གཱ་ཐཱ ཨ་ཝོ་ཙུཾ.
༧༩༦. ཏ་ཏྠ སུ་ར་མྨཱཏི སུ་ཊྛུ ར་མ་ཎཱི་ཡཱ. ས་མཱཏི ས་མ་ཏ་ལཱ. སུ་ཏི་ཏྠཱཏི ར་ཏ་ན་མ་ཡ་སོ་པཱ་ན་ཏཱ་ཡ སུ་ནྡ་ར་ཏི་ཏྠཱ. མ་ཧོ་ད་ཀཱཏི བ་ཧུ་ཛ་ལཱ.
༧༩༧. ས་བྦོ་ཏུ་ཀནྟི པུ་པྥཱུ་པ་ག་ཕ་ལཱུ་པ་ག་རུ་ཀྑཱ་དཱི་ཧི ས་བྦེ་སུ ཨུ་ཏཱུ་སུ སུ་ཁཱ་ཝ་ཧཾ. ཏེ་ནཱ་ཧ ‘‘དྷཱ་ར་ཡ་ཏེ ཕ་ལཱ་ནཱི’’ཏི. སུ་པུ་པྥི་ཏནྟི ནི་ཙྩཾ སུ་པུ་པྥི་ཏཾ.
ཏཾ སུ་ཏྭཱ པེ་ཏོ པོ་ཀྑ་ར་ཎི་ཨཱ་དཱི་ནཾ པ་ཊི་ལཱ་བྷ་ཀཱ་ར་ཎཾ ཨཱ་ཙི་ཀྑ་ནྟོ –
༧༩༨. ‘‘ཨ་མྦ་པ་ཀྐཾ ད་ཀཾ ཡཱ་གུ, སཱི་ཏ་ཙྪཱ་ཡཱ མ་ནོ་ར་མཱ;
དྷཱི་ཏཱ་ཡ དི་ནྣ་དཱ་ནེ་ན, ཏེ་ན མེ ཨི་དྷ ལ་བྦྷ་ཏཱི’’ཏི. –
གཱ་ཐ་མཱ་ཧ. ཏ་ཏྠ ཏེ་ན མེ ཨི་དྷ ལ་བྦྷ་ཏཱིཏི ཡཾ ཏཾ བྷ་ག་ཝ་ཏོ བྷི་ཀྑཱུ་ན་ཉྩ ཨ་མྦ་པ་ཀྐཾ ཨུ་ད་ཀཾ ཡཱ་གུ་ཉྩ མ་མཾ ཨུ་དྡི་སྶ དེ་ནྟི་ཡཱ མ་ཡ྄ཧཾ དྷཱི་ཏཱ་ཡ དི་ནྣཾ དཱ་ནཾ, ཏེ་ན མེ དྷཱི་ཏཱ་ཡ དི་ནྣ་དཱ་ནེ་ན ཨི་དྷ ཨི་མ་སྨིཾ དི་བྦེ ཨ་མྦ་ཝ་ནེ ས་བྦོ་ཏུ་ཀཾ ཨ་མྦ་པ་ཀྐཾ, ཨི་མི་སྶཱ དི་བྦཱ་ཡ མ་ནུ་ཉྙཱ་ཡ པོ་ཀྑ་ར་ཎི་ཡཱ དི་བྦཾ ཨུ་ད་ཀཾ, ཡཱ་གུ་ཡཱ ཨ་ཏྠ་ར་ཎ་སྶ ཙ དཱ་ནེ་ན ཨུ་ཡྻཱ་ན་ཝི་མཱ་ན་ཀ་པྤ་རུ་ཀྑཱ་དཱི་སུ སཱི་ཏ་ཙྪཱ་ཡཱ མ་ནོ་ར་མཱ ཨི་དྷ ལ་བྦྷ་ཏི, ས་མི་ཛ྄ཛྷ་ཏཱི་ཏི ཨ་ཏྠོ.
ཨེ་ཝ་ཉྩ པ་ན ཝ་ཏྭཱ སོ པེ་ཏོ ཏེ ཝཱ་ཎི་ཛེ ནེ་ཏྭཱ ཏཱ་ནི པ་ཉྩ ཀ་ཧཱ་པ་ཎ་ས་ཏཱ་ནི ད་སྶེ་ཏྭཱ ‘‘ཨི་ཏོ ཨུ་པ་ཌྜྷཾ ཏུ་མྷེ ག་ཎྷ་ཐ, ཨུ་པ་ཌྜྷཾ མ་ཡཱ ག་ཧི་ཏཾ ཨི་ཎཾ སོ་དྷེ་ཏྭཱ སུ་ཁེ་ན ཛཱི་ཝ་ཏཱུ་ཏི མ་ཡ྄ཧཾ དྷཱི་ཏཱ་ཡ དེ་ཐཱ’’ཏི ཨཱ་ཧ. ཝཱ་ཎི་ཛཱ ཨ་ནུ་ཀྐ་མེ་ན སཱ་ཝ་ཏྠིཾ པ་ཏྭཱ ཏ་སྶ དྷཱི་ཏཱ་ཡ ཀ་ཐེ་ཏྭཱ ཏེ་ན ཨ་ཏྟ་ནོ དི་ནྣ་བྷཱ་ག་མྤི ཏ་སྶཱ ཨེ་ཝ ཨ་དཾ་སུ. སཱ ཀ་ཧཱ་པ་ཎ་ས་ཏཾ དྷ་ནི་ཀཱ་ནཾ ད་ཏྭཱ ཨི་ཏ་རཾ ཨ་ཏྟ་ནོ པི་ཏུ ས་ཧཱ་ཡ་སྶ ཏ་སྶ ཀུ་ཊུ་མྦི་ཀ་སྶ ད་ཏྭཱ ས་ཡཾ ཝེ་ཡྻཱ་ཝ་ཙྩཾ ཀ་རོ་ནྟི ནི་ཝ་ས་ཏི. སོ ‘‘ཨི་དཾ ས་བྦཾ ཏུ་ཡ྄ཧཾ་ཡེ་ཝ ཧོ་ཏཱུ’’ཏི ཏ་སྶཱ་ཡེ་ཝ པ་ཊི་ད་ཏྭཱ ཏཾ ཨ་ཏྟ་ནོ ཛེ་ཊྛ་པུ་ཏྟ་སྶ གྷ་ར་སཱ་མི་ནིཾ ཨ་ཀཱ་སི.
སཱ ག་ཙྪ་ནྟེ ཀཱ་ལེ ཨེ་ཀཾ པུ་ཏྟཾ ལ་བྷི་ཏྭཱ ཏཾ ཨུ་པ་ལཱ་ལེ་ནྟཱི –
༧༩༩. ‘‘ས་ནྡི་ཊྛི་ཀཾ ཀ་མྨཾ ཨེ་ཝཾ པ་སྶ་ཐ, དཱ་ན་སྶ ད་མ་སྶ སཾ་ཡ་མ་སྶ ཝི་པཱ་ཀཾ;
དཱ་སཱི ཨ་ཧཾ ཨ་ཡྻ་ཀུ་ལེ་སུ ཧུ་ཏྭཱ, སུ་ཎི་སཱ ཧོ་མི ཨ་གཱ་ར་སྶ ཨི་སྶ་རཱ’’ཏི. –
ཨི་མཾ གཱ་ཐཾ ཝ་ད་ཏི.
ཨ་ཐེ་ཀ་དི་ཝ་སཾ ས་ཏྠཱ ཏ་སྶཱ ཉཱ་ཎ་པ་རི་པཱ་ཀཾ ཨོ་ལོ་ཀེ་ཏྭཱ ཨོ་བྷཱ་སཾ ཕ་རི་ཏྭཱ ས་མྨུ་ཁེ ཋི་ཏོ ཝི་ཡ ཨ་ཏྟཱ་ནཾ ད་སྶེ་ཏྭཱ –
‘‘ཨ་སཱ་ཏཾ སཱ་ཏ་རཱུ་པེ་ན, པི་ཡ་རཱུ་པེ་ན ཨ་པྤི་ཡཾ;
དུ་ཀྑཾ སུ་ཁ་སྶ རཱུ་པེ་ན, པ་མ་ཏྟཾ ཨ་ཏི་ཝ་ཏྟ་ཏཱི’’ཏི. (ཨུ་དཱ. ༡༨; ཛཱ. ༡.༡.༡༠༠) –
ཨི་མཾ གཱ་ཐ་མཱ་ཧ. སཱ གཱ་ཐཱ་པ་རི་ཡོ་སཱ་ནེ སོ་ཏཱ་པ་ཏྟི་ཕ་ལེ པ་ཏི་ཊྛི་ཏཱ. སཱ དུ་ཏི་ཡ་དི་ཝ་སེ བུ་དྡྷ་པྤ་མུ་ཁ་སྶ བྷི་ཀྑུ་ས་ངྒྷ་སྶ དཱ་ནཾ ད་ཏྭཱ ཏཾ པ་ཝ་ཏྟིཾ བྷ་ག་ཝ་ཏོ ཨཱ་རོ་ཙེ་སི. བྷ་ག་ཝཱ ཏ་མ་ཏྠཾ ཨ་ཊྛུ་པྤ་ཏྟིཾ ཀ་ཏྭཱ ས་མྤ་ཏྟ་པ་རི་སཱ་ཡ དྷ་མྨཾ དེ་སེ་སི. སཱ དེ་ས་ནཱ མ་ཧཱ་ཛ་ན་སྶ སཱ་ཏྠི་ཀཱ ཨ་ཧོ་སཱི་ཏི.
ཨ་མྦ་ཝ་ན་པེ་ཏ་ཝ་ཏྠུ་ཝ་ཎྞ་ནཱ ནི་ཊྛི་ཏཱ.