༡༡. པཱ་ཊ་ལི་པུ་ཏྟ་པེ་ཏ་ཝ་ཏྠུ་ཝ་ཎྞ་ནཱ
དི་ཊྛཱ ཏ་ཡཱ ནི་ར་ཡཱ ཏི་ར་ཙྪཱ་ན་ཡོ་ནཱིཏི ཨི་དཾ ས་ཏྠ་རི ཛེ་ཏ་ཝ་ནེ ཝི་ཧ་ར་ནྟེ ཨ་ཉྙ་ཏ་རཾ ཝི་མཱ་ན་པེ་ཏཾ ཨཱ་ར་བྦྷ ཝུ་ཏྟཾ. སཱ་ཝ་ཏྠི་ཝཱ་སི་ནོ ཀི་ར པཱ་ཊ་ལི་པུ་ཏྟ་ཝཱ་སི་ནོ ཙ བ་ཧཱུ ཝཱ་ཎི་ཛཱ ནཱ་ཝཱ་ཡ སུ་ཝ་ཎྞ་བྷཱུ་མིཾ ཨ་ག་མིཾ་སུ. ཏ་ཏྠེ་ཀོ ཨུ་པཱ་ས་ཀོ ཨཱ་བཱ་དྷི་ཀོ མཱ་ཏུ་གཱ་མེ པ་ཊི་བ་དྡྷ་ཙི་ཏྟོ ཀཱ་ལ་མ་ཀཱ་སི. སོ ཀ་ཏ་ཀུ་ས་ལོ་པི དེ་ཝ་ལོ་ཀཾ ཨ་ནུ་པ་པ་ཛྫི་ཏྭཱ ཨི་ཏྠི་ཡཱ པ་ཊི་བ་དྡྷ་ཙི་ཏྟ་ཏཱ་ཡ ས་མུ་དྡ་མ་ཛ྄ཛྷེ ཝི་མཱ་ན་པེ་ཏོ ཧུ་ཏྭཱ ནི་བྦ་ཏྟི. ཡ་སྶཾ པ་ན སོ པ་ཊི་བ་དྡྷ་ཙི་ཏྟོ, སཱ ཨི་ཏྠཱི སུ་ཝ་ཎྞ་བྷཱུ་མི་གཱ་མི་ནིཾ ནཱ་ཝཾ ཨ་བྷི་རུ་ཡ྄ཧ ག་ཙྪ་ཏི. ཨ་ཐ ཁོ སོ པེ་ཏོ ཏཾ ཨི་ཏྠིཾ ག་ཧེ་ཏུ་ཀཱ་མོ ནཱ་ཝཱ་ཡ ག་མ་ནཾ ཨུ་པ་རུ་ནྡྷི. ཨ་ཐ ཝཱ་ཎི་ཛཱ ‘‘ཀེ་ན ནུ ཁོ ཀཱ་ར་ཎེ་ན ཨ་ཡཾ ནཱ་ཝཱ ན ག་ཙྪ་ཏཱི’’ཏི ཝཱི་མཾ་ས་ནྟཱ ཀཱ་ལ༹་ཀ་ཎྞི་ས་ལཱ་ཀཾ ཝི་ཙཱ་རེ་སུཾ. ཨ་མ་ནུ་སྶི་དྡྷི་ཡཱ ཡཱ་ཝ་ཏ་ཏི་ཡཾ ཏ་སྶཱ ཨེ་ཝ ཨི་ཏྠི་ཡཱ པཱ་པུ་ཎི, ཡ་སྶཾ སོ པ་ཊི་བ་དྡྷ་ཙི་ཏྟོ. ཏཾ དི་སྭཱ ཝཱ་ཎི་ཛཱ ཝེ་ལུ༹་ཀ་ལཱ་པཾ ས་མུ་དྡེ ཨོ་ཏཱ་རེ་ཏྭཱ ཏ་སྶ ཨུ་པ་རི ཏཾ ཨི་ཏྠིཾ ཨོ་ཏཱ་རེ་སུཾ. ཨི་ཏྠི་ཡཱ ཨོ་ཏཱ་རི་ཏ་མ་ཏྟཱ་ཡ ནཱ་ཝཱ ཝེ་གེ་ན སུ་ཝ་ཎྞ་བྷཱུ་མིཾ ཨ་བྷི་མུ་ཁཱ པཱ་ཡཱ་སི. ཨ་མ་ནུ་སྶོ ཏཾ ཨི་ཏྠིཾ ཨ་ཏྟ་ནོ ཝི་མཱ་ནཾ ཨཱ་རོ་པེ་ཏྭཱ ཏཱ་ཡ ས་དྡྷིཾ ཨ་བྷི་ར་མི.
སཱ ཨེ་ཀཾ སཾ་ཝ་ཙྪ་རཾ ཨ་ཏི་ཀྐ་མི་ཏྭཱ ནི་བྦི་ནྣ་རཱུ་པཱ ཏཾ པེ་ཏཾ ཡཱ་ཙ་ནྟཱི ཨཱ་ཧ – ‘‘ཨ་ཧཾ ཨི་དྷ ཝ་ས་ནྟཱི མ་ཡ྄ཧཾ ས་མྤ་རཱ་ཡི་ཀཾ ཨ་ཏྠཾ ཀཱ་ཏུཾ ན ལ་བྷཱ་མི, སཱ་དྷུ, མཱ་རི་ས, མཾ པཱ་ཊ་ལི་པུ་ཏྟ་མེ་ཝ ནེ་ཧཱི’’ཏི. སོ ཏཱ་ཡ ཡཱ་ཙི་ཏོ –
༧༩༣. ‘‘དི་ཊྛཱ ཏ་ཡཱ ནི་ར་ཡཱ ཏི་ར་ཙྪཱ་ན་ཡོ་ནི, པེ་ཏཱ ཨ་སུ་རཱ ཨ་ཐ་ཝཱ་པི མཱ་ནུ་སཱ དེ་ཝཱ;
ས་ཡ་མ་དྡ་ས ཀ་མྨ་ཝི་པཱ་ཀ་མ་ཏྟ་ནོ, ནེ་སྶཱ་མི ཏཾ པཱ་ཊ་ལི་པུ་ཏྟ་མ་ཀྑ་ཏཾ;
ཏ་ཏྠ ག་ནྟྭཱ ཀུ་ས་ལཾ ཀ་རོ་ཧི ཀ་མྨ’’ནྟི. –
གཱ་ཐ་མཱ་ཧ. ཏ་ཏྠ དི་ཊྛཱ ཏ་ཡཱ ནི་ར་ཡཱཏི ཨེ་ཀ་ཙྩེ པ་ཙྩེ་ཀ་ནི་ར་ཡཱ་པི ཏ་ཡཱ དི་ཊྛཱ. ཏི་ར་ཙྪཱ་ན་ཡོ་ནཱིཏི མ་ཧཱ་ནུ་བྷཱ་ཝཱ ནཱ་ག་སུ་པ་ཎྞཱ་དི་ཏི་ར་ཙྪཱ་ནཱ་པི དི་ཊྛཱ ཏ་ཡཱ་ཏི ཡོ་ཛ་ནཱ. པེ་ཏཱཏི ཁུ་པྤི་པཱ་སཱ་དི་བྷེ་དཱ པེ་ཏཱ. ཨ་སུ་རཱཏི ཀཱ་ལ་ཀ་ཉྩི་ཀཱ་དི་བྷེ་དཱ ཨ་སུ་རཱ. དེ་ཝཱཏི ཨེ་ཀ་ཙྩེ ཙཱ་ཏུ་མ་ཧཱ་རཱ་ཛི་ཀཱ དེ་ཝཱ. སོ ཀི་ར ཨ་ཏྟ་ནོ ཨཱ་ནུ་བྷཱ་ཝེ་ན ཨ་ནྟ་ར་ནྟ་རཱ ཏཾ ག་ཧེ་ཏྭཱ པ་ཙྩེ་ཀ་ནི་ར་ཡཱ་དི་ཀེ ད་སྶེ་ནྟོ ཝི་ཙ་ར་ཏི, ཏེ་ན ཨེ་ཝ་མཱ་ཧ. ས་ཡ་མ་དྡ་ས ཀ་མྨ་ཝི་པཱ་ཀ་མ་ཏྟ་ནོཏི ནི་ར་ཡཱ་དི་ཀེ ཝི་སེ་ས་ཏོ ག་ནྟྭཱ པ་སྶ་ནྟཱི ས་ཡ་མེ་ཝ ཨ་ཏྟ་ནཱ ཀ་ཏ་ཀ་མྨཱ་ནཾ ཝི་པཱ་ཀཾ པ་ཙྩ་ཀྑ་ཏོ ཨ་དྡ་ས ཨ་ད་ཀྑི. ནེ་སྶཱ་མི ཏཾ པཱ་ཊ་ལི་པུ་ཏྟ་མ་ཀྑ་ཏནྟི ཨི་དཱ་ནཱ་ཧཾ ཏཾ ཨ་ཀྑ་ཏཾ ཀེ་ན་ཙི ཨ་པ་རི་ཀྑ་ཏཾ མ་ནུ་སྶ་རཱུ་པེ་ནེ་ཝ པཱ་ཊ་ལི་པུ་ཏྟཾ ན་ཡི་སྶཱ་མི. ཏྭཾ པ་ན ཏ་ཏྠ ག་ནྟྭཱ ཀུ་ས་ལཾ ཀ་རོ་ཧི ཀ་མྨཾ, ཀ་མྨ་ཝི་པཱ་ཀ་སྶ པ་ཙྩ་ཀྑ་ཏོ དི་ཊྛ་ཏྟཱ ཡུ་ཏྟ་པ་ཡུ་ཏྟཱ པུ་ཉྙ་ནི་ར་ཏཱ ཧོ་ཧཱི་ཏི ཨ་ཏྠོ.
ཨ་ཐ སཱ ཨི་ཏྠཱི ཏ་སྶ ཝ་ཙ་ནཾ སུ་ཏྭཱ ཨ་ཏྟ་མ་ནཱ –
༧༩༤. ‘‘ཨ་ཏྠ་ཀཱ་མོ་སི མེ ཡ་ཀྑ, ཧི་ཏ་ཀཱ་མོ་སི དེ་ཝ་ཏེ;
ཀ་རོ་མི ཏུ་ཡ྄ཧཾ ཝ་ཙ་ནཾ, ཏྭཾ་སི ཨཱ་ཙ་རི་ཡོ མ་མ.
༧༩༥. ‘‘དི་ཊྛཱ མ་ཡཱ ནི་ར་ཡཱ ཏི་ར་ཙྪཱ་ན་ཡོ་ནི, པེ་ཏཱ ཨ་སུ་རཱ ཨ་ཐ་ཝཱ་པི མཱ་ནུ་སཱ དེ་ཝཱ;
ས་ཡ་མ་དྡ་སཾ ཀ་མྨ་ཝི་པཱ་ཀ་མ་ཏྟ་ནོ, ཀཱ་ཧཱ་མི པུ་ཉྙཱ་ནི ཨ་ན་པྤ་ཀཱ་ནཱི’’ཏི. –
གཱ་ཐ་མཱ་ཧ.
ཨ་ཐ སོ པེ་ཏོ ཏཾ ཨི་ཏྠིཾ ག་ཧེ་ཏྭཱ ཨཱ་ཀཱ་སེ་ན ག་ནྟྭཱ པཱ་ཊ་ལི་པུ་ཏྟ་ན་ག་ར་སྶ མ་ཛ྄ཛྷེ ཋ་པེ་ཏྭཱ པ་ཀྐཱ་མི. ཨ་ཐ་སྶཱ ཉཱ་ཏི་མི་ཏྟཱ་ད་ཡོ ཏཾ དི་སྭཱ ‘‘མ་ཡཾ པུ་བྦེ ས་མུ་དྡེ པ་ཀྑི་ཏྟཱ མ་ཏཱ་ཏི ཨ་སྶུ་མྷ. སཱ ཨ་ཡཾ དི་ཊྛཱ ཝ་ཏ, བྷོ, སོ་ཏྠི་ནཱ ཨཱ་ག་ཏཱ’’ཏི ཨ་བྷི་ན་ནྡ་མཱ་ནཱ ས་མཱ་ག་ནྟྭཱ ཏ་སྶཱ པ་ཝ་ཏྟིཾ པུ་ཙྪིཾ་སུ. སཱ ཏེ་སཾ ཨཱ་དི་ཏོ པ་ཊྛཱ་ཡ ཨ་ཏྟ་ནཱ དི་ཊྛཾ ཨ་ནུ་བྷཱུ་ཏ་ཉྩ ས་བྦཾ ཀ་ཐེ་སི. སཱ་ཝ་ཏྠི་ཝཱ་སི་ནོ་པི ཁོ ཏེ ཝཱ་ཎི་ཛཱ ཨ་ནུ་ཀྐ་མེ་ན སཱ་ཝ་ཏྠིཾ ཨུ་པ་ག་ཏ་ཀཱ་ལེ ས་ཏྠུ ས་ནྟི་ཀཾ ཨུ་པ་ས་ངྐ་མི་ཏྭཱ ཝ་ནྡི་ཏྭཱ ཨེ་ཀ་མ་ནྟཾ ནི་སི་ནྣཱ ཏཾ པ་ཝ་ཏྟིཾ བྷ་ག་ཝ་ཏོ ཨཱ་རོ་ཙེ་སུཾ. བྷ་ག་ཝཱ ཏ་མ་ཏྠཾ ཨ་ཊྛུ་པྤ་ཏྟིཾ ཀ་ཏྭཱ ཙ་ཏུ་ནྣཾ པ་རི་སཱ་ནཾ དྷ་མྨཾ དེ་སེ་སི. ཏཾ སུ་ཏྭཱ མ་ཧཱ་ཛ་ནོ སཾ་ཝེ་ག་ཛཱ་ཏོ དཱ་ནཱ་དི་ཀུ་ས་ལ་དྷ་མྨ་ནི་ར་ཏོ ཨ་ཧོ་སཱི་ཏི.
པཱ་ཊ་ལི་པུ་ཏྟ་པེ་ཏ་ཝ་ཏྠུ་ཝ་ཎྞ་ནཱ ནི་ཊྛི་ཏཱ.