༡༠. ག་ཎ་པེ་ཏ་ཝ་ཏྠུ་ཝ་ཎྞ་ནཱ
ན་གྒཱ དུ་བྦ་ཎྞ་རཱུ་པཱ་ཏྠཱཏི ཨི་དཾ ས་ཏྠ་རི ཛེ་ཏ་ཝ་ནེ ཝི་ཧ་ར་ནྟེ ས་མྦ་ཧུ་ལེ པེ་ཏེ ཨཱ་ར་བྦྷ ཝུ་ཏྟཾ. སཱ་ཝ་ཏྠི་ཡཾ ཀི་ར ས་མྦ་ཧུ་ལཱ མ་ནུ་སྶཱ ག་ཎ་བྷཱུ་ཏཱ ཨ་སྶ་དྡྷཱ ཨ་པྤ་ས་ནྣཱ མ་ཙྪེ་ར་མ་ལ་པ་རི་ཡུ་ཊྛི་ཏ་ཙི་ཏྟཱ དཱ་ནཱ་དི་སུ་ཙ་རི་ཏ་ཝི་མུ་ཁཱ ཧུ་ཏྭཱ ཙི་རཾ ཛཱི་ཝི་ཏྭཱ ཀཱ་ཡ་སྶ བྷེ་དཱ ན་ག་ར་སྶ ས་མཱི་པེ པེ་ཏ་ཡོ་ནི་ཡཾ ནི་བྦ་ཏྟིཾ་སུ. ཨ་ཐེ་ཀ་དི་ཝ་སཾ ཨཱ་ཡ་སྨཱ མ་ཧཱ་མོ་གྒ་ལླཱ་ནོ སཱ་ཝ་ཏྠི་ཡཾ པི་ཎྜཱ་ཡ ག་ཙྪ་ནྟོ ཨ་ནྟ་རཱ་མ་གྒེ པེ་ཏེ དི་སྭཱ –
༧༨༢. ‘‘ན་གྒཱ དུ་བྦ་ཎ་རཱུ་པཱ་ཏྠ, ཀི་སཱ དྷ་མ་ནི་ས་ནྠ་ཏཱ;
ཨུ་པྥཱ་སུ་ལི་ཀཱ ཀི་སི་ཀཱ, ཀེ ནུ ཏུ་མྷེ་ཏྠ མཱ་རི་སཱ’’ཏི. –
གཱ་ཐཱ་ཡ པུ་ཙྪི. ཏ་ཏྠ དུ་བྦ་ཎྞ་རཱུ་པཱ་ཏྠཱཏི དུ་བྦ་ཎྞ་ས་རཱི་རཱ ཧོ་ཐ. ཀེ ནུ ཏུ་མྷེ་ཏྠཱཏི ཏུ་མྷེ ཀེ ནུ ནཱ་མ བྷ་ཝ་ཐ. མཱ་རི་སཱཏི ཏེ ཨ་ཏྟ་ནོ སཱ་རུ་པྤ་ཝ་སེ་ན ཨཱ་ལ་པ་ཏི.
ཏཾ སུ་ཏྭཱ པེ་ཏཱ –
༧༨༣. ‘‘མ་ཡཾ བྷ་ད་ནྟེ པེ་ཏ་མྷཱ, དུ་གྒ་ཏཱ ཡ་མ་ལོ་ཀི་ཀཱ;
པཱ་པ་ཀ་མྨཾ ཀ་རི་ཏྭཱ་ན, པེ་ཏ་ལོ་ཀཾ ཨི་ཏོ ག་ཏཱ’’ཏི. –
གཱ་ཐཱ་ཡ ཨ་ཏྟ་ནོ པེ་ཏ་བྷཱ་ཝཾ པ་ཀཱ་སེ་ཏྭཱ པུ་ན ཐེ་རེ་ན –
༧༨༤. ‘‘ཀིཾ ནུ ཀཱ་ཡེ་ན ཝཱ་ཙཱ་ཡ, མ་ན་སཱ དུ་ཀྐ་ཊཾ ཀ་ཏཾ;
ཀི་སྶ་ཀ་མྨ་ཝི་པཱ་ཀེ་ན, པེ་ཏ་ལོ་ཀཾ ཨི་ཏོ ག་ཏཱ’’ཏི. –
གཱ་ཐཱ་ཡ ཀ་ཏ་ཀ་མྨཾ པུ་ཙྪི་ཏཱ –
༧༨༥. ‘‘ཨ་ནཱ་ཝ་ཊེ་སུ ཏི་ཏྠེ་སུ, ཝི་ཙི་ནི་མྷ་དྡྷ་མཱ་ས་ཀཾ;
ས་ནྟེ་སུ དེ་ཡྻ་དྷ་མྨེ་སུ, དཱི་པཾ ནཱ་ཀ་མྷ ཨ་ཏྟ་ནོ.
༧༨༦. ‘‘ན་དིཾ ཨུ་པེ་མ ཏ་སི་ཏཱ, རི་ཏྟ་ཀཱ པ་རི་ཝ་ཏྟ་ཏི;
ཚཱ་ཡཾ ཨུ་པེ་མ ཨུ་ཎྷེ་སུ, ཨཱ་ཏ་པོ པ་རི་ཝ་ཏྟ་ཏི.
༧༨༧. ‘‘ཨ་གྒི་ཝ་ཎྞོ ཙ ནོ ཝཱ་ཏོ, ཌ་ཧ་ནྟོ ཨུ་པ་ཝཱ་ཡ་ཏི;
ཨེ་ཏ་ཉྩ བྷ་ནྟེ ཨ་ར་ཧཱ་མ, ཨ་ཉྙ་ཉྩ པཱ་པ་ཀཾ ཏ་ཏོ.
༧༨༨. ‘‘ཨ་པི ཡོ་ཛ་ནཱ་ནི ག་ཙྪཱ་མ, ཚཱ་ཏཱ ཨཱ་ཧཱ་ར་གེ་དྷི་ནོ;
ཨ་ལ་དྡྷཱ་ཝ ནི་ཝ་ཏྟཱ་མ, ཨ་ཧོ ནོ ཨ་པྤ་པུ་ཉྙ་ཏཱ.
༧༨༩. ‘‘ཚཱ་ཏཱ པ་མུ་ཙྪི་ཏཱ བྷ་ནྟཱ, བྷཱུ་མི་ཡཾ པ་ཊི་སུ་མྦྷི་ཏཱ;
ཨུ་ཏྟཱ་ནཱ པ་ཊི་ཀི་རཱ་མ, ཨ་ཝ་ཀུ་ཛྫཱ པ་ཏཱ་མ་སེ.
༧༩༠. ‘‘ཏེ ཙ ཏ་ཏྠེ་ཝ པ་ཏི་ཏཱ, བྷཱུ་མི་ཡཾ པ་ཊི་སུ་མྦྷི་ཏཱ;
ཨུ་རཾ སཱི་ས་ཉྩ གྷ་ཊྚེ་མ, ཨ་ཧོ ནོ ཨ་པྤ་པུ་ཉྙ་ཏཱ.
༧༩༡. ‘‘ཨེ་ཏ་ཉྩ བྷ་ནྟེ ཨ་ར་ཧཱ་མ, ཨ་ཉྙ་ཉྩ པཱ་པ་ཀཾ ཏ་ཏོ;
ས་ནྟེ་སུ དེ་ཡྻ་དྷ་མྨེ་སུ, དཱི་པཾ ནཱ་ཀ་མྷ ཨ་ཏྟ་ནོ.
༧༩༢. ‘‘ཏེ ཧི ནཱུ་ན ཨི་ཏོ ག་ནྟྭཱ, ཡོ་ནིཾ ལ་དྡྷཱ་ན མཱ་ནུ་སིཾ;
ཝ་ད་ཉྙཱུ སཱི་ལ་ས་མྤ་ནྣཱ, ཀཱ་ཧཱ་མ ཀུ་ས་ལཾ བ་ཧུ’’ནྟི. –
ཨ་ཏྟ་ནཱ ཀ་ཏ་ཀ་མྨཾ ཀ་ཐེ་སུཾ.
༧༨༨. ཏ་ཏྠ ཨ་པི ཡོ་ཛ་ནཱ་ནི ག་ཙྪཱ་མཱཏི ཨ་ནེ་ཀཱ་ནི་པི ཡོ་ཛ་ནཱ་ནི ག་ཙྪཱ་མ. ཀ་ཐཾ? ཚཱ་ཏཱ ཨཱ་ཧཱ་ར་གེ་དྷི་ནོཏི, ཙི་ར་ཀཱ་ལཾ ཛི་གྷ་ཙྪཱ་ཡ ཛི་གྷ་ཙྪི་ཏཱ ཨཱ་ཧཱ་རེ གི་དྡྷཱ ཨ་བྷི་གི་ཛ྄ཛྷ་ནྟཱ ཧུ་ཏྭཱ, ཨེ་ཝཾ ག་ནྟྭཱ་པི ཀི་ཉྩི ཨཱ་ཧཱ་རཾ ཨ་ལ་དྡྷཱ་ཡེ་ཝ ནི་ཝ་ཏྟཱ་མ. ཨ་པྤ་པུ་ཉྙ་ཏཱཏི ཨ་པུ་ཉྙ་ཏཱ ཨ་ཀ་ཏ་ཀ་ལྱཱ་ཎ་ཏཱ.
༧༨༩. ཨུ་ཏྟཱ་ནཱ པ་ཊི་ཀི་རཱ་མཱཏི ཀ་དཱ་ཙི ཨུ་ཏྟཱ་ནཱ ཧུ་ཏྭཱ ཝི་ཀི་རི་ཡ་མཱ་ན་ངྒ་པ་ཙྩ་ངྒཱ ཝི་ཡ ཝ་ཏྟཱ་མ. ཨ་ཝ་ཀུ་ཛྫཱ པ་ཏཱ་མ་སེཏི ཀ་དཱ་ཙི ཨ་ཝ་ཀུ་ཛྫཱ ཧུ་ཏྭཱ པ་ཏཱ་མ.
༧༩༠. ཏེ ཙཱཏི ཏེ མ་ཡཾ. ཨུ་རཾ སཱི་ས་ཉྩ གྷ་ཊྚེ་མཱཏི ཨ་ཝ་ཀུ་ཛྫཱ ཧུ་ཏྭཱ པ་ཏི་ཏཱ ཨུ་ཊྛཱ་ཏུཾ ཨ་ས་ཀྐོ་ནྟཱ ཝེ་དྷ་ནྟཱ ཝེ་ད་ནཱ་པྤ་ཏྟཱ ཨ་ཏྟ་ནོ ཨ་ཏྟ་ནོ ཨུ་རཾ སཱི་ས་ཉྩ པ་ཊི་གྷཾ་སཱ་མ. སེ་སཾ ཧེ་ཊྛཱ ཝུ་ཏྟ་ན་ཡ་མེ་ཝ.
ཐེ་རོ ཏཾ པ་ཝ་ཏྟིཾ བྷ་ག་ཝ་ཏོ ཨཱ་རོ་ཙེ་སི. བྷ་ག་ཝཱ ཏ་མ་ཏྠཾ ཨ་ཊྛུ་པྤ་ཏྟིཾ ཀ་ཏྭཱ ས་མྤ་ཏྟ་པ་རི་སཱ་ཡ དྷ་མྨཾ དེ་སེ་སི. ཏཾ སུ་ཏྭཱ མ་ཧཱ་ཛ་ནོ མ་ཙྪེ་ར་མ་ལཾ པ་ཧཱ་ཡ དཱ་ནཱ་དི་སུ་ཙ་རི་ཏ་ནི་ར་ཏོ ཨ་ཧོ་སཱི་ཏི.
ག་ཎ་པེ་ཏ་ཝ་ཏྠུ་ཝ་ཎྞ་ནཱ ནི་ཊྛི་ཏཱ.