༡༢. བྷ་དྲཱ་ཝུ་དྷ་མཱ་ཎ་ཝ་སུ་ཏྟ་ནི་དྡེ་ས་ཝ་ཎྞ་ནཱ

༧༠. དྭཱ་ད་ས་མེ བྷ་དྲཱ་ཝུ་དྷ་སུ་ཏྟེ – ཨོ་ཀ་ཉྫ་ཧནྟི ཨཱ་ལ་ཡཾ ཛ་ཧཾ. ཏ་ཎྷ་ཙྪི་དནྟི ཏ་ཎྷཱ་ཀཱ་ཡ་ཙྪི་དཾ. ཨ་ནེ་ཛནྟི ལོ་ཀ་དྷ་མྨེ་སུ ནི་ཀྐ་མྤཾ. ན་ནྡི་ཉྫ་ཧནྟི ཨ་ནཱ་ག་ཏ་རཱུ་པཱ་དི་པ་ཏྠ་ནཱ་ཛ་ཧཾ. ཨེ་ཀཱ ཨེ་ཝ ཧི སཱ ཏ་ཎྷཱ, ཐུ་ཏི་ཝ་སེ་ན ཨི་དྷ ནཱ་ན་པྤ་ཀཱ་ར་ཏོ ཝུ་ཏྟཱ. ཀ་པྤ་ཉྫ་ཧནྟི དུ་ཝི་དྷཾ ཀ་པྤ་ཛ་ཧཾ. ཨ་བྷི་ཡཱ་ཙེཏི ཨ་ཏི་ཝི་ཡ ཡཱ་ཙཱ་མི. སུ་ཏྭཱ་ན ནཱ་ག་སྶ ཨ་པ་ན་མི་སྶ་ནྟི ཨི་ཏོཏི ནཱ་ག་སྶ ཏ་ཝ བྷ་ག་ཝ་ཏོ ཝ་ཙ་ནཾ སུ་ཏྭཱ ཨི་ཏོ པཱ་སཱ་ཎ་ཀ་ཙེ་ཏི་ཡ་ཏོ བ་ཧུ་ཛ་ནཱ པ་ཀྐ་མི་སྶ་ནྟཱི་ཏི ཨ་དྷི་པྤཱ་ཡོ.

ཡེ ཨུ་པ་ཡུ་པཱ་དཱ་ནཱཏི ཏ་ཎྷཱ་དི་ཊྛཱི་ཧི ཨུ་པ་ག་ནྟྭཱ ག་ཧི་ཏཱ. ཙེ་ཏ་སོ ཨ་དྷི་ཊྛཱ་ནཱཏི ཙི་ཏྟེ པ་ཏི་ཊྛི་ཏཱ. ཨ་བྷི་ནི་ཝེ་སཱ་ནུ་ས་ཡཱཏི པ་ཏི་ཊྛ་ཧི་ཏྭཱ ཨཱ་ག་ནྟྭཱ ས་ཡི་ཏཱ.

༧༡. ཛ་ན་པ་དེ་ཧི ས་ངྒ་ཏཱཏི ཨ་ངྒཱ་དཱི་ཧི ཛ་ན་པ་དེ་ཧི ཨི་དྷ ས་མཱ་ག་ཏཱ. ཝི་ཡཱ་ཀ་རོ་ཧཱིཏི དྷ་མྨཾ དེ་སེ་ཧི.

ས་ངྒ་ཏཱཏི ཨེ་ཏེ ཁ་ཏྟི་ཡཱ་ད་ཡོ ཨེ་ཀཱི་བྷཱུ་ཏཱ. ས་མཱ་ག་ཏཱཏི ཝུ་ཏྟ་པྤ་ཀཱ་རེ་ཧི ཛ་ན་པ་དེ་ཧི ཨཱ་ག་ཏཱ. ས་མོ་ཧི་ཏཱཏི རཱ་སཱི་བྷཱུ་ཏཱ. ས་ནྣི་པ་ཏི་ཏཱཏི ཨ་དྷི་ཡོ་གཱ.

༧༢. ཨ་ཐ་སྶ ཨཱ་ས་ཡཱ་ནུ་ལོ་མེ་ན དྷ་མྨཾ དེ་སེ་ནྟོ བྷ་ག་ཝཱ ཨུ་པ་རཱུ་པ་རི་གཱ་ཐཱ་ཡོ ཨ་བྷཱ་སི. ཏ་ཏྠ ཨཱ་དཱ་ན་ཏ་ཎྷནྟི རཱུ་པཱ་དཱི་ནཾ ཨཱ་དཱ་ཡི་ཀཾ ག་ཧ་ཎ་ཏ་ཎྷཾ, ཏ་ཎྷུ་པཱ་དཱ་ན་ནྟི ཝུ་ཏྟཾ ཧོ་ཏི. ཡཾ ཡ་ཉྷི ལོ་ཀ་སྨི་མུ་པཱ་དི་ཡ་ནྟཱིཏི ཨེ་ཏེ་སུ ཨུ་དྡྷཱ་དི་བྷེ་དེ་སུ ཡཾ ཡཾ ག་ཎྷ་ནྟི. ཏེ་ནེ་ཝ མཱ་རོ ཨ་ནྭེ་ཏི་ཛ་ནྟུནྟི ཏེ་ནེ་ཝ ཨུ་པཱ་དཱ་ན་པ་ཙྩ་ཡ་ནི་བྦ་ཏྟ་ཀ་མྨཱ་བྷི་ས་ངྑཱ་ར་ནི་བྦ་ཏྟ་ཝ་སེ་ན པ་ཊི་ས་ནྡྷི་ཀྑ་ནྡྷ་མཱ་རོ ཏཾ ས་ཏྟཾ ཨ་ནུ་ག་ཙྪ་ཏི.

༧༣. ཏ་སྨཱ པ་ཛཱ་ནནྟི ཏ་སྨཱ ཨེ་ཏ་མཱ་དཱི་ན་ཝཾ ཨ་ནི་ཙྩཱ་དི་ཝ་སེ་ན ཝཱ ས་ངྑཱ་རེ པ་ཛཱ་ན་ནྟོ. ཨཱ་དཱ་ན་ས་ཏྟེ ཨི་ཏི པེ་ཀྑ་མཱ་ནོ, པ་ཛཾ ཨི་མཾ མ་ཙྩུ་དྷེ་ཡྻེ ཝི་ས་ཏྟནྟི ཨཱ་དཱ་ཏ་བྦ་ཊྛེ་ན ཨཱ་དཱ་ནེ་སུ རཱུ་པཱ་དཱི་སུ ས་ཏྟེ ས་བྦ་ལོ་ཀེ ཨི་མཾ པ་ཛཾ མ་ཙྩུ་དྷེ་ཡྻེ ལ་གྒཾ པེ་ཀྑ་མཱ་ནོ, ཨཱ་དཱ་ན་ས་ཏྟེ ཝཱ ཨཱ་དཱ་ནཱ་བྷི་ནི་ཝི་ཊྛེ པུ་གྒ་ལེ ཨཱ་དཱ་ན་ས་ངྒ་ཧེ་ཏུ་ཉྩ ཨི་མཾ པ་ཛཾ མ་ཙྩུ་དྷེ་ཡྻེ ལ་གྒཾ ཏ་ཏོ ཝཱི་ཏི་ཀྐ་མི་ཏུཾ ཨ་ས་མ་ཏྠཾ ཨི་ཏི པེ་ཀྑ་མཱ་ནོ ཀི་ཉྩ་ནཾ ས་བྦ་ལོ་ཀེ ན ཨུ་པཱ་དི་ཡེ་ཐཱ་ཏི. སེ་སཾ ས་བྦ་ཏྠ པཱ་ཀ་ཊ་མེ་ཝ.

ཨེ་ཝཾ བྷ་ག་ཝཱ ཨི་ད་མྤི སུ་ཏྟཾ ཨ་ར་ཧ་ཏྟ་ནི་ཀཱུ་ཊེ་ནེ་ཝ དེ་སེ་སི, དེ་ས་ནཱ་པ་རི་ཡོ་སཱ་ནེ ཙ པུ་བྦ་ས་དི་སོ ཨེ་ཝ དྷ་མྨཱ་བྷི་ས་མ་ཡོ ཨ་ཧོ་སཱི་ཏི.

ས་དྡྷ་མྨ་པྤ་ཛྫོ་ཏི་ཀཱ་ཡ ཙཱུ་ལ༹་ནི་དྡེ་ས-ཨ་ཊྛ་ཀ་ཐཱ་ཡ

བྷ་དྲཱ་ཝུ་དྷ་སུ་ཏྟ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.