༩. སཱ་རི་པུ་ཏྟ་ཏྠེ་ར་ཝ་ཏྠུ

ཡ་མྷཱཏི ཨི་མཾ དྷ་མྨ་དེ་ས་ནཾ ས་ཏྠཱ ཛེ་ཏ་ཝ་ནེ ཝི་ཧ་ར་ནྟོ སཱ་རི་པུ་ཏྟ་ཏྠེ་རཾ ཨཱ་ར་བྦྷ ཀ་ཐེ་སི.

སོ ཀི་རཱ་ཡ་སྨཱ ཨ་སྶ་ཛི་ཏྠེ་ར་སྶ ས་ནྟི་ཀེ དྷ་མྨཾ སུ་ཏྭཱ སོ་ཏཱ་པ་ཏྟི་ཕ་ལཾ པ་ཏྟ་ཀཱ་ལ་ཏོ པ་ཊྛཱ་ཡ ‘‘ཡ་སྶཾ དི་སཱ་ཡཾ ཐེ་རོ ཝ་ས་ཏཱི’’ཏི སུ་ཎཱ་ཏི, ཏ་ཏོ ཨ་ཉྫ་ལིཾ པ་གྒ་ཡ྄ཧ ཏ་ཏོ་ཝ སཱི་སཾ ཀ་ཏྭཱ ནི་པ་ཛྫ་ཏི. བྷི་ཀྑཱུ ‘‘མི་ཙྪཱ་དི་ཊྛི་ཀོ སཱ་རི་པུ་ཏྟོ, ཨ་ཛྫཱ་པི དི་སཱ ན་མ་སྶ་མཱ་ནོ ཝི་ཙ་ར་ཏཱི’’ཏི ཏ་མ་ཏྠཾ ཏ་ཐཱ་ག་ཏ་སྶ ཨཱ་རོ་ཙེ་སུཾ. ས་ཏྠཱ ཐེ་རཾ པ་ཀྐོ་སཱ་པེ་ཏྭཱ ‘‘ས་ཙྩཾ ཀི་ར ཏྭཾ, སཱ་རི་པུ་ཏྟ, དི་སཱ ན་མ་སྶ་ནྟོ ཝི་ཙ་ར་སཱི’’ཏི པུ་ཙྪི་ཏྭཱ, ‘‘བྷ་ནྟེ, མ་མ དི་སཱ ན་མ་སྶ་ན་བྷཱ་ཝཾ ཝཱ ཨ་ན་མ་སྶ་ན་བྷཱ་ཝཾ ཝཱ ཏུ་མྷེ་ཝ ཛཱ་ནཱ་ཐཱ’’ཏི ཝུ་ཏྟེ ‘‘ན, བྷི་ཀྑ་ཝེ, སཱ་རི་པུ་ཏྟོ དི་སཱ ན་མ་སྶ་ཏི, ཨ་སྶ་ཛི་ཏྠེ་ར་སྶ པ་ན ས་ནྟི་ཀཱ དྷ་མྨཾ སུ་ཏྭཱ སོ་ཏཱ་པ་ཏྟི་ཕ་ལཾ པ་ཏྟ་ཏཱ་ཡ ཨ་ཏྟ་ནོ ཨཱ་ཙ་རི་ཡཾ ན་མ་སྶ་ཏི. ཡ་ཉྷི ཨཱ་ཙ་རི་ཡཾ ནི་སྶཱ་ཡ བྷི་ཀྑུ དྷ་མྨཾ ཝི་ཛཱ་ནཱ་ཏི, ཏེ་ན སོ བྲཱ་ཧྨ་ཎེ་ན ཨ་གྒི ཝི་ཡ ས་ཀྐ་ཙྩཾ ན་མ་སྶི་ཏ་བྦོ་ཡེ་ཝཱ’’ཏི ཝ་ཏྭཱ དྷ་མྨཾ དེ་སེ་ནྟོ ཨི་མཾ གཱ་ཐ་མཱ་ཧ –

༣༩༢. ‘‘ཡ་མྷཱ དྷ་མྨཾ ཝི་ཛཱ་ནེ་ཡྻ, ས་མྨཱ་ས་མྦུ་དྡྷ་དེ་སི་ཏཾ;

ས་ཀྐ་ཙྩཾ ཏཾ ན་མ་སྶེ་ཡྻ, ཨ་གྒི་ཧུ་ཏྟཾ་ཝ བྲཱ་ཧྨ་ཎོ’’ཏི.

ཏ་ཏྠ ཨ་གྒི་ཧུ་ཏྟཾ་ཝཱཏི ཡ་ཐཱ བྲཱ་ཧྨ་ཎོ ཨ་གྒི་ཧུ་ཏྟཾ ས་མྨཱ པ་རི་ཙ་ར་ཎེ་ན ཙེ་ཝ ཨ་ཉྫ་ལི་ཀ་མྨཱ་དཱི་ཧི ཙ ས་ཀྐ་ཙྩཾ ན་མ་སྶ་ཏི, ཨེ་ཝཾ ཡ་མྷཱ ཨཱ་ཙ་རི་ཡཱ ཏ་ཐཱ་ག་ཏ་པ་ཝེ་དི་ཏཾ དྷ་མྨཾ ཝི་ཛཱ་ནེ་ཡྻ, ཏཾ ས་ཀྐ་ཙྩཾ ན་མ་སྶེ་ཡྻཱ་ཏི ཨ་ཏྠོ.

དེ་ས་ནཱ་ཝ་སཱ་ནེ བ་ཧཱུ སོ་ཏཱ་པ་ཏྟི་ཕ་ལཱ་དཱི་ནི པཱ་པུ་ཎིཾ་སཱུ་ཏི.

སཱ་རི་པུ་ཏྟ་ཏྠེ་ར་ཝ་ཏྠུ ན་ཝ་མཾ.