༨. པ་ཉྩ་ས་ཏ་བྷི་ཀྑུ་ཝ་ཏྠུ

ཝ་སྶི་ཀཱ ཝི་ཡ པུ་པྥཱ་ནཱིཏི ཨི་མཾ དྷ་མྨ་དེ་ས་ནཾ ས་ཏྠཱ ཛེ་ཏ་ཝ་ནེ ཝི་ཧ་ར་ནྟོ པ་ཉྩ་ས་ཏེ བྷི་ཀྑཱུ ཨཱ་ར་བྦྷ ཀ་ཐེ་སི.

ཏེ ཀི་ར ས་ཏྠུ ས་ནྟི་ཀེ ཀ་མྨ་ཊྛཱ་ནཾ ག་ཧེ་ཏྭཱ ཨ་ར་ཉྙེ ས་མ་ཎ་དྷ་མྨཾ ཀ་རོ་ནྟཱ པཱ་ཏོ་ཝ པུ་པྥི་ཏཱ་ནི ཝ་སྶི་ཀ་པུ་པྥཱ་ནི སཱ་ཡཾ ཝ་ཎྚ་ཏོ མུ་ཙྩ་ནྟཱ་ནི དི་སྭཱ ‘‘པུ་པྥཱ་ནཾ ཝ་ཎྚེ་ཧི མུ་ཙྩ་ན་ཏོ མ་ཡཾ པ་ཋ་མ་ཏ་རཾ རཱ་གཱ་དཱི་ཧི མུ་ཙྩི་སྶཱ་མཱ’’ཏི ཝཱ་ཡ་མིཾ་སུ. ས་ཏྠཱ ཏེ བྷི་ཀྑཱུ ཨོ་ལོ་ཀེ་ཏྭཱ, ‘‘བྷི་ཀྑ་ཝེ, བྷི་ཀྑུ་ནཱ ནཱ་མ ཝ་ཎྚ་ཏོ མུ་ཙྩ་ན་པུ་པྥེ་ན ཝི་ཡ དུ་ཀྑ་ཏོ མུ་ཙྩི་ཏུཾ ཝཱ་ཡ་མི་ཏ་བྦ་མེ་ཝཱ’’ཏི ཝ་ཏྭཱ ག་ནྡྷ་ཀུ་ཊི་ཡཾ ནི་སི་ནྣོ་ཝ ཨཱ་ལོ་ཀཾ ཕ་རི་ཏྭཱ ཨི་མཾ གཱ་ཐ་མཱ་ཧ –

༣༧༧. ‘‘ཝ་སྶི་ཀཱ ཝི་ཡ པུ་པྥཱ་ནི, མ་དྡ་ཝཱ་ནི པ་མུ་ཉྩ་ཏི;

ཨེ་ཝཾ རཱ་ག་ཉྩ དོ་ས་ཉྩ, ཝི་པྤ་མུ་ཉྩེ་ཐ བྷི་ཀྑ་ཝོ’’ཏི.

ཏ་ཏྠ ཝ་སྶི་ཀཱཏི སུ་མ་ནཱ. མ་དྡ་ཝཱ་ནཱིཏི མི་ལཱ་ཏཱ་ནི. ཨི་དཾ ཝུ་ཏྟཾ ཧོ་ཏི – ཡ་ཐཱ ཝ་སྶི་ཀཱ ཧི་ཡྻོ པུ་པྥི་ཏ་པུ་པྥཱ་ནི པུ་ན་དི་ཝ་སེ པུ་རཱ་ཎ་བྷཱུ་ཏཱ་ནི མུ་ཉྩ་ཏི, ཝ་ཎྚ་ཏོ ཝི་སྶ་ཛྫེ་ཏི, ཨེ་ཝཾ ཏུ་མྷེ་པི རཱ་གཱ་ད་ཡོ དོ་སེ ཝི་པྤ་མུ་ཉྩེ་ཐཱ་ཏི.

དེ་ས་ནཱ་ཝ་སཱ་ནེ ས་བྦེ་པི ཏེ བྷི་ཀྑཱུ ཨ་ར་ཧ་ཏྟེ པ་ཏི་ཊྛ་ཧིཾ་སཱུ་ཏི.

པ་ཉྩ་ས་ཏ་བྷི་ཀྑུ་ཝ་ཏྠུ ཨ་ཊྛ་མཾ.