༤. པ་སེ་ན་དི་ཀོ་ས་ལ་ཝ་ཏྠུ
མི་དྡྷཱི ཡ་དཱ ཧོ་ཏཱིཏི ཨི་མཾ དྷ་མྨ་དེ་ས་ནཾ ས་ཏྠཱ ཛེ་ཏ་ཝ་ནེ ཝི་ཧ་ར་ནྟོ རཱ་ཛཱ་ནཾ པ་སེ་ན་དི་ཀོ་ས་ལཾ ཨཱ་ར་བྦྷ ཀ་ཐེ་སི.
ཨེ་ཀ་སྨི་ཉྷི ས་མ་ཡེ རཱ་ཛཱ ཏ་ཎྜུ་ལ་དོ་ཎ་སྶ ཨོ་ད་ནཾ ཏ་དུ་པི་ཡེ་ན སཱུ་པ་བྱ་ཉྫ་ནེ་ན བྷུ་ཉྫ་ཏི. སོ ཨེ་ཀ་དི་ཝ་སཾ བྷུ་ཏྟ་པཱ་ཏ་རཱ་སོ བྷ་ཏྟ་ས་མྨ་དཾ ཨ་ཝི་ནོ་དེ་ཏྭཱ་ཝ ས་ཏྠུ ས་ནྟི་ཀཾ ག་ནྟྭཱ ཀི་ལ་ནྟ་རཱུ་པོ ཨི་ཏོ ཙི་ཏོ ཙ ས་མྤ་རི་ཝ་ཏྟ་ཏི, ནི་དྡཱ་ཡ ཨ་བྷི་བྷུ་ཡྻ་མཱ་ནོ་པི ཨུ་ཛུ་ཀཾ ནི་པ་ཛྫི་ཏུཾ ཨ་ས་ཀྐོ་ནྟོ ཨེ་ཀ་མ་ནྟཾ ནི་སཱི་དི. ཨ་ཐ ནཾ ས་ཏྠཱ ཨཱ་ཧ – ‘‘ཀིཾ, མ་ཧཱ་རཱ་ཛ, ཨ་ཝི་སྶ་མི་ཏྭཱ་ཝ ཨཱ་ག་ཏོ་སཱི’’ཏི? ‘‘ཨཱ་མ, བྷ་ནྟེ, བྷུ་ཏྟ་ཀཱ་ལ་ཏོ པ་ཊྛཱ་ཡ མེ མ་ཧཱ་དུ་ཀྑཾ ཧོ་ཏཱི’’ཏི. ཨ་ཐ ནཾ ས་ཏྠཱ, ‘‘མ་ཧཱ་རཱ་ཛ, ཨ་ཏི་བ་ཧུ་བྷོ་ཛ་ནཾ ཨེ་ཝཾ དུ་ཀྑཾ ཧོ་ཏཱི’’ཏི ཝ་ཏྭཱ ཨི་མཾ གཱ་ཐ་མཱ་ཧ –
༣༢༥. ‘‘མི་དྡྷཱི ཡ་དཱ ཧོ་ཏི མ་ཧ་གྒྷ་སོ ཙ,
ནི་དྡཱ་ཡི་ཏཱ ས་མྤ་རི་ཝ་ཏྟ་སཱ་ཡཱི;
མ་ཧཱ་ཝ་རཱ་ཧོ་ཝ ནི་ཝཱ་པ་པུ་ཊྛོ,
པུ་ན་པྤུ་ནཾ ག་བྦྷ་མུ་པེ་ཏི མ་ནྡོ’’ཏི.
ཏ་ཏྠ མི་དྡྷཱིཏི ཐི་ན་མི་དྡྷཱ་བྷི་བྷཱུ་ཏོ. མ་ཧ་གྒྷ་སོ ཙཱཏི མ་ཧཱ་བྷོ་ཛ་ནོ ཨཱ་ཧ་ར་ཧ་ཏྠ་ཀ་ཨ་ལཾ་སཱ་ཊ་ཀ་ཏ་ཏྲ་ཝ་ཊྚ་ཀ་ཀཱ་ཀ་མཱ་ས་ཀ་བྷུ་ཏྟ་ཝ་མི་ཏ་ཀཱ་ནཾ ཨ་ཉྙ་ཏ་རོ ཝི་ཡ. ནི་ཝཱ་པ་པུ་ཊྛོཏི ཀུ་ཎྜ་ཀཱ་དི་ནཱ སཱུ་ཀ་ར་བྷ་ཏྟེ་ན པུ་ཊྛོ. གྷ་ར་སཱུ་ཀ་རོ ཧི ད་ཧ་ར་ཀཱ་ལ་ཏོ པ་ཊྛཱ་ཡ པོ་སི་ཡ་མཱ་ནོ ཐཱུ་ལ་ས་རཱི་ར་ཀཱ་ལེ གེ་ཧཱ བ་ཧི ནི་ཀྑ་མི་ཏུཾ ཨ་ལ་བྷ་ནྟོ ཧེ་ཊྛཱ་མ་ཉྩཱ་དཱི་སུ ས་མྤ་རི་ཝ་ཏྟི་ཏྭཱ ཨ་སྶ་ས་ནྟོ པ་སྶ་ས་ནྟོ ས་ཡ་ཏེ་ཝ. ཨི་དཾ ཝུ་ཏྟཾ ཧོ་ཏི – ཡ་དཱ པུ་རི་སོ མི་དྡྷཱི ཙ ཧོ་ཏི མ་ཧ་གྒྷ་སོ ཙ, ནི་ཝཱ་པ་པུ་ཊྛོ མ་ཧཱ་ཝ་རཱ་ཧོ ཝི་ཡ ཙ ཨ་ཉྙེ་ན ཨི་རི་ཡཱ་པ་ཐེ་ན ཡཱ་པེ་ཏུཾ ཨ་ས་ཀྐོ་ནྟོ ནི་དྡཱ་ཡ་ན་སཱི་ལོ ས་མྤ་རི་ཝ་ཏྟ་སཱ་ཡཱི, ཏ་དཱ སོ ‘‘ཨ་ནི་ཙྩཾ དུ་ཀྑཾ ཨ་ན་ཏྟཱ’’ཏི ཏཱི་ཎི ལ་ཀྑ་ཎཱ་ནི མ་ན་སི་ཀཱ་ཏུཾ ན ས་ཀྐོ་ཏི. ཏེ་སཾ ཨ་མ་ན་སི་ཀཱ་རཱ མ་ནྡ་པ་ཉྙོ པུ་ན་པྤུ་ནཾ ག་བྦྷ་མུ་པེ་ཏི, ག་བྦྷ་ཝཱ་ས་ཏོ ན པ་རི་མུ་ཙྩ་ཏཱི་ཏི. དེ་ས་ནཱ་ཝ་སཱ་ནེ ས་ཏྠཱ ར་ཉྙོ ཨུ་པ་ཀཱ་ར་ཝ་སེ་ན –
‘‘མ་ནུ་ཛ་སྶ ས་དཱ ས་ཏཱི་མ་ཏོ, མ་ཏྟཾ ཛཱ་ན་ཏོ ལ་དྡྷ་བྷོ་ཛ་ནེ;
ཏ་ནུ་ཀ་སྶ བྷ་ཝ་ནྟི ཝེ་ད་ནཱ, ས་ཎི་ཀཾ ཛཱི་ར་ཏི ཨཱ་ཡུ པཱ་ལ་ཡ’’ནྟི. (སཾ. ནི. ༡.༡༢༤);
ཨི་མཾ གཱ་ཐཾ ཝ་ཏྭཱ ཨུ་ཏྟ་ར་མཱ་ཎ་ཝཾ ཨུ་གྒ་ཎྷཱ་པེ་ཏྭཱ ‘‘ཨི་མཾ གཱ་ཐཾ ར་ཉྙོ བྷོ་ཛ་ན་ཝེ་ལཱ་ཡ པ་ཝེ་དེ་ཡྻཱ་སི, ཨི་མི་ནཱ ཨུ་པཱ་ཡེ་ན བྷོ་ཛ་ནཾ པ་རི་ཧཱ་པེ་ཡྻཱ་སཱི’’ཏི ཨུ་པཱ་ཡཾ ཨཱ་ཙི་ཀྑི, སོ ཏ་ཐཱ ཨ་ཀཱ་སི. རཱ་ཛཱ ཨ་པ་རེ་ན ས་མ་ཡེ་ན ནཱ་ལི༹་ཀོ་ད་ན་པ་ར་མ་ཏཱ་ཡ ས་ཎྛི་ཏོ སུ་ས་ལླ་ཧུ་ཀ་ས་རཱི་རོ སུ་ཁ་པྤ་ཏྟོ ས་ཏྠ་རི ཨུ་པྤ་ནྣ་ཝི་སྶཱ་སོ ས་ཏྟཱ་ཧཾ ཨ་ས་དི་ས་དཱ་ནཾ པ་ཝ་ཏྟེ་སི. དཱ་ནཱ་ནུ་མོ་ད་ནཱ་ཡ མ་ཧཱ་ཛ་ནོ མ་ཧ་ནྟཾ ཝི་སེ་སཾ པཱ་པུ་ཎཱི་ཏི.
པ་སེ་ན་དི་ཀོ་ས་ལ་ཝ་ཏྠུ ཙ་ཏུ་ཏྠཾ.