༦. ཧ་ཏྠ་ཀ་ཝ་ཏྠུ

ན མུ་ཎྜ་ཀེ་ན ས་མ་ཎོཏི ཨི་མཾ དྷ་མྨ་དེ་ས་ནཾ ས་ཏྠཱ སཱ་ཝ་ཏྠི་ཡཾ ཝི་ཧ་ར་ནྟོ ཧ་ཏྠ་ཀཾ ཨཱ་ར་བྦྷ ཀ་ཐེ་སི.

སོ ཀི་ར ཝཱ་ད་ཀྑི་ཏྟོ ‘‘ཏུ་མྷེ ཨ་སུ་ཀ་ཝེ་ལཱ་ཡ ཨ་སུ་ཀ་ཊྛཱ་ནཾ ནཱ་མ ཨཱ་ག་ཙྪེ་ཡྻཱ་ཐ, ཝཱ་དཾ ཀ་རི་སྶཱ་མཱ’’ཏི ཝ་ཏྭཱ པུ་རེ་ཏ་ར་མེ་ཝ ཏ་ཏྠ ག་ནྟྭཱ ‘‘པ་སྶ་ཐ, ཏི་ཏྠི་ཡཱ མ་མ བྷ་ཡེ་ན ནཱ་ག་ཏཱ, ཨེ་སོ་ཝ པ་ན ནེ་སཾ པ་རཱ་ཛ་ཡོ’’ཏི་ཨཱ་དཱི་ནི ཝ་ཏྭཱ ཝཱ་ད་ཀྑི་ཏྟོ ཨ་ཉྙེ་ན་ཉྙཾ པ་ཊི་ཙ་ར་ནྟོ ཝི་ཙ་ར་ཏི. ས་ཏྠཱ ‘‘ཧ་ཏྠ་ཀོ ཀི་ར ཨེ་ཝཾ ཀ་རོ་ཏཱི’’ཏི སུ་ཏྭཱ ཏཾ པ་ཀྐོ་སཱ་པེ་ཏྭཱ ‘‘ས་ཙྩཾ ཀི་ར ཏྭཾ, ཧ་ཏྠ་ཀ, ཨེ་ཝཾ ཀ་རོ་སཱི’’ཏི པུ་ཙྪི་ཏྭཱ ‘‘ས་ཙྩ’’ནྟི ཝུ་ཏྟེ, ‘‘ཀ་སྨཱ ཨེ་ཝཾ ཀ་རོ་སི? ཨེ་ཝ་རཱུ་པ་ཉྷི མུ་སཱ་ཝཱ་དཾ ཀ་རོ་ནྟོ སཱི་ས་མུ་ཎྜ་ནཱ་དི་མ་ཏྟེ་ནེ་ཝ ས་མ་ཎོ ནཱ་མ ན ཧོ་ཏི. ཡོ པ་ན ཨ་ཎཱུ་ནི ཝཱ ཐཱུ་ལཱ་ནི ཝཱ པཱ་པཱ་ནི ས་མེ་ཏྭཱ ཋི་ཏོ, ཨ་ཡ་མེ་ཝ ས་མ་ཎོ’’ཏི ཝ་ཏྭཱ ཨི་མཱ གཱ་ཐཱ ཨ་བྷཱ་སི –

༢༦༤. ‘‘ན མུ་ཎྜ་ཀེ་ན ས་མ་ཎོ, ཨ་བྦ་ཏོ ཨ་ལི་ཀཾ བྷ་ཎཾ;

ཨི་ཙྪཱ་ལོ་བྷ་ས་མཱ་པ་ནྣོ, ས་མ་ཎོ ཀིཾ བྷ་ཝི་སྶ་ཏི.

༢༦༥. ‘‘ཡོ ཙ ས་མེ་ཏི པཱ་པཱ་ནི, ཨ་ཎུཾ ཐཱུ་ལཱ་ནི ས་བྦ་སོ;

ས་མི་ཏ་ཏྟཱ ཧི པཱ་པཱ་ནཾ, ས་མ་ཎོ་ཏི པ་ཝུ་ཙྩ་ཏཱི’’ཏི.

ཏ་ཏྠ མུ་ཎྜ་ཀེ་ནཱཏི སཱི་ས་མུ་ཎྜ་ན་མ་ཏྟེ་ན. ཨ་བྦ་ཏོཏི སཱི་ལ་ཝ་ཏེ་ན ཙ དྷུ་ཏ་ངྒ་ཝ་ཏེ་ན ཙ ཝི་ར་ཧི་ཏོ. ཨ་ལི་ཀཾ བྷ་ཎནྟི མུ་སཱ་ཝཱ་དཾ བྷ་ཎ་ནྟོ ཨ་ས་མྤ་ཏྟེ་སུ ཨཱ་ར་མྨ་ཎེ་སུ ཨི་ཙྪཱ་ཡ པ་ཏྟེ་སུ ཙ ལོ་བྷེ་ན ས་མ་ནྣཱ་ག་ཏོ ས་མ་ཎོ ནཱ་མ ཀིཾ བྷ་ཝི་སྶ་ཏི? ས་མེ་ཏཱིཏི ཡོ ཙ པ་རི་ཏྟཱ་ནི ཝཱ མ་ཧ་ནྟཱ་ནི ཝཱ པཱ་པཱ་ནི ཝཱུ་པ་ས་མེ་ཏི, སོ ཏེ་སཾ ས་མི་ཏ་ཏྟཱ ས་མ་ཎོ་ཏི པ་ཝུ་ཙྩ་ཏཱི་ཏི ཨ་ཏྠོ.

དེ་ས་ནཱ་ཝ་སཱ་ནེ བ་ཧཱུ སོ་ཏཱ་པ་ཏྟི་ཕ་ལཱ་དཱི་ནི པཱ་པུ་ཎིཾ་སཱུ་ཏི.

ཧ་ཏྠ་ཀ་ཝ་ཏྠུ ཚ་ཊྛཾ.