༨. བ་ཧུ་བྷ་ཎྜི་ཀ་བྷི་ཀྑུ་ཝ་ཏྠུ

ན ན་གྒ་ཙ་རི་ཡཱཏི ཨི་མཾ དྷ་མྨ་དེ་ས་ནཾ ས་ཏྠཱ ཛེ་ཏ་ཝ་ནེ ཝི་ཧ་ར་ནྟོ བ་ཧུ་བྷ་ཎྜི་ཀཾ བྷི་ཀྑུཾ ཨཱ་ར་བྦྷ ཀ་ཐེ་སི.

སཱ་ཝ་ཏྠི་ཝཱ་སཱི ཀི་རེ་ཀོ ཀུ་ཊུ་མྦི་ཀོ བྷ་རི་ཡཱ་ཡ ཀཱ་ལ་ཀ་ཏཱ་ཡ པ་བྦ་ཛི. སོ པ་བྦ་ཛ་ནྟོ ཨ་ཏྟ་ནོ པ་རི་ཝེ་ཎ་ཉྩ ཨ་གྒི་སཱ་ལ་ཉྩ བྷ་ཎྜ་ག་བྦྷ་ཉྩ ཀཱ་རེ་ཏྭཱ ས་བྦ་མྤི བྷ་ཎྜ་ག་བྦྷཾ ས་པྤི་མ་དྷུ་ཏེ་ལཱ་དཱི་ཧི པཱུ་རེ་ཏྭཱ པ་བྦ་ཛི, པ་བྦ་ཛི་ཏྭཱ ཙ པ་ན ཨ་ཏྟ་ནོ དཱ་སེ པ་ཀྐོ་སཱ་པེ་ཏྭཱ ཡ་ཐཱ་རུ་ཙི་ཀཾ ཨཱ་ཧཱ་རཾ པ་ཙཱ་པེ་ཏྭཱ བྷུ་ཉྫ་ཏི. བ་ཧུ་བྷ་ཎྜོ ཙ བ་ཧུ་པ་རི་ཀྑཱ་རོ ཙ ཨ་ཧོ་སི. ར་ཏྟིཾ ཨ་ཉྙཾ ནི་ཝཱ་ས་ན་པཱ་རུ་པ་ནཾ ཧོ་ཏི, དི་ཝཱ ཨ་ཉྙཾ ནི་ཝཱ་ས་ན་པཱ་རུ་པ་ནཾ ཧོ་ཏི, དི་ཝཱ ཨ་ཉྙཾ ཝི་ཧཱ་ར་པ་ཙྩ་ནྟེ ཝ་ས་ཏི. ཏ་སྶེ་ཀ་དི་ཝ་སཾ ཙཱི་ཝ་ར་པ་ཙྩ་ཏྠ་ར་ཎཱ་ནི སུ་ཀྑཱ་པེ་ནྟ་སྶ སེ་ནཱ་ས་ན་ཙཱ་རི་ཀཾ ཨཱ་ཧི་ཎྜ་ནྟཱ བྷི་ཀྑཱུ པ་སྶི་ཏྭཱ ‘‘ཀ་སྶི་མཱ་ནི, ཨཱ་ཝུ་སོ’’ཏི པུ་ཙྪི་ཏྭཱ ‘‘མ་ཡ྄ཧ’’ནྟི ཝུ་ཏྟེ, ‘‘ཨཱ་ཝུ་སོ, བྷ་ག་ཝ་ཏཱ ཏི་ཙཱི་ཝ་རཱ་ནི ཨ་ནུ་ཉྙཱ་ཏཱ་ནི, ཏྭ་ཉྩ པ་ན ཨེ་ཝཾ ཨ་པྤི་ཙྪ་སྶ བུ་དྡྷ་སྶ སཱ་ས་ནེ པ་བྦ་ཛི་ཏྭཱ ཨེ་ཝཾ བ་ཧུ་པ་རི་ཀྑཱ་རོ ཛཱ་ཏོ’’ཏི ཏཾ ས་ཏྠུ ས་ནྟི་ཀཾ ནེ་ཏྭཱ, ‘‘བྷ་ནྟེ, ཨ་ཡཾ བྷི་ཀྑུ ཨ་ཏི་བ་ཧུ་བྷ་ཎྜོ’’ཏི ཨཱ་རོ་ཙེ་སུཾ. ས་ཏྠཱ ‘‘ས་ཙྩཾ ཀི་ར ཏཾ བྷི་ཀྑཱུ’’ཏི པུ་ཙྪི་ཏྭཱ ‘‘ས་ཙྩཾ, བྷ་ནྟེ’’ཏི ཝུ་ཏྟེ ཨཱ་ཧ – ‘‘ཀ་སྨཱ པ་ན ཏྭཾ, བྷི་ཀྑུ, མ་ཡཱ ཨ་པྤི་ཙྪ་ཏཱ་ཡ དྷ་མྨེ དེ་སི་ཏེ ཨེ་ཝཾ བ་ཧུ་བྷ་ཎྜོ ཛཱ་ཏོ’’ཏི. སོ ཏཱ་ཝ་ཏྟ་ཀེ་ནེ་ཝ ཀུ་པི་ཏོ ‘‘ཨི་མི་ནཱ དཱ་ནི ནཱི་ཧཱ་རེ་ན ཙ་རི་སྶཱ་མཱི’’ཏི པཱ་རུ་པ་ནཾ ཚ་ཌྜེ་ཏྭཱ པ་རི་ས་མ་ཛ྄ཛྷེ ཨེ་ཀ་ཙཱི་ཝ་རོ ཨ་ཊྛཱ་སི. ཨ་ཐ ནཾ ས་ཏྠཱ ཨུ་པ་ཏྠ་མྦྷ་ཡ་མཱ་ནོ ན་ནུ ཏྭཾ བྷི་ཀྑུ པུ་བྦེ ཧི་རོ་ཏྟ་པྤ་ག་ཝེ་ས་ཀོ ད་ཀ་ར་ཀྑ་ས་ཀཱ་ལེ་པི ཧི་རོ་ཏྟ་པྤཾ ག་ཝེ་ས་མཱ་ནོ དྭཱ་ད་ས ཝ་སྶཱ་ནི ཝི་ཧཱ་སི, ཀ་སྨཱ ཨི་དཱ་ནི ཨེ་ཝཾ ག་རུ་ཀེ བུ་དྡྷ་སཱ་ས་ནེ པ་བྦ་ཛི་ཏྭཱ ཙ་ཏུ་པ་རི་ས་མ་ཛ྄ཛྷེ པཱ་རུ་པ་ནཾ ཚ་ཌྜེ་ཏྭཱ ཧི་རོ་ཏྟ་པྤཾ པ་ཧཱ་ཡ ཋི་ཏོ་སཱི་ཏི. སོ ས་ཏྠུ ཝ་ཙ་ནཾ སུ་ཏྭཱ ཧི་རོ་ཏྟ་པྤཾ པ་ཙྩུ་པ་ཊྛཱ་པེ་ཏྭཱ ཏཾ ཙཱི་ཝ་རཾ པཱ་རུ་པི་ཏྭཱ ས་ཏྠཱ་རཾ ཝ་ནྡི་ཏྭཱ ཨེ་ཀ་མ་ནྟཾ ནི་སཱི་དི. བྷི་ཀྑཱུ ཏ་སྶ ཨ་ཏྠ་སྶ ཨཱ་ཝི་བྷཱ་ཝ་ཏྠཾ བྷ་ག་ཝ་ནྟཾ ཡཱ་ཙིཾ་སུ. བྷ་ག་ཝཱ ཨ་ཏཱི་ཏཾ ཨཱ་ཧ་རི་ཏྭཱ ཀ་ཐེ་སི –

ཨ་ཏཱི་ཏེ ཀི་ར བཱ་རཱ་ཎ་སི་ར་ཉྙོ ཨ་གྒ་མ་ཧེ་སི་ཡཱ ཀུ་ཙྪི་སྨིཾ བོ་དྷི་ས་ཏྟོ པ་ཊི་ས་ནྡྷིཾ ག་ཎྷི. ཏ་སྶ ནཱ་མ་གྒ་ཧ་ཎ་དི་ཝ་སེ མ་ཧིཾ་ས་ཀུ་མཱ་རོཏི ནཱ་མཾ ཀ་རིཾ་སུ. ཏ་སྶ ཀ་ནི་ཊྛ་བྷཱ་ཏཱ ཙ་ནྡ་ཀུ་མཱ་རོ ནཱ་མ ཨ་ཧོ་སི. ཏེ་སཾ མཱ་ཏ་རི ཀཱ་ལ་ཀ་ཏཱ་ཡ རཱ་ཛཱ ཨ་ཉྙཾ ཨ་གྒ་མ་ཧེ་སི་ཊྛཱ་ནེ ཋ་པེ་སི. སཱ་པི པུ་ཏྟཾ ཝི་ཛཱ་ཡི, སཱུ་རི་ཡ་ཀུ་མཱ་རོཏི་སྶ ནཱ་མཾ ཀ་རིཾ་སུ. ཏཾ དི་སྭཱ རཱ་ཛཱ ཏུ་ཊྛོ ‘‘པུ་ཏྟ་སྶ ཏེ ཝ་རཾ ད་མྨཱི’’ཏི ཨཱ་ཧ. སཱ་པི ཁོ, ‘‘དེ་ཝ, ཨི་ཙྪི་ཏ་ཀཱ་ལེ ག་ཎྷི་སྶཱ་མཱི’’ཏི ཝ་ཏྭཱ པུ་ཏྟ་སྶ ཝ་ཡ་པྤ་ཏྟ་ཀཱ་ལེ རཱ་ཛཱ་ནཾ ཨཱ་ཧ – ‘‘དེ་ཝེ་ན མ་ཡ྄ཧཾ པུ་ཏྟ་སྶ ཛཱ་ཏ་ཀཱ་ལེ ཝ་རོ དི་ནྣོ, ཨི་དཱ་ནི མེ པུ་ཏྟ་སྶ ར་ཛྫཾ དེ་ཧཱི’’ཏི. རཱ་ཛཱ ‘‘མ་མ དྭེ པུ་ཏྟཱ ཨ་གྒི་ཀྑ་ནྡྷཱ ཝི་ཡ ཛ་ལ་ནྟཱ ཝི་ཙ་ར་ནྟི, ན ས་ཀྐཱ ཏ་སྶ ར་ཛྫཾ དཱ་ཏུ’’ནྟི པ་ཊི་ཀྑི་པི་ཏྭཱ་པི ཏཾ པུ་ན་པྤུ་ནཾ ཡཱ་ཙ་མཱ་ན་མེ་ཝ དི་སྭཱ ‘‘ཨ་ཡཾ མེ པུ་ཏྟཱ་ནཾ ཨ་ན་ཏྠ་མྤི ཀ་རེ་ཡྻཱ’’ཏི པུ་ཏྟེ པ་ཀྐོ་སཱ་པེ་ཏྭཱ, ‘‘ཏཱ་ཏཱ, ཨ་ཧཾ སཱུ་རི་ཡ་ཀུ་མཱ་ར་སྶ ཛཱ་ཏ་ཀཱ་ལེ ཝ་རཾ ཨ་དཱ་སིཾ, ཨི་དཱ་ནི་སྶ མཱ་ཏཱ ར་ཛྫཾ ཡཱ་ཙ་ཏི, ཨ་ཧཾ ཏ་སྶ ན དཱ་ཏུ་ཀཱ་མོ, ཏ་སྶ མཱ་ཏཱ ཏུ་མྷཱ་ཀཾ ཨ་ན་ཏྠ་མྤི ཀ་རེ་ཡྻ, ག་ཙྪ་ཐ ཏུ་མྷེ, ཨ་ར་ཉྙེ ཝ་སི་ཏྭཱ མ་མ་ཙྩ་ཡེ་ནཱ་ག་ནྟྭཱ ར་ཛྫཾ ག་ཎྷ་ཐཱ’’ཏི ཨུ་ཡྻོ་ཛེ་སི. ཏེ པི་ཏ་རཾ ཝ་ནྡི་ཏྭཱ པཱ་སཱ་དཱ ཨོ་ཏ་ར་ནྟེ རཱ་ཛ་ངྒ་ཎེ ཀཱི་ལ༹་མཱ་ནོ སཱུ་རི་ཡ་ཀུ་མཱ་རོ དི་སྭཱ ཏཾ ཀཱ་ར་ཎཾ ཉ་ཏྭཱ ཏེ་ཧི ས་དྡྷིཾ ནི་ཀྑ་མི. ཏེ་སཾ ཧི་མ་ཝ་ནྟཾ པ་ཝི་ཊྛ་ཀཱ་ལེ བོ་དྷི་ས་ཏྟོ མ་གྒཱ ཨོ་ཀྐ་མྨ ཨ་ཉྙ་ཏ་ར་སྨིཾ རུ་ཀྑ་མཱུ་ལེ ནི་སཱི་དི་ཏྭཱ སཱུ་རི་ཡ་ཀུ་མཱ་རཾ ཨཱ་ཧ – ‘‘ཏཱ་ཏ, ཨེ་ཏཾ ས་རཾ ག་ནྟྭཱ ནྷ་ཏྭཱ ཙ པི་ཝི་ཏྭཱ ཙ ཨ་མྷཱ་ཀ་མྤི པ་དུ་མི་ནི་པ་ཎྞེ་ཧི ཨུ་ད་ཀཾ ཨཱ་ཧ་རཱ’’ཏི. སོ པ་ན ས་རོ ཝེ་སྶ་ཝ་ཎྞ་སྶ ས་ནྟི་ཀཱ ཨེ་ཀེ་ན ད་ཀ་ར་ཀྑ་སེ་ན ལ་དྡྷོ ཧོ་ཏི. ཝེ་སྶ་ཝ་ཎྞོ ཙ ཏཾ ཨཱ་ཧ – ‘‘ཋ་པེ་ཏྭཱ དེ་ཝ་དྷ་མྨ་ཛཱ་ན་ན་ཀེ ཡེ ཙ ཨ་ཉྙེ ཨི་མཾ ས་རཾ ཨོ་ཏ་ར་ནྟི, ཏེ ཁཱ་དི་ཏུཾ ལ་བྷ་སཱི’’ཏི. ཏ་ཏོ པ་ཊྛཱ་ཡ སོ ཏཾ ས་རཾ ཨོ་ཏི་ཎྞོ་ཏི་ཎྞེ དེ་ཝ་དྷ་མྨེ པུ་ཙྪི་ཏྭཱ ཨ་ཛཱ་ན་ནྟེ ཁཱ་ད་ཏི, སཱུ་རི་ཡ་ཀུ་མཱ་རོ་པི ཏཾ ས་རཾ ཨ་ཝཱི་མཾ་སི་ཏྭཱ་ཝ ཨོ་ཏ་རི, ཏེ་ན ཙ ‘‘དེ་ཝ་དྷ་མྨེ ཛཱ་ནཱ་སཱི’’ཏི པུ་ཙྪི་ཏོ ‘‘དེ་ཝ་དྷ་མྨཱ ནཱ་མ ཙ་ནྡི་མ་སཱུ་རི་ཡཱ’’ཏི ཨཱ་ཧ. ཨ་ཐ ནཾ ‘‘ཏྭཾ དེ་ཝ་དྷ་མྨེ ན ཛཱ་ནཱ་སཱི’’ཏི ཨུ་ད་ཀཾ པ་ཝེ་སེ་ཏྭཱ ཨ་ཏྟ་ནོ བྷ་ཝ་ནེ ཋ་པེ་སི. བོ་དྷི་ས་ཏྟོ་པི ཏཾ ཙི་རཱ་ཡ་ནྟཾ དི་སྭཱ ཙ་ནྡ་ཀུ་མཱ་རཾ པེ་སེ་སི. སོ་པི ཏེ་ན ‘‘དེ་ཝ་དྷ་མྨེ ཛཱ་ནཱ་སཱི’’ཏི པུ་ཙྪི་ཏོ ‘‘དེ་ཝ་དྷ་མྨཱ ནཱ་མ ཙ་ཏ་སྶོ དི་སཱ’’ཏི ཨཱ་ཧ. ད་ཀ་ར་ཀྑ་སོ ཏ་མྤི ཨུ་ད་ཀཾ པ་ཝེ་སེ་ཏྭཱ ཏ་ཏྠེ་ཝ ཋ་པེ་སི.

བོ་དྷི་ས་ཏྟོ ཏ་སྨི་མྤི ཙི་རཱ་ཡ་ནྟེ ‘‘ཨ་ནྟ་རཱ་ཡེ་ན བྷ་ཝི་ཏ་བྦ’’ནྟི ས་ཡཾ ག་ནྟྭཱ དྭི་ནྣ་མྤི ཨོ་ཏ་ར་ཎ་པ་དཾ་ཡེ་ཝ དི་སྭཱ ‘‘ཨ་ཡཾ ས་རོ ར་ཀྑ་ས་པ་རི་གྒ་ཧི་ཏོ’’ཏི ཉ་ཏྭཱ ཁ་གྒཾ ས་ནྣ་ཡ྄ཧི་ཏྭཱ དྷ་ནུཾ ག་ཧེ་ཏྭཱ ཨ་ཊྛཱ་སི. ར་ཀྑ་སོ ཏཾ ཨ་ནོ་ཏ་ར་ནྟཾ དི་སྭཱ ཝ་ན་ཀ་མྨི་ཀ་པུ་རི་ས་ཝེ་སེ་ནཱ་ག་ནྟྭཱ ཨཱ་ཧ – ‘‘བྷོ པུ་རི་ས, ཏྭཾ མ་གྒ་ཀི་ལ་ནྟོ, ཀ་སྨཱ ཨི་མཾ ས་རཾ ཨོ་ཏ་རི་ཏྭཱ ནྷ་ཏྭཱ ཙ པི་ཝི་ཏྭཱ ཙ བྷི་ས་མུ་ལཱ་ལཾ ཁཱ་དི་ཏྭཱ པུ་པྥཱ་ནི པི་ལ་ནྡྷི་ཏྭཱ ན ག་ཙྪ་སཱི’’ཏི. བོ་དྷི་ས་ཏྟོ ཏཾ དི་སྭཱ་ཝ ‘‘ཨེ་ས སོ ཡ་ཀྑོ’’ཏི ཉ་ཏྭཱ ‘‘ཏ་ཡཱ མེ བྷཱ་ཏ་རོ ག་ཧི་ཏཱ’’ཏི ཨཱ་ཧ. ཨཱ་མ, མ་ཡཱ ག་ཧི་ཏཱ་ཏི. ཀིཾ ཀཱ་ར་ཎཱ་ཏི? ཨ་ཧཾ ཨི་མཾ ས་རཾ ཨོ་ཏི་ཎྞོ་ཏི་ཎྞེ ལ་བྷཱ་མཱི་ཏི. ཀིཾ པ་ན ས་བྦེ་ཝ ལ་བྷ་སཱི་ཏི? དེ་ཝ་དྷ་མྨ་ཛཱ་ན་ན་ཀེ ཋ་པེ་ཏྭཱ ཨ་ཝ་སེ་སེ ལ་བྷཱ་མཱི་ཏི. ཨ་ཏྠི པ་ན ཏེ དེ་ཝ་དྷ་མྨེ་ཧི ཨ་ཏྠོ་ཏི? ཨཱ་མ, ཨ་ཏྠཱི་ཏི. ཨ་ཧཾ ཀ་ཐེ་སྶཱ་མཱི་ཏི. ཏེ་ན ཧི ཀ་ཐེ་ཧཱི་ཏི. ན ས་ཀྐཱ ཀི་ལི་ཊྛེ་ན ག་ཏྟེ་ན ཀ་ཐེ་ཏུ་ནྟི. ཡ་ཀྑོ བོ་དྷི་ས་ཏྟཾ ནྷཱ་པེ་ཏྭཱ པཱ་ནཱི་ཡཾ པཱ་ཡེ་ཏྭཱ ཨ་ལ་ངྐ་རི་ཏྭཱ ཨ་ལ་ངྐ་ཏ་མ་ཎྜ་པ་མ་ཛ྄ཛྷེ པ་ལླ་ངྐཾ ཨཱ་རོ་པེ་ཏྭཱ ས་ཡ་མ་སྶ པཱ་ད་མཱུ་ལེ ནི་སཱི་དི. ཨ་ཐ ནཾ བོ་དྷི་ས་ཏྟོ ‘‘ས་ཀྐ་ཙྩཾ སུ་ཎཱ་ཧཱི’’ཏི ཝ་ཏྭཱ ཨི་མཾ གཱ་ཐ་མཱ་ཧ –

‘‘ཧི་རི་ཨོ་ཏྟ་པྤ་ས་མྤ་ནྣཱ, སུ་ཀྐ་དྷ་མྨ་ས་མཱ་ཧི་ཏཱ;

ས་ནྟོ ས་པྤུ་རི་སཱ ལོ་ཀེ, དེ་ཝ་དྷ་མྨཱཏི ཝུ་ཙྩ་རེ’’ཏི. (ཛཱ. ༡.༡.༦);

ཡ་ཀྑོ ཨི་མཾ དྷ་མྨ་དེ་ས་ནཾ སུ་ཏྭཱ པ་ས་ནྣོ བོ་དྷི་ས་ཏྟཾ ཨཱ་ཧ – ‘‘པ་ཎྜི་ཏ, ཨ་ཧཾ ཏེ པ་ས་ནྣོ, ཨེ་ཀཾ བྷཱ་ཏ་རཾ ད་མྨི, ཀ་ཏ་རཾ ཨཱ་ནེ་མཱི’’ཏི? ‘‘ཀ་ནི་ཊྛཾ ཨཱ་ནེ་ཧཱི’’ཏི. པ་ཎྜི་ཏ, ཏྭཾ ཀེ་ཝ་ལཾ དེ་ཝ་དྷ་མྨེ ཛཱ་ནཱ་སི་ཡེ་ཝ, ན པ་ན ཏེ་སུ ཝ་ཏྟ་སཱི་ཏི. ཀིཾ ཀཱ་ར་ཎཱ་ཏི? ཡ་སྨཱ ཛེ་ཊྛཾ ཋ་པེ་ཏྭཱ ཀ་ནི་ཊྛཾ ཨཱ་ཧ་རཱ་པེ་ནྟོ ཛེ་ཊྛཱ་པ་ཙཱ་ཡི་ཀ་ཀ་མྨཾ ན ཀ་རོ་སཱི་ཏི, དེ་ཝ་དྷ་མྨེ ཙཱ་ཧཾ ཡ་ཀྑ ཛཱ་ནཱ་མི, ཏེ་སུ ཙ ཝ་ཏྟཱ་མི. མ་ཡ་ཉྷི ཨེ་ཏཾ ནི་སྶཱ་ཡ ཨི་མཾ ཨ་ར་ཉྙཾ པ་ཝི་ཊྛཱ. ཨེ་ཏ་སྶ ཧི ཨ་ཏྠཱ་ཡ ཨ་མྷཱ་ཀཾ པི་ཏ་རཾ ཨེ་ཏ་སྶ མཱ་ཏཱ ར་ཛྫཾ ཡཱ་ཙི, ཨ་མྷཱ་ཀཾ པ་ན པི་ཏཱ ཏཾ ཝ་རཾ ཨ་ད་ཏྭཱ ཨ་མྷཱ་ཀཾ ཨ་ནུ་ར་ཀྑ་ཎ་ཏྠཱ་ཡ ཨ་ར་ཉྙེ ཝཱ་སཾ ཨ་ནུ་ཛཱ་ནི, སོ ཀུ་མཱ་རོ ཨ་ནི་ཝ་ཏྟི་ཏྭཱ ཨ་མྷེ་ཧི ས་དྡྷིཾ ཨཱ་ག་ཏོ. ‘‘ཏཾ ཨ་ར་ཉྙེ ཨེ་ཀོ ཡ་ཀྑོ ཁཱ་དཱི’’ཏི ཝུ་ཏྟེ་པི ན ཀོ་ཙི ས་དྡ་ཧི་སྶ་ཏི. ཏེ་ནཱ་ཧཾ ག་ར་ཧ་བྷ་ཡ་བྷཱི་ཏོ ཏ་མེ་ཝཱ་ཧ་རཱ་པེ་མཱི་ཏི. ཡ་ཀྑོ བོ་དྷི་ས་ཏྟ་སྶ པ་སཱི་དི་ཏྭཱ ‘‘སཱ་དྷུ པ་ཎྜི་ཏ, ཏྭ་མེ་ཝ དེ་ཝ་དྷ་མྨེ ཛཱ་ནཱ་སི, དེ་ཝ་དྷ་མྨེ་སུ ཙ ཝ་ཏྟ་སཱི’’ཏི དྭེ བྷཱ་ཏ་རོ ཨཱ་ནེ་ཏྭཱ ཨ་དཱ་སི. ཨ་ཐ ནཾ བོ་དྷི་ས་ཏྟོ ཡ་ཀྑ་བྷཱ་ཝེ ཨཱ་དཱི་ན་ཝཾ ཀ་ཐེ་ཏྭཱ པ་ཉྩ་སུ སཱི་ལེ་སུ པ་ཏི་ཊྛཱ་པེ་སི. སོ ཏེ་ན སུ་སཾ་ཝི་ཧི་ཏཱ་ར་ཀྑོ ཏ་སྨིཾ ཨ་ར་ཉྙེ ཝ་སི་ཏྭཱ པི་ཏ་རི ཀཱ་ལ་ཀ་ཏེ ཡ་ཀྑཾ ཨཱ་དཱ་ཡ བཱ་རཱ་ཎ་སིཾ ག་ནྟྭཱ ར་ཛྫཾ ག་ཧེ་ཏྭཱ ཙ་ནྡ་ཀུ་མཱ་ར་སྶ ཨུ་པ་ར་ཛྫཾ, སཱུ་རི་ཡ་ཀུ་མཱ་ར་སྶ སེ་ནཱ་པ་ཏི་ཊྛཱ་ནཾ ད་ཏྭཱ ཡ་ཀྑ་སྶ ར་མ་ཎཱི་ཡེ ཋཱ་ནེ ཨཱ་ཡ་ཏ་ནཾ ཀཱ་རཱ་པེ་ཏྭཱ ཡ་ཐཱ སོ ལཱ་བྷ་གྒ་པྤ་ཏྟོ ཧོ་ཏི, ཏ་ཐཱ ཨ་ཀཱ་སི.

ས་ཏྠཱ ཨི་མཾ དྷ་མྨ་དེ་ས་ནཾ ཨཱ་ཧ་རི་ཏྭཱ ཛཱ་ཏ་ཀཾ ས་མོ་དྷཱ་ནེ་སི ‘‘ཏ་དཱ ར་ཀྑ་སོ བ་ཧུ་བྷ་ཎྜི་ཀ་བྷི་ཀྑུ ཨ་ཧོ་སི, སཱུ་རི་ཡ་ཀུ་མཱ་རོ ཨཱ་ན་ནྡོ, ཙ་ནྡ་ཀུ་མཱ་རོ སཱ་རི་པུ་ཏྟོ, མ་ཧིཾ་ས་ཀུ་མཱ་རོ པ་ན ཨ་ཧ་མེ་ཝཱ’’ཏི. ཨེ་ཝཾ ས་ཏྠཱ ཛཱ་ཏ་ཀཾ ཀ་ཐེ་ཏྭཱ ‘‘ཨེ་ཝཾ ཏྭཾ, བྷི་ཀྑུ, པུ་བྦེ དེ་ཝ་དྷ་མྨེ ག་ཝེ་ས་མཱ་ནོ ཧི་རི་ཨོ་ཏྟ་པྤ་ས་མྤ་ནྣོ ཝི་ཙ་རི་ཏྭཱ ཨི་དཱ་ནི ཙ་ཏུ་པ་རི་ས་མ་ཛ྄ཛྷེ ཨི་མི་ནཱ ནཱི་ཧཱ་རེ་ན ཋ་ཏྭཱ མ་མ པུ་ར་ཏོ ‘ཨ་པྤི་ཙྪོ་མྷཱི’ཏི ཝ་ད་ནྟོ ཨ་ཡུ་ཏྟཾ ཨ་ཀཱ་སི. ན ཧི སཱ་ཊ་ཀ་པ་ཊི་ཀྑེ་པཱ་དི་མ་ཏྟེ་ན ས་མ་ཎོ ནཱ་མ ཧོ་ཏཱི’’ཏི ཝ་ཏྭཱ ཨ་ནུ་ས་ནྡྷིཾ གྷ་ཊེ་ཏྭཱ དྷ་མྨཾ དེ་སེ་ནྟོ ཨི་མཾ གཱ་ཐ་མཱ་ཧ –

༡༤༡. ‘‘ན ན་གྒ་ཙ་རི་ཡཱ ན ཛ་ཊཱ ན པ་ངྐཱ, ནཱ་ནཱ་ས་ཀཱ ཐ་ཎྜི་ལ་སཱ་ཡི་ཀཱ ཝཱ;

ར་ཛོ་ཛ་ལླཾ ཨུ་ཀྐུ་ཊི་ཀ་པྤ་དྷཱ་ནཾ, སོ་དྷེ་ནྟི མ་ཙྩཾ ཨ་ཝི་ཏི་ཎྞ་ཀ་ངྑ’’ནྟི.

ཏ་ཏྠ ནཱ་ནཱ་ས་ཀཱཏི ན ཨ་ན་ས་ཀཱ, བྷ་ཏྟ་པ་ཊི་ཀྑེ་པ་ཀཱ་ཏི ཨ་ཏྠོ. ཐ་ཎྜི་ལ་སཱ་ཡི་ཀཱཏི བྷཱུ་མི་ས་ཡ་ནཱ. ར་ཛོ་ཛ་ལླནྟི ཀ་དྡ་མ་ལེ་པ་ནཱ་ཀཱ་རེ་ན ས་རཱི་རེ ས་ནྣི་ཧི་ཏ་ར་ཛོ. ཨུ་ཀྐུ་ཊི་ཀ་པྤ་དྷཱ་ནནྟི ཨུ་ཀྐུ་ཊི་ཀ་བྷཱ་ཝེ་ན ཨཱ་ར་དྡྷ་ཝཱི་རི་ཡཾ. ཨི་དཾ ཝུ་ཏྟཾ ཧོ་ཏི – ཡོ ཧི མ་ཙྩོ ‘‘ཨེ་ཝཾ ཨ་ཧཾ ལོ་ཀ་ནི་སྶ་ར་ཎ་ས་ངྑཱ་ཏཾ སུ་དྡྷིཾ པཱ་པུ་ཎི་སྶཱ་མཱི’’ཏི ཨི་མེ་སུ ན་གྒ་ཙ་རི་ཡཱ་དཱི་སུ ཡཾ ཀི་ཉྩི ས་མཱ་དཱ་ཡ ཝ་ཏྟེ་ཡྻ, སོ ཀེ་ཝ་ལཾ མི་ཙྪཱ་ད་སྶ་ན་ཉྩེ་ཝ ཝ་ཌྜྷེ་ཡྻ, ཀི་ལ་མ་ཐ་སྶ ཙ བྷཱ་གཱི ཨ་སྶ. ན ཧི ཨེ་ཏཱ་ནི སུ་ས་མཱ་དི་ནྣཱ་ནི་པི ཨ་ཊྛ་ཝ་ཏྠུ་ཀཱ་ཡ ཀ་ངྑཱ་ཡ ཨ་ཝི་ཏི་ཎྞ་བྷཱ་ཝེ་ན ཨ་ཝི་ཏི་ཎྞ་ཀ་ངྑཾ མ་ཙྩཾ སོ་དྷེ་ནྟཱིཏི.

དེ་ས་ནཱ་ཝ་སཱ་ནེ བ་ཧཱུ སོ་ཏཱ་པ་ཏྟི་ཕ་ལཱ་དཱི་ནི པཱ་པུ་ཎིཾ་སཱུ་ཏི.

བ་ཧུ་བྷ་ཎྜི་ཀ་བྷི་ཀྑུ་ཝ་ཏྠུ ཨ་ཊྛ་མཾ.