༥. པ་ཎྜི་ཏ་སཱ་མ་ཎེ་ར་ཝ་ཏྠུ
ཨུ་ད་ཀ་ཉྷི ན་ཡ་ནྟཱིཏི ཨི་མཾ དྷ་མྨ་དེ་ས་ནཾ ས་ཏྠཱ ཛེ་ཏ་ཝ་ནེ ཝི་ཧ་ར་ནྟོ པ་ཎྜི་ཏ་སཱ་མ་ཎེ་རཾ ཨཱ་ར་བྦྷ ཀ་ཐེ་སི.
ཨ་ཏཱི་ཏེ ཀི་ར ཀ་སྶ་པ་ས་མྨཱ་ས་མྦུ་དྡྷོ ཝཱི་ས་ཏི་ཁཱི་ཎཱ་ས་ཝ་ས་ཧ་སྶ་པ་རི་ཝཱ་རོ བཱ་རཱ་ཎ་སིཾ ཨ་ག་མཱ་སི. མ་ནུ་སྶཱ ཨ་ཏྟ་ནོ བ་ལཾ ས་ལླ་ཀྑེ་ཏྭཱ ཨ་ཊྛ་པི ད་ས་པི ཨེ་ཀ་ཏོ ཧུ་ཏྭཱ ཨ་ག་ནྟུ་ཀ་དཱ་ནཱ་དཱི་ནི ཨ་དཾ་སུ. ཨ་ཐེ་ཀ་དི་ཝ་སཾ ས་ཏྠཱ བྷ་ཏྟ་ཀི་ཙྩ་པ་རི་ཡོ་སཱ་ནེ ཨེ་ཝཾ ཨ་ནུ་མོ་ད་ན་མ་ཀཱ་སི –
‘‘ཨུ་པཱ་ས་ཀཱ ཨི་དྷ ཨེ་ཀ་ཙྩོ ‘ཨ་ཏྟ་ནོ ས་ནྟ་ཀ་མེ་ཝ དཱ་ཏུཾ ཝ་ཊྚ་ཏི, ཀིཾ པ་རེ་ན ས་མཱ་ད་པི་ཏེ་ནཱ’ཏི ཨ་ཏྟ་ནཱ་ཝ དཱ་ནཾ དེ་ཏི, པ་རཾ ན ས་མཱ་ད་པེ་ཏི. སོ ནི་བྦ་ཏྟ་ནི་བྦ་ཏྟ་ཊྛཱ་ནེ བྷོ་ག་ས་མྤ་དཾ ལ་བྷ་ཏི, ནོ པ་རི་ཝཱ་ར་ས་མྤ་དཾ. ཨེ་ཀ་ཙྩོ པ་རཾ ས་མཱ་ད་པེ་ཏི, ཨ་ཏྟ་ནཱ ན དེ་ཏི. སོ ནི་བྦ་ཏྟ་ནི་བྦ་ཏྟ་ཊྛཱ་ནེ པ་རི་ཝཱ་ར་ས་མྤ་དཾ ལ་བྷ་ཏི, ནོ བྷོ་ག་ས་མྤ་དཾ ཨེ་ཀ་ཙྩོ ཨ་ཏྟ་ནཱ་པི ན དེ་ཏི, པ་ར་མྤི ན ས་མཱ་ད་པེ་ཏི. སོ ནི་བྦ་ཏྟ་ནི་བྦ་ཏྟ་ཊྛཱ་ནེ ནེ་ཝ བྷོ་ག་ས་མྤ་དཾ ལ་བྷ་ཏི, ན པ་རི་ཝཱ་ར་ས་མྤ་དཾ, ཝི་གྷཱ་སཱ་དོ་ཝ ཧུ་ཏྭཱ ཛཱི་ཝ་ཏི. ཨེ་ཀ་ཙྩོ ཨ་ཏྟ་ནཱ ཙ དེ་ཏི, པ་ར་ཉྩ ས་མཱ་ད་པེ་ཏི. སོ ནི་བྦ་ཏྟ་ནི་བྦ་ཏྟ་ཊྛཱ་ནེ བྷོ་ག་ས་མྤ་ད་མྤི ལ་བྷ་ཏི པ་རི་ཝཱ་ར་ས་མྤ་ད་མྤཱི’’ཏི.
ཏཾ སུ་ཏྭཱ ས་མཱི་པེ ཋི་ཏོ ཨེ་ཀོ པ་ཎྜི་ཏ་པུ་རི་སོ ཙི་ནྟེ་སི – ‘‘ཨ་ཧཾ དཱ་ནི ཏ་ཐཱ ཀ་རི་སྶཱ་མི, ཡ་ཐཱ མེ དྭེ་པི ས་མྤ་ཏྟི་ཡོ བྷ་ཝི་སྶ་ནྟཱི’’ཏི. སོ ས་ཏྠཱ་རཾ ཝ་ནྡི་ཏྭཱ ཨཱ་ཧ – ‘‘བྷ་ནྟེ, སྭཱ་ཏ་ནཱ་ཡ མ་ཡ྄ཧཾ བྷི་ཀྑཾ ག་ཎྷ་ཐཱ’’ཏི. ‘‘ཀི་ཏྟ་ཀེ་ཧི ཏེ བྷི་ཀྑཱུ་ཧི ཨ་ཏྠོ’’ཏི? ‘‘ཀི་ཏྟ་ཀོ པ་ན ཝོ, བྷ་ནྟེ, པ་རི་ཝཱ་རོ’’ཏི? ‘‘ཝཱི་ས་ཏི བྷི་ཀྑུ་ས་ཧ་སྶཱ་ནཱི’’ཏི. ‘‘བྷ་ནྟེ, ས་བྦེ་ཧི ས་དྡྷིཾ སྭཱ་ཏ་ནཱ་ཡ མ་ཡ྄ཧཾ བྷི་ཀྑཾ ག་ཎྷ་ཐཱ’’ཏི. ས་ཏྠཱ ཨ་དྷི་ཝཱ་སེ་སི. སོ གཱ་མཾ པ་ཝི་སི་ཏྭཱ, ‘‘ཨ་མྨ་ཏཱ་ཏཱ, སྭཱ་ཏ་ནཱ་ཡ མ་ཡཱ བུ་དྡྷ་པྤ་མུ་ཁོ བྷི་ཀྑུ་ས་ངྒྷོ ནི་མ་ནྟི་ཏོ, ཏུ་མྷེ ཡ་ཏྟ་ཀཱ་ནཾ བྷི་ཀྑཱུ་ནཾ དཱ་ཏུཾ ས་ཀྑི་སྶ་ཐ, ཏ་ཏྟ་ཀཱ་ནཾ དཱ་ནཾ དེ་ཐཱ’’ཏི ཨཱ་རོ་ཙེ་ཏྭཱ ཝི་ཙ་ར་ནྟོ ཨ་ཏྟ་ནོ ཨ་ཏྟ་ནོ བ་ལཾ ས་ལླ་ཀྑེ་ཏྭཱ ‘‘མ་ཡཾ ད་ས་ནྣཾ ད་སྶཱ་མ, མ་ཡཾ ཝཱི་ས་ཏི་ཡཱ, མ་ཡཾ ས་ཏ་སྶ, མ་ཡཾ པ་ཉྩ་ས་ཏཱ་ན’’ནྟི ཝུ་ཏྟེ ས་བྦེ་སཾ ཝ་ཙ་ནཾ ཨཱ་དི་ཏོ པ་ཊྛཱ་ཡ པ་ཎྞེ ཨཱ་རོ་པེ་སི.
ཏེ་ན ཙ ས་མ་ཡེ་ན ཏ་སྨིཾ ན་ག་རེ ཨ་ཏི་དུ་གྒ་ཏ་བྷཱ་ཝེ་ནེ་ཝ ‘‘མ་ཧཱ་དུ་གྒ་ཏོ’’ཏི པ་ཉྙཱ་ཏོ ཨེ་ཀོ པུ་རི་སོ ཨ་ཏྠི. སོ ཏ་མྤི ས་མྨུ་ཁཱ་ག་ཏཾ དི་སྭཱ, ས་མྨ མ་ཧཱ་དུ་གྒ་ཏ, མ་ཡཱ སྭཱ་ཏ་ནཱ་ཡ བུ་དྡྷ་པྤ་མུ་ཁོ བྷི་ཀྑུ་ས་ངྒྷོ ནི་མ་ནྟི་ཏོ, སྭེ ན་ག་ར་ཝཱ་སི་ནོ དཱ་ནཾ ད་སྶ་ནྟི, ‘‘ཏྭཾ ཀ་ཏི བྷི་ཀྑཱུ བྷོ་ཛེ་སྶ་སཱི’’ཏི? ‘‘སཱ་མི, མ་ཡ྄ཧཾ ཀིཾ བྷི་ཀྑཱུ་ཧི, བྷི་ཀྑཱུ་ཧི ནཱ་མ ས་དྷ་ནཱ་ནཾ ཨ་ཏྠོ, མ་ཡ྄ཧཾ པ་ན སྭེ ཡཱ་གུ་ཨ་ཏྠཱ་ཡ ཏ་ཎྜུ་ལ་ནཱ་ལི༹་མ་ཏྟ་མྤི ན་ཏྠི, ཨ་ཧཾ བྷ་ཏིཾ ཀ་ཏྭཱ ཛཱི་ཝཱ་མི, ཀིཾ མེ བྷི་ཀྑཱུ་ཧཱི’’ཏི? ས་མཱ་ད་པ་ཀེ་ན ནཱ་མ བྱ་ཏྟེ་ན བྷ་ཝི་ཏ་བྦཾ. ཏ་སྨཱ སོ ཏེ་ན ‘‘ན་ཏྠཱི’’ཏི ཝུ་ཏྟེ་པི ཏུ་ཎྷཱི་བྷཱུ་ཏོ ཨ་ཧུ་ཏྭཱ ཨེ་ཝ་མཱ་ཧ – ‘‘ས་མྨ མ་ཧཱ་དུ་གྒ་ཏ, ཨི་མ་སྨིཾ ན་ག་རེ སུ་བྷོ་ཛ་ནཾ བྷུ་ཉྫི་ཏྭཱ སུ་ཁུ་མ་ཝ་ཏྠཾ ནི་ཝཱ་སེ་ཏྭཱ ནཱ་ནཱ་བྷ་ར་ཎ་པ་ཊི་མ་ཎྜི་ཏཱ སི་རི་ས་ཡ་ནེ ས་ཡ་མཱ་ནཱ བ་ཧཱུ ཛ་ནཱ ས་མྤ་ཏྟིཾ ཨ་ནུ་བྷ་ཝ་ནྟི, ཏྭཾ པ་ན དི་ཝ་སཾ བྷ་ཏིཾ ཀ་ཏྭཱ ཀུ་ཙྪི་པཱུ་ར་ཎ་མ་ཏྟ་མྤི ན ལ་བྷ་སི, ཨེ་ཝཾ ས་ནྟེ་པི ‘ཨ་ཧཾ པུ་བྦེ པུ་ཉྙཾ ཨ་ཀ་ཏ་ཏྟཱ ཀི་ཉྩི ན ལ་བྷཱ་མཱི’ཏི ན ཛཱ་ནཱ་སཱི’’ཏི? ‘‘ཛཱ་ནཱ་མི, སཱ་མཱི’’ཏི. ‘‘ཨ་ཐ ཀ་སྨཱ ཨི་དཱ་ནི པུ་ཉྙཾ ན ཀ་རོ་སི, ཏྭཾ ཡུ་ཝཱ བ་ལ་ས་མྤ་ནྣོ, ཀིཾ ཏ་ཡཱ བྷ་ཏིཾ ཀ་ཏྭཱ་པི ཡ་ཐཱ་བ་ལཾ དཱ་ནཾ དཱ་ཏུཾ ན ཝ་ཊྚ་ཏཱི’’ཏི? སོ ཏ་སྨིཾ ཀ་ཐེ་ནྟེ་ཡེ་ཝ སཾ་ཝེ་ག་པྤ་ཏྟོ ཧུ་ཏྭཱ ‘‘མ་ཡ྄ཧ་མྤི ཨེ་ཀཾ བྷི་ཀྑུཾ པ་ཎྞེ ཨཱ་རོ་པེ་ཧི, ཀི་ཉྩི་དེ་ཝ བྷ་ཏིཾ ཀ་ཏྭཱ ཨེ་ཀ་སྶ བྷི་ཀྑཾ ད་སྶཱ་མཱི’’ཏི ཨཱ་ཧ. ཨི་ཏ་རོ ‘‘ཀིཾ ཨེ་ཀེ་ན བྷི་ཀྑུ་ནཱ པ་ཎྞེ ཨཱ་རོ་པི་ཏེ་ནཱ’’ཏི ན ཨཱ་རོ་པེ་སི? མ་ཧཱ་དུ་གྒ་ཏོ་པི གེ་ཧཾ ག་ནྟྭཱ བྷ་རི་ཡཾ ཨཱ་ཧ – ‘‘བྷ་དྡེ, ན་ག་ར་ཝཱ་སི་ནོ སྭེ ས་ངྒྷ་བྷ་ཏྟཾ ཀ་རི་སྶ་ནྟི, ཨ་ཧ་མྤི ས་མཱ་ད་པ་ཀེ་ན ‘ཨེ་ཀ་སྶ བྷི་ཀྑཾ དེ་ཧཱི’ཏི ཝུ་ཏྟོ, མ་ཡ་མྤི སྭེ ཨེ་ཀ་སྶ བྷི་ཀྑཾ ད་སྶཱ་མཱ’’ཏི. ཨ་ཐ་སྶ བྷ་རི་ཡཱ ‘‘མ་ཡཾ ད་ལི་དྡཱ, ཀ་སྨཱ ཏ་ཡཱ ས་མྤ་ཊི་ཙྪི་ཏ’’ནྟི ཨ་ཝ་ཏྭཱ་ཝ, ‘‘སཱ་མི, བྷ་དྡ་ཀཾ ཏེ ཀ་ཏཾ, མ་ཡཾ པུ་བྦེ་པི ཀི་ཉྩི ཨ་ད་ཏྭཱ ཨི་དཱ་ནི དུ་གྒ་ཏཱ ཛཱ་ཏཱ, མ་ཡཾ ཨུ་བྷོ་པི བྷ་ཏིཾ ཀ་ཏྭཱ ཨེ་ཀ་སྶ བྷི་ཀྑཾ ད་སྶཱ་མ, སཱ་མཱི’’ཏི ཝ་ཏྭཱ ཨུ་བྷོ་པི གེ་ཧཱ ནི་ཀྑ་མི་ཏྭཱ བྷ་ཏི་ཊྛཱ་ནཾ ཨ་ག་མཾ་སུ.
མ་ཧཱ་སེ་ཊྛི ཏཾ དི་སྭཱ ‘‘ཀིཾ, ས་མྨ མ་ཧཱ་དུ་གྒ་ཏ, བྷ་ཏིཾ ཀ་རི་སྶ་སཱི’’ཏི པུ་ཙྪི. ‘‘ཨཱ་མ, ཨ་ཡྻཱ’’ཏི. ‘‘ཀིཾ ཀ་རི་སྶ་སཱི’’ཏི? ‘‘ཡཾ ཏུ་མྷེ ཀཱ་རེ་སྶ་ཐ, ཏཾ ཀ་རི་སྶཱ་མཱི’’ཏི. ‘‘ཏེ་ན ཧི མ་ཡཾ སྭེ དྭེ ཏཱི་ཎི བྷི་ཀྑུ་ས་ཏཱ་ནི བྷོ་ཛེ་སྶཱ་མ, ཨེ་ཧི, དཱ་རཱུ་ནི ཕཱ་ལེ་ཧཱི’’ཏི ཝཱ་སི་ཕ་ར་སུཾ ནཱི་ཧ་རི་ཏྭཱ དཱ་པེ་སི. མ་ཧཱ་དུ་གྒ་ཏོ ད་ལ༹ྷཾ ཀ་ཙྪཾ བ་ནྡྷི་ཏྭཱ མ་ཧུ་སྶཱ་ཧ་པྤ་ཏྟོ ཝཱ་སིཾ པ་ཧཱ་ཡ ཕ་ར་སུཾ ག་ཎྷ་ནྟོ, ཕ་ར་སུཾ པ་ཧཱ་ཡ ཝཱ་སིཾ ག་ཎྷ་ནྟོ དཱ་རཱུ་ནི ཕཱ་ལེ་ཏི. ཨ་ཐ ནཾ སེ་ཊྛི ཨཱ་ཧ – ‘‘ས་མྨ, ཏྭཾ ཨ་ཛྫ ཨ་ཏི་ཝི་ཡ ཨུ་སྶཱ་ཧ་པྤ་ཏྟོ ཀ་མྨཾ ཀ་རོ་སི, ཀིཾ ནུ ཁོ ཀཱ་ར་ཎ’’ནྟི? ‘‘སཱ་མི, ཨ་ཧཾ སྭེ ཨེ་ཀཾ བྷི་ཀྑུཾ བྷོ་ཛེ་སྶཱ་མཱི’’ཏི. ཏཾ སུ་ཏྭཱ སེ་ཊྛི པ་ས་ནྣ་མཱ་ན་སོ ཙི་ནྟེ་སི – ‘‘ཨ་ཧོ ཨི་མི་ནཱ དུ་ཀྐ་རཾ ཀ་ཏཾ, ‘ཨ་ཧཾ དུ་གྒ་ཏོ’ཏི ཏུ་ཎྷཱི་བྷཱ་ཝཾ ཨ་ནཱ་པ་ཛྫི་ཏྭཱ ‘བྷ་ཏིཾ ཀ་ཏྭཱ ཨེ་ཀཾ བྷི་ཀྑུཾ བྷོ་ཛེ་སྶཱ་མཱི’ཏི ཝ་ད་ཏཱི’’ཏི. སེ་ཊྛི་བྷ་རི་ཡཱ་པི ཏ་སྶ བྷ་རི་ཡཾ དི་སྭཱ, ‘‘ཨ་མྨ, ཀིཾ ཀ་མྨཾ ཀ་རི་སྶ་སཱི’’ཏི པུ་ཙྪི་ཏྭཱ ‘‘ཡཾ ཏུ་མྷེ ཀཱ་རེ་སྶ་ཐ, ཏཾ ཀ་རོ་མཱི’’ཏི ཝུ་ཏྟེ ཨུ་དུ་ཀྑ་ལ་སཱ་ལཾ པ་ཝེ་སེ་ཏྭཱ སུ་པྤ་མུ་ས་ལཱ་དཱི་ནི དཱ་པེ་སི. སཱ ན་ཙྩ་ནྟཱི ཝི་ཡ ཏུ་ཊྛ་པ་ཧ་ཊྛཱ ཝཱི་ཧིཾ ཀོ་ཊྚེ་ཏི ཙེ་ཝ ཨོ་ཕུ་ཎཱ་ཏི ཙ. ཨ་ཐ ནཾ སེ་ཊྛི་བྷ་རི་ཡཱ པུ་ཙྪི – ‘‘ཨ་མྨ, ཏྭཾ ཨ་ཏི་ཝི་ཡ ཏུ་ཊྛ་པ་ཧ་ཊྛཱ ཀ་མྨཾ ཀ་རོ་སི, ཀིཾ ནུ ཁོ ཀཱ་ར་ཎ’’ནྟི? ‘‘ཨ་ཡྻེ, ཨི་མཾ བྷ་ཏིཾ ཀ་ཏྭཱ མ་ཡ་མྤི ཨེ་ཀཾ བྷི་ཀྑུཾ བྷོ་ཛེ་སྶཱ་མཱ’’ཏི. ཏཾ སུ་ཏྭཱ སེ་ཊྛི་བྷ་རི་ཡཱ་པི ཏ་སྶཾ ‘‘ཨ་ཧོ ཝ་ཏཱ་ཡཾ དུ་ཀྐ་ར་ཀཱ་རི་ཀཱ’’ཏི པ་སཱི་དི. སེ་ཊྛི མ་ཧཱ་དུ་གྒ་ཏ་སྶ དཱ་རཱུ་ནཾ ཕཱ་ལི་ཏ་ཀཱ་ལེ ‘‘ཨ་ཡཾ ཏེ བྷ་ཏཱི’’ཏི སཱ་ལཱི་ནཾ ཙ་ཏ་སྶོ ནཱ་ལི༹་ཡོ དཱ་པེ་ཏྭཱ ‘‘ཨ་ཡཾ ཏེ ཏུ་ཊྛི་དཱ་ཡོ’’ཏི ཨ་པ་རཱ་པི ཙ་ཏ་སྶོ ནཱ་ལི༹་ཡོ དཱ་པེ་སི.
སོ གེ་ཧཾ ག་ནྟྭཱ བྷ་རི་ཡཾ ཨཱ་ཧ – ‘‘མ་ཡཱ བྷ་ཏིཾ ཀ་ཏྭཱ སཱ་ལི ལ་དྡྷོ, ཨ་ཡཾ ནི་ཝཱ་པོ བྷ་ཝི་སྶ་ཏི, ཏ་ཡཱ ལ་དྡྷཱ་ཡ བྷ་ཏི་ཡཱ ད་དྷི་ཏེ་ལ་ཀ་ཊུ་ཀ་བྷ་ཎྜཱ་ནི ག་ཎྷཱ་ཧཱི’’ཏི. སེ་ཊྛི་བྷ་རི་ཡཱ་པི པུ་ན ཏ་སྶཱ ཨེ་ཀཾ ས་པྤི་ཀ་རོ་ཊི་ཀ་ཉྩེ་ཝ ད་དྷི་བྷཱ་ཛ་ན་ཉྩ ཀ་ཊུ་ཀ་བྷ་ཎྜ་ཉྩ སུ་དྡྷ་ཏ་ཎྜུ་ལི༹་ནཱ་ལི༹་ཉྩ དཱ་པེ་སི. ཨི་ཏི ཙ ཨུ་བྷི་ནྣ་མྤི ན་ཝ ཏ་ཎྜུ་ལ་ནཱ་ལི༹་ཡོ ཨ་ཧེ་སུཾ. ཏེ ‘‘དེ་ཡྻ་དྷ་མྨོ ནོ ལ་དྡྷོ’’ཏི ཏུ་ཊྛ་ཧ་ཊྛཱ པཱ་ཏོ་ཝ ཨུ་ཊྛ་ཧིཾ་སུ. བྷ་རི་ཡཱ མ་ཧཱ་དུ་གྒ་ཏཾ ཨཱ་ཧ – ‘‘ག་ཙྪ, སཱ་མི, པ་ཎྞཾ པ་རི་ཡེ་སི་ཏྭཱ ཨཱ་ཧ་རཱ’’ཏི. སོ ཨ་ནྟ་རཱ་པ་ཎེ པ་ཎྞཾ ཨ་དི་སྭཱ ན་དཱི་ཏཱི་རཾ ག་ནྟྭཱ ‘‘ཨ་ཛྫ ཨ་ཡྻཱ་ནཾ བྷོ་ཛ་ནཾ དཱ་ཏུཾ ལ་བྷི་སྶཱ་མཱི’’ཏི པ་ཧ་ཊྛ་མཱ་ན་སོ གཱ་ཡ་ནྟོ པ་ཎྞཾ ཨུ་ཙྩི་ན་ཏི. མ་ཧཱ་ཛཱ་ལཾ ཁི་པི་ཏྭཱ ཋི་ཏོ ཀེ་ཝ་ཊྚོ ‘‘མ་ཧཱ་དུ་གྒ་ཏ་སྶ ས་དྡེ་ན བྷ་ཝི་ཏ་བྦ’’ནྟི ཏཾ པ་ཀྐོ་སི་ཏྭཱ པུ་ཙྪི – ‘‘ཨ་ཏི་ཝི་ཡ ཏུ་ཊྛ་ཙི་ཏྟོ གཱ་ཡ་སི, ཀིཾ ནུ ཁོ ཀཱ་ར་ཎ’’ནྟི? ‘‘པ་ཎྞཾ ཨུ་ཙྩི་ནཱ་མི, ས་མྨཱ’’ཏི. ‘‘ཀིཾ ཀ་རི་སྶ་སཱི’’ཏི? ‘‘ཨེ་ཀཾ བྷི་ཀྑུཾ བྷོ་ཛེ་སྶཱ་མཱི’’ཏི. ‘‘ཨ་ཧོ སུ་ཁི་ཏོ, བྷི་ཀྑུ, སོ ཏ་ཝ ཀིཾ པ་ཎྞཾ ཁཱ་དི་སྶ་ཏཱི’’ཏི? ‘‘ཀིཾ ཀ་རོ་མི, ས་མྨ, ཨ་ཏྟ་ནཱ ལ་དྡྷ་པ་ཎྞེ་ན བྷོ་ཛེ་སྶཱ་མཱི’’ཏི? ‘‘ཏེ་ན ཧི ཨེ་ཧཱི’’ཏི. ‘‘ཀིཾ ཀ་རོ་མི, ས་མྨཱ’’ཏི? ‘‘ཨི་མེ མ་ཙྪེ ག་ཧེ་ཏྭཱ པཱ་ད་གྒྷ་ན་ཀཱ་ནི ཨ་ཌྜྷ་གྒྷ་ན་ཀཱ་ནི ཀ་ཧཱ་པ་ཎ་གྒྷ་ན་ཀཱ་ནི ཙ ཨུ་དྡཱ་ནཱ་ནི ཀ་རོ་ཧཱི’’ཏི. སོ ཏ་ཐཱ ཨ་ཀཱ་སི. བ་དྡྷ་བ་དྡྷེ མ་ཙྪེ ན་ག་ར་ཝཱ་སི་ནོ ནི་མ་ནྟི་ཏ་ནི་མ་ནྟི་ཏཱ་ནཾ བྷི་ཀྑཱུ་ནཾ ཨ་ཏྠཱ་ཡ ཧ་རིཾ་སུ. ཏ་སྶ མ་ཙྪུ་དྡཱ་ནཱ་ནི ཀ་རོ་ནྟ་སྶེ་ཝ བྷི་ཀྑཱ་ཙཱ་ར་ཝེ་ལཱ པཱ་པུ་ཎི. སོ ཝེ་ལཾ ས་ལླ་ཀྑེ་ཏྭཱ ‘‘ག་མི་སྶཱ་མ་ཧཾ, ས་མྨ, ཨ་ཡཾ བྷི་ཀྑཱུ་ནཾ ཨཱ་ག་མ་ན་ཝེ་ལཱ’’ཏི ཨཱ་ཧ. ‘‘ཨ་ཏྠི པ་ན ཀི་ཉྩི མ་ཙྪུ་དྡཱ་ན’’ནྟི? ‘‘ན་ཏྠི, ས་མྨ, ས་བྦཱ་ནི ཁཱི་ཎཱ་ནཱི’’ཏི. ‘‘ཏེ་ན ཧི མ་ཡཱ ཨ་ཏྟ་ནོ ཨ་ཏྠཱ་ཡ ཝཱ་ལུ་ཀཱ་ཡ ནི་ཁ་ཎི་ཏྭཱ ཙ་ཏྟཱ་རོ རོ་ཧི་ཏ་མ་ཙྪཱ ཋ་པི་ཏཱ, ས་ཙེ བྷི་ཀྑུཾ བྷོ་ཛེ་ཏུ་ཀཱ་མོ་སི, ཨི་མེ ག་ཧེ་ཏྭཱ ག་ཙྪཱ’’ཏི ཏེ མ་ཙྪེ ཏ་སྶ ཨ་དཱ་སི.
ཏཾ དི་ཝ་སཾ པ་ན ས་ཏྠཱ པ་ཙྩཱུ་ས་ཀཱ་ལེ ལོ་ཀཾ ཝོ་ལོ་ཀེ་ནྟོ མ་ཧཱ་དུ་གྒ་ཏཾ ཨ་ཏྟ་ནོ ཉཱ་ཎ་ཛཱ་ལ་སྶ ཨ་ནྟོ པ་ཝི་ཊྛཾ དི་སྭཱ ‘‘ཀིཾ ནུ ཁོ བྷ་ཝི་སྶ་ཏཱི’’ཏི ཨཱ་ཝ་ཛྫེ་ནྟོ ‘‘མ་ཧཱ་དུ་གྒ་ཏོ ‘ཨེ་ཀཾ བྷི་ཀྑུཾ བྷོ་ཛེ་སྶཱ་མཱི’ཏི བྷ་རི་ཡཱ་ཡ ས་དྡྷིཾ ཧི་ཡྻོ བྷ་ཏིཾ ཨ་ཀཱ་སི, ཀ་ཏ་རཾ ནུ ཁོ བྷི་ཀྑུཾ ལ་བྷི་སྶ་ཏཱི’’ཏི ཙི་ནྟེ་ཏྭཱ ‘‘མ་ནུ་སྶཱ པ་ཎྞེ ཨཱ་རོ་པི་ཏ་ས་ཉྙཱ་ཡ བྷི་ཀྑཱུ ག་ཧེ་ཏྭཱ ཨ་ཏྟ་ནོ ཨ་ཏྟ་ནོ གེ་ཧེ་སུ ནི་སཱི་དཱ་པེ་སྶ་ནྟི, མ་ཧཱ་དུ་གྒ་ཏོ མཾ ཋ་པེ་ཏྭཱ ཨ་ཉྙཾ བྷི་ཀྑུཾ ན ལ་བྷི་སྶ་ཏཱི’’ཏི ཨུ་པ་དྷཱ་རེ་སི. བུ་དྡྷཱ ཀི་ར དུ་གྒ་ཏེ་སུ ཨ་ནུ་ཀ་མྤཾ ཀ་རོ་ནྟི. ཏ་སྨཱ ས་ཏྠཱ པཱ་ཏོ་ཝ ས་རཱི་ར་པ་ཊི་ཛ་གྒ་ནཾ ཀ་ཏྭཱ ‘‘མ་ཧཱ་དུ་གྒ་ཏཾ ས་ངྒ་ཎྷི་སྶཱ་མཱི’’ཏི ག་ནྡྷ་ཀུ་ཊིཾ པ་ཝི་སི་ཏྭཱ ནི་སཱི་དི. མ་ཧཱ་དུ་གྒ་ཏེ་པི མ་ཙྪེ ག་ཧེ་ཏྭཱ གེ་ཧཾ པ་ཝི་ས་ནྟེ ས་ཀྐ་སྶ པ་ཎྜུ་ཀ་མྦ་ལ་སི་ལཱ་ས་ནཾ ཨུ་ཎྷཱ་ཀཱ་རཾ ད་སྶེ་སི. སོ ‘‘ཀིཾ ནུ ཁོ ཀཱ་ར་ཎ’’ནྟི ཨོ་ལོ་ཀེ་ནྟོ ‘‘ཧི་ཡྻོ, མ་ཧཱ་དུ་གྒ་ཏོ ‘ཨེ་ཀ་སྶ བྷི་ཀྑུ་ནོ བྷི་ཀྑཾ ད་སྶཱ་མཱི’ཏི ཨ་ཏྟ་ནོ བྷ་རི་ཡཱ་ཡ ས་དྡྷིཾ བྷ་ཏིཾ ཨ་ཀཱ་སི, ཀ་ཏ་རཾ ནུ ཁོ བྷི་ཀྑུཾ ལ་བྷི་སྶ་ཏཱི’’ཏི ཙི་ནྟེ་ཏྭཱ ‘‘ན་ཏྠེ་ཏ་སྶ ཨ་ཉྙོ བྷི་ཀྑུ, ས་ཏྠཱ པ་ན མ་ཧཱ་དུ་གྒ་ཏ་སྶ ས་ངྒ་ཧཾ ཀ་རི་སྶཱ་མཱི’’ཏི ག་ནྡྷ་ཀུ་ཊི་ཡཾ ནི་སི་ནྣོ. མ་ཧཱ་དུ་གྒ་ཏོ ཨ་ཏྟ་ནོ ཨུ་པ་ཀ་པྤ་ན་ཀཾ ཡཱ་གུ་བྷ་ཏྟཾ པ་ཎྞ་སཱུ་པེ་ཡྻ་མྤི ཏ་ཐཱ་ག་ཏ་སྶ ད་དེ་ཡྻ, ‘‘ཡཾ་ནཱུ་ནཱ་ཧཾ མ་ཧཱ་དུ་གྒ་ཏ་སྶ གེ་ཧཾ ག་ནྟྭཱ བྷ་ཏྟ་ཀཱ་ར་ཀ་ཀ་མྨཾ ཀ་རེ་ཡྻ’’ནྟི ཨ་ཉྙཱ་ཏ་ཀ་ཝེ་སེ་ན ཏ་སྶ གེ་ཧ་ས་མཱི་པཾ ག་ནྟྭཱ ‘‘ཨ་ཏྠི ནུ ཁོ ཀ་སྶ་ཙི ཀི་ཉྩི བྷ་ཏི་ཡཱ ཀཱ་ཏ་བྦ’’ནྟི པུ་ཙྪི. མ་ཧཱ་དུ་གྒ་ཏོ ཏཾ དི་སྭཱ ཨཱ་ཧ – ‘‘ས་མྨ, ཀིཾ ཀ་མྨཾ ཀ་རི་སྶ་སཱི’’ཏི? ‘‘ཨ་ཧཾ, སཱ་མི, ས་བྦ་སི་པྤི་ཀོ, མ་ཡ྄ཧཾ ཨ་ཛཱ་ན་ན་སི་པྤཾ ནཱ་མ ན་ཏྠི, ཡཱ་གུ་བྷ་ཏྟཱ་དཱི་ནི་པི ས་མྤཱ་དེ་ཏུཾ ཛཱ་ནཱ་མཱི’’ཏི. ‘‘ས་མྨ, མ་ཡཾ ཏ་ཝ ཀ་མྨེ་ན ཨ་ཏྠི་ཀཱ, ཏུ་ཡ྄ཧཾ པ་ན ཀི་ཉྩི དཱ་ཏ་བྦཾ བྷ་ཏིཾ ན པ་སྶཱ་མཱ’’ཏི. ‘‘ཀིཾ པ་ན ཏེ ཀ་ཏྟ་བྦ’’ནྟི? ‘‘ཨེ་ཀ་སྶ བྷི་ཀྑུ་སྶ བྷི་ཀྑཾ དཱ་ཏུ་ཀཱ་མོ་མྷི, ཏ་སྶ ཡཱ་གུ་བྷ་ཏྟ་སཾ་ཝི་དྷཱ་ནཾ ཨི་ཙྪཱ་མཱི’’ཏི. ‘‘ས་ཙེ བྷི་ཀྑུ་སྶ བྷི་ཀྑཾ ད་སྶ་སི, ན མེ བྷ་ཏི་ཡཱ ཨ་ཏྠོ, ཀིཾ མ་མ པུ་ཉྙཾ ན ཝ་ཊྚ་ཏཱི’’ཏི? ‘‘ཨེ་ཝཾ ས་ནྟེ སཱ་དྷུ, ས་མྨ, པ་ཝི་སཱ’’ཏི. སོ ཏ་སྶ གེ་ཧཾ པ་ཝི་སི་ཏྭཱ ཏེ་ལ་ཏ་ཎྜུ་ལཱ་དཱི་ནི ཨཱ་ཧ་རཱ་པེ་ཏྭཱ ‘‘ག་ཙྪ, ཨ་ཏྟ་ནོ པ་ཏྟ་བྷི་ཀྑུཾ ཨཱ་ནེ་ཧཱི’’ཏི ཏཾ ཨུ་ཡྻོ་ཛེ་སི. དཱ་ན་ཝེ་ཡྻཱ་ཝ་ཊི་ཀོ་པི པ་ཎྞེ ཨཱ་རོ་པི་ཏ་ནི་ཡཱ་མེ་ནེ་ཝ ཏེ་སཾ ཏེ་སཾ གེ་ཧཱ་ནི བྷི་ཀྑཱུ པ་ཧི་ཎི.
མ་ཧཱ་དུ་གྒ་ཏོ ཏ་སྶ ས་ནྟི་ཀཾ ག་ནྟྭཱ ‘‘མ་ཡ྄ཧཾ པ་ཏྟ་བྷི་ཀྑུཾ དེ་ཧཱི’’ཏི ཨཱ་ཧ. སོ ཏ་སྨིཾ ཁ་ཎེ ས་ཏིཾ ལ་བྷི་ཏྭཱ ‘‘ཨ་ཧཾ ཏ་ཝ བྷི་ཀྑུཾ པ་མུ་ཊྛོ’’ཏི ཨཱ་ཧ. མ་ཧཱ་དུ་གྒ་ཏོ ཏི་ཁི་ཎཱ་ཡ ས་ཏྟི་ཡཱ ཀུ་ཙྪི་ཡཾ པ་ཧ་ཊོ ཝི་ཡ, ‘‘སཱ་མི, ཀ་སྨཱ མཾ ནཱ་སེ་སི, ཨ་ཧཾ ཏ་ཡཱ ཧི་ཡྻོ ས་མཱ་ད་པི་ཏོ བྷ་རི་ཡཱ་ཡ ས་དྡྷིཾ དི་ཝ་སཾ བྷ་ཏིཾ ཀ་ཏྭཱ ཨ་ཛྫ པཱ་ཏོ་ཝ པ་ཎྞ་ཏྠཱ་ཡ ན་དཱི་ཏཱི་རེ ཨཱ་ཧི་ཎྜི་ཏྭཱ ཨཱ་ག་ཏོ, དེ་ཧི མེ ཨེ་ཀཾ བྷི་ཀྑུ’’ནྟི བཱ་ཧཱ པ་གྒ་ཡ྄ཧ པ་རི་དེ་ཝི. མ་ནུ་སྶཱ ས་ནྣི་པ་ཏི་ཏྭཱ ‘‘ཀི་མེ་ཏཾ, མ་ཧཱ་དུ་གྒ་ཏཱ’’ཏི པུ་ཙྪིཾ་སུ. སོ ཏ་མ་ཏྠཾ ཨཱ་རོ་ཙེ་སི. ཏེ ཝེ་ཡྻཱ་ཝ་ཊི་ཀཾ པུ་ཙྪིཾ་སུ – ‘‘ས་ཙྩཾ ཀི་ར, ས་མྨ, ཏ་ཡཱ ཨེ་ས ‘བྷ་ཏིཾ ཀ་ཏྭཱ ཨེ་ཀ་སྶ བྷི་ཀྑུ་སྶ བྷི་ཀྑཾ དེ་ཧཱི’ཏི ས་མཱ་ད་པི་ཏོ’’ཏི? ‘‘ཨཱ་མ, ཨ་ཡྻཱ’’ཏི. ‘‘བྷཱ་རི་ཡཾ ཏེ ཀ་མྨཾ ཀ་ཏཾ, ཡོ ཏྭཾ ཨེ་ཏྟ་ཀེ བྷི་ཀྑཱུ སཾ་ཝི་ད་ཧ་ནྟོ ཨེ་ཏ་སྶ ཨེ་ཀཾ བྷི་ཀྑུཾ ནཱ་དཱ་སཱི’’ཏི. སོ ཏེ་སཾ ཝ་ཙ་ནེ་ན མ་ངྐུ་བྷཱུ་ཏོ ཏཾ ཨཱ་ཧ – ‘‘ས་མྨ མ་ཧཱ་དུ་གྒ་ཏ, མཱ མཾ ནཱ་ས་ཡི, ཨ་ཧཾ ཏ་ཝ ཀཱ་ར་ཎཱ མ་ཧཱ་ཝི་ཧེ་སཾ པ་ཏྟོ, མ་ནུ་སྶཱ པ་ཎྞེ ཨཱ་རོ་པི་ཏ་ནི་ཡཱ་མེ་ན ཨ་ཏྟ་ནོ ཨ་ཏྟ་ནོ པ་ཏྟ་བྷི་ཀྑཱུ ན་ཡིཾ་སུ, ཨ་ཏྟ་ནོ གེ་ཧེ ནི་སི་ནྣ་བྷི་ཀྑུཾ ནཱི་ཧ་རི་ཏྭཱ དེ་ནྟོ ནཱ་མ ན་ཏྠི, ས་ཏྠཱ པ་ན མུ་ཁཾ དྷོ་ཝི་ཏྭཱ ག་ནྡྷ་ཀུ་ཊི་ཡ་མེ་ཝ ནི་སི་ནྣོ, རཱ་ཛ་ཡུ་ཝ་རཱ་ཛ་སེ་ནཱ་པ་ཏི་ཨཱ་ད་ཡོ ས་ཏྠུ ག་ནྡྷ་ཀུ་ཊི་ཏོ ནི་ཀྑ་མ་ནཾ ཨོ་ལོ་ཀེ་ནྟཱ ནི་སི་ནྣཱ ས་ཏྠུ པ་ཏྟཾ ག་ཧེ་ཏྭཱ ‘ག་མི་སྶཱ་མཱ’ཏི. བུ་དྡྷཱ ནཱ་མ དུ་གྒ་ཏེ ཨ་ནུ་ཀ་མྤཾ ཀ་རོ་ནྟི, ཏྭཾ ཝི་ཧཱ་རཾ ག་ནྟྭཱ ‘དུ་གྒ་ཏོ་མྷི, བྷ་ནྟེ, མ་མ ས་ངྒ་ཧཾ ཀ་རོ་ཐཱ’ཏི ས་ཏྠཱ་རཾ ཝ་ནྡ, ས་ཙེ ཏེ པུ་ཉྙཾ ཨ་ཏྠི, ཨ་དྡྷཱ ལ་ཙྪ་སཱི’’ཏི.
སོ ཝི་ཧཱ་རཾ ཨ་ག་མཱ་སི. ཨ་ཐ ནཾ ཨ་ཉྙེ་སུ དི་ཝ་སེ་སུ ཝི་ཧཱ་རེ ཝི་གྷཱ་སཱ་ད་བྷཱ་ཝེ་ན དི་ཊྛ་ཏྟཱ རཱ་ཛ་ཡུ་ཝ་རཱ་ཛཱ་ད་ཡོ, ‘‘མ་ཧཱ་དུ་གྒ་ཏ, ན ཏཱ་ཝ བྷ་ཏྟ་ཀཱ་ལོ, ཀ་སྨཱ ཏྭཾ ཨཱ་ག་ཙྪ་སཱི’’ཏི ཨཱ་ཧཾ་སུ. སོ ‘‘ཛཱ་ནཱ་མི, སཱ་མི, ‘ན ཏཱ་ཝ བྷ་ཏྟ་ཀཱ་ལོ’ཏི. ས་ཏྠཱ་རཾ པ་ན ཝ་ནྡི་ཏུཾ ཨཱ་ག་ཙྪཱ་མཱི’’ཏི ཝ་ད་ནྟོ ག་ནྟྭཱ ག་ནྡྷ་ཀུ་ཊི་ཡཱ ཨུ་མྨཱ་རེ སཱི་སཾ ཋ་པེ་ཏྭཱ པ་ཉྩ་པ་ཏི་ཊྛི་ཏེ་ན ཝ་ནྡི་ཏྭཱ, ‘‘བྷ་ནྟེ, ཨི་མ་སྨིཾ ན་ག་རེ མ་ཡཱ དུ་གྒ་ཏ་ཏ་རོ ན་ཏྠི, ཨ་ཝ་སྶ་ཡོ མེ ཧོ་ཐ, ཀ་རོ་ཐ མེ ས་ངྒ་ཧ’’ནྟི ཨཱ་ཧ. ས་ཏྠཱ ག་ནྡྷ་ཀུ་ཊི་དྭཱ་རཾ ཝི་ཝ་རི་ཏྭཱ པ་ཏྟཾ ནཱི་ཧ་རི་ཏྭཱ ཏ་སྶ ཧ་ཏྠེ ཋ་པེ་སི. སོ ཙ་ཀྐ་ཝ་ཏྟི་སི་རིཾ པ་ཏྟོ ཝི་ཡ ཨ་ཧོ་སི, རཱ་ཛ་ཡུ་ཝ་རཱ་ཛཱ་ད་ཡོ ཨ་ཉྙ་མ་ཉྙ་སྶ མུ་ཁཱ་ནི ཨོ་ལོ་ཀ་ཡིཾ་སུ. ས་ཏྠཱ་རཱ དི་ནྣ་པ་ཏྟ་ཉྷི ཀོ་ཙི ཨི་སྶ་རི་ཡ་ཝ་སེ་ན ག་ཧེ་ཏུཾ ས་མ་ཏྠོ ནཱ་མ ན་ཏྠི. ཨེ་ཝཾ པ་ན ཝ་དིཾ་སུ, ‘‘ས་མྨ མ་ཧཱ་དུ་གྒ་ཏ, ས་ཏྠུ པ་ཏྟཾ ཨ་མྷཱ་ཀཾ དེ་ཧི ཨེ་ཏྟ་ཀཾ ནཱ་མ ཏེ དྷ་ནཾ ད་སྶཱ་མ, ཏྭཾ དུ་གྒ་ཏོ དྷ་ནཾ ག་ཎྷཱ་ཧི, ཀིཾ ཏེ པ་ཏྟེ་ནཱ’’ཏི? མ་ཧཱ་དུ་གྒ་ཏོ ‘‘ན ཀ་སྶ་ཙི ད་སྶཱ་མི, ན མེ དྷ་ནེ་ན ཨ་ཏྠོ, ས་ཏྠཱ་རཾ་ཡེ་ཝ བྷོ་ཛེ་སྶཱ་མཱི’’ཏི ཨཱ་ཧ. ཨ་ཝ་སེ་སཱ ཏཾ ཡཱ་ཙི་ཏྭཱ པ་ཏྟཾ ཨ་ལ་བྷི་ཏྭཱ ནི་ཝ་ཏྟིཾ་སུ. རཱ་ཛཱ པ་ན ‘‘མ་ཧཱ་དུ་གྒ་ཏོ དྷ་ནེ་ན པ་ལོ་བྷི་ཡ་མཱ་ནོ་པི ས་ཏྠུ པ་ཏྟཾ ན དེ་ཏི, ས་ཏྠཱ་རཱ ཙ ས་ཡཾ དི་ནྣ་པ་ཏྟཾ ཀོ་ཙི ག་ཧེ་ཏུཾ ན ས་ཀྐོ་ཏི, ཨི་མ་སྶ དེ་ཡྻ་དྷ་མྨོ ནཱ་མ ཀི་ཏྟ་ཀོ བྷ་ཝི་སྶ་ཏི, ཨི་མི་ནཱ དེ་ཡྻ་དྷ་མྨ་སྶ དི་ནྣ་ཀཱ་ལེ ས་ཏྠཱ་རཾ ཨཱ་དཱ་ཡ གེ་ཧཾ ནེ་ཏྭཱ མ་ཡ྄ཧཾ ས་མྤཱ་དི་ཏཾ ཨཱ་ཧཱ་རཾ ད་སྶཱ་མཱི’’ཏི ཙི་ནྟེ་ཏྭཱ ས་ཏྠཱ་རཱ ས་དྡྷིཾ་ཡེ་ཝ ཨ་ག་མཱ་སི. ས་ཀྐོ་པི དེ་ཝ་རཱ་ཛཱ ཡཱ་གུ་ཁ་ཛྫ་ཀ་བྷ་ཏྟ་སཱུ་པེ་ཡྻ་པ་ཎྞཱ་དཱི་ནི ས་མྤཱ་དེ་ཏྭཱ ས་ཏྠུ ནི་སཱི་ད་ནཱ་ར་ཧཾ ཨཱ་ས་ནཾ པ་ཉྙ་པེ་ཏྭཱ ནི་སཱི་དི.
མ་ཧཱ་དུ་གྒ་ཏོ ས་ཏྠཱ་རཾ ནེ་ཏྭཱ ‘‘པ་ཝི་ས་ཐ, བྷ་ནྟེ’’ཏི ཨཱ་ཧ. ཝ་ས་ན་གེ་ཧ་ཉྩ་སྶ ནཱི་ཙཾ ཧོ་ཏི, ཨ་ནོ་ན་ཏེ་ན པ་ཝི་སི་ཏུཾ ན ས་ཀྐཱ. བུ་དྡྷཱ ཙ ནཱ་མ གེ་ཧཾ པ་ཝི་ས་ནྟཱ ན ཨོ་ན་མི་ཏྭཱ པ་ཝི་ས་ནྟི. གེ་ཧ་ཉྷི པ་ཝི་ས་ན་ཀཱ་ལེ མ་ཧཱ་པ་ཐ་ཝཱི ཝཱ ཧེ་ཊྛཱ ཨོ་ག་ཙྪ་ཏི, གེ་ཧཾ ཝཱ ཨུ་དྡྷཾ ག་ཙྪ་ཏི. ཨི་དཾ ཏེ་སཾ སུ་དི་ནྣ་དཱ་ན་སྶ ཕ་ལཾ. པུ་ན ནི་ཀྑ་མི་ཏྭཱ ག་ཏ་ཀཱ་ལེ ས་བྦཾ པཱ་ཀ་ཏི་ཀ་མེ་ཝ ཧོ་ཏི. ཏ་སྨཱ ས་ཏྠཱ ཋི་ཏ་ཀོ་ཝ གེ་ཧཾ པ་ཝི་སི་ཏྭཱ ས་ཀྐེ་ན པ་ཉྙ་ཏྟཱ་ས་ནེ ནི་སཱི་དི. ས་ཏྠ་རི ནི་སི་ནྣེ རཱ་ཛཱ ཨཱ་ཧ – ‘‘ས་མྨ མ་ཧཱ་དུ་གྒ་ཏ, ཏ་ཡཱ ཨ་མྷཱ་ཀཾ ཡཱ་ཙ་ནྟཱ་ན་མྤི ས་ཏྠུ པ་ཏྟོ ན དི་ནྣོ, པ་སྶཱ་མ ཏཱ་ཝ, ཀཱི་དི་སོ ཏེ ས་ཏྠུ ས་ཀྐཱ་རོ ཀ་ཏོ’’ཏི? ཨ་ཐ་སྶ ས་ཀྐོ ཡཱ་གུ་ཁ་ཛྫ་ཀཱ་དཱི་ནི ཝི་ཝ་རི་ཏྭཱ ད་སྶེ་སི. ཏེ་སཾ ཝཱ་ས་ག་ནྡྷོ ས་ཀ་ལ་ན་ག་རཾ ཚཱ་དེ་ཏྭཱ ཨ་ཊྛཱ་སི. རཱ་ཛཱ ཡཱ་གུ་ཨཱ་དཱི་ནི ཨོ་ལོ་ཀེ་ཏྭཱ བྷ་ག་ཝ་ནྟཾ ཨཱ་ཧ – ‘‘བྷ་ནྟེ, ‘ཨ་ཧཾ མ་ཧཱ་དུ་གྒ་ཏ་སྶ དེ་ཡྻ་དྷ་མྨོ ཀི་ཏྟ་ཀོ བྷ་ཝི་སྶ་ཏི, ཨི་མི་ནཱ དེ་ཡྻ་དྷ་མྨེ དི་ནྣེ ས་ཏྠཱ་རཾ གེ་ཧཾ ནེ་ཏྭཱ ཨ་ཏྟ་ནོ ས་མྤཱ་དི་ཏཾ ཨཱ་ཧཱ་རཾ ད་སྶཱ་མཱི’ཏི ཙི་ནྟེ་ཏྭཱ ཨཱ་ག་ཏོ, མ་ཡཱ ཨེ་ཝ་རཱུ་པོ ཨཱ་ཧཱ་རོ ན དི་ཊྛ་པུ་བྦོ, མ་ཡི ཨི་དྷ ཋི་ཏེ མ་ཧཱ་དུ་གྒ་ཏོ ཀི་ལ་མེ་ཡྻ, ག་ཙྪཱ་མ་ཧ’’ནྟི ས་ཏྠཱ་རཾ ཝ་ནྡི་ཏྭཱ པ་ཀྐཱ་མི. ས་ཀྐོ་པི ས་ཏྠཱ་རཾ ཡཱ་གུ་ཨཱ་དཱི་ནི ད་ཏྭཱ ས་ཀྐ་ཙྩཾ པ་རི་ཝི་སི. ས་ཏྠཱ་པི ཀ་ཏ་བྷ་ཏྟ་ཀི་ཙྩོ ཨ་ནུ་མོ་ད་ནཾ ཀ་ཏྭཱ ཨུ་ཊྛཱ་ཡཱ་ས་ནཱ པ་ཀྐཱ་མི.
ས་ཀྐོ མ་ཧཱ་དུ་གྒ་ཏ་སྶ ས་ཉྙཾ ཨ་དཱ་སི. སོ པ་ཏྟཾ ག་ཧེ་ཏྭཱ ས་ཏྠཱ་རཾ ཨ་ནུ་ག་ཙྪི. ས་ཀྐོ ནི་ཝ་ཏྟི་ཏྭཱ མ་ཧཱ་དུ་གྒ་ཏ་སྶ གེ་ཧ་དྭཱ་རེ ཋི་ཏོ ཨཱ་ཀཱ་སཾ ཨོ་ལོ་ཀེ་སི. ཏཱ་ཝ་དེ་ཝ ཨཱ་ཀཱ་ས་ཏོ ས་ཏྟ་ར་ཏ་ན་ཝ་སྶཾ ཝ་སྶི་ཏྭཱ ཏ་སྶ གེ་ཧེ ས་བྦ་བྷཱ་ཛ་ནཱ་ནི པཱུ་རེ་ཏྭཱ ས་ཀ་ལཾ གེ་ཧཾ པཱུ་རེ་སི. ཏ་སྶ གེ་ཧེ ཨོ་ཀཱ་སོ ནཱ་ཧོ་སི. ཏ་སྶ བྷ་རི་ཡཱ དཱ་ར་ཀེ ཧ་ཏྠེ་སུ ག་ཧེ་ཏྭཱ ནཱི་ཧ་རི་ཏྭཱ བ་ཧི ཨ་ཊྛཱ་སི. སོ ས་ཏྠཱ་རཾ ཨ་ནུ་ག་ནྟྭཱ ནི་ཝ་ཏྟོ དཱ་ར་ཀེ བ་ཧི དི་སྭཱ ‘‘ཀིཾ ཨི་ད’’ནྟི པུ་ཙྪི. ‘‘སཱ་མི, ས་ཀ་ལཾ ནོ གེ་ཧཾ ས་ཏྟ་ཧི ར་ཏ་ནེ་ཧི པུ་ཎྞཾ, པ་ཝི་སི་ཏུཾ ཨོ་ཀཱ་སོ ན་ཏྠཱི’’ཏི. སོ ‘‘ཨ་ཛྫེ་ཝ མེ དཱ་ནེ་ན ཝི་པཱ་ཀོ དི་ནྣོ’’ཏི ཙི་ནྟེ་ཏྭཱ ར་ཉྙོ ས་ནྟི་ཀཾ ག་ནྟྭཱ ཝ་ནྡི་ཏྭཱ, ‘‘ཀ་སྨཱ ཨཱ་ག་ཏོ་སཱི’’ཏི ཝུ་ཏྟེ ཨཱ་ཧ –‘‘དེ་ཝ, གེ་ཧཾ མེ ས་ཏྟ་ཧི ར་ཏ་ནེ་ཧི པུ་ཎྞཾ, ཏཾ དྷ་ནཾ ག་ཎྷ་ཐཱ’’ཏི. རཱ་ཛཱ ‘‘ཨ་ཧོ བུ་དྡྷཱ་ནཾ དི་ནྣ་དཱ་ནཾ, ཨ་ཛྫེ་ཝ མ་ཏྠ་ཀཾ པ་ཏྟ’’ནྟི ཙི་ནྟེ་ཏྭཱ ཏཾ ཨཱ་ཧ – ‘‘ཀིཾ ཏེ ལ་དྡྷུཾ ཝ་ཊྚ་ཏཱི’’ཏི? ‘‘དྷ་ན་ཧ་ར་ཎ་ཏྠཱ་ཡ ས་ཀ་ཊ་ས་ཧ་སྶཾ, དེ་ཝཱ’’ཏི. རཱ་ཛཱ ས་ཀ་ཊ་ས་ཧ་སྶཾ པེ་སེ་ཏྭཱ དྷ་ནཾ ཨཱ་ཧ་རཱ་པེ་ཏྭཱ རཱ་ཛ་ངྒ་ཎེ ཨོ་ཀི་རཱ་པེ་སི. ཏཱ་ལ་པྤ་མཱ་ཎོ རཱ་སི ཨ་ཧོ་སི. རཱ་ཛཱ ན་ག་རེ ས་ནྣི་པཱ་ཏཱ་པེ་ཏྭཱ ‘‘ཨི་མ་སྨིཾ ན་ག་རེ ཨ་ཏྠི ཀ་སྶ་ཙི ཨེ་ཏྟ་ཀཾ དྷ་ན’’ནྟི པུ་ཙྪི. ‘‘ན་ཏྠི, དེ་ཝཱ’’ཏི. ‘‘ཨེ་ཝཾ མ་ཧཱ་དྷ་ན་སྶ ཀིཾ ཀཱ་ཏུཾ ཝ་ཊྚ་ཏཱི’’ཏི? ‘‘སེ་ཊྛི་ཊྛཱ་ནཾ དཱ་ཏུཾ ཝ་ཊྚ་ཏི, དེ་ཝཱ’’ཏི. རཱ་ཛཱ ཏ་སྶ མ་ཧཱ་ས་ཀྐཱ་རཾ ཀ་ཏྭཱ སེ་ཊྛི་ཊྛཱ་ནཾ དཱ་པེ་སི.
ཨ་ཐ་སྶ པུ་བྦེ ཨེ་ཀ་སྶ སེ་ཊྛི་ནོ གེ་ཧ་ཊྛཱ་ནཾ ཨཱ་ཙི་ཀྑི་ཏྭཱ ‘‘ཨེ་ཏྠ ཛཱ་ཏེ ག་ཙྪེ ཧ་རཱ་པེ་ཏྭཱ གེ་ཧཾ ཨུ་ཊྛཱ་པེ་ཏྭཱ ཝ་སཱ་ཧཱི’’ཏི ཨཱ་ཧ. ཏ་སྶ ཏཾ ཋཱ་ནཾ སོ་དྷེ་ཏྭཱ ས་མཾ ཀ་ཏྭཱ བྷཱུ་མི་ཡཱ ཁ་ཉྙ་མཱ་ནཱ་ཡ ཨ་ཉྙ་མ་ཉྙཾ ཨཱ་ཧ་ཙྩ ནི་དྷི་ཀུ་མྦྷི་ཡོ ཨུ་ཊྛ་ཧིཾ་སུ. ཏེ་ན ར་ཉྙོ ཨཱ་རོ་ཙི་ཏེ ‘‘ཏ་ཝ པུ་ཉྙེ་ན ནི་བྦ་ཏྟཱ, ཏྭ་མེ་ཝ ག་ཎྷཱ་ཧཱི’’ཏི ཨཱ་ཧ. སོ གེ་ཧཾ ཀཱ་རེ་ཏྭཱ ས་ཏྟཱ་ཧཾ བུ་དྡྷ་པྤ་མུ་ཁ་སྶ བྷི་ཀྑུ་ས་ངྒྷ་སྶ མ་ཧཱ་དཱ་ནཾ ཨ་དཱ་སི. ཏ་ཏོ པ་ར་མྤི ཡཱ་ཝ་ཏཱ་ཡུ་ཀཾ ཏི་ཊྛ་ནྟོ པུ་ཉྙཱ་ནི ཀ་རི་ཏྭཱ ཨཱ་ཡུ་པ་རི་ཡོ་སཱ་ནེ དེ་ཝ་ལོ་ཀེ ནི་བྦ་ཏྟོ.
ཨེ་ཀཾ བུ་དྡྷ་ནྟ་རཾ དི་བྦ་ས་མྤ་ཏྟིཾ ཨ་ནུ་བྷ་ཝི་ཏྭཱ ཨི་མ་སྨིཾ བུ་དྡྷུ་པྤཱ་དེ ཏ་ཏོ ཙུ་ཏོ སཱ་ཝ་ཏྠི་ཡཾ སཱ་རི་པུ་ཏྟ་ཏྠེ་ར་སྶཱུ་པ་ཊྛཱ་ཀ་ཀུ་ལེ སེ་ཊྛི་དྷཱི་ཏུ ཀུ་ཙྪི་ཡཾ པ་ཊི་ས་ནྡྷིཾ ག་ཎྷི. ཨ་ཐ་སྶཱ མཱ་ཏཱ་པི་ཏ་རོ ག་བྦྷ་སྶ པ་ཏི་ཊྛི་ཏ་བྷཱ་ཝཾ ཉ་ཏྭཱ ག་བྦྷ་པ་རི་ཧཱ་རཾ ཨ་དཾ་སུ. ཏ་སྶཱ ཨ་པ་རེ་ན ས་མ་ཡེ་ན ཨེ་ཝ་རཱུ་པོ དོ་ཧ་ལོ༹ ཨུ་པྤ་ཛྫི – ‘‘ཨ་ཧོ ཝ་ཏཱ་ཧཾ དྷ་མྨ་དེ་ས་ནཱ་པ་ཏིཾ ཨཱ་དིཾ ཀ་ཏྭཱ པ་ཉྩ་ནྣཾ བྷི་ཀྑུ་ས་ཏཱ་ནཾ རོ་ཧི་ཏ་མ་ཙྪ་ར་སེ་ན དཱ་ནཾ ད་ཏྭཱ ཀཱ་སཱ་ཡཱ་ནི ཝ་ཏྠཱ་ནི ནི་ཝཱ་སེ་ཏྭཱ ཨཱ་ས་ན་པ་རི་ཡ་ནྟེ ནི་སི་ནྣཱ ཏེ་སཾ བྷི་ཀྑཱུ་ནཾ ཨུ་ཙྪི་ཊྛ་བྷ་ཏྟཾ པ་རི་བྷུ་ཉྫེ་ཡྻ’’ནྟི. སཱ མཱ་ཏཱ་པི་ཏཱུ་ནཾ ཨཱ་རོ་ཙེ་ཏྭཱ ཏ་ཐཱ ཨ་ཀཱ་སི, དོ་ཧ་ལོ༹ པ་ཊི་པ་སྶ་མྦྷི. ཨ་ཐ་སྶཱ ཏ་ཏོ ཨ་པ་རེ་སུ་པི ས་ཏྟ་སུ མ་ངྒ་ལེ་སུ རོ་ཧི་ཏ་མ་ཙྪ་ར་སེ་ནེ་ཝ དྷ་མྨ་སེ་ནཱ་པ་ཏི་ཏྠེ་ར་པྤ་མུ་ཁཱ་ནི པ་ཉྩ བྷི་ཀྑུ་ས་ཏཱ་ནི བྷོ་ཛེ་སུཾ. ས་བྦཾ ཏི་སྶ་ཀུ་མཱ་ར་སྶ ཝ་ཏྠུ་མྷི ཝུ་ཏྟ་ནི་ཡཱ་མེ་ནེ་ཝ ཝེ་དི་ཏ་བྦཾ. ཨ་ཡ་མ་སྶ པ་ན མ་ཧཱ་དུ་གྒ་ཏ་ཀཱ་ལེ དི་ནྣ་སྶ རོ་ཧི་ཏ་མ་ཙྪ་ར་ས་དཱ་ན་སྶེ་ཝ ནི་སྶ་ནྡོ. ནཱ་མ་གྒ་ཧ་ཎ་དི་ཝ་སེ པ་ན་སྶ, ‘‘བྷ་ནྟེ, དཱ་ས་སྶ ཝོ སི་ཀྑཱ་པ་དཱ་ནི དེ་ཐཱ’’ཏི མཱ་ཏ་རཱ ཝུ་ཏྟེ ཐེ་རོ ཨཱ་ཧ – ‘‘ཀོ་ནཱ་མོ ཨ་ཡཾ དཱ་ར་ཀོ’’ཏི? ‘‘བྷ་ནྟེ, ཨི་མ་སྶ དཱ་ར་ཀ་སྶ ཀུ་ཙྪི་ཡཾ པ་ཊི་ས་ནྡྷི་གྒ་ཧ་ཎ་ཏོ པ་ཊྛཱ་ཡ ཨི་མ་སྨིཾ གེ་ཧེ ཛ་ལཱ༹ ཨེ་ལ༹་མཱུ་གཱ་པི པ་ཎྜི་ཏཱ ཛཱ་ཏཱ, ཏ་སྨཱ མེ པུ་ཏྟ་སྶ པ་ཎྜི་ཏོཏྭེ་ཝ ནཱ་མཾ བྷ་ཝི་སྶ་ཏཱི’’ཏི. ཐེ་རོ སི་ཀྑཱ་པ་དཱ་ནི ཨ་དཱ་སི. ཛཱ་ཏ་དི་ཝ་ས་ཏོ པ་ཊྛཱ་ཡ པ་ན་སྶ ‘‘ནཱ་ཧཾ མ་མ པུ་ཏྟ་སྶ ཨ་ཛ྄ཛྷཱ་ས་ཡཾ བྷི་ནྡི་སྶཱ་མཱི’’ཏི མཱ་ཏུ ཙི་ཏྟཾ ཨུ་པྤ་ཛྫི. སོ ས་ཏྟ་ཝ་སྶི་ཀ་ཀཱ་ལེ མཱ་ཏ་རཾ ཨཱ་ཧ – ‘‘ཨ་མྨ, ཐེ་ར་སྶ ས་ནྟི་ཀེ པ་བྦ་ཛི་སྶཱ་མཱི’’ཏི. ‘‘སཱ་དྷུ, ཏཱ་ཏ, ‘ཨ་ཧཾ ཏ་ཝ ཨ་ཛ྄ཛྷཱ་ས་ཡཾ ན བྷི་ནྡི་སྶཱ་མི་ཙྩེ་ཝ མ་ནཾ ཨུ་པྤཱ་དེ་སི’’’ནྟི ཝ་ཏྭཱ ཐེ་རཾ ནི་མ་ནྟེ་ཏྭཱ བྷོ་ཛེ་ཏྭཱ, ‘‘བྷ་ནྟེ, དཱ་སོ ཝོ པ་བྦ་ཛི་ཏུ་ཀཱ་མོ, ཨ་ཧཾ ཨི་མཾ སཱ་ཡ་ནྷ་ས་མ་ཡེ ཝི་ཧཱ་རཾ ཨཱ་ནེ་སྶཱ་མཱི’’ཏི ཐེ་རཾ ཨུ་ཡྻོ་ཛེ་ཏྭཱ ཉཱ་ཏ་ཀེ ས་ནྣི་པཱ་ཏཱ་པེ་ཏྭཱ ‘‘མ་མ པུ་ཏྟ་སྶ གི་ཧི་ཀཱ་ལེ ཀ་ཏྟ་བྦ་ས་ཀྐཱ་རཾ ཨ་ཛྫེ་ཝ ཀ་རི་སྶཱ་མཱ’’ཏི མ་ཧ་ནྟཾ ས་ཀྐཱ་རཾ ཀཱ་རེ་ཏྭཱ ཏཾ ཨཱ་དཱ་ཡ ཝི་ཧཱ་རཾ ག་ནྟྭཱ ‘‘ཨི་མཾ, བྷ་ནྟེ, པ་བྦཱ་ཛེ་ཐཱ’’ཏི ཐེ་ར་སྶ ཨ་དཱ་སི.
ཐེ་རོ པ་བྦ་ཛྫཱ་ཡ དུ་ཀྐ་ར་བྷཱ་ཝཾ ཨཱ་ཙི་ཀྑི་ཏྭཱ ‘‘ཀ་རི་སྶཱ་མ་ཧཾ, བྷ་ནྟེ, ཏུ་མྷཱ་ཀཾ ཨོ་ཝཱ་ད’’ནྟི ཝུ་ཏྟེ ‘‘ཏེ་ན ཧི ཨེ་ཧཱི’’ཏི ཀེ་སེ ཏེ་མེ་ཏྭཱ ཏ་ཙ་པ་ཉྩ་ཀ་ཀ་མྨ་ཊྛཱ་ནཾ ཨཱ་ཙི་ཀྑི་ཏྭཱ པ་བྦཱ་ཛེ་སི. མཱ་ཏཱ་པི་ཏ་རོ་པི་སྶ ས་ཏྟཱ་ཧཾ ཝི་ཧཱ་རེ་ཡེ་ཝ ཝ་ས་ནྟཱ བུ་དྡྷ་པྤ་མུ་ཁ་སྶ བྷི་ཀྑུ་ས་ངྒྷ་སྶ རོ་ཧི་ཏ་མ་ཙྪ་ར་སེ་ནེ་ཝ དཱ་ནཾ ད་ཏྭཱ ས་ཏྟ་མེ དི་ཝ་སེ སཱ་ཡཾ གེ་ཧཾ ཨ་ག་མཾ་སུ. ཐེ་རོ ཨ་ཊྛ་མེ དི་ཝ་སེ ཨ་ནྟོ་གཱ་མཾ ག་ཙྪ་ནྟོ ཏཾ ཨཱ་དཱ་ཡ ག་ཙྪ་ཏི, བྷི་ཀྑུ་ས་ངྒྷེ་ན ས་དྡྷིཾ ནཱ་ག་མཱ་སི. ཀིཾ ཀཱ་ར་ཎཱ? ན ཏཱ་ཝ་སྶ པ་ཏྟ་ཙཱི་ཝ་ར་གྒ་ཧ་ཎཱ་ནི ཝཱ ཨི་རི་ཡཱ་པ་ཐོ ཝཱ པཱ་སཱ་དི་ཀོ ཧོ་ཏི, ཨ་པི་ཙ ཝི་ཧཱ་རེ ཐེ་ར་སྶ ཀ་ཏྟ་བྦ་ཝ་ཏྟཾ ཨ་ཏྠི. ཐེ་རོ ཧི བྷི་ཀྑུ་ས་ངྒྷེ ཨ་ནྟོ་གཱ་མཾ པ་ཝི་ཊྛེ ས་ཀ་ལ་ཝི་ཧཱ་རཾ ཝི་ཙ་ར་ནྟོ ཨ་ས་མྨ་ཛྫ་ན་ཊྛཱ་ནཾ ས་མྨ་ཛྫི་ཏྭཱ ཏུ་ཙྪ་བྷཱ་ཛ་ནེ་སུ པཱ་ནཱི་ཡ་པ་རི་བྷོ་ཛ་ནཱི་ཡཱ་ནི ཨུ་པ་ཊྛ་པེ་ཏྭཱ དུ་ནྣི་ཀྑི་ཏྟཱ་ནི མ་ཉྩ་པཱི་ཋཱ་དཱི་ནི པ་ཊི་སཱ་མེ་ཏྭཱ པ་ཙྪཱ གཱ་མཾ པ་ཝི་ས་ཏི. ཨ་པི་ཙ ‘‘ཨ་ཉྙ་ཏི་ཏྠི་ཡཱ ཏུ་ཙྪ་ཝི་ཧཱ་རཾ པ་ཝི་སི་ཏྭཱ ‘པ་སྶ་ཐ ས་མ་ཎ་སྶ གོ་ཏ་མ་སྶ སཱ་ཝ་ཀཱ་ནཾ ནི་སི་ནྣ་ཊྛཱ་ནཱ་ནཱི’ཏི ཝ་ཏྟུཾ མཱ ལ་བྷིཾ་སཱུ’’ཏི ས་ཀ་ལ་ཝི་ཧཱ་རཾ པ་ཊི་ཛ་གྒི་ཏྭཱ པ་ཙྪཱ གཱ་མཾ པ་ཝི་ས་ཏི. ཏ་སྨཱ ཏཾ དི་ཝ་ས་མྤི སཱ་མ་ཎེ་རེ་ན པ་ཏྟ་ཙཱི་ཝ་རཾ གཱ་ཧཱ་པེ་ཏྭཱ དི་ཝཱ་ཏ་རཾ པི་ཎྜཱ་ཡ པཱ་ཝི་སི.
སཱ་མ་ཎེ་རོ ཨུ་པ་ཛ྄ཛྷཱ་ཡེ་ན ས་དྡྷིཾ ག་ཙྪ་ནྟོ ཨ་ནྟ་རཱ་མ་གྒེ མཱ་ཏི་ཀཾ དི་སྭཱ, ‘‘བྷ་ནྟེ, ཨི་དཾ ཀིཾ ནཱ་མཱ’’ཏི པུ་ཙྪི. ‘‘མཱ་ཏི་ཀཱ ནཱ་མ, སཱ་མ་ཎེ་རཱ’’ཏི. ‘‘ཨི་མཱ་ཡ ཀིཾ ཀ་རོ་ནྟཱི’’ཏི? ‘‘ཨི་ཏོ ཙི་ཏོ ཙ ཨུ་ད་ཀཾ ཨཱ་ཧ་རི་ཏྭཱ ཨ་ཏྟ་ནོ ས་སྶ་ཀ་མྨཾ ས་མྤཱ་དེ་ནྟཱི’’ཏི. ‘‘ཀིཾ པ་ན, བྷ་ནྟེ, ཨུ་ད་ཀ་སྶ ཙི་ཏྟཾ ཨ་ཏྠཱི’’ཏི? ‘‘ན་ཏྠཱ་ཝུ་སོ’’ཏི. ‘‘ཨེ་ཝ་རཱུ་པཾ ཨ་ཙི་ཏྟ་ཀཾ ཨ་ཏྟ་ནོ ཨི་ཙྪི་ཏ་ཊྛཱ་ནཾ ཧ་ར་ནྟི, བྷ་ནྟེ’’ཏི? ‘‘ཨཱ་མཱ་ཝུ་སོ’’ཏི. སོ ཙི་ནྟེ་སི – ‘‘ས་ཙེ ཨེ་ཝ་རཱུ་པ་མྤི ཨ་ཙི་ཏྟ་ཀཾ ཨ་ཏྟ་ནོ ཨི་ཙྪི་ཏི་ཙྪི་ཏ་ཊྛཱ་ནཾ ཧ་རི་ཏྭཱ ཀ་མྨཾ ཀ་རོ་ནྟི, ཀ་སྨཱ ས་ཙི་ཏྟ་ཀཱ་པི ཙི་ཏྟཾ ཨ་ཏྟ་ནོ ཝ་སེ ཝ་ཏྟེ་ཏྭཱ ས་མ་ཎ་དྷ་མྨཾ ཀཱ་ཏུཾ ན ས་ཀྑི་སྶ་ནྟཱི’’ཏི. ཨ་ཐེ་སོ པུ་ར་ཏོ ག་ཙྪ་ནྟོ ཨུ་སུ་ཀཱ་རེ ས་ར་ད་ཎྜ་ཀཾ ཨ་གྒི་མྷི ཏཱ་པེ་ཏྭཱ ཨ་ཀྑི་ཀོ་ཊི་ཡཱ ཨོ་ལོ་ཀེ་ཏྭཱ ཨུ་ཛུ་ཀཾ ཀ་རོ་ནྟེ དི་སྭཱ, ‘‘ཨི་མེ, བྷ་ནྟེ, ཀེ ནཱ་མཱ’’ཏི པུ་ཙྪི. ‘‘ཨུ་སུ་ཀཱ་རཱ ནཱ་མཱ་ཝུ་སོ’’ཏི. ‘‘ཀིཾ པ་ནེ་ཏེ ཀ་རོ་ནྟཱི’’ཏི? ‘‘ཨ་གྒི་མྷི ཏཱ་པེ་ཏྭཱ ས་ར་ད་ཎྜ་ཀཾ ཨུ་ཛུཾ ཀ་རོ་ནྟཱི’’ཏི. ‘‘ས་ཙི་ཏྟ་ཀོ, བྷ་ནྟེ, ཨེ་སོ’’ཏི? ‘‘ཨ་ཙི་ཏྟ་ཀོ, ཨཱ་ཝུ་སོ’’ཏི. སོ ཙི་ནྟེ་སི – ‘‘ས་ཙེ ཨ་ཙི་ཏྟ་ཀཾ ག་ཧེ་ཏྭཱ ཨ་གྒི་མྷི ཏཱ་པེ་ཏྭཱ ཨུ་ཛུཾ ཀ་རོ་ནྟི, ཀ་སྨཱ ས་ཙི་ཏྟ་ཀཱ་པི ཨ་ཏྟ་ནོ ཙི་ཏྟཾ ཝ་སེ ཝ་ཏྟེ་ཏྭཱ ས་མ་ཎ་དྷ་མྨཾ ཀཱ་ཏུཾ ན ས་ཀྑི་སྶ་ནྟཱི’’ཏི. ཨ་ཐེ་སོ པུ་ར་ཏོ ག་ཙྪ་ནྟོ དཱ་རཱུ་ནི ཨ་ར་ནེ་མི་ནཱ་བྷི་ཨཱ་དཱི་ནི ཏ་ཙྪ་ནྟེ དི་སྭཱ, ‘‘བྷ་ནྟེ, ཨི་མེ ཀེ ནཱ་མཱ’’ཏི པུ་ཙྪི. ‘‘ཏ་ཙྪ་ཀཱ ནཱ་མཱ་ཝུ་སོ’’ཏི. ‘‘ཀིཾ པ་ནེ་ཏེ ཀ་རོ་ནྟཱི’’ཏི? ‘‘དཱ་རཱུ་ནི ག་ཧེ་ཏྭཱ ཡཱ་ན་ཀཱ་དཱི་ནཾ ཙ་ཀྐཱ་དཱི་ནི ཀ་རོ་ནྟི, ཨཱ་ཝུ་སོ’’ཏི. ‘‘ཨེ་ཏཱ་ནི པ་ན ས་ཙི་ཏྟ་ཀཱ་ནི, བྷ་ནྟེ’’ཏི? ‘‘ཨ་ཙི་ཏྟ་ཀཱ་ནི, ཨཱ་ཝུ་སོ’’ཏི. ཨ་ཐ་སྶ ཨེ་ཏ་ད་ཧོ་སི – ‘‘ས་ཙེ ཨ་ཙི་ཏྟ་ཀཱ་ནི ཀ་ཊྛ་ཀ་ལི་ངྒ་རཱ་ནི ག་ཧེ་ཏྭཱ ཙ་ཀྐཱ་དཱི་ནི ཀ་རོ་ནྟི, ཀ་སྨཱ ས་ཙི་ཏྟ་ཀཱ ཨ་ཏྟ་ནོ ཙི་ཏྟཾ ཝ་སེ ཝ་ཏྟེ་ཏྭཱ ས་མ་ཎ་དྷ་མྨཾ ཀཱ་ཏུཾ ན ས་ཀྑི་སྶ་ནྟཱི’’ཏི. སོ ཨི་མཱ་ནི ཀཱ་ར་ཎཱ་ནི དི་སྭཱ, ‘‘བྷ་ནྟེ, ས་ཙེ ཏུ་མྷཱ་ཀཾ པ་ཏྟ་ཙཱི་ཝ་རེ ཏུ་མྷེ ག་ཎྷེ་ཡྻཱ་ཐ, ཨ་ཧཾ ནི་ཝ་ཏྟེ་ཡྻ’’ནྟི. ཐེ་རོ ‘‘ཨ་ཡཾ ཨ་དྷུ་ནཱ པ་བྦ་ཛི་ཏོ ད་ཧ་ར་སཱ་མ་ཎེ་རོ མཾ ཨ་ནུ་བ་ནྡྷ་མཱ་ནོ ཨེ་ཝཾ ཝ་དེ་ཏཱི’’ཏི ཙི་ཏྟཾ ཨ་ནུ་པྤཱ་དེ་ཏྭཱ་ཝ ‘‘ཨཱ་ཧ་ར, སཱ་མ་ཎེ་རཱ’’ཏི ཝ་ཏྭཱ ཨ་ཏྟ་ནོ པ་ཏྟ་ཙཱི་ཝ་རཾ ཨ་གྒ་ཧེ་སི.
སཱ་མ་ཎེ་རོ་པི ཨུ་པ་ཛ྄ཛྷཱ་ཡཾ ཝ་ནྡི་ཏྭཱ ནི་ཝ་ཏྟ་ནྟོ, ‘‘བྷ་ནྟེ, མ་ཡ྄ཧཾ ཨཱ་ཧཱ་རཾ ཨཱ་ཧ་ར་ནྟོ རོ་ཧི་ཏ་མ་ཙྪ་ར་སེ་ནེ་ཝ ཨཱ་ཧ་རེ་ཡྻཱ་ཐཱ’’ཏི ཨཱ་ཧ. ‘‘ཀ་ཐཾ ལ་བྷི་སྶཱ་མཱ་ཝུ་སོ’’ཏི? ‘‘བྷ་ནྟེ, ཨ་ཏྟ་ནོ པུ་ཉྙེ་ན ཨ་ལ་བྷ་ནྟཱ མ་མ པུ་ཉྙེ་ན ལ་བྷི་སྶ་ཐཱ’’ཏི ཨཱ་ཧ. ཐེ་རོ ‘‘ད་ཧ་ར་སཱ་མ་ཎེ་ར་སྶ བ་ཧི ནི་སི་ནྣ་ཀ་སྶ པ་རི་པ་ནྠོ་པི བྷ་ཝེ་ཡྻཱ’’ཏི ཀུ་ཉྫི་ཀཾ ད་ཏྭཱ ‘‘མ་ཡ྄ཧཾ ཝ་ས་ན་ག་བྦྷ་སྶ དྭཱ་རཾ ཝི་ཝ་རི་ཏྭཱ ཨ་ནྟོ པ་ཝི་སི་ཏྭཱ ནི་སཱི་དེ་ཡྻཱ་སཱི’’ཏི ཨཱ་ཧ. སོ ཏ་ཐཱ ཀ་ཏྭཱ ཨ་ཏྟ་ནོ ཀ་ར་ཛ་ཀཱ་ཡེ ཉཱ་ཎཾ ཨོ་ཏཱ་རེ་ཏྭཱ ཨ་ཏྟ་བྷཱ་ཝཾ ས་མྨ་ས་ནྟོ ནི་སཱི་དི. ཨ་ཐ་སྶ གུ་ཎ་ཏེ་ཛེ་ན ས་ཀྐ་སྶ ཨཱ་ས་ནཾ ཨུ་ཎྷཱ་ཀཱ་རཾ ད་སྶེ་སི. སོ ‘‘ཀིཾ ནུ ཁོ ཀཱ་ར་ཎ’’ནྟི ཨུ་པ་དྷཱ་རེ་ནྟོ ‘‘པ་ཎྜི་ཏ་སཱ་མ་ཎེ་རོ ཨུ་པ་ཛ྄ཛྷཱ་ཡ་སྶ པ་ཏྟ་ཙཱི་ཝ་རཾ ད་ཏྭཱ ‘ས་མ་ཎ་དྷ་མྨཾ ཀ་རི་སྶཱ་མཱི’ཏི ནི་ཝ་ཏྟོ, མ་ཡཱ་པི ཏ་ཏྠ ག་ནྟུཾ ཝ་ཊྚ་ཏཱི’’ཏི ཙི་ནྟེ་ཏྭཱ ཙ་ཏྟཱ་རོ མ་ཧཱ་རཱ་ཛེ ཨཱ་མ་ནྟེ་ཏྭཱ ‘‘ཝི་ཧཱ་ར་སྶ ཨུ་པ་ཝ་ནེ ཝ་ས་ནྟེ ས་ཀུ་ཎེ པ་ལཱ་པེ་ཏྭཱ ས་མ་ནྟ་ཏོ ཨཱ་ར་ཀྑཾ ག་ཎྷ་ཐཱ’’ཏི ཝ་ཏྭཱ ཙ་ནྡ་དེ་ཝ་པུ་ཏྟཾ ‘‘ཙ་ནྡ་མ་ཎྜ་ལཾ ཨཱ་ཀ་ཌྜྷི་ཏྭཱ ག་ཎྷཱ་ཧཱི’’ཏི, སཱུ་རི་ཡ་དེ་ཝ་པུ་ཏྟཾ ‘‘སཱུ་རི་ཡ་མ་ཎྜ་ལཾ ཨཱ་ཀ་ཌྜྷི་ཏྭཱ ག་ཎྷཱ་ཧཱི’’ཏི ཝ་ཏྭཱ ས་ཡཾ ག་ནྟྭཱ ཨཱ་ཝི་ཉྪ་ན་ར་ཛྫུ་ཊྛཱ་ནེ ཨཱ་ར་ཀྑཾ ག་ཧེ་ཏྭཱ ཨ་ཊྛཱ་སི, ཝི་ཧཱ་རེ པུ་རཱ་ཎ་པ་ཎྞ་སྶ པ་ཏ་ནྟ་སྶ་པི ས་དྡོ ནཱ་ཧོ་སི, སཱ་མ་ཎེ་ར་སྶ ཙི་ཏྟཾ ཨེ་ཀ་གྒཾ ཨ་ཧོ་སི. སོ ཨ་ནྟ་རཱ་བྷ་ཏྟེ་ཡེ་ཝ ཨ་ཏྟ་བྷཱ་ཝཾ ས་མྨ་སི་ཏྭཱ ཏཱི་ཎི ཕ་ལཱ་ནི པཱ་པུ་ཎི.
ཐེ་རོ་པི ‘‘སཱ་མ་ཎེ་རོ ཝི་ཧཱ་རེ ནི་སི་ནྣོ, ཏ་སྶ ཨུ་པ་ཀ་པྤ་ན་ཀཾ བྷོ་ཛ་ནཾ ཨ་སུ་ཀ་ཀུ་ལེ ནཱ་མ ས་ཀྐཱ ལ་དྡྷུ’’ནྟི ཨེ་ཀཾ པེ་མ་གཱ་ར་ཝ་ཡུ་ཏྟཾ ཨུ་པ་ཊྛཱ་ཀ་ཀུ་ལཾ ཨ་ག་མཱ་སི. ཏ་ཏྠ ཙ མ་ནུ་སྶཱ ཏཾ དི་ཝ་སཾ རོ་ཧི་ཏ་མ་ཙྪེ ལ་བྷི་ཏྭཱ ཐེ་ར་སྶེ་ཝ ཨཱ་ག་མ་ནཾ ཨོ་ལོ་ཀེ་ནྟོ ནི་སཱི་དིཾ་སུ. ཏེ ཐེ་རཾ ཨཱ་ག་ཙྪ་ནྟཾ དི་སྭཱ, ‘‘བྷ་ནྟེ, བྷ་དྡ་ཀཾ ཝོ ཀ་ཏཾ ཨི་དྷཱ་ག་ཙྪ་ནྟེ་ཧཱི’’ཏི ཨ་ནྟོ་གེ་ཧེ པ་ཝེ་སེ་ཏྭཱ ཡཱ་གུ་ཁ་ཛྫ་ཀཱ་དཱི་ནི ད་ཏྭཱ རོ་ཧི་ཏ་མ་ཙྪ་ར་སེ་ན་སྶ པི་ཎྜ་པཱ་ཏཾ ཨ་དཾ་སུ. ཐེ་རོ ཧ་ར་ཎཱ་ཀཱ་རཾ ད་སྶེ་སི. མ་ནུ་སྶཱ ‘‘པ་རི་བྷུ་ཉྫ་ཐ, བྷ་ནྟེ, ཧ་ར་ཎ་ཀ་བྷ་ཏྟ་མྤི ལ་བྷི་སྶ་ཐཱ’’ཏི ཝ་ཏྭཱ ཐེ་ར་སྶ བྷ་ཏྟ་ཀི་ཙྩཱ་ཝ་སཱ་ནེ པ་ཏྟཾ རོ་ཧི་ཏ་མ་ཙྪ་ར་ས་བྷོ་ཛ་ན་སྶ པཱུ་རེ་ཏྭཱ ཨ་དཾ་སུ. ཐེ་རོ ‘‘སཱ་མ་ཎེ་རོ མེ ཚཱ་ཏོ’’ཏི སཱི་གྷཾ ཨ་ག་མཱ་སི. ས་ཏྠཱ་པི ཏཾ དི་ཝ་སཾ ཀཱ་ལ་སྶེ་ཝ བྷུ་ཉྫི་ཏྭཱ ཝི་ཧཱ་རཾ ག་ནྟྭཱ ཨེ་ཝཾ ཨཱ་ཝ་ཛྫེ་སི – ‘‘པ་ཎྜི་ཏ་སཱ་མ་ཎེ་རོ ཨུ་པ་ཛ྄ཛྷཱ་ཡ་སྶ པ་ཏྟ་ཙཱི་ཝ་རཾ ད་ཏྭཱ ‘ས་མ་ཎ་དྷ་མྨཾ ཀ་རི་སྶཱ་མཱི’ཏི ནི་ཝ་ཏྟོ, ནི་པྥ་ཛྫི་སྶ་ཏི ནུ ཁོ ཨ་སྶ པ་བྦ་ཛི་ཏ་ཀི་ཙྩ’’ནྟི ཨུ་པ་དྷཱ་རེ་ནྟོ ཏི་ཎྞཾ ཕ་ལཱ་ནཾ པ་ཏྟ་བྷཱ་ཝཾ ཉ་ཏྭཱ ‘‘ཨ་ར་ཧ་ཏྟ་སྶ ཨུ་པ་ནི་སྶ་ཡོ ཨ་ཏྠི, ན་ཏྠཱི’’ཏི ཨཱ་ཝ་ཛྫེ་ནྟོ ‘‘ཨ་ཏྠཱི’’ཏི དི་སྭཱ ‘‘པུ་རེ་བྷ་ཏྟ་མེ་ཝ ཨ་ར་ཧ་ཏྟཾ པ་ཏྟུཾ ས་ཀྑི་སྶ་ཏི, ན ས་ཀྑི་སྶ་ཏཱི’’ཏི ཨུ་པ་དྷཱ་རེ་ནྟོ ‘‘ས་ཀྑི་སྶ་ཏཱི’’ཏི ཨ་ཉྙཱ་སི. ཨ་ཐ་སྶ ཨེ་ཏ་ད་ཧོ་སི – ‘‘སཱ་རི་པུ་ཏྟོ སཱ་མ་ཎེ་ར་སྶ བྷ་ཏྟཾ ཨཱ་དཱ་ཡ སཱི་གྷཾ ཨཱ་ག་ཙྪ་ཏི, ཨ་ནྟ་རཱ་ཡ་མྤི་སྶ ཀ་རེ་ཡྻ དྭཱ་ར་ཀོ་ཊྛ་ཀེ ཨཱ་ར་ཀྑཾ ག་ཧེ་ཏྭཱ ནི་སཱི་དི་སྶཱ་མི, ཨ་ཐ ནཾ པ་ཉྷཾ པུ་ཙྪི་སྶཱ་མི, ཏ་སྨིཾ པ་ཉྷེ ཝི་སྶ་ཛྫི་ཡ་མཱ་ནེ སཱ་མ་ཎེ་རོ ས་ཧ པ་ཊི་ས་མྦྷི་དཱ་ཧི ཨ་ར་ཧ་ཏྟཾ པཱ་པུ་ཎི་སྶ་ཏཱི’’ཏི. ཏ་ཏོ ག་ནྟྭཱ དྭཱ་ར་ཀོ་ཊྛ་ཀེ ཋ་ཏྭཱ ས་མྤ་ཏྟཾ ཐེ་རཾ ཙ་ཏྟཱ་རོ པ་ཉྷེ པུ་ཙྪི, པུ་ཊྛཾ པུ་ཊྛཾ པ་ཉྷཾ ཝི་སྶ་ཛྫེ་སི.
ཏ་ཏྲི་དཾ པུ་ཙྪཱ་ཝི་སྶ་ཛྫ་ནཾ – ས་ཏྠཱ ཀི་ར ནཾ ཨཱ་ཧ – ‘‘སཱ་རི་པུ་ཏྟ, ཀིཾ ཏེ ལ་དྡྷ’’ནྟི? ‘‘ཨཱ་ཧཱ་རོ, བྷ་ནྟེ’’ཏི. ‘‘ཨཱ་ཧཱ་རོ ནཱ་མ ཀིཾ ཨཱ་ཧ་ར་ཏི, སཱ་རི་པུ་ཏྟཱ’’ཏི? ‘‘ཝེ་ད་ནཾ, བྷ་ནྟེ’’ཏི. ‘‘ཝེ་ད་ནཾ ཀིཾ ཨཱ་ཧ་ར་ཏི, སཱ་རི་པུ་ཏྟཱ’’ཏི? ‘‘རཱུ་པཾ, བྷ་ནྟེ’’ཏི. ‘‘རཱུ་པཾ པ་ན ཀིཾ ཨཱ་ཧ་ར་ཏི, སཱ་རི་པུ་ཏྟཱ’’ཏི? ‘‘ཕ་སྶཾ, བྷ་ནྟེ’’ཏི. ཏ་ཏྲཱ་ཡཾ ཨ་དྷི་པྤཱ་ཡོ – ‘‘ཛི་གྷ་ཙྪི་ཏེ་ན ཧི པ་རི་བྷུ་ཏྟོ ཨཱ་ཧཱ་རོ ཏ་སྶ ཁུ་དྡཾ པ་རི་ཧ་རི་ཏྭཱ སུ་ཁཾ ཝེ་ད་ནཾ ཨཱ་ཧ་ར་ཏི. ཨཱ་ཧཱ་ར་པ་རི་བྷོ་གེ་ན སུ་ཁི་ཏ་སྶ སུ་ཁཱ་ཡ ཝེ་ད་ནཱ་ཡ ཨུ་པྤ་ཛྫ་མཱ་ནཱ་ཡ ས་རཱི་རེ ཝ་ཎྞ་ས་མྤ་ཏྟི ཧོ་ཏི. ཨེ་ཝཾ ཝེ་ད་ནཱ རཱུ་པཾ ཨཱ་ཧ་ར་ཏི. སུ་ཁི་ཏོ པ་ན ཨཱ་ཧཱ་ར་ཛ་རཱུ་པ་ཝ་སེ་ན ཨུ་པྤ་ནྣ་སུ་ཁ་སོ་མ་ན་སྶོ ‘ཨི་དཱ་ནི མེ ཨ་སྶཱ་དོ ཛཱ་ཏོ’ཏི ནི་པྤ་ཛྫ་ནྟོ ཝཱ ནི་སཱི་ད་ནྟོ ཝཱ སུ་ཁ་ས་མྥ་སྶཾ པ་ཊི་ལ་བྷ་ཏཱི’’ཏི.
ཨེ་ཝཾ ཨི་མེ་སུ ཙ་ཏཱུ་སུ པ་ཉྷེ་སུ ཝི་སྶ་ཛྫི་ཀེ་སུ སཱ་མ་ཎེ་རོ ས་ཧ པ་ཊི་ས་མྦྷི་དཱ་ཧི ཨ་ར་ཧ་ཏྟཾ པ་ཏྟོ. ས་ཏྠཱ་པི ཐེ་རཾ ཨཱ་ཧ – ‘‘ག་ཙྪ, སཱ་རི་པུ་ཏྟ, ཏ་ཝ སཱ་མ་ཎེ་ར་སྶ བྷ་ཏྟཾ དེ་ཧཱི’’ཏི. ཐེ་རོ ག་ནྟྭཱ དྭཱ་རཾ ཨཱ་ཀོ་ཊེ་སི. སཱ་མ་ཎེ་རོ ནི་ཀྑ་མི་ཏྭཱ ཐེ་ར་སྶ ཧ་ཏྠ་ཏོ པ་ཏྟཾ ག་ཧེ་ཏྭཱ ཨེ་ཀ་མ་ནྟཾ ཋ་པེ་ཏྭཱ ཏཱ་ལ་ཝ་ཎྚེ་ན ཐེ་རཾ བཱི་ཛི. ཨ་ཐ ནཾ ཐེ་རོ ཨཱ་ཧ – ‘‘སཱ་མ་ཎེ་ར, བྷ་ཏྟ་ཀི་ཙྩཾ ཀ་རོ་ཧཱི’’ཏི. ‘‘ཏུ་མྷེ པ་ན, བྷ་ནྟེ’’ཏི. ‘‘ཀ་ཏཾ མ་ཡཱ བྷ་ཏྟ་ཀི་ཙྩཾ, ཏྭཾ ཀ་རོ་ཧཱི’’ཏི. ས་ཏྟ་ཝ་སྶི་ཀ་དཱ་ར་ཀོ པ་བྦ་ཛི་ཏྭཱ ཨ་ཊྛ་མེ དི་ཝ་སེ ཏཾ ཁ་ཎཾ ཝི་ཀ་སི་ཏ་པ་དུ་མུ་པྤ་ལ་ས་དི་སོ ཨ་ར་ཧ་ཏྟཾ པ་ཏྟོ, པ་ཙྩ་ཝེ་ཀྑི་ཏ་ཊྛཱ་ནཾ པ་ན པ་ཙྩ་ཝེ་ཀྑ་ནྟོ ནི་སཱི་དི་ཏྭཱ བྷ་ཏྟ་ཀི་ཙྩ་མ་ཀཱ་སི. ཏེ་ན པ་ཏྟཾ དྷོ་ཝི་ཏྭཱ པ་ཊི་སཱ་མི་ཏ་ཀཱ་ལེ ཙ་ནྡ་དེ་ཝ་པུ་ཏྟོ ཙ་ནྡ་མ་ཎྜ་ལཾ ཝི་སྶ་ཛྫེ་སི, སཱུ་རི་ཡ་དེ་ཝ་པུ་ཏྟོ སཱུ་རི་ཡ་མ་ཎྜ་ལཾ. ཙ་ཏྟཱ་རོ མ་ཧཱ་རཱ་ཛཱ་ནོ ཙ་ཏུ་དྡི་སཾ ཨཱ་ར་ཀྑཾ ཝི་སྶ་ཛྫེ་སུཾ, ས་ཀྐོ དེ་ཝ་རཱ་ཛཱ ཨཱ་ཝི་ཉྪ་ན་ཀེ ཨཱ་ར་ཀྑཾ ཝི་སྶ་ཛྫེ་སི. སཱུ་རི་ཡོ མ་ཛ྄ཛྷ་ཊྛཱ་ན་ཏོ ག་ལི་ཏྭཱ ག་ཏོ.
བྷི་ཀྑཱུ ཨུ་ཛ྄ཛྷཱ་ཡིཾ་སུ, ‘‘ཚཱ་ཡཱ ཨ་དྷི་ཀ་པྤ་མཱ་ཎཱ ཛཱ་ཏཱ, སཱུ་རི་ཡོ མ་ཛ྄ཛྷ་ཊྛཱ་ན་ཏོ ག་ལི་ཏྭཱ ག་ཏོ, སཱ་མ་ཎེ་རེ་ན ཙ ཨི་དཱ་ནེ་ཝ བྷུ་ཏྟཾ, ཀིཾ ནུ ཁོ ཨེ་ཏ’’ནྟི. ས་ཏྠཱ ཏཾ པ་ཝ་ཏྟིཾ ཉ་ཏྭཱ ཨཱ་ག་ནྟྭཱ པུ་ཙྪི – ‘‘བྷི་ཀྑ་ཝེ, ཀིཾ ཀ་ཐེ་ཐཱ’’ཏི? ‘‘ཨི་དཾ ནཱ་མ, བྷ་ནྟེ’’ཏི? ‘‘ཨཱ་མ, བྷི་ཀྑ་ཝེ, པུ་ཉྙ་ཝ་ཏོ ས་མ་ཎ་དྷ་མྨཾ ཀ་ར་ཎ་ཀཱ་ལེ ཙ་ནྡ་དེ་ཝ་པུ་ཏྟོ ཙ་ནྡ་མ་ཎྜ་ལཾ, སཱུ་རི་ཡ་དེ་ཝ་པུ་ཏྟོ སཱུ་རི་ཡ་མ་ཎྜ་ལཾ ཨཱ་ཀ་ཌྜྷི་ཏྭཱ ག་ཎྷི, ཙ་ཏྟཱ་རོ མ་ཧཱ་རཱ་ཛཱ་ནོ ཝི་ཧཱ་རོ་པ་ཝ་ནེ ཙ་ཏུ་དྡི་སཾ ཨཱ་ར་ཀྑཾ ག་ཎྷིཾ་སུ, ས་ཀྐོ དེ་ཝ་རཱ་ཛཱ ཨཱ་ཝི་ཉྪ་ན་ཀེ ཨཱ་ར་ཀྑཾ ག་ཎྷི, ཨ་ཧ་མྤི ‘བུ་དྡྷོ་མྷཱི’ཏི ཨ་པྤོ་སྶུ་ཀྐོ ནི་སཱི་དི་ཏུཾ ནཱ་ལ་ཏྠཾ, ག་ནྟྭཱ དྭཱ་ར་ཀོ་ཊྛ་ཀེ མ་མ པུ་ཏྟ་སྶ ཨཱ་ར་ཀྑཾ ཨ་གྒ་ཧེ་སིཾ, ནེ་ཏྟི་ཀེ ཙ མཱ་ཏི་ཀཱ་ཡ ཨུ་ད་ཀཾ ཧ་ར་ནྟེ, ཨུ་སུ་ཀཱ་རེ ཙ ཨུ་སུཾ ཨུ་ཛུཾ ཀ་རོ་ནྟེ, ཏ་ཙྪ་ཀེ ཙ དཱ་རཱུ་ནི ཏ་ཙྪ་ནྟེ དི་སྭཱ ཨེ་ཏྟ་ཀཾ ཨཱ་ར་མྨ་ཎཾ ག་ཧེ་ཏྭཱ པ་ཎྜི་ཏཱ ཨ་ཏྟཱ་ནཾ ད་མེ་ཏྭཱ ཨ་ར་ཧ་ཏྟཾ ག་ཎྷ་ནྟི་ཡེ་ཝཱ’’ཏི ཝ་ཏྭཱ ཨ་ནུ་ས་ནྡྷིཾ གྷ་ཊེ་ཏྭཱ དྷ་མྨཾ དེ་སེ་ནྟོ ཨི་མཾ གཱ་ཐ་མཱ་ཧ –
༨༠. ‘‘ཨུ་ད་ཀ་ཉྷི ན་ཡ་ནྟི ནེ་ཏྟི་ཀཱ, ཨུ་སུ་ཀཱ་རཱ ན་མ་ཡ་ནྟི ཏེ་ཛ་ནཾ;
དཱ་རུཾ ན་མ་ཡ་ནྟི ཏ་ཙྪ་ཀཱ, ཨ་ཏྟཱ་ནཾ ད་མ་ཡ་ནྟི པ་ཎྜི་ཏཱ’’ཏི.
ཏ་ཏྠ ཨུ་ད་ཀནྟི པ་ཐ་ཝི་ཡཱ ཐ་ལ་ཊྛཱ་ནཾ ཁ་ཎི་ཏྭཱ ཨཱ་ཝཱ་ཊ་ཊྛཱ་ནཾ པཱུ་རེ་ཏྭཱ མཱ་ཏི་ཀཾ ཝཱ ཀ་ཏྭཱ རུ་ཀྑ་དོ་ཎིཾ ཝཱ ཋ་པེ་ཏྭཱ ཨ་ཏྟ་ནཱ ཨི་ཙྪི་ཏི་ཙྪི་ཏ་ཊྛཱ་ནཾ ཨུ་ད་ཀཾ. ནེ་ནྟཱི་ཏི ནེ་ཏྟི་ཀཱ. ཏེ་ཛ་ནནྟི ཀ་ཎྜཾ. ཨི་དཾ ཝུ་ཏྟཾ ཧོ་ཏི – ནེ་ཏྟི་ཀཱ ཨ་ཏྟ་ནོ རུ་ཙི་ཡཱ ཨུ་ད་ཀཾ ན་ཡ་ནྟི, ཨུ་སུ་ཀཱ་རཱཔི ཏཱ་པེ་ཏྭཱ ཏེ་ཛ་ནཾ ན་མ་ཡ་ནྟི ཨུ་སུཾ ཨུ་ཛུཾ ཀ་རོ་ནྟི. ཏ་ཙྪ་ཀཱཔི ནེ་མི་ཨཱ་དཱི་ནཾ ཨ་ཏྠཱ་ཡ ཏ་ཙྪ་ནྟཱ དཱ་རུཾ ན་མ་ཡ་ནྟི ཨ་ཏྟ་ནོ རུ་ཙི་ཡཱ ཨུ་ཛུཾ ཝཱ ཝ་ངྐཾ ཝཱ ཀ་རོ་ནྟི. ཨེ་ཝཾ ཨེ་ཏྟ་ཀཾ ཨཱ་ར་མྨ་ཎཾ ཀ་ཏྭཱ པ་ཎྜི་ཏཱ སོ་ཏཱ་པ་ཏྟི་མ་གྒཱ་དཱི་ནི ཨུ་པྤཱ་དེ་ནྟཱ ཨ་ཏྟཱ་ནཾ ད་མ་ཡ་ནྟི, ཨ་ར་ཧ་ཏྟ་པྤ་ཏྟཱ པ་ན ཨེ་ཀ་ནྟ་ད་ནྟཱ ནཱ་མ ཧོ་ནྟཱི་ཏི.
དེ་ས་ནཱ་ཝ་སཱ་ནེ བ་ཧཱུ སོ་ཏཱ་པ་ཏྟི་ཕ་ལཱ་དཱི་ནི པཱ་པུ་ཎིཾ་སཱུ་ཏི.
པ་ཎྜི་ཏ་སཱ་མ་ཎེ་ར་ཝ་ཏྠུ པ་ཉྩ་མཾ.