༢. མ་རཱི་ཙི་ཀ་མྨ་ཊྛཱ་ནི་ཀ་ཏྠེ་ར་ཝ་ཏྠུ

ཕེ་ཎཱུ་པ་མནྟི ཨི་མཾ དྷ་མྨ་དེ་ས་ནཾ ས་ཏྠཱ སཱ་ཝ་ཏྠི་ཡཾ ཝི་ཧ་ར་ནྟོ ཨ་ཉྙ་ཏ་རཾ མ་རཱི་ཙི་ཀ་མྨ་ཊྛཱ་ནི་ཀཾ བྷི་ཀྑུཾ ཨཱ་ར་བྦྷ ཀ་ཐེ་སི.

སོ ཀི་ར བྷི་ཀྑུ ས་ཏྠུ ས་ནྟི་ཀེ ཀ་མྨ་ཊྛཱ་ནཾ ག་ཧེ་ཏྭཱ, ‘‘ས་མ་ཎ་དྷ་མྨཾ ཀ་རི་སྶཱ་མཱི’’ཏི ཨ་ར་ཉྙཾ པ་ཝི་སི་ཏྭཱ གྷ་ཊེ་ཏྭཱ ཝཱ་ཡ་མི་ཏྭཱ ཨ་ར་ཧ་ཏྟཾ པ་ཏྟུཾ ཨ་ས་ཀྐོ་ནྟོ ‘‘ཝི་སེ་སེ་ཏྭཱ ཀ་མྨ་ཊྛཱ་ནཾ ཀ་ཐཱ་པེ་སྶཱ་མཱི’’ཏི ས་ཏྠུ ས་ནྟི་ཀཾ ཨཱ་ག་ཙྪ་ནྟོ ཨ་ནྟ་རཱ་མ་གྒེ མ་རཱི་ཙིཾ དི་སྭཱ, ‘‘ཡ་ཐཱ ཨ་ཡཾ གི་མྷ་ས་མ་ཡེ ཨུ་ཊྛི་ཏཱ མ་རཱི་ཙི དཱུ་རེ ཋི་ཏཱ་ནཾ རཱུ་པ་ག་ཏཱ ཝི་ཡ པ་ཉྙཱ་ཡ་ཏི, ས་ནྟི་ཀཾ ཨཱ་ག་ཙྪ་ནྟཱ་ནཾ ནེ་ཝ པ་ཉྙཱ་ཡ་ཏི, ཨ་ཡཾ ཨ་ཏྟ་བྷཱ་ཝོ་པི ཨུ་པྤཱ་ད་ཝ་ཡ་ཊྛེ་ན ཨེ་ཝ་རཱུ་པོ’’ཏི མ་རཱི་ཙི་ཀ་མྨ་ཊྛཱ་ནཾ བྷཱ་ཝེ་ནྟོ ཨཱ་ག་ནྟྭཱ མ་གྒ་ཀི་ལ་ནྟོ ཨ་ཙི་ར་ཝ་ཏི་ཡཾ ནྷཱ་ཡི་ཏྭཱ ཨེ་ཀ་སྨིཾ ཙ་ཎྜ་སོ་ཏ་ཏཱི་རེ རུ་ཀྑ་ཚཱ་ཡཱ་ཡ ནི་སི་ནྣོ ཨུ་ད་ཀ་ཝེ་གཱ་བྷི་གྷཱ་ཏེ་ན ཨུ་ཊྛ་ཧི་ཏྭཱ མ་ཧ་ནྟེ མ་ཧ་ནྟེ ཕེ་ཎ་པི་ཎྜེ བྷི་ཛྫ་མཱ་ནེ དི་སྭཱ, ‘‘ཨ་ཡཾ ཨ་ཏྟ་བྷཱ་ཝོ་པི ཨུ་པྤ་ཛྫི་ཏྭཱ བྷི་ཛྫ་ན་ཊྛེ་ན ཨེ་ཝ་རཱུ་པོ་ཡེ་ཝཱ’’ཏི ཨཱ་ར་མྨ་ཎཾ ཨ་གྒ་ཧེ་སི. ས་ཏྠཱ ག་ནྡྷ་ཀུ་ཊི་ཡཾ ཋི་ཏོ་ཝ ཏཾ ཐེ་རཾ དི་སྭཱ, ‘‘ཨེ་ཝ་མེ་ཝ, བྷི་ཀྑུ, ཨེ་ཝ་རཱུ་པོ་ཝཱ་ཡཾ ཨ་ཏྟ་བྷཱ་ཝོ ཕེ་ཎ་པི་ཎྜོ ཝི་ཡ མ་རཱི་ཙི ཝི་ཡ ཨུ་པྤ་ཛྫ་ན་བྷི་ཛྫ་ན་ས་བྷཱ་ཝོ་ཡེ་ཝཱ’’ཏི ཝ་ཏྭཱ ཨི་མཾ གཱ་ཐ་མཱ་ཧ –

༤༦. ‘‘ཕེ་ཎཱུ་པ་མཾ ཀཱ་ཡ་མི་མཾ ཝི་དི་ཏྭཱ,

མ་རཱི་ཙི་དྷ་མྨཾ ཨ་བྷི་ས་མྦུ་དྷཱ་ནོ;

ཚེ་ཏྭཱ་ན མཱ་ར་སྶ པ་པུ་པྥ་ཀཱ་ནི,

ཨ་ད་སྶ་ནཾ མ་ཙྩུ་རཱ་ཛ་སྶ ག་ཙྪེ’’ཏི.

ཏ་ཏྠ ཕེ་ཎཱུ་པ་མནྟི ཨི་མཾ ཀེ་སཱ་དི་ས་མཱུ་ཧ་ས་ངྑཱ་ཏཾ ཀཱ་ཡཾ ཨ་བ་ལ་དུ་བྦ་ལ་ཊྛེ་ན ཨ་ན་དྡྷ་ནི་ཡ་ཏཱ་ཝ་ཀཱ་ལི་ཀ་ཊྛེ་ན ཕེ་ཎ་པི་ཎྜ་ས་རི་ཀྑ་ཀོ་ཏི ཝི་དི་ཏྭཱ. མ་རཱི་ཙི་དྷ་མྨནྟི ཡ་ཐཱ མ་རཱི་ཙི དཱུ་རེ ཋི་ཏཱ་ནཾ རཱུ་པ་ག་ཏཱ ཝི་ཡ ག་ཡ྄ཧཱུ་པ་གཱ ཝི་ཡ ཧོ་ཏི, ས་ནྟི་ཀེ ཨུ་པ་ག་ཙྪ་ནྟཱ་ནཾ རི་ཏྟཱ ཏུ་ཙྪཱ ཨ་ག་ཡ྄ཧཱུ་པ་གཱ ས་མྤ་ཛྫ་ཏི, ཨེ་ཝ་མེ་ཝ ཁ་ཎི་ཀ་ཨི་ཏྟ་ར་པ་ཙྩུ་པ་ཊྛཱ་ན་ཊྛེ་ན ཨ་ཡཾ ཀཱ་ཡོ་པི མ་རཱི་ཙི་དྷ་མྨོ་ཏི ཨ་བྷི་ས་མྦུ་དྷཱ་ནོ བུ་ཛ྄ཛྷ་ནྟོ, ཛཱ་ན་ནྟོ་ཏི ཨ་ཏྠོ. མཱ་ར་སྶ པ་པུ་པྥ་ཀཱ་ནཱིཏི མཱ་ར་སྶ པ་པུ་པྥ་ཀ་ས་ངྑཱ་ཏཱ་ནི ཏེ་བྷཱུ་མ་ཀཱ་ནི ཝ་ཊྚཱ་ནི ཨ་རི་ཡ་མ་གྒེ་ན ཚི་ནྡི་ཏྭཱ ཁཱི་ཎཱ་ས་ཝོ བྷི་ཀྑུ མ་ཙྩུ་རཱ་ཛ་སྶ ཨ་ད་སྶ་ནཾ ཨ་ཝི་ས་ཡཾ ཨ་མ་ཏ་མ་ཧཱ་ནི་བྦཱ་ནཾ ག་ཙྪེ་ཡྻཱ་ཏི.

གཱ་ཐཱ་པ་རི་ཡོ་སཱ་ནེ ཐེ་རོ ས་ཧ པ་ཊི་ས་མྦྷི་དཱ་ཧི ཨ་ར་ཧ་ཏྟཾ པ་ཏྭཱ ས་ཏྠུ སུ་ཝ་ཎྞ་ཝ་ཎྞཾ ས་རཱི་རཾ ཐོ་མེ་ནྟོ ཝ་ཎྞེ་ནྟོ ཝ་ནྡ་ནྟོ་ཝ ཨཱ་ག་ཏོ་ཏི.

མ་རཱི་ཙི་ཀ་མྨ་ཊྛཱ་ནི་ཀ་ཏྠེ་ར་ཝ་ཏྠུ དུ་ཏི་ཡཾ.