༤. ཀོ་ཎྜ་ཉྙ་བུ་དྡྷ་ཝཾ་ས་ཝ་ཎྞ་ནཱ
དཱི་པ་ངྐ་རེ ཀི་ར བྷ་ག་ཝ་ཏི པ་རི་ནི་བྦུ་ཏེ ཏ་སྶ སཱ་ས་ནཾ ཝ་སྶ་ས་ཏ་ས་ཧ་སྶཾ པ་ཝ་ཏྟི་ཏྠ. ཨ་ཐ བུ་དྡྷཱ་ནུ་བུ་དྡྷཱ་ནཾ སཱ་ཝ་ཀཱ་ནཾ ཨ་ནྟ་ར་དྷཱ་ནེ་ན སཱ་ས་ན་མྤི་སྶ ཨ་ནྟ་ར་དྷཱ་ཡི. ཨ་ཐ་སྶ ཨ་པ་ར་བྷཱ་གེ ཨེ་ཀ་མ་ས་ངྑྱེ་ཡྻ་མ་ཏི་ཀྐ་མི་ཏྭཱ ཨེ་ཀ་སྨིཾ ཀ་པྤེ ཀོ་ཎྜ་ཉྙོ ནཱ་མ ས་ཏྠཱ ཨུ་ད་པཱ་དི. སོ པ་ན བྷ་ག་ཝཱ སོ་ལ༹་ས་ཨ་ས་ངྑྱེ་ཡྻཾ ཀ་པྤཱ་ན་ཉྩ ས་ཏ་ས་ཧ་སྶཾ པཱ་ར་མི་ཡོ པཱུ་རེ་ཏྭཱ བོ་དྷི་ཉཱ་ཎཾ པ་རི་པཱ་ཙེ་ཏྭཱ ཝེ་སྶ་ནྟ་ར་ཏྟ་བྷཱ་ཝ་ས་དི་སེ ཨ་ཏྟ་བྷཱ་ཝེ ཋ་ཏྭཱ ཏ་ཏོ ཙ་ཝི་ཏྭཱ ཏུ་སི་ཏ་པུ་རེ ནི་བྦ་ཏྟི་ཏྭཱ ཏ་ཏྠ ཡཱ་ཝ་ཏཱ་ཡུ་ཀཾ ཋ་ཏྭཱ དེ་ཝ་ཏཱ་ནཾ པ་ཊི་ཉྙཾ ད་ཏྭཱ ཏུ་སི་ཏ་པུ་ར་ཏོ ཙ་ཝི་ཏྭཱ ར་མྨ་ཝ་ཏཱི་ན་ག་རེ སུ་ན་ནྡ་སྶ ནཱ་མ ར་ཉྙོ ཀུ་ལེ སུ་ཛཱ་ཏཱ་ཡ ནཱ་མ དེ་ཝི་ཡཱ ཀུ་ཙྪི་སྨིཾ པ་ཊི་ས་ནྡྷིཾ ཨ་གྒ་ཧེ་སི. ཏ་སྶ་པི པ་ཊི་ས་ནྡྷི་ཀྑ་ཎེ དཱི་པ་ངྐ་ར་བུ་དྡྷ་ཝཾ་སེ ཝུ་ཏྟ་པྤ་ཀཱ་རཱ་ནི དྭ་ཏྟིཾ་ས པཱ་ཊི་ཧཱ་རི་ཡཱ་ནི ནི་བྦ་ཏྟིཾ་སུ. སོ དེ་ཝ་ཏཱ་ཧི ཀ་ཏཱ་ར་ཀྑ་སཾ་ཝི་དྷཱ་ནོ ད་ས་ནྣཾ མཱ་སཱ་ནཾ ཨ་ཙྩ་ཡེ་ན མཱ་ཏུ་ཀུ་ཙྪི་ཏོ ནི་ཀྑ་མི་ཏྭཱ ས་བྦ་ས་ཏྟུ་ཏྟ་རོ ཨུ་ཏྟ་རཱ་བྷི་མུ་ཁོ ས་ཏྟ་པ་ད་ཝཱི་ཏི་ཧཱ་རེ་ན ག་ནྟྭཱ ས་བྦཱ ཙ དི་སཱ ཝི་ལོ་ཀེ་ཏྭཱ ཨཱ་ས་བྷིཾ ཝཱ་ཙཾ ནི་ཙྪཱ་རེ་སི – ‘‘ཨ་གྒོ་ཧ་མ་སྨི ལོ་ཀ་སྶ, ཛེ་ཊྛོ་ཧ་མ་སྨི ལོ་ཀ་སྶ, སེ་ཊྛོ་ཧ་མ་སྨི ལོ་ཀ་སྶ, ཨ་ཡ་མ་ནྟི་མཱ ཛཱ་ཏི, ན་ཏྠི དཱ་ནི པུ་ན་བྦྷ་ཝོ’’ཏི (དཱི. ནི. ༢.༣༡; མ. ནི. ༣.༢༠༧).
ཏ་ཏོ ཀུ་མཱ་ར་སྶ ནཱ་མ་ཀ་ར་ཎ་དི་ཝ་སེ ནཱ་མཾ ཀ་རོ་ནྟཱ ‘‘ཀོ་ཎྜ་ཉྙོ’’ཏི ནཱ་མ་མ་ཀཾ་སུ. སོ ཧི བྷ་ག་ཝཱ ཀོ་ཎྜ་ཉྙ་གོ་ཏྟོ ཨ་ཧོ་སི. ཏ་སྶ ཀི་ར ཏ་ཡོ པཱ་སཱ་དཱ ཨ་ཧེ་སུཾ – རཱ་མ, སུ་རཱ་མ, སུ་བྷ་ནཱ་མ་ཀཱ པ་ར་མ་ར་མ་ཎཱི་ཡཱ. ཏེ་སུ ཏཱི་ཎི ས་ཏ་ས་ཧ་སྶཱ་ནི ནཱ་ཊ་ཀི་ཏྠཱི་ནཾ ན་ཙྩ་གཱི་ཏ་ཝཱ་དི་ཏ་ཀུ་ས་ལཱ་ནཾ ས་བྦ་ཀཱ་ལཾ པ་ཙྩུ་པ་ཊྛི་ཏཱ་ནི ཨ་ཧེ་སུཾ. ཏ་སྶ རུ་ཙི་དེ་ཝཱི ནཱ་མ ཨ་གྒ་མ་ཧེ་སཱི ཨ་ཧོ་སི. ཝི་ཛི་ཏ་སེ་ནོ ནཱ་མ་སྶ པུ་ཏྟོ ཨ་ཧོ་སི. སོ ད་ས་ཝ་སྶ་ས་ཧ་སྶཱ་ནི ཨ་གཱ་རཾ ཨ་ཛ྄ཛྷཱ་ཝ་སི.
སོ པ་ན ཛི་ཎྞ་བྱཱ་དྷི་མ་ཏ་པ་བྦ་ཛི་ཏེ དི་སྭཱ ཨཱ་ཛ་ཉྙ་ར་ཐེ་ན ནི་ཀྑ་མི་ཏྭཱ པ་བྦ་ཛི་ཏྭཱ ད་ས མཱ་སེ པ་དྷཱ་ན་ཙ་རི་ཡཾ ཙ་རི. ཀོ་ཎྜ་ཉྙ་ཀུ་མཱ་རཾ པ་ན པ་བྦ་ཛ་ནྟཾ ད་ས ཛ་ན་ཀོ་ཊི་ཡོ ཨ་ནུ་པ་བྦ་ཛིཾ་སུ. སོ ཏེ་ཧི པ་རི་ཝུ་ཏོ ད་ས མཱ་སེ པ་དྷཱ་ན་ཙ་རི་ཡཾ ཙ་རི་ཏྭཱ ཝི་སཱ་ཁ་པུ་ཎྞ་མཱ་ཡ སུ་ན་ནྡ་གཱ་མེ ས་མ་ས་ཧི་ཏ་གྷ་ན་པ་ཡོ་དྷ་རཱ་ཡ ཡ་སོ་དྷ་རཱ་ཡ ནཱ་མ སེ་ཊྛི་དྷཱི་ཏཱ་ཡ དི་ནྣཾ པ་ར་མ་མ་དྷུ་རཾ མ་དྷུ་པཱ་ཡཱ་སཾ པ་རི་བྷུ་ཉྫི་ཏྭཱ ཕ་ལ་པ་ལླ་ཝ་ངྐུ་ར་ས་མ་ལ་ངྐ་ཏེ སཱ་ལ་ཝ་ནེ དི་ཝཱ་ཝི་ཧཱ་རཾ ཝཱི་ཏི་ནཱ་མེ་ཏྭཱ སཱ་ཡ་ནྷ་ས་མ་ཡེ ག་ཎཾ པ་ཧཱ་ཡ སུ་ན་ནྡ་ཀཱ་ཛཱི་ཝ་ཀེ་ན དི་ནྣཱ ཨ་ཊྛ ཏི་ཎ་མུ་ཊྛི་ཡོ ག་ཧེ་ཏྭཱ སཱ་ལ་ཀ་ལྱཱ་ཎི་རུ་ཀྑཾ ཏི་ཀྑ་ཏྟུཾ པ་ད་ཀྑི་ཎཾ ཀ་ཏྭཱ པུ་བྦ་དི་སཱ་བྷཱ་གཾ ཨོ་ལོ་ཀེ་ཏྭཱ བོ་དྷི་རུ་ཀྑཾ པི་ཊྛི་ཏོ ཀ་ཏྭཱ ཨ་ཊྛ་པ་ཎྞཱ་ས་ཧ་ཏྠ་ཝི་ཏྠ་ཏཾ ཏི་ཎ་ས་ནྠ་རཾ ས་ནྠ་རི་ཏྭཱ པ་ལླ་ངྐཾ ཨཱ་བྷུ་ཛི་ཏྭཱ ཙ་ཏུ་ར་ངྒ་ཝཱི་རི་ཡཾ ཨ་དྷི་ཊྛཱ་ཡ མཱ་ར་བ་ལཾ ཝི་དྷ་མི་ཏྭཱ ར་ཏྟི་ཡཱ པ་ཋ་མ་ཡཱ་མེ པུ་བྦེ་ནི་ཝཱ་སཱ་ནུ་སྶ་ཏི་ཉཱ་ཎཾ ཝི་སོ་དྷེ་ཏྭཱ མ་ཛ྄ཛྷི་མ་ཡཱ་མེ དི་བྦ་ཙ་ཀྑུཾ ཝི་སོ་དྷེ་ཏྭཱ པ་ཙྪི་མ་ཡཱ་མེ པ་ཙྩ་ཡཱ་ཀཱ་རཾ ས་མྨ་སི་ཏྭཱ ཨཱ་ནཱ་པཱ་ན་ཙ་ཏུ་ཏྠ་ཛ྄ཛྷཱ་ན་ཏོ ཝུ་ཊྛཱ་ཡ པ་ཉྩ་སུ ཁ་ནྡྷེ་སུ ཨ་བྷི་ནི་ཝི་སི་ཏྭཱ ཨུ་ད་ཡ་བྦ་ཡ་ཝ་སེ་ན ས་མ་པ་ཉྙཱ་ས ལ་ཀྑ་ཎཱ་ནི དི་སྭཱ ཡཱ་ཝ གོ་ཏྲ་བྷུ་ཉཱ་ཎཾ ཝི་པ་སྶ་ནཾ ཝ་ཌྜྷེ་ཏྭཱ ཙ་ཏྟཱ་རི མ་གྒ་ཉཱ་ཎཱ་ནི ཙ་ཏྟཱ་རི ཙ ཕ་ལ་ཉཱ་ཎཱ་ནི ཙ་ཏ་སྶོ པ་ཊི་ས་མྦྷི་དཱ ཙ་ཏུ་ཡོ་ནི་པ་རི་ཙྪེ་ད་ཀ་ཉཱ་ཎཾ པ་ཉྩ་ག་ཏི་པ་རི་ཙྪེ་ད་ཀ་ཉཱ་ཎཾ ཚ ཨ་སཱ་དྷཱ་ར་ཎ་ཉཱ་ཎཱ་ནི ས་ཀ་ལེ ཙ བུ་དྡྷ་གུ་ཎེ པ་ཊི་ཝི་ཛ྄ཛྷི་ཏྭཱ པ་རི་པུ་ཎྞ་ས་ངྐ་པྤོ བོ་དྷི་མཱུ་ལེ ནི་སི་ནྣོ་ཝ –
‘‘ཨ་ནེ་ཀ་ཛཱ་ཏི་སཾ་སཱ་རཾ, ས་ནྡྷཱ་ཝི་སྶཾ ཨ་ནི་བྦི་སཾ;
ག་ཧ་ཀཱ་རཾ ག་ཝེ་ས་ནྟོ, དུ་ཀྑཱ ཛཱ་ཏི པུ་ན་པྤུ་ནཾ.
‘‘ག་ཧ་ཀཱ་ར་ཀ དི་ཊྛོ་སི, པུ་ན གེ་ཧཾ ན ཀཱ་ཧ་སི;
ས་བྦཱ ཏེ ཕཱ་སུ་ཀཱ བྷ་གྒཱ, ག་ཧ་ཀཱུ་ཊཾ ཝི་ས་ངྑ་ཏཾ;
ཝི་ས་ངྑཱ་ར་ག་ཏཾ ཙི་ཏྟཾ, ཏ་ཎྷཱ་ནཾ ཁ་ཡ་མ་ཛ྄ཛྷ་གཱ. (དྷ. པ. ༡༥༣-༡༥༤);
‘‘ཨ་ཡོ་གྷ་ན་ཧ་ཏ་སྶེ་ཝ, ཛ་ལ་ཏོ ཛཱ་ཏ་ཝེ་ད་སོ;
ཨ་ནུ་པུ་བྦཱུ་པ་ས་ནྟ་སྶ, ཡ་ཐཱ ན ཉཱ་ཡ་ཏེ ག་ཏི.
‘‘ཨེ་ཝཾ ས་མྨཱ ཝི་མུ་ཏྟཱ་ནཾ, ཀཱ་མ་བ་ནྡྷོ་གྷ་ཏཱ་རི་ནཾ;
པ་ཉྙཱ་པེ་ཏུཾ ག་ཏཱི ན་ཏྠི, པ་ཏྟཱ་ནཾ ཨ་ཙ་ལཾ སུ་ཁ’’ནྟི. (ཨུ་དཱ. ༨༠) –
ཨེ་ཝཾ ཨུ་དཱ་ནཾ ཨུ་དཱ་ནེ་ཏྭཱ ས་ཏྟ་ས་ཏྟཱ་ཧཾ བོ་དྷི་མཱུ་ལེ་ཡེ་ཝ ཕ་ལ་ས་མཱ་པ་ཏྟི་སུ་ཁེ་ན ཝཱི་ཏི་ནཱ་མེ་ཏྭཱ ཨ་ཊྛ་མེ ས་ཏྟཱ་ཧེ བྲ་ཧྨུ་ནོ ཨ་ཛ྄ཛྷེ་ས་ནཾ པ་ཊི་ཙྩ – ‘‘ཀ་སྶ ནུ ཁོ ཨ་ཧཾ པ་ཋ་མཾ དྷ་མྨཾ དེ་སེ་ཡྻ’’ནྟི (མ. ནི. ༡.༢༨༤; ༢.༣༤༡; མ་ཧཱ་ཝ. ༡༠) ཨུ་པ་དྷཱ་རེ་ནྟོ ཨ་ཏྟ་ནཱ ས་དྡྷིཾ པ་བྦ་ཛི་ཏཱ ད་ས བྷི་ཀྑུ་ཀོ་ཊི་ཡོ ཨ་དྡ་ས. ‘‘ཨི་མེ པ་ན ཀུ་ལ་པུ་ཏྟཱ ས་མུ་པ་ཙི་ཏ་ཀུ་ས་ལ་མཱུ་ལཱ མཾ པ་བྦ་ཛ་ནྟཾ ཨ་ནུ་པ་བྦ་ཛི་ཏཱ མ་ཡཱ ས་དྡྷིཾ པ་དྷཱ་ནཾ ཙ་རི་ཏྭཱ མཾ ཨུ་པ་ཊྛ་ཧིཾ་སུ, ཧ་ནྡཱ་ཧཾ ཨི་མེ་སཾ ས་བྦ་པ་ཋ་མཾ དྷ་མྨཾ དེ་སེ་ཡྻ’’ནྟི ཨེ་ཝཾ ཨུ་པ་དྷཱ་རེ་ཏྭཱ – ‘‘ཨི་དཱ་ནི པ་ན ཏེ ཀ་ཏྠ ཝ་ས་ནྟཱི’’ཏི ཨོ་ལོ་ཀེ་ནྟོ – ‘‘ཨི་ཏོ ཨ་ཊྛཱ་ར་ས་ཡོ་ཛ་ནི་ཀེ ཨ་རུ་ནྡྷ་ཝ་ཏཱི་ན་ག་རེ དེ་ཝ་ཝ་ནེ ཝི་ཧ་ར་ནྟཱི’’ཏི དི་སྭཱ – ‘‘ཏེ་སཾ དྷ་མྨཾ དེ་སེ་ཏུཾ ག་མི་སྶཱ་མཱི’’ཏི པ་ཏྟ་ཙཱི་ཝ་ར་མཱ་དཱ་ཡ སེ་ཡྻ་ཐཱ་པི ནཱ་མ བ་ལ་ཝཱ པུ་རི་སོ ས་མི་ཉྫི་ཏཾ ཝཱ བཱ་ཧཾ པ་སཱ་རེ་ཡྻ, པ་སཱ་རི་ཏཾ ཝཱ བཱ་ཧཾ ས་མི་ཉྫེ་ཡྻ, ཨེ་ཝ་མེ་ཝ བོ་དྷི་མཱུ་ལེ ཨ་ནྟ་ར་ཧི་ཏོ དེ་ཝ་ཝ་ནེ པཱ་ཏུ་ར་ཧོ་སི.
ཏ་སྨི་ཉྩ ས་མ་ཡེ ཏཱ ད་ས བྷི་ཀྑུ་ཀོ་ཊི་ཡོ ཨ་རུ་ནྡྷ་ཝ་ཏཱི་ན་ག་རཾ ཨུ་པ་ནི་སྶཱ་ཡ དེ་ཝ་ཝ་ནེ ཝི་ཧ་ར་ནྟི. ཏེ པ་ན བྷི་ཀྑཱུ ད་ས་བ་ལཾ དཱུ་ར་ཏོ་ཝ ཨཱ་ག་ཙྪ་ནྟཾ དི་སྭཱ པ་ས་ནྣ་མཱ་ན་སཱ པ་ཙྩུ་གྒ་ནྟྭཱ, བྷ་ག་ཝ་ཏོ པ་ཏྟ་ཙཱི་ཝ་རཾ པ་ཊི་གྒ་ཧེ་ཏྭཱ, བུ་དྡྷཱ་ས་ནཾ པ་ཉྙཱ་པེ་ཏྭཱ, ས་ཏྠུ གཱ་ར་ཝཾ ཀ་ཏྭཱ, བྷ་ག་ཝ་ནྟཾ ཝ་ནྡི་ཏྭཱ, པ་རི་ཝཱ་རེ་ཏྭཱ ཨེ་ཀ་མ་ནྟཾ ནི་སཱི་དིཾ་སུ. ཏ་ཏྲ ཀོ་ཎྜ་ཉྙོ ད་ས་བ་ལོ མུ་ནི་ག་ཎ་པ་རི་ཝུ་ཏོ བུ་དྡྷཱ་ས་ནེ ནི་སི་ནྣོ ཏི་ད་ས་ག་ཎ་པ་རི་ཝུ་ཏོ ད་ས་ས་ཏ་ན་ཡ་ནོ ཝི་ཡ ཝི་མ་ལ་ག་ག་ན་ཏ་ལ་ག་ཏོ ས་ར་ད་ས་མ་ཡ་ར་ཛ་ནི་ཀ་རོ ཝི་ཡ ཏཱ་རཱ་ག་ཎ་པ་རི་ཝུ་ཏོ པུ་ཎྞ་ཙ་ནྡོ ཝི་ཡ ཝི་རོ་ཙི་ཏྠ. ཨ་ཐ ས་ཏྠཱ ཏེ་སཾ ས་བྦ་བུ་དྡྷ་ནི་སེ་ཝི་ཏཾ ཨ་ནུ་ཏྟ་རཾ ཏི་པ་རི་ཝ་ཊྚཾ དྭཱ་ད་སཱ་ཀཱ་རཾ དྷ་མྨ་ཙ་ཀྐ་པྤ་ཝ་ཏྟ་ན་སུ་ཏྟ་ནྟཾ ཀ་ཐེ་ཏྭཱ ད་ས་བྷི་ཀྑུ་ཀོ་ཊི་པྤ་མུ་ཁཱ ས་ཏ་ས་ཧ་སྶ་དེ་ཝ་མ་ནུ་སྶ་ཀོ་ཊི་ཡོ དྷ་མྨཱ་མ་ཏཾ པཱ་ཡེ་སི. ཏེ་ན ཝུ་ཏྟཾ –
༡. ‘‘དཱི་པ་ངྐ་ར་སྶ ཨ་པ་རེ་ན, ཀོ་ཎྜ་ཉྙོ ནཱ་མ ནཱ་ཡ་ཀོ;
ཨ་ན་ནྟ་ཏེ་ཛོ ཨ་མི་ཏ་ཡ་སོ, ཨ་པྤ་མེ་ཡྻོ དུ་རཱ་ས་དོ.
༢. ‘‘དྷ་ར་ཎཱུ་པ་མོ ཁ་མ་ནེ་ན, སཱི་ལེ་ན སཱ་ག་རཱུ་པ་མོ;
ས་མཱ་དྷི་ནཱ མེ་རཱུ་པ་མོ, ཉཱ་ཎེ་ན ག་ག་ནཱུ་པ་མོ.
༣. ‘‘ཨི་ནྡྲི་ཡ་བ་ལ་བོ་ཛ྄ཛྷ་ངྒ-མ་གྒ་ས་ཙྩ་པྤ་ཀཱ་ས་ནཾ;
པ་ཀཱ་སེ་སི ས་དཱ བུ་དྡྷོ ཧི་ཏཱ་ཡ ས་བྦ་པཱ་ཎི་ནཾ.
༤. ‘‘དྷ་མྨ་ཙ་ཀྐཾ པ་ཝ་ཏྟེ་ནྟེ, ཀོ་ཎྜ་ཉྙེ ལོ་ཀ་ནཱ་ཡ་ཀེ;
ཀོ་ཊི་ས་ཏ་ས་ཧ་སྶཱ་ནཾ, པ་ཋ་མཱ་བྷི་ས་མ་ཡོ ཨ་ཧཱུ’’ཏི.
ཏ་ཏྠ དཱི་པ་ངྐ་ར་སྶ ཨ་པ་རེ་ནཱཏི དཱི་པ་ངྐ་ར་སྶ ས་ཏྠུ་ནོ ཨ་པ་ར་བྷཱ་གེ་ཏི ཨ་ཏྠོ. ཀོ་ཎྜ་ཉྙོ ནཱ་མཱཏི ཨ་ཏྟ་ནོ གོ་ཏྟ་ཝ་སེ་ན ས་མ་དྷི་ག་ཏ་ནཱ་མ་དྷེ་ཡྻོ. ནཱ་ཡ་ཀོཏི ཝི་ནཱ་ཡ་ཀོ. ཨ་ན་ནྟ་ཏེ་ཛོཏི ཨ་ཏྟ་ནོ སཱི་ལ་གུ་ཎ་ཉཱ་ཎ་པུ་ཉྙ་ཏེ་ཛེ་ན ཨ་ན་ནྟ་ཏེ་ཛོ. ཧེ་ཊྛ་ཏོ ཨ་ཝཱི་ཙི ཨུ་པ་རི བྷ་ཝ་གྒཾ ཏི་རི་ཡ་ཏོ ཨ་ན་ནྟཱ ལོ་ཀ་དྷཱ་ཏུ་ཡོ ཨེ་ཏྠ་ནྟ་རེ ཨེ་ཀ་པུ་གྒ་ལོ་པི ཏ་སྶ མུ་ཁཾ ཨོ་ལོ་ཀེ་ཏྭཱ ཋཱ་ཏུཾ ས་མ་ཏྠོ ནཱ་མ ན་ཏྠི. ཏེ་ན ཝུ་ཏྟཾ ‘‘ཨ་ན་ནྟ་ཏེ་ཛོ’’ཏི. ཨ་མི་ཏ་ཡ་སོཏི ཨ་ན་ནྟ་པ་རི་ཝཱ་རོ. ཏ་སྶ ཧི བྷ་ག་ཝ་ཏོ ཝ་སྶ་ས་ཏ་ས་ཧ་སྶཱ་ནི ཡཱ་ཝ པ་རི་ནི་བྦཱ་ན་ས་མ་ཡཾ ཨེ་ཏྠ་ནྟ་རེ བྷི་ཀྑུ་པ་རི་སཱ་ཡ ག་ཎ་ན་པ་རི་ཙྪེ་དོ ནཱ་མ ནཱ་ཧོ་སི. ཏ་སྨཱ ‘‘ཨ་མི་ཏ་ཡ་སོ’’ཏི ཝུ་ཙྩ་ཏི. ཨ་མི་ཏ་གུ་ཎ་ཀི་ཏྟི་པི ‘‘ཨ་མི་ཏ་ཡ་སོ’’ཏི ཝུ་ཙྩ་ཏི. ཨ་པྤ་མེ་ཡྻོཏི གུ་ཎ་ག་ཎ་པ་རི་མཱ་ཎ་ཝ་སེ་ན ན་པྤ་མེ་ཡྻོ་ཏི ཨ་པྤ་མེ་ཡྻོ. ཡ་ཐཱ་ཧ –
‘‘བུ་དྡྷོ་པི བུ་དྡྷ་སྶ བྷ་ཎེ་ཡྻ ཝ་ཎྞཾ, ཀ་པྤ་མྤི ཙེ ཨ་ཉྙ་མ་བྷཱ་ས་མཱ་ནོ;
ཁཱི་ཡེ་ཐ ཀ་པྤོ ཙི་ར་དཱི་གྷ་མ་ནྟ་རེ, ཝ་ཎྞོ ན ཁཱི་ཡེ་ཐ ཏ་ཐཱ་ག་ཏ་སྶཱ’’ཏི. (དཱི. ནི. ཨ་ཊྛ. ༡.༣༠༤; ༣.༡༤༡; མ. ནི. ཨ་ཊྛ. ༢.༤༢༥; ཨུ་དཱ. ཨ་ཊྛ. ༥༣; ཙ་རི་ཡཱ. ཨ་ཊྛ. ནི་དཱ་ན་ཀ་ཐཱ);
ཏ་སྨཱ ཨ་པྤ་མེ་ཡྻ་གུ་ཎ་ག་ཎ་ཏྟཱ ‘‘ཨ་པྤ་མེ་ཡྻོ’’ཏི ཝུ་ཙྩ་ཏི. དུ་རཱ་ས་དོཏི དུ་རུ་པ་ས་ངྐ་མ་ནཱི་ཡོ, ཨཱ་ས་ཛྫ གྷ་ཊྚེ་ཏྭཱ ཨུ་པ་ས་ངྐ་མི་ཏུ་མ་ས་ཀྐུ་ཎེ་ཡྻ་བྷཱ་ཝ་ཏོ དུ་རཱ་ས་དོ, དུ་ར་བྷི་བྷ་ཝ་ནཱི་ཡོ་ཏི ཨ་ཏྠོ.
དྷ་ར་ཎཱུ་པ་མོཏི དྷ་ར་ཎཱི་ས་མོ. ཁ་མ་ནེ་ནཱཏི ཁ་ནྟི་ཡཱ, ཙ་ཏུ་ན་ཧུ་ཏཱ་དྷི་ཀ་དྭི་ཡོ་ཛ་ན་ས་ཏ་ས་ཧ་སྶ་བ་ཧ་ལཱ མ་ཧཱ་པ་ཐ་ཝཱི ཝི་ཡ པ་ཀ་ཏི་ཝཱ་ཏེ་ན ལཱ་བྷཱ་ལཱ་བྷ་ཨི་ཊྛཱ་ནི་ཊྛཱ་དཱི་ཧི ཨ་ཀ་མྤ་ན་བྷཱ་ཝ་ཏོ ‘‘དྷ་ར་ཎཱུ་པ་མོ’’ཏི ཝུ་ཙྩ་ཏི. སཱི་ལེ་ན སཱ་ག་རཱུ་པ་མོཏི སཱི་ལ་སཾ་ཝ་རེ་ན ཝེ་ལཱ་ནཱ་ཏི་ཀྐ་མ་ན་བྷཱ་ཝེ་ན སཱ་ག་ར་ས་མོ. ‘‘མ་ཧཱ་ས་མུ་དྡོ, བྷི་ཀྑ་ཝེ, ཋི་ཏ་དྷ་མྨོ ཝེ་ལཾ ནཱ་ཏི་ཝ་ཏྟ་ཏཱི’’ཏི (ཨ. ནི. ༨.༡༩; ཙཱུ་ལ༹་ཝ. ༣༨༤; མི. པ. ༦.༢.༡༠) ཧི ཝུ་ཏྟཾ.
ས་མཱ་དྷི་ནཱ མེ་རཱུ་པ་མོཏི ས་མཱ་དྷི་པ་ཊི་པ་ཀྑ་བྷཱུ་ཏ་དྷ་མྨ་ཛ་ནི་ཏ་ཀ་མྤཱ་བྷཱ་ཝ་ཏོ མེ་རུ་ནཱ གི་རི་ཝ་རེ་ན ས་མོ, ས་དི་སོ་ཏི ཨ་ཏྠོ. མེ་རུ་གི་རི་ཝ་རོ ཝི་ཡ ཐི་ར་ཏ་ར་ས་རཱི་རོ་ཏི ཝཱ. ཉཱ་ཎེ་ན ག་ག་ནཱུ་པ་མོཏི ཨེ་ཏྠ བྷ་ག་ཝ་ཏོ ཉཱ་ཎ་སྶ ཨ་ན་ནྟ་བྷཱ་ཝེ་ན ཨ་ན་ནྟཱ་ཀཱ་སེ་ན ཨུ་པ་མཱ ཀ་ཏཱ. ཙ་ཏྟཱ་རི ཨ་ན་ནྟཱ་ནི ཝུ་ཏྟཱ་ནི བྷ་ག་ཝ་ཏཱ. ཡ་ཐཱ་ཧ –
‘‘ས་ཏྟ་ཀཱ་ཡོ ཙ ཨཱ་ཀཱ་སོ, ཙ་ཀྐ་ཝཱ་ལཱ༹ ཙ་ན་ནྟ་ཀཱ;
བུ་དྡྷ་ཉཱ་ཎཾ ཨ་པྤ་མེ་ཡྻཾ, ན ས་ཀྐཱ ཨེ་ཏེ ཝི་ཛཱ་ནི་ཏུ’’ནྟི. (བུ. ཝཾ. ༡.༦༤);
ཏ་སྨཱ ཨ་ན་ནྟ་སྶ ཉཱ་ཎ་སྶ ཨ་ན་ནྟེ་ན ཨཱ་ཀཱ་སེ་ན ཨུ་པ་མཱ ཀ་ཏཱ་ཏི.
ཨི་ནྡྲི་ཡ་བ་ལ་བོ་ཛ྄ཛྷ་ངྒ་མ་གྒ་ས་ཙྩ་པྤ་ཀཱ་ས་ནནྟི ཨེ་ཏེ་སཾ ཨི་ནྡྲི་ཡ་བ་ལ་བོ་ཛ྄ཛྷ་ངྒ་མ་གྒ་ས་ཙྩཱ་ནཾ ག་ཧ་ཎེ་ན ས་ཏི་པ་ཊྛཱ་ན་ས་མྨ་པྤ་དྷཱ་ནི་དྡྷི་པཱ་དཱ་པི ག་ཧི་ཏཱ་ཝ ཧོ་ནྟི. ཏ་སྨཱ ཨི་ནྡྲི་ཡཱ་དཱི་ནཾ ཙ་ཏུ་ས་ངྑེ་པཱ་ནཾ ཝ་སེ་ན ས་ཏྟ་ཏྟིཾ་ས་བོ་དྷི་པ་ཀྑི་ཡ་དྷ་མྨཱ་ནཾ པ་ཀཱ་ས་ན་དྷ་མྨཾ པ་ཀཱ་སེ་སི, དེ་སེ་སཱི་ཏི ཨ་ཏྠོ. ཧི་ཏཱ་ཡཱཏི ཧི་ཏ་ཏྠཾ. དྷ་མྨ་ཙ་ཀྐཾ པ་ཝ་ཏྟེ་ནྟེཏི དེ་ས་ནཱ་ཉཱ་ཎེ པ་ཝ་ཏྟི་ཡ་མཱ་ནེ.
ཏ་ཏོ ཨ་པ་ར་བྷཱ་གེ མ་ཧཱ་མ་ངྒ་ལ་ས་མཱ་ག་མེ ད་ས་སུ ཙ་ཀྐ་ཝཱ་ལ༹་ས་ཧ་སྶེ་སུ དེ་ཝ་ཏཱ་ཡོ སུ་ཁུ་མེ ཨ་ཏྟ་བྷཱ་ཝེ མཱ་པེ་ཏྭཱ ཨི་མ་སྨི་ཉྙེ་ཝ ཙ་ཀྐ་ཝཱ་ལེ༹ ས་ནྣི་པ་ཏིཾ་སུ. ཏ་ཏྠ ཀི་ར ཨ་ཉྙ་ཏ་རོ དེ་ཝ་པུ་ཏྟོ ཀོ་ཎྜ་ཉྙ་ད་ས་བ་ལཾ མ་ངྒ་ལ་པ་ཉྷཾ པུ་ཙྪི. ཏ་སྶ བྷ་ག་ཝཱ མ་ངྒ་ལཱ་ནི ཀ་ཐེ་སི. ཏ་ཏྠ ན་ཝུ་ཏི་ཀོ་ཊི་ས་ཧ་སྶཱ་ནི ཨ་ར་ཧ་ཏྟཾ པཱ་པུ་ཎིཾ་སུ. སོ་ཏཱ་པ་ནྣཱ་དཱི་ནཾ ག་ཎ་ན་པ་རི་ཙྪེ་དོ ནཱ་མ ནཱ་ཧོ་སི. ཏེ་ན ཝུ་ཏྟཾ –
༥. ‘‘ཏ་ཏོ པ་ར་མྤི དེ་སེ་ནྟེ, ན་ར་མ་རཱུ་ནཾ ས་མཱ་ག་མེ;
ན་ཝུ་ཏི་ཀོ་ཊི་ས་ཧ་སྶཱ་ནཾ, དུ་ཏི་ཡཱ་བྷི་ས་མ་ཡོ ཨ་ཧཱུ’’ཏི.
ཏ་ཏྠ ཏ་ཏོ པ་ར་མྤཱིཏི ཏ་ཏོ ཨ་པ་ར་བྷཱ་གེ་པི. དེ་སེ་ནྟེཏི བྷ་ག་ཝ་ཏི དྷ་མྨཾ དེ་སེ་ནྟེ. ན་ར་མ་རཱུ་ནནྟི ན་རཱ་ན་ཉྩེ་ཝ ཨ་མ་རཱ་ན་ཉྩ, ཡ་དཱ པ་ན བྷ་ག་ཝཱ ག་ག་ན་ཏ་ལེ ཏི་ཏྠི་ཡ་མཱ་ན་མ་དྡ་ནཾ ཡ་མ་ཀ་པཱ་ཊི་ཧཱ་རི་ཡཾ ཀ་རོ་ནྟོ དྷ་མྨཾ དེ་སེ་སི ཏ་དཱ ཨ་སཱི་ཏི་ཀོ་ཊི་ས་ཧ་སྶཱ་ནི ཨ་ར་ཧ་ཏྟཾ པཱ་པུ་ཎིཾ་སུ. ཏཱི་སུ ཕ་ལེ་སུ པ་ཏི་ཊྛི་ཏཱ ག་ཎ་ན་པ་ཐཾ ཝཱི་ཏི་ཝ་ཏྟཱ. ཏེ་ན ཝུ་ཏྟཾ –
༦. ‘‘ཏི་ཏྠི་ཡེ ཨ་བྷི་མ་དྡ་ནྟོ, ཡ་དཱ དྷ་མྨ་མ་དེ་ས་ཡི;
ཨ་སཱི་ཏི་ཀོ་ཊི་ས་ཧ་སྶཱ་ནཾ, ཏ་ཏི་ཡཱ་བྷི་ས་མ་ཡོ ཨ་ཧཱུ’’ཏི.
ཏ་ཏྠ ཏ་དཱ-ས་དྡཾ ཨཱ་ནེ་ཏྭཱ ཨ་ཏྠོ ད་ཊྛ་བྦོ. ཡ་དཱ བྷ་ག་ཝཱ དྷ་མྨཾ དེ་སེ་སི, ཏ་དཱ ཨ་སཱི་ཏི་ཀོ་ཊི་ས་ཧ་སྶཱ་ནཾ དྷ་མྨཱ་བྷི་ས་མ་ཡོ ཨ་ཧཱུ་ཏི.
ཀོ་ཎྜ་ཉྙོ ཀི་ར ས་ཏྠཱ ཨ་བྷི་ས་མྦོ་དྷིཾ པ་ཏྭཱ པ་ཋ་མ་ཝ་སྶཾ ཙ་ནྡ་ཝ་ཏཱི་ན་ག་རཾ ཨུ་པ་ནི་སྶཱ་ཡ ཙ་ནྡཱ་རཱ་མེ ཝི་ཧཱ་སི. ཏ་ཏྠ སུ་ཙི་ནྡྷ་ར་སྶ ནཱ་མ བྲཱ་ཧྨ་ཎ་མ་ཧཱ་སཱ་ལ་སྶ པུ་ཏྟོ བྷ་དྡ་མཱ་ཎ་ཝོ ནཱ་མ ཡ་སོ་དྷ་ར་བྲཱ་ཧྨ་ཎ་སྶ པུ་ཏྟོ སུ་བྷ་དྡ་མཱ་ཎ་ཝོ ཙ ཀོ་ཎྜ་ཉྙ་སྶ བུ་དྡྷ་སྶ ས་མྨུ་ཁཱ དྷ་མྨ་དེ་ས་ནཾ སུ་ཏྭཱ པ་ས་ནྣ་མཱ་ན་སཱ ད་ས་ཧི མཱ་ཎ་ཝ་ཀ་ས་ཧ་སྶེ་ཧི ས་དྡྷིཾ ཏ་སྶ ས་ནྟི་ཀེ པ་བྦ་ཛི་ཏྭཱ ཨ་ར་ཧ་ཏྟཾ པཱ་པུ་ཎིཾ་སུ.
ཨ་ཐ ཀོ་ཎྜ་ཉྙོ ས་ཏྠཱ ཛེ་ཊྛ་མཱ་ས་པུ་ཎྞ་མཱ་ཡ སུ་བྷ་དྡ་ཏྠེ་ར་པྤ་མུ་ཁེ་ན ཀོ་ཊི་ས་ཏ་ས་ཧ་སྶེ་ན པ་རི་ཝུ་ཏོ པཱ་ཏི་མོ་ཀྑ་མུ་དྡི་སི, སོ པ་ཋ་མོ ས་ནྣི་པཱ་ཏོ ཨ་ཧོ་སི. ཏ་ཏོ ཨ་པ་ར་བྷཱ་གེ ཀོ་ཎྜ་ཉྙ་ས་ཏྠུ་ནོ པུ་ཏྟེ ཝི་ཛི་ཏ་སེ་ནེ ནཱ་མ ཨ་ར་ཧ་ཏྟཾ པ་ཏྟེ ཏཾ་པ་མུ་ཁ་སྶ ཀོ་ཊི་ས་ཧ་སྶ་སྶ མ་ཛ྄ཛྷེ བྷ་ག་ཝཱ པཱ་ཏི་མོ་ཀྑཾ ཨུ་དྡི་སི, སོ དུ་ཏི་ཡོ ས་ནྣི་པཱ་ཏོ ཨ་ཧོ་སི. ཨ་ཐཱ་པ་རེ་ན ས་མ་ཡེ་ན ད་ས་བ་ལོ ཛ་ན་པ་ད་ཙཱ་རི་ཀཾ ཙ་ར་ནྟོ ཨུ་དེ་ན་རཱ་ཛཱ་ནཾ ནཱ་མ ན་ཝུ་ཏི་ཀོ་ཊི་ཛ་ན་པ་རི་ཝཱ་རཾ པ་བྦཱ་ཛེ་སི ས་དྡྷིཾ ཏཱ་ཡ པ་རི་སཱ་ཡ. ཏ་སྨིཾ པ་ན ཨ་ར་ཧ་ཏྟཾ པ་ཏྟེ ཏཾ་པ་མུ་ཁེ་ཧི ན་ཝུ་ཏི་ཡཱ ཨ་ར་ཧ་ནྟ་ཀོ་ཊཱི་ཧི བྷ་ག་ཝཱ པ་རི་ཝུ་ཏོ པཱ་ཏི་མོ་ཀྑཾ ཨུ་དྡི་སི, སོ ཏ་ཏི་ཡོ ས་ནྣི་པཱ་ཏོ ཨ་ཧོ་སི. ཏེ་ན ཝུ་ཏྟཾ –
༧. ‘‘ས་ནྣི་པཱ་ཏཱ ཏ་ཡོ ཨཱ་སུཾ, ཀོ་ཎྜ་ཉྙ་སྶ མ་ཧེ་སི་ནོ;
ཁཱི་ཎཱ་ས་ཝཱ་ནཾ ཝི་མ་ལཱ་ནཾ, ས་ནྟ་ཙི་ཏྟཱ་ན ཏཱ་དི་ནཾ.
༨. ‘‘ཀོ་ཊི་ས་ཏ་ས་ཧ་སྶཱ་ནཾ, པ་ཋ་མོ ཨཱ་སི ས་མཱ་ག་མོ;
དུ་ཏི་ཡོ ཀོ་ཊི་ས་ཧ་སྶཱ་ནཾ, ཏ་ཏི་ཡོ ན་ཝུ་ཏི་ཀོ་ཊི་ན’’ནྟི.
ཏ་དཱ ཀི་ར ཨ་མྷཱ་ཀཾ བོ་དྷི་ས་ཏྟོ ཝི་ཛི་ཏཱ་ཝཱི ནཱ་མ ཙ་ཀྐ་ཝ་ཏྟཱི ཧུ་ཏྭཱ ཙ་ནྡ་ཝ་ཏཱི་ན་ག་རེ པ་ཊི་ཝ་ས་ཏི. སོ ཀི་ར ཨ་ནེ་ཀ་ན་ར་ཝ་ར་པ་རི་ཝུ་ཏོ ས་ལི་ལ་ནི་དྷི་ནི་ཝ་ས་ནཾ ས་མེ་རུ་ཡུ་ག་ནྡྷ་རཾ ཨ་པ་རི་མི་ཏ་ཝ་སུ་དྷ་རཾ ཝ་སུ་ནྡྷ་རཾ ཨ་ད་ཎྜེ་ན ཨ་ས་ཏྠེ་ན དྷ་མྨེ་ན པ་རི་པཱ་ལེ་ཏི. ཨ་ཐ ཀོ་ཎྜ་ཉྙོ བུ་དྡྷོ་པི ཀོ་ཊི་ས་ཏ་ས་ཧ་སྶ་ཁཱི་ཎཱ་ས་ཝ་པ་རི་ཝུ་ཏོ ཛ་ན་པ་ད་ཙཱ་རི་ཀཾ ཙ་ར་མཱ་ནོ ཨ་ནུ་པུ་བྦེ་ན ཙ་ནྡ་ཝ་ཏཱི་ན་ག་རཾ ས་མྤཱ་པུ་ཎི.
སོ ཝི་ཛི་ཏཱ་ཝཱི ཀི་ར རཱ་ཛཱ – ‘‘ས་མྨཱ་ས་མྦུ་དྡྷོ ཀི་ར ཨ་མྷཱ་ཀཾ ན་ག་རཾ ཨ་ནུ་པྤ་ཏྟོ’’ཏི སུ་ཏྭཱ པ་ཙྩུ་གྒ་ནྟྭཱ བྷ་ག་ཝ་ཏོ ཝ་ས་ན་ཊྛཱ་ནཾ སཾ་ཝི་ད་ཧི་ཏྭཱ སྭཱ་ཏ་ནཱ་ཡ ས་དྡྷིཾ བྷི་ཀྑུ་ས་ངྒྷེ་ན ནི་མ་ནྟེ་ཏྭཱ པུ་ན་དི་ཝ་སེ བྷ་ཏྟ་ཝི་དྷིཾ སུ་ཊྛུ པ་ཊི་ཡཱ་དེ་ཏྭཱ ཀོ་ཊི་ས་ཏ་ས་ཧ་སྶ་ས་ངྑ་སྶ བུ་དྡྷ་པྤ་མུ་ཁ་སྶ བྷི་ཀྑུ་ས་ངྒྷ་སྶ མ་ཧཱ་དཱ་ནཾ ཨ་དཱ་སི. བོ་དྷི་ས་ཏྟོ བྷ་ག་ཝ་ནྟཾ བྷོ་ཛེ་ཏྭཱ ཨ་ནུ་མོ་ད་ནཱ་ཝ་སཱ་ནེ – ‘‘བྷ་ནྟེ, ཏེ་མཱ་སཾ མ་ཧཱ་ཛ་ན་ས་ངྒ་ཧཾ ཀ་རོ་ནྟོ ཨི་དྷེ་ཝ ཝ་ས་ཐཱ’’ཏི ཡཱ་ཙི་ཏྭཱ ཏ་ཡོ མཱ་སེ ནི་ར་ནྟ་རཾ བུ་དྡྷ་པྤ་མུ་ཁ་སྶ བྷི་ཀྑུ་ས་ངྒྷ་སྶ ཨ་ས་དི་ས་མ་ཧཱ་དཱ་ནཾ ཨ་དཱ་སི.
ཨ་ཐ ས་ཏྠཱ བོ་དྷི་ས་ཏྟཾ – ‘‘ཨ་ནཱ་ག་ཏེ གོ་ཏ་མོ ནཱ་མ བུ་དྡྷོ བྷ་ཝི་སྶ་ཏཱི’’ཏི བྱཱ་ཀ་རི་ཏྭཱ དྷ་མྨ་མ་སྶ དེ་སེ་སི. སོ ས་ཏྠུ དྷ་མྨ་ཀ་ཐཾ སུ་ཏྭཱ ར་ཛྫཾ ནི་ཡྻཱ་ཏེ་ཏྭཱ པ་བྦ་ཛི་ཏྭཱ ཏཱི་ཎི པི་ཊ་ཀཱ་ནི ཨུ་གྒ་ཧེ་ཏྭཱ ཨ་ཊྛ ས་མཱ་པ་ཏྟི་ཡོ པ་ཉྩ ཙ ཨ་བྷི་ཉྙཱ་ཡོ ཨུ་པྤཱ་དེ་ཏྭཱ ཨ་པ་རི་ཧཱི་ན་ཛ྄ཛྷཱ་ནོ བྲ་ཧྨ་ལོ་ཀེ ནི་བྦ་ཏྟི. ཏེ་ན ཝུ་ཏྟཾ –
༩. ‘‘ཨ་ཧཾ ཏེ་ན ས་མ་ཡེ་ན, ཝི་ཛི་ཏཱ་ཝཱི ནཱ་མ ཁ་ཏྟི་ཡོ;
ས་མུ་དྡཾ ཨ་ནྟ་མ་ནྟེ་ན, ཨི་སྶ་རི་ཡཾ ཝ་ཏྟ་ཡཱ་མ་ཧཾ.
༡༠. ‘‘ཀོ་ཊི་ས་ཏ་ས་ཧ་སྶཱ་ནཾ, ཝི་མ་ལཱ་ནཾ མ་ཧེ་སི་ནཾ;
ས་ཧ ལོ་ཀ་གྒ་ནཱ་ཐེ་ན, པ་ར་མ་ནྣེ་ན ཏ་པྤ་ཡིཾ.
༡༡. ‘‘སོ་པི མཾ བུ་དྡྷོ བྱཱ་ཀཱ་སི, ཀོ་ཎྜ་ཉྙོ ལོ་ཀ་ནཱ་ཡ་ཀོ;
ཨ་པ་རི་མེ་ཡྻི་ཏོ ཀ་པྤེ, བུ་དྡྷོ ལོ་ཀེ བྷ་ཝི་སྶ་ཏི.
༡༢. ‘‘པ་དྷཱ་ནཾ པ་ད་ཧི་ཏྭཱ་ན, ཀ་ཏྭཱ དུ་ཀྐ་ར་ཀཱ་རི་ཀཾ;
ཨ་སྶ་ཏྠ་མཱུ་ལེ ས་མྦུ་དྡྷོ, བུ་ཛ྄ཛྷི་སྶ་ཏི མ་ཧཱ་ཡ་སོ.
༡༣. ‘‘ཨི་མ་སྶ ཛ་ནི་ཀཱ མཱ་ཏཱ, མཱ་ཡཱ ནཱ་མ བྷ་ཝི་སྶ་ཏི;
པི་ཏཱ སུ་དྡྷོ་ད་ནོ ནཱ་མ, ཨ་ཡཾ ཧེ་སྶ་ཏི གོ་ཏ་མོ.
༡༤. ‘‘ཀོ་ལི་ཏོ ཨུ་པ་ཏི་སྶོ ཙ, ཨ་གྒཱ ཧེ་སྶ་ནྟི སཱ་ཝ་ཀཱ;
ཨཱ་ན་ནྡོ ནཱ་མུ་པ་ཊྛཱ་ཀོ, ཨུ་པ་ཊྛི་སྶ་ཏི ཏཾ ཛི་ནཾ.
༡༥. ‘‘ཁེ་མཱ ཨུ་པྤ་ལ་ཝ་ཎྞཱ ཙ, ཨ་གྒཱ ཧེ་སྶ་ནྟི སཱ་ཝི་ཀཱ;
བོ་དྷི ཏ་སྶ བྷ་ག་ཝ་ཏོ, ཨ་སྶ་ཏྠོ་ཏི པ་ཝུ་ཙྩ་ཏི.
༡༦. ‘‘ཙི་ཏྟོ ཙ ཧ་ཏྠཱ་ལ༹་ཝ་ཀོ, ཨ་གྒཱ ཧེ་སྶ་ནྟུ་པ་ཊྛ་ཀཱ;
ན་ནྡ་མཱ་ཏཱ ཙ ཨུ་ཏྟ་རཱ, ཨ་གྒཱ ཧེ་སྶ་ནྟུ་པ་ཊྛི་ཀཱ;
ཨཱ་ཡུ ཝ་སྶ་ས་ཏཾ ཏ་སྶ, གོ་ཏ་མ་སྶ ཡ་ས་སྶི་ནོ.
༡༧. ‘‘ཨི་དཾ སུ་ཏྭཱ་ན ཝ་ཙ་ནཾ, ཨ་ས་མ་སྶ མ་ཧེ་སི་ནོ;
ཨཱ་མོ་དི་ཏཱ ན་ར་མ་རཱུ, བུ་དྡྷ་བཱི་ཛཾ ཀི་ར ཨ་ཡཾ.
༡༨. ‘‘ཨུ་ཀྐུ་ཊྛི་ས་དྡཱ ཝ་ཏྟ་ནྟི, ཨ་པྥོ་ཊེ་ནྟི ཧ་ས་ནྟི ཙ;
ཀ་ཏ་ཉྫ་ལཱི ན་མ་སྶ་ནྟི, ད་ས་ས་ཧ་སྶི་དེ་ཝ་ཏཱ.
༡༩. ‘‘ཡ་དི་མ་སྶ ལོ་ཀ་ནཱ་ཐ་སྶ, ཝི་ར་ཛ྄ཛྷི་སྶཱ་མ སཱ་ས་ནཾ;
ཨ་ནཱ་ག་ཏ་མྷི ཨ་དྡྷཱ་ནེ, ཧེ་སྶཱ་མ ས་མྨུ་ཁཱ ཨི་མཾ.
༢༠. ‘‘ཡ་ཐཱ མ་ནུ་སྶཱ ན་དིཾ ཏ་ར་ནྟཱ, པ་ཊི་ཏི་ཏྠཾ ཝི་ར་ཛ྄ཛྷི་ཡ;
ཧེ་ཊྛཱ་ཏི་ཏྠེ ག་ཧེ་ཏྭཱ་ན, ཨུ་ཏྟ་ར་ནྟི མ་ཧཱ་ན་དིཾ.
༢༡. ‘‘ཨེ་ཝ་མེ་ཝ མ་ཡཾ ས་བྦེ, ཡ་དི མུ་ཉྩཱ་མི་མཾ ཛི་ནཾ;
ཨ་ནཱ་ག་ཏ་མྷི ཨ་དྡྷཱ་ནེ, ཧེ་སྶཱ་མ ས་མྨུ་ཁཱ ཨི་མཾ.
༢༢. ‘‘ཏ་སྶཱ་ཧཾ ཝ་ཙ་ནཾ སུ་ཏྭཱ, བྷི་ཡྻོ ཙི་ཏྟཾ པ་སཱ་ད་ཡིཾ;
ཏ་མེ་ཝ ཨ་ཏྠཾ སཱ་དྷེ་ནྟོ, མ་ཧཱ་ར་ཛྫཾ ཛི་ནེ ཨ་དཾ;
མ་ཧཱ་ར་ཛྫཾ ད་དི་ཏྭཱ་ན, པ་བྦ་ཛིཾ ཏ་སྶ ས་ནྟི་ཀེ.
༢༣. ‘‘སུ་ཏྟ་ནྟཾ ཝི་ན་ཡཾ ཙཱ་པི, ན་ཝ་ངྒཾ ས་ཏྠུ་སཱ་ས་ནཾ;
ས་བྦཾ པ་རི་ཡཱ་པུ་ཎི་ཏྭཱ་ན, སོ་བྷ་ཡིཾ ཛི་ན་སཱ་ས་ནཾ.
༢༤. ‘‘ཏ་ཏྠ་པྤ་མ་ཏྟོ ཝི་ཧ་ར་ནྟོ, ནི་ས་ཛྫ་ཊྛཱ་ན་ཙ་ངྐ་མེ;
ཨ་བྷི་ཉྙཱ་པཱ་ར་མིཾ ག་ནྟྭཱ, བྲ་ཧྨ་ལོ་ཀ་མ་ག་ཉྪ་ཧ’’ནྟི.
ཏ་ཏྠ ཨ་ཧཾ ཏེ་ན ས་མ་ཡེ་ནཱཏི ཨ་ཧཾ ཏ་སྨིཾ ས་མ་ཡེ. ཝི་ཛི་ཏཱ་ཝཱི ནཱ་མཱཏི ཨེ་ཝཾ་ནཱ་མ་ཀོ ཙ་ཀྐ་ཝ་ཏྟི་རཱ་ཛཱ ཨ་ཧོ་སིཾ. ས་མུ་དྡཾ ཨ་ནྟ་མ་ནྟེ་ནཱཏི ཨེ་ཏྠ ཙ་ཀྐ་ཝཱ་ལ༹་པ་བྦ་ཏཾ སཱི་མཾ མ་རི་ཡཱ་དཾ ཀ་ཏྭཱ ཋི་ཏཾ ས་མུ་དྡཾ ཨ་ནྟཾ ཀ་ཏྭཱ ཨི་སྶ་རི་ཡཾ ཝ་ཏྟ་ཡཱ་མཱི་ཏི ཨ་ཏྠོ. ཨེ་ཏྟཱ་ཝ་ཏཱ ན པཱ་ཀ་ཊཾ ཧོ་ཏི.
རཱ་ཛཱ ཀི་ར ཙ་ཀྐ་ཝ་ཏྟཱི ཙ་ཀྐ་ར་ཏ་ནཱ་ནུ་བྷཱ་ཝེ་ན ཝཱ་མ་པ་སྶེ་ན སི་ནེ་རུཾ ཀ་ཏྭཱ ས་མུ་དྡ་སྶ ཨུ་པ་རི་བྷཱ་གེ་ན ཨ་ཊྛ་ཡོ་ཛ་ན་ས་ཧ་སྶ་པྤ་མཱ་ཎཾ པུ་བྦ་ཝི་དེ་ཧཾ ག་ཙྪ་ཏི. ཏ་ཏྠ རཱ་ཛཱ ཙ་ཀྐ་ཝ་ཏྟཱི – ‘‘པཱ་ཎོ ན ཧ་ནྟ་བྦོ, ཨ་དི་ནྣཾ ནཱ་དཱ་ཏ་བྦཾ, ཀཱ་མེ་སུ་མི་ཙྪཱ ན ཙ་རི་ཏ་བྦཱ, མུ་སཱ ན བྷཱ་སི་ཏ་བྦཱ, མ་ཛྫཾ ན པཱ་ཏ་བྦཾ, ཡ་ཐཱ་བྷུ་ཏྟ་ཉྩ བྷུ་ཉྫ་ཐཱ’’ཏི (དཱི. ནི. ༢.༢༤༤; ༣.༨༥; མ. ནི. ༣.༢༥༧) ཨོ་ཝཱ་དཾ དེ་ཏི. ཨེ་ཝཾ ཨོ་ཝཱ་དེ དི་ནྣེ ཏཾ ཙ་ཀྐ་ར་ཏ་ནཾ ཝེ་ཧཱ་སཾ ཨ་བྦྷུ་གྒ་ནྟྭཱ པུ་ར་ཏྠི་མཾ ས་མུ་དྡཾ ཨ་ཛ྄ཛྷོ་གཱ་ཧ་ཏི. ཡ་ཐཱ ཡ་ཐཱ ཙ ཏཾ ཨ་ཛ྄ཛྷོ་གཱ་ཧ་ཏི, ཏ་ཐཱ ཏ་ཐཱ སཾ་ཁི་ཏྟ་ཨཱུ་མི་ཝི་པྥཱ་རཾ ཧུ་ཏྭཱ ཨོ་ག་ཙྪ་མཱ་ནཾ མ་ཧཱ་ས་མུ་དྡ་ས་ལི་ལཾ ཡོ་ཛ་ན་མ་ཏྟཾ ཨོ་གྒ་ནྟྭཱ ཨ་ནྟོ་ས་མུ་དྡཾ ཨུ་བྷོ་སུ པ་སྶེ་སུ ཝེ་ལུ༹་རི་ཡ་མ་ཎི་བྷི་ཏྟི ཝི་ཡ པ་ར་མ་ད་སྶ་ནཱི་ཡཾ ཧུ་ཏྭཱ ཏི་ཊྛ་ཏི, ཨེ་ཝཾ པུ་ར་ཏྠི་མ་སཱ་ག་ར་པ་རི་ཡ་ནྟཾ ག་ནྟྭཱ ཏཾ ཙ་ཀྐ་ར་ཏ་ནཾ པ་ཊི་ནི་ཝ་ཏྟ་ཏི. པ་ཊི་ནི་ཝ་ཏྟ་མཱ་ནེ ཙ ཏ་སྨིཾ སཱ པ་རི་སཱ ཨ་གྒ་ཏོ ཧོ་ཏི, མ་ཛ྄ཛྷེ རཱ་ཛཱ ཙ་ཀྐ་ཝ་ཏྟཱི ཨ་ནྟེ ཙ་ཀྐ་ར་ཏ་ནཾ ཧོ་ཏི. ཏ་མྤི ཛ་ལཾ ཛ་ལ་ནྟེ་ན ཝི་ཡོ་གཾ ཨ་ས་ཧ་མཱ་ན་མི་ཝ ནེ་མི་མ་ཎྜ་ལ་པ་རི་ཡ་ནྟཾ ཨ་བྷི་ཧ་ན་ནྟ་མེ་ཝ ཏཱི་ར་མུ་པ་ག་ཙྪ་ཏི.
ཨེ་ཝཾ རཱ་ཛཱ ཙ་ཀྐ་ཝ་ཏྟཱི པུ་ར་ཏྠི་མ་ས་མུ་དྡ་པ་རི་ཡ་ནྟཾ པུ་བྦ་ཝི་དེ་ཧཾ ཨ་བྷི་ཝི་ཛི་ནི་ཏྭཱ ད་ཀྑི་ཎ་ས་མུ་དྡ་པ་རི་ཡ་ནྟཾ ཛ་མྦུ་དཱི་པཾ ཝི་ཛེ་ཏུ་ཀཱ་མོ ཙ་ཀྐ་ར་ཏ་ན་དེ་སི་ཏེ་ན མ་གྒེ་ན ད་ཀྑི་ཎ་ས་མུ་དྡཱ་བྷི་མུ་ཁོ ག་ཙྪ་ཏི. ཏཾ ད་ས་ས་ཧ་སྶ་ཡོ་ཛ་ན་པྤ་མཱ་ཎཾ ཛ་མྦུ་དཱི་པཾ ཨ་བྷི་ཝི་ཛི་ནི་ཏྭཱ ད་ཀྑི་ཎ་ས་མུ་དྡ་ཏོ པ་ཙྩུ་ཏྟ་རི་ཏྭཱ ས་ཏྟ་ཡོ་ཛ་ན་ས་ཧ་སྶ་པྤ་མཱ་ཎཾ ཨ་པ་ར་གོ་ཡཱ་ནཾ ཝི་ཛེ་ཏུཾ ཧེ་ཊྛཱ ཝུ་ཏྟ་ན་ཡེ་ནེ་ཝ ག་ནྟྭཱ ཏ་མྤི སཱ་ག་ར་པ་རི་ཡ་ནྟཾ ཨ་བྷི་ཝི་ཛི་ནི་ཏྭཱ པ་ཙྪི་མ་ས་མུ་དྡ་ཏོ་པི ཨུ་ཏྟ་རི་ཏྭཱ ཨ་ཊྛ་ཡོ་ཛ་ན་ས་ཧ་སྶ་པྤ་མཱ་ཎཾ ཨུ་ཏྟ་ར་ཀུ་རུཾ ཝི་ཛེ་ཏུཾ ཏ་ཐེ་ཝ ག་ནྟྭཱ ཏཾ ས་མུ་དྡ་པ་རི་ཡ་ནྟཾ ཀ་ཏྭཱ ཏ་ཐེ་ཝ ཨ་བྷི་ཝི་ཛི་ཡ ཨུ་ཏྟ་ར་ས་མུ་དྡ་ཏོ་པི པ་ཙྩུ་ཏྟ་ར་ཏི. ཨེ་ཏྟཱ་ཝ་ཏཱ ར་ཉྙཱ ཙ་ཀྐ་ཝ་ཏྟི་ནཱ སཱ་ག་ར་པ་རི་ཡ་ནྟཱ་ཡ པ་ཐ་ཝི་ཡཱ ཨི་སྶ་རི་ཡཾ ཨ་དྷི་ག་ཏཾ ཧོ་ཏི. ཏེ་ན ཝུ་ཏྟཾ ས་མུ་དྡཾ ཨ་ནྟ་མ་ནྟེ་ན, ཨི་སྶ་རི་ཡཾ ཝ་ཏྟ་ཡཱ་མ་ཧ’’ནྟི.
ཀོ་ཊི་ས་ཏ་ས་ཧ་སྶཱ་ནནྟི ཀོ་ཊི་ས་ཏ་ས་ཧ་སྶཱ་ནི. ཨ་ཡ་མེ་ཝ ཝཱ པཱ་ཋོ. ཝི་མ་ལཱ་ནནྟི ཁཱི་ཎཱ་ས་ཝཱ་ནཾ. ས་ཧ ལོ་ཀ་གྒ་ནཱ་ཐེ་ནཱཏི ས་དྡྷིཾ ད་ས་བ་ལེ་ན ཀོ་ཊི་ས་ཏ་ས་ཧ་སྶཱ་ན་ནྟི ཨ་ཏྠོ. པ་ར་མ་ནྣེ་ནཱཏི པ་ཎཱི་ཏེ་ན ཨ་ནྣེ་ན. ཏ་པྤ་ཡིནྟི ཏ་པྤེ་སིཾ. ཨ་པ་རི་མེ་ཡྻི་ཏོ ཀ་པྤེཏི ཨི་ཏོ པ་ཊྛཱ་ཡ ས་ཏ་ས་ཧ་སྶ་ཀ་པྤཱ་དྷི་ཀཱ་ནི ཏཱི་ཎི ཨ་ས་ངྑྱེ་ཡྻཱ་ནི ཨ་ཏི་ཀྐ་མི་ཏྭཱ ཨེ་ཀ་སྨིཾ བྷ་དྡ་ཀ་པྤེ་ཏི ཨ་ཏྠོ.
པ་དྷཱ་ནནྟི ཝཱི་རི་ཡཾ. ཏ་མེ་ཝ ཨ་ཏྠཾ སཱ་དྷེ་ནྟོཏི ཏ་མེ་ཝ བུ་དྡྷ་ཀཱ་ར་ཀ་མ་ཏྠཾ དཱ་ན་པཱ་ར་མིཾ པཱུ་རེ་ནྟོ སཱ་དྷེ་ནྟོ ནི་པྥཱ་དེ་ནྟོ་ཏི ཨ་ཏྠོ. མ་ཧཱ་ར་ཛྫནྟི ཙ་ཀྐ་ཝ་ཏྟི་ར་ཛྫཾ. ཛི་ནེཏི བྷ་ག་ཝ་ཏི, ས་མྤ་དཱ་ན་ཏྠེ ཝཱ བྷུ་མྨཾ ད་ཊྛ་བྦཾ. ཨ་དནྟི ཨ་དཱ་སིཾ. ཨེ་ཝ་མ་ཏྠཾ སཱ་དྷེ་ནྟོ་ཏི ཨི་མི་ནཱ ས་མྦ་ནྡྷོ ད་ཊྛ་བྦོ. ‘‘མ་ཧཱ་ར་ཛྫཾ ཛི་ནེ ད་དི’’ནྟི པ་ཋ་ནྟི ཀེ་ཙི. ད་དི་ཏྭཱ་ནཱཏི ཙ་ཛི་ཏྭཱ. སུ་ཏྟ་ནྟནྟི སུ་ཏྟ་ནྟ་པི་ཊ་ཀཾ. ཝི་ན་ཡནྟི ཝི་ན་ཡ་པི་ཊ་ཀཾ. ན་ཝ་ངྒནྟི སུ་ཏྟ་གེ་ཡྻཱ་དི་ན་ཝ་ངྒཾ. སོ་བྷ་ཡིཾ ཛི་ན་སཱ་ས་ནནྟི ཨཱ་ག་མཱ་དྷི་ག་མེ་ཧི ལོ་ཀི་ཡེ་ཧི ས་མ་ལ་ངྐ་རིཾ. ཏ་ཏྠཱཏི ཏ་སྶ བྷ་ག་ཝ་ཏོ སཱ་ས་ནེ. ཨ་པྤ་མ་ཏྟོཏི ས་ཏི་ས་མྤ་ནྣོ. བྲ་ཧྨ་ལོ་ཀ་མ་ག་ཉྪ་ཧནྟི བྲ་ཧྨ་ལོ་ཀཾ ཨ་ག་ཉྪིཾ ཨ་ཧཾ.
ཨི་མ་སྶ པ་ན ཀོ་ཎྜ་ཉྙ་བུ་དྡྷ་སྶ ར་མྨ་ཝ་ཏཱི ནཱ་མ ན་ག་རཾ ཨ་ཧོ་སི, སུ་ན་ནྡོ ནཱ་མ རཱ་ཛཱ པི་ཏཱ, སུ་ཛཱ་ཏཱ ནཱ་མ དེ་ཝཱི མཱ་ཏཱ, བྷ་དྡོ ཙ སུ་བྷ་དྡོ ཙ དྭེ ཨ་གྒ་སཱ་ཝ་ཀཱ, ཨ་ནུ་རུ་དྡྷོ ནཱ་མུ་པ་ཊྛཱ་ཀོ, ཏི་སྶཱ ཙ ཨུ་པ་ཏི་སྶཱ ཙ དྭེ ཨ་གྒ་སཱ་ཝི་ཀཱ, སཱ་ལ་ཀ་ལྱཱ་ཎི་རུ་ཀྑོ བོ་དྷི, ཨ་ཊྛཱ་སཱི་ཏི་ཧ་ཏྠུ་བྦེ་དྷཾ ས་རཱི་རཾ, ཝ་སྶ་ས་ཏ་ས་ཧ་སྶཱ་ནི ཨཱ་ཡུ་པྤ་མཱ་ཎཾ ཨ་ཧོ་སི, ཏ་སྶ རུ་ཙི་དེ་ཝཱི ནཱ་མ ཨ་གྒ་མ་ཧེ་སཱི ཨ་ཧོ་སི, ཝི་ཛི་ཏ་སེ་ནོ ནཱ་མ་སྶ པུ་ཏྟོ, ཙ་ནྡོ ནཱ་མུ་པ་ཊྛཱ་ཀོ རཱ་ཛཱ. ཙ་ནྡཱ་རཱ་མེ ཀི་ར ཝ་སཱི་ཏི. ཏེ་ན ཝུ་ཏྟཾ –
༢༥. ‘‘ན་ག་རཾ ར་མྨ་ཝ་ཏཱི ནཱ་མ, སུ་ན་ནྡོ ནཱ་མ ཁ་ཏྟི་ཡོ;
སུ་ཛཱ་ཏཱ ནཱ་མ ཛ་ནི་ཀཱ, ཀོ་ཎྜ་ཉྙ་སྶ མ་ཧེ་སི་ནོ.
༣༠. ‘‘བྷ་དྡོ ཙེ་ཝ སུ་བྷ་དྡོ ཙ, ཨ་ཧེ་སུཾ ཨ་གྒ་སཱ་ཝ་ཀཱ;
ཨ་ནུ་རུ་དྡྷོ ནཱ་མུ་པ་ཊྛཱ་ཀོ, ཀོ་ཎྜ་ཉྙ་སྶ མ་ཧེ་སི་ནོ.
༣༡. ‘‘ཏི་སྶཱ ཙ ཨུ་པ་ཏི་སྶཱ ཙ, ཨ་ཧེ་སུཾ ཨ་གྒ་སཱ་ཝི་ཀཱ;
སཱ་ལ་ཀ་ལྱཱ་ཎི་ཀོ བོ་དྷི, ཀོ་ཎྜ་ཉྙ་སྶ མ་ཧེ་སི་ནོ.
༣༣. ‘‘སོ ཨ་ཊྛཱ་སཱི་ཏི ཧ་ཏྠཱ་ནི, ཨ་ཙྩུ་གྒ་ཏོ མ་ཧཱ་མུ་ནི;
སོ་བྷ་ཏེ ཨུ་ལུ༹་རཱ་ཛཱ་ཝ, སཱུ་རི་ཡོ མ་ཛ྄ཛྷ་ནྷི་ཀེ ཡ་ཐཱ.
༣༤. ‘‘ཝ་སྶ་ས་ཏ་ས་ཧ་སྶཱ་ནི, ཨཱ་ཡུ ཝི་ཛྫ་ཏི ཏཱ་ཝ་དེ;
ཏཱ་ཝ་ཏཱ ཏི་ཊྛ་མཱ་ནོ སོ, ཏཱ་རེ་སི ཛ་ན་ཏཾ བ་ཧུཾ.
༣༥. ‘‘ཁཱི་ཎཱ་ས་ཝེ་ཧི ཝི་མ་ལེ་ཧི, ཝི་ཙི་ཏྟཱ ཨཱ་སི མེ་ད་ནཱི;
ཡ་ཐཱ ཧི ག་ག་ན་མུ་ལཱུ༹་བྷི, ཨེ་ཝཾ སོ ཨུ་པ་སོ་བྷ་ཐ.
༣༦. ‘‘ཏེ་པི ནཱ་གཱ ཨ་པྤ་མེ་ཡྻཱ, ཨ་ས་ངྑོ་བྷཱ དུ་རཱ་ས་དཱ;
ཝི་ཛྫུ་པཱ་ཏཾ་ཝ ད་སྶེ་ཏྭཱ, ནི་བྦུ་ཏཱ ཏེ མ་ཧཱ་ཡ་སཱ.
༣༧. ‘‘སཱ ཙ ཨ་ཏུ་ལི་ཡཱ ཛི་ན་སྶ ཨི་དྡྷི, ཉཱ་ཎ་པ་རི་བྷཱ་ཝི་ཏོ ཙ ས་མཱ་དྷི;
ས་བྦཾ ཏ་མ་ནྟ་ར་ཧི་ཏཾ, ན་ནུ རི་ཏྟཱ ས་བྦ་ས་ངྑཱ་རཱ’’ཏི.
ཏ་ཏྠ སཱ་ལ་ཀ་ལྱཱ་ཎི་ཀོཏི སཱ་ལ་ཀ་ལྱཱ་ཎི་རུ་ཀྑོ, སོ བུ་དྡྷ་ཀཱ་ལེ ཙེ་ཝ ཙ་ཀྐ་ཝ་ཏྟི་ཀཱ་ལེ ཙ ནི་བྦ་ཏྟ་ཏི, ནཱ་ཉྙ་དཱ. སོ ཨེ་ཀཱ་ཧེ་ནེ་ཝ ཨུ་ཊྛཱ་ཏི ཀི་ར. ཁཱི་ཎཱ་ས་ཝེ་ཧི ཝི་མ་ལེ་ཧི, ཝི་ཙི་ཏྟཱ ཨཱ་སི མེ་ད་ནཱིཏི ཨ་ཡཾ མེ་ད་ནཱི ཁཱི་ཎཱ་ས་ཝེ་ཧི ཨེ་ཀ་ཀཱ་སཱ་ཝ་པ་ཛྫོ་ཏཱ ཝི་ཙི་ཏྟཱ པ་ར་མ་ད་སྶ་ནཱི་ཡཱ ཨ་ཧོ་སི. ཡ་ཐཱ ཧཱིཏི ཨོ་པ་མྨ་ཏྠེ ནི་པཱ་ཏོ. ཨུ་ལཱུ༹་བྷཱིཏི ན་ཀྑ་ཏྟེ་ཧི, ཏཱ་རཱ་ག་ཎེ་ཧི ག་ག་ན་ཏ་ལཾ ཝི་ཡ ཁཱི་ཎཱ་ས་ཝེ་ཧི ཝི་ཙི་ཏྟཱ ཨ་ཡཾ མེ་ད་ནཱི སོ་བྷི་ཏྠཱ་ཏི ཨ་ཏྠོ.
ཨ་ས་ངྑོ་བྷཱཏི ཨ་ཊྛ་ཧི ལོ་ཀ་དྷ་མྨེ་ཧི ཨ་ཀྑོ་བྷཱ ཨ་ཝི་ཀཱ་རཱ. ཝི་ཛྫུ་པཱ་ཏཾ་ཝ ད་སྶེ་ཏྭཱཏི ཝི་ཛྫུ་པཱ་ཏཾ ཝི་ཡ ད་སྶ་ཡི་ཏྭཱ, ‘‘ཝི་ཛྫུ་པྤཱ་ཏཾ་ཝཱ’’ཏི་པི པཱ་ཋོ. ཀོ་ཎྜ་ཉྙ་བུ་དྡྷ་སྶ ཀི་ར ཀཱ་ལེ པ་རི་ནི་བྦཱ་ཡ་མཱ་ནཱ བྷི་ཀྑཱུ ས་ཏྟ་ཏཱ་ལ་པྤ་མཱ་ཎ་མཱ་ཀཱ་ས་མ་བྦྷུ་གྒ་ནྟྭཱ ཨ་སི་ཏ་ཛ་ལ་དྷ་ར་ཝི་ཝ་ར་ག་ཏཱ ཝི་ཛྫུ་ལ་ཏཱ ཝི་ཡ ས་མ་ནྟ་ཏོ ཝི་ཛྫོ་ཏ་མཱ་ནཱ ཏེ་ཛོ་དྷཱ་ཏུཾ ས་མཱ་པ་ཛྫི་ཏྭཱ ནི་རུ་པཱ་དཱ་ནཱ ད་ཧ་ནཱ ཝི་ཡ པ་རི་ནི་བྦཱ་ཡིཾ་སུ. ཏེ་ན ཝུ་ཏྟཾ ‘‘ཝི་ཛྫུ་པཱ་ཏཾ་ཝ ད་སྶེ་ཏྭཱ’’ཏི. ཨ་ཏུ་ལི་ཡཱཏི ཨ་ཏུ་ལྱཱ ཨ་ས་དི་སཱ. ཉཱ་ཎ་པ་རི་བྷཱ་ཝི་ཏོཏི ཉཱ་ཎེ་ན ཝ་ཌྜྷི་ཏོ. སེ་ས་གཱ་ཐཱ ཧེ་ཊྛཱ ཝུ་ཏྟ་ན་ཡ་ཏྟཱ ཨུ་ཏྟཱ་ནཱ ཨེ་ཝཱ་ཏི.
‘‘ཀོ་ཎྜ་ཉྙོ ནཱ་མ ས་མྦུ་དྡྷོ, ཙ་ནྡཱ་རཱ་མེ མ་ནོ་ར་མེ;
ནི་བྦཱ་ཡི ཙེ་ཏི་ཡོ ཏ་སྶ, ས་ཏྟ་ཡོ་ཛ་ནི་ཀོ ཀ་ཏོ.
‘‘ན ཧེ་ཝ དྷཱ་ཏུ་ཡོ ཏ་སྶ, ས་ཏྠུ་ནོ, ཝི་ཀི་རིཾ་སུ ཏཱ;
ཋི་ཏཱ ཨེ་ཀ་གྷ་ནཱ ཧུ་ཏྭཱ, སུ་ཝ་ཎྞ་པ་ཊི་མཱ ཝི་ཡ’’.
ས་ཀ་ལ་ཛ་མྦུ་དཱི་པ་ཝཱ་སི་ནོ མ་ནུ་སྶཱ ས་མཱ་ག་ནྟྭཱ ས་ཏྟ་ཡོ་ཛ་ནི་ཀཾ ས་ཏྟ་ར་ཏ་ན་མ་ཡཾ ཧ་རི་ཏཱ་ལ་མ་ནོ་སི་ལཱ་ཡ མ་ཏྟི་ཀཱ་ཀི་ཙྩཾ ཏེ་ལ་ས་པྤཱི་ཧི ཨུ་ད་ཀ་ཀི་ཙྩཾ ཀ་ཏྭཱ ནི་ཊྛཱ་པེ་སུ་ནྟི.
ཀོ་ཎྜ་ཉྙ་བུ་དྡྷ་ཝཾ་ས་ཝ་ཎྞ་ནཱ ནི་ཊྛི་ཏཱ.
ནི་ཊྛི་ཏོ དུ་ཏི་ཡོ བུ་དྡྷ་ཝཾ་སོ.