༢༦. ཀ་སྶ་པ་བུ་དྡྷ་ཝཾ་ས་ཝ་ཎྞ་ནཱ
ཀོ་ཎཱ་ག་མ་ན་སྶ པ་ན བྷ་ག་ཝ་ཏོ ཨ་པ་ར་བྷཱ་གེ ཏ་སྶ སཱ་ས་ནེ ཙ ཨ་ནྟ་ར་ཧི་ཏེ ཏིཾ་ས་ཝ་སྶ་ས་ཧ་སྶཱ་ཡུ་ཀཱ ས་ཏྟཱ ཨ་ནུ་པུ་བྦེ་ན པ་རི་ཧཱ་ཡི་ཏྭཱ ད་ས་ཝ་སྶཱ་ཡུ་ཀཱ ཧུ་ཏྭཱ པུ་ན ཝ་ཌྜྷི་ཏྭཱ ཨ་པ་རི་མི་ཏཱ་ཡུ་ཀཱ ཧུ་ཏྭཱ པུ་ན ཨ་ནུ་པུ་བྦེ་ན པ་རི་ཧཱ་ཡི་ཏྭཱ ཝཱི་ས་ཏི་ཝ་སྶ་ས་ཧ་སྶཱ་ཡུ་ཀེ་སུ ས་ཏྟེ་སུ ཛཱ་ཏེ་སུ ཨ་ནེ་ཀ་མ་ནུ་སྶ་པོ ཀ་སྶ་པོ ནཱ་མ ས་ཏྠཱ ལོ་ཀེ ཨུ་ད་པཱ་དི (སུ. ནི. ཨ་ཊྛ. ཨཱ་མ་ཀ་ག་ནྡྷ་སུ་ཏྟ་ཝ་ཎྞ་ནཱ). སོ པཱ་ར་མི་ཡོ པཱུ་རེ་ཏྭཱ ཏུ་སི་ཏ་པུ་རེ ནི་བྦ་ཏྟི་ཏྭཱ ཏ་ཏོ ཙ་ཝི་ཏྭཱ བཱ་རཱ་ཎ་སཱི་ན་ག་རེ བྲ་ཧྨ་ད་ཏྟ་སྶ ནཱ་མ བྲཱ་ཧྨ་ཎ་སྶ ཝི་པུ་ལ་གུ་ཎ་ཝ་ཏི་ཡཱ དྷ་ན་ཝ་ཏི་ཡཱ ནཱ་མ བྲཱ་ཧྨ་ཎི་ཡཱ ཀུ་ཙྪི་སྨིཾ པ་ཊི་ས་ནྡྷིཾ ག་ཧེ་ཏྭཱ ད་ས་ནྣཾ མཱ་སཱ་ནཾ ཨ་ཙྩ་ཡེ་ན ཨི་སི་པ་ཏ་ནེ མི་ག་དཱ་ཡེ མཱ་ཏུ་ཀུ་ཙྪི་ཏོ ནི་ཀྑ་མི. གོ་ཏྟ་ཝ་སེ་ན པ་ན་སྶ ‘‘ཀ་སྶ་པ་ཀུ་མཱ་རོ’’ཏི ནཱ་མ་མ་ཀཾ་སུ. སོ དྭེ ཝ་སྶ་ས་ཧ་སྶཱ་ནི ཨ་གཱ་རཾ ཨ་ཛ྄ཛྷཱ་ཝ་སི. ཧཾ་ས་ཝཱ ཡ་ས་ཝཱ སི་རི་ན་ནྡོ་ཏི ཏ་སྶ ཏ་ཡོ པཱ་སཱ་དཱ ཨ་ཧེ་སུཾ. སུ་ན་ནྡཱ ནཱ་མ བྲཱ་ཧྨ་ཎི་པྤ་མུ་ཁཱ་ནི ཨ་ཊྛ་ཙ་ཏྟཱ་ལཱི་ས ཨི་ཏྠི་ས་ཧ་སྶཱ་ནི པ་ཙྩུ་པ་ཊྛི་ཏཱ་ནི ཨ་ཧེ་སུཾ.
སོ ཙ་ཏྟཱ་རི ནི་མི་ཏྟཱ་ནི དི་སྭཱ སུ་ན་ནྡཱ་ཡ བྲཱ་ཧྨ་ཎི་ཡཱ ཝི་ཛི་ཏ་སེ་ནེ ནཱ་མ པུ་ཏྟེ ཨུ་པྤ་ནྣེ ཨུ་པྤ་ནྣ་སཾ་ཝེ་གོ ‘‘མ་ཧཱ་བྷི་ནི་ཀྑ་མ་ནཾ ནི་ཀྑ་མི་སྶཱ་མཱི’’ཏི ཙི་ནྟེ་སི. ཨ་ཐ་སྶ པ་རི་ཝི་ཏ་ཀྐ་ས་མ་ན་ནྟ་ར་མེ་ཝ པཱ་སཱ་དོ ཀུ་ལཱ་ལ་ཙ་ཀྐ་མི་ཝ བྷ་མི་ཏྭཱ ག་ག་ན་ཏ་ལ་མ་བྦྷུ་གྒ་ནྟྭཱ པ་ར་མ་རུ་ཙི་ར་ཀ་ར་ནི་ཀ་རོ ས་ར་ད་ས་མ་ཡ་ར་ཛ་ནི་ཀ་རོ ཝི་ཡ ཏཱ་རཱ་ག་ཎ་པ་རི་ཝུ་ཏོ ཨ་ནེ་ཀ་ན་ར་ས་ཏ་པ་རི་ཝུ་ཏོ ག་ག་ན་ཏ་ལ་མ་ལ་ངྐ་རོ་ནྟོ ཝི་ཡ པུ་ཉྙཱ་ནུ་བྷཱ་ཝཾ པ་ཀཱ་སེ་ནྟོ ཝི་ཡ ཛ་ན་ན་ཡ་ན་ཧ་ད་ཡཱ་ནི ཨཱ་ཀ་ཌྜྷེ་ནྟོ ཝི་ཡ རུ་ཀྑ་གྒཱ་ནི པ་རཾ སོ་བྷ་ཡ་མཱ་ནོ ཝི་ཡ ཙ ག་ནྟྭཱ ནི་གྲོ་དྷ་བོ་དྷིཾ མ་ཛ྄ཛྷེ་ཀ་ཏྭཱ བྷཱུ་མི་ཡཾ པ་ཏི་ཊྛ་ཧི. ཨ་ཐ བོ་དྷི་ས་ཏྟོ མ་ཧཱ་ས་ཏྟོ པ་ཐ་ཝི་ཡཾ པ་ཏི་ཊྛ་ཧི་ཏྭཱ དེ་ཝ་ད་ཏྟཾ ཨ་ར་ཧ་ཏྟ་དྡྷ་ཛ་མཱ་དཱ་ཡ པ་བྦ་ཛི. ཏ་སྶ ནཱ་ཊ་ཀི་ཏྠི་ཡོ པཱ་སཱ་དཱ ཨོ་ཏ་རི་ཏྭཱ ཨ་ཌྜྷ་གཱ་ཝུ་ཏཾ མ་གྒཾ ག་ནྟྭཱ ས་པ་རི་ཝཱ་རཱ སེ་ནཱ་ས་ནྣི་ཝེ་སཾ ཀ་ཏྭཱ ནི་སཱི་དིཾ་སུ. ཏ་ཏོ ཨི་ཏྠི་པ་རི་ཙཱ་རི་ཀེ ཋ་པེ་ཏྭཱ ས་ཧཱ་ག་ཏཱ ས་བྦེ པ་བྦ་ཛིཾ་སུ.
མ་ཧཱ་པུ་རི་སོ ཀི་ར ས་ཏྟཱ་ཧཾ ཏེ་ཧི པ་རི་ཝུ་ཏོ པ་དྷཱ་ན་ཙ་རི་ཡཾ ཙ་རི་ཏྭཱ ཝི་སཱ་ཁ་པུ་ཎྞ་མཱ་ཡ སུ་ན་ནྡཱ་ཡ ནཱ་མ བྲཱ་ཧྨ་ཎི་ཡཱ དི་ནྣཾ མ་དྷུ་པཱ་ཡཱ་སཾ པ་རི་བྷུ་ཉྫི་ཏྭཱ ཁ་དི་ར་ཝ་ནེ དི་ཝཱ་ཝི་ཧཱ་རཾ ཀ་ཏྭཱ སཱ་ཡ་ནྷ་ས་མ་ཡེ སོ་མེ་ན ནཱ་མ ཡ་ཝ་པཱ་ལ་ཀེ་ན ཨུ་པ་ནཱི་ཏཱ ཨ་ཊྛ ཏི་ཎ་མུ་ཊྛི་ཡོ ག་ཧེ་ཏྭཱ ནི་གྲོ་དྷ་བོ་དྷིཾ ཨུ་པ་ག་ནྟྭཱ པ་ཉྩ་ད་ས་ཧ་ཏྠཱ་ཡཱ་མ་ཝི་ཏྠ་ཏཾ ཏི་ཎ་ས་ནྠ་རཾ ས་ནྠ་རི་ཏྭཱ ཏ་ཏྠ ནི་སཱི་དི་ཏྭཱ ཨ་བྷི་ས་མྦོ་དྷིཾ པཱ་པུ་ཎི་ཏྭཱ – ‘‘ཨ་ནེ་ཀ་ཛཱ་ཏི་སཾ་སཱ་རཾ…པེ… ཏ་ཎྷཱ་ནཾ ཁ་ཡ་མ་ཛ྄ཛྷ་གཱ’’ཏི ཨུ་དཱ་ནཾ ཨུ་དཱ་ནེ་ཏྭཱ ས་ཏྟ་ས་ཏྟཱ་ཧཾ ཝཱི་ཏི་ནཱ་མེ་ཏྭཱ ཨ་ཏྟ་ནཱ ས་ཧ པ་བྦ་ཛི་ཏཱ་ནཾ བྷི་ཀྑཱུ་ནཾ ཀོ་ཊི་ཡཱ ཨུ་པ་ནི་སྶ་ཡ་ས་མྤ་ཏྟིཾ དི་སྭཱ ག་ག་ན་ཏ་ལེ་ན ག་ནྟྭཱ བཱ་རཱ་ཎ་སི་ཡཾ ཨི་སི་པ་ཏ་ནེ མི་ག་དཱ་ཡེ ཨོ་ཏ་རི་ཏྭཱ ཏེ་ཧི པ་རི་ཝུ་ཏོ ཏ་ཏྠ དྷ་མྨ་ཙ་ཀྐཾ པ་ཝ་ཏྟེ་སི. ཏ་དཱ ཝཱི་ས་ཏི་ཡཱ ཀོ་ཊི་ས་ཧ་སྶཱ་ནཾ པ་ཋ་མོ དྷ་མྨཱ་བྷི་ས་མ་ཡོ ཨ་ཧོ་སི. ཏེ་ན ཝུ་ཏྟཾ –
༡. ‘‘ཀོ་ཎཱ་ག་མ་ན་སྶ ཨ་པ་རེ་ན, ས་མྦུ་དྡྷོ དྭི་པ་དུ་ཏྟ་མོ;
ཀ་སྶ་པོ ནཱ་མ གོ་ཏྟེ་ན, དྷ་མྨ་རཱ་ཛཱ པ་བྷ་ངྐ་རོ.
༢. ‘‘ས་ཉྪ་ཌྜི་ཏཾ ཀུ་ལ་མཱུ་ལཾ, བ་ཧྭ་ནྣ་པཱ་ན་བྷོ་ཛ་ནཾ;
ད་ཏྭཱ་ན ཡཱ་ཙ་ཀེ དཱ་ནཾ, པཱུ་ར་ཡི་ཏྭཱ་ན མཱ་ན་སཾ;
ཨུ་ས་བྷོ་ཝ ཨཱ་ལ༹་ཀཾ བྷེ་ཏྭཱ, པ་ཏྟོ ས་མྦོ་དྷི་མུ་ཏྟ་མཾ.
༣. ‘‘དྷ་མྨ་ཙ་ཀྐཾ པ་ཝ་ཏྟེ་ནྟེ, ཀ་སྶ་པེ ལོ་ཀ་ནཱ་ཡ་ཀེ;
ཝཱི་ས་ཀོ་ཊི་ས་ཧ་སྶཱ་ནཾ, པ་ཋ་མཱ་བྷི་ས་མ་ཡོ ཨ་ཧཱུ’’ཏི.
ཏ་ཏྠ ས་ཉྪ་ཌྜི་ཏནྟི ཚ་ཌྜི་ཏཾ ཨུ་ཛ྄ཛྷི་ཏཾ པ་རི་ཙྩ་ཏྟཾ. ཀུ་ལ་མཱུ་ལནྟི ཀུ་ལ་གྷ་རཾ, ཨ་པ་རི་མི་ཏ་བྷོ་ག་ཀྑ་ནྡྷཾ ཨ་ནེ་ཀ་ཀོ་ཊི་ས་ཧ་སྶ་དྷ་ན་ས་ཉྩ་ཡཾ ད་ས་ས་ཏ་ན་ཡ་ན་བྷ་ཝ་ན་ས་དི་ས་བྷོ་གཾ ཨ་ཏི་དུ་ཙྩ་ཛཾ ཏི་ཎ་མི་ཝ ཚ་ཌྜི་ཏ་ནྟི ཨ་ཏྠོ. ཡཱ་ཙ་ཀེཏི ཡཱ་ཙ་ཀཱ་ནཾ ད་ཏྭཱ. ཨཱ་ལ༹་ཀནྟི གོ་ཊྛཾ, ཡ་ཐཱ ཨུ་ས་བྷོ གོ་ཊྛཾ བྷི་ནྡི་ཏྭཱ ཡ་ཐཱ་སུ་ཁཾ ཨི་ཙྪི་ཏ་ཊྛཱ་ནཾ པཱ་པུ་ཎཱ་ཏི, ཨེ་ཝཾ མ་ཧཱ་པུ་རི་སོ་པི གེ་ཧ་བ་ནྡྷ་ནཾ བྷི་ནྡི་ཏྭཱ ཨ་བྷི་ས་མྦོ་དྷིཾ པཱ་པུ་ཎཱི་ཏི ཨ་ཏྠོ.
པུ་ན ཙ་ཏུ་མཱ་སཾ ཛ་ན་པ་ད་ཙཱ་རི་ཀཾ ཙ་ར་མཱ་ནེ ས་ཏྠ་རི ད་ས་ཀོ་ཊི་ས་ཧ་སྶཱ་ནཾ དུ་ཏི་ཡོ ཨ་བྷི་ས་མ་ཡོ ཨ་ཧོ་སི. ཡ་དཱ པ་ན སུ་ནྡ་ར་ན་ག་ར་དྭཱ་རེ ཨ་ས་ན་རུ་ཀྑ་མཱུ་ལེ ཡ་མ་ཀ་པཱ་ཊི་ཧཱ་རི་ཡཾ ཀ་རོ་ནྟོ དྷ་མྨཾ དེ་སེ་སི, ཏ་དཱ པ་ཉྩ་ནྣཾ ཀོ་ཊི་ས་ཧ་སྶཱ་ནཾ ཏ་ཏི་ཡོ ཨ་བྷི་ས་མ་ཡོ ཨ་ཧོ་སི. པུ་ན ཡ་མ་ཀ་པཱ་ཊི་ཧཱ་རི་ཡཾ ཀ་ཏྭཱ སུ་ར་རི་པུ་དུ་ར་བྷི་བྷ་ཝ་ནེ ཏཱ་ཝ་ཏིཾ་ས་བྷ་ཝ་ནེ སུ་དྷ་མྨཱ ནཱ་མ དེ་ཝ་ས་བྷཱ ཨ་ཏྠི, ཏ་ཏྠ ནི་སཱི་དི་ཏྭཱ ཨ་ཏྟ་ནོ མཱ་ཏ་རཾ དྷ་ན་ཝ་ཏཱི་དེ་ཝིཾ པ་མུ་ཁཾ ཀ་ཏྭཱ ད་ས་ས་ཧ་སྶི་ལོ་ཀ་དྷཱ་ཏུ་ཡཱ དེ་ཝ་ཏཱ་ནཾ ཨ་ནུ་གྒ་ཧ་ཀ་ར་ཎ་ཏྠཾ ས་ཏྟ་པྤ་ཀ་ར་ཎཾ ཨ་བྷི་དྷ་མྨ་པི་ཊ་ཀཾ དེ་སེ་ནྟོ ཏཱི་ཎི དེ་ཝ་ཏཱ་ཀོ་ཊི་ས་ཧ་སྶཱ་ནི དྷ་མྨཱ་མ་ཏཾ པཱ་ཡེ་སི. ཏེ་ན ཝུ་ཏྟཾ –
༤. ‘‘ཙ་ཏུ་མཱ་སཾ ཡ་དཱ བུ་དྡྷོ, ལོ་ཀེ ཙ་ར་ཏི ཙཱ་རི་ཀཾ;
ད་ས་ཀོ་ཊི་ས་ཧ་སྶཱ་ནཾ, དུ་ཏི་ཡཱ་བྷི་ས་མ་ཡོ ཨ་ཧུ.
༥. ‘‘ཡ་མ་ཀཾ ཝི་ཀུ་བྦ་ནཾ ཀ་ཏྭཱ, ཉཱ་ཎ་དྷཱ་ཏུཾ པ་ཀི་ཏྟ་ཡི;
པ་ཉྩ་ཀོ་ཊི་ས་ཧ་སྶཱ་ནཾ, ཏ་ཏི་ཡཱ་བྷི་ས་མ་ཡོ ཨ་ཧུ.
༦. ‘‘སུ་དྷ་མྨཱ དེ་ཝ་པུ་རེ ར་མྨེ, ཏ་ཏྠ དྷ་མྨཾ པ་ཀི་ཏྟ་ཡི;
ཏཱི་ཎི་ཀོ་ཊི་ས་ཧ་སྶཱ་ནཾ, དེ་ཝཱ་ནཾ བོ་དྷ་ཡཱི ཛི་ནོ.
༧. ‘‘ན་ར་དེ་ཝ་སྶ ཡ་ཀྑ་སྶ, ཨ་པ་རེ དྷ་མྨ་དེ་ས་ནེ;
ཨེ་ཏེ་སཱ་ནཾ ཨ་བྷི་ས་མ་ཡཱ, ག་ཎ་ནཱ་ཏོ ཨ་ས་ངྑི་ཡཱ’’ཏི.
ཏ་ཏྠ ཙ་ཏུ་མཱ་སནྟི ཙཱ་ཏུ་མཱ་སེ. ཨ་ཡ་མེ་ཝ ཝཱ པཱ་ཋོ. ཙ་ར་ཏཱིཏི ཨ་ཙ་རི. ཡ་མ་ཀཾ ཝི་ཀུ་བྦ་ནཾ ཀ་ཏྭཱཏི ཡ་མ་ཀ་པཱ་ཊི་ཧཱ་རི་ཡཾ ཀ་ཏྭཱ. ཉཱ་ཎ་དྷཱ་ཏུནྟི ས་བྦ་ཉྙུ་ཏ་ཉྙཱ་ཎ་ས་བྷཱ་ཝཾ. ‘‘ས་བྦ་ཉཱ་ཎ་དྷཱ་ཏུ’’ནྟི་པི ཝ་ད་ནྟི. པ་ཀི་ཏྟ་ཡཱིཏི མ་ཧཱ་ཛ་ན་སྶ པ་ཀཱ་སེ་སི. སུ་དྷ་མྨཱཏི ཏཱ་ཝ་ཏིཾ་ས་བྷ་ཝ་ནེ སུ་དྷ་མྨཱ ནཱ་མ ས་བྷཱ ཨ་ཏྠི, ཏ་ཏྠ ནི་སཱི་དི་ཏྭཱ་ཏི ཨ་ཏྠོ. དྷ་མྨནྟི ཨ་བྷི་དྷ་མྨཾ.
ཏ་དཱ ཀི་ར ཨཱ་ནུ་བྷཱ་ཝ་ཝི་ཛི་ཏ་ན་ར་དེ་ཝོ ན་ར་དེ་ཝོ ནཱ་མ མ་ཧེ་ས་ཀྑོ ཧེ་ཊྛཱ ཝུ་ཏྟ་ན་ར་དེ་ཝ་ཡ་ཀྑོ ཝི་ཡ མ་ཧི་དྡྷི་ཀོ ཡ་ཀྑོ ཨ་ཧོ་སི. སོ ཛ་མྦུ་དཱི་པེ ཨེ་ཀ་སྨིཾ ན་ག་རེ ར་ཉྙོ ཡཱ་དི་སཾ རཱུ་པཾ, ཏཱ་དི་སཾ རཱུ་པ་ས་ཎྛཱ་ནཾ ས་ར་ཀུ་ཏྟིཾ ནི་མྨི་ནི་ཏྭཱ ཏཾ རཱ་ཛཱ་ནཾ མཱ་རེ་ཏྭཱ ཁཱ་དི་ཏྭཱ ས་ཧ་ཨ་ནྟེ་པུ་རཾ ར་ཛྫཾ པ་ཊི་པ་ཛྫི་ཏྭཱ ཨ་པ་རི་མི་ཏ་མཾ་ས་བྷོ་ཛ་ནོ ཨ་ཧོ་སི. སོ ཀི་ར ཨི་ཏྠི་དྷུ་ཏྟོ ཙ ཨ་ཧོ་སི. ཡ་དཱ པ་ན ཏཾ ཀུ་ས་ལཱ ཚེ་ཀཱ ཨི་ཏྠི་ཡོ – ‘‘ནཱ་ཡཾ ཨ་མྷཱ་ཀཾ རཱ་ཛཱ, ཨ་མ་ནུ་སྶོ ཨེ་སོ’’ཏི ཛཱ་ན་ནྟི, ཏ་དཱ སོ ལ་ཛྫི་ཏོ ཧུ་ཏྭཱ ཏཱ ས་བྦཱ ཁཱ་དི་ཏྭཱ ཨ་ཉྙཾ ན་ག་རཾ པ་ཊི་པ་ཛྫ་ཏི. ཨེ་ཝ་མེ་ཝ སོ ན་ར་དེ་ཝ་ཡ་ཀྑོ མ་ནུ་སྶེ བྷ་ཀྑ་ཡ་ནྟོ ཡ་དཱ སུ་ནྡ་ར་ན་ག་རཱ་བྷི་མུ་ཁོ ཨ་ག་མཱ་སི, ཏ་དཱ ཏཾ དི་སྭཱ ན་ག་ར་ཝཱ་སི་ནོ མ་ནུ་སྶཱ མ་ར་ཎ་བྷ་ཡ་ཏ་ཛྫི་ཏ་ས་ནྟཱ་སཱ ས་ཀ་ན་ག་ར་ཏོ ནི་ཀྑ་མི་ཏྭཱ ཏ་ཏོ ཏ་ཏོ པ་ལཱ་ཡིཾ་སུ. ཨ་ཐ ཏེ མ་ནུ་སྶེ པ་ལཱ་ཡ་མཱ་ནེ དི་སྭཱ ཀ་སྶ་པ་ད་ས་བ་ལོ ཏ་སྶ ན་ར་དེ་ཝ་སྶ ཡ་ཀྑ་སྶ པུ་ར་ཏོ ཨ་ཊྛཱ་སི. ན་ར་དེ་ཝོ ཨེ་ཝཾ དེ་ཝ་དེ་ཝཾ ཋི་ཏཾ དི་སྭཱ ཝི་སྶ་རཾ གྷོ་རཾ ནཱ་དཾ ན་དི་ཏྭཱ བྷ་ག་ཝ་ཏོ བྷ་ཡཾ ཨུ་པྤཱ་དེ་ཏུཾ ཨ་ས་ཀྐོ་ནྟོ ཏཾ ས་ར་ཎཾ ག་ནྟྭཱ པ་ཉྷཾ པུ་ཙྪི. པ་ཉྷཾ ཝི་སྶ་ཛྫེ་ཏྭཱ ཏཾ ད་མེ་ཏྭཱ དྷ་མྨེ དེ་སི་ཡ་མཱ་ནེ ས་མྤ་ཏྟཱ་ནཾ ན་ར་མ་རཱ་ནཾ ག་ཎ་ན་པ་ཐཱ་ཏཱི་ཏཱ་ནཾ ཨ་བྷི་ས་མ་ཡོ ཨ་ཧོ་སི. ཏེ་ན ཝུ་ཏྟཾ – ‘‘ན་ར་དེ་ཝ་སྶ ཡ་ཀྑ་སྶཱ’’ཏི་ཨཱ་དི. ཏ་ཏྠ ཨ་པ་རེ དྷ་མྨ་དེ་ས་ནེཏི ཨ་པ་ར་སྨིཾ དྷ་མྨ་དེ་ས་ནེ. ཨེ་ཏེ་སཱ་ནནྟི ཨེ་ཏེ་སཾ. ཨ་ཡ་མེ་ཝ ཝཱ པཱ་ཋོ.
ཏ་སྶ པ་ན ཀ་སྶ་པ་བྷ་ག་ཝ་ཏོ ཨེ་ཀོ་ཝ སཱ་ཝ་ཀ་ས་ནྣི་པཱ་ཏོ ཨ་ཧོ་སི. བཱ་རཱ་ཎ་སཱི་ན་ག་རེ པུ་རོ་ཧི་ཏ་པུ་ཏྟོ ཏི་སྶོ ནཱ་མ ཨ་ཧོ་སི. སོ ཀ་སྶ་པ་སྶ བོ་དྷི་ས་ཏྟ་སྶ ས་རཱི་རེ ལ་ཀྑ་ཎ་ས་མྤ་ཏྟིཾ དི་སྭཱ པི་ཏུ་ནོ བྷཱ་ས་ཏོ སུ་ཏྭཱ – ‘‘ནི་སྶཾ་ས་ཡཾ ཨེ་སོ མ་ཧཱ་བྷི་ནི་ཀྑ་མ་ནཾ ནི་ཀྑ་མི་ཏྭཱ བུ་དྡྷོ བྷ་ཝི་སྶ་ཏི, ཨེ་ཏ་སྶཱ་ཧཾ ས་ནྟི་ཀེ པ་བྦ་ཛི་ཏྭཱ སཾ་སཱ་ར་དུ་ཀྑ་ཏོ མུ་ཙྩི་སྶཱ་མཱི’’ཏི ཙི་ནྟེ་ཏྭཱ སུ་དྡྷ་མུ་ནི་ག་ཎ་ཝ་ནྟཾ ཧི་མ་ཝ་ནྟཾ ག་ནྟྭཱ ཏཱ་པ་ས་པ་བྦ་ཛྫཾ པ་བྦ་ཛི. ཏ་སྶ པ་རི་ཝཱ་ར་བྷཱུ་ཏཱ་ནི ཝཱི་ས་ཏི་ཏཱ་པ་ས་ས་ཧ་སྶཱ་ནི ཨ་ཧེ་སུཾ. སོ ཨ་པ་ར་བྷཱ་གེ ‘‘ཀ་སྶ་པ་ཀུ་མཱ་རོ ནི་ཀྑ་མི་ཏྭཱ ཨ་བྷི་ས་མྦོ་དྷིཾ ཨ་ནུ་པྤ་ཏྟོ’’ཏི སུ་ཏྭཱ ས་པ་རི་ཝཱ་རོ ཨཱ་ག་ནྟྭཱ ཀ་སྶ་པ་སྶ བྷ་ག་ཝ་ཏོ ས་ནྟི་ཀེ ས་པ་རི་ཝཱ་རོ ཨེ་ཧི་བྷི་ཀྑུ་པ་བྦ་ཛྫཱ་ཡ པ་བྦ་ཛི་ཏྭཱ ཨ་ར་ཧ་ཏྟཾ པཱ་པུ་ཎི. ཏ་སྨིཾ ས་མཱ་ག་མེ ཀ་སྶ་པོ བྷ་ག་ཝཱ མཱ་གྷ་པུ་ཎྞ་མཱ་ཡཾ པཱ་ཏི་མོ་ཀྑཾ ཨུ་དྡི་སི. ཏེ་ན ཝུ་ཏྟཾ –
༨. ‘‘ཏ་སྶཱ་པི དེ་ཝ་དེ་ཝ་སྶ, ཨེ་ཀོ ཨཱ་སི ས་མཱ་ག་མོ;
ཁཱི་ཎཱ་ས་ཝཱ་ནཾ ཝི་མ་ལཱ་ནཾ, ས་ནྟ་ཙི་ཏྟཱ་ན ཏཱ་དི་ནཾ.
༩. ‘‘ཝཱི་ས་བྷི་ཀྑུ་ས་ཧ་སྶཱ་ནཾ, ཏ་དཱ ཨཱ་སི ས་མཱ་ག་མོ;
ཨ་ཏི་ཀྐ་ནྟ་བྷ་ཝ་ནྟཱ་ནཾ, ཧི་རི་སཱི་ལེ་ན ཏཱ་དི་ན’’ནྟི.
ཏ་ཏྠ ཨ་ཏི་ཀྐ་ནྟ་བྷ་ཝ་ནྟཱ་ནནྟི ཨ་ཏི་ཀྐ་ནྟ་པུ་ཐུ་ཛྫ་ན་སོ་ཏཱ་པ་ནྣཱ་དཱི་ནཾ, ས་བྦེ་སཾ ཁཱི་ཎཱ་ས་ཝཱ་ན་མེ་ཝཱ་ཏི ཨ་ཏྠོ. ཧི་རི་སཱི་ལེ་ན ཏཱ་དི་ནནྟི ཧི་རི་ཡཱ ཙ སཱི་ལེ་ན ཙ ས་དི་སཱ་ནཾ.
ཏ་དཱ ཨ་མྷཱ་ཀཾ བོ་དྷི་ས་ཏྟོ ཛོ་ཏི་པཱ་ལོ ནཱ་མ མཱ་ཎ་ཝོ ཏི་ཎྞཾ ཝེ་དཱ་ནཾ པཱ་ར་གཱུ བྷཱུ་མི་ཡ་ཉྩེ་ཝ ཨ་ནྟ་ལི་ཀྑེ ཙ པཱ་ཀ་ཊོ གྷ་ཊི་ཀཱ་ར་སྶ ཀུ་མྦྷ་ཀཱ་ར་སྶ ས་ཧཱ་ཡོ ཨ་ཧོ་སི. སོ ཏེ་ན ས་དྡྷིཾ ས་ཏྠཱ་རཾ ཨུ་པ་ས་ངྐ་མི་ཏྭཱ ཏ་སྶ དྷ་མྨ་ཀ་ཐཾ སུ་ཏྭཱ ཏ་སྶ ས་ནྟི་ཀེ པ་བྦ་ཛི. སོ ཨཱ་ར་དྡྷ་ཝཱི་རི་ཡོ ཏཱི་ཎི པི་ཊ་ཀཱ་ནི ཨུ་གྒ་ཧེ་ཏྭཱ ཝ་ཏྟ་པ་ཊི་པ་ཏྟི་ཡཱ བུ་དྡྷ་སཱ་ས་ནཾ སོ་བྷེ་སི. སོ་པི ཏཾ ས་ཏྠཱ བྱཱ་ཀཱ་སི. ཏེ་ན ཝུ་ཏྟཾ –
༡༠. ‘‘ཨ་ཧཾ ཏ་དཱ མཱ་ཎ་ཝ་ཀོ, ཛོ་ཏི་པཱ་ལོ་ཏི ཝི་སྶུ་ཏོ;
ཨ་ཛ྄ཛྷཱ་ཡ་ཀོ མ་ནྟ་དྷ་རོ, ཏི་ཎྞཾ ཝེ་དཱ་ན པཱ་ར་གཱུ.
༡༡. ‘‘ལ་ཀྑ་ཎེ ཨི་ཏི་ཧཱ་སེ ཙ, ས་དྷ་མྨེ པཱ་ར་མིཾ ག་ཏོ;
བྷཱུ་མ་ནྟ་ལི་ཀྑ་ཀུ་ས་ལོ, ཀ་ཏ་ཝི་ཛྫོ ཨ་ན་ཝ་ཡོ.
༡༢. ‘‘ཀ་སྶ་པ་སྶ བྷ་ག་ཝ་ཏོ, གྷ་ཊི་ཀཱ་རོ ནཱ་མུ་པ་ཊྛ་ཀོ;
ས་གཱ་ར་ཝོ ས་པྤ་ཏི་སྶོ, ནི་བྦུ་ཏོ ཏ་ཏི་ཡེ ཕ་ལེ.
༡༣. ‘‘ཨཱ་དཱ་ཡ མཾ གྷ་ཊཱི་ཀཱ་རོ, ཨུ་པ་ག་ཉྪི ཀ་སྶ་པཾ ཛི་ནཾ;
ཏ་སྶ དྷ་མྨཾ སུ་ཎི་ཏྭཱ་ན, པ་བྦ་ཛིཾ ཏ་སྶ ས་ནྟི་ཀེ.
༡༤. ‘‘ཨཱ་ར་དྡྷ་ཝཱི་རི་ཡོ ཧུ་ཏྭཱ, ཝ་ཏྟཱ་ཝ་ཏྟེ་སུ ཀོ་ཝི་དོ;
ན ཀྭ་ཙི པ་རི་ཧཱ་ཡཱ་མི, པཱུ་རེ་སིཾ ཛི་ན་སཱ་ས་ནཾ.
༡༥. ‘‘ཡཱ་ཝ་ཏཱ བུ་དྡྷ་བྷ་ཎི་ཏཾ, ན་ཝ་ངྒཾ ཛི་ན་སཱ་ས་ནཾ;
ས་བྦཾ པ་རི་ཡཱ་པུ་ཎི་ཏྭཱ་ན, སོ་བྷ་ཡིཾ ཛི་ན་སཱ་ས་ནཾ.
༡༦. ‘‘མ་མ ཨ་ཙྪ་རི་ཡཾ དི་སྭཱ, སོ་པི བུ་དྡྷོ ཝི་ཡཱ་ཀ་རི;
ཨི་མ་མྷི བྷ་དྡ་ཀེ ཀ་པྤེ, ཨ་ཡཾ བུ་དྡྷོ བྷ་ཝི་སྶ་ཏི.
༡༧. ‘‘ཨ་ཧུ ཀ་པི་ལ་ཝ྄ཧ་ཡཱ ར་མྨཱ…པེ… ཧེ་སྶཱ་མ ས་མྨུ་ཁཱ ཨི་མཾ.
༣༠. ‘‘ཏ་སྶཱ་པི ཝ་ཙ་ནཾ སུ་ཏྭཱ, བྷི་ཡྻོ ཙི་ཏྟཾ པ་སཱ་ད་ཡིཾ;
ཨུ་ཏྟ་རིཾ ཝ་ཏ་མ་དྷི་ཊྛཱ་སིཾ, ད་ས་པཱ་ར་མི་པཱུ་རི་ཡཱ.
༣༡. ‘‘ཨེ་ཝ་མ་ཧཾ སཾ་ས་རི་ཏྭཱ, པ་རི་ཝ་ཛྫེ་ནྟོ ཨ་ནཱ་ཙ་རཾ;
དུ་ཀྐ་ར་ཉྩ ཀ་ཏཾ མ་ཡ྄ཧཾ, བོ་དྷི་ཡཱ་ཡེ་ཝ ཀཱ་ར་ཎཱ’’ཏི.
ཏ་ཏྠ བྷཱུ་མ་ནྟ་ལི་ཀྑ་ཀུ་ས་ལོཏི བྷཱུ་མི་སི་ཀྑཱ་སུ ཙ ཨ་ནྟ་ལི་ཀྑེ་སུ ཙ ཛོ་ཏི་ཙ་ཀྐཱ་ཙཱ་རེ ཛོ་ཏི་ཝི་ཛྫཱ་ཡ ཙ ཀུ་ས་ལོ་ཏི ཨ་ཏྠོ. ཨུ་པ་ཊྛ་ཀོཏི ཨུ་པ་ཊྛཱ་ཡ་ཀོ. ས་པྤ་ཏི་སྶོཏི ས་པྤ་ཏི་སྶ་ཡོ. ནི་བྦུ་ཏོཏི ཝི་ནཱི་ཏོ, ཝི་སྶུ་ཏོ ཝཱ. ཏ་ཏི་ཡེ ཕ་ལེཏི ནི་མི་ཏྟ་ས་ཏྟ་མཱི, ཏ་ཏི་ཡ་ཕ་ལཱ་དྷི་ག་མ་ཧེ་ཏུ ནི་བྦུ་ཏོ་ཏི ཨ་ཏྠོ. ཨཱ་དཱ་ཡཱཏི མཾ ག་ཧེ་ཏྭཱ. ཝ་ཏྟཱ་ཝ་ཏྟེ་སཱུཏི ཁུ་དྡ་ཀ་ཝ་ཏྟ་མ་ཧཱ་ཝ་ཏྟེ་སུ. ཀོ་ཝི་དོཏི ཏེ་སཾ པཱུ་ར་ཎེ ཀུ་ས་ལོ. ན ཀྭ་ཙི པ་རི་ཧཱ་ཡཱ་མཱིཏི ཀྭ་ཙི་པི སཱི་ལེ་སུ ཝཱ ས་མཱ་དྷི་ས་མཱ་པ་ཏྟི་ཨཱ་དཱི་སུ ཝཱ ཀ་ཏྠ་ཙི ཀུ་ཏོ་པི ན པ་རི་ཧཱ་ཡཱ་མི, ས་བྦ་ཏྠ མེ པ་རི་ཧཱ་ནི ནཱ་མ ན ཝི་ཛྫ་ཏཱི་ཏི དཱི་པེ་ཏི. ‘‘ན ཀོ་ཙི པ་རི་ཧཱ་ཡཱ་མཱི’’ཏི་པི པཱ་ཋོ, སོ་ཡེ་ཝ་ཏྠོ.
ཡཱ་ཝ་ཏཱཏི པ་རི་ཙྪེ་ད་ཝ་ཙ་ན་མེ་ཏཾ, ཡཱ་ཝ་ཏ་ཀ་ནྟི ཨ་ཏྠོ. བུ་དྡྷ་བྷ་ཎི་ཏནྟི བུ་དྡྷ་ཝ་ཙ་ནཾ. སོ་བྷ་ཡིནྟི སོ་བྷེ་སིཾ པ་ཀཱ་སེ་སིཾ. མ་མ ཨ་ཙྪ་རི་ཡནྟི མ་མ ས་མྨཱ་པ་ཊི་པ་ཏྟིཾ ཨ་ཉྙེ་ཧི ཨ་སཱ་དྷཱ་ར་ཎཾ ཨ་ཙྪ་རི་ཡཾ ཨ་བྦྷུ་ཏཾ ཀ་སྶ་པོ བྷ་ག་ཝཱ དི་སྭཱ་ཏི ཨ་ཏྠོ. སཾ་ས་རི་ཏྭཱཏི སཾ་སཱ་རེ སཾ་ས་རི་ཏྭཱ. ཨ་ནཱ་ཙ་རནྟི ཨ་ནཱ་ཙཱ་རཾ ཨ་ཀ་ཏྟ་བྦཾ, ཨ་ཀ་ར་ཎཱི་ཡ་ནྟི ཨ་ཏྠོ.
ཏ་སྶ པ་ན ཀ་སྶ་པ་སྶ བྷ་ག་ཝ་ཏོ ཛཱ་ཏ་ན་ག་རཾ བཱ་རཱ་ཎ་སཱི ནཱ་མ ཨ་ཧོ་སི, བྲ་ཧྨ་ད་ཏྟོ ནཱ་མ བྲཱ་ཧྨ་ཎོ པི་ཏཱ, པ་ར་མ་གུ་ཎ་ཝ་ཏཱི དྷ་ན་ཝ་ཏཱི ནཱ་མ བྲཱ་ཧྨ་ཎཱི མཱ་ཏཱ, ཏི་སྶོ ཙ བྷཱ་ར་དྭཱ་ཛོ ཙ དྭེ ཨ་གྒ་སཱ་ཝ་ཀཱ, ས་བྦ་མི་ཏྟོ ནཱ་མུ་པ་ཊྛཱ་ཀོ, ཨ་ནུ་ལཱ༹ ཙ ཨུ་རུ་ཝེ་ལཱ༹ ཙ དྭེ ཨ་གྒ་སཱ་ཝི་ཀཱ, ནི་གྲོ་དྷ་རུ་ཀྑོ བོ་དྷི, ས་རཱི་རཾ ཝཱི་ས་ཏི་ཧ་ཏྠུ་བྦེ་དྷཾ ཨ་ཧོ་སི, ཝཱི་ས་ཏི་ཝ་སྶ་ས་ཧ་སྶཱ་ནི ཨཱ་ཡུ, སུ་ན་ནྡཱ ནཱ་མ་སྶ ཨ་གྒ་མ་ཧེ་སཱི, ཝི་ཛི་ཏ་སེ་ནོ ནཱ་མ པུ་ཏྟོ, པཱ་སཱ་ད་ཡཱ་ནེ་ན ནི་ཀྑ་མི. ཏེ་ན ཝུ་ཏྟཾ –
༣༢. ‘‘ན་ག་རཾ བཱ་རཱ་ཎ་སཱི ནཱ་མ, ཀི་ཀཱི ནཱ་མཱ་སི ཁ་ཏྟི་ཡོ;
ཝ་ས་ཏེ ཏ་ཏྠ ན་ག་རེ, ས་མྦུ་དྡྷ་སྶ མ་ཧཱ་ཀུ་ལཾ.
༣༣. ‘‘བྲཱ་ཧྨ་ཎོ བྲ་ཧྨ་ད་ཏྟོ་ཝ, ཨཱ་སི བུ་དྡྷ་སྶ སོ པི་ཏཱ;
དྷ་ན་ཝ་ཏཱི ནཱ་མ ཛ་ནི་ཀཱ, ཀ་སྶ་པ་སྶ མ་ཧེ་སི་ནོ.
༣༨. ‘‘ཏི་སྶོ ཙ བྷཱ་ར་དྭཱ་ཛོ ཙ, ཨ་ཧེ་སུཾ ཨ་གྒ་སཱ་ཝ་ཀཱ;
ས་བྦ་མི་ཏྟོ ནཱ་མུ་པ་ཊྛཱ་ཀོ, ཀ་སྶ་པ་སྶ མ་ཧེ་སི་ནོ.
༣༩. ‘‘ཨ་ནུ་ལཱ༹ ཨུ་རུ་ཝེ་ལཱ༹ ཙ, ཨ་ཧེ་སུཾ ཨ་གྒ་སཱ་ཝི་ཀཱ;
བོ་དྷི ཏ་སྶ བྷ་ག་ཝ་ཏོ, ནི་གྲོ་དྷོ་ཏི པ་ཝུ་ཙྩ་ཏི.
༤༡. ‘‘ཨུ་ཙྩ་ཏྟ་ནེ་ན སོ བུ་དྡྷོ, ཝཱི་ས་ཏི་ར་ཏ་ནུ་གྒ་ཏོ;
ཝི་ཛྫུ་ལ་ཊྛཱི་ཝ ཨཱ་ཀཱ་སེ, ཙ་ནྡོ་ཝ ག་ཧ་པཱུ་རི་ཏོ.
༤༢. ‘‘ཝཱི་ས་ཏི་ཝ་སྶ་ས་ཧ་སྶཱ་ནི, ཨཱ་ཡུ ཏ་སྶ མ་ཧེ་སི་ནོ;
ཏཱ་ཝ་ཏཱ ཏི་ཊྛ་མཱ་ནོ སོ, ཏཱ་རེ་སི ཛ་ན་ཏཾ བ་ཧུཾ.
༤༣. ‘‘དྷ་མྨ་ཏ་ལཱ༹་ཀཾ མཱ་པ་ཡི་ཏྭཱ, སཱི་ལཾ ད་ཏྭཱ ཝི་ལེ་པ་ནཾ;
དྷ་མྨ་དུ་སྶཾ ནི་ཝཱ་སེ་ཏྭཱ, དྷ་མྨ་མཱ་ལཾ ཝི་བྷ་ཛྫི་ཡ.
༤༤. ‘‘དྷ་མྨ་ཝི་མ་ལ་མཱ་དཱ་སཾ, ཋ་པ་ཡི་ཏྭཱ མ་ཧཱ་ཛ་ནེ;
ཀེ་ཙི ནི་བྦཱ་ནཾ པ་ཏྠེ་ནྟཱ, པ་སྶ་ནྟུ མེ ཨ་ལ་ངྐ་རཾ.
༤༥. ‘‘སཱི་ལ་ཀ་ཉྩུ་ཀཾ ད་ཏྭཱ་ན, ཛྷཱ་ན་ཀ་ཝ་ཙ་ཝ་མྨི་ཏཾ;
དྷ་མྨ་ཙ་མྨཾ པཱ་རུ་པི་ཏྭཱ, ད་ཏྭཱ ས་ནྣཱ་ཧ་མུ་ཏྟ་མཾ.
༤༦. ‘‘ས་ཏི་ཕ་ལ་ཀཾ ད་ཏྭཱ་ན, ཏི་ཁི་ཎཾ ཉཱ་ཎ་ཀུ་ནྟི་མཾ;
དྷ་མྨ་ཁ་གྒ་ཝ་རཾ ད་ཏྭཱ, སཱི་ལ་སཾ་ས་གྒ་མ་དྡ་ནཾ.
༤༧. ‘‘ཏེ་ཝི་ཛྫཱ་བྷཱུ་ས་ནཾ ད་ཏྭཱ་ན, ཨཱ་ཝེ་ལ༹ཾ ཙ་ཏུ་རོ ཕ་ལེ;
ཚ་ལ༹་བྷི་ཉྙཱ་བྷ་ར་ཎཾ ད་ཏྭཱ, དྷ་མྨ་པུ་པྥ་པི་ལ༹་ནྡྷ་ནཾ.
༤༨. ‘‘ས་དྡྷ་མྨ་པ་ཎྜ་ར་ཙྪ་ཏྟཾ, ད་ཏྭཱ པཱ་པ་ནི་ཝཱ་ར་ཎཾ;
མཱ་པ་ཡི་ཏྭཱ་བྷ་ཡཾ པུ་པྥཾ, ནི་བྦུ་ཏོ སོ ས་སཱ་ཝ་ཀོ.
༤༩. ‘‘ཨེ་སོ ཧི ས་མྨཱ་ས་མྦུ་དྡྷོ, ཨ་པྤ་མེ་ཡྻོ དུ་རཱ་ས་དོ;
ཨེ་སོ ཧི དྷ་མྨ་ར་ཏ་ནོ, སྭཱ་ཀྑཱ་ཏོ ཨེ་ཧི་པ་སྶི་ཀོ.
༥༠. ‘‘ཨེ་སོ ཧི ས་ངྒྷ་ར་ཏ་ནོ, སུ་པྤ་ཊི་པ་ནྣོ ཨ་ནུ་ཏྟ་རོ;
ས་བྦཾ ཏ་མ་ནྟ་ར་ཧི་ཏཾ, ན་ནུ རི་ཏྟཱ ས་བྦ་ས་ངྑཱ་རཱ’’ཏི.
ཏ་ཏྠ ཝི་ཛྫུ་ལ་ཊྛཱི་ཝཱཏི གྷ་ན་བྷཱ་ཝེ་ན ས་ཎྛི་ཏཱ ཝི་ཛྫུ་ལ་ཏཱ ཝི་ཡ. ཙ་ནྡོ་ཝ ག་ཧ་པཱུ་རི་ཏོཏི པ་རི་ཝེ་ས་ག་ཧ་པ་རི་ཀྑི་ཏོ པུ་ཎྞ་ཙ་ནྡོ ཝི་ཡ. དྷ་མྨ་ཏ་ལཱ༹་ཀཾ མཱ་པ་ཡི་ཏྭཱཏི པ་རི་ཡ་ཏྟི་དྷ་མྨ་ཏ་ལཱ༹་ཀཾ མཱ་པ་ཡི་ཏྭཱ. སཱི་ལཾ ད་ཏྭཱ ཝི་ལེ་པ་ནནྟི ཙ་ཏུ་པཱ་རི་སུ་དྡྷི་སཱི་ལ་ས་ངྑཱ་ཏཾ ཙི་ཏྟ་ས་ནྟ་ཏི་ཝི་བྷཱུ་ས་ན་ཏྠཾ ཝི་ལེ་པ་ནཾ ད་ཏྭཱ. དྷ་མྨ་དུ་སྶཾ ནི་ཝཱ་སེ་ཏྭཱཏི ཧི་རོ་ཏྟ་པྤ་དྷ་མྨ་ས་ངྑཱ་ཏཾ སཱ་ཊ་ཀ་ཡུ་གཾ ནི་ཝཱ་སེ་ཏྭཱ. དྷ་མྨ་མཱ་ལཾ ཝི་བྷ་ཛྫི་ཡཱཏི ས་ཏྟ་ཏྟིཾ་ས་བོ་དྷི་པ་ཀྑི་ཡ་དྷ་མྨ་ཀུ་སུ་མ་མཱ་ལཾ ཝི་བྷ་ཛི་ཏྭཱ. ཝི་ད་ཧི་ཏྭཱ་ཏི ཨ་ཏྠོ.
དྷ་མྨ་ཝི་མ་ལ་མཱ་དཱ་སནྟི ཝི་མ་ལཾ སོ་ཏཱ་པ་ཏྟི་མ་གྒ་ས་ངྑཱ་ཏཾ ཨཱ་དཱ་སཾ སཱ་ཝ་ཛྫཱ་ན་ཝ་ཛྫ་ཀུ་ས་ལཱ་ཀུ་ས་ལ་དྷ་མྨ་ས་ལླ་ཀྑ་ཎ་ཏྠཾ མ་ཧཱ་ཛ་ན་སྶ དྷ་མྨ་ཏ་ལཱ༹་ཀ་ཏཱི་རེ དྷ་མྨཱ་དཱ་སཾ ཋ་པེ་ཏྭཱ་ཏི ཨ་ཏྠོ. མ་ཧཱ་ཛ་ནེཏི མ་ཧཱ་ཛ་ན་སྶ. ཀེ་ཙཱིཏི ཡེ ཀེ་ཙི. ནི་བྦཱ་ནཾ པ་ཏྠེ་ནྟཱཏི ས་བྦཱ་ཀུ་ས་ལ་མ་ལ་ཝི་ལ་ཡ་ཀ་རཾ ཨ་མ་ཏ་མ་ས་ངྑ་ཏ་མ་ནཱི་ཏི་ཀཾ པ་ར་མ་ས་ནྟཾ ཨ་ཙྩུ་ཏི་ར་སཾ ནི་བྦཱ་ནཾ པ་ཏྠེ་ནྟཱ ཝི་ཙ་ར་ནྟི. ཏེ ཨི་མཾ ཨ་ལ་ངྐཱ་རཾ ཝུ་ཏྟ་པྤ་ཀཱ་རཾ མ་ཡཱ ད་སྶི་ཏཾ པ་སྶ་ནྟཱུ་ཏི ཨ་ཏྠོ. ‘‘ནི་བྦཱ་ན་མ་བྷི་པ་ཏྠེ་ནྟཱ, པ་སྶ་ནྟུ མཾ ཨ་ལ་ངྐ་ར’’ནྟི་པི པཱ་ཋོ, སོ་ཡེ་ཝ་ཏྠོ. ཨ་ལ་ངྐ་ར་ནྟི ར་སྶཾ ཀ་ཏྭཱ ཝུ་ཏྟཾ.
སཱི་ལ་ཀ་ཉྩུ་ཀཾ ད་ཏྭཱ་ནཱཏི པ་ཉྩ་སཱི་ལ་ད་ས་སཱི་ལ་ཙ་ཏུ་པཱ་རི་སུ་དྡྷི་སཱི་ལ་མ་ཡཾ ཀ་ཉྩུ་ཀཾ ད་ཏྭཱ. ཛྷཱ་ན་ཀ་ཝ་ཙ་ཝ་མྨི་ཏནྟི ཙ་ཏུ་ཀྐ་པ་ཉྩ་ཀ་ཛ྄ཛྷཱ་ན་ཀ་ཝ་ཙ་བ་ནྡྷཾ བ་ནྡྷི་ཏྭཱ. དྷ་མྨ་ཙ་མྨཾ པཱ་རུ་པི་ཏྭཱཏི ས་ཏི་ས་མྤ་ཛ་ཉྙ་ས་ངྑཱ་ཏ་དྷ་མྨ་ཙ་མྨཾ པཱ་རུ་པི་ཏྭཱ. ད་ཏྭཱ ས་ནྣཱ་ཧ་མུ་ཏྟ་མནྟི ཨུ་ཏྟ་མཾ ཙ་ཏུ་ར་ངྒ་ས་མ་ནྣཱ་ག་ཏཾ ཝཱི་རི་ཡ་ས་ནྣཱ་ཧཾ ད་ཏྭཱ་ཏི ཨ་ཏྠོ. ས་ཏི་ཕ་ལ་ཀཾ ད་ཏྭཱ་ནཱཏི རཱ་གཱ་དི་དོ་སཱ་རི་པཱ་པ་ནི་ཝཱ་ར་ཎ་ཏྠཾ ཙ་ཏུ་ས་ཏི་པ་ཊྛཱ་ན་ཕ་ལ་ཀ་ནི་ཝཱ་ར་ཎཾ ད་ཏྭཱ. ཏི་ཁི་ཎཾ ཉཱ་ཎ་ཀུ་ནྟི་མནྟི པ་ཊི་ཝེ་དྷ་ས་མ་ཏྠཾ ཏི་ཁི་ཎ་ཝི་པ་སྶ་ནཱ་ཉཱ་ཎ་ཀུ་ནྟ་ཝ་ནྟཾ, ཝི་པ་སྶ་ནཱ་ཉཱ་ཎ་ནི་སི་ཏ་ཀུ་ནྟ་ཝ་ར་ནྟི ཨ་ཏྠོ, ཀི་ལེ་ས་བ་ལ་ནི་དྷ་ན་ཀ་ར་ས་མ་ཏྠཾ ཝཱ ཡོ་གཱ་ཝ་ཙ་ར་ཡོ་དྷ་ཝ་རཾ ཋ་པེ་ཏྭཱ་ཏི ཨ་ཏྠོ. དྷ་མྨ་ཁ་གྒ་ཝ་རཾ ད་ཏྭཱཏི ཏ་སྶ ཡོ་གཱ་ཝ་ཙ་ར་སྶ ཝཱི་རི་ཡུ་པ་ལ་ཏ་ལ་ནི་སི་ཏ་དྷཱ་རཾ མ་གྒ་པ་ཉྙཱ་ཝ་ར་ཁ་གྒཾ ད་ཏྭཱ. སཱི་ལ་སཾ་ས་གྒ་མ་དྡ་ནནྟི ཨ་རི་ཡཾ ལོ་ཀུ་ཏྟ་ར་སཱི་ལཾ ཀི་ལེ་ས་སཾ་ས་གྒ་མ་དྡ་ན་ཏྠཱ་ཡ, ཀི་ལེ་ས་ནི་གྷཱ་ཏ་ན་ཏྠཱ་ཡཱ་ཏི ཨ་ཏྠོ.
ཏེ་ཝི་ཛྫཱ་བྷཱུ་ས་ནཾ ད་ཏྭཱཏི ཏེ་ཝི་ཛྫཱ་མ་ཡཾ ཝི་བྷཱུ་ས་ནཾ ད་ཏྭཱ. ཨཱ་ཝེ་ལ༹ཾ ཙ་ཏུ་རོ ཕ་ལེཏི ཙ་ཏྟཱ་རི ཕ་ལཱ་ནི ཝ་ཊཾ་ས་ཀཾ ཀ་ཏྭཱ. ཚ་ལ༹་བྷི་ཉྙཱ་བྷ་ར་ཎནྟི ཨཱ་བྷ་ར་ཎ་ཏྠཱ་ཡ ཨ་ལ་ངྐཱ་ར་ཀ་ར་ཎ་ཏྠཱ་ཡ ཚ ཨ་བྷི་ཉྙཱ་ཡོ ད་ཏྭཱ. དྷ་མྨ་པུ་པྥ་པི་ལ༹་ནྡྷ་ནནྟི ན་ཝ་ལོ་ཀུ་ཏྟ་ར་དྷ་མྨ་ས་ངྑཱ་ཏཾ ཀུ་སུ་མ་མཱ་ལཾ ཀ་ཏྭཱ. ས་དྡྷ་མྨ་པ་ཎྜ་ར་ཙྪ་ཏྟཾ, ད་ཏྭཱ པཱ་པ་ནི་ཝཱ་ར་ཎནྟི ཨ་ཙྩ་ནྟ་ཝི་སུ་དྡྷཾ ཝི་མུ་ཏྟི་སེ་ཏ་ཙྪ་ཏྟཾ ས་བྦཱ་ཀུ་ས་ལཱ་ཏ་པ་ནི་ཝཱ་ར་ཎཾ ད་ཏྭཱ. མཱ་པ་ཡི་ཏྭཱ་བྷ་ཡཾ པུ་པྥནྟི ཨ་བྷ་ཡ་པུ་ར་གཱ་མི་ནཾ ཨ་ཊྛ་ངྒི་ཀ་མ་གྒཾ པུ་པྥཾ ཀ་ཏྭཱ་ཏི ཨ་ཏྠོ.
ཀ་སྶ་པོ ཀི་ར བྷ་ག་ཝཱ ཀཱ་སི་ར་ཊྛེ སེ་ཏ་བྱ་ན་ག་རེ སེ་ཏ་བྱུ་ཡྻཱ་ནེ པ་རི་ནི་བྦཱ་ཡི. དྷཱ་ཏུ་ཡོ ཀི་ར་སྶ ན ཝི་ཀི་རིཾ་སུ. ས་ཀ་ལ་ཛ་མྦུ་དཱི་པ་ཝཱ་སི་ནོ མ་ནུ་སྶཱ ས་ནྣི་པ་ཏི་ཏྭཱ ཨེ་ཀེ་ཀཾ སུ་ཝ་ཎྞི་ཊྛ་ཀཾ ཀོ་ཊི་ཨ་གྒྷ་ན་ཀཾ ར་ཏ་ན་ཝི་ཙི་ཏྟཾ བ་ཧི་ཙི་ན་ན་ཏྠཾ ཨེ་ཀེ་ཀཾ ཨ་ཌྜྷ་ཀོ་ཊི་ཨ་གྒྷ་ན་ཀཾ ཨ་བྦྷ་ནྟ་ར་པཱུ་ར་ཎ་ཏྠཾ མ་ནོ་སི་ལཱ་ཡ མ་ཏྟི་ཀཱ་ཀི་ཙྩཾ ཏེ་ལེ་ན ཨུ་ད་ཀ་ཀི་ཙྩཾ ཀ་རོ་ནྟོ ཡོ་ཛ་ནུ་བྦེ་དྷཾ ཐཱུ་པ་མ་ཀཾ་སུ.
‘‘ཀ་སྶ་པོ་པི བྷ་ག་ཝཱ ཀ་ཏ་ཀི་ཙྩོ, ས་བྦ་ས་ཏྟ་ཧི་ཏ་མེ་ཝ ཀ་རོ་ནྟོ;
ཀཱ་སི་རཱ་ཛ་ན་ག་རེ མི་ག་དཱ་ཡེ, ལོ་ཀ་ན་ནྡ་ན་ཀ་རོ ནི་ཝ་སཱི’’ཏི.
སེ་ས་གཱ་ཐཱ་སུ ས་བྦ་ཏྠ པཱ་ཀ་ཊ་མེ་ཝཱ་ཏི.
ཨི་ཏི མ་དྷུ་ར་ཏྠ་ཝི་ལཱ་སི་ནི་ཡཱ བུ་དྡྷ་ཝཾ་ས-ཨ་ཊྛ་ཀ་ཐཱ་ཡ
ཀ་སྶ་པ་བུ་དྡྷ་ཝཾ་ས་ཝ་ཎྞ་ནཱ ནི་ཊྛི་ཏཱ.
ཨེ་ཏྟཱ་ཝ་ཏཱ ཙ་ཏུ་ཝཱི་ས་ཏི་ཡཱ བུ་དྡྷཱ་ནཾ བུ་དྡྷ་ཝཾ་ས་ཝ་ཎྞ་ནཱ
ས་བྦཱ་ཀཱ་རེ་ན ནི་ཊྛི་ཏཱ.