༢༣. ཝེ་སྶ་བྷཱུ་བུ་དྡྷ་ཝཾ་ས་ཝ་ཎྞ་ནཱ
སི་ཁི་སྶ པ་ན ས་མྨཱ་ས་མྦུ་དྡྷ་སྶ ཨ་པ་ར་བྷཱ་གེ ཨ་ནྟ་ར་ཧི་ཏེ ཏ་སྶ སཱ་ས་ནེ ས་ཏྟ་ཏི་ཝ་སྶ་ས་ཧ་སྶཱ་ཡུ་ཀཱ མ་ནུ་སྶཱ ཨ་ནུ་ཀྐ་མེ་ན པ་རི་ཧཱ་ཡི་ཏྭཱ ད་ས་ཝ་སྶཱ་ཡུ་ཀཱ ཨ་ཧེ་སུཾ. པུ་ན ཝ་ཌྜྷི་ཏྭཱ ཨ་པ་རི་མི་ཏཱ་ཡུ་ཀཱ ཧུ་ཏྭཱ ཨ་ནུ་ཀྐ་མེ་ན པ་རི་ཧཱ་ཡི་ཏྭཱ ས་ཊྛི་ཝ་སྶ་ས་ཧ་སྶཱ་ཡུ་ཀཱ ཨ་ཧེ་སུཾ. ཏ་དཱ ཝི་ཛི་ཏ་མ་ནོ་བྷཱུ ས་བྦ་ལོ་ཀཱ་བྷི་བྷཱུ ས་ཡ་མྦྷཱུ ཝེ་སྶ་བྷཱུ ནཱ་མ ས་ཏྠཱ ལོ་ཀེ ཨུ་ད་པཱ་དི. སོ པཱ་ར་མི་ཡོ པཱུ་རེ་ཏྭཱ ཏུ་སི་ཏ་པུ་རེ ནི་བྦ་ཏྟི་ཏྭཱ ཏ་ཏོ ཙ་ཝི་ཏྭཱ ཨ་ནོ་མ་ན་ག་རེ སུ་པྤ་ཏཱི་ཏ་སྶ སུ་པྤ་ཏཱི་ཏ་སྶ ནཱ་མ ར་ཉྙོ ཨ་གྒ་མ་ཧེ་སི་ཡཱ སཱི་ལ་ཝ་ཏི་ཡཱ ཡ་ས་ཝ་ཏི་ཡཱ ནཱ་མ ཀུ་ཙྪི་སྨིཾ པ་ཊི་ས་ནྡྷིཾ ཨ་གྒ་ཧེ་སི. སོ ད་ས་ནྣཾ མཱ་སཱ་ནཾ ཨ་ཙྩ་ཡེ་ན ཨ་ནུ་པ་མུ་ཡྻཱ་ནེ མཱ་ཏུ་ཀུ་ཙྪི་ཏོ ནི་ཀྑ་མི. ཛཱ་ཡ་མཱ་ནོ་ཝ ཛ་ནཾ ཏོ་སེ་ནྟོ ཝ་ས་བྷ་ནཱ་དཾ ན་དི. ཏ་སྨཱ ཝ་ས་བྷ་ནཱ་ད་ཧེ་ཏུ་ཏྟཱ ཏ་སྶ ནཱ་མ་གྒ་ཧ་ཎ་དི་ཝ་སེ ‘‘ཝེ་སྶ་བྷཱུ’’ཏི ནཱ་མ་མ་ཀཾ་སུ. སོ ཚ་བྦ་སྶ་ས་ཧ་སྶཱ་ནི ཨ་གཱ་རཾ ཨ་ཛ྄ཛྷཱ་ཝ་སི. རུ་ཙི-སུ་རུ་ཙི-ར་ཏི་ཝ་ཌྜྷ་ན་ནཱ་མ་ཀཱ ཏ་ཡོ པཱ་སཱ་དཱ ཏ་སྶ ཨ་ཧེ་སུཾ. སུ་ཙི་ཏྟཱ་དེ་ཝི་པྤ་མུ་ཁཱ་ནི ཏིཾ་ས ཨི་ཏྠི་ས་ཧ་སྶཱ་ནི པ་ཙྩུ་པ་ཊྛི་ཏཱ་ནི ཨ་ཧེ་སུཾ.
སོ ཙ་ཏྟཱ་རི ནི་མི་ཏྟཱ་ནི དི་སྭཱ སུ་ཙི་ཏྟཱ་ཡ ནཱ་མ དེ་ཝི་ཡཱ སུ་པྤ་བུ་དྡྷེ ནཱ་མ ཀུ་མཱ་རེ ཨུ་པྤ་ནྣེ སུ་ཝ་ཎྞ་སི་ཝི་ཀཱ་ཡ ཨུ་ཡྻཱ་ན་ད་སྶ་ན་ཏྠཱ་ཡ ག་ནྟྭཱ དེ་ཝ་ད་ཏྟཱ་ནི ཀཱ་སཱ་ཡཱ་ནི ག་ཧེ་ཏྭཱ པ་བྦ་ཛི. ཏཾ ས་ཏྟ་ཏྟིཾ་ས་ས་ཧ་སྶཱ་ནི ཨ་ནུ་པ་བྦ་ཛིཾ་སུ. ཨ་ཐ སོ ཏེ་ཧི པ་རི་ཝུ་ཏོ ཚ མཱ་སེ པ་དྷཱ་ན་ཙ་རི་ཡཾ ཙ་རི་ཏྭཱ ཝི་སཱ་ཁ་པུ་ཎྞ་མཱ་ཡ སུ་ཙི་ཏྟ་ནི་ག་མེ ས་ནྡི་སྶ་མཱ་ན་ས་རཱི་རཱ་ཡ སི་རི་ཝ་ཌྜྷ་ནཱ་ཡ ནཱ་མ དི་ནྣཾ མ་དྷུ་པཱ་ཡཱ་སཾ པ་རི་བྷུ་ཉྫི་ཏྭཱ སཱ་ལ་ཝ་ནེ དི་ཝཱ་ཝི་ཧཱ་རཾ ཝཱི་ཏི་ནཱ་མེ་ཏྭཱ སཱ་ཡ་ནྷ་ས་མ་ཡེ ན་རི་ནྡ་ནཱ་ག་རཱ་ཛེ་ན དི་ནྣཱ ཨ་ཊྛ ཏི་ཎ་མུ་ཊྛི་ཡོ ག་ཧེ་ཏྭཱ སཱ་ལ་བོ་དྷིཾ པ་ད་ཀྑི་ཎ་ཏོ ཨུ་པཱ་ག་མི. ཏ་སྶཱ་པི སཱ་ལ་སྶ ཏ་དེ་ཝ པཱ་ཊ་ལི་ཡཱ པ་མཱ་ཎ་མེ་ཝ པ་མཱ་ཎཾ ཨ་ཧོ་སི. ཏ་ཐེ་ཝ པུ་པྥ་ཕ་ལ་སི་རི་ཝི་བྷ་ཝོ ཝེ་དི་ཏ་བྦོ. སོ སཱ་ལ་མཱུ་ལ་མུ་པ་ག་ནྟྭཱ ཙ་ཏྟཱ་ལཱི་ས་ཧ་ཏྠ་ཝི་ཏྠ་ཏཾ ཏི་ཎ་ས་ནྠ་རཾ ས་ནྠ་རི་ཏྭཱ པ་ལླ་ངྐཾ ཨཱ་བྷུ་ཛི་ཏྭཱ ཝི་ག་ཏ་ནཱི་ཝ་ར་ཎཾ ས་བྦ་ཀཱ་མ་མ་དཱ་ཝ་ར་ཎཾ ཨ་ནཱ་ཝ་ར་ཎ་ཉཱ་ཎཾ པ་ཊི་ལ་བྷི་ཏྭཱ – ‘‘ཨ་ནེ་ཀ་ཛཱ་ཏི་སཾ་སཱ་རཾ…པེ… ཏ་ཎྷཱ་ནཾ ཁ་ཡ་མ་ཛ྄ཛྷ་གཱ’’ཏི ཨུ་དཱ་ནཾ ཨུ་དཱ་ནེ་ཏྭཱ ས་ཏྟ་ས་ཏྟཱ་ཧཾ ཏ་ཏྠེ་ཝ ཝཱི་ཏི་ནཱ་མེ་ཏྭཱ ཨ་ཏྟ་ནོ ཀ་ནི་ཊྛ་བྷཱ་ཏི་ཀ་སྶ སོ་ཎ་ཀུ་མཱ་ར་སྶ ཨུ་ཏྟ་ར་ཀུ་མཱ་ར་སྶ ཙ ཨུ་པ་ནི་སྶ་ཡ་ས་མྤ་ཏྟིཾ དི་སྭཱ དེ་ཝ་པ་ཐེ་ན ག་ནྟྭཱ ཨ་ནོ་མ་ན་ག་ར་ས་མཱི་པེ ཨ་རུ་ཎུ་ཡྻཱ་ནེ ཨོ་ཏ་རི་ཏྭཱ ཨུ་ཡྻཱ་ན་པཱ་ལེ་ན ཀུ་མཱ་རེ པ་ཀྐོ་སཱ་པེ་ཏྭཱ ཏེ་སཾ ས་པ་རི་ཝཱ་རཱ་ནཾ མ་ཛ྄ཛྷེ དྷ་མྨ་ཙ་ཀྐཾ པ་ཝ་ཏྟེ་སི. ཏ་དཱ ཨ་སཱི་ཏི་ཡཱ ཀོ་ཊི་ས་ཧ་སྶཱ་ནཾ པ་ཋ་མོ ཨ་བྷི་ས་མ་ཡོ ཨ་ཧོ་སི.
པུ་ན ཛ་ན་པ་ད་ཙཱ་རི་ཀཾ ཙ་ར་ནྟོ བྷ་ག་ཝཱ ཏ་ཏྠ ཏ་ཏྠ དྷ་མྨཾ དེ་སེ་ནྟོ ས་ཏྟ་ཏི་ཡཱ ཀོ་ཊི་ས་ཧ་སྶཱ་ནཾ དྷ་མྨཱ་བྷི་ས་མ་ཡོ ཨ་ཧོ་སི, སོ དུ་ཏི་ཡོ ཨ་བྷི་ས་མ་ཡོ ཨ་ཧོ་སི. ཨ་ནོ་མ་ན་ག་རེ་ཡེ་ཝ དི་ཊྛི་ཛཱ་ལཾ བྷི་ནྡ་ནྟོ ཏི་ཏྠི་ཡ་མཱ་ན་དྡྷ་ཛཾ པཱ་ཏེ་ནྟོ མཱ་ན་མ་དཾ ཝི་དྡྷཾ་སེ་ནྟོ དྷ་མྨ་དྡྷ་ཛཾ ས་མུ་སྶ་ཡ་ནྟོ ན་ཝུ་ཏི་ཡོ་ཛ་ན་ཝི་ཏྠ་ཏཱ་ཡ མ་ནུ་སྶ་པ་རི་སཱ་ཡ པ་རི་མཱ་ཎ་ར་ཧི་ཏཱ་ཡ དེ་ཝ་པ་རི་སཱ་ཡ ཡ་མ་ཀ་པཱ་ཊི་ཧཱ་རི་ཡཾ ཀ་ཏྭཱ དེ་ཝ་མ་ནུ་སྶེ པ་སཱ་དེ་ཏྭཱ ས་ཊྛི་ཀོ་ཊི་ཡོ དྷ་མྨཱ་མ་ཏེ་ན ཏ་པྤེ་སི, སོ ཏ་ཏི་ཡོ ཨ་བྷི་ས་མ་ཡོ ཨ་ཧོ་སི. ཏེ་ན ཝུ་ཏྟཾ –
༡. ‘‘ཏ་ཏྠེ་ཝ མ་ཎྜ་ཀ་པྤ་མྷི, ཨ་ས་མོ ཨ་པྤ་ཊི་པུ་གྒ་ལོ;
ཝེ་སྶ་བྷཱུ ནཱ་མ ནཱ་མེ་ན, ལོ་ཀེ ཨུ་པྤ་ཛྫི ནཱ་ཡ་ཀོ.
༢. ‘‘ཨཱ་དི་ཏྟཾ ཝ་ཏ རཱ་ག་གྒི, ཏ་ཎྷཱ་ནཾ ཝི་ཛི་ཏཾ ཏ་དཱ;
ནཱ་གོ་ཝ བ་ནྡྷ་ནཾ ཚེ་ཏྭཱ, པ་ཏྟོ ས་མྦོ་དྷི་མུ་ཏྟ་མཾ.
༣. ‘‘དྷ་མྨ་ཙ་ཀྐཾ པ་ཝ་ཏྟེ་ནྟེ, ཝེ་སྶ་བྷཱུ་ལོ་ཀ་ནཱ་ཡ་ཀེ;
ཨ་སཱི་ཏི་ཀོ་ཊི་ས་ཧ་སྶཱ་ནཾ, པ་ཋ་མཱ་བྷི་ས་མ་ཡོ ཨ་ཧུ.
༤. ‘‘པ་ཀྐ་ནྟེ ཙཱ་རི་ཀཾ ར་ཊྛེ, ལོ་ཀ་ཛེ་ཊྛེ ན་རཱ་ས་བྷེ;
ས་ཏྟ་ཏི་ཀོ་ཊི་ས་ཧ་སྶཱ་ནཾ, དུ་ཏི་ཡཱ་བྷི་ས་མ་ཡོ ཨ་ཧུ.
༥. ‘‘མ་ཧཱ་དི་ཊྛིཾ ཝི་ནོ་དེ་ནྟོ, པཱ་ཊི་ཧེ་རཾ ཀ་རོ་ཏི སོ;
ས་མཱ་ག་ཏཱ ན་ར་མ་རཱུ, ད་ས་ས་ཧ་སྶཱི ས་དེ་ཝ་ཀེ.
༦. ‘‘མ་ཧཱ་ཨ་ཙྪ་རི་ཡཾ དི་སྭཱ, ཨ་བྦྷུ་ཏཾ ལོ་མ་ཧཾ་ས་ནཾ;
དེ་ཝཱ ཙེ་ཝ མ་ནུ་སྶཱ ཙ, བུ་ཛ྄ཛྷ་རེ ས་ཊྛི་ཀོ་ཊི་ཡོ’’ཏི.
ཏ་ཏྠ ཨཱ་དི་ཏྟནྟི ས་ཀ་ལ་མི་དཾ ལོ་ཀ་ཏྟ་ཡཾ ས་མྤ་དི་ཏྟཾ. རཱ་ག་གྒཱིཏི རཱ་གེ་ན. ཏ་ཎྷཱ་ནཾ ཝི་ཛི་ཏནྟི ཏ་ཎྷཱ་ནཾ ཝི་ཛི་ཏཾ ར་ཊྛཾ ཝ་ས་ཝ་ཏྟི་ཊྛཱ་ན་ནྟི ཨེ་ཝཾ ཉ་ཏྭཱ་ཏི ཨ་ཏྠོ. ནཱ་གོ་ཝ བ་ནྡྷ་ནཾ ཚེ་ཏྭཱཏི ཧ་ཏྠཱི ཝི་ཡ པཱུ་ཏི་ལ་ཏཱ་བ་ནྡྷ་ནཾ ཚི་ནྡི་ཏྭཱ ས་མྦོ་དྷིཾ པ་ཏྟོ ཨ་དྷི་ག་ཏོ. ད་ས་ས་ཧ་སྶཱིཏི ད་ས་ས་ཧ་སྶི་ཡཾ. ས་དེ་ཝ་ཀེཏི ས་དེ་ཝ་ཀེ ལོ་ཀེ. བུ་ཛ྄ཛྷ་རེཏི བུ་ཛ྄ཛྷིཾ་སུ.
སོ་ཎུ་ཏྟ་རཱ་ནཾ པ་ན དྭི་ནྣཾ ཨ་གྒ་སཱ་ཝ་ཀཱ་ནཾ ས་མཱ་ག་མེ པ་བྦ་ཛི་ཏཱ་ནཾ ཨ་སཱི་ཏི་ཡཱ ཨ་ར་ཧ་ནྟ་ས་ཧ་སྶཱ་ནཾ མ་ཛ྄ཛྷེ མཱ་གྷ་པུ་ཎྞ་མཱ་ཡཾ པཱ་ཏི་མོ་ཀྑཾ ཨུ་དྡི་སི, སོ པ་ཋ་མོ ས་ནྣི་པཱ་ཏོ ཨ་ཧོ་སི. ཡ་དཱ པ་ན ཝེ་སྶ་བྷུ་ནཱ ས་བྦ་ལོ་ཀཱ་བྷི་བྷུ་ནཱ ས་ཧ པ་བྦ་ཛི་ཏཱ ས་ཏྟ་ཏྟིཾ་ས་ས་ཧ་སྶ་ས་ངྑཱ བྷི་ཀྑཱུ ག་ཎ་ཏོ ཨོ་ཧཱི་ན་ས་མ་ཡེ པ་ཀྐ་ནྟཱ, ཏེ ཝེ་སྶ་བྷུ་སྶ ས་མྨཱ་ས་མྦུ་དྡྷ་སྶ དྷ་མྨ་ཙ་ཀྐ་པྤ་ཝ་ཏྟིཾ སུ་ཏྭཱ སོ་རེ་ཡྻཾ ནཱ་མ ན་ག་རཾ ཨཱ་ག་ནྟྭཱ བྷ་ག་ཝ་ནྟཾ ཨ་དྡ་སཾ་སུ. ཏེ་སཾ བྷ་ག་ཝཱ དྷ་མྨཾ དེ་སེ་ཏྭཱ ས་བྦེ་ཝ ཏེ ཨེ་ཧི་བྷི་ཀྑུ་པ་བྦ་ཛྫཱ་ཡ པ་བྦཱ་ཛེ་ཏྭཱ ཙ་ཏུ་ར་ངྒ་ས་མ་ནྣཱ་ག་ཏཱ་ཡ པ་རི་སཱ་ཡ པཱ་ཏི་མོ་ཀྑཾ ཨུ་དྡི་སི, སོ དུ་ཏི་ཡོ ས་ནྣི་པཱ་ཏོ ཨ་ཧོ་སི.
ཡ་དཱ པ་ན ནཱ་རི་ཝཱ་ཧ་ན་ན་ག་རེ ཨུ་པ་ས་ནྟོ ནཱ་མ རཱ་ཛ་པུ་ཏྟོ ར་ཛྫཾ ཀཱ་རེ་སི, ཏ་སྶཱ་ནུ་ཀ་མྤཱ་ཡ བྷ་ག་ཝཱ ཏ་ཏྠ ཨ་ག་མཱ་སི, སོ་པི བྷ་ག་ཝ་ཏོ ཨཱ་ག་མ་ནཾ སུ་ཏྭཱ ས་པ་རི་ཝཱ་རོ བྷ་ག་ཝ་ཏོ པ་ཙྩུ་གྒ་མ་ནཾ ཀ་ཏྭཱ ནི་མ་ནྟེ་ཏྭཱ མ་ཧཱ་དཱ་ནཾ ད་ཏྭཱ ཏ་སྶ དྷ་མྨཾ སུ་ཏྭཱ པ་ས་ནྣ་ཧ་ད་ཡོ པ་བྦ་ཛི. ཏཾ ས་ཊྛི་ས་ཧ་སྶ་ས་ངྑཱ པུ་རི་སཱ ཨ་ནུ་པ་བྦ་ཛིཾ་སུ. ཏེ ཏེ་ན ས་དྡྷིཾ ཨ་ར་ཧ་ཏྟཾ པཱ་པུ་ཎིཾ་སུ. སོ ཏེ་ཧི པ་རི་ཝུ་ཏོ ཝེ་སྶ་བྷཱུ བྷ་ག་ཝཱ པཱ་ཏི་མོ་ཀྑཾ ཨུ་དྡི་སི, སོ ཏ་ཏི་ཡོ ས་ནྣི་པཱ་ཏོ ཨ་ཧོ་སི. ཏེ་ན ཝུ་ཏྟཾ –
༧. ‘‘ས་ནྣི་པཱ་ཏཱ ཏ་ཡོ ཨཱ་སུཾ, ཝེ་སྶ་བྷུ་སྶ མ་ཧེ་སི་ནོ;
ཁཱི་ཎཱ་ས་ཝཱ་ནཾ ཝི་མ་ལཱ་ནཾ, ས་ནྟ་ཙི་ཏྟཱ་ན ཏཱ་དི་ནཾ.
༨. ‘‘ཨ་སཱི་ཏི་བྷི་ཀྑུ་ས་ཧ་སྶཱ་ནཾ, པ་ཋ་མོ ཨཱ་སི ས་མཱ་ག་མོ;
ས་ཏྟ་ཏི་བྷི་ཀྑུ་ས་ཧ་སྶཱ་ནཾ, དུ་ཏི་ཡོ ཨཱ་སི ས་མཱ་ག་མོ.
༩. ‘‘ས་ཊྛི་བྷི་ཀྑུ་ས་ཧ་སྶཱ་ནཾ, ཏ་ཏི་ཡོ ཨཱ་སི ས་མཱ་ག་མོ;
ཛ་རཱ་དི་བྷ་ཡ་ཏཱི་ཏཱ་ནཾ, ཨོ་ར་སཱ་ནཾ མ་ཧེ་སི་ནོ’’ཏི.
ཏ་དཱ ཨ་མྷཱ་ཀཾ བོ་དྷི་ས་ཏྟོ ས་ར་བྷ་ཝ་ཏཱི་ན་ག་རེ པ་ར་མ་པི་ཡ་ད་སྶ་ནོ སུ་ད་སྶ་ནོ ནཱ་མ རཱ་ཛཱ ཧུ་ཏྭཱ ཝེ་སྶ་བྷུ་མྷི ལོ་ཀ་ནཱ་ཡ་ཀེ ས་ར་བྷ་ན་ག་ར་མུ་པ་ག་ཏེ ཏ་སྶ དྷ་མྨཾ སུ་ཏྭཱ པ་ས་ནྣ་ཧ་ད་ཡོ ད་ས་ན་ཁ་ས་མོ་དྷཱ་ན་ས་མུ་ཛྫ་ལཾ ཛ་ལ་ཛཱ་མ་ལཱ་ཝི་ཀ་ལ་ཀ་མ་ལ་མ་ཀུ་ལ་ས་དི་ས་མ་ཉྫ་ལིཾ སི་ར་སི ཀ་ཏྭཱ བུ་དྡྷ་པྤ་མུ་ཁ་སྶ ས་ངྒྷ་སྶ ས་ཙཱི་ཝ་རཾ མ་ཧཱ་དཱ་ནཾ ད་ཏྭཱ ཏ་ཏྠེ་ཝ བྷ་ག་ཝ་ཏོ ནི་ཝཱ་ས་ཏྠཱ་ཡ ག་ནྡྷ་ཀུ་ཊིཾ ཀ་ཏྭཱ ཏཾ པ་རི་ཀྑི་པི་ཏྭཱ ཝི་ཧཱ་ར་ས་ཧ་སྶཾ ཀཱ་རེ་ཏྭཱ ས་བྦ་ཉྩ ཝི་བྷ་ཝ་ཛཱ་ཏཾ བྷ་ག་ཝ་ཏོ སཱ་ས་ནེ པ་རི་ཙྩ་ཛི་ཏྭཱ ཏ་སྶ ས་ནྟི་ཀེ པ་བྦ་ཛི་ཏྭཱ ཨཱ་ཙཱ་ར་གུ་ཎ་ས་མྤ་ནྣོ ཏེ་ར་ས་དྷུ་ཏ་གུ་ཎེ་སུ ནི་ར་ཏོ བོ་དྷི་ས་མྦྷཱ་ར་པ་རི་ཡེ་ས་ནཱ་ཡ ར་ཏོ བུ་དྡྷ་སཱ་ས་ནཱ་བྷི་ར་ཏོ ཝི་ཧཱ་སི. སོ་པི ཏཾ བྷ་ག་ཝཱ བྱཱ་ཀཱ་སི – ‘‘ཨ་ནཱ་ག་ཏེ ཨི་ཏོ ཨེ་ཀ་ཏྟིཾ་ས་ཀ་པྤེ ཨ་ཡཾ གོ་ཏ་མོ ནཱ་མ བུ་དྡྷོ བྷ་ཝི་སྶ་ཏཱི’’ཏི. ཏེ་ན ཝུ་ཏྟཾ –
༡༠. ‘‘ཨ་ཧཾ ཏེ་ན ས་མ་ཡེ་ན, སུ་ད་སྶ་ནོ ནཱ་མ ཁ་ཏྟི་ཡོ;
ནི་མ་ནྟེ་ཏྭཱ མ་ཧཱ་ཝཱི་རཾ, དཱ་ནཾ ད་ཏྭཱ མ་ཧཱ་ར་ཧཾ;
ཨ་ནྣ་པཱ་ནེ་ན ཝ་ཏྠེ་ན, ས་ས་ངྒྷཾ ཛི་ན་པཱུ་ཛ་ཡིཾ.
༡༡. ‘‘ཏ་སྶ བུ་དྡྷ་སྶ ཨ་ས་མ་སྶ, ཙ་ཀྐཾ ཝ་ཏྟི་ཏ་མུ་ཏྟ་མཾ;
སུ་ཏྭཱ་ན པ་ཎི་ཏཾ དྷ་མྨཾ, པ་བྦ་ཛྫ་མ་བྷི་རོ་ཙ་ཡིཾ.
༡༢. ‘‘མ་ཧཱ་དཱ་ནཾ པ་ཝ་ཏྟེ་ཏྭཱ, ར་ཏྟི་ནྡི་ཝ་མ་ཏ་ནྡི་ཏོ;
པ་བྦ་ཛྫཾ གུ་ཎ་ས་མྤ་ནྣཾ, པ་བྦ་ཛིཾ ཛི་ན་ས་ནྟི་ཀེ.
༡༣. ‘‘ཨཱ་ཙཱ་ར་གུ་ཎ་ས་མྤ་ནྣོ, ཝ་ཏྟ་སཱི་ལ་ས་མཱ་ཧི་ཏོ;
ས་བྦ་ཉྙུ་ཏཾ ག་ཝེ་ས་ནྟོ, ར་མཱ་མི ཛི་ན་སཱ་ས་ནེ.
༡༤. ‘‘ས་དྡྷཱ་པཱི་ཏིཾ ཨུ་པ་ག་ནྟྭཱ, བུ་དྡྷཾ ཝ་ནྡཱ་མི ས་ཏྠ་རཾ;
པཱི་ཏི ཨུ་པྤ་ཛྫ་ཏི མ་ཡ྄ཧཾ, བོ་དྷི་ཡཱ་ཡེ་ཝ ཀཱ་ར་ཎཱ.
༡༥. ‘‘ཨ་ནི་ཝ་ཏྟ་མཱ་ན་སཾ ཉ་ཏྭཱ, ས་མྦུ་དྡྷོ ཨེ་ཏ་ད་བྲ་ཝི;
ཨེ་ཀ་ཏྟིཾ་སེ ཨི་ཏོ ཀ་པྤེ, ཨ་ཡཾ བུ་དྡྷོ བྷ་ཝི་སྶ་ཏི.
༡༦. ‘‘ཨ་ཧུ ཀ་པི་ལ་ཝ྄ཧ་ཡཱ ར་མྨཱ…པེ… ཧེ་སྶཱ་མ ས་མྨུ་ཁཾ ཨི་མཾ.
༡༧. ‘‘ཏ་སྶཱ་ཧཾ ཝ་ཙ་ནཾ སུ་ཏྭཱ, བྷི་ཡྻོ ཙི་ཏྟཾ པ་སཱ་ད་ཡིཾ;
ཨུ་ཏྟ་རིཾ ཝ་ཏ་མ་དྷི་ཊྛཱ་སིཾ, ད་ས་པཱ་ར་མི་པཱུ་རི་ཡཱ’’ཏི.
ཏ་ཏྠ ཙ་ཀྐཾ ཝ་ཏྟི་ཏནྟི དྷ་མྨ་ཙ་ཀྐཾ པ་ཝ་ཏྟི་ཏཾ. པ་ཎཱི་ཏཾ དྷ་མྨནྟི ཨུ་ཏྟ་རི་མ་ནུ་སྶ་དྷ་མྨཾ. པ་བྦ་ཛྫཾ གུ་ཎ་ས་མྤ་ནྣནྟི ཉ་ཏྭཱ པ་བྦ་ཛི་ནྟི ཨ་ཏྠོ. ཝ་ཏྟ་སཱི་ལ་ས་མཱ་ཧི་ཏོཏི ཝ་ཏྟེ་སུ ཙ སཱི་ལེ་སུ ཙ ས་མཱ་ཧི་ཏོ. ཏེ་སཾ ཏེ་སཾ པཱུ་ར་ཎེ ས་མཱ་ཧི་ཏོ་ཏི ཨ་ཏྠོ. ར་མཱ་མཱིཏི ཨ་བྷི་ར་མིཾ. ས་དྡྷཱ་པཱི་ཏིནྟི ས་དྡྷ་ཉྩ པཱི་ཏི་ཉྩ ཨུ་པ་ག་ནྟྭཱ. ཝ་ནྡཱ་མཱིཏི ཨ་བྷི་ཝ་ནྡིཾ, ཨ་ཏཱི་ཏ་ཏྠེ ཝ་ཏྟ་མཱ་ན་ཝ་ཙ་ནཾ ད་ཊྛ་བྦཾ. ས་ཏྠ་རནྟི ས་ཏྠཱ་རཾ. ཨ་ནི་ཝ་ཏྟ་མཱ་ན་སནྟི ཨ་ནོ་ས་ཀྐི་ཡ་མཱ་ན་མཱ་ན་སཾ.
ཏ་སྶ པ་ན བྷ་ག་ཝ་ཏོ ཨ་ནོ་མཾ ནཱ་མ ན་ག་རཾ ཨ་ཧོ་སི. སུ་པྤ་ཏཱི་ཏོ ནཱ་མ་སྶ པི་ཏཱ ཁ་ཏྟི་ཡོ, ཡ་ས་ཝ་ཏཱི ནཱ་མ མཱ་ཏཱ, སོ་ཎོ ཙ ཨུ་ཏྟ་རོ ཙ དྭེ ཨ་གྒ་སཱ་ཝ་ཀཱ, ཨུ་པ་ས་ནྟོ ནཱ་མུ་པ་ཊྛཱ་ཀོ, རཱ་མཱ ཙ ས་མཱ་ལཱ ཙ དྭེ ཨ་གྒ་སཱ་ཝི་ཀཱ, སཱ་ལ་རུ་ཀྑོ བོ་དྷི, ས་རཱི་རཾ ས་ཊྛི་ཧ་ཏྠུ་བྦེ་དྷཾ ཨ་ཧོ་སི. ས་ཊྛི་ཝ་སྶ་ས་ཧ་སྶཱ་ནི ཨཱ་ཡུ, སུ་ཙི་ཏྟཱ ནཱ་མ་སྶ བྷ་རི་ཡཱ, སུ་པྤ་བུ་དྡྷོ ནཱ་མ་སྶ པུ་ཏྟོ, སུ་ཝ་ཎྞ་སི་ཝི་ཀཱ་ཡ ནི་ཀྑ་མི. ཏེ་ན ཝུ་ཏྟཾ –
༡༨. ‘‘ཨ་ནོ་མཾ ནཱ་མ ན་ག་རཾ, སུ་པྤ་ཏཱི་ཏོ ནཱ་མ ཁ་ཏྟི་ཡོ;
མཱ་ཏཱ ཡ་ས་ཝ་ཏཱི ནཱ་མ, ཝེ་སྶ་བྷུ་སྶ མ་ཧེ་སི་ནོ.
༢༣. ‘‘སོ་ཎོ ཙ ཨུ་ཏྟ་རོ ཙེ་ཝ, ཨ་ཧེ་སུཾ ཨ་གྒ་སཱ་ཝ་ཀཱ;
ཨུ་པ་ས་ནྟོ ནཱ་མུ་པ་ཊྛཱ་ཀོ, ཝེ་སྶ་བྷུ་སྶ མ་ཧེ་སི་ནོ.
༢༤. ‘‘རཱ་མཱ ཙེ་ཝ ས་མཱ་ལཱ ཙ, ཨ་ཧེ་སུཾ ཨ་གྒ་སཱ་ཝི་ཀཱ;
བོ་དྷི ཏ་སྶ བྷ་ག་ཝ་ཏོ, མ་ཧཱ་སཱ་ལོ་ཏི ཝུ་ཙྩ་ཏི.
༢༥. ‘‘སོ་ཏྠི་ཀོ ཙེ་ཝ ར་མྨོ ཙ, ཨ་ཧེ་སུཾ ཨ་གྒུ་པ་ཊྛ་ཀཱ;
གོ་ཏ་མཱི སི་རི་མཱ ཙེ་ཝ, ཨ་ཧེ་སུཾ ཨ་གྒུ་པ་ཊྛི་ཀཱ.
༢༦. ‘‘ས་ཊྛི་ར་ཏ་ན་མུ་བྦེ་དྷོ, ཧེ་མ་ཡཱུ་པ་ས་མཱུ་པ་མོ;
ཀཱ་ཡཱ ནི་ཙྪ་ར་ཏཱི ར་སྨི, ར་ཏྟིཾ་ཝ པ་བྦ་ཏེ སི་ཁཱི.
༢༧. ‘‘ས་ཊྛི་ཝ་སྶ་ས་ཧ་སྶཱ་ནི, ཨཱ་ཡུ ཏ་སྶ མ་ཧེ་སི་ནོ;
ཏཱ་ཝ་ཏཱ ཏི་ཊྛ་མཱ་ནོ སོ, ཏཱ་རེ་སི, ཛ་ན་ཏཾ བ་ཧུཾ.
༢༨. ‘‘དྷ་མྨཾ ཝི་ཏྠཱ་རི་ཀཾ ཀ་ཏྭཱ, ཝི་བྷ་ཛི་ཏྭཱ མ་ཧཱ་ཛ་ནཾ;
དྷ་མྨ་ནཱ་ཝཾ ཋ་པེ་ཏྭཱ་ན, ནི་བྦུ་ཏོ སོ ས་སཱ་ཝ་ཀོ.
༢༩. ‘‘ད་སྶ་ནེ་ཡྻཾ ས་བྦ་ཛ་ནཾ, ཝི་ཧཱ་རཾ ཨི་རི་ཡཱ་པ་ཐཾ;
ས་བྦཾ ཏ་མ་ནྟ་ར་ཧི་ཏཾ, ན་ནུ རི་ཏྟཱ ས་བྦ་ས་ངྑཱ་རཱ’’ཏི.
ཏ་ཏྠ ཧེ་མ་ཡཱུ་པ་ས་མཱུ་པ་མོཏི སུ་ཝ་ཎྞ་ཏྠ་མྦྷ་ས་དི་སོ་ཏི ཨ་ཏྠོ. ནི་ཙྪ་ར་ཏཱིཏི ཨི་ཏོ ཙི་ཏོ ཙ ས་ནྡྷཱ་ཝ་ཏི. ར་སྨཱིཏི པ་བྷཱ་ར་སྨི. ར་ཏྟིཾ་ཝ པ་བྦ་ཏེ སི་ཁཱིཏི ར་ཏྟི་ཡཾ པ་བྦ་ཏ་མ་ཏྠ་ཀེ ཨ་གྒི ཝི་ཡ. རཾ་སི་ཝི་ཛྫོ་ཏཱ ཏ་སྶ ཀཱ་ཡེ་ཏི ཨ་ཏྠོ. ཝི་བྷ་ཛི་ཏྭཱཏི ཝི་བྷཱ་གཾ ཀ་ཏྭཱ, ཨུ་གྒྷ་ཊི་ཏཱ་དི་ཝ་སེ་ན སོ་ཏཱ་པ་ནྣཱ་དི་ཝ་སེ་ན ཙཱ་ཏི ཨ་ཏྠོ. དྷ་མྨ་ནཱ་ཝནྟི ཨ་ཊྛ་ངྒ་མ་གྒ་ས་ངྑཱ་ཏཾ དྷ་མྨ་ནཱ་ཝཾ, ཙ་ཏུ་རོ་གྷ་ནི་ཏྠ་ར་ཎ་ཏྠཱ་ཡ ཋ་པེ་ཏྭཱ་ཏི ཨ་ཏྠོ. ད་སྶ་ནེ་ཡྻནྟི ད་སྶ་ནཱི་ཡོ. ས་བྦ་ཛ་ནནྟི ས་བྦོ ཛ་ནོ, ས་སཱ་ཝ་ཀ་ས་ངྒྷོ ས་མྨཱ་ས་མྦུ་དྡྷོ་ཏི ཨ་ཏྠོ. ཝི་ཧཱ་རནྟི ཝི་ཧཱ་རོ, ས་བྦ་ཏྠ པ་ཙྩ་ཏྟེ ཨུ་པ་ཡོ་ག་ཝ་ཙ་ནཾ ད་ཊྛ་བྦཾ.
ཝེ་སྶ་བྷཱུ ཀི་ར བྷ་ག་ཝཱ ཨུ་ས་བྷ་ཝ་ཏཱི་ན་ག་རེ ཁེ་མེ མི་ག་དཱ་ཡེ པ་རི་ནི་བྦཱ་ཡི. དྷཱ་ཏུ་ཡོ པ་ན་སྶ ཝི་པྤ་ཀི་རིཾ་སུ.
‘‘ཨུ་ས་བྷ་ཝ་ཏི་པུ་རེ པུ་རུ་ཏྟ་མེ, ཛི་ན་ཝ་ས་བྷོ བྷ་ག་ཝཱ ཧི ཝེ་སྶ་བྷཱུ;
ཨུ་པ་ཝ་ན་ཝི་ཧ་རེ མ་ནོ་ར་མེ, ནི་རུ་པ་དྷི་སེ་ས་མུ་པཱ་ག་ཏོ ཀི་རཱ’’ཏི.
སེ་སཾ ས་བྦ་ཏྠ གཱ་ཐཱ་སུ པཱ་ཀ་ཊ་མེ་ཝཱ་ཏི.
ཝེ་སྶ་བྷཱུ་བུ་དྡྷ་ཝཾ་ས་ཝ་ཎྞ་ནཱ ནི་ཊྛི་ཏཱ.
ནི་ཊྛི་ཏོ ཨེ་ཀ་ཝཱི་ས་ཏི་མོ བུ་དྡྷ་ཝཾ་སོ.