༢༠. ཕུ་སྶ་བུ་དྡྷ་ཝཾ་ས་ཝ་ཎྞ་ནཱ
ཏ་སྶ ཏི་སྶ་སྶ བྷ་ག་ཝ་ཏོ ཨ་པ་ར་བྷཱ་གེ ཨ་ནུ་ཀྐ་མེ་ན པ་རི་ཧཱ་ཡི་ཏྭཱ པུ་ན ཝ་ཌྜྷི་ཏྭཱ ཨ་པ་རི་མི་ཏཱ་ཡུ་ཀཱ ཧུ་ཏྭཱ ཨ་ནུ་པུ་བྦེ་ན ཧཱ་ཡི་ཏྭཱ ན་ཝུ་ཏི་ཝ་སྶ་ས་ཧ་སྶཱ་ཡུ་ཀེ་སུ ཛཱ་ཏེ་སུ ཏ་སྨིཾ་ཡེ་ཝ ཀ་པྤེ ཕུ་སྶོ ནཱ་མ ས་ཏྠཱ ལོ་ཀེ ཨུ་པྤ་ཛྫི. སོ་པི བྷ་ག་ཝཱ པཱ་ར་མི་ཡོ པཱུ་རེ་ཏྭཱ ཏུ་སི་ཏ་པུ་རེ ནི་བྦ་ཏྟི་ཏྭཱ ཏ་ཏོ ཙ་ཝི་ཏྭཱ ཀཱ་སི་ཀ་ན་ག་རེ ཛ་ཡ་སེ་ན་ར་ཉྙོ ཨ་གྒ་མ་ཧེ་སི་ཡཱ སི་རི་མཱ་ཡ ནཱ་མ དེ་ཝི་ཡཱ ཀུ་ཙྪི་སྨིཾ པ་ཊི་ས་ནྡྷིཾ ག་ཧེ་ཏྭཱ ད་ས་ནྣཾ མཱ་སཱ་ནཾ ཨ་ཙྩ་ཡེ་ན སི་རི་མུ་ཡྻཱ་ནེ མཱ་ཏུ་ཀུ་ཙྪི་ཏོ ནི་ཀྑ་མི. སོ ན་ཝ་ཝ་སྶ་ས་ཧ་སྶཱ་ནི ཨ་གཱ་རཾ ཨ་ཛ྄ཛྷཱ་ཝ་སི. ཏ་སྶ ཀི་ར ག་རུ་ལ༹་པ་ཀྑ-ཧཾ་ས-སུ་ཝ་ཎྞ་བྷཱ་རཱ་ཏི ཏ་ཡོ པཱ་སཱ་དཱ ཨ་ཧེ་སུཾ. ཀི་སཱ་གོ་ཏ་མི་པྤ་མུ་ཁཱ་ནི ཏིཾ་ས ཨི་ཏྠི་ས་ཧ་སྶཱ་ནི པ་ཙྩུ་པ་ཊྛི་ཏཱ་ནི ཨ་ཧེ་སུཾ.
སོ ཙ་ཏྟཱ་རི ནི་མི་ཏྟཱ་ནི དི་སྭཱ ཀི་སཱ་གོ་ཏ་མི་ཡཱ ཨ་ནུ་པ་མེ ནཱ་མ པུ་ཏྟེ ཨུ་པྤ་ནྣེ ཨ་ལ་ངྐ་ཏ་ག་ཛ་ཝ་ར་ཀྑ་ནྡྷ་ག་ཏོ མ་ཧཱ་བྷི་ནི་ཀྑ་མ་ནཾ ནི་ཀྑ་མི་ཏྭཱ པ་བྦ་ཛི. ཏཾ པ་བྦ་ཛི་ཏཾ ཛ་ན་ཀོ་ཊི ཨ་ནུ་པ་བྦ་ཛི. སོ ཏེ་ཧི པ་རི་ཝུ་ཏོ ཚ མཱ་སེ པ་དྷཱ་ན་ཙ་རི་ཡཾ ཙ་རི་ཏྭཱ ཏ་ཏོ ག་ཎཾ པ་ཧཱ་ཡ ས་ཏྟཱ་ཧཾ ཨེ་ཀ་ཙ་རི་ཡཾ ཨ་ནུ་བྲཱུ་ཧ་ཡ་མཱ་ནོ ཝ་སི་ཏྭཱ ཝི་སཱ་ཁ་པུ་ཎྞ་མཱ་ཡ ཨ་ཉྙ་ཏ་རེ ན་ག་རེ ཨ་ཉྙ་ཏ་ར་སྶ སེ་ཊྛི་ནོ དྷཱི་ཏཱ་ཡ སི་རི་ཝ་ཌྜྷཱ་ཡ ནཱ་མ དི་ནྣཾ མ་དྷུ་པཱ་ཡཱ་སཾ པ་རི་བྷུ་ཉྫི་ཏྭཱ སིཾ་ས་པཱ་ཝ་ནེ དི་ཝཱ་ཝི་ཧཱ་རཾ ཝཱི་ཏི་ནཱ་མེ་ཏྭཱ སཱ་ཡ་ནྷ་ས་མ་ཡེ སི་རི་ཝ་ཌྜྷེ་ན ནཱ་མ ཨུ་པཱ་ས་ཀེ་ན དི་ནྣཱ ཨ་ཊྛ ཏི་ཎ་མུ་ཊྛི་ཡོ ག་ཧེ་ཏྭཱ ཨཱ་མ་ལ་ཀ་བོ་དྷིཾ ཨུ་པ་ས་ངྐ་མི་ཏྭཱ ས་མཱ་རཾ མཱ་ར་བ་ལཾ ཝི་དྷ་མི་ཏྭཱ ས་བྦ་ཉྙུ་ཏ་ཉྙཱ་ཎཾ པ་ཏྭཱ – ‘‘ཨ་ནེ་ཀ་ཛཱ་ཏི་སཾ་སཱ་རཾ…པེ… ཏ་ཎྷཱ་ནཾ ཁ་ཡ་མ་ཛ྄ཛྷ་གཱ’’ཏི ཨུ་དཱ་ནཾ ཨུ་དཱ་ནེ་ཏྭཱ ས་ཏྟ་ས་ཏྟཱ་ཧཾ བོ་དྷི་ས་མཱི་པེ་ཡེ་ཝ ཝཱི་ཏི་ནཱ་མེ་ཏྭཱ ཨ་ཏྟ་ནཱ ས་དྡྷིཾ པ་བྦ་ཛི་ཏཱ་ནཾ བྷི་ཀྑཱུ་ནཾ ཀོ་ཊཱི་ནཾ དྷ་མྨ་པ་ཊི་ཝེ་དྷ་ས་མ་ཏྠ་ཏཾ དི་སྭཱ ཨཱ་ཀཱ་སེ་ན ག་ནྟྭཱ ས་ངྐ་སྶ་ན་ག་རེ ཨི་སི་པ་ཏ་ནེ མི་ག་དཱ་ཡེ ཨོ་ཏ་རི་ཏྭཱ ཏེ་སཾ མ་ཛ྄ཛྷེ དྷ་མྨ་ཙ་ཀྐཾ པ་ཝ་ཏྟེ་སི. ཏ་དཱ ཀོ་ཊི་ས་ཏ་ས་ཧ་སྶཱ་ནཾ པ་ཋ་མོ ཨ་བྷི་ས་མ་ཡོ ཨ་ཧོ་སི. ཏེ་ན ཝུ་ཏྟཾ –
༡. ‘‘ཏ་ཏྠེ་ཝ མ་ཎྜ་ཀ་པྤ་མྷི, ཨ་ཧུ ས་ཏྠཱ ཨ་ནུ་ཏྟ་རོ;
ཨ་ནཱུ་པ་མོ ཨ་ས་མ་ས་མོ, ཕུ་སྶོ ལོ་ཀ་གྒ་ནཱ་ཡ་ཀོ.
༢. ‘‘སོ་པི ས་བྦཾ ཏ་མཾ ཧ་ནྟྭཱ, ཝི་ཛ་ཊེ་ཏྭཱ མ་ཧཱ་ཛ་ཊཾ;
ས་དེ་ཝ་ཀཾ ཏ་པྤ་ཡ་ནྟོ, ཨ་བྷི་ཝ་སྶི ཨ་མ་ཏ་མྦུ་ནཱ.
༣. ‘‘དྷ་མྨ་ཙ་ཀྐཾ པ་ཝ་ཏྟེ་ནྟེ, ཕུ་སྶེ ན་ཀྑ་ཏྟ་མ་ངྒ་ལེ;
ཀོ་ཊི་ས་ཏ་ས་ཧ་སྶཱ་ནཾ, པ་ཋ་མཱ་བྷི་ས་མ་ཡོ ཨ་ཧཱུ’’ཏི.
ཏ་ཏྠ ཏ་ཏྠེ་ཝ མ་ཎྜ་ཀ་པྤ་མྷཱིཏི ཡ་སྨིཾ ཀ་པྤེ དྭེ བུ་དྡྷཱ ཨུ་པྤ་ཛྫ་ནྟི, སོ ‘‘མ་ཎྜ་ཀ་པྤོ’’ཏི ཧེ་ཊྛཱ ཝུ་ཏྟོ. ཝི་ཛ་ཊེ་ཏྭཱཏི པ་ཊི་ཝི་སྶ་ཛྫེ་ཏྭཱ. མ་ཧཱ་ཛ་ཊནྟི ཨེ་ཏྠ ཛ་ཊཱ་ཏི ཏ་ཎྷཱ་ཡེ་ཏཾ ཨ་དྷི་ཝ་ཙ་ནཾ. སཱ ཧི རཱུ་པཱ་དཱི་སུ ཨཱ་ར་མྨ་ཎེ་སུ ཧེ་ཊྛུ་པ་རི་ཡ་ཝ་སེ་ན པུ་ན་པྤུ་ནཾ ཨུ་པྤ་ཛྫ་ན་ཏོ སཾ་སི་བྦ་ན་ཏོ སུ་ཏྟ་གུ་མྦ་ཛཱ་ལ་པཱུ་ཝ་ས་ངྑཱ་ཏཱ ཛ་ཊཱ ཝི་ཡཱ་ཏི ཛ་ཊཱ་ཏི ཝུ་ཏྟཾ, ཏཾ མ་ཧཱ་ཛ་ཊཾ. ས་དེ་ཝ་ཀནྟི ས་དེ་ཝ་ཀཾ ལོ་ཀཾ. ཨ་བྷི་ཝ་སྶཱིཏི པཱ་ཝ་སྶི. ཨ་མ་ཏ་མྦུ་ནཱཏི ཨ་མ་ཏ་ས་ངྑཱ་ཏེ་ན དྷ་མྨ་ཀ་ཐཱ་ས་ལི་ལེ་ན ཏ་པྤ་ཡ་ནྟོ པཱ་ཝ་སྶཱི་ཏི ཨ་ཏྠོ.
ཡ་དཱ པ་ན བཱ་རཱ་ཎ་སཱི་ན་ག་རེ སི་རི་ཝ་ཌྜྷོ ནཱ་མ རཱ་ཛཱ མ་ཧ་ནྟཾ བྷོ་ག་ཀྑ་ནྡྷཾ པ་ཧཱ་ཡ ཏཱ་པ་ས་པ་བྦ་ཛྫཾ པ་བྦ་ཛི. ཏེ་ན ས་ཧ པ་བྦ་ཛི་ཏཱ་ནཾ ཏཱ་པ་སཱ་ནཾ ན་ཝུ་ཏི་ས་ཏ་ས་ཧ་སྶཱ་ནི ཨ་ཧེ་སུཾ. ཏེ་སཾ བྷ་ག་ཝཱ དྷ་མྨཾ དེ་སེ་སི. ཏ་དཱ ན་ཝུ་ཏི་ཡཱ ས་ཏ་ས་ཧ་སྶཱ་ནཾ དུ་ཏི་ཡཱ་བྷི་ས་མ་ཡོ ཨ་ཧོ་སི. ཡ་དཱ པ་ན ཨ་ཏྟ་ནོ པུ་ཏྟ་སྶ ཨ་ནུ་པ་མ་ཀུ་མཱ་ར་སྶ དྷ་མྨཾ དེ་སེ་སི, ཏ་དཱ ཨ་སཱི་ཏི་ཡཱ ས་ཏ་ས་ཧ་སྶཱ་ནཾ ཏ་ཏི་ཡོ ཨ་བྷི་ས་མ་ཡོ ཨ་ཧོ་སི. ཏེ་ན ཝུ་ཏྟཾ –
༤. ‘‘ན་ཝུ་ཏི་ས་ཏ་ས་ཧ་སྶཱ་ནཾ, དུ་ཏི་ཡཱ་བྷི་ས་མ་ཡོ ཨ་ཧུ;
ཨ་སཱི་ཏི་ས་ཏ་ས་ཧ་སྶཱ་ནཾ, ཏ་ཏི་ཡཱ་བྷི་ས་མ་ཡོ ཨ་ཧཱུ’’ཏི.
ཏ་ཏོ ཨ་པ་རེ་ན ས་མ་ཡེ་ན ཀ་ཎྞ་ཀུ་ཛྫ་ན་ག་རེ སུ་ར་ཀྑི་ཏོ རཱ་ཛ་པུ་ཏྟོ ཙ པུ་རོ་ཧི་ཏ་པུ་ཏྟོ དྷ་མྨ་སེ་ན་ཀུ་མཱ་རོ ཙ ཕུ་སྶེ ས་མྨཱ་ས་མྦུ་དྡྷེ ཨ་ཏྟ་ནོ ན་ག་རཾ ས་མྤ་ཏྟེ ས་ཊྛི་ཡཱ པུ་རི་ས་ས་ཏ་ས་ཧ་སྶེ་ཧི ས་དྡྷིཾ པ་ཙྩུ་གྒ་ནྟྭཱ ཝ་ནྡི་ཏྭཱ ནི་མ་ནྟེ་ཏྭཱ ས་ཏྟཱ་ཧཾ མ་ཧཱ་དཱ་ནཾ ད་ཏྭཱ ད་ས་བ་ལ་སྶ དྷ་མྨ་ཀ་ཐཾ སུ་ཏྭཱ བྷ་ག་ཝ་ཏི པ་སཱི་དི་ཏྭཱ ཏེ ས་པ་རི་ཝཱ་རཱ པ་བྦ་ཛི་ཏྭཱ ཨ་ར་ཧ་ཏྟཾ པཱ་པུ་ཎིཾ་སུ. ཏེ་སཾ ས་ཊྛི་ཡཱ བྷི་ཀྑུ་ས་ཏ་ས་ཧ་སྶཱ་ནཾ མ་ཛ྄ཛྷེ བྷ་ག་ཝཱ པཱ་ཏི་མོ་ཀྑཾ ཨུ་དྡི་སི, སོ པ་ཋ་མོ ས་ནྣི་པཱ་ཏོ ཨ་ཧོ་སི. པུ་ན ཀཱ་སི་ན་ག་རེ ཛ་ཡ་སེ་ན་ར་ཉྙོ ས་ཊྛི་མ་ཏྟཱ་ནཾ ཉཱ་ཏཱི་ནཾ ས་མཱ་ག་མེ བུ་དྡྷ་ཝཾ་སཾ དེ་སེ་སི, ཏཾ སུ་ཏྭཱ པ་ཉྙཱ་ས་ས་ཏ་ས་ཧ་སྶཱ་ནི ཨེ་ཧི་བྷི་ཀྑུ་པ་བྦ་ཛྫཱ་ཡ པ་བྦ་ཛི་ཏྭཱ ཨ་ར་ཧ་ཏྟཾ པཱ་པུ་ཎིཾ་སུ. ཏེ་སཾ མ་ཛ྄ཛྷ་ག་ཏོ བྷ་ག་ཝཱ པཱ་ཏི་མོ་ཀྑཾ ཨུ་དྡི་སི, སོ དུ་ཏི་ཡོ ས་ནྣི་པཱ་ཏོ ཨ་ཧོ་སི. པུ་ན མ་ཧཱ་མ་ངྒ་ལ་ས་མཱ་ག་མེ མ་ངྒ་ལ་ཀ་ཐཾ སུ་ཏྭཱ ཙ་ཏྟཱ་ལཱི་ས་པུ་རི་ས་ས་ཏ་ས་ཧ་སྶཱ་ནི པ་བྦ་ཛི་ཏྭཱ ཨ་ར་ཧ་ཏྟཾ པཱ་པུ་ཎིཾ་སུ. ཏེ་སཾ མ་ཛ྄ཛྷ་ག་ཏོ སུ་ག་ཏོ པཱ་ཏི་མོ་ཀྑཾ ཨུ་དྡི་སི, སོ ཏ་ཏི་ཡོ ས་ནྣི་པཱ་ཏོ ཨ་ཧོ་སི. ཏེ་ན ཝུ་ཏྟཾ –
༥. ‘‘ས་ནྣི་པཱ་ཏཱ ཏ་ཡོ ཨཱ་སུཾ, ཕུ་སྶ་སྶ་པི མ་ཧེ་སི་ནོ;
ཁཱི་ཎཱ་ས་ཝཱ་ནཾ ཝི་མ་ལཱ་ནཾ, ས་ནྟ་ཙི་ཏྟཱ་ན ཏཱ་དི་ནཾ.
༦. ‘‘ས་ཊྛི་ས་ཏ་ས་ཧ་སྶཱ་ནཾ, པ་ཋ་མོ ཨཱ་སི ས་མཱ་ག་མོ;
པ་ཉྙཱ་ས་ས་ཏ་ས་ཧ་སྶཱ་ནཾ, དུ་ཏི་ཡོ ཨཱ་སི ས་མཱ་ག་མོ.
༧. ‘‘ཙ་ཏྟཱ་ལཱི་ས་ས་ཏ་ས་ཧ་སྶཱ་ནཾ, ཏ་ཏི་ཡོ ཨཱ་སི ས་མཱ་ག་མོ;
ཨ་ནུ་པཱ་དཱ ཝི་མུ་ཏྟཱ་ནཾ, ཝོ་ཙྪི་ནྣ་པ་ཊི་ས་ནྡྷི་ན’’ནྟི.
ཏ་དཱ ཨ་མྷཱ་ཀཾ བོ་དྷི་ས་ཏྟོ ཨ་རི་ནྡ་མ་ན་ག་རེ ཝི་ཛི་ཏཱ་ཝཱི ནཱ་མ ཁ་ཏྟི་ཡོ ཧུ་ཏྭཱ ཏ་སྶ དྷ་མྨཾ སུ་ཏྭཱ བྷ་ག་ཝ་ཏི པ་སཱི་དི་ཏྭཱ ཏ་སྶ མ་ཧཱ་དཱ་ནཾ ད་ཏྭཱ མ་ཧཱ་ར་ཛྫཾ པ་ཧཱ་ཡ བྷ་ག་ཝ་ཏོ ས་ནྟི་ཀེ པ་བྦ་ཛི་ཏྭཱ ཏཱི་ཎི པི་ཊ་ཀཱ་ནི ཨུ་གྒ་ཧེ་ཏྭཱ ཏེ་པི་ཊ་ཀ་དྷ་རོ མ་ཧཱ་ཛ་ན་སྶ དྷ་མྨ་ཀ་ཐཾ ཀ་ཐེ་སི, སཱི་ལ་པཱ་ར་མི་ཉྩ པཱུ་རེ་སི. སོ་པི ནཾ ‘‘བུ་དྡྷོ བྷ་ཝི་སྶ་ཏཱི’’ཏི བྱཱ་ཀཱ་སི. ཏེ་ན ཝུ་ཏྟཾ –
༨. ‘‘ཨ་ཧཾ ཏེ་ན ས་མ་ཡེ་ན, ཝི་ཛི་ཏཱ་ཝཱི ནཱ་མ ཁ་ཏྟི་ཡོ;
ཚ་ཌྜ་ཡི་ཏྭཱ མ་ཧཱ་ར་ཛྫཾ, པ་བྦ་ཛིཾ ཏ་སྶ ས་ནྟི་ཀེ.
༩. ‘‘སོ་པི མཾ བུ་དྡྷོ བྱཱ་ཀཱ་སི, ཕུ་སྶོ ལོ་ཀ་གྒ་ནཱ་ཡ་ཀོ;
དྭེ་ན་ཝུ་ཏེ ཨི་ཏོ ཀ་པྤེ, ཨ་ཡཾ བུ་དྡྷོ བྷ་ཝི་སྶ་ཏི.
༡༠. ‘‘པ་དྷཱ་ནཾ པ་ད་ཧི་ཏྭཱ་ན…པེ… ད་ས་པཱ་ར་མི་པཱུ་རི་ཡཱ.
༡༢. ‘‘སུ་ཏྟ་ནྟཾ ཝི་ན་ཡ་ཉྩཱ་པི, ན་ཝ་ངྒཾ ས་ཏྠུ་སཱ་ས་ནཾ;
ས་བྦཾ པ་རི་ཡཱ་པུ་ཎི་ཏྭཱ, སོ་བྷ་ཡིཾ ཛི་ན་སཱ་ས་ནཾ.
༡༣. ‘‘ཏ་ཏྠ་པྤ་མ་ཏྟོ ཝི་ཧ་ར་ནྟོ, བྲ་ཧྨཾ བྷཱ་ཝེ་ཏྭ བྷཱ་ཝ་ནཾ;
ཨ་བྷི་ཉྙཱ་པཱ་ར་མིཾ ག་ནྟྭཱ, བྲ་ཧྨ་ལོ་ཀ་མ་ག་ཉྪ་ཧ’’ནྟི.
ཏ་སྶ པ་ན བྷ་ག་ཝ་ཏོ ཀཱ་སི་ཀཾ ནཱ་མ ན་ག་རཾ ཨ་ཧོ་སི. ཛ་ཡ་སེ་ནོ ནཱ་མ རཱ་ཛཱ པི་ཏཱ, སི་རི་མཱ ནཱ་མ མཱ་ཏཱ, སུ་ར་ཀྑི་ཏོ ཙ དྷ་མྨ་སེ་ནོ ཙ དྭེ ཨ་གྒ་སཱ་ཝ་ཀཱ, ས་བྷི་ཡོ ནཱ་མུ་པ་ཊྛཱ་ཀོ, ཙཱ་ལཱ ཙ ཨུ་པ་ཙཱ་ལཱ ཙ དྭེ ཨ་གྒ་སཱ་ཝི་ཀཱ, ཨཱ་མ་ལ་ཀ་རུ་ཀྑོ བོ་དྷི, ས་རཱི་རཾ ཨ་ཊྛ་པ་ཎྞཱ་ས་ཧ་ཏྠུ་བྦེ་དྷཾ ཨ་ཧོ་སི, ཨཱ་ཡུ ན་ཝུ་ཏི་ཝ་སྶ་ས་ཧ་སྶཱ་ནི, ཀི་སཱ་གོ་ཏ་མཱི ནཱ་མ ཨ་གྒ་མ་ཧེ་སཱི, ཨ་ནུ་པ་མོ ནཱ་མ་སྶ པུ་ཏྟོ, ཧ་ཏྠི་ཡཱ་ནེ་ན ནི་ཀྑ་མི. ཏེ་ན ཝུ་ཏྟཾ –
༡༤. ‘‘ཀཱ་སི་ཀཾ ནཱ་མ ན་ག་རཾ, ཛ་ཡ་སེ་ནོ ནཱ་མ ཁ་ཏྟི་ཡོ;
སི་རི་མཱ ནཱ་མ ཛ་ནི་ཀཱ, ཕུ་སྶ་སྶཱ་པི མ་ཧེ་སི་ནོ…པེ. …;
བོ་དྷི ཏ་སྶ བྷ་ག་ཝ་ཏོ, ཨཱ་མ་ཎྜོ་ཏི པ་ཝུ་ཙྩ་ཏི…པེ….
༢༢. ‘‘ཨ་ཊྛ་པ་ཎྞཱ་ས་ར་ཏ་ནཾ, སོ་པི ཨ་ཙྩུ་གྒ་ཏོ མུ་ནི;
སོ་བྷ་ཏེ ས་ཏ་རཾ་སཱི་ཝ, ཨུ་ལུ༹་རཱ་ཛཱ་ཝ པཱུ་རི་ཏོ.
༢༣. ‘‘ན་ཝུ་ཏི་ཝ་སྶ་ས་ཧ་སྶཱ་ནི, ཨཱ་ཡུ ཝི་ཛྫ་ཏི ཏཱ་ཝ་དེ;
ཏཱ་ཝ་ཏཱ ཏི་ཊྛ་མཱ་ནོ སོ, ཏཱ་རེ་སི ཛ་ན་ཏཾ བ་ཧུཾ.
༢༤. ‘‘ཨོ་ཝ་དི་ཏྭཱ བ་ཧཱུ ས་ཏྟེ, ས་ནྟཱ་རེ་ཏྭཱ བ་ཧཱུ ཛ་ནེ;
སོ་པི ས་ཏྠཱ ཨ་ཏུ་ལ་ཡ་སོ, ནི་བྦུ་ཏོ སོ ས་སཱ་ཝ་ཀོ’’ཏི.
ཏ་ཏྠ ཨཱ་མ་ཎྜོཏི ཨཱ་མ་ལ་ཀ་རུ་ཀྑོ. ཨོ་ཝ་དི་ཏྭཱཏི ཨོ་ཝཱ་དཾ ད་ཏྭཱ, ཨ་ནུ་སཱ་སི་ཏྭཱ་ཏི ཨ་ཏྠོ. སོ་པི ས་ཏྠཱ ཨ་ཏུ་ལ་ཡ་སོཏི སོ་པི ས་ཏྠཱ ཨ་མི་ཏ་ཡ་སོ་ཏི ཨ་ཏྠོ. ‘‘སོ ཛ་ཧི་ཏྭཱ ཨ་མི་ཏ་ཡ་སོ’’ཏི་པི པཱ་ཋོ, ཏ་སྶ སོ ས་བྦ་མེ་ཝ ཝུ་ཏྟ་པྤ་ཀཱ་རཾ ཝི་སེ་སཾ ཧི་ཏྭཱ་ཏི ཨ་ཏྠོ.
ཕུ་སྶོ ཀི་ར ས་མྨཱ་ས་མྦུ་དྡྷོ ཀུ་སི་ནཱ་རཱ་ཡཾ སེ་ནཱ་རཱ་མེ པ་རི་ནི་བྦཱ་ཡི. དྷཱ་ཏུ་ཡོ ཀི་ར་སྶ ཝི་ཏྠཱ་རི་ཀཱ ཨ་ཧེ་སུཾ. སེ་ས་གཱ་ཐཱ་སུ ས་བྦ་ཏྠ པཱ་ཀ་ཊ་མེ་ཝཱ་ཏི.
ཕུ་སྶ་བུ་དྡྷ་ཝཾ་ས་ཝ་ཎྞ་ནཱ ནི་ཊྛི་ཏཱ.
ནི་ཊྛི་ཏོ ཨ་ཊྛཱ་ར་ས་མོ བུ་དྡྷ་ཝཾ་སོ.