༡༩. ཏི་སྶ་བུ་དྡྷ་ཝཾ་ས་ཝ་ཎྞ་ནཱ
ཏ་སྶ པ་ན སི་དྡྷ་ཏྠ་སྶ བྷ་ག་ཝ་ཏོ ཨ་པ་ར་བྷཱ་གེ ཨེ་ཀོ ཀ་པྤོ བུ་དྡྷ་སུ་ཉྙོ ཨ་ཧོ་སི. ཨི་ཏོ དྭཱ་ན་ཝུ་ཏི་ཀ་པྤ་མ་ཏྠ་ཀེ ཏི་སྶོ, ཕུ་སྶོཏི ཨེ་ཀ་སྨིཾ ཀ་པྤེ དྭེ བུ་དྡྷཱ ནི་བྦ་ཏྟིཾ་སུ. ཏ་ཏྠ ཏི་སྶོ ནཱ་མ མ་ཧཱ་པུ་རི་སོ པཱ་ར་མི་ཡོ པཱུ་རེ་ཏྭཱ ཏུ་སི་ཏ་པུ་རེ ནི་བྦ་ཏྟི་ཏྭཱ ཏ་ཏོ ཙ་ཝི་ཏྭཱ ཁེ་མ་ཀ་ན་ག་རེ ཛ་ན་ས་ནྡྷ་སྶ ནཱ་མ ར་ཉྙོ ཨ་གྒ་མ་ཧེ་སི་ཡཱ པ་དུ་མ་ད་ལ་ས་དི་ས་ན་ཡ་ནཱ་ཡ པ་དུ་མཱ་ནཱ་མཱ་ཡ དེ་ཝི་ཡཱ ཀུ་ཙྪི་སྨིཾ པ་ཊི་ས་ནྡྷིཾ ག་ཧེ་ཏྭཱ ད་ས་ནྣཾ མཱ་སཱ་ནཾ ཨ་ཙྩ་ཡེ་ན ཨ་ནོ་མུ་ཡྻཱ་ནེ མཱ་ཏུ་ཀུ་ཙྪི་ཏོ ནི་ཀྑ་མི. ས་ཏྟ་ཝ་སྶ་ས་ཧ་སྶཱ་ནི ཨ་གཱ་རཾ ཨ་ཛ྄ཛྷཱ་ཝ་སི. ཏ་སྶ གུ་ཧཱ་སེ་ལ-ནཱ་རི་ས་ཡ-ནི་ས་བྷ་ནཱ་མ་ཀཱ ཏ་ཡོ པཱ་སཱ་དཱ ཨ་ཧེ་སུཾ. སུ་བྷ་དྡཱ་དེ་ཝི་པྤ་མུ་ཁཱ་ནི ཏེ་ཏྟིཾ་ས ཨི་ཏྠི་ས་ཧ་སྶཱ་ནི ཨ་ཧེ་སུཾ.
སོ ཙ་ཏྟཱ་རི ནི་མི་ཏྟཱ་ནི དི་སྭཱ སུ་བྷ་དྡཱ་དེ་ཝི་ཡཱ པུ་ཏྟེ ཨཱ་ན་ནྡ་ཀུ་མཱ་རེ ཨུ་པྤ་ནྣེ སོ་ནུ་ཏྟ་རཾ ནཱ་མ ཨ་ནུ་ཏྟ་རཾ ཏུ་ར་ངྒ་ཝ་ར་མཱ་རུ་ཡ྄ཧ མ་ཧཱ་བྷི་ནི་ཀྑ་མ་ནཾ ནི་ཀྑ་མི་ཏྭཱ པ་བྦ་ཛི. ཏཾ མ་ནུ་སྶཱ་ནཾ ཀོ་ཊི ཨ་ནུ་པ་བྦ་ཛི. སོ ཏེ་ཧི པ་རི་ཝུ་ཏོ ཨ་ཊྛ མཱ་སེ པ་དྷཱ་ན་ཙ་རི་ཡཾ ཙ་རི་ཏྭཱ ཝི་སཱ་ཁ་པུ་ཎྞ་མཱ་ཡ ཝཱི་ར་ནི་ག་མེ ཝཱི་ར་སེ་ཊྛི་སྶ དྷཱི་ཏཱ་ཡ དི་ནྣཾ མ་དྷུ་པཱ་ཡཱ་སཾ པ་རི་བྷུ་ཉྫི་ཏྭཱ ས་ལ་ལ་ཝ་ནེ དི་ཝཱ་ཝི་ཧཱ་རཾ ཝཱི་ཏི་ནཱ་མེ་ཏྭཱ སཱ་ཡ་ནྷ་ས་མ་ཡེ ཝི་ཛི་ཏ་ས་ངྒཱ་མ་ཀེ་ན ནཱ་མ ཡ་ཝ་པཱ་ལེ་ན ཨུ་པ་ནཱི་ཏཱ ཨ་ཊྛ ཏི་ཎ་མུ་ཊྛི་ཡོ ག་ཧེ་ཏྭཱ ཨ་ས་ན་བོ་དྷིཾ ཨུ་པ་ས་ངྐ་མི་ཏྭཱ ཙ་ཏྟཱ་ལཱི་ས་ཧ་ཏྠ་ཝི་ཏྠ་ཏཾ ཏི་ཎ་ས་ནྠ་རཾ ས་ནྠ་རི་ཏྭཱ ཏ་ཏྠ པ་ལླ་ངྐཾ ཨཱ་བྷུ་ཛི་ཏྭཱ ས་མཱ་རཾ མཱ་ར་བ་ལཾ ཝི་དྷ་མི་ཏྭཱ ཨ་དྷི་ག་ཏ་ས་བྦ་ཉྙུ་ཏ་ཉྙཱ་ཎོ – ‘‘ཨ་ནེ་ཀ་ཛཱ་ཏི་སཾ་སཱ་རཾ…པེ… ཏ་ཎྷཱ་ནཾ ཁ་ཡ་མ་ཛ྄ཛྷ་གཱ’’ཏི ཨུ་དཱ་ནཾ ཨུ་དཱ་ནེ་ཏྭཱ ས་ཏྟ་ས་ཏྟཱ་ཧཾ བོ་དྷི་ས་མཱི་པེ་ཡེ་ཝ ཝཱི་ཏི་ནཱ་མེ་ཏྭཱ ཡ་ས་ཝ་ཏཱི ན་ག་རེ བྲ་ཧྨ་དེ་ཝཾ ཨུ་ད་ཡ་ཉྩ དྭེ རཱ་ཛ་པུ་ཏྟེ ས་པ་རི་ཝཱ་རེ ཨུ་པ་ནི་སྶ་ཡ་ས་མྤ་ནྣེ ཨཱ་ཀཱ་སེ་ན ག་ནྟྭཱ ཡ་ས་ཝ་ཏཱི་མི་ག་དཱ་ཡེ ཨོ་ཏ་རི་ཏྭཱ ཨུ་ཡྻཱ་ན་པཱ་ལེ་ན རཱ་ཛ་པུ་ཏྟེ པ་ཀྐོ་སཱ་པེ་ཏྭཱ ཏེ་སཾ ས་པ་རི་ཝཱ་རཱ་ནཾ ཨ་ཝི་སཱ་རི་ནཱ བྱཱ་པི་ནཱ མ་དྷུ་རེ་ན བྲ་ཧྨ་སྶ་རེ་ན ད་ས་ས་ཧ་སྶི་ལོ་ཀ་དྷཱ་ཏུཾ ཝི་ཉྙཱ་པེ་ནྟོ་ཝ དྷ་མྨ་ཙ་ཀྐཾ པ་ཝ་ཏྟེ་སི, ཏ་དཱ ཀོ་ཊི་ས་ཏཱ་ནཾ པ་ཋ་མོ དྷ་མྨཱ་བྷི་ས་མ་ཡོ ཨ་ཧོ་སི. ཏེ་ན ཝུ་ཏྟཾ –
༡. ‘‘སི་དྡྷ་ཏྠ་སྶ ཨ་པ་རེ་ན, ཨ་ས་མོ ཨ་པྤ་ཊི་པུ་གྒ་ལོ;
ཨ་ན་ནྟ་ཏེ་ཛོ ཨ་མི་ཏ་ཡ་སོ, ཏི་སྶོ ལོ་ཀ་གྒ་ནཱ་ཡ་ཀོ.
༢. ‘‘ཏ་མ་ནྡྷ་ཀཱ་རཾ ཝི་དྷ་མི་ཏྭཱ, ཨོ་བྷཱ་སེ་ཏྭཱ ས་དེ་ཝ་ཀཾ;
ཨ་ནུ་ཀ་མྤ་ཀོ མ་ཧཱ་ཝཱི་རོ, ལོ་ཀེ ཨུ་པྤ་ཛྫི ཙ་ཀྑུ་མཱ.
༣. ‘‘ཏ་སྶཱ་པི ཨ་ཏུ་ལཱ ཨི་དྡྷི, ཨ་ཏུ་ལཾ སཱི་ལཾ ས་མཱ་དྷི ཙ;
ས་བྦ་ཏྠ པཱ་ར་མིཾ ག་ནྟྭཱ, དྷ་མྨ་ཙ་ཀྐཾ པ་ཝ་ཏྟ་ཡི.
༤. ‘‘སོ བུ་དྡྷོ ད་ས་ས་ཧ་སྶི་མྷི, ཝི་ཉྙཱ་པེ་སི གི་རཾ སུ་ཙིཾ;
ཀོ་ཊི་ས་ཏཱ་ནི ཨ་བྷི་ས་མིཾ་སུ, པ་ཋ་མེ དྷ་མྨ་དེ་ས་ནེ’’ཏི.
ཏ་ཏྠ ས་བྦ་ཏྠཱཏི ས་བྦེ་སུ དྷ་མྨེ་སུ པཱ་རཾ ག་ནྟྭཱ. ད་ས་ས་ཧ་སྶི་མྷཱིཏི ད་ས་ས་ཧ་སྶི་ཡཾ ཨ་ཐཱ་པ་རེ་ན ས་མ་ཡེ་ན ཏི་སྶེ་ན ས་ཏྠཱ་རཱ ས་དྡྷིཾ པ་བྦ་ཛི་ཏཱ་ནཾ བྷི་ཀྑཱུ་ནཾ ཀོ་ཊི མ་ཧཱ་པུ་རི་ས་སྶ ག་ཎ་ཝཱ་སཾ པ་ཧཱ་ཡ བོ་དྷི་མཱུ་ལ་མུ་པ་ག་མ་ན་ས་མ་ཡེ ཨ་ཉྙ་ཏྲ ག་ཏཱ. སཱ ཏི་སྶེ་ན ས་མྨཱ་ས་མྦུ་དྡྷེ་ན དྷ་མྨ་ཙ་ཀྐཾ པ་ཝ་ཏྟི་ཏ’’ནྟི སུ་ཏྭཱ ཡ་ས་ཝ་ཏཱི་མི་ག་དཱ་ཡཾ ཨཱ་ག་ནྟྭཱ ད་ས་བ་ལ་མ་བྷི་ཝཱ་དེ་ཏྭཱ ཏཾ པ་རི་ཝཱ་རེ་ཏྭཱ ནི་སཱི་དི. ཏེ་སཾ བྷ་ག་ཝཱ དྷ་མྨཾ དེ་སེ་སི, ཏ་དཱ ན་ཝུ་ཏི་ཡཱ ཀོ་ཊཱི་ནཾ དུ་ཏི་ཡཱ་བྷི་ས་མ་ཡོ ཨ་ཧོ་སི. པུ་ན མ་ཧཱ་མ་ངྒ་ལ་ས་མཱ་ག་མེ མ་ངྒ་ལ་པ་རི་ཡོ་སཱ་ནེ ས་ཊྛི་ཡཱ ཀོ་ཊཱི་ནཾ ཏ་ཏི་ཡོ ཨ་བྷི་ས་མ་ཡོ ཨ་ཧོ་སི. ཏེ་ན ཝུ་ཏྟཾ –
༥. ‘‘དུ་ཏི་ཡོ ན་ཝུ་ཏི་ཀོ་ཊཱི་ནཾ, ཏ་ཏི་ཡོ ས་ཊྛི་ཀོ་ཊི་ཡོ;
བ་ནྡྷ་ནཱ་ཏོ པ་མོ་ཙེ་སི, ས་ཏྟེ ན་ར་མ་རཱུ ཏ་དཱ’’ཏི.
ཏ་ཏྠ དུ་ཏི་ཡོ ན་ཝུ་ཏི་ཀོ་ཊཱི་ནནྟི དུ་ཏི་ཡོ ཨ་བྷི་ས་མ་ཡོ ཨ་ཧོ་སི ན་ཝུ་ཏི་ཀོ་ཊི་པཱ་ཎཱི་ན་ནྟི ཨ་ཏྠོ. བ་ནྡྷ་ནཱ་ཏོཏི བ་ནྡྷ་ན་ཏོ, ད་ས་ཧི སཾ་ཡོ་ཛ་ནེ་ཧི པ་རི་མོ་ཙེ་སཱི་ཏི ཨ་ཏྠོ. ཨི་དཱ་ནི པ་རི་མོ་ཙི་ཏེ ས་ཏྟེ ས་རཱུ་པ་ཏོ ད་སྶེ་ནྟོ ‘‘ན་ར་མ་རཱུ’’ཏི ཨཱ་ཧ. ན་ར་མ་རཱུཏི ན་རཱ་མ་རེ.
ཡ་ས་ཝ་ཏཱི་ན་ག་རེ ཀི་ར ཨ་ནྟོ་ཝ་སྶཾ པ་བྦ་ཛི་ཏཱ་ནཾ ཨ་ར་ཧ་ནྟཱ་ནཾ ས་ཏ་ས་ཧ་སྶེ་ཧི པ་རི་ཝུ་ཏོ པ་ཝཱ་རེ་སི, སོ པ་ཋ་མོ ས་ནྣི་པཱ་ཏོ ཨ་ཧོ་སི. ཨུ་བྷ་ཏོ སུ་ཛཱ་ཏ་སྶ སུ་ཛཱ་ཏ་སྶ ནཱ་མ ར་ཉྙོ ནཱ་རི་ཝཱ་ཧ་ན་ཀུ་མཱ་རོ ནཱ་རི་ཝཱ་ཧ་ན་ན་ག་རཾ ཨ་ནུ་པྤ་ཏྟེ བྷ་ག་ཝ་ཏི ལོ་ཀ་ནཱ་ཐེ ས་པ་རི་ཝཱ་རོ པ་ཙྩུ་གྒ་ནྟྭཱ ད་ས་བ་ལཾ ས་བྷི་ཀྑུ་ས་ངྒྷཾ ནི་མ་ནྟེ་ཏྭཱ ས་ཏྟཱ་ཧཾ ཨ་ས་དི་ས་དཱ་ནཾ ད་ཏྭཱ ཨ་ཏྟ་ནོ ར་ཛྫཾ པུ་ཏྟ་སྶ ནི་ཡྻཱ་ཏེ་ཏྭཱ ས་པ་རི་ཝཱ་རོ ས་བྦ་ལོ་ཀཱ་དྷི་པ་ཏི་སྶ ཏི་སྶ་ས་མྨཱ་ས་མྦུ་དྡྷ་སྶ ས་ནྟི་ཀེ ཨེ་ཧི་བྷི་ཀྑུ་པ་བྦ་ཛྫཱ་ཡ པ་བྦ་ཛི. ཏ་སྶ ཀི་ར སཱ པ་བྦ་ཛྫཱ ས་བྦ་དི་སཱ་སུ པཱ་ཀ་ཊཱ ཨ་ཧོ་སི. ཏ་སྨཱ ཏ་ཏོ ཏ་ཏོ ཨཱ་ག་ནྟྭཱ ནཱ་རི་ཝཱ་ཧ་ན་ཀུ་མཱ་རཾ མ་ཧཱ་ཛ་ནོ ཨ་ནུ་པ་བྦ་ཛི. ཏ་དཱ ཏ་ཐཱ་ག་ཏོ ན་ཝུ་ཏི་ཡཱ བྷི་ཀྑུ་ས་ཏ་ས་ཧ་སྶ་སྶ མ་ཛ྄ཛྷ་ག་ཏོ པཱ་ཏི་མོ་ཀྑཾ ཨུ་དྡི་སི, སོ དུ་ཏི་ཡོ ས་ནྣི་པཱ་ཏོ ཨ་ཧོ་སི. པུ་ན ཁེ་མ་ཝ་ཏཱི་ན་ག་རེ ཉཱ་ཏི་ས་མཱ་ག་མེ བུ་དྡྷ་ཝཾ་ས་དྷ་མྨ་ཀ་ཐཾ སུ་ཏྭཱ ཨ་སཱི་ཏི་ས་ཏ་ས་ཧ་སྶཱ་ནི ཏ་སྶ ས་ནྟི་ཀེ པ་བྦ་ཛི་ཏྭཱ ཨ་ར་ཧ་ཏྟཾ པཱ་པུ་ཎིཾ་སུ, ཏེ་ཧི པ་རི་ཝུ་ཏོ སུ་ག་ཏོ པཱ་ཏི་མོ་ཀྑཾ ཨུ་དྡི་སི, སོ ཏ་ཏི་ཡོ ས་ནྣི་པཱ་ཏོ ཨ་ཧོ་སི. ཏེ་ན ཝུ་ཏྟཾ –
༦. ‘‘ས་ནྣི་པཱ་ཏཱ ཏ་ཡོ ཨཱ་སུཾ, ཏི་སྶེ ལོ་ཀ་གྒ་ནཱ་ཡ་ཀེ;
ཁཱི་ཎཱ་ས་ཝཱ་ནཾ ཝི་མ་ལཱ་ནཾ, ས་ནྟ་ཙི་ཏྟཱ་ན ཏཱ་དི་ནཾ.
༧. ‘‘ཁཱི་ཎཱ་ས་ཝ་ས་ཏ་ས་ཧ་སྶཱ་ནཾ, པ་ཋ་མོ ཨཱ་སི ས་མཱ་ག་མོ;
ན་ཝུ་ཏི་ས་ཏ་ས་ཧ་སྶཱ་ནཾ, དུ་ཏི་ཡོ ཨཱ་སི ས་མཱ་ག་མོ.
༨. ‘‘ཨ་སཱི་ཏི་ས་ཏ་ས་ཧ་སྶཱ་ནཾ, ཏ་ཏི་ཡོ ཨཱ་སི ས་མཱ་ག་མོ;
ཁཱི་ཎཱ་ས་ཝཱ་ནཾ ཝི་མ་ལཱ་ནཾ, པུ་པྥི་ཏཱ་ནཾ ཝི་མུ་ཏྟི་ཡཱ’’ཏི.
ཏ་དཱ ཨ་མྷཱ་ཀཾ བོ་དྷི་ས་ཏྟོ ཡ་ས་ཝ་ཏཱི་ན་ག་རེ སུ་ཛཱ་ཏོ ནཱ་མ རཱ་ཛཱ ཧུ་ཏྭཱ ཨི་དྡྷཾ ཕཱི་ཏཾ ཛ་ན་པ་དཾ ཨ་ནེ་ཀ་ཀོ་ཊི་དྷ་ན་ས་ནྣི་ཙ་ཡཾ ཨ་ནུ་རཱ་ག་མུ་པ་ག་ཏ་ཧ་ད་ཡ་ཉྩ པ་རི་ཛ་ནཾ ཏི་ཎ་ན་ལ༹་མི་ཝ པ་རི་ཙྩ་ཛི་ཏྭཱ ཛཱ་ཏི་ཨཱ་དཱི་སུ སཾ་ཝི་གྒ་ཧ་ད་ཡོ ནི་ཀྑ་མི་ཏྭཱ ཏཱ་པ་ས་པ་བྦ་ཛྫཾ པ་བྦ་ཛི་ཏྭཱ མ་ཧི་དྡྷི་ཀོ མ་ཧཱ་ནུ་བྷཱ་ཝོ ཧུ་ཏྭཱ ‘‘བུ་དྡྷོ ལོ་ཀེ ཨུ་པྤ་ནྣོ’’ཏི སུ་ཏྭཱ པ་ཉྩ་ཝ་ཎྞཱ་ཡ པཱི་ཏི་ཡཱ ཕུ་ཊ་ས་རཱི་རོ ཧུ་ཏྭཱ ས་པ་ཏི་སྶོ ཏི་སྶཾ བྷ་ག་ཝ་ནྟཾ ཨུ་པ་ས་ངྐ་མི་ཏྭཱ ཝ་ནྡི་ཏྭཱ ཙི་ནྟེ་སི – ‘‘ཧ་ནྡཱ་ཧཾ མ་ནྡཱ་ར་ཝ་པཱ་རི་ཙྪ་ཏྟ་ཀཱ་དཱི་ཧི དི་བྦ་ཀུ་སུ་མེ་ཧི བྷ་ག་ཝ་ནྟཾ པཱུ་ཛེ་སྶཱ་མཱི’’ཏི. ཨ་ཐ སོ ཨེ་ཝཾ ཙི་ནྟེ་ཏྭཱ ཨི་དྡྷི་ཡཱ ས་གྒ་ལོ་ཀཾ ག་ནྟྭཱ ཙི་ཏྟ་ལ་ཏཱ་ཝ་ནཾ པ་ཝི་སི་ཏྭཱ པ་དུ་མ་པཱ་རི་ཙྪ་ཏྟ་ཀ་མ་ནྡཱ་ར་ཝཱ་དཱི་ཧི དི་བྦ་ཀུ་སུ་མེ་ཧི ར་ཏ་ན་མ་ཡཾ ཙ་ངྐོ་ཊ་ཀཾ གཱ་ཝུ་ཏ་པྤ་མཱ་ཎཾ པཱུ་རེ་ཏྭཱ ག་ཧེ་ཏྭཱ ག་ག་ན་ཏ་ལེ་ན ཨཱ་ག་ནྟྭཱ དི་བྦེ་ཧི སུ་ར་བྷི་ཀུ་སུ་མེ་ཧི བྷ་ག་ཝ་ནྟཾ པཱུ་ཛེ་སི. ཨེ་ཀ་ཉྩ མ་ཎི་ད་ཎྜ་ཀཾ སུ་ཝ་ཎྞ་མ་ཡ་ཀ་ཎྞི་ཀཾ པ་དུ་མ་རཱ་ག་མ་ཎི་མ་ཡ་པ་ཎྞཾ སུ་ག་ནྡྷ་ཀེ་ས་ར་ཙྪ་ཏྟཾ ཝི་ཡ པ་དུ་མ་ཙྪ་ཏྟཾ བྷ་ག་ཝ་ཏོ སི་ར་སི དྷཱ་ར་ཡ་ནྟོ ཙ་ཏུ་པ་རི་ས་མ་ཛ྄ཛྷེ ཨ་ཊྛཱ་སི. ཨ་ཐ བྷ་ག་ཝཱ ནཾ – ‘‘ཨི་ཏོ དྭེ་ན་ཝུ་ཏེ ཀ་པྤེ གོ་ཏ་མོ ནཱ་མ བུ་དྡྷོ བྷ་ཝི་སྶ་ཏཱི’’ཏི བྱཱ་ཀཱ་སི. ཏེ་ན ཝུ་ཏྟཾ –
༩. ‘‘ཨ་ཧཾ ཏེ་ན ས་མ་ཡེ་ན, སུ་ཛཱ་ཏོ ནཱ་མ ཁ་ཏྟི་ཡོ;
མ་ཧཱ་བྷོ་གཾ ཚ་ཌྜ་ཡི་ཏྭཱ, པ་བྦ་ཛིཾ ཨི་སི་པ་བྦ་ཛཾ.
༡༠. ‘‘མ་ཡི པ་བྦ་ཛི་ཏེ ས་ནྟེ, ཨུ་པྤ་ཛྫི ལོ་ཀ་ནཱ་ཡ་ཀོ;
བུ་དྡྷོ་ཏི ས་དྡཾ སུ་ཏྭཱ་ན, པཱི་ཏི མེ ཨུ་པ་པ་ཛྫ་ཐ.
༡༡. ‘‘དི་བྦཾ མ་ནྡཱ་ར་ཝཾ པུ་པྥཾ, པ་དུ་མཾ པཱ་རི་ཚ་ཏྟ་ཀཾ;
ཨུ་བྷོ ཧ་ཏྠེ་ཧི པ་གྒ་ཡ྄ཧ, དྷུ་ན་མཱ་ནོ ཨུ་པཱ་ག་མིཾ.
༡༢. ‘‘ཙཱ་ཏུ་ཝ་ཎྞ་པ་རི་ཝུ་ཏཾ, ཏི་སྶཾ ལོ་ཀ་གྒ་ནཱ་ཡ་ཀཾ;
ཏ་མ་ཧཾ པུ་པྥཾ ག་ཧེ་ཏྭཱ, མ་ཏྠ་ཀེ དྷཱ་ར་ཡིཾ ཛི་ནཾ.
༡༣. ‘‘སོ་པི མཾ བུ་དྡྷོ བྱཱ་ཀཱ་སི, ཛ་ན་མ་ཛ྄ཛྷེ ནི་སཱི་དི་ཡ;
དྭེ་ན་ཝུ་ཏེ ཨི་ཏོ ཀ་པྤེ, ཨ་ཡཾ བུ་དྡྷོ བྷ་ཝི་སྶ་ཏི.
༡༤. ‘‘པ་དྷཱ་ནཾ པ་ད་ཧི་ཏྭཱ་ན…པེ… ཧེ་སྶཱ་མ ས་མྨུ་ཁཱ ཨི་མཾ.
༡༥. ‘‘ཏ་སྶཱ་པི ཝ་ཙ་ནཾ སུ་ཏྭཱ, བྷི་ཡྻོ ཙི་ཏྟཾ པ་སཱ་ད་ཡིཾ;
ཨུ་ཏྟ་རིཾ ཝ་ཏ་མ་དྷི་ཊྛཱ་སིཾ, ད་ས་པཱ་ར་མི་པཱུ་རི་ཡཱ’’ཏི.
ཏ་ཏྠ མ་ཡི པ་བྦ་ཛི་ཏེཏི མ་ཡི པ་བྦ་ཛི་ཏ་བྷཱ་ཝཾ ཨུ་པ་ག་ཏེ. ‘‘མ་མ པ་བྦ་ཛི་ཏཾ ས་ནྟ’’ནྟི པོ་ཏྠ་ཀེ་སུ ལི་ཁ་ནྟི, སོ པ་མཱ་ད་ལེ་ཁོ་ཏི ཝེ་དི་ཏ་བྦོ. ཨུ་པ་པ་ཛྫ་ཐཱཏི ཨུ་པྤ་ཛྫི་ཏྠ. ཨུ་བྷོ ཧ་ཏྠེ་ཧཱིཏི ཨུ་བྷེ་ཧི ཧ་ཏྠེ་ཧི. པ་གྒ་ཡ྄ཧཱཏི ག་ཧེ་ཏྭཱ་ན. དྷུ་ན་མཱ་ནོཏི ཝཱ་ཀ་ཙཱི་རཱ་ནི ཝི་དྷུ་ན་མཱ་ནོ་ཝ. ཙཱ་ཏུ་ཝ་ཎྞ་པ་རི་ཝུ་ཏནྟི ཙ་ཏུ་པ་རི་ས་པ་རི་ཝུ་ཏཾ, ཁ་ཏྟི་ཡ་བྲཱ་ཧྨ་ཎ་ག་ཧ་པ་ཏི་ས་མ་ཎ་པ་རི་ཝུ་ཏ་ནྟི ཨ་ཏྠོ. ‘‘ཙ་ཏུ་ཝ་ཎྞེ་ཧི པ་རི་ཝུ་ཏ’’ནྟི པ་ཋ་ནྟི ཀེ་ཙི.
ཏ་སྶ པ་ན བྷ་ག་ཝ་ཏོ ཁེ་མཾ ནཱ་མ ན་ག་རཾ ཨ་ཧོ་སི. ཛ་ན་ས་ནྡྷོ ནཱ་མ ཁ་ཏྟི་ཡོ པི་ཏཱ, པ་དུ་མཱ ནཱ་མ ཛ་ནི་ཀཱ, བྲ་ཧྨ་དེ་ཝོ ཙ ཨུ་ད་ཡོ ཙ དྭེ ཨ་གྒ་སཱ་ཝ་ཀཱ, ས་མ་ངྒོ ནཱ་མུ་པ་ཊྛཱ་ཀོ, ཕུ་སྶཱ ཙ སུ་ད་ཏྟཱ ཙ དྭེ ཨ་གྒ་སཱ་ཝི་ཀཱ, ཨ་ས་ན་རུ་ཀྑོ བོ་དྷི, ས་རཱི་རཾ ས་ཊྛི་ཧ་ཏྠུ་བྦེ་དྷཾ ཨ་ཧོ་སི, ཝ་སྶ་ས་ཏ་ས་ཧ་སྶཾ ཨཱ་ཡུ, སུ་བྷ་དྡཱ ནཱ་མ ཨ་གྒ་མ་ཧེ་སཱི, ཨཱ་ན་ནྡོ ནཱ་མ པུ་ཏྟོ, ཏུ་ར་ངྒ་ཡཱ་ནེ་ན ནི་ཀྑ་མི. ཏེ་ན ཝུ་ཏྟཾ –
༡༦. ‘‘ཁེ་མ་ཀཾ ནཱ་མ ན་ག་རཾ, ཛ་ན་ས་ནྡྷོ ནཱ་མ ཁ་ཏྟི་ཡོ;
པ་དུ་མཱ ནཱ་མ ཛ་ནི་ཀཱ, ཏི་སྶ་སྶ ཙ མ་ཧེ་སི་ནོ.
༢༡. ‘‘བྲ་ཧྨ་དེ་ཝོ ཙ ཨུ་ད་ཡོ ཙ, ཨ་ཧེ་སུཾ ཨ་གྒ་སཱ་ཝ་ཀཱ;
ས་མ་ངྒོ ནཱ་མུ་པ་ཊྛཱ་ཀོ, ཏི་སྶ་སྶ ཙ མ་ཧེ་སི་ནོ.
༢༢. ‘‘ཕུ་སྶཱ ཙེ་ཝ སུ་ད་ཏྟཱ ཙ, ཨ་ཧེ་སུཾ ཨ་གྒ་སཱ་ཝི་ཀཱ;
བོ་དྷི ཏ་སྶ བྷ་ག་ཝ་ཏོ, ཨ་ས་ནོ་ཏི པ་ཝུ་ཙྩ་ཏི.
༢༤. ‘‘སོ བུ་དྡྷོ ས་ཊྛི་ར་ཏ་ནོ, ཨ་ཧུ ཨུ་ཙྩ་ཏྟ་ནེ ཛི་ནོ;
ཨ་ནཱུ་པ་མོ ཨ་ས་དི་སོ, ཧི་མ་ཝཱ ཝི་ཡ དི་སྶ་ཏི.
༢༥. ‘‘ཏ་སྶཱ་པི ཨ་ཏུ་ལ་ཏེ་ཛ་སྶ, ཨཱ་ཡུ ཨཱ་སི ཨ་ནུ་ཏྟ་རོ;
ཝ་སྶ་ས་ཏ་ས་ཧ་སྶཱ་ནི, ལོ་ཀེ ཨ་ཊྛཱ་སི ཙ་ཀྑུ་མཱ.
༢༦. ‘‘ཨུ་ཏྟ་མཾ པ་ཝ་རཾ སེ་ཊྛཾ, ཨ་ནུ་བྷོ་ཏྭཱ མ་ཧཱ་ཡ་སཾ;
ཛ་ལི་ཏྭཱ ཨ་གྒི་ཀྑ་ནྡྷོ་ཝ, ནི་བྦུ་ཏོ སོ ས་སཱ་ཝ་ཀོ.
༢༧. ‘‘ཝ་ལཱ་ཧ་ཀོ་ཝ ཨ་ནི་ལེ་ན, སཱུ་རི་ཡེ་ན ཝི་ཡ ཨུ་སྶ་ཝོ;
ཨ་ནྡྷ་ཀཱ་རོ་ཝ པ་དཱི་པེ་ན, ནི་བྦུ་ཏོ སོ ས་སཱ་ཝ་ཀོ’’ཏི.
ཏ་ཏྠ ཨུ་ཙྩ་ཏྟ་ནེཏི ཨུ་ཙྩ་བྷཱ་ཝེ་ན. ཧི་མ་ཝཱ ཝི་ཡ དི་སྶ་ཏཱིཏི ཧི་མ་ཝཱ་ཝ པ་དི་སྶ་ཏི. ཨ་ཡ་མེ་ཝ ཝཱ པཱ་ཋོ. ཡ་ཐཱ ཡོ་ཛ་ནཱ་ནཾ ས་ཏཱ་ནུ་ཙྩོ ཧི་མ་ཝཱ པ་ཉྩ་པ་བྦ་ཏོ སུ་དཱུ་རེ ཋི་ཏཱ་ན་མྤི ཨུ་ཙྩ་བྷཱ་ཝེ་ན ཙ སོ་མྨ་བྷཱ་ཝེ་ན ཙ ཨ་ཏི་ར་མ་ཎཱི་ཡོ ཧུ་ཏྭཱ དི་སྶ་ཏི, ཨེ་ཝཾ བྷ་ག་ཝཱ་པི དི་སྶ་ཏཱི་ཏི ཨ་ཏྠོ. ཨ་ནུ་ཏྟ་རོཏི ནཱ་ཏི་དཱི་གྷོ ནཱ་ཏི་ར་སྶོ. ཨཱ་ཡུ ཝ་སྶ་ས་ཏ་ས་ཧ་སྶ་ནྟི ཨ་ཏྠོ. ཨུ་ཏྟ་མཾ པ་ཝ་རཾ སེ་ཊྛནྟི ཨ་ཉྙ་མ་ཉྙ་ཝེ་ཝ་ཙ་ནཱ་ནི. ཨུ་སྶ་ཝོཏི ཧི་མ་བི་ནྡུ ཝ་ལཱ་ཧ་ཀ་ཨུ་སྶ་ཝ་ཨ་ནྡྷ་ཀཱ་རཱ ཝི་ཡ ཨ་ནི་ལ་སཱུ་རི་ཡ་དཱི་པེ་ཧི ཨ་ནི་ཙྩ་ཏཱ་ནི་ལ་སཱུ་རི་ཡ་དཱི་པེ་ཧི ཨུ་པ་དྡུ་ཏོ པ་རི་ནི་བྦུ་ཏོ ས་སཱ་ཝ་ཀོ བྷ་ག་ཝཱ་ཏི ཨ་ཏྠོ.
ཏི་སྶོ ཀི་ར བྷ་ག་ཝཱ སུ་ན་ནྡ་ཝ་ཏཱི་ན་ག་རེ སུ་ན་ནྡཱ་རཱ་མེ པ་རི་ནི་བྦཱ་ཡི. སེ་ས་མེ་ཏྠ གཱ་ཐཱ་སུ པཱ་ཀ་ཊ་མེ་ཝཱ་ཏི.
ཏི་སྶ་བུ་དྡྷ་ཝཾ་ས་ཝ་ཎྞ་ནཱ ནི་ཊྛི་ཏཱ.
ནི་ཊྛི་ཏོ ས་ཏྟ་ར་ས་མོ བུ་དྡྷ་ཝཾ་སོ.