༡༨. སི་དྡྷ་ཏྠ་བུ་དྡྷ་ཝཾ་ས་ཝ་ཎྞ་ནཱ
དྷ་མྨ་ད་སྶི་མྷི བྷ་ག་ཝ་ཏི པ་རི་ནི་བྦུ་ཏེ ཨ་ནྟ་ར་ཧི་ཏེ ཙ་སྶ སཱ་ས་ནེ ཏ་སྨིཾ ཀ་པྤེ ཨ་ཏཱི་ཏེ ཀ་པྤ་ས་ཧ་སྶེ ཙ ས་ཏྟ་སུ ཀ་པྤ་ས་ཏེ་སུ ཙ ཚ་སུ ཀ་པྤེ་སུ ཙ ཨ་ཏི་ཀྐ་ནྟེ་སུ ཨི་ཏོ ཙ་ཏུ་ན་ཝུ་ཏི་ཀ་པྤ་མ་ཏྠ་ཀེ ཨེ་ཀ་སྨིཾ ཀ་པྤེ ཨེ་ཀོ་ཝ ལོ་ཀ་ཏྠ་ཙ་རོ ཨ་དྷི་ག་ཏ་པ་ར་མ་ཏྠོ སི་དྡྷ་ཏྠོ ནཱ་མ ས་ཏྠཱ ལོ་ཀེ པཱ་ཏུ་ར་ཧོ་སི. ཏེ་ན ཝུ་ཏྟཾ –
༡. ‘‘དྷ་མྨ་ད་སྶི་སྶ ཨ་པ་རེ་ན, སི་དྡྷ་ཏྠོ ལོ་ཀ་ནཱ་ཡ་ཀོ;
ནི་ཧ་ནི་ཏྭཱ ཏ་མཾ ས་བྦཾ, སཱུ་རི་ཡོ ཨ་བྦྷུ་གྒ་ཏོ ཡ་ཐཱ’’ཏི.
སི་དྡྷ་ཏྠོ བོ་དྷི་ས་ཏྟོ་པི པཱ་ར་མི་ཡོ པཱུ་རེ་ཏྭཱ ཏུ་སི་ཏ་བྷ་ཝ་ནེ ནི་བྦ་ཏྟི་ཏྭཱ ཏ་ཏོ ཙ་ཝི་ཏྭཱ ཝེ་བྷཱ་ར་ན་ག་རེ ཨུ་དེ་ན་སྶ ནཱ་མ ར་ཉྙོ ཨ་གྒ་མ་ཧེ་སི་ཡཱ སུ་ཕ་སྶཱ་ཡ ནཱ་མ དེ་ཝི་ཡཱ ཀུ་ཙྪི་སྨིཾ པ་ཊི་ས་ནྡྷིཾ ག་ཧེ་ཏྭཱ ད་ས་ནྣཾ མཱ་སཱ་ནཾ ཨ་ཙྩ་ཡེ་ན ཝཱི་རི་ཡུ་ཡྻཱ་ནེ མཱ་ཏུ་ཀུ་ཙྪི་ཏོ ནི་ཀྑ་མི. ཛཱ་ཏེ པ་ན མ་ཧཱ་པུ་རི་སེ ས་བྦེ་སཾ ཨཱ་ར་དྡྷ་ཀ་མྨ་ནྟཱ ཙ ཨི་ཙྪི་ཏཱ ཙ ཨ་ཏྠཱ སི་དྡྷི་མ་ག་མཾ་སུ. ཏ་སྨཱ པ་ན་སྶ ཉཱ་ཏ་ཀཱ ‘‘སི་དྡྷ་ཏྠོ’’ཏི ནཱ་མ་མ་ཀཾ་སུ. སོ ད་ས་ཝ་སྶ་ས་ཧ་སྶཱ་ནི ཨ་གཱ་ར་མ་ཛ྄ཛྷེ ཝ་སི. ཏ་སྶ ཀོ་ཀཱ-སུ་པྤ་ལ-པ་དུ་མ་ནཱ་མ་ཀཱ ཏ་ཡོ པཱ་སཱ་དཱ ཨ་ཧེ་སུཾ. སོ་མ་ན་སྶཱ་དེ་ཝི་པྤ་མུ་ཁཱ་ནི ཨ་ཊྛ་ཙ་ཏྟཱ་ལཱི་ས ཨི་ཏྠི་ས་ཧ་སྶཱ་ནི པ་ཙྩུ་པ་ཊྛི་ཏཱ་ནི ཨ་ཧེ་སུཾ.
སོ ཙ་ཏྟཱ་རི ནི་མི་ཏྟཱ་ནི དི་སྭཱ སོ་མ་ན་སྶཱ་དེ་ཝི་ཡཱ པུ་ཏྟེ ཨ་ནུ་པ་མ་ཀུ་མཱ་རེ ཨུ་པྤ་ནྣེ ཨཱ་སཱ་ལ༹ྷི་པུ་ཎྞ་མི་ཡཾ སུ་ཝ་ཎྞ་སི་ཝི་ཀཱ་ཡ ནི་ཀྑ་མི་ཏྭཱ ཝཱི་རི་ཡུ་ཡྻཱ་ནཾ ག་ནྟྭཱ པ་བྦ་ཛི. ཏཾ ཀོ་ཊི་ས་ཏ་ས་ཧ་སྶ་མ་ནུ་སྶཱ ཨ་ནུ་པ་བྦ་ཛིཾ་སུ. མ་ཧཱ་པུ་རི་སོ ཀི་ར ཏེ་ཧི ས་དྡྷིཾ ད་ས མཱ་སེ པ་དྷཱ་ན་ཙ་རི་ཡཾ ཙ་རི་ཏྭཱ ཝི་སཱ་ཁ་པུ་ཎྞ་མཱ་ཡཾ ཨ་ས་དི་ས་བྲཱ་ཧྨ་ཎ་གཱ་མེ སུ་ནེ་ཏྟཱ་ཡ ནཱ་མ བྲཱ་ཧྨ་ཎ་ཀ་ཉྙཱ་ཡ དི་ནྣཾ མ་དྷུ་པཱ་ཡཱ་སཾ པ་རི་བྷུ་ཉྫི་ཏྭཱ བ་ད་ར་ཝ་ནེ དི་ཝཱ་ཝི་ཧཱ་རཾ ཝཱི་ཏི་ནཱ་མེ་ཏྭཱ སཱ་ཡ་ནྷ་ས་མ་ཡེ ཝ་རུ་ཎེ་ན ནཱ་མ ཡ་ཝ་པཱ་ལེ་ན དི་ནྣཱ ཨ་ཊྛ ཏི་ཎ་མུ་ཊྛི་ཡོ ག་ཧེ་ཏྭཱ ཀ་ཎི་ཀཱ་ར་བོ་དྷིཾ ཨུ་པ་ག་ནྟྭཱ ཙ་ཏྟཱ་ལཱི་ས་ཧ་ཏྠ་ཝི་ཏྠ་ཏཾ ཏི་ཎ་ས་ནྠ་རཾ ས་ནྠ་རི་ཏྭཱ པ་ལླ་ངྐཾ ཨཱ་བྷུ་ཛི་ཏྭཱ ས་བྦ་ཉྙུ་ཏཾ པཱ་པུ་ཎི་ཏྭཱ – ‘‘ཨ་ནེ་ཀ་ཛཱ་ཏི་སཾ་སཱ་རཾ…པེ… ཏ་ཎྷཱ་ནཾ ཁ་ཡ་མ་ཛ྄ཛྷ་གཱ’’ཏི ཨུ་དཱ་ནཾ ཨུ་དཱ་ནེ་ཏྭཱ ས་ཏྟ་ས་ཏྟཱ་ཧཾ ཝཱི་ཏི་ནཱ་མེ་ཏྭཱ ཨ་ཏྟ་ནཱ ས་ཧ པ་བྦ་ཛི་ཏཱ་ནཾ བྷི་ཀྑཱུ་ནཾ ཀོ་ཊི་ས་ཏ་ས་ཧ་སྶཱ་ནཾ ཙ་ཏུ་ས་ཙྩ་པ་ཊི་ཝེ་དྷ་ས་མ་ཏྠ་ཏཾ དི་སྭཱ ཨ་ནི་ལ་པ་ཐེ་ན ག་ནྟྭཱ ག་ཡཱ་མི་ག་དཱ་ཡེ ཨོ་ཏ་རི་ཏྭཱ ཏེ་སཾ དྷ་མྨ་ཙ་ཀྐཾ པ་ཝ་ཏྟེ་སི, ཏ་དཱ ཀོ་ཊི་ས་ཏ་ས་ཧ་སྶཱ་ནཾ པ་ཋ་མོ ཨ་བྷི་ས་མ་ཡོ ཨ་ཧོ་སི. ཏེ་ན ཝུ་ཏྟཾ –
༢. ‘‘སོ་པི པ་ཏྭཱ་ན ས་མྦོ་དྷིཾ, ས་ནྟཱ་རེ་ནྟོ ས་དེ་ཝ་ཀཾ;
ཨ་བྷི་ཝ་སྶི དྷ་མྨ་མེ་གྷེ་ན, ནི་བྦཱ་པེ་ནྟོ ས་དེ་ཝ་ཀཾ.
༣. ‘‘ཏ་སྶཱ་པི ཨ་ཏུ་ལ་ཏེ་ཛ་སྶ, ཨ་ཧེ་སུཾ ཨ་བྷི་ས་མ་ཡཱ ཏ་ཡོ;
ཀོ་ཊི་ས་ཏ་ས་ཧ་སྶཱ་ནཾ, པ་ཋ་མཱ་བྷི་ས་མ་ཡོ ཨ་ཧཱུ’’ཏི.
ཏ་ཏྠ ས་དེ་ཝ་ཀནྟི ས་དེ་ཝ་ཀཾ ལོ་ཀཾ. དྷ་མྨ་མེ་གྷེ་ནཱཏི དྷ་མྨ་ཀ་ཐཱ་མེ་གྷ་ཝ་སྶེ་ན. པུ་ན བྷཱི་མ་ར་ཐ་ན་ག་རེ བྷཱི་མ་ར་ཐེ་ན ནཱ་མ ར་ཉྙཱ ནི་མ་ནྟི་ཏོ ན་ག་ར་མ་ཛ྄ཛྷེ ཀ་ཏེ ས་ནྠཱ་གཱ་རེ ནི་སི་ནྣོ ཀ་ར་ཝཱི་ཀ་རུ་ཏ་མ་ཉྫུ་ནཱ ས་ཝ་ན་སུ་ཁེ་ན པ་ར་མ་མ་དྷུ་རེ་ན པ་ཎྜི་ཏ་ཛ་ན་ཧ་ད་ཡ་ངྒ་མེ་ན ཨ་མ་ཏཱ་བྷི་སེ་ཀ་ས་དི་སེ་ན བྲ་ཧྨ་སྶ་རེ་ན ད་ས དི་སཱ པ་རི་པཱུ་རེ་ནྟོ དྷ་མྨཱ་མ་ཏ་དུ་ནྡུ་བྷི་མཱ་ཧ་ནི, ཏ་དཱ ན་ཝུ་ཏི་ཀོ་ཊཱི་ནཾ དུ་ཏི་ཡོ ཨ་བྷི་ས་མ་ཡོ ཨ་ཧོ་སི. ཏེ་ན ཝུ་ཏྟཾ –
༤. ‘‘པུ་ནཱ་པ་རཾ བྷཱི་མ་ར་ཐེ, ཡ་དཱ ཨཱ་ཧ་ནི དུ་ནྡུ་བྷིཾ;
ཏ་དཱ ན་ཝུ་ཏི་ཀོ་ཊཱི་ནཾ, དུ་ཏི་ཡཱ་བྷི་ས་མ་ཡོ ཨ་ཧཱུ’’ཏི.
ཡ་དཱ པ་ན ཝེ་བྷཱ་ར་ན་ག་རེ ཉཱ་ཏི་ས་མཱ་ག་མེ བུ་དྡྷ་ཝཾ་སཾ དེ་སེ་ནྟོ ན་ཝུ་ཏི་ཀོ་ཊཱི་ནཾ དྷ་མྨ་ཙ་ཀྑུཾ ཨུ་པྤཱ་དེ་སི, སོ ཏ་ཏི་ཡོ ཨ་བྷི་ས་མ་ཡོ ཨ་ཧོ་སི. ཏེ་ན ཝུ་ཏྟཾ –
༥. ‘‘ཡ་དཱ བུ་དྡྷོ དྷ་མྨཾ དེ་སེ་སི, ཝེ་བྷཱ་རེ སོ པུ་རུ་ཏྟ་མེ;
ཏ་དཱ ན་ཝུ་ཏི་ཀོ་ཊཱི་ནཾ, ཏ་ཏི་ཡཱ་བྷི་ས་མ་ཡོ ཨ་ཧཱུ’’ཏི.
ཨ་མ་ར་རུ་ཙི་ར་ད་སྶ་ནེ ཨ་མ་ར་ན་ག་རེ ནཱ་མ ས་མྦ་ལོ ཙ སུ་མི་ཏྟོ ཙ དྭེ བྷཱ་ཏ་རོ ར་ཛྫཾ ཀཱ་རེ་སུཾ. ཨ་ཐ སི་དྡྷ་ཏྠོ ས་ཏྠཱ ཏེ་སཾ རཱ་ཛཱུ་ནཾ ཨུ་པ་ནི་སྶ་ཡ་ས་མྤ་ཏྟིཾ དི་སྭཱ ག་ག་ན་ཏ་ལེ་ན ག་ནྟྭཱ ཨ་མ་ར་ན་ག་ར་མ་ཛ྄ཛྷེ ཨོ་ཏ་རི་ཏྭཱ ཙ་ཀྐཱ་ལ་ངྐ་ཏ་ཏ་ལེ་ཧི ཙ་ར་ཎེ་ཧི པ་ཐ་ཝི་ཏ་ལཾ མ་དྡ་ནྟོ ཝི་ཡ པ་ད་ཙེ་ཏི་ཡཱ་ནི ད་སྶེ་ཏྭཱ ཨ་མ་རུ་ཡྻཱ་ནཾ ག་ནྟྭཱ པ་ར་མ་ར་མ་ཎཱི་ཡེ ཨ་ཏྟ་ནོ ཀ་རུ་ཎཱ་སཱི་ཏ་ལེ སི་ལཱ་ཏ་ལེ ནི་སཱི་དི. ཏ་ཏོ དྭེ་པི བྷཱ་ཏི་ཀ་རཱ་ཛཱ་ནོ ད་ས་བ་ལ་སྶ པ་ད་ཙེ་ཏི་ཡཱ་ནི དི་སྭཱ པ་དཱ་ནི ཨ་ནུ་ག་ནྟྭཱ སི་དྡྷ་ཏྠཾ ཨ་དྷི་ག་ཏ་པ་ར་མ་ཏྠཾ ས་ཏྠཱ་རཾ ས་བྦ་ལོ་ཀ་ནེ་ཏཱ་རཾ ས་པ་རི་ཝཱ་རཾ ཨུ་པ་ས་ངྐ་མི་ཏྭཱ ཨ་བྷི་ཝཱ་དེ་ཏྭཱ བྷ་ག་ཝ་ནྟཾ པ་རི་ཝཱ་རེ་ཏྭཱ ནི་སཱི་དིཾ་སུ. ཏེ་སཾ བྷ་ག་ཝཱ ཨ་ཛ྄ཛྷཱ་ས་ཡཱ་ནུ་རཱུ་པཾ དྷ་མྨཾ དེ་སེ་སི. ཏ་སྶ ཏེ དྷ་མྨ་ཀ་ཐཾ སུ་ཏྭཱ ས་ཉྫཱ་ཏ་ས་དྡྷཱ ཧུ་ཏྭཱ ས་བྦེ་ཝ པ་བྦ་ཛི་ཏྭཱ ཨ་ར་ཧ་ཏྟཾ པཱ་པུ་ཎིཾ་སུ. ཏེ་སཾ ཀོ་ཊི་ས་ཏཱ་ནཾ ཁཱི་ཎཱ་ས་ཝཱ་ནཾ མ་ཛ྄ཛྷེ བྷ་ག་ཝཱ པཱ་ཏི་མོ་ཀྑཾ ཨུ་དྡི་སི, སོ པ་ཋ་མོ ས་ནྣི་པཱ་ཏོ ཨ་ཧོ་སི. ཝེ་བྷཱ་ར་ན་ག་རེ ཉཱ་ཏི་ས་མཱ་ག་མེ པ་བྦ་ཛི་ཏཱ་ནཾ ན་ཝུ་ཏི་ཀོ་ཊཱི་ནཾ མ་ཛ྄ཛྷེ པཱ་ཏི་མོ་ཀྑཾ ཨུ་དྡི་སི, སོ དུ་ཏི་ཡོ ས་ནྣི་པཱ་ཏོ ཨ་ཧོ་སི. སུ་ད་སྶ་ན་ཝི་ཧཱ་རེ ས་ནྣི་པ་ཏི་ཏཱ་ནཾ ཨ་སཱི་ཏི་ཀོ་ཊཱི་ནཾ མ་ཛ྄ཛྷེ པཱ་ཏི་མོ་ཀྑཾ ཨུ་དྡི་སི, སོ ཏ་ཏི་ཡོ ས་ནྣི་པཱ་ཏོ ཨ་ཧོ་སི. ཏེ་ན ཝུ་ཏྟཾ –
༦. ‘‘ས་ནྣི་པཱ་ཏཱ ཏ་ཡོ ཨཱ་སུཾ, ཏ་སྨི་མྤི དྭི་པ་དུ་ཏྟ་མེ;
ཁཱི་ཎཱ་ས་ཝཱ་ནཾ ཝི་མ་ལཱ་ནཾ, ས་ནྟ་ཙི་ཏྟཱ་ན ཏཱ་དི་ནཾ.
༧. ‘‘ཀོ་ཊི་ས་ཏཱ་ནཾ ན་ཝུ་ཏཱི་ནཾ, ཨ་སཱི་ཏི་ཡཱ་པི ཙ ཀོ་ཊི་ནཾ;
ཨེ་ཏེ ཨཱ་སུཾ ཏ་ཡོ ཋཱ་ནཱ, ཝི་མ་ལཱ་ནཾ ས་མཱ་ག་མེ’’ཏི.
ཏ་ཏྠ ན་ཝུ་ཏཱི་ནཾ, ཨ་སཱི་ཏི་ཡཱ་པི ཙ ཀོ་ཊི་ནནྟི ན་ཝུ་ཏཱི་ནཾ ཀོ་ཊཱི་ནཾ ཨ་སཱི་ཏི་ཡཱ་པི ཙ ཀོ་ཊཱི་ནཾ ས་ནྣི་པཱ་ཏཱ ཨ་ཧེ་སུ་ནྟི ཨ་ཏྠོ. ཨེ་ཏེ ཨཱ་སུཾ ཏ་ཡོ ཋཱ་ནཱཏི ཨེ་ཏཱ་ནི ཏཱི་ཎི ས་ནྣི་པཱ་ཏ་ཊྛཱ་ནཱ་ནི ཨ་ཧེ་སུ་ནྟི ཨ་ཏྠོ. ‘‘ཋཱ་ནཱ་ནེ ཏཱ་ནི ཏཱི་ཎི ཨ་ཧེ་སུ’’ནྟི་པི པཱ་ཋོ.
ཏ་དཱ ཨ་མྷཱ་ཀཾ བོ་དྷི་ས་ཏྟོ སུ་ར་སེ་ན་ན་ག་རེ མ་ངྒ་ལོ ནཱ་མ བྲཱ་ཧྨ་ཎོ ཧུ་ཏྭཱ ཝེ་ད་ཝེ་ད་ངྒཱ་ནཾ པཱ་རཾ ག་ནྟྭཱ ཨ་ནེ་ཀ་ཀོ་ཊི་ས་ངྑཾ དྷ་ན་ས་ནྣི་ཙ་ཡཾ དཱི་ནཱ་ནཱ་ཐཱ་དཱི་ནཾ པ་རི་ཙྩ་ཛི་ཏྭཱ ཝི་ཝེ་ཀཱ་རཱ་མོ ཧུ་ཏྭཱ ཏཱ་པ་ས་པ་བྦ་ཛྫཾ པ་བྦ་ཛི་ཏྭཱ ཛྷཱ་ནཱ་བྷི་ཉྙཱ་ཡོ ནི་བྦ་ཏྟེ་ཏྭཱ ཝི་ཧ་ར་ནྟོ – ‘‘སི་དྡྷ་ཏྠོ ནཱ་མ བུ་དྡྷོ ལོ་ཀེ ཨུ་པྤ་ནྣོ’’ཏི སུ་ཏྭཱ ཏཾ ཨུ་པ་ས་ངྐ་མི་ཏྭཱ ཝ་ནྡི་ཏྭཱ ཏ་སྶ དྷ་མྨ་ཀ་ཐཾ སུ་ཏྭཱ ཡཱ་ཡ ཛ་མྦུ་ཡཱ ཨ་ཡཾ ཛ་མྦུ་དཱི་པོ པ་ཉྙཱ་ཡ་ཏི, ཨི་དྡྷི་ཡཱ ཏཾ ཛ་མྦུཾ ཨུ་པ་ས་ངྐ་མི་ཏྭཱ ཏ་ཏོ ཕ་ལཾ ཨཱ་ཧ་རི་ཏྭཱ ན་ཝུ་ཏི་ཀོ་ཊི་བྷི་ཀྑུ་པ་རི་ཝཱ་རཾ སི་དྡྷ་ཏྠཾ ས་ཏྠཱ་རཾ སུ་ར་སེ་ན་ཝི་ཧཱ་རེ ནི་སཱི་དཱ་པེ་ཏྭཱ ཛ་མྦུ་ཕ་ལེ་ཧི ས་ནྟ་པྤེ་སི ས་མྤ་ཝཱ་རེ་སི. ཨ་ཐ ས་ཏྠཱ ཏཾ ཕ་ལཾ པ་རི་བྷུ་ཉྫི་ཏྭཱ – ‘‘ཨི་ཏོ ཙ་ཏུ་ན་ཝུ་ཏི་ཀ་པྤ་མ་ཏྠ་ཀེ གོ་ཏ་མོ ནཱ་མ བུ་དྡྷོ བྷ་ཝི་སྶ་ཏཱི’’ཏི བྱཱ་ཀཱ་སི. ཏེ་ན ཝུ་ཏྟཾ –
༨. ‘‘ཨ་ཧཾ ཏེ་ན ས་མ་ཡེ་ན, མ་ངྒ་ལོ ནཱ་མ ཏཱ་པ་སོ;
ཨུ་གྒ་ཏེ་ཛོ དུ་པྤ་ས་ཧོ, ཨ་བྷི་ཉྙཱ་བ་ལ་ས་མཱ་ཧི་ཏོ.
༩. ‘‘ཛ་མྦུ་ཏོ ཕ་ལ་མཱ་ནེ་ཏྭཱ, སི་དྡྷ་ཏྠ་སྶ ཨ་དཱ་ས་ཧཾ;
པ་ཊི་གྒ་ཧེ་ཏྭཱ ས་མྦུ་དྡྷོ, ཨི་དཾ ཝ་ཙ་ན་མ་བྲ་ཝི.
༡༠. ‘‘པ་སྶ་ཐ ཨི་མཾ ཏཱ་པ་སཾ, ཛ་ཊི་ལཾ ཨུ་གྒ་ཏཱ་པ་ནཾ;
ཙ་ཏུ་ན་ཝུ་ཏི་ཏོ ཀ་པྤེ, ཨ་ཡཾ བུ་དྡྷོ བྷ་ཝི་སྶ་ཏི.
༡༡. ‘‘པ་དྷཱ་ནཾ པ་ད་ཧི་ཏྭཱ་ན…པེ… ཧེ་སྶཱ་མ ས་མྨུ་ཁཱ ཨི་མཾ.
༡༢. ‘‘ཏ་སྶཱ་པི ཝ་ཙ་ནཾ སུ་ཏྭཱ, བྷི་ཡྻོ ཙི་ཏྟཾ པ་སཱ་ད་ཡིཾ;
ཨུ་ཏྟ་རིཾ ཝ་ཏ་མ་དྷི་ཊྛཱ་སིཾ, ད་ས་པཱ་ར་མི་པཱུ་རི་ཡཱ’’ཏི.
ཏ་ཏྠ དུ་པྤ་ས་ཧོཏི དུ་རཱ་ས་དོ. ཨ་ཡ་མེ་ཝ ཝཱ པཱ་ཋོ. ཏ་སྶ པ་ན བྷ་ག་ཝ་ཏོ ན་ག་རཾ ཝེ་བྷཱ་རཾ ནཱ་མ ཨ་ཧོ་སི. ཨུ་དེ་ནོ ནཱ་མ རཱ་ཛཱ པི་ཏཱ, ཛ་ཡ་སེ་ནོ་ཏི་པི ཏ་སྶེ་ཝ ནཱ་མཾ, སུ་ཕ་སྶཱ ནཱ་མ མཱ་ཏཱ, ས་མྦ་ལོ ཙ སུ་མི་ཏྟོ ཙ དྭེ ཨ་གྒ་སཱ་ཝ་ཀཱ, རེ་ཝ་ཏོ ནཱ་མུ་པ་ཊྛཱ་ཀོ, སཱི་ཝ་ལཱ ཙ སུ་རཱ་མཱ ཙ དྭེ ཨ་གྒ་སཱ་ཝི་ཀཱ, ཀ་ཎི་ཀཱ་ར་རུ་ཀྑོ བོ་དྷི, ས་རཱི་རཾ ས་ཊྛི་ཧ་ཏྠུ་བྦེ་དྷཾ ཨ་ཧོ་སི. ཝ་སྶ་ས་ཏ་ས་ཧ་སྶཾ ཨཱ་ཡུ, སོ་མ་ན་སྶཱ ནཱ་མ ཨ་གྒ་མ་ཧེ་སཱི ཨ་ཧོ་སི, ཨ་ནུ་པ་མོ ནཱ་མ པུ་ཏྟོ, སུ་ཝ་ཎྞ་སི་ཝི་ཀཱ་ཡ ནི་ཀྑ་མི. ཏེ་ན ཝུ་ཏྟཾ –
༡༣. ‘‘ཝེ་བྷཱ་རཾ ནཱ་མ ན་ག་རཾ, ཨུ་དེ་ནོ ནཱ་མ ཁ་ཏྟི་ཡོ;
སུ་ཕ་སྶཱ ནཱ་མ ཛ་ནི་ཀཱ, སི་དྡྷི་ཏྠ་སྶ མ་ཧེ་སི་ནོ.
༡༨. ‘‘ས་མྦ་ལོ ཙ སུ་མི་ཏྟོ ཙ, ཨ་ཧེ་སུཾ ཨ་གྒ་སཱ་ཝ་ཀཱ;
རེ་ཝ་ཏོ ནཱ་མུ་པ་ཊྛཱ་ཀོ, སི་དྡྷ་ཏྠ་སྶ མ་ཧེ་སི་ནོ.
༡༩. ‘‘སཱི་ཝ་ལཱ ཙ སུ་རཱ་མཱ ཙ, ཨ་ཧེ་སུཾ ཨ་གྒ་སཱ་ཝི་ཀཱ;
བོ་དྷི ཏ་སྶ བྷ་ག་ཝ་ཏོ, ཀ་ཎི་ཀཱ་རོ་ཏི ཝུ་ཙྩ་ཏི.
༢༡. ‘‘སོ བུ་དྡྷོ ས་ཊྛི་ར་ཏ་ནཾ, ཨ་ཧོ་སི ན་བྷ་མུ་གྒ་ཏོ;
ཀ་ཉྩ་ན་གྒྷི་ཡ་ས་ངྐཱ་སོ, ད་ས་ས་ཧ་སྶཱི ཝི་རོ་ཙ་ཏི.
༢༢. ‘‘སོ་པི བུ་དྡྷོ ཨ་ས་མ་ས་མོ, ཨ་ཏུ་ལོ ཨ་པྤ་ཊི་པུ་གྒ་ལོ;
ཝ་སྶ་ས་ཏ་ས་ཧ་སྶཱ་ནི, ལོ་ཀེ ཨ་ཊྛཱ་སི ཙ་ཀྑུ་མཱ.
༢༣. ‘‘ཝི་པུ་ལཾ པ་བྷཾ ད་སྶ་ཡི་ཏྭཱ, པུ་པྥཱ་པེ་ཏྭཱ་ན སཱ་ཝ་ཀེ;
ཝི་ལཱ་སེ་ཏྭཱ ས་མཱ་པ་ཏྱཱ, ནི་བྦུ་ཏོ སོ ས་སཱ་ཝ་ཀོ’’ཏི.
ཏ་ཏྠ ས་ཊྛི་ར་ཏ་ནནྟི ས་ཊྛི་ར་ཏ་ན་པྤ་མཱ་ཎཾ ན་བྷཾ ཨུ་གྒ་ཏོ་ཏི ཨ་ཏྠོ. ཀ་ཉྩ་ན་གྒྷི་ཡ་ས་ངྐཱ་སོཏི ནཱ་ནཱ་ར་ཏ་ན་ཝི་ཙི་ཏྟ་ཀ་ན་ཀ་མ་ཡ་ཨ་གྒྷི་ཡ་ས་དི་ས་ད་སྶ་ནོ་ཏི ཨ་ཏྠོ. ད་ས་ས་ཧ་སྶཱི ཝི་རོ་ཙ་ཏཱིཏི ད་ས་ས་ཧ་སྶི་ཡཾ ཝི་རོ་ཙ་ཏི. ཝི་པུ་ལནྟི ཨུ་ལཱ༹་རཾ ཨོ་བྷཱ་སཾ. པུ་པྥཱ་པེ་ཏྭཱ་ནཱཏི ཛྷཱ་ནཱ་བྷི་ཉྙཱ་མ་གྒ་ཕ་ལ་ས་མཱ་པ་ཏྟི་པུ་པྥེ་ཧི པུ་པྥི་ཏེ པ་ར་མ་སོ་བྷ་གྒ་པྤ་ཏྟེ ཀ་ཏྭཱ་ཏི ཨ་ཏྠོ. ཝི་ལཱ་སེ་ཏྭཱཏི ཝི་ལཱ་ས་ཡི་ཏྭཱ ཀཱི་ལི༹་ཏྭཱ. ས་མཱ་པ་ཏྱཱཏི ལོ་ཀི་ཡ་ལོ་ཀུ་ཏྟ་རཱ་ཧི ས་མཱ་པ་ཏྟཱི་ཧི ཨ་བྷི་ཉྙཱ་ཧི ཙ. ནི་བྦུ་ཏོཏི ཨ་ནུ་པཱ་དཱ་པ་རི་ནི་བྦཱ་ནེ་ན ནི་བྦུ་ཏོ.
སི་དྡྷ་ཏྠོ ཀི་ར ས་ཏྠཱ ཀ་ཉྩ་ན་ཝེ་ལུ༹་ན་ག་རེ ཨ་ནོ་མུ་ཡྻཱ་ནེ པ་རི་ནི་བྦཱ་ཡི. ཏ་ཏྠེ་ཝ་སྶ ར་ཏ་ན་མ་ཡཾ ཙ་ཏུ་ཡོ་ཛ་ནུ་བྦེ་དྷཾ ཙེ་ཏི་ཡ་མ་ཀཾ་སཱུ་ཏི. སེ་ས་གཱ་ཐཱ་སུ ས་བྦ་ཏྠ པཱ་ཀ་ཊ་མེ་ཝཱ་ཏི.
སི་དྡྷ་ཏྠ་བུ་དྡྷ་ཝཾ་ས་ཝ་ཎྞ་ནཱ ནི་ཊྛི་ཏཱ.
ནི་ཊྛི་ཏོ སོ་ལ༹་ས་མོ བུ་དྡྷ་ཝཾ་སོ.