༡༧. དྷ་མྨ་ད་སྶཱི་བུ་དྡྷ་ཝཾ་ས་ཝ་ཎྞ་ནཱ
ཨ་ཏྠ་ད་སྶི་མྷི ས་མྨཱ་ས་མྦུ་དྡྷེ པ་རི་ནི་བྦུ་ཏེ ཨ་ནྟ་ར་ཀ་པྤེ ཙ ཝཱི་ཏི་ཝ་ཏྟེ ཨ་པ་རི་མི་ཏཱ་ཡུ་ཀེ་སུ ས་ཏྟེ་སུ ཨ་ནུ་པུ་བྦེ་ན པ་རི་ཧཱ་ཡི་ཏྭཱ ཝ་སྶ་ས་ཏ་ས་ཧ་སྶཱ་ཡུ་ཀེ་སུ ཛཱ་ཏེ་སུ དྷ་མྨ་ད་སྶཱི ནཱ་མ ས་ཏྠཱ ལོ་ཀཱ་ལོ་ཀ་ཀ་རོ ལོ་བྷཱ་དི་ལོ་ཀ་མ་ལ་ཝི་ན་ཡ་ཀ་རོ ལོ་ཀེ་ཀ་ནཱ་ཡ་ཀོ ལོ་ཀེ ཨུ་ད་པཱ་དི. སོ་པི བྷ་ག་ཝཱ པཱ་ར་མི་ཡོ པཱུ་རེ་ཏྭཱ ཏུ་སི་ཏ་པུ་རེ ནི་བྦ་ཏྟི་ཏྭཱ ཏ་ཏོ ཙ་ཝི་ཏྭཱ ས་ར་ཎ་ན་ག་རེ ས་བྦ་ལོ་ཀ་ས་ར་ཎ་སྶ ས་ར་ཎ་སྶ ནཱ་མ ར་ཉྙོ ཨ་གྒ་མ་ཧེ་སི་ཡཱ སུ་ན་ནྡཱ་ཡ ནཱ་མ དེ་ཝི་ཡཱ ཀུ་ཙྪི་སྨིཾ པ་ཊི་ས་ནྡྷིཾ ཨ་གྒ་ཧེ་སི. སོ ད་ས་ནྣཾ མཱ་སཱ་ནཾ ཨ་ཙྩ་ཡེ་ན ས་ར་ཎུ་ཡྻཱ་ནེ མཱ་ཏུ་ཀུ་ཙྪི་ཏོ པཱ་ཝུ་སྶ་ཀཱ་ལེ ས་ལི་ལ་དྷ་ར་ཝི་ཝ་ར་ག་ཏོ པུ་ཎྞ་ཙ་ནྡོ ཝི་ཡ ནི་ཀྑ་མི. མ་ཧཱ་པུ་རི་སེ པ་ན མཱ་ཏུ་ཀུ་ཙྪི་ཏོ ནི་ཀྑ་ནྟ་མ་ཏྟེ་ཡེ་ཝ ཨ་དྷི་ཀ་ར་ཎ་ཝོ་ཧཱ་ར་ས་ཏྠ་པོ་ཏྠ་ཀེ་སུ ཨ་དྷ་མྨི་ཡཱ ཝོ་ཧཱ་རཱ ས་ཡ་མེ་ཝ ཨ་ནྟ་ར་དྷཱ་ཡིཾ་སུ. དྷ་མྨི་ཀ་ཝོ་ཧཱ་རཱ་ཡེ་ཝ ཨ་ཊྛཾ་སུ. ཏེ་ན་སྶ ནཱ་མ་གྒ་ཧ་ཎ་དི་ཝ་སེ ‘‘དྷ་མྨ་ད་སྶཱི’’ཏི ནཱ་མ་མ་ཀཾ་སུ. སོ ཨ་ཊྛ་ཝ་སྶ་ས་ཧ་སྶཱ་ནི ཨ་གཱ་རཾ ཨ་ཛ྄ཛྷཱ་ཝ་སི. ཏ་སྶ ཀི་ར ཨ་ར་ཛ-ཝི་ར་ཛ-སུ་ད་སྶ་ན་ནཱ་མ་ཀཱ ཏ་ཡོ པཱ་སཱ་དཱ ཨ་ཧེ་སུཾ. ཝི་ཙི་ཀོ་ལི༹་དེ་ཝི་པྤ་མུ་ཁཱ་ནཾ ཨི་ཏྠཱི་ནཾ ཝཱི་ས་ཏི་ས་ཧ་སྶཱ་དྷི་ཀཾ ས་ཏ་ས་ཧ་སྶཾ ཨ་ཧོ་སི.
སོ ཙ་ཏྟཱ་རི ནི་མི་ཏྟཱ་ནི དི་སྭཱ ཝི་ཙི་ཀོ་ལི༹་དེ་ཝི་ཡཱ པུ་ཉྙ་ཝ་ཌྜྷ་ནེ ནཱ་མ པུ་ཏྟེ ཨུ་པྤ་ནྣེ དེ་ཝ་ཀུ་མཱ་རོ ཝི་ཡ ཨ་ཏི་ཝི་ཡ སུ་ཁུ་མཱ་ལོ དེ་ཝ་ས་མྤ་ཏྟི་མི་ཝ ས་མྤ་ཏྟི་མ་ནུ་བྷ་ཝ་མཱ་ནོ མ་ཛ྄ཛྷི་མ་ཡཱ་མེ ཝུ་ཊྛཱ་ཡ སི་རི་ས་ཡ་ནེ ནི་སི་ནྣོ ནི་དྡོ་པ་ག་ཏཱ་ནཾ ཨི་ཏྠཱི་ནཾ ཝི་པྤ་ཀཱ་རཾ དི་སྭཱ ས་ཉྫཱ་ཏ་སཾ་ཝེ་གོ མ་ཧཱ་བྷི་ནི་ཀྑ་མ་ནཱ་ཡ ཙི་ཏྟཾ ཨུ་པྤཱ་དེ་སི. ཙི་ཏྟུ་པྤཱ་ད་ས་མ་ན་ནྟ་ར་མེ་ཝ་སྶ སུ་ད་སྶ་ན་པཱ་སཱ་དོ ག་ག་ན་ཏ་ལ་མ་བྦྷུ་གྒ་ནྟྭཱ ཙ་ཏུ་ར་ངྒི་ནི་ཡཱ སེ་ནཱ་ཡ པ་རི་ཝུ་ཏོ དུ་ཏི་ཡོ དི་ཝ་ས་ཀ་རོ ཝི་ཡ དི་བྦ་ཝི་མཱ་ནཾ ཝི་ཡ ཙ ག་ནྟྭཱ ར་ཏྟ་ཀུ་ར་ཝ་ཀ་ཏ་རུ་བོ་དྷི་ས་མཱི་པེ་ཡེ་ཝ ཨོ་ཏ་རི་ཏྭཱ ཨ་ཊྛཱ་སི. མ་ཧཱ་པུ་རི་སོ ཀི་ར བྲ་ཧྨུ་ནཱ ཨུ་པ་ནཱི་ཏཱ་ནི ཀཱ་སཱ་ཡཱ་ནི ག་ཧེ་ཏྭཱ པ་བྦ་ཛི་ཏྭཱ པཱ་སཱ་ད་ཏོ ཨོ་ཏ་རི་ཏྭཱ ཨ་ཝི་དཱུ་རེ ཨ་ཊྛཱ་སི. པཱ་སཱ་དོ པུ་ན ཨཱ་ཀཱ་སེ་ན ག་ནྟྭཱ བོ་དྷི་རུ་ཀྑཾ ཨ་ནྟོ་ཀ་ཏྭཱ པ་ཐ་ཝི་ཡཾ པ་ཏི་ཊྛཱ་སི. ཨི་ཏྠི་ཡོ་པི ས་པ་རི་ཝཱ་རཱ པཱ་སཱ་ད་ཏོ ཨོ་ཏ་རི་ཏྭཱ ཨ་ཌྜྷ་གཱ་ཝུ་ཏ་མ་ཏྟཾ ག་ནྟྭཱ ཨ་ཊྛཾ་སུ. ཏ་ཏྠ ཨི་ཏྠི་ཡོ ཙ ཏཱ་སཾ པ་རི་ཙཱ་རི་ཀཱ ཙེ་ཊི་ཀཱ་ཡོ ཙ ཋ་པེ་ཏྭཱ ས་བྦེ མ་ནུ་སྶཱ ཏཾ ཨ་ནུ་པ་བྦ་ཛིཾ་སུ. བྷི་ཀྑཱུ་ནཾ ཀོ་ཊི་ས་ཏ་ས་ཧ་སྶཾ ཨ་ཧོ་སི.
ཨ་ཐ དྷ་མྨ་ད་སྶཱི བོ་དྷི་ས་ཏྟོ ས་ཏྟཱ་ཧཾ པ་དྷཱ་ན་ཙ་རི་ཡཾ ཙ་རི་ཏྭཱ ཝི་ཙི་ཀོ་ལི༹་དེ་ཝི་ཡཱ དི་ནྣཾ མ་དྷུ་པཱ་ཡཱ་སཾ པ་རི་བྷུ་ཉྫི་ཏྭཱ བ་ད་ར་ཝ་ནེ དི་ཝཱ་ཝི་ཧཱ་རཾ ཀ་ཏྭཱ སཱ་ཡ་ནྷ་ས་མ་ཡེ སི་རི་ཝ་ཌྜྷ་ནེ་ན ནཱ་མ ཡ་ཝ་པཱ་ལ་ཀེ་ན དི་ནྣཱ ཨ་ཊྛ ཏི་ཎ་མུ་ཊྛི་ཡོ ག་ཧེ་ཏྭཱ བི་མྦི་ཛཱ་ལ་བོ་དྷིཾ ཨུ་པ་ག་ནྟྭཱ ཏེ་པ་ཎྞཱ་ས་ཧ་ཏྠ་ཝི་ཏྠ་ཏཾ ཏི་ཎ་ས་ནྠ་རཾ ས་ནྠ་རི་ཏྭཱ ཏ་ཏྠ ས་བྦ་ཉྙུ་ཏ་ཉྙཱ་ཎཾ པ་ཊི་ཝི་ཛ྄ཛྷི་ཏྭཱ – ‘‘ཨ་ནེ་ཀ་ཛཱ་ཏི་སཾ་སཱ་རཾ…པེ… ཏ་ཎྷཱ་ནཾ ཁ་ཡ་མ་ཛ྄ཛྷ་གཱ’’ཏི ཨུ་དཱ་ནཾ ཨུ་དཱ་ནེ་ཏྭཱ་ཝ བོ་དྷི་ས་མཱི་པེ ས་ཏྟ་ས་ཏྟཱ་ཧཾ ཝཱི་ཏི་ནཱ་མེ་ཏྭཱ ཀ་ཏ་བྲ་ཧྨ་ཡཱ་ཙ་ནོ ཨ་ཏྟ་ནཱ ས་དྡྷིཾ པ་བྦ་ཛི་ཏ་སྶ བྷི་ཀྑཱུ་ནཾ ཀོ་ཊི་ས་ཏ་ས་ཧ་སྶ་སྶ ས་དྡྷ་མྨ་པྤ་ཊི་ཝེ་དྷ་ས་མ་ཏྠ་ཏཾ ཉ་ཏྭཱ ཨ་ཊྛཱ་ར་ས་ཡོ་ཛ་ནི་ཀ་མ་གྒཾ ཨེ་ཀཱ་ཧེ་ནེ་ཝ ཨི་སི་པ་ཏ་ནཾ ག་ནྟྭཱ ཏེ་ཧི པ་རི་ཝུ་ཏོ ཏ་ཏྠ དྷ་མྨ་ཙ་ཀྐཾ པ་ཝ་ཏྟེ་སི, ཏ་དཱ ཀོ་ཊི་ས་ཏ་ས་ཧ་སྶཱ་ནཾ པ་ཋ་མཱ་བྷི་ས་མ་ཡོ ཨ་ཧོ་སི. ཏེ་ན ཝུ་ཏྟཾ –
༡. ‘‘ཏ་ཏྠེ་ཝ མ་ཎྜ་ཀ་པྤ་མྷི, དྷ་མྨ་ད་སྶཱི མ་ཧཱ་ཡ་སོ;
ཏ་མ་ནྡྷ་ཀཱ་རཾ ཝི་དྷ་མི་ཏྭཱ, ཨ་ཏི་རོ་ཙ་ཏི ས་དེ་ཝ་ཀེ.
༢. ‘‘ཏ་སྶཱ་པི ཨ་ཏུ་ལ་ཏེ་ཛ་སྶ, དྷ་མྨ་ཙ་ཀྐ་པྤ་ཝ་ཏྟ་ནེ;
ཀོ་ཊི་ས་ཏ་ས་ཧ་སྶཱ་ནཾ, པ་ཋ་མཱ་བྷི་ས་མ་ཡོ ཨ་ཧཱུ’’ཏི.
ཏ་ཏྠ ཏ་མ་ནྡྷ་ཀཱ་རནྟི ཏ་མ་ས་ངྑཱ་ཏཾ མོ་ཧ་ནྡྷ་ཀཱ་ར་ནྟི ཨ་ཏྠོ.
ཡ་དཱ པ་ན ཏ་ག་ར་ནཱ་མ་ཀེ ན་ག་རེ ས་ཉྫ་ཡོ ནཱ་མ རཱ་ཛཱ ཀཱ་མེ་སུ ཨཱ་དཱི་ན་ཝཾ ནེ་ཀྑ་མྨཾ ཁེ་མ་ཏོ ཙ དི་སྭཱ ཨི་སི་པ་བྦ་ཛྫཾ པ་བྦ་ཛི. ཏཾ ན་ཝུ་ཏི་ཀོ་ཊི་ཡོ ཨ་ནུ་པ་བྦ་ཛིཾ་སུ. ཏེ ས་བྦེ་ཡེ་ཝ པ་ཉྩཱ་བྷི་ཉྙཱ་ཨ་ཊྛ་ས་མཱ་པ་ཏྟི་ལཱ་བྷི་ནོ ཨ་ཧེ་སུཾ. ཨ་ཐ ས་ཏྠཱ དྷ་མྨ་ད་སྶཱི ཏེ་སཾ ཨུ་པ་ནི་སྶ་ཡ་ས་མྤ་ཏྟིཾ དི་སྭཱ ཨཱ་ཀཱ་སེ་ན ག་ནྟྭཱ ས་ཉྫ་ཡ་སྶ ཏཱ་པ་ས་སྶ ཨ་སྶ་མ་པ་དཾ ག་ནྟྭཱ ཨཱ་ཀཱ་སེ ཋ་ཏྭཱ ཏེ་སཾ ཏཱ་པ་སཱ་ནཾ ཨ་ཛ྄ཛྷཱ་ས་ཡཱ་ནུ་རཱུ་པཾ དྷ་མྨཾ དེ་སེ་ཏྭཱ དྷ་མྨ་ཙ་ཀྑུཾ ཨུ་པྤཱ་དེ་སི, སོ དུ་ཏི་ཡོ ཨ་བྷི་ས་མ་ཡོ ཨ་ཧོ་སི. ཏེ་ན ཝུ་ཏྟཾ –
༣. ‘‘ཡ་དཱ བུ་དྡྷོ དྷ་མྨ་ད་སྶཱི, ཝི་ནེ་སི ས་ཉྫ་ཡཾ ཨི་སིཾ;
ཏ་དཱ ན་ཝུ་ཏི་ཀོ་ཊཱི་ནཾ, དུ་ཏི་ཡཱ་བྷི་ས་མ་ཡོ ཨ་ཧཱུ’’ཏི.
ཡ་དཱ པ་ན ས་ཀྐོ དེ་ཝཱ་ན་མི་ནྡོ ད་ས་བ་ལ་སྶ དྷ་མྨཾ སོ་ཏུ་ཀཱ་མོ ཏཾ ཨུ་པ་ས་ངྐ་མི, ཏ་དཱ ཨ་སཱི་ཏི་ཡཱ ཀོ་ཊཱི་ནཾ ཏ་ཏི་ཡོ ཨ་བྷི་ས་མ་ཡོ ཨ་ཧོ་སི. ཏེ་ན ཝུ་ཏྟཾ –
༤. ‘‘ཡ་དཱ ས་ཀྐོ ཨུ་པ་ག་ཉྪི, ས་པ་རི་སོ ཝི་ནཱ་ཡ་ཀཾ;
ཏ་དཱ ཨ་སཱི་ཏི་ཀོ་ཊཱི་ནཾ, ཏ་ཏི་ཡཱ་བྷི་ས་མ་ཡོ ཨ་ཧཱུ’’ཏི.
ཡ་དཱ པ་ན ས་ར་ཎ་ན་ག་རེ ཝེ་མཱ་ཏི་ཀ་བྷཱ་ཏི་ཀཾ པ་དུ་མ་ཀུ་མཱ་རཾ ཕུ་སྶ་དེ་ཝ་ཀུ་མཱ་ར་ཉྩ ས་པ་རི་ཝཱ་རེ པ་བྦཱ་ཛེ་སི, ཏ་སྨིཾ ཨ་ནྟོ་ཝ་སྶེ པ་བྦ་ཛི་ཏཱ་ནཾ བྷི་ཀྑཱུ་ནཾ ཀོ་ཊི་ས་ཏ་ས་ཧ་སྶཱ་ནཾ མ་ཛ྄ཛྷེ ཝི་སུ་དྡྷི་པ་ཝཱ་ར་ཎཾ པ་ཝཱ་རེ་སི, སོ པ་ཋ་མོ ས་ནྣི་པཱ་ཏོ ཨ་ཧོ་སི. པུ་ན བྷ་ག་ཝ་ཏོ དེ་ཝ་ལོ་ཀ་ཏོ ཨོ་རོ་ཧ་ཎེ ས་ཏ་ཀོ་ཊཱི་ནཾ དུ་ཏི་ཡོ ས་ནྣི་པཱ་ཏོ ཨ་ཧོ་སི. ཡ་དཱ པ་ན སུ་ད་སྶ་ནཱ་རཱ་མེ ཏེ་ར་ས་ནྣཾ དྷུ་ཏ་གུ་ཎཱ་ནཾ གུ་ཎེ ཨཱ་ནི་སཾ་སེ པ་ཀཱ་སེ་ཏྭཱ ཧཱ་རི་ཏཾ ནཱ་མ མ་ཧཱ་སཱ་ཝ་ཀཾ ཨེ་ཏ་ད་གྒེ ཋ་པེ་སི, ཏ་དཱ ཨ་སཱི་ཏི་ཡཱ ཀོ་ཊཱི་ནཾ མ་ཛ྄ཛྷེ བྷ་ག་ཝཱ པཱ་ཏི་མོ་ཀྑཾ ཨུ་དྡི་སི, སོ ཏ་ཏི་ཡོ ས་ནྣི་པཱ་ཏོ ཨ་ཧོ་སི. ཏེ་ན ཝུ་ཏྟཾ –
༥. ‘‘ཏ་སྶཱ་པི དེ་ཝ་དེ་ཝ་སྶ, ས་ནྣི་པཱ་ཏཱ ཏ་ཡོ ཨ་ཧུཾ;
ཁཱི་ཎཱ་ས་ཝཱ་ནཾ ཝི་མ་ལཱ་ནཾ, ས་ནྟ་ཙི་ཏྟཱ་ན ཏཱ་དི་ནཾ.
༦. ‘‘ཡ་དཱ བུ་དྡྷོ དྷ་མྨ་ད་སྶཱི, ས་ར་ཎེ ཝ་སྶཾ ཨུ་པཱ་ག་མི;
ཏ་དཱ ཀོ་ཊི་ས་ཏ་ས་ཧ་སྶཱ་ནཾ, པ་ཋ་མོ ཨཱ་སི ས་མཱ་ག་མོ.
༧. ‘‘པུ་ནཱ་པ་རཾ ཡ་དཱ བུ་དྡྷོ, དེ་ཝ་ཏོ ཨེ་ཏི མཱ་ནུ་སཾ;
ཏ་དཱ་པི ས་ཏ་ཀོ་ཊཱི་ནཾ, དུ་ཏི་ཡོ ཨཱ་སི ས་མཱ་ག་མོ.
༨. ‘‘པུ་ནཱ་པ་རཾ ཡ་དཱ བུ་དྡྷོ, པ་ཀཱ་སེ་སི དྷུ་ཏེ གུ་ཎེ;
ཏ་དཱ ཨ་སཱི་ཏི་ཀོ་ཊཱི་ནཾ, ཏ་ཏི་ཡོ ཨཱ་སི ས་མཱ་ག་མོ’’ཏི.
ཏ་དཱ ཨ་མྷཱ་ཀཾ བོ་དྷི་ས་ཏྟོ ས་ཀྐོ དེ་ཝ་རཱ་ཛཱ ཧུ་ཏྭཱ དྭཱི་སུ དེ་ཝ་ལོ་ཀེ་སུ དེ་ཝེ་ཧི པ་རི་ཝུ་ཏོ ཨཱ་ག་ནྟྭཱ དི་བྦེ་ཧི ག་ནྡྷ་པུ་པྥཱ་དཱི་ཧི དི་བྦ་ཏུ་རི་ཡེ་ཧི ཙ ཏ་ཐཱ་ག་ཏཾ པཱུ་ཛེ་སི. སོ་པི ནཾ ས་ཏྠཱ – ‘‘ཨ་ནཱ་ག་ཏེ གོ་ཏ་མོ ནཱ་མ བུ་དྡྷོ བྷ་ཝི་སྶ་ཏཱི’’ཏི བྱཱ་ཀཱ་སི. ཏེ་ན ཝུ་ཏྟཾ –
༩. ‘‘ཨ་ཧཾ ཏེ་ན ས་མ་ཡེ་ན, ས་ཀྐོ ཨཱ་སིཾ པུ་རི་ནྡ་དོ;
དི་བྦེ་ན ག་ནྡྷ་མཱ་ལེ་ན, ཏུ་རི་ཡེ་ནཱ་བྷི་པཱུ་ཛ་ཡིཾ.
༡༠. ‘‘སོ་པི མཾ ཏ་དཱ བྱཱ་ཀཱ་སི, དེ་ཝ་མ་ཛ྄ཛྷེ ནི་སཱི་དི་ཡ;
ཨ་ཊྛཱ་ར་སེ ཀ་པྤ་ས་ཏེ, ཨ་ཡཾ བུ་དྡྷོ བྷ་ཝི་སྶ་ཏི.
༡༡. ‘‘པ་དྷཱ་ནཾ པ་ད་ཧི་ཏྭཱ་ན…པེ… ཧེ་སྶཱ་མ ས་མྨུ་ཁཱ ཨི་མཾ.
༡༢. ‘‘ཏ་སྶཱ་པི ཝ་ཙ་ནཾ སུ་ཏྭཱ, བྷི་ཡྻོ ཙི་ཏྟཾ པ་སཱ་ད་ཡིཾ;
ཨུ་ཏྟ་རིཾ ཝ་ཏ་མ་དྷི་ཊྛཱ་སིཾ, ད་ས་པཱ་ར་མི་པཱུ་རི་ཡཱ’’ཏི.
ཏ་སྶ པ་ན བྷ་ག་ཝ་ཏོ ས་ར་ཎཾ ནཱ་མ ན་ག་རཾ ཨ་ཧོ་སི. ས་ར་ཎོ ནཱ་མ རཱ་ཛཱ པི་ཏཱ, སུ་ན་ནྡཱ ནཱ་མ མཱ་ཏཱ, པ་དུ་མོ ཙ ཕུ་སྶ་དེ་ཝོ ཙ དྭེ ཨ་གྒ་སཱ་ཝ་ཀཱ, སུ་ནེ་ཏྟོ ནཱ་མ ཨུ་པ་ཊྛཱ་ཀོ, ཁེ་མཱ ཙ ས་བྦ་ནཱ་མཱ ཙ དྭེ ཨ་གྒ་སཱ་ཝི་ཀཱ, བི་མྦི་ཛཱ་ལ་རུ་ཀྑོ བོ་དྷི, ས་རཱི་རཾ པ་ན་སྶ ཨ་སཱི་ཏི་ཧ་ཏྠུ་བྦེ་དྷཾ ཨ་ཧོ་སི, ཨཱ་ཡུ ཝ་སྶ་ས་ཏ་ས་ཧ་སྶཾ, ཝི་ཙི་ཀོ་ལི༹་དེ་ཝཱི ནཱ་མ་སྶ ཨ་གྒ་མ་ཧེ་སཱི, པུ་ཉྙ་ཝ་ཌྜྷ་ནོ ནཱ་མ་སྶ པུ་ཏྟོ, པཱ་སཱ་དེ་ན ནི་ཀྑ་མི. ཏེ་ན ཝུ་ཏྟཾ –
༡༣. ‘‘ས་ར་ཎཾ ནཱ་མ ན་ག་རཾ, ས་ར་ཎོ ནཱ་མ ཁ་ཏྟི་ཡོ;
སུ་ན་ནྡཱ ནཱ་མ ཛ་ནི་ཀཱ, དྷ་མྨ་ད་སྶི་སྶ ས་ཏྠུ་ནོ.
༡༨. ‘‘པ་དུ་མོ ཕུ་སྶ་དེ་ཝོ ཙ, ཨ་ཧེ་སུཾ ཨ་གྒ་སཱ་ཝ་ཀཱ;
སུ་ནེ་ཏྟོ ནཱ་མུ་པ་ཊྛཱ་ཀོ, དྷ་མྨ་ད་སྶི་སྶ ས་ཏྠུ་ནོ.
༡༩. ‘‘ཁེ་མཱ ཙ ས་བྦ་ནཱ་མཱ ཙ, ཨ་ཧེ་སུཾ ཨ་གྒ་སཱ་ཝི་ཀཱ;
བོ་དྷི ཏ་སྶ བྷ་ག་ཝ་ཏོ, བི་མྦི་ཛཱ་ལོ་ཏི ཝུ་ཙྩ་ཏི.
༢༡. ‘‘སོ་པི བུ་དྡྷོ ཨ་ས་མ་ས་མོ, ཨ་སཱི་ཏི་ཧ་ཏྠ་མུ་གྒ་ཏོ;
ཨ་ཏི་རོ་ཙ་ཏི ཏེ་ཛེ་ན, ད་ས་ས་ཧ་སྶི་མྷི དྷཱ་ཏུ་ཡཱ.
༢༢. ‘‘སུ་ཕུ་ལློ སཱ་ལ་རཱ་ཛཱ་ཝ, ཝི་ཛྫཱུ་ཝ ག་ག་ནེ ཡ་ཐཱ;
མ་ཛ྄ཛྷ་ནྷི་ཀེ་ཝ སཱུ་རི་ཡོ, ཨེ་ཝཾ སོ ཨུ་པ་སོ་བྷ་ཐ.
༢༣. ‘‘ཏ་སྶཱ་པི ཨ་ཏུ་ལ་ཏེ་ཛ་སྶ, ས་མ་ཀཾ ཨཱ་སི ཛཱི་ཝི་ཀཾ;
ཝ་སྶ་ས་ཏ་ས་ཧ་སྶཱ་ནི, ལོ་ཀེ ཨ་ཊྛཱ་སི ཙ་ཀྑུ་མཱ.
༢༤. ‘‘ཨོ་བྷཱ་སཾ ད་སྶ་ཡི་ཏྭཱ་ན, ཝི་མ་ལཾ ཀ་ཏྭཱ་ན སཱ་ས་ནཾ;
ཙ་ཝི ཙ་ནྡོ་ཝ ག་ག་ནེ, ནི་བྦུ་ཏོ སོ ས་སཱ་ཝ་ཀོ’’ཏི.
ཏ་ཏྠ བི་མྦི་ཛཱ་ལོཏི ར་ཏྟ་ཀུ་ར་ཝ་ཀ་རུ་ཀྑོ. ད་ས་ས་ཧ་སྶི་མྷི དྷཱ་ཏུ་ཡཱཏི ད་ས་ས་ཧ་སྶི་ཡཱ ལོ་ཀ་དྷཱ་ཏུ་ཡཱ. ཝི་ཛྫཱུ་ཝཱཏི ཝི་ཛྫུ་ལ་ཏཱ ཝི་ཡ. ཨུ་པ་སོ་བྷ་ཐཱཏི ཡ་ཐཱ ག་ག་ནེ ཝི་ཛྫུ ཙ མ་ཛྫ་ནྷི་ཀེ སཱུ་རི་ཡོ ཙ ཨུ་པ་སོ་བྷ་ཏི, ཨེ་ཝཾ སོ བྷ་ག་ཝཱ ཨུ་པ་སོ་བྷི་ཏྠཱ་ཏི ཨ་ཏྠོ. ས་མ་ཀནྟི ས་བྦེ་ཧི ན་ར་ས་ཏྟེ་ཧི ས་མ་མེ་ཝ ཏ་སྶ ཨཱ་ཡུ ཨ་ཧོ་སཱི་ཏི ཨ་ཏྠོ. ཙ་ཝཱིཏི ཙུ་ཏོ. ཙ་ནྡོ་ཝཱཏི ག་ག་ན་ཏོ ཙ་ནྡི་མཱ ཝི་ཡ ཙ་ཝཱི་ཏི ཨ་ཏྠོ. དྷ་མྨ་ད་སྶཱི ཀི་ར བྷ་ག་ཝཱ སཱ་ལ་ཝ་ཏཱི་ན་ག་རེ ཀེ་སཱ་རཱ་མེ པ་རི་ནི་བྦཱ་ཡི སེ་ས་མེ་ཏྠ གཱ་ཐཱ་སུ པཱ་ཀ་ཊ་མེ་ཝཱ་ཏི.
དྷ་མྨ་ད་སྶཱི་བུ་དྡྷ་ཝཾ་ས་ཝ་ཎྞ་ནཱ ནི་ཊྛི་ཏཱ.
ནི་ཊྛི་ཏོ པ་ནྣ་ར་ས་མོ བུ་དྡྷ་ཝཾ་སོ.