༡༦. ཨ་ཏྠ་ད་སྶཱི་བུ་དྡྷ་ཝཾ་ས་ཝ་ཎྞ་ནཱ
པི་ཡ་ད་སྶི་མྷི ས་མྨཱ་ས་མྦུ་དྡྷེ པ་རི་ནི་བྦུ་ཏེ ཏ་སྶ སཱ་ས་ནེ ཙ ཨ་ནྟ་ར་ཧི་ཏེ པ་རི་ཧཱ་ཡི་ཏྭཱ ཝ་ཌྜྷི་ཏྭཱ ཨ་པ་རི་མི་ཏཱ་ཡུ་ཀེ་སུ མ་ནུ་སྶེ་སུ ཨ་ནུ་ཀྐ་མེ་ན པ་རི་ཧཱ་ཡི་ཏྭཱ ཝ་སྶ་ས་ཏ་ས་ཧ་སྶཱ་ཡུ་ཀེ་སུ ཛཱ་ཏེ་སུ པ་ར་མ་ཏྠ་ད་སྶཱི ཨ་ཏྠ་ད་སྶཱི ནཱ་མ བུ་དྡྷོ ལོ་ཀེ ཨུ་པྤ་ཛྫི. སོ པཱ་ར་མི་ཡོ པཱུ་རེ་ཏྭཱ ཏུ་སི་ཏ་པུ་རེ ནི་བྦ་ཏྟི་ཏྭཱ ཏ་ཏོ ཙ་ཝི་ཏྭཱ པ་ར་མ་སོ་བྷ་ནེ སོ་བྷ་ནེ ནཱ་མ ན་ག་རེ སཱ་ག་ར་སྶ ནཱ་མ ར་ཉྙོ ཀུ་ལེ ཨ་གྒ་མ་ཧེ་སི་ཡཱ སུ་ད་སྶ་ན་དེ་ཝི་ཡཱ ཀུ་ཙྪི་སྨིཾ པ་ཊི་ས་ནྡྷིཾ ག་ཧེ་ཏྭཱ ད་ས མཱ་སེ ག་བྦྷེ ཝ་སི་ཏྭཱ སུ་ཙི་ནྡྷ་ནུ་ཡྻཱ་ནེ མཱ་ཏུ་ཀུ་ཙྪི་ཏོ ནི་ཀྑ་མི. མཱ་ཏུ་ཀུ་ཙྪི་ཏོ མ་ཧཱ་པུ་རི་སེ ནི་ཀྑ་ནྟ་མ་ཏྟེ སུ་ཙི་ར་ཀཱ་ལ་ནི་ཧི་ཏཱ་ནི ཀུ་ལ་པ་ར་མྤ་རཱ་ག་ཏཱ་ནི མ་ཧཱ་ནི་དྷཱ་ནཱ་ནི དྷ་ན་སཱ་མི་ཀཱ པ་ཊི་ལ་བྷིཾ་སཱུ་ཏི ཏ་སྶ ནཱ་མ་གྒ་ཧ་ཎ་དི་ཝ་སེ ‘‘ཨ་ཏྠ་ད་སྶཱི’’ཏི ནཱ་མ་མ་ཀཾ་སུ. སོ ད་ས་ཝ་སྶ་ས་ཧ་སྶཱ་ནི ཨ་གཱ་རཾ ཨ་ཛ྄ཛྷཱ་ཝ་སི. ཨ་མ་ར་གི་རི-སུ་ར་གི་རི-གི་རི་ཝཱ་ཧ་ན་ནཱ་མ་ཀཱ པ་ར་མ་སུ་ར་བྷི་ཛ་ན་ཀཱ ཏ་ཡོ ཙ་སྶ པཱ་སཱ་དཱ ཨ་ཧེ་སུཾ. ཝི་སཱ་ཁཱ་དེ་ཝི་པྤ་མུ་ཁཱ་ནི ཏེ་ཏྟིཾ་ས ཨི་ཏྠི་ས་ཧ་སྶཱ་ནི ཨ་ཧེ་སུཾ.
སོ ཙ་ཏྟཱ་རི ནི་མི་ཏྟཱ་ནི དི་སྭཱ ཝི་སཱ་ཁཱ་དེ་ཝི་ཡཱ སེ་ལ་ཀུ་མཱ་རེ ནཱ་མ པུ་ཏྟེ ཨུ་པྤ་ནྣེ སུ་ད་སྶ་ནཾ ནཱ་མ ཨ་སྶ་རཱ་ཛཾ ཨ་བྷི་རུ་ཧི་ཏྭཱ མ་ཧཱ་བྷི་ནི་ཀྑ་མ་ནཾ ནི་ཀྑ་མི་ཏྭཱ པ་བྦ་ཛི. ཏཾ ན་ཝ མ་ནུ་སྶ་ཀོ་ཊི་ཡོ ཨ་ནུ་པ་བྦ་ཛིཾ་སུ. ཏེ་ཧི པ་རི་ཝུ་ཏོ སོ མ་ཧཱ་པུ་རི་སོ ཨ་ཊྛ མཱ་སེ པ་དྷཱ་ན་ཙ་རི་ཡཾ ཙ་རི་ཏྭཱ ཝི་སཱ་ཁ་པུ་ཎྞ་མཱ་ཡ སུ་ཙི་ནྡྷ་ར་ནཱ་གི་ཡཱ ཨུ་པ་ཧཱ་ར་ཏྠཱ་ཡ ཨཱ་ནཱི་ཏཾ མ་དྷུ་པཱ་ཡཱ་སཾ མ་ཧཱ་ཛ་ནེ་ན ས་ནྡི་སྶ་མཱ་ན་ས་བྦ་ས་རཱི་རཱ་ཡ ནཱ་གི་ཡཱ ས་ཧ སུ་ཝ་ཎྞ་པཱ་ཏི་ཡཱ དི་ནྣཾ མ་དྷུ་པཱ་ཡཱ་སཾ པ་རི་བྷུ་ཉྫི་ཏྭཱ ཏ་རུ་ཎ་ཏ་རུ་ས་ཏ་ས་མ་ལ་ངྐ་ཏེ ཏ་རུ་ཎ་སཱ་ལ་ཝ་ནེ དི་ཝཱ་ཝི་ཧཱ་རཾ ཝཱི་ཏི་ནཱ་མེ་ཏྭཱ སཱ་ཡ་ནྷ་ས་མ་ཡེ དྷ་མྨ་རུ་ཙི་ནཱ མ་ཧཱ་རུ་ཙི་ནཱ ནཱ་མ ནཱ་ག་རཱ་ཛེ་ན དི་ནྣཱ ཨ་ཊྛ ཀུ་ས་ཏི་ཎ་མུ་ཊྛི་ཡོ ག་ཧེ་ཏྭཱ ཙ་མྤ་ཀ་བོ་དྷིཾ ཨུ་པ་ས་ངྐ་མི་ཏྭཱ ཏེ་པ་ཉྙཱ་ས་ཧ་ཏྠཱ་ཡཱ་མ་ཝི་ཏྠ་ཏཾ ཀུ་ས་ཏི་ཎ་ས་ནྠ་རཾ ས་ནྠ་རི་ཏྭཱ པ་ལླ་ངྐཾ ཨཱ་བྷུ་ཛི་ཏྭཱ ས་མྦོ་དྷིཾ པ་ཏྭཱ ས་བྦ་བུ་དྡྷཱ་ཙི་ཎྞཾ – ‘‘ཨ་ནེ་ཀ་ཛཱ་ཏི་སཾ་སཱ་རཾ…པེ… ཏ་ཎྷཱ་ནཾ ཁ་ཡ་མ་ཛ྄ཛྷ་གཱ’’ཏི ཨུ་དཱ་ནཾ ཨུ་དཱ་ནེ་ཏྭཱ ས་ཏྟ་ས་ཏྟཱ་ཧཾ བོ་དྷི་ས་མཱི་པེ་ཡེ་ཝ ཝཱི་ཏི་ནཱ་མེ་ཏྭཱ བྲ་ཧྨུ་ནོ དྷ་མྨ་དེ་ས་ནཱ་ཡཱ་ཙ་ནཾ ས་མྤ་ཊི་ཙྪི་ཏྭཱ ཨ་ཏྟ་ནཱ ས་ཧ པ་བྦ་ཛི་ཏ་ན་ཝ་བྷི་ཀྑུ་ཀོ་ཊི་ཡོ ཨ་རི་ཡ་དྷ་མྨ་པ་ཊི་ཝེ་དྷ་ས་མ་ཏྠེ དི་སྭཱ ཨཱ་ཀཱ་སེ་ན ག་ནྟྭཱ ཨ་ནོ་མ་ན་ག་ར་ས་མཱི་པེ ཨ་ནོ་མུ་ཡྻཱ་ནེ ཨོ་ཏ་རི་ཏྭཱ ཏེ་ཧི པ་རི་ཝུ་ཏོ ཏ་ཏྠ དྷ་མྨ་ཙ་ཀྐཾ པ་ཝ་ཏྟེ་སི. ཏ་དཱ ཀོ་ཊི་ས་ཏ་ས་ཧ་སྶཱ་ནཾ པ་ཋ་མོ དྷ་མྨཱ་བྷི་ས་མ་ཡོ ཨ་ཧོ་སི.
པུ་ན བྷ་ག་ཝ་ཏི ལོ་ཀ་ནཱ་ཡ་ཀེ དེ་ཝ་ལོ་ཀ་ཙཱ་རི་ཀཾ ཙ་རི་ཏྭཱ ཏ་ཏྠ དྷ་མྨཾ དེ་སེ་ནྟེ ཀོ་ཊི་ས་ཏ་ས་ཧ་སྶཱ་ནཾ དུ་ཏི་ཡོ ཨ་བྷི་ས་མ་ཡོ ཨ་ཧོ་སི. ཡ་དཱ པ་ན བྷ་ག་ཝཱ ཨ་ཏྠ་ད་སྶཱི ཨ་མྷཱ་ཀཾ བྷ་ག་ཝཱ ཝི་ཡ ཀ་པི་ལ་ཝ་ཏྠུ་པུ་རཾ སོ་བྷ་ན་པུ་རཾ པ་ཝི་སི་ཏྭཱ དྷ་མྨཾ དེ་སེ་སི, ཏ་དཱ ཀོ་ཊི་ས་ཏ་ས་ཧ་སྶཱ་ནཾ ཏ་ཏི་ཡོ དྷ་མྨཱ་བྷི་ས་མ་ཡོ ཨ་ཧོ་སི. ཏེ་ན ཝུ་ཏྟཾ –
༡. ‘‘ཏ་ཏྠེ་ཝ མ་ཎྜ་ཀ་པྤ་མྷི, ཨ་ཏྠ་ད་སྶཱི མ་ཧཱ་ཡ་སོ;
མ་ཧཱ་ཏ་མཾ ནི་ཧ་ནྟྭཱ་ན, པ་ཏྟོ ས་མྦོ་དྷི་མུ་ཏྟ་མཾ.
༢. ‘‘བྲ་ཧྨུ་ནཱ ཡཱ་ཙི་ཏོ ས་ནྟོ, དྷ་མྨ་ཙ་ཀྐཾ པ་ཝ་ཏྟ་ཡི;
ཨ་མ་ཏེ་ན ཏ་པྤ་ཡཱི ལོ་ཀཾ, ད་ས་ས་ཧ་སྶཱི ས་དེ་ཝ་ཀཾ.
༣. ‘‘ཏ་སྶཱ་པི ལོ་ཀ་ནཱ་ཐ་སྶ, ཨ་ཧེ་སུཾ ཨ་བྷི་ས་མ་ཡཱ ཏ་ཡོ;
ཀོ་ཊི་ས་ཏ་ས་ཧ་སྶཱ་ནཾ, པ་ཋ་མཱ་བྷི་ས་མ་ཡོ ཨ་ཧུ.
༤. ‘‘ཡ་དཱ བུ་དྡྷོ ཨ་ཏྠ་ད་སྶཱི, ཙ་ར་ཏི དེ་ཝ་ཙཱ་རི་ཀཾ;
ཀོ་ཊི་ས་ཏ་ས་ཧ་སྶཱ་ནཾ, དུ་ཏི་ཡཱ་བྷི་ས་མ་ཡོ ཨ་ཧུ.
༥. ‘‘པུ་ནཱ་པ་རཾ ཡ་དཱ བུ་དྡྷོ, དེ་སེ་སི པི་ཏུ་ས་ནྟི་ཀེ;
ཀོ་ཊི་ས་ཏ་ས་ཧ་སྶཱ་ནཾ, ཏ་ཏི་ཡཱ་བྷི་ས་མ་ཡོ ཨ་ཧཱུ’’ཏི.
ཏ་ཏྠ ཏ་ཏྠེ་ཝཱཏི ཏ་སྨི་ཉྙེ་ཝ ཀ་པྤེ་ཏི ཨ་ཏྠོ. ཨེ་ཏྠ པ་ན ཝ་ར་ཀ་པྤོ ‘‘མ་ཎྜ་ཀ་པྤོ’’ཏི ཨ་དྷི་པྤེ་ཏོ. ‘‘ཡ་སྨིཾ ཀ་པྤེ ཏ་ཡོ བུ་དྡྷཱ ནི་བྦ་ཏྟ་ནྟི, སོ ཀ་པྤོ ཝ་ར་ཀ་པྤོ’’ཏི ཧེ་ཊྛཱ པ་དུ་མུ་ཏྟ་ར་བུ་དྡྷ་ཝཾ་ས་ཝ་ཎྞ་ནཱ་ཡཾ ཝུ་ཏྟོ. ཏ་སྨཱ ཝ་ར་ཀ་པྤོ ཨི་དྷ ‘‘མ་ཎྜ་ཀ་པྤོ’’ཏི ཝུ་ཏྟོ. ནི་ཧ་ནྟྭཱ་ནཱཏི ནི་ཧ་ནི་ཏྭཱ. ཨ་ཡ་མེ་ཝ ཝཱ པཱ་ཋོ. ས་ནྟོཏི ས་མཱ་ནོ. ཨ་མ་ཏེ་ནཱཏི མ་གྒ་ཕ་ལཱ་དྷི་ག་མཱ་མ་ཏ་པཱ་ནེ་ན. ཏ་པྤ་ཡཱིཏི ཨ་ཏ་པྤ་ཡི, པཱི་ཎེ་སཱི་ཏི ཨ་ཏྠོ. ད་ས་ས་ཧ་སྶཱིཏི ད་ས་ས་ཧ་སྶི་ལོ་ཀ་དྷཱ་ཏུཾ. དེ་ཝ་ཙཱ་རི་ཀནྟི དེ་ཝཱ་ནཾ ཝི་ན་ཡ་ན་ཏྠཾ དེ་ཝ་ལོ་ཀ་ཙཱ་རི་ཀ་ནྟི ཨ་ཏྠོ.
སུ་ཙ་ནྡ་ཀ་ན་ག་རེ ཀི་ར ས་ནྟོ ཙ རཱ་ཛ་པུ་ཏྟོ ཨུ་པ་ས་ནྟོ ཙ པུ་རོ་ཧི་ཏ་པུ་ཏྟོ ཏཱི་སུ ཝེ་དེ་སུ ས་བྦ་ས་མ་ཡ་ནྟ་རེ་སུ ཙ སཱ་ར་མ་དི་སྭཱ ན་ག་ར་སྶ ཙ་ཏཱུ་སུ དྭཱ་རེ་སུ ཙ་ཏྟཱ་རོ པ་ཎྜི་ཏེ ཝི་སཱ་ར་དེ ཙ མ་ནུ་སྶེ ཋ་པེ་སུཾ – ‘‘ཡཾ པ་ན ཏུ་མྷེ པ་ཎྜི་ཏཾ ས་མ་ཎཾ ཝཱ བྲཱ་ཧྨ་ཎཾ ཝཱ པ་སྶ་ཐ སུ་ཎཱ་ཐ ཝཱ, ཏཾ ཨ་མྷཱ་ཀཾ ཨཱ་ག་ནྟྭཱ ཨཱ་རོ་ཙེ་ཐཱ’’ཏི. ཏེ་ན ཙ ས་མ་ཡེ་ན ཨ་ཏྠ་ད་སྶཱི ལོ་ཀ་ནཱ་ཐོ སུ་ཙ་ནྡ་ཀ་ན་ག་རཾ ས་མྤཱ་པུ་ཎི. ཨ་ཐ ཏེ་ཧི ནི་ཝེ་དི་ཏཱ པུ་རི་སཱ ག་ནྟྭཱ ཏེ་སཾ ད་ས་བ་ལ་སྶ ཏ་ཏྠཱ་ག་མ་ནཾ པ་ཊི་ཝེ་དེ་སུཾ. ཏ་ཏོ ཏེ ས་ནྟོ་པ་ས་ནྟཱ ཏ་ཐཱ་ག་ཏཱ་ག་མ་ནཾ སུ་ཏྭཱ པ་ཧ་ཊྛ་མཱ་ན་སཱ ས་ཧ་སྶ་པ་རི་ཝཱ་རཱ ད་ས་བ་ལཾ ཨ་ས་མཾ པ་ཙྩུ་གྒ་ནྟྭཱ ཨ་བྷི་ཝཱ་དེ་ཏྭཱ ནི་མ་ནྟེ་ཏྭཱ ས་ཏྟཱ་ཧཾ བུ་དྡྷ་པྤ་མུ་ཁ་སྶ ས་ངྒྷ་སྶ ཨ་ས་དི་སཾ མ་ཧཱ་དཱ་ནཾ ད་ཏྭཱ ས་ཏྟ་མེ དི་ཝ་སེ ས་ཀ་ལ་ན་ག་ར་ཝཱ་སཱི་ཧི མ་ནུ་སྶེ་ཧི ས་དྡྷིཾ དྷ་མྨ་ཀ་ཐཾ སུ་ཎིཾ་སུ. ཏ་སྨིཾ ཀི་ར དི་ཝ་སེ ཨ་ཊྛ་ན་ཝུ་ཏི་ས་ཧ་སྶཱ་ནི ཨེ་ཧི་བྷི་ཀྑུ་པ་བྦ་ཛྫཱ་ཡ པ་བྦ་ཛི་ཏྭཱ ཨ་ར་ཧ་ཏྟཾ པཱ་པུ་ཎིཾ་སུ. ཏཱ་ཡ པ་རི་སཱ་ཡ མ་ཛ྄ཛྷེ བྷ་ག་ཝཱ པཱ་ཏི་མོ་ཀྑཾ ཨུ་དྡི་སི, སོ པ་ཋ་མོ ས་ནྣི་པཱ་ཏོ ཨ་ཧོ་སི.
ཡ་དཱ པ་ན བྷ་ག་ཝཱ ཨ་ཏྟ་ནོ པུ་ཏྟ་སྶ སེ་ལ་ཏྠེ་ར་སྶ དྷ་མྨཾ དེ་སེ་ནྟོ ཨ་ཊྛཱ་སཱི་ཏི་ས་ཧ་སྶཱ་ནི པ་སཱ་དེ་ཏྭཱ ཨེ་ཧི་བྷི་ཀྑུ་བྷཱ་ཝེ་ན པ་བྦཱ་ཛེ་ཏྭཱ ཨ་ར་ཧ་ཏྟཾ པཱ་པེ་ཏྭཱ པཱ་ཏི་མོ་ཀྑཾ ཨུ་དྡི་སི, སོ དུ་ཏི་ཡོ ས་ནྣི་པཱ་ཏོ ཨ་ཧོ་སི. པུ་ན མ་ཧཱ་མ་ངྒ་ལ་ས་མཱ་ག་མེ མཱ་གྷ་པུ་ཎྞ་མཱ་ཡཾ དེ་ཝ་མ་ནུ་སྶཱ་ནཾ དྷ་མྨཾ དེ་སེ་ནྟོ ཨ་ཊྛ་ས་ཏྟ་ཏི་ས་ཧ་སྶཱ་ནི ཨ་ར་ཧ་ཏྟཾ པཱ་པེ་ཏྭཱ པཱ་ཏི་མོ་ཀྑཾ ཨུ་དྡི་སི, སོ ཏ་ཏི་ཡོ ས་ནྣི་པཱ་ཏོ ཨ་ཧོ་སི. ཏེ་ན ཝུ་ཏྟཾ –
༦. ‘‘ས་ནྣི་པཱ་ཏཱ ཏ་ཡོ ཨཱ་སུཾ, ཏ་སྶཱ་པི ཙ མ་ཧེ་སི་ནོ;
ཁཱི་ཎཱ་ས་ཝཱ་ནཾ ཝི་མ་ལཱ་ནཾ, ས་ནྟ་ཙི་ཏྟཱ་ན ཏཱ་དི་ནཾ.
༧. ‘‘ཨ་ཊྛ་ན་ཝུ་ཏི་ས་ཧ་སྶཱ་ནཾ, པ་ཋ་མོ ཨཱ་སི ས་མཱ་ག་མོ;
ཨ་ཊྛཱ་སཱི་ཏི་ས་ཧ་སྶཱ་ནཾ, དུ་ཏི་ཡོ ཨཱ་སི ས་མཱ་ག་མོ.
༨. ‘‘ཨ་ཊྛ་ས་ཏྟ་ཏི་ས་ཧ་སྶཱ་ནཾ, ཏ་ཏི་ཡོ ཨཱ་སི ས་མཱ་ག་མོ;
ཨ་ནུ་པཱ་དཱ ཝི་མུ་ཏྟཱ་ནཾ, ཝི་མ་ལཱ་ནཾ མ་ཧེ་སི་ན’’ནྟི.
ཏ་དཱ ཀི་ར ཨ་མྷཱ་ཀཾ བོ་དྷི་ས་ཏྟོ ཙ་མྤ་ཀ་ན་ག་རེ སུ་སཱི་མོ ནཱ་མ བྲཱ་ཧྨ་ཎ་མ་ཧཱ་སཱ་ལོ ལོ་ཀ་ས་མྨ་ཏོ ཨ་ཧོ་སི. སོ ས་བྦ་ཝི་བྷ་ཝ་ཛཱ་ཏཾ དཱི་ནཱ་ནཱ་ཐ་ཀ་པ་ཎ་དྡྷི་ཀཱ་དཱི་ནཾ ཝི་སྶ་ཛྫེ་ཏྭཱ ཧི་མ་ཝ་ནྟ་ས་མཱི་པཾ ག་ནྟྭཱ ཏཱ་པ་ས་པ་བྦ་ཛྫཾ པ་བྦ་ཛི་ཏྭཱ ཨ་ཊྛ ས་མཱ་པ་ཏྟི་ཡོ པ་ཉྩ ཨ་བྷི་ཉྙཱ་ཡོ ཙ ནི་བྦ་ཏྟེ་ཏྭཱ མ་ཧི་དྡྷི་ཀོ མ་ཧཱ་ནུ་བྷཱ་ཝོ ཧུ་ཏྭཱ མ་ཧཱ་ཛ་ན་སྶ ཀུ་ས་ལཱ་ཀུ་ས་ལཱ་ནཾ དྷ་མྨཱ་ནཾ ཨ་ན་ཝ་ཛྫ་སཱ་ཝ་ཛྫ་བྷཱ་ཝ་ཉྩ ད་སྶེ་ཏྭཱ བུ་དྡྷུ་པྤཱ་དཾ ཨཱ་ག་མ་ཡ་མཱ་ནོ ཨ་ཊྛཱ་སི.
ཨ་ཐཱ་པ་རེ་ན ས་མ་ཡེ་ན ཨ་ཏྠ་ད་སྶི་མྷི ལོ་ཀ་ནཱ་ཡ་ཀེ ལོ་ཀེ ཨུ་པྤ་ཛྫི་ཏྭཱ སུ་ད་སྶ་ན་མ་ཧཱ་ན་ག་རེ ཨ་ཊྛ་ནྣཾ པ་རི་སཱ་ནཾ མ་ཛ྄ཛྷེ དྷ་མྨཱ་མ་ཏ་ཝ་སྶཾ ཝ་སྶེ་ནྟེ ཏ་སྶ དྷ་མྨཾ སུ་ཏྭཱ ས་གྒ་ལོ་ཀཾ ག་ནྟྭཱ དི་བྦཱ་ནི མ་ནྡཱ་ར་ཝ་པ་དུ་མ་པཱ་རི་ཙྪ་ཏྟ་ཀཱ་དཱི་ནི པུ་པྥཱ་ནི དེ་ཝ་ལོ་ཀ་ཏོ ཨཱ་ཧ་རི་ཏྭཱ ཨ་ཏྟ་ནོ ཨཱ་ནུ་བྷཱ་ཝཾ ད་སྶེ་ནྟོ དི་སྶ་མཱ་ན་ས་རཱི་རོ ཙ་ཏཱུ་སུ དི་སཱ་སུ ཙ་ཏུ་དྡཱི་པི་ཀ་མ་ཧཱ་མེ་གྷོ ཝི་ཡ པུ་པྥ་ཝ་སྶཾ ཝ་སྶེ་ཏྭཱ ས་མ་ནྟ་ཏོ པུ་པྥ་མ་ཎྜ་པཾ པུ་པྥ་མ་ཡ་གྒྷི་ཏོ་ར་ཎ་ཧེ་མ་ཛཱ་ལཱ་དཱི་ནི པུ་པྥ་མ་ཡཱ་ནི ཀ་ཏྭཱ མ་ནྡཱ་ར་ཝ་པུ་པྥ་ཙྪ་ཏྟེ་ན ད་ས་བ་ལཾ པཱུ་ཛེ་སི. སོ་པི ནཾ བྷ་ག་ཝཱ – ‘‘ཨ་ནཱ་ག་ཏེ གོ་ཏ་མོ ནཱ་མ བུ་དྡྷོ བྷ་ཝི་སྶ་ཏཱི’’ཏི བྱཱ་ཀཱ་སི. ཏེ་ན ཝུ་ཏྟཾ –
༩. ‘‘ཨ་ཧཾ ཏེ་ན ས་མ་ཡེ་ན, ཛ་ཊི་ལོ ཨུ་གྒ་ཏཱ་པ་ནོ;
སུ་སཱི་མོ ནཱ་མ ནཱ་མེ་ན, མ་ཧི་ཡཱ སེ་ཊྛ་ས་མྨ་ཏོ.
༡༠. ‘‘དི་བྦཾ མ་ནྡཱ་ར་ཝཾ པུ་པྥཾ, པ་དུ་མཾ པཱ་རི་ཙྪ་ཏྟ་ཀཾ;
དེ་ཝ་ལོ་ཀཱ ཧ་རི་ཏྭཱ་ན, ས་མྦུ་དྡྷ་མ་བྷི་པཱུ་ཛ་ཡིཾ.
༡༡. ‘‘སོ་པི མཾ བུ་དྡྷོ བྱཱ་ཀཱ་སི, ཨ་ཏྠ་ད་སྶཱི མ་ཧཱ་མུ་ནི;
ཨ་ཊྛཱ་ར་སེ ཀ་པྤ་ས་ཏེ, ཨ་ཡཾ བུ་དྡྷོ བྷ་ཝི་སྶ་ཏི.
༡༢. ‘‘པ་དྷཱ་ནཾ པ་ད་ཧི་ཏྭཱ་ན…པེ… ཧེ་སྶཱ་མ ས་མྨུ་ཁཱ ཨི་མཾ.
༡༣. ‘‘ཏ་སྶཱ་པི ཝ་ཙ་ནཾ སུ་ཏྭཱ, ཧ་ཊྛོ སཾ་ཝི་གྒ་མཱ་ན་སོ;
ཨུ་ཏྟ་རིཾ ཝ་ཏ་མ་དྷི་ཊྛཱ་སིཾ, ད་ས་པཱ་ར་མི་པཱུ་རི་ཡཱ’’ཏི.
ཏ་ཏྠ ཛ་ཊི་ལོཏི ཛ་ཊཱ ཨ་སྶ ཨ་ཏྠཱི་ཏི ཛ་ཊི་ལོ. མ་ཧི་ཡཱ སེ་ཊྛ་ས་མྨ་ཏོཏི ས་ཀ་ལེ་ན་པི ལོ་ཀེ་ན སེ་ཊྛོ ཨུ་ཏྟ་མོ པ་ཝ་རོ་ཏི ཨེ་ཝཾ ས་མྨ་ཏོ ས་མྦྷཱ་ཝི་ཏོ་ཏི ཨ་ཏྠོ.
ཏ་སྶ པ་ན བྷ་ག་ཝ་ཏོ སོ་བྷ་ནཾ ནཱ་མ ན་ག་རཾ ཨ་ཧོ་སི. སཱ་ག་རོ ནཱ་མ རཱ་ཛཱ པི་ཏཱ, སུ་ད་སྶ་ནཱ ནཱ་མ མཱ་ཏཱ, ས་ནྟོ ཨུ་པ་ས་ནྟོ ཙ དྭེ ཨ་གྒ་སཱ་ཝ་ཀཱ, ཨ་བྷ་ཡོ ནཱ་མུ་པ་ཊྛཱ་ཀོ, དྷ་མྨཱ ཙ སུ་དྷ་མྨཱ ཙ དྭེ ཨ་གྒ་སཱ་ཝི་ཀཱ, ཙ་མྤ་ཀ་རུ་ཀྑོ བོ་དྷི, ས་རཱི་རཾ ཨ་སཱི་ཏི་ཧ་ཏྠུ་བྦེ་དྷཾ ཨ་ཧོ་སི. ས་རཱི་ར་པྤ་བྷཱ ས་མ་ནྟ་ཏོ ས་བྦ་ཀཱ་ལཾ ཡོ་ཛ་ན་མ་ཏྟཾ ཕ་རི་ཏྭཱ ཨ་ཊྛཱ་སི, ཨཱ་ཡུ ཝ་སྶ་ས་ཏ་ས་ཧ་སྶཾ, ཝི་སཱ་ཁཱ ནཱ་མ་སྶ ཨ་གྒ་མ་ཧེ་སཱི, སེ་ལོ ནཱ་མ པུ་ཏྟོ, ཨ་སྶ་ཡཱ་ནེ་ན ནི་ཀྑ་མི. ཏེ་ན ཝུ་ཏྟཾ –
༡༤. ‘‘སོ་བྷ་ནཾ ནཱ་མ ན་ག་རཾ, སཱ་ག་རོ ནཱ་མ ཁ་ཏྟི་ཡོ;
སུ་ད་སྶ་ནཱ ནཱ་མ ཛ་ནི་ཀཱ, ཨ་ཏྠ་ད་སྶི་སྶ ས་ཏྠུ་ནོ.
༡༩. ‘‘ས་ནྟོ ཙ ཨུ་པ་ས་ནྟོ ཙ, ཨ་ཧེ་སུཾ ཨ་གྒ་སཱ་ཝ་ཀཱ;
ཨ་བྷ་ཡོ ནཱ་མུ་པ་ཊྛཱ་ཀོ, ཨ་ཏྠ་ད་སྶི་སྶ ས་ཏྠུ་ནོ.
༢༠. ‘‘དྷ་མྨཱ ཙེ་ཝ སུ་དྷ་མྨཱ ཙ, ཨ་ཧེ་སུཾ ཨ་གྒ་སཱ་ཝི་ཀཱ;
བོ་དྷི ཏ་སྶ བྷ་ག་ཝ་ཏོ, ཙ་མྤ་ཀོ་ཏི པ་ཝུ་ཙྩ་ཏི.
༢༢. ‘‘སོ་པི བུ་དྡྷོ ཨ་ས་མ་ས་མོ, ཨ་སཱི་ཏི་ཧ་ཏྠ་མུ་གྒ་ཏོ;
སོ་བྷ་ཏེ སཱ་ལ་རཱ་ཛཱ་ཝ, ཨུ་ལུ༹་རཱ་ཛཱ་ཝ པཱུ་རི་ཏོ.
༢༣. ‘‘ཏ་སྶ པཱ་ཀ་ཏི་ཀཱ རཾ་སཱི, ཨ་ནེ་ཀ་ས་ཏ་ཀོ་ཊི་ཡོ;
ཨུ་དྡྷཾ ཨ་དྷོ ད་ས དི་སཱ, ཕ་ར་ནྟི ཡོ་ཛ་ནཾ ས་དཱ.
༢༤. ‘‘སོ་པི བུ་དྡྷོ ན་རཱ་ས་བྷོ, ས་བྦ་ས་ཏྟུ་ཏྟ་མོ མུ་ནི;
ཝ་སྶ་ས་ཏ་ས་ཧ་སྶཱ་ནི, ལོ་ཀེ ཨ་ཊྛཱ་སི ཙ་ཀྑུ་མཱ.
༢༥. ‘‘ཨ་ཏུ་ལཾ ད་སྶེ་ཏྭཱ ཨོ་བྷཱ་སཾ, ཝི་རོ་ཙེ་ཏྭཱ ས་དེ་ཝ་ཀེ;
སོ་པི ཨ་ནི་ཙྩ་ཏཾ པ་ཏྟོ, ཡ་ཐ་གྒུ་པཱ་དཱ་ན་ས་ངྑ་ཡཱ’’ཏི.
ཏ་ཏྠ ཨུ་ལུ༹་རཱ་ཛཱ་ཝ པཱུ་རི་ཏོཏི ས་ར་ད་ས་མ་ཡ་པ་རི་པུ་ཎྞ་ཝི་མ་ལ་ས་ཀ་ལ་མ་ཎྜ་ལོ ཏཱ་ར་ཀ་རཱ་ཛཱ ཝི་ཡཱ་ཏི ཨ་ཏྠོ. པཱ་ཀ་ཏི་ཀཱཏི པ་ཀ་ཏི་ཝ་སེ་ན ཨུ་པྤ་ཛྫ་མཱ་ནཱ, ན ཨ་དྷི་ཊྛཱ་ན་ཝ་སེ་ན. ཡ་དཱ ཨི་ཙྪ་ཏི བྷ་ག་ཝཱ, ཏ་དཱ ཨ་ནེ་ཀ་ཀོ་ཊི་ས་ཏ་ས་ཧ་སྶེ་པི ཙ་ཀྐ་ཝཱ་ལེ༹ ཨཱ་བྷཱ་ཡ ཕ་རེ་ཡྻ. རཾ་སཱིཏི ར་སྨི་ཡོ. ཨུ་པཱ་དཱ་ན་ས་ངྑ་ཡཱཏི ཨུ་པཱ་དཱ་ན་ཀྑ་ཡཱ ཨི་ནྡྷ་ན་ཀྑ་ཡཱ ཨ་གྒི ཝི་ཡ. སོ་པི བྷ་ག་ཝཱ ཙ་ཏུ་ནྣཾ ཨུ་པཱ་དཱ་ནཱ་ནཾ ཁ་ཡེ་ན ཨ་ནུ་པཱ་དི་སེ་སཱ་ཡ ནི་བྦཱ་ན་དྷཱ་ཏུ་ཡཱ ཨ་ནུ་པ་མ་ན་ག་རེ ཨ་ནོ་མཱ་རཱ་མེ པ་རི་ནི་བྦཱ་ཡི. དྷཱ་ཏུ་ཡོ པ་ན་སྶ ཨ་དྷི་ཊྛཱ་ནེ་ན ཝི་ཀི་རིཾ་སུ. སེ་ས་མེ་ཏྠ གཱ་ཐཱ་སུ ཨུ་ཏྟཱ་ན་མེ་ཝཱ་ཏི.
ཨ་ཏྠ་ད་སྶཱི་བུ་དྡྷ་ཝཾ་ས་ཝ་ཎྞ་ནཱ ནི་ཊྛི་ཏཱ.
ནི་ཊྛི་ཏོ ཙུ་དྡ་ས་མོ བུ་དྡྷ་ཝཾ་སོ.