༡༥. པི་ཡ་ད་སྶཱི་བུ་དྡྷ་ཝཾ་ས་ཝ་ཎྞ་ནཱ
སུ་ཛཱ་ཏ་སྶ པ་ན ཨ་པ་ར་བྷཱ་གེ ཨི་ཏོ ཨ་ཊྛ་ཀ་པྤ་ས་ཏཱ་དྷི་ཀ་ས་ཧ་སྶ་ཀ་པྤ་མ་ཏྠ་ཀེ ཨེ་ཀ་སྨིཾ ཀ་པྤེ པི་ཡ་ད་སྶཱི, ཨ་ཏྠ་ད་སྶཱི, དྷ་མྨ་ད་སྶཱིཏི ཏ་ཡོ བུ་དྡྷཱ ནི་བྦ་ཏྟིཾ་སུ. ཏ་ཏྠ པི་ཡ་ད་སྶཱི ནཱ་མ བྷ་ག་ཝཱ པཱ་ར་མི་ཡོ པཱུ་རེ་ཏྭཱ ཏུ་སི་ཏ་པུ་རེ ནི་བྦ་ཏྟི་ཏྭཱ ཏ་ཏོ ཙ་ཝི་ཏྭཱ སུ་དྷ་ཉྙ་ཝ་ཏཱི་ན་ག་རེ སུ་ད་ཏྟ་སྶ ནཱ་མ ར་ཉྙོ ཨ་གྒ་མ་ཧེ་སི་ཡཱ ཙ་ནྡ་ས་དི་ས་ཝ་ད་ནཱ་ཡ ཙ་ནྡཱ་དེ་ཝི་ཡཱ ནཱ་མ ཀུ་ཙྪི་སྨིཾ པ་ཊི་ས་ནྡྷིཾ ག་ཧེ་ཏྭཱ ད་ས་ནྣཾ མཱ་སཱ་ནཾ ཨ་ཙྩ་ཡེ་ན ཝ་རུ་ཎུ་ཡྻཱ་ནེ མཱ་ཏུ་ཀུ་ཙྪི་ཏོ ནི་ཀྑ་མི. ཏ་སྶ པ་ན ནཱ་མ་གྒ་ཧ་ཎ་དི་ཝ་སེ ལོ་ཀ་སྶ པི་ཡཱ་ནཾ པཱ་ཊི་ཧཱ་རི་ཡ་ཝི་སེ་སཱ་ནཾ ད་སྶི་ཏ་ཏྟཱ ‘‘པི་ཡ་ད་སྶཱི’’ཏྭེ་ཝ ནཱ་མ་མ་ཀཾ་སུ. སོ ན་ཝ་ཝ་སྶ་ས་ཧ་སྶཱ་ནི ཨ་གཱ་རཾ ཨ་ཛ྄ཛྷཱ་ཝ་སི. ཏ་སྶ ཀི་ར སུ་ནི་མྨ་ལ་ཝི་མ་ལ་གི་རི་བྲ་ཧཱ་ནཱ་མ་ཀཱ ཏ་ཡོ པཱ་སཱ་དཱ ཨ་ཧེ་སུཾ. ཝི་མ་ལཱ་མ་ཧཱ་དེ་ཝི་པྤ་མུ་ཁཱ་ནི ཏེ་ཏྟིཾ་ས ཨི་ཏྠི་ས་ཧ་སྶཱ་ནི པ་ཙྩུ་པ་ཊྛི་ཏཱ་ནི ཨ་ཧེ་སུཾ.
སོ ཙ་ཏྟཱ་རི ནི་མི་ཏྟཱ་ནི དི་སྭཱ ཝི་མ་ལཱ་དེ་ཝི་ཡཱ ཀ་ཉྩ་ན་ཝེ་ལེ༹ ནཱ་མ པུ་ཏྟེ ཨུ་པྤ་ནྣེ ཨཱ་ཛ་ཉྙ་ར་ཐེ་ན མ་ཧཱ་བྷི་ནི་ཀྑ་མ་ནཾ ནི་ཀྑ་མི་ཏྭཱ པ་བྦ་ཛི. ཨེ་ཀཱ ཙ ནཾ པུ་རི་ས་ཀོ་ཊི ཨ་ནུ་པ་བྦ་ཛི. སོ ཏེ་ཧི པ་རི་ཝུ་ཏོ མ་ཧཱ་པུ་རི་སོ ཚ མཱ་སེ པ་དྷཱ་ན་ཙ་རི་ཡཾ ཙ་རི་ཏྭཱ ཝི་སཱ་ཁ་པུ་ཎྞ་མཱ་ཡ ཝ་རུ་ཎ་བྲཱ་ཧྨ་ཎ་གཱ་མེ ཝ་ས་བྷ་བྲཱ་ཧྨ་ཎ་སྶ དྷཱི་ཏཱ་ཡ དི་ནྣཾ མ་དྷུ་པཱ་ཡཱ་སཾ པ་རི་བྷུ་ཉྫི་ཏྭཱ སཱ་ལ་ཝ་ནེ དི་ཝཱ་ཝི་ཧཱ་རཾ ཝཱི་ཏི་ནཱ་མེ་ཏྭཱ སུ་ཛཱ་ཏཱ་ཛཱི་ཝ་ཀེ་ན དི་ནྣཱ ཨ་ཊྛ ཏི་ཎ་མུ་ཊྛི་ཡོ ག་ཧེ་ཏྭཱ ཀ་ཀུ་དྷ་བོ་དྷིཾ ཨུ་པ་ས་ངྐ་མི་ཏྭཱ ཏེ་པ་ཉྙཱ་ས་ཧ་ཏྠ་ཝི་ཏྠ་ཏཾ ཏི་ཎ་ས་ནྠ་རཾ ས་ནྠ་རི་ཏྭཱ པ་ལླ་ངྐཾ ཨཱ་བྷུ་ཛི་ཏྭཱ ས་བྦ་ཉྙུ་ཏ་ཉྙཱ་ཎཾ པ་ཊི་ཝི་ཛ྄ཛྷི་ཏྭཱ ‘‘ཨ་ནེ་ཀ་ཛཱ་ཏི་སཾ་སཱ་ར’’ནྟི ཨུ་དཱ་ནཾ ཨུ་དཱ་ནེ་ཏྭཱ ཏ་ཏྠེ་ཝ ས་ཏྟ་ས་ཏྟཱ་ཧཾ ཝཱི་ཏི་ནཱ་མེ་ཏྭཱ ཨ་ཏྟ་ནཱ ས་ཧ པ་བྦ་ཛི་ཏཱ་ནཾ ཨ་རི་ཡ་དྷ་མྨ་པ་ཊི་ཝེ་དྷ་ས་མ་ཏྠ་ཏཾ ཉ་ཏྭཱ ཨཱ་ཀཱ་སེ་ན ཏ་ཏྠ ག་ནྟྭཱ ཨུ་ས་བྷ་ཝ་ཏཱི་ན་ག་ར་ས་མཱི་པེ ཨུ་ས་བྷ་ཝ་ཏུ་ཡྻཱ་ནེ ཨོ་ཏ་རི་ཏྭཱ བྷི་ཀྑུ་ཀོ་ཊི་པ་རི་ཝུ་ཏོ དྷ་མྨ་ཙ་ཀྐཾ པ་ཝ་ཏྟེ་སི. ཏ་དཱ ཀོ་ཊི་ས་ཏ་ས་ཧ་སྶཱ་ནཾ དྷ་མྨཱ་བྷི་ས་མ་ཡོ ཨ་ཧོ་སི. ཨ་ཡཾ པ་ཋ་མོ ཨ་བྷི་ས་མ་ཡོ.
པུ་ན ཨུ་ས་བྷ་ཝ་ཏི་ཡཱ ནཱ་མ ན་ག་ར་སྶ ཨ་ཝི་དཱུ་རེ སུ་ད་སྶ་ན་པ་བྦ་ཏེ སུ་ད་སྶ་ནོ ནཱ་མ དེ་ཝ་རཱ་ཛཱ པ་ཊི་ཝ་ས་ཏི. སོ མི་ཙྪཱ་དི་ཊྛི་ཀོ ཨ་ཧོ་སི. ས་ཀ་ལ་ཛ་མྦུ་དཱི་པེ པ་ན མ་ནུ་སྶཱ ཏ་སྶ ཨ་ནུ་སཾ་ཝ་ཙྪ་རཾ ས་ཏ་ས་ཧ་སྶ་གྒྷ་ནི་ཀཾ བ་ལིཾ ཨུ་པ་སཾ་ཧ་ར་ནྟི. སོ སུ་ད་སྶ་ནོ དེ་ཝ་རཱ་ཛཱ ན་ར་རཱ་ཛེ་ན ས་དྡྷིཾ ཨེ་ཀཱ་ས་ནེ ནི་སཱི་དི་ཏྭཱ བ་ལིཾ ས་མྤ་ཊི་ཙྪ་ཏི. ཨ་ཐ པི་ཡ་ད་སྶཱི བྷ་ག་ཝཱ ‘‘ཏ་སྶ སུ་ད་སྶ་ན་སྶ དེ་ཝ་རཱ་ཛ་སྶ ཏཾ དི་ཊྛི་ག་ཏཾ ཝི་ནོ་དེ་སྶཱ་མཱི’’ཏི ཏ་སྨིཾ དེ་ཝ་རཱ་ཛེ ཡ་ཀྑ་ས་མཱ་ག་མཾ ག་ཏེ ཏ་སྶ བྷ་ཝ་ནཾ པ་ཝི་སི་ཏྭཱ སི་རི་ས་ཡ་ནཾ ཨཱ་རུ་ཧི་ཏྭཱ ཚ་བྦ་ཎྞ་རཾ་སི་ཡོ མུ་ཉྩ་ནྟོ ཡུ་ག་ནྡྷ་ར་པ་བྦ་ཏེ ས་ར་ད་ས་མ་ཡེ སཱུ་རི་ཡོ ཝི་ཡ ནི་སཱི་དི. ཏ་སྶ པ་རི་ཝཱ་ར་པ་རི་ཙཱ་རི་ཀཱ དེ་ཝ་ཏཱ་ཡོ མཱ་ལཱ་ག་ནྡྷ་ཝི་ལེ་པ་ནཱ་དཱི་ཧི ད་ས་བ་ལཾ པཱུ་ཛེ་ཏྭཱ པ་རི་ཝཱ་རེ་ཏྭཱ ཨ་ཊྛཾ་སུ.
སུ་ད་སྶ་ནོ་པི དེ་ཝ་རཱ་ཛཱ ཡ་ཀྑ་ས་མཱ་ག་མ་ཏོ ཨཱ་ག་ཙྪ་ནྟོ ཨ་ཏྟ་ནོ བྷ་ཝ་ན་ཏོ ཚ་བྦ་ཎྞ་ར་སྨི་ཡོ ནི་ཙྪ་ར་ནྟེ དི་སྭཱ ཙི་ནྟེ་སི – ‘‘ཨ་ཉྙེ་སུ པ་ན དི་ཝ་སེ་སུ མ་མ བྷ་ཝ་ན་སྶ ཨེ་དི་སཱི ཨ་ནེ་ཀ་རཾ་སི་ཛཱ་ལ་ས་མུ་ཛྫ་ལ་ཝི་བྷཱུ་ཏི ན དི་ཊྛ་པུ་བྦཱ. ཀོ ནུ ཁོ ཨི་དྷ པ་ཝི་ཊྛོ དེ་ཝོ ཝཱ མ་ནུ་སྶོ ཝཱ’’ཏི ཨོ་ལོ་ཀེ་ནྟོ ཨུ་ད་ཡ་གི་རི་སི་ཁ་ར་མ་ཏྠ་ཀེ ས་ར་ད་ས་མ་ཡ་དི་ཝ་ས་ཀ་ར་མི་ཝ ཚ་བྦ་ཎྞ་རཾ་སི་ཛཱ་ལེ་ན ཨ་བྷི་ཛྫ་ལ་ནྟཾ ནི་སི་ནྣཾ བྷ་ག་ཝ་ནྟཾ དི་སྭཱ ཙི་ནྟེ་སི – ‘‘ཨ་ཡཾ མུ་ཎྜ་ཀ་ས་མ་ཎོ མ་མ པ་རི་ཝཱ་རེ་ན པ་རི་ཛ་ནེ་ན པ་རི་ཝུ་ཏོ ཝ་ར་ས་ཡ་ནེ ནི་སི་ནྣོ’’ཏི ཀོ་དྷཱ་བྷི་བྷཱུ་ཏ་མཱ་ན་སོ – ‘‘ཧ་ནྡཱ་ཧཾ ཨི་མ་སྶ ཨ་ཏྟ་ནོ བ་ལཾ ད་སྶེ་སྶཱ་མཱི’’ཏི ཙི་ནྟེ་ཏྭཱ ས་ཀ་ལཾ ཏཾ པ་བྦ་ཏཾ ཨེ་ཀ་ཛཱ་ལ་མ་ཀཱ་སི. ‘‘ཨི་མི་ནཱ ཨ་གྒི་ཛཱ་ལེ་ན ཚཱ་རི་ཀཱ་བྷཱུ་ཏོ མུ་ཎྜ་ཀ་ས་མ་ཎོ’’ཏི ཨོ་ལོ་ཀེ་ནྟོ ཨ་ནེ་ཀ་རཾ་སི་ཛཱ་ལ་ཝི་ས་ར་ཝི་པྥུ་རི་ཏ་ཝ་ར་ས་རཱི་རཾ པ་ས་ནྣ་ཝ་ད་ན་ཝ་ཎྞ་སོ་བྷཾ ཝི་པྤ་ས་ནྣ་ཙྪ་ཝི་རཱ་གཾ ད་ས་བ་ལ་མ་བྷི་ཛྫ་ལ་ནྟཾ དི་སྭཱ ཙི་ནྟེ་སི – ‘‘ཨ་ཡཾ ས་མ་ཎོ ཨ་གྒི་དཱ་ཧཾ ས་ཧ་ཏི, ཧ་ནྡཱ་ཧཾ ཨི་མཾ ས་མ་ཎཾ ཨུ་ད་ཀོ་གྷེ་ན ཨོ་སཱ་དེ་ཏྭཱ མཱ་རེ་སྶཱ་མཱི’’ཏི ཨ་ཏི་ག་མྦྷཱི་རཾ ཨུ་ད་ཀོ་གྷཾ ཝི་མཱ་ནཱ་བྷི་མུ་ཁཾ པ་ཝ་ཏྟེ་སི.
ཏ་ཏོ ཨུ་ད་ཀོ་གྷེ་ན པུ་ཎྞེ ཏ་སྨིཾ ཝི་མཱ་ནེ ནི་སི་ནྣ་སྶ ཏ་སྶ བྷ་ག་ཝ་ཏོ ཙཱི་ཝ་རེ ཨཾ་སུ་མ་ཏྟཾ ཝཱ ས་རཱི་རེ ལོ་མ་མ་ཏྟཾ ཝཱ ན ཏེ་མི་ཏྠ. ཏ་ཏོ སུ་ད་སྶ་ནོ དེ་ཝ་རཱ་ཛཱ – ‘‘ཨི་མི་ནཱ ས་མ་ཎོ ནི་ར་སྶཱ་སོ མ་ཏོ བྷ་ཝི་སྶ་ཏཱི’’ཏི མ་ནྟྭཱ ཨུ་ད་ཀཾ ས་ངྑི་པི་ཏྭཱ ཨོ་ལོ་ཀེ་ནྟོ བྷ་ག་ཝ་ནྟཾ ཨ་སི་ཏ་ཛ་ལ་དྷ་ར་ཝི་ཝ་ར་ག་ཏཾ ས་ར་ད་ས་མ་ཡ་ར་ཛ་ནི་ཀ་ར་མི་ཝ ཝི་ཝི་དྷ་རཾ་སི་ཛཱ་ལ་ཝི་ས་རེ་ན ཝི་རོ་ཙ་མཱ་ནཾ ས་ཀ་པ་རི་ས་པ་རི་ཝུ་ཏཾ ནི་སི་ནྣཾ དི་སྭཱ ཨ་ཏྟ་ནོ མ་ཀྑཾ ཨ་ས་ཧ་མཱ་ནོ – ‘‘ཧ་ནྡ མཱ་རེ་སྶཱ་མི ན’’ནྟི ཀོ་དྷེ་ན ན་ཝ་ཝི་དྷ་ཨཱ་ཝུ་དྷ་ཝ་སྶཾ ཝ་སྶེ་སི. ཨ་ཐ་སྶ བྷ་ག་ཝ་ཏོ ཨཱ་ནུ་བྷཱ་ཝེ་ན ས་བྦཱ་ཝུ་དྷཱ་ནི ནཱ་ནཱ་ཝི་དྷ་པ་ར་མ་རུ་ཙི་ར་ད་སྶ་ནཱ སུ་ར་བྷི་ཀུ་སུ་མ་མཱ་ལཱ ཧུ་ཏྭཱ ད་ས་བ་ལ་སྶ པཱ་ད་མཱུ་ལེ ནི་པ་ཏིཾ་སུ.
ཏ་ཏོ ཏཾ ཨ་ཙྪ་རི་ཡཾ དི་སྭཱ སུ་ད་སྶ་ནོ དེ་ཝ་རཱ་ཛཱ པ་ར་མ་ཀུ་པི་ཏ་མཱ་ན་སོ བྷ་ག་ཝ་ནྟཾ ཨུ་བྷོ་ཧི ཧ་ཏྠེ་ཧི པཱ་དེ་སུ ག་ཧེ་ཏྭཱ ཨ་ཏྟ་ནོ བྷ་ཝ་ན་ཏོ ནཱི་ཧ་རི་ཏུ་ཀཱ་མོ ཨུ་ཀྑི་པི་ཏྭཱ མ་ཧཱ་ས་མུ་དྡཾ ཨ་ཏི་ཀྐ་མི་ཏྭཱ ཙ་ཀྐ་ཝཱ་ལ༹་པ་བྦ་ཏཾ ག་ནྟྭཱ – ‘‘ཀིཾ ནུ ཁོ ས་མ་ཎོ ཛཱི་ཝ་ཏི ཝཱ མ་ཏོ ཝཱ’’ཏི ཨོ་ལོ་ཀེ་ནྟོ ཏ་སྨིཾ་ཡེ་ཝ ཨཱ་ས་ནེ ནི་སི་ནྣཾ དི་སྭཱ – ‘‘ཨ་ཧོ མ་ཧཱ་ནུ་བྷཱ་ཝོ ཨ་ཡཾ ས་མ་ཎོ, ནཱ་ཧཾ ཨི་མཾ ས་མ་ཎཾ ཨི་ཏོ ནི་ཀྐ་ཌྜྷི་ཏུཾ ས་ཀྐོ་མི. ཡ་དི ཧི མཾ ཀོ་ཙི ཛཱ་ནི་སྶ་ཏི, ཨ་ན་པྤ་ཀོ མེ ཨ་ཡ་སོ བྷ་ཝི་སྶ་ཏི. ཡཱ་ཝི་མཾ ཀོ་ཙི ན པ་སྶ་ཏི, ཏཱ་ཝ ནཾ ཝི་སྶ་ཛྫེ་ཏྭཱ ག་མི་སྶཱ་མཱི’’ཏི ཙི་ནྟེ་སི.
ཨ་ཐ ད་ས་བ་ལོ ཏ་སྶ ཙི་ཏྟཱ་ཙཱ་རཾ ཉ་ཏྭཱ ཏ་ཐཱ ཨ་དྷི་ཊྛཱ་སི, ཡ་ཐཱ ནཾ ས་བྦེ དེ་ཝ་མ་ནུ་སྶཱ པ་སྶ་ནྟི. ཏ་སྨི་ཉྩ དི་ཝ་སེ ས་ཀ་ལ་ཛ་མྦུ་དཱི་པེ ཨེ་ཀ་ས་ཏ་རཱ་ཛཱ་ནོ ཏ་སྶེ་ཝ ཨུ་པ་ཧཱ་ར་དཱ་ན་ཏྠཱ་ཡ ས་ནྣི་པ་ཏིཾ་སུ. ཏེ བྷ་ག་ཝ་ཏོ པཱ་དེ ག་ཧེ་ཏྭཱ ནི་སི་ནྣཾ སུ་ད་སྶ་ནཾ དེ་ཝ་རཱ་ཛཱ་ནཾ ན་ར་རཱ་ཛཱ་ནོ དི་སྭཱ – ‘‘ཨ་མྷཱ་ཀཾ དེ་ཝ་རཱ་ཛཱ མུ་ནི་རཱ་ཛ་སྶ པི་ཡ་ད་སྶི་སྶ ས་ཏྠུ་ནོ པཱ་ད་པ་རི་ཙ་རི་ཡཾ ཀ་རོ་ཏི, ཨ་ཧོ བུ་དྡྷཱ ནཱ་མ ཨ་ཙྪ་རི་ཡཱ, ཨ་ཧོ བུ་དྡྷ་གུ་ཎཱ ཝི་སི་ཊྛཱ’’ཏི བྷ་ག་ཝ་ཏི, པ་ས་ནྣ་ཙི་ཏྟཱ ས་བྦེ བྷ་ག་ཝ་ནྟཾ ན་མ་སྶ་མཱ་ནཱ སི་ར་སྨིཾ ཨ་ཉྫ་ལིཾ ཀ་ཏྭཱ ཨ་ཊྛཾ་སུ. ཏ་ཏྠ པི་ཡ་ད་སྶཱི བྷ་ག་ཝཱ ཏཾ སུ་ད་སྶ་ནཾ དེ་ཝ་རཱ་ཛཱ་ནཾ པ་མུ་ཁཾ ཀ་ཏྭཱ དྷ་མྨཾ དེ་སེ་སི. ཏ་དཱ དེ་ཝ་མ་ནུ་སྶཱ་ནཾ ན་ཝུ་ཏི་ཀོ་ཊི་ས་ཧ་སྶཱ་ནི ཨ་ར་ཧ་ཏྟཾ པཱ་པུ་ཎིཾ་སུ. སོ དུ་ཏི་ཡོ ཨ་བྷི་ས་མ་ཡོ ཨ་ཧོ་སི.
ཡ་དཱ པ་ན ན་ཝ་ཡོ་ཛ་ན་པྤ་མཱ་ཎེ ཀུ་མུ་ད་ན་ག་རེ བུ་དྡྷ་པ་ཙྩ་ཏྠི་ཀོ དེ་ཝ་ད་ཏྟོ ཝི་ཡ སོ་ཎ་ཏྠེ་རོ ནཱ་མ མ་ཧཱ་པ་དུ་མ་ཀུ་མཱ་རེ་ན ས་དྡྷིཾ མ་ནྟེ་ཏྭཱ ཏ་སྶ པི་ཏ་རཾ གྷཱ་ཏེ་ཏྭཱ པུ་ན པི་ཡ་ད་སྶཱི་བུ་དྡྷ་སྶ ཝ་དྷཱ་ཡ ནཱ་ན་པྤ་ཀཱ་རཾ པ་ཡོ་གཾ ཀ་ཏྭཱ་པི གྷཱ་ཏེ་ཏུཾ ཨ་ས་ཀྐོ་ནྟོ སོ དོ་ཎ་མུ་ཁ་ནཱ་ག་རཱ་ཛཱ་རོ་ཧཾ པ་ཀྐོ་སཱ་པེ་ཏྭཱ ཏཾ པ་ལོ་བྷེ་ཏྭཱ ཏ་མ་ཏྠཾ ཨཱ་རོ་ཙེ་སི – ‘‘ཡ་དཱ པ་ནཱ་ཡཾ ས་མ་ཎོ པི་ཡ་ད་སྶཱི ཨི་མཾ ན་ག་རཾ པི་ཎྜཱ་ཡ པ་ཝི་ས་ཏི, ཏ་དཱ དོ་ཎ་མུ་ཁཾ ནཱ་མ ག་ཛ་ཝ་རཾ ཝི་སྶ་ཛྫེ་ཏྭཱ པི་ཡ་ད་སྶཱི་ས་མ་ཎཾ མཱ་རེ་ཧཱི’’ཏི.
ཨ་ཐ སོ ཨཱ་རོ་ཧོ ཧི་ཏཱ་ཧི་ཏ་ཝི་ཙཱ་ར་ཎ་ར་ཧི་ཏོ རཱ་ཛ་ཝ་ལླ་བྷོ – ‘‘ཨ་ཡཾ ས་མ་ཎོ ཋཱ་ན་ནྟ་རཱ་པི མཾ ཙཱ་ཝེ་ཡྻཱ’’ཏི མ་ནྟྭཱ ‘‘སཱ་དྷཱུ’’ཏི ས་མྤ་ཊི་ཙྪི་ཏྭཱ དུ་ཏི་ཡ་དི་ཝ་སེ ད་ས་བ་ལ་སྶ ན་ག་ར་པྤ་ཝེ་ས་ན་ས་མ་ཡཾ ས་ལླ་ཀྑེ་ཏྭཱ སུ་ཛཱ་ཏ་མ་ཏྠ་ཀ་པི་ཎྜ་ཀུ་མྦྷ་ན་ལཱ་ཊཾ དྷ་ནུ་ས་དི་ས་དཱི་གྷ་སུ་ཎྜ་ཏ་ཊཾ སུ་ཝི་པུ་ལ་མུ་དུ་ཀ་ཎྞཾ མ་དྷུ་པི་ངྒ་ལ་ན་ཡ་ནཾ སུ་ནྡ་ར་ཀྑ་ནྡྷཱ་ས་ནཾ ཨ་ནུ་ཝ་ཊྚ་གྷ་ན་ཛ་གྷ་ནཾ ནི་ཙི་ཏ་གཱུ་ལ༹ྷ་ཛཱ་ཎུ་ཨ་ནྟ་རཾ ཨཱི་སཱ་ས་དི་ས་རུ་ཙི་ར་ད་ནྟཾ སུ་ཝཱ་ལ་དྷིཾ ཨ་པ་ཙི་ཏ་མེ་ཙ་ཀཾ ས་བྦ་ལ་ཀྑ་ཎ་ས་མྤ་ནྣཾ ཨ་སི་ཏ་ཛ་ལ་དྷ་ར་ས་དི་ས་ཙཱ་རུ་ད་སྶ་ནཾ སཱི་ཧ་ཝི་ཀྐ་ནྟ་ལ་ལི་ཏ་གཱ་མི་ནཾ ཛ་ངྒ་མ་མི་ཝ དྷ་རཱ་དྷ་རཾ ས་ཏྟ་པྤ་ཏི་ཊྛཾ ས་ཏྟ་དྷཱ པ་བྷི་ནྣཾ ས་བྦ་སོ ཝི་སྶ་ཝ་ནྟཾ ཝི་གྒ་ཧ་ཝ་ནྟ་མི་ཝ ཨ་ནྟ་ཀཾ ཨུ་པ་ས་ངྐ་མི་ཏྭཱ པི་ཎྜ་ཀ་བ་ལ༹་ཉྫ་ན་དྷཱུ་པ་ལེ་པཱ་དི་ཝི་སེ་སེ་ཧི བྷི་ཡྻོ་པི མ་ཏྟ་པྤ་མ་ཏྟཾ ཀ་ཏྭཱ ཨ་རི་ཝཱ་ར་ཎ་ཝཱ་ར་ཎཾ ཨེ་རཱ་ཝ་ཎ་ཝཱ་ར་ཎ་མི་ཝ ཨ་རི་ཛ་ན་ཝཱ་ར་ཎཾ མུ་ནི་ཝཱ་ར་ཎཾ མཱ་ར་ཎ་ཏྠཱ་ཡ པེ་སེ་སི. ཨ་ཐ སོ དྭི་ར་ད་ཝ་རོ མུ་ཏྟ་མ་ཏྟོ་ཝ ག་ཛ་མ་ཧིཾ་ས་ཏུ་ར་ངྒ་ན་ར་ནཱ་རི་ཡོ ཧ་ནྟྭཱ ཧ་ཏ་རུ་དྷི་ར་པ་རི་ར་ཉྫི་ཏ་ས་ད་ནྟ་ཀ་ར་ས་རཱི་རོ ཨ་ནྟ་ཛཱ་ལ་པ་རི་ཡོ་ན་དྡྷ་ན་ཡ་ནོ ས་ཀ་ཊ་ཀ་ཝཱ་ཊ་ཀཱུ་ཊཱ་གཱ་ར་དྭཱ་ར་ཏོ་ར་ཎཱ་དཱི་ནི བྷ་ཉྫི་ཏྭཱ ཀཱ་ཀ-ཀུ་ལ་ལ-གི་ཛ྄ཛྷཱ་དཱི་ཧི ཨ་ནུ་པ་རི་ཡཱ་ཡ་མཱ་ནོ ཧ་ཏ་མ་ཧིཾ་ས་ན་ར་ཏུ་ར་ངྒ་དི་ར་དཱ་དཱི་ནཾ ཨ་ངྒཱ་ནི ཨཱ་ལུ་མྤི་ཏྭཱ མ་ནུ་སྶ་བྷ་ཀྑོ ཡ་ཀྑོ ཝི་ཡ བྷ་ཀྑ་ཡ་ནྟོ དཱུ་ར་ཏོ་ཝ ད་ས་བ་ལཾ སི་སྶ་ག་ཎ་པ་རི་ཝུ་ཏཾ ཨཱ་ག་ཙྪ་ནྟཾ དི་སྭཱ ཨ་ནི་ལ་ག་རུ་ལ༹་ས་དི་ས་ཝེ་གོ ཝེ་གེ་ན བྷ་ག་ཝ་ནྟ་མ་བྷི་ག་ཉྪི.
ཨ་ཐ པུ་ར་ཝཱ་སི་ནོ པ་ན ཛ་ནཱ བྷ་ཡ་ས་ནྟཱ་པ་པ་རི་པཱུ་རི་ཏ་མཱ་ན་སཱ པཱ་སཱ་ད་པཱ་ཀཱ་ར་ཙ་ཡ་ཏ་རཱུ་པ་ག་ཏཱ ཏ་ཐཱ་ག་ཏཱ་བྷི་མུ་ཁ་མ་བྷི་དྷཱ་ཝ་ནྟཾ དི་སྭཱ ཧཱ་ཧཱ་ཀཱ་ར་ས་དྡ་མ་ཀཾ་སུ. ཀེ་ཙི པ་ན ཨུ་པཱ་ས་ཀཱ ཏཾ ནཱ་ན་པྤ་ཀཱ་རེ་ཧི ན་ཡེ་ཧི ནི་ཝཱ་ར་ཡི་ཏུ་མཱ་ར་བྷིཾ་སུ. ཨ་ཐ སོ བུ་དྡྷ་ནཱ་གོ ཧ་ཏྠི་ནཱ་ག་མཱ་ཡ་ནྟ་མོ་ལོ་ཀེ་ཏྭཱ ཀ་རུ་ཎཱ་ཝི་པྥཱ་ར་སཱི་ཏ་ལ་ཧ་ད་ཡོ མེ་ཏྟཱ་ཡ ཏཾ ཕ་རི. ཏ་ཏོ སོ ཧ་ཏྠི་ནཱ་གོ མེ་ཏྟཱ་ཕ་ར་ཎེ་ན མུ་དུ་ཀ་ཏ་ཧ་ད་ཡ་ས་ནྟཱ་ནོ ཨ་ཏྟ་ནོ དོ་སཱ་པ་རཱ་དྷཾ ཉ་ཏྭཱ ལ་ཛྫཱ་ཡ བྷ་ག་ཝ་ཏོ པུ་ར་ཏོ ཋཱ་ཏུཾ ཨ་ས་ཀྐོ་ནྟོ པ་ཐ་ཝི་ཡཾ པ་ཝི་ས་ནྟོ ཝི་ཡ སི་ར་སཱ བྷ་ག་ཝ་ཏོ པཱ་དེ་སུ ནི་པ་ཏི. ཨེ་ཝཾ ནི་པ་ནྣོ པ་ན སོ ཏི་མི་ར་ནི་ཀ་ར་ས་དི་ས་ས་རཱི་རོ ས་ཉྪཱ་པྤ་བྷཱ་ནུ་ར་ཉྫི་ཏ་ཝ་ར་ཀ་ན་ཀ་གི་རི་སི་ཁ་ར་ས་མཱི་པ་མུ་པ་ག་ཏོ ཨ་སི་ཏ་ས་ལི་ལ་དྷ་ར་ནི་ཀ་རོ ཝི་ཡ ཝི་རོ་ཙི་ཏྠ.
ཨ་ཐེ་ཝཾ མུ་ནི་རཱ་ཛ་པཱ་ད་མཱུ་ལེ ཀ་རི་རཱ་ཛཱ་ནཾ སི་ར་སཱ ནི་པ་ཏ་ནྟཾ དི་སྭཱ ནཱ་ག་ར་ཛ་ནཱ པ་ར་མ་པཱི་ཏི་པཱུ་རི་ཏ་ཧ་ད་ཡཱ སཱ་དྷུ་ཀཱ་ར་སཱི་ཧ་ནཱ་དཾ ཨུ་ཀྐུ་ཊྛི་ས་དྡཾ པ་ཝ་ཏྟ་ཡིཾ་སུ. སུ་ར་བྷི་ཀུ་སུ་མ་མཱ་ལཱ་ཙ་ནྡ་ན་ག་ནྡྷ་ཙུ་ཎྞཱ་ལ་ངྐཱ་རཱ་དཱི་ཧི ཏཾ ཨ་ནེ་ཀ་པྤ་ཀཱ་རཾ པཱུ་ཛེ་སུཾ. ས་མ་ནྟ་ཏོ ཙེ་ལུ་ཀྑེ་པཱ པ་ཝ་ཏྟིཾ་སུ. ག་ག་ན་ཏ་ལེ སུ་ར་དུ་ནྡུ་བྷི་ཡོ ཨ་བྷི་ན་དིཾ་སུ. ཨ་ཐ བྷ་ག་ཝཱ ཏ་མ་སི་ཏ་གི་རི་སི་ཁ་ར་མི་ཝ པཱ་ད་མཱུ་ལེ ནི་པ་ནྣཾ དི་ར་ད་ཝ་རཾ ཨོ་ལོ་ཀེ་ཏྭཱ ཨ་ངྐུ་ས་དྷ་ཛ་ཛཱ་ལ་ས་ངྑ་ཙ་ཀྐཱ་ལ་ངྐ་ཏེ་ན ཀ་ར་ཏ་ལེ་ན ག་ཛ་ཝ་ར་མ་ཏྠ་ཀཾ པ་རཱ་མ་སི་ཏྭཱ ཏ་སྶ ཙི་ཏྟཱ་ཙཱ་རཱ་ནུ་ཀཱུ་ལཱ་ཡ དྷ་མྨ་དེ་ས་ནཱ་ཡ ཏཾ ཨ་ནུ་སཱ་སི –
‘‘ག་ཛ་ཝ་ར ཝ་ད་ཏོ སུ་ཎོ་ཧི ཝཱ་ཙཾ, མ་མ ཧི་ཏ་མ་ཏྠ་ཡུ་ཏ་ཉྩ ཏཾ བྷ་ཛཱ་ཧི;
ཏ་ཝ ཝ་དྷ་ནི་ར་ཏཾ པ་དུ་ཊྛ་བྷཱ་ཝཾ, ཨ་པ་ན་ཡ ས་ནྟ་མུ་པེ་ཧི ཙཱ་རུ་ད་ནྟི.
‘‘ལོ་བྷེ་ན དོ་སེ་ན ཙ མོ་ཧ་ཏོ ཝཱ, ཡོ པཱ་ཎི་ནོ ཧིཾ་ས་ཏི ཝཱ་ར་ཎི་ནྡ;
སོ པཱ་ཎ་གྷཱ་ཏཱི སུ་ཙི་ར་མྤི ཀཱ་ལཾ, དུ་ཀྑཾ སུ་གྷོ་རཾ ན་ར་ཀེ་ནུ་བྷོ་ཏི.
‘‘མཱ་ཀཱ་སི མཱ་ཏ་ངྒ པུ་ནེ་ཝ་རཱུ་པཾ, ཀ་མྨཾ པ་མཱ་དེ་ན མ་དེ་ན ཝཱ་པི;
ཨ་ཝཱི་ཙི་ཡཾ དུ་ཀྑ་མ་ས་ཡ྄ཧ ཀ་པྤཾ, པ་པྤོ་ཏི པཱ་ཎཾ ཨ་ཏི་པཱ་ཏ་ཡ་ནྟོ.
‘‘དུ་ཀྑཾ སུ་གྷོ་རཾ ན་ར་ཀེ་ནུ་བྷོ་ཏྭཱ, མ་ནུ་སྶ་ལོ་ཀཾ ཡ་དི ཡཱ་ཏི བྷི་ཡྻོ;
ཨ་པྤཱ་ཡུ་ཀོ ཧོ་ཏི ཝི་རཱུ་པ་རཱུ་པོ, ཝི་ཧིཾ་ས་ཀོ དུ་ཀྑ་ཝི་སེ་ས་བྷཱ་གཱི.
‘‘ཡ་ཐཱ ཙ པཱ་ཎཱ པ་ར་མཾ པི་ཡཱ ཏེ, མ་ཧཱ་ཛ་ནེ ཀུ་ཉྫ་ར མ་ནྡ་ནཱ་ག;
ཏ་ཐཱ པ་ར་སྶཱ་པི པི་ཡཱ་ཏི ཉ་ཏྭཱ, པཱ་ཎཱ་ཏི་པཱ་ཏོ པ་རི་ཝ་ཛྫ་ནཱི་ཡོ.
‘‘དོ་སེ ཙ ཧིཾ་སཱ་ནི་ར་ཏེ ཝི་དི་ཏྭཱ, པཱ་ཎཱ་ཏི་པཱ་ཏཱ ཝི་ར་ཏེ གུ་ཎེ ཙ;
པཱ་ཎཱ་ཏི་པཱ་ཏཾ པ་རི་ཝ་ཛྫ་ཡ ཏྭཾ, ས་གྒེ སུ་ཁཾ ཨི་ཙྪ་སི ཙེ པ་ར་ཏྠ.
‘‘པཱ་ཎཱ་ཏི་པཱ་ཏཱ ཝི་ར་ཏོ སུ་ད་ནྟོ, པི་ཡོ མ་ནཱ་པོ བྷ་ཝ་ཏཱི་དྷ ལོ་ཀེ;
ཀཱ་ཡ་སྶ བྷེ་དཱ ཙ པ་རཾ པ་ན་སྶ, ས་གྒཱ་དྷི་ཝཱ་སཾ ཀ་ཐ་ཡ་ནྟི བུ་དྡྷཱ.
‘‘དུ་ཀྑཱ་ག་མཾ ནི་ཙྪ་ཏི ཀོ་ཙི ལོ་ཀེ, ས་བྦོ་པི ཛཱ་ཏོ སུ་ཁ་མེ་ས་ཏེ་ཝ;
ཏ་སྨཱ མ་ཧཱ་ནཱ་ག ཝི་ཧཱ་ཡ ཧིཾ་སཾ, བྷཱ་ཝེ་ཧི མེ་ཏྟཾ ཀ་རུ་ཎ་ཉྩ ཀཱ་ལེ’’ཏི.
ཨ་ཐེ་ཝཾ ད་ས་བ་ལེ་ནཱ་ནུ་སཱ་སི་ཡ་མཱ་ནོ ད་ནྟི་ཝ་རོ ས་ཉྙཾ པ་ཊི་ལ་བྷི་ཏྭཱ པ་ར་མ་ཝི་ནཱི་ཏོ ཝི་ན་ཡཱ་ཙཱ་ར་ས་མྤ་ནྣོ སི་སྶོ ཝི་ཡ ཨ་ཧོ་སི. ཨེ་ཝཾ སོ པི་ཡ་ད་སྶཱི བྷ་ག་ཝཱ ཨ་མྷཱ་ཀཾ ས་ཏྠཱ ཝི་ཡ དྷ་ན་པཱ་ལཾ དོ་ཎ་མུ་ཁཾ ཀ་རི་ཝ་རཾ ད་མི་ཏྭཱ ཏ་ཏྠ མ་ཧཱ་ཛ་ན་ས་མཱ་ག་མེ དྷ་མྨཾ དེ་སེ་སི. ཏ་དཱ ཨ་སཱི་ཏི་ཀོ་ཊི་ས་ཧ་སྶཱ་ནཾ དྷ་མྨཱ་བྷི་ས་མ་ཡོ ཨ་ཧོ་སི. ཨ་ཡཾ ཏ་ཏི་ཡོ ཨ་བྷི་ས་མ་ཡོ ཨ་ཧོ་སི. ཏེ་ན ཝུ་ཏྟཾ –
༡. ‘‘སུ་ཛཱ་ཏ་སྶ ཨ་པ་རེ་ན, ས་ཡ་མྦྷཱུ ལོ་ཀ་ནཱ་ཡ་ཀོ;
དུ་རཱ་ས་དོ ཨ་ས་མ་ས་མོ, པི་ཡ་ད་སྶཱི མ་ཧཱ་ཡ་སོ.
༢. ‘‘སོ་པི བུ་དྡྷོ ཨ་མི་ཏ་ཡ་སོ, ཨཱ་དི་ཙྩོ་ཝ ཝི་རོ་ཙ་ཏི;
ས་བྦཾ ཏ་མཾ ནི་ཧ་ནྟྭཱ་ན, དྷ་མྨ་ཙ་ཀྐཾ པ་ཝ་ཏྟ་ཡི.
༣. ‘‘ཏ་སྶཱ་པི ཨ་ཏུ་ལ་ཏེ་ཛ་སྶ, ཨ་ཧེ་སུཾ ཨ་བྷི་ས་མ་ཡཱ ཏ་ཡོ;
ཀོ་ཊི་ས་ཏ་ས་ཧ་སྶཱ་ནཾ, པ་ཋ་མཱ་བྷི་ས་མ་ཡོ ཨ་ཧུ.
༤. ‘‘སུ་ད་སྶ་ནོ དེ་ཝ་རཱ་ཛཱ, མི་ཙྪཱ་དི་ཊྛི་མ་རོ་ཙ་ཡི;
ཏ་སྶ དི་ཊྛིཾ ཝི་ནོ་དེ་ནྟོ, ས་ཏྠཱ དྷ་མྨ་མ་དེ་ས་ཡི.
༥. ‘‘ཛ་ན་ས་ནྣི་པཱ་ཏོ ཨ་ཏུ་ལོ, མ་ཧཱ་ས་ནྣི་པ་ཏཱི ཏ་དཱ;
ན་ཝུ་ཏི་ཀོ་ཊི་ས་ཧ་སྶཱ་ནཾ, དུ་ཏི་ཡཱ་བྷི་ས་མ་ཡོ ཨ་ཧུ.
༦. ‘‘ཡ་དཱ དོ་ཎ་མུ་ཁཾ ཧ་ཏྠིཾ, ཝི་ནེ་སི ན་ར་སཱ་ར་ཐི;
ཨ་སཱི་ཏི་ཀོ་ཊི་ས་ཧ་སྶཱ་ནཾ, ཏ་ཏི་ཡཱ་བྷི་ས་མ་ཡོ ཨ་ཧཱུ’’ཏི.
སུ་མ་ངྒ་ལ་ན་ག་རེ པཱ་ལི་ཏོ ནཱ་མ རཱ་ཛ་པུ་ཏྟོ ཙ པུ་རོ་ཧི་ཏ་པུ་ཏྟོ ས་བྦ་ད་སྶི་ཀུ་མཱ་རོ ཙཱ་ཏི དྭེ ས་ཧཱ་ཡ་ཀཱ ཨ་ཧེ་སུཾ. ཏེ པི་ཡ་ད་སྶི་མྷི ས་མྨཱ་ས་མྦུ་དྡྷེ ཙཱ་རི་ཀཾ ཙ་ར་ནྟེ ‘‘ཨ་ཏྟ་ནོ ན་ག་རཾ ས་མྤ་ཏྟོ’’ཏི སུ་ཏྭཱ ཀོ་ཊི་ས་ཏ་ས་ཧ་སྶ་པ་རི་ཝཱ་རཱ པ་ཙྩུ་གྒ་མ་ནཾ ཀ་ཏྭཱ ཏ་སྶ དྷ་མྨཾ སུ་ཏྭཱ ས་ཏྟཱ་ཧཾ མ་ཧཱ་དཱ་ནཾ ད་ཏྭཱ ས་ཏྟ་མེ དི་ཝ་སེ བྷ་ག་ཝ་ཏོ བྷ་ཏྟཱ་ནུ་མོ་ད་ནཱ་ཝ་སཱ་ནེ ཀོ་ཊི་ས་ཏ་ས་ཧ་སྶེ་ཧི ས་དྡྷིཾ པ་བྦ་ཛི་ཏྭཱ ཨ་ར་ཧ་ཏྟཾ པཱ་པུ་ཎིཾ་སུ. ཏེ་སཾ པ་ན མ་ཛ྄ཛྷེ བྷ་ག་ཝཱ པཱ་ཏི་མོ་ཀྑཾ ཨུ་དྡི་སི, སོ པ་ཋ་མོ ས་ནྣི་པཱ་ཏོ ཨ་ཧོ་སི. ཨ་ཐཱ་པ་རེ་ན ས་མ་ཡེ་ན སུ་ད་སྶ་ན་དེ་ཝ་རཱ་ཛ་སྶ ས་མཱ་ག་མེ ན་ཝུ་ཏི་ཀོ་ཊི་ཡོ ཨ་ར་ཧ་ཏྟཾ པཱ་པུ་ཎིཾ་སུ. ཏེ་ཧི པ་རི་ཝུ་ཏོ ས་ཏྠཱ པཱ་ཏི་མོ་ཀྑཾ ཨུ་དྡི་སི, ཨ་ཡཾ དུ་ཏི་ཡོ ས་ནྣི་པཱ་ཏོ ཨ་ཧོ་སི. པུ་ན དོ་ཎ་མུ་ཁ་ཝི་ན་ཡ་ནེ ཨ་སཱི་ཏི་ཀོ་ཊི་ཡོ པ་བྦ་ཛི་ཏྭཱ ཨ་ར་ཧ་ཏྟཾ པཱ་པུ་ཎིཾ་སུ. ཏེ་སཾ མ་ཛ྄ཛྷེ བྷ་ག་ཝཱ པཱ་ཏི་མོ་ཀྑཾ ཨུ་དྡི་སི, ཨ་ཡཾ ཏ་ཏི་ཡོ ས་ནྣི་པཱ་ཏོ ཨ་ཧོ་སི. ཏེ་ན ཝུ་ཏྟཾ –
༧. ‘‘ས་ནྣི་པཱ་ཏཱ ཏ་ཡོ ཨཱ་སུཾ, ཏ་སྶཱ་པི པི་ཡ་ད་སྶི་ནོ;
ཀོ་ཊི་ས་ཏ་ས་ཧ་སྶཱ་ནཾ, པ་ཋ་མོ ཨཱ་སི ས་མཱ་ག་མོ.
༨. ‘‘ཏ་ཏོ པ་རཾ ན་ཝུ་ཏི་ཀོ་ཊཱི, ས་མིཾ་སུ ཨེ་ཀ་ཏོ མུ་ནཱི;
ཏ་ཏི་ཡེ ས་ནྣི་པཱ་ཏ་མྷི, ཨ་སཱི་ཏི་ཀོ་ཊི་ཡོ ཨ་ཧཱུ’’ཏི.
ཏ་དཱ ཨ་མྷཱ་ཀཾ བོ་དྷི་ས་ཏྟོ ཀ་སྶ་པོ ནཱ་མ བྲཱ་ཧྨ་ཎ་མཱ་ཎ་ཝོ ཨི་ཏི་ཧཱ་ས་པ་ཉྩ་མཱ་ནཾ ཏི་ཎྞཾ ཝེ་དཱ་ནཾ པཱ་ར་གཱུ ཧུ་ཏྭཱ ས་ཏྠུ དྷ་མྨ་དེ་ས་ནཾ སུ་ཏྭཱ ཀོ་ཊི་ས་ཏ་ས་ཧ་སྶ་པ་རི་ཙྩཱ་གེ་ན པ་ར་མཱ་རཱ་མཾ ས་ངྒྷཱ་རཱ་མཾ ཀཱ་རེ་ཏྭཱ ས་ར་ཎེ་སུ ཙ པ་ཉྩ་སཱི་ལེ་སུ ཙ པ་ཏི་ཊྛཱ་སི. ཨ་ཐ ནཾ ས་ཏྠཱ – ‘‘ཨི་ཏོ ཨ་ཊྛཱ་ར་ས་ཀ་པྤ་ས་ཏ་ཙྩ་ཡེ་ན གོ་ཏ་མོ ནཱ་མ བུ་དྡྷོ ལོ་ཀེ བྷ་ཝི་སྶ་ཏཱི’’ཏི བྱཱ་ཀཱ་སི. ཏེ་ན ཝུ་ཏྟཾ –
༩. ‘‘ཨ་ཧཾ ཏེ་ན ས་མ་ཡེ་ན, ཀ་སྶ་པོ ནཱ་མ བྲཱ་ཧྨ་ཎོ;
ཨ་ཛ྄ཛྷཱ་ཡ་ཀོ མ་ནྟ་དྷ་རོ, ཏི་ཎྞཾ ཝེ་དཱ་ན པཱ་ར་གཱུ.
༡༠. ‘‘ཏ་སྶ དྷ་མྨཾ སུ་ཎི་ཏྭཱ་ན, པ་སཱ་དཾ ཛ་ན་ཡིཾ ཨ་ཧཾ;
ཀོ་ཊི་ས་ཏ་ས་ཧ་སྶེ་ཧི, ས་ངྒྷཱ་རཱ་མཾ ཨ་མཱ་པ་ཡིཾ.
༡༡. ‘‘ཏ་སྶ ད་ཏྭཱ་ན ཨཱ་རཱ་མཾ, ཧ་ཊྛོ སཾ་ཝི་གྒ་མཱ་ན་སོ;
ས་ར་ཎེ པ་ཉྩ་སཱི་ལེ ཙ, ད་ལ༹་ཧཾ ཀ་ཏྭཱ ས་མཱ་དི་ཡིཾ.
༡༢. ‘‘སོ་པི མཾ བུ་དྡྷོ བྱཱ་ཀཱ་སི, ས་ངྒྷ་མ་ཛ྄ཛྷེ ནི་སཱི་དི་ཡ;
ཨ་ཊྛཱ་ར་སེ ཀ་པྤ་ས་ཏེ, ཨ་ཡཾ བུ་དྡྷོ བྷ་ཝི་སྶ་ཏི.
༡༣. ‘‘པ་དྷཱ་ནཾ པ་ད་ཧི་ཏྭཱ་ན…པེ… ཧེ་སྶཱ་མ ས་མྨུ་ཁཱ ཨི་མཾ.
༡༤. ‘‘ཏ་སྶཱ་པི ཝ་ཙ་ནཾ སུ་ཏྭཱ, བྷི་ཡྻོ ཙི་ཏྟཾ པ་སཱ་ད་ཡིཾ;
ཨུ་ཏྟ་རིཾ ཝ་ཏ་མ་དྷི་ཊྛཱ་སིཾ, ད་ས་པཱ་ར་མི་པཱུ་རི་ཡཱ’’ཏི.
ཏ་ཏྠ ས་ར་ཎེ པ་ཉྩ་སཱི་ལེ ཙཱཏི ཏཱི་ཎི ས་ར་ཎཱ་ནི པ་ཉྩ སཱི་ལཱ་ནི ཙཱ་ཏི ཨ་ཏྠོ. ཨ་ཊྛཱ་ར་སེ ཀ་པྤ་ས་ཏེཏི ཨི་ཏོ ཨ་ཊྛ་ས་ཏཱ་དྷི་ཀ་སྶ ཀ་པྤ་ས་ཧ་སྶ་སྶ ཨ་ཙྩ་ཡེ་ནཱ་ཏི ཨ་ཏྠོ.
ཏ་སྶ པ་ན བྷ་ག་ཝ་ཏོ སུ་དྷ་ཉྙཾ ནཱ་མ ན་ག་རཾ ཨ་ཧོ་སི. པི་ཏཱ སུ་ད་ཏྟོ ནཱ་མ རཱ་ཛཱ, མཱ་ཏཱ སུ་ཙ་ནྡཱ ནཱ་མ དེ་ཝཱི, པཱ་ལི་ཏོ ཙ ས་བྦ་ད་སྶཱི ཙ དྭེ ཨ་གྒ་སཱ་ཝ་ཀཱ, སོ་བྷི་ཏོ ནཱ་མུ་པ་ཊྛཱ་ཀོ, སུ་ཛཱ་ཏཱ ཙ དྷ་མྨ་དི་ནྣཱ ཙ དྭེ ཨ་གྒ་སཱ་ཝི་ཀཱ, ཀ་ཀུ་དྷ་རུ་ཀྑོ བོ་དྷི, ས་རཱི་རཾ ཨ་སཱི་ཏི་ཧ་ཏྠུ་བྦེ་དྷཾ ཨ་ཧོ་སི, ན་ཝུ་ཏི་ཝ་སྶ་ས་ཧ་སྶཱ་ནི ཨཱ་ཡུ, ཝི་མ་ལཱ ནཱ་མ་སྶ ཨ་གྒ་མ་ཧེ་སཱི ཨ་ཧོ་སི, ཀ་ཉྩ་ནཱ་ཝེ་ལོ༹ ནཱ་མ པུ་ཏྟོ, སོ ཨཱ་ཛ་ཉྙ་ར་ཐེ་ན ནི་ཀྑ་མཱི་ཏི. ཏེ་ན ཝུ་ཏྟཾ –
༡༥. ‘‘སུ་དྷ་ཉྙཾ ནཱ་མ ན་ག་རཾ, སུ་ད་ཏྟོ ནཱ་མ ཁ་ཏྟི་ཡོ;
ཙ་ནྡཱ ནཱ་མཱ་སི ཛ་ནི་ཀཱ, པི་ཡ་ད་སྶི་སྶ ས་ཏྠུ་ནོ.
༢༠. ‘‘པཱ་ལི་ཏོ ས་བྦ་ད་སྶཱི ཙ, ཨ་ཧེ་སུཾ ཨ་གྒ་སཱ་ཝ་ཀཱ;
སོ་བྷི་ཏོ ནཱ་མུ་པ་ཊྛཱ་ཀོ, པི་ཡ་ད་སྶི་སྶ ས་ཏྠུ་ནོ.
༢༡. ‘‘སུ་ཛཱ་ཏཱ དྷ་མྨ་དི་ནྣཱ ཙ, ཨ་ཧེ་སུཾ ཨ་གྒ་སཱ་ཝི་ཀཱ;
བོ་དྷི ཏ་སྶ བྷ་ག་ཝ་ཏོ, ཀ་ཀུ་དྷོ་ཏི པ་ཝུ་ཙྩ་ཏི.
༢༣. ‘‘སོ་པི བུ་དྡྷོ ཨ་མི་ཏ་ཡ་སོ, དྭ་ཏྟིཾ་ས་ཝ་ར་ལ་ཀྑ་ཎོ;
ཨ་སཱི་ཏི་ཧ་ཏྠ་མུ་བྦེ་དྷོ, སཱ་ལ་རཱ་ཛཱ་ཝ དི་སྶ་ཏི.
༢༤. ‘‘ཨ་གྒི་ཙ་ནྡ་སཱུ་རི་ཡཱ་ནཾ, ན་ཏྠི ཏཱ་དི་སི་ཀཱ པ་བྷཱ;
ཡ་ཐཱ ཨ་ཧུ པ་བྷཱ ཏ་སྶ, ཨ་ས་མ་སྶ མ་ཧེ་སི་ནོ.
༢༥. ‘‘ཏ་སྶཱ་པི དེ་ཝ་དེ་ཝ་སྶ, ཨཱ་ཡུ ཏཱ་ཝ་ཏ་ཀཾ ཨ་ཧུ;
ན་ཝུ་ཏི་ཝ་སྶ་ས་ཧ་སྶཱ་ནི, ལོ་ཀེ ཨ་ཊྛཱ་སི ཙ་ཀྑུ་མཱ.
༢༦. ‘‘སོ་པི བུ་དྡྷོ ཨ་ས་མ་ས་མོ, ཡུ་གཱ་ནི་པི ཏཱ་ནི ཨ་ཏུ་ལི་ཡཱ་ནི;
ས་བྦཾ ཏ་མ་ནྟ་ར་ཧི་ཏཾ, ན་ནུ རི་ཏྟཱ ས་བྦ་ས་ངྑཱ་རཱ’’ཏི.
ཏ་ཏྠ སཱ་ལ་རཱ་ཛཱ ཝཱཏི ས་བྦ་ཕཱ་ལི་ཕུ་ལློ པ་ར་མ་ར་མ་ཎཱི་ཡ་ད་སྶ་ནོ ས་མ་ཝ་ཊྚ་ཀྑ་ནྡྷོ སཱ་ལ་རཱ་ཛཱ ཝི་ཡ དི་སྶ་ཏི. ཡུ་གཱ་ནི་པི ཏཱ་ནཱིཏི ཨ་གྒ་སཱ་ཝ་ཀ་ཡུ་གཱ་དཱི་ནི ཡུ་ག་ལཱ༹་ནི. སེ་ས་གཱ་ཐཱ་སུ ས་བྦ་ཏྠ ཨུ་ཏྟཱ་ན་མེ་ཝཱ་ཏི.
པི་ཡ་ད་སྶཱི་བུ་དྡྷ་ཝཾ་ས་ཝ་ཎྞ་ནཱ ནི་ཊྛི་ཏཱ.
ནི་ཊྛི་ཏོ ཏེ་ར་ས་མོ བུ་དྡྷ་ཝཾ་སོ.