༡༡. ར་ཊྛ་པཱ་ལ་ཏྠེ་ར་ཨ་པ་དཱ་ན་ཝ་ཎྞ་ནཱ
ཨེ་ཀཱ་ད་ས་མཱ་པ་དཱ་ནེ པ་དུ་མུ་ཏྟ་ར་སྶ བྷ་ག་ཝ་ཏོཏི་ཨཱ་དི་ཀཾ ཨཱ་ཡ་སྨ་ཏོ ར་ཊྛ་པཱ་ལ་ཏྠེ་ར་སྶ ཨ་པ་དཱ་ནཾ. ཨ་ཡ་མྤི པུ་རི་མ་བུ་དྡྷེ་སུ ཀ་ཏཱ་དྷི་ཀཱ་རོ ཏ་ཏྠ ཏ་ཏྠ བྷ་ཝེ ཝི་ཝ་ཊྚཱུ་པ་ནི་སྶ་ཡཱ་ནི པུ་ཉྙཱ་ནི ཨུ་པ་ཙི་ན་ནྟོ པ་དུ་མུ་ཏྟ་ར་སྶ བྷ་ག་ཝ་ཏོ ཀཱ་ལེ ཏ་སྶ ཨུ་པྤ་ཏྟི་ཏོ པུ་རེ་ཏ་ར་མེ་ཝ ཧཾ་ས་ཝ་ཏཱི་ན་ག་རེ ག་ཧ་པ་ཏི་མ་ཧཱ་སཱ་ལ་ཀུ་ལེ ནི་བྦ་ཏྟི་ཏྭཱ ཝ་ཡ་པྤ་ཏྟོ པི་ཏུ ཨ་ཙྩ་ཡེ་ན གྷ་རཱ་ཝཱ་སེ པ་ཏི་ཊྛི་ཏོ ར་ཏ་ན་ཀོ་ཊྛཱ་གཱ་ར་ཀ་མྨི་ཀེ་ན ད་སྶི་ཏཾ ཨ་པ་རི་མཱ་ཎཾ ཀུ་ལ་ཝཾ་སཱ་ནུ་ག་ཏཾ དྷ་ནཾ དི་སྭཱ ‘‘ཨི་མཾ ཨེ་ཏྟ་ཀཾ དྷ་ན་རཱ་སིཾ མ་ཡ྄ཧཾ ཨ་ཡྻ་ཀ་པ་ཡྻ་ཀཱ་ད་ཡོ ཨ་ཏྟ་ནཱ ས་དྡྷིཾ ག་ཧེ་ཏྭཱ ག་ནྟུཾ ནཱ་ས་ཀྑིཾ་སུ, མ་ཡཱ པ་ན ག་ཧེ་ཏྭཱ ག་ནྟུཾ ཝ་ཊྚ་ཏཱི’’ཏི ཙི་ནྟེ་ཏྭཱ ཀ་པ་ཎ་དྡྷི་ཀཱ་དཱི་ནཾ མ་ཧཱ་དཱ་ནཾ དེ་ཏི. སོ ཨ་བྷི་ཉྙཱ་ལཱ་བྷིཾ ཨེ་ཀཾ ཏཱ་པ་སཾ ཨུ་པ་ཊྛ་ཧ་ནྟོ ཏེ་ན དེ་ཝ་ལོ་ཀཱ་དྷི་པ་ཙྩེ ཨུ་ཡྻོ་ཛི་ཏོ ཡཱ་ཝ་ཛཱི་ཝཾ པུ་ཉྙཱ་ནི ཀ་ཏྭཱ ཏ་ཏོ ཙུ་ཏོ དེ་ཝོ ཧུ་ཏྭཱ ནི་བྦ་ཏྟི. སོ ཏ་ཏྠ དེ་ཝ་ལོ་ཀེ དེ་ཝ་ར་ཛྫཾ ཀ་རོ་ནྟོ ཡཱ་ཝ་ཏཱ་ཡུ་ཀཾ ཋ་ཏྭཱ ཏ་ཏོ ཙུ་ཏོ མ་ནུ་སྶ་ལོ་ཀེ བྷི་ནྣཾ ར་ཊྛཾ ས་ནྡྷཱ་རེ་ཏུཾ ས་མ་ཏྠ་སྶ ཀུ་ལ་སྶ ཨེ་ཀ་པུ་ཏྟོ ཧུ་ཏྭཱ ནི་བྦ་ཏྟི. ཏེ་ན ཙ ས་མ་ཡེ་ན པ་དུ་མུ་ཏྟ་རོ ནཱ་མ བྷ་ག་ཝཱ ལོ་ཀེ ཨུ་པྤ་ཛྫི་ཏྭཱ པ་ཝ་ཏྟི་ཏ་ཝ་ར་དྷ་མྨ་ཙ་ཀྐོ ཝེ་ནེ་ཡྻ་ས་ཏྟཾ ནི་བྦཱ་ན་མ་ཧཱ་ན་ག་ར་ས་ངྑཱ་ཏ་ཁེ་མ་ནྟ་བྷཱུ་མིཾ ས་མྤཱ་པེ་སི. ཨ་ཐ སོ ཀུ་ལ་པུ་ཏྟོ ཨ་ནུ་ཀྐ་མེ་ན ཝི་ཉྙུ་ཏཾ པ་ཏྟོ ཨེ་ཀ་དི་ཝ་སཾ ཨུ་པཱ་ས་ཀེ་ཧི ས་དྡྷིཾ ཝི་ཧཱ་རཾ ག་ཏོ ས་ཏྠཱ་རཾ དྷ་མྨཾ དེ་སེ་ནྟཾ དི་སྭཱ པ་ས་ནྣ་ཙི་ཏྟོ པ་རི་ས་པ་རི་ཡ་ནྟེ ནི་སཱི་དི.
ཏེ་ན ཙ ས་མ་ཡེ་ན ས་ཏྠཱ ཨེ་ཀཾ བྷི་ཀྑུཾ ས་དྡྷཱ་པ་བྦ་ཛི་ཏཱ་ནཾ ཨ་གྒ་ཊྛཱ་ནེ ཋ་པེ་སི, ཏཾ དི་སྭཱ པ་ས་ནྣ་མཱ་ན་སོ ཏ་ད་ཏྠཱ་ཡ ཙི་ཏྟཾ ཋ་པེ་ཏྭཱ ས་ཏ་ས་ཧ་སྶ་བྷི་ཀྑུ་པ་རི་ཝཱ་ར་སྶ བྷ་ག་ཝ་ཏོ མ་ཧ་ཏཱ ས་ཀྐཱ་རེ་ན ས་ཏྟཱ་ཧཾ མ་ཧཱ་དཱ་ནཾ པ་ཝ་ཏྟེ་ཏྭཱ པ་ཎི་དྷཱ་ནཾ ཨ་ཀཱ་སི. ས་ཏྠཱ ཏ་སྶ ཨ་ན་ནྟ་རཱ་ཡེ་ན ཨི་ཛ྄ཛྷ་ན་བྷཱ་ཝཾ དི་སྭཱ ‘‘ཨ་ནཱ་ག་ཏེ གོ་ཏ་མ་སྶ ནཱ་མ ས་མྨཱ་ས་མྦུ་དྡྷ་སྶ སཱ་ས་ནེ ས་དྡྷཱ་པ་བྦ་ཛི་ཏཱ་ནཾ ཨ་གྒོ བྷ་ཝི་སྶ་ཏཱི’’ཏི བྱཱ་ཀཱ་སི. སོ ས་ཏྠཱ་རཾ བྷི་ཀྑུ་ས་ངྒྷ་ཉྩ ཝ་ནྡི་ཏྭཱ ཨུ་ཊྛཱ་ཡཱ་ས་ནཱ པ་ཀྐཱ་མི. སོ ཏ་ཏྠ ཡཱ་ཝ་ཏཱ་ཡུ་ཀཾ པུ་ཉྙཱ་ནི ཀ་ཏྭཱ ཏ་ཏོ ཙ་ཝི་ཏྭཱ དེ་ཝ་མ་ནུ་སྶེ་སུ སཾ་ས་ར་ནྟོ ཨི་ཏོ དྭཱ་ན་ཝུ་ཏི་ཀ་པྤེ ཕུ་སྶ་སྶ བྷ་ག་ཝ་ཏོ ཀཱ་ལེ ས་ཏྠུ ཝེ་མཱ་ཏི་ཀ་བྷཱ་ཏི་ཀེ་སུ ཏཱི་སུ རཱ་ཛ་པུ་ཏྟེ་སུ ས་ཏྠཱ་རཾ ཨུ་པ་ཊྛ་ཧ་ནྟེ་སུ ཏེ་སཾ པུ་ཉྙ་ཀི་རི་ཡཱ་ཡ ས་ཧཱ་ཡ་ཀི་ཙྩཾ ཨ་ཀཱ་སི. ཨེ་ཝཾ ཏ་ཏྠ ཏ་ཏྠ བྷ་ཝེ ཏཾ ཏཾ བ་ཧུཾ ཀུ་ས་ལཾ ཨུ་པ་ཙི་ནི་ཏྭཱ སུ་ག་ཏཱི་སུ་ཡེ་ཝ སཾ་ས་ར་ནྟོ ཨི་མ་སྨིཾ བུ་དྡྷུ་པྤཱ་དེ ཀུ་རུ་ར་ཊྛེ ཐུ་ལླ་ཀོ་ཊྛི་ཀ་ནི་ག་མེ ར་ཊྛ་པཱ་ལ་སེ་ཊྛི་གེ་ཧེ ནི་བྦ་ཏྟི, ཏ་སྶ བྷི་ནྣཾ ར་ཊྛཾ ས་ནྡྷཱ་རེ་ཏུཾ ས་མ་ཏྠེ ཀུ་ལེ ནི་བྦ་ཏྟ་ཏྟཱ ར་ཊྛ་པཱ་ལོཏི ཝཾ་སཱ་ནུ་ག་ཏ་མེ་ཝ ནཱ་མཾ ཨ་ཧོ་སི. སོ མ་ཧ་ཏཱ པ་རི་ཝཱ་རེ་ན ཝ་ཌྜྷ་ནྟོ ཨ་ནུ་ཀྐ་མེ་ན ཡོ་བྦ་ནཾ པ་ཏྟོ མཱ་ཏཱ་པི་ཏཱུ་ཧི པ་ཏི་རཱུ་པེ་ན དཱ་རེ་ན སཾ་ཡོ་ཛེ་ཏྭཱ མ་ཧ་ནྟེ ཙ ཡ་སེ པ་ཏི་ཊྛཱ་པི་ཏོ དི་བྦ་ས་མྤ་ཏྟི་ས་དི་སཾ ས་མྤ་ཏྟིཾ པ་ཙྩ་ནུ་བྷོ་ཏི. ཨ་ཐ བྷ་ག་ཝཱ ཀུ་རུ་ར་ཊྛེ ཛ་ན་པ་ད་ཙཱ་རི་ཀཾ ཙ་ར་ནྟོ ཐུ་ལླ་ཀོ་ཊྛི་ཀཾ ཨ་ནུ་པཱ་པུ་ཎི. ཏཾ སུ་ཏྭཱ ར་ཊྛ་པཱ་ལོ ཀུ་ལ་པུ་ཏྟོ ས་ཏྠཱ་རཾ ཨུ་པ་ས་ངྐ་མི་ཏྭཱ ས་ཏྠུ ས་ནྟི་ཀེ དྷ་མྨཾ སུ་ཏྭཱ པ་ཊི་ལ་དྡྷ་ས་དྡྷོ ས་ཏྟ་ཝཱ་རེ བྷ་ཏྟ་ཙྪེ་དེ ཀ་ཏྭཱ ཀི་ཙྪེ་ན ཀ་སི་རེ་ན མཱ་ཏཱ་པི་ཏ་རོ ཨ་ནུ་ཛཱ་ནཱ་པེ་ཏྭཱ ས་ཏྠཱ་རཾ ཨུ་པ་ས་ངྐ་མི་ཏྭཱ པ་བྦ་ཛྫཾ ཡཱ་ཙི་ཏྭཱ ས་ཏྠུ ཨཱ་ཎ་ཏྟི་ཡཱ ཨ་ཉྙ་ཏ་ར་སྶ ཐེ་ར་སྶ ས་ནྟི་ཀེ པ་བྦ་ཛི་ཏྭཱ ཡོ་ནི་སོ་མ་ན་སི་ཀཱ་རེ་ན ཀ་མྨཾ ཀ་རོ་ནྟོ ཝི་པ་སྶ་ནཾ ཝ་ཌྜྷེ་ཏྭཱ ཨ་ར་ཧ་ཏྟཾ པཱ་པུ་ཎི.
༡༧༩-༡༨༠. ཨ་ཐཱ་ཡ་སྨཱ ཨ་པ་ར་བྷཱ་གེ ཨ་ཏྟ་ནོ པུ་བྦ་ཀ་མྨཾ ས་རི་ཏྭཱ སོ་མ་ན་སྶ་ཛཱ་ཏོ པུ་བྦ་ཙ་རི་ཏཱ་པ་དཱ་ནཾ པ་ཀཱ་སེ་ནྟོ པ་དུ་མུ་ཏྟ་ར་སྶ བྷ་ག་ཝ་ཏོཏི་ཨཱ་དི་མཱ་ཧ. སུ་ནཱ་གོ སོ མ་ཡཱ དི་ནྣོཏི ཏ་དཱ མ་ཧཱ་དྷ་ན་སེ་ཊྛི ཧུ་ཏྭཱ ས་བྦཾ སཱ་པ་ཏེ་ཡྻཾ དཱ་ན་མུ་ཁེ ཝི་སྶ་ཛྫ་ན་ས་མ་ཡེ ས་ཏྟ་པྤ་ཏི་ཊྛོ སུ་ནྡ་རོ ནཱ་གོ ཧ་ཏྠི་རཱ་ཛཱ མ་ཡཱ དི་ནྣོ ཨ་ཧོ་སི. ཏཾ ད་སྶེ་ནྟོ ཨཱི་སཱ་ད་ནྟོཏི་ཨཱ་དི་མཱ་ཧ. ཨཱི་སཱ་ད་ནྟོ ར་ཐ་ཨཱི་ས་པྤ་མཱ་ཎ་ད་ནྟོ, སོ མ་ཡཱ དི་ནྣོ ཧ་ཏྠི་ནཱ་གོ. ཨུ་རཱུ་ལ༹ྷ་ཝཱཏི རཱ་ཛཱ་ཝ་ཧ་ན་ཡོ་གྒ་ས་མ་ཏྠོ, རཱ་ཛཱ་ར་ཧོ ཝཱ. སེ་ཏ་ཙྪ་ཏྟོཏི ཨ་ལ་ངྐཱ་ར་ཏྠཱ་ཡ ཨུ་པ་ཊྛ་ཧ་ན་སེ་ཏ་ཙྪ་ཏྟ་ས་ཧི་ཏོ་ཏི ཨ་ཏྠོ. པ་སོ་བྷི་ཏོཏི ཨཱ་རོ་ཧ་པ་རི་ཎཱ་ཧ་ཝཱ རཱུ་པ་སོ་བྷཱ་ཧི ས་མྤ་ནྣོ་ཏི ཨ་ཏྠོ. ས་ཀ་པྤ་ནོ ས་ཧ་ཏྠི་པོཏི ཧ་ཏྠི་ཨ་ལ་ངྐཱ་ར་ས་ཧི་ཏོ ཧ་ཏྠི་གོ་པ་ཀ་ས་ཧི་ཏོ་ཏི ཨ་ཏྠོ. ཨི་ཏྠ་མྦྷཱུ་ཏོ ཧ་ཏྠི་ནཱ་གོ པ་དུ་མུ་ཏྟ་ར་སྶ བྷ་ག་ཝ་ཏོ མ་ཡཱ དི་ནྣོ་ཏི ཨ་ཏྠོ.
༡༨༡. མ་ཡཱ བྷ་ཏྟཾ ཀཱ་རེ་ཏྭཱ་ནཱཏི མ་ཡཱ ཀཱ་རཱ་པི་ཏ་ཝི་ཧཱ་རེ ཝ་ས་ནྟཱ་ནཾ ཀོ་ཊི་ས་ངྑཱ་ནཾ བྷི་ཀྑཱུ་ནཾ ནི་ཙྩ་བྷ་ཏྟཾ པ་ཊྛ་པེ་ཏྭཱ མ་ཧེ་སི་ནོ ནི་ཡྻཱ་དེ་སི་ནྟི ས་མྦ་ནྡྷོ.
༡༨༣. ཛ་ལ་ཛུ་ཏྟ་མ་ནཱ་མ་ཀོཏི ཛ་ལ་ཏོ ཛཱ་ཏོ ཛ་ལ་ཛོ, ཀིཾ ཏཾ? པ་དུ་མཾ, པ་དུ་མེ་ན ས་མཱ་ན་ནཱ་མ་ཏྟཱ ཨུ་ཏྟ་མ་ཏྟཱ ཙ པ་དུ་མུ་ཏྟ་རོ ནཱ་མ བྷ་ག་ཝཱ་ཏི ཨ་ཏྠོ. སེ་སཾ ས་བྦ་ཏྠ ཨུ་ཏྟཱ་ན་ཏྠ་མེ་ཝཱ་ཏི.
ར་ཊྛ་པཱ་ལ་ཏྠེ་ར་ཨ་པ་དཱ་ན་ཝ་ཎྞ་ནཱ ས་མ་ཏྟཱ.
ཚ་པྤ་ཉྙཱ་ས་མ་མ་ཧཱ་ཝ་གྒ་ཝ་ཎྞ་ནཱ ས་མ་ཏྟཱ.
ཨི་ཏི ཝི་སུ་དྡྷ་ཛ་ན་ཝི་ལཱ་སི་ནི་ཡཱ ཨ་པ་དཱ་ན-ཨ་ཊྛ་ཀ་ཐཱ་ཡ
ཨེ་ཏྟཱ་ཝ་ཏཱ བུ་དྡྷ་པ་ཙྩེ་ཀ་བུ་དྡྷ་སཱ་ཝ་ཀ་ཏྠེ་རཱ་པ་དཱ་ན-ཨ་ཊྛ་ཀ་ཐཱ ས་མ་ཏྟཱ.
ནི་ག་མ་ན་ཀ་ཐཱ
སཱི་ཧ་ལ༹་དཱི་པ་ཀེ ཨ་པྤི་ཙྪ་ཏཱ་དི་གུ་ཎ་ཝ་ནྟཱ་ནཾ ཐེ་ར་ཝཾ་ས་པྤ་དཱི་པཱ་ནཾ ཨཱ་ན་ནྡ་ཏྠེ་རཱ་དཱི་ནཾ ས་བྦ་ས་ཏྟཱ་ནཾ ཏ་ཎྷཱ་མཱ་ན་དི་ཊྛཱ་ད་ཡོ ཚེ་ད་ན་ནི་གྒ་ཧ་ཝི་ཝེ་ཙ་ནཱ་དྱ་ཏྠཾ ས་ཏྟ་ཧི མཱ་སེ་ཧི ཨ་ཏི་ཝི་ཡ ཨཱ་རཱ་དྷ་ནེ་ན ལ་དྡྷ་ཀོ་ས་ལླེ་ན བོ་དྷི་ས་མྦྷཱ་རཾ ག་ཝེ་ས་ནྟེ་ན ས་ཏི་དྷི་ཏི་ག་ཏི་ཝཱི་རི་ཡ་པ་ར་ཀྐ་མ་ནྟེ་ན མ་ཧཱ་ས་མ་ནྟ་གུ་ཎ་སོ་བྷ་ནེ་ན ཏི་པི་ཊ་ཀ་དྷ་རེ་ན པ་ཎྜི་ཏེ་ན ཨཱ་བྷ་ཏཾ ཨི་མཾ ཨ་པ་དཱ་ན-ཨ་ཊྛ་ཀ་ཐཾ ས་བྦོ ས་དེ་ཝ་ལོ་ཀོ ཛཱ་ནཱ་ཏཱུ་ཏི.
ཨ་ནེ་ན ལོ་བྷཱ་དི་མ་ལཱ པ་ཛཱ་ནཾ, ཙ་ཀྑཱ་དི་རོ་གཱ ཝི་ཝི་དྷཱ ཙ དུ་ཀྑཱ;
ཀ་ལ་ཧཱ་དི་བྷ་ཡཱ དུ་ཀྑི་ཏཱ ཛཱ་ཏཱ, ཙོ་རཱ་ད་ཡོ་ན་ཏྠ་ཀ་རཱ ཙ ལོ་ཀེ.
ན་སྶ་ནྟུ མེ པ་ཉྩ ཝེ་རཱ ཙ པཱ་པཱ, ན་སྶ་ནྟུ གི་མྷེ ཡ་ཐཱ ཝུ་ཊྛི་ཝཱ་ཏཱ;
ཨ་ཊྛ་ངྒི་ཀ་མ་གྒ་ཝ་རེ་ན པ་ཏྭཱ, ནི་བྦཱ་ན་པུ་རཾ པ་ཊི་པཱ་ད་ཡཱ་མི.
ས་བྦ་དི་ཊྛི་ཉྩ མ་དྡ་ནྟོ, རཱ་ག་དོ་སཱ་དི་པཱ་པ་ཀེ;
སཾ་སཱ་ར་ཝ་ཊྚཾ ཚི་ནྡི་ཏྭཱ, ཨུ་པེ་མི ས་གྒ་མོ་ཀྑ་ཀེ.
ཨཱ་ཎཱ་ཁེ་ཏྟ་མྷི ས་བྦ་ཏྠ, ཨ་ཝཱི་ཙི་མྷི བྷ་ཝ་གྒ་ཏོ;
ས་བྦེ དྷ་མྨཱ་ནུ་ཡཱ་ཡ་ནྟུ, ཏ་ཡོ ལོ་ཀཱ ཨུ་ཏུ་པི ཙཱ་ཏི.
ཨ་པ་དཱ་ན-ཨ་ཊྛ་ཀ་ཐཱ ས་མ་ཏྟཱ.