༡༠. ཨུ་པ་ཝཱ་ན་ཏྠེ་ར་ཨ་པ་དཱ་ན་ཝ་ཎྞ་ནཱ
ད་ས་མཱ་པ་དཱ་ནེ པ་དུ་མུ་ཏྟ་རོ ནཱ་མ ཛི་ནོཏི་ཨཱ་དི་ཀཾ ཨཱ་ཡ་སྨ་ཏོ ཨུ་པ་ཝཱ་ན་ཏྠེ་ར་སྶ ཨ་པ་དཱ་ནཾ. ཨ་ཡཾ ཀི་ར པུ་རི་མ་བུ་དྡྷེ་སུ ཀ་ཏཱ་དྷི་ཀཱ་རོ ཏ་ཏྠ ཏ་ཏྠ བྷ་ཝེ ཝི་ཝ་ཊྚཱུ་པ་ནི་སྶ་ཡཱ་ནི པུ་ཉྙཱ་ནི ཨུ་པ་ཙི་ན་ནྟོ ཀེ་ན་ཙི ཀ་མྨ་ཙྪི་དྡེ་ན པ་དུ་མུ་ཏྟ་ར་སྶ བྷ་ག་ཝ་ཏོ ཀཱ་ལེ ད་ལླི་དྡ་ཀུ་ལེ ནི་བྦ་ཏྟི་ཏྭཱ ཝི་ཉྙུ་ཏཾ པ་ཏྟོ བྷ་ག་ཝ་ཏི པ་རི་ནི་བྦུ་ཏེ ཏ་སྶ དྷཱ་ཏུཾ ག་ཧེ་ཏྭཱ མ་ནུ་སྶ་དེ་ཝ་ནཱ་ག་ག་རུ་ལ༹་ཡ་ཀྑ་ཀུ་མྦྷ་ཎྜ་ག་ནྡྷ་བྦེ་ཧི ས་ཏྟ་ར་ཏ་ན་མ་ཡེ ས་ཏྟ་ཡོ་ཛ་ནི་ཀེ ཐཱུ་པེ ཀ་ཏེ ཏ་ཏྠ སུ་དྷོ་ཏཾ ཨ་ཏྟ་ནོ ཨུ་ཏྟ་རཱ་ས་ངྒཾ ཝེ་ལ༹་གྒེ ཨཱ་བ་ནྡྷི་ཏྭཱ དྷ་ཛཾ ཀ་ཏྭཱ པཱུ་ཛཾ ཨ་ཀཱ་སི. ཏཾ ག་ཧེ་ཏྭཱ ཨ་བྷི་ས་མྨ་ཏ་ཀོ ནཱ་མ ཡ་ཀྑ་སེ་ནཱ་པ་ཏི དེ་ཝེ་ཧི ཙེ་ཏི་ཡ་པཱུ་ཛཱ་ར་ཀྑ་ཎ་ཏྠཾ ཋ་པི་ཏོ ཨ་དི་སྶ་མཱ་ན་ཀཱ་ཡོ ཨཱ་ཀཱ་སེ དྷཱ་རེ་ནྟོ ཙེ་ཏི་ཡཾ ཏི་ཀྑ་ཏྟུཾ པ་ད་ཀྑི་ཎཾ ཨ་ཀཱ་སི. ཏཾ དི་སྭཱ བྷི་ཡྻོ་སོ་མ་ཏྟཱ་ཡ པ་ས་ནྣ་མཱ་ན་སོ ཨ་ཧོ་སི. སོ ཏེ་ན པུ་ཉྙ་ཀ་མྨེ་ན དེ་ཝ་མ་ནུ་སྶེ་སུ སཾ་ས་ར་ནྟོ ཨི་མ་སྨིཾ བུ་དྡྷུ་པྤཱ་དེ སཱ་ཝ་ཏྠི་ཡཾ བྲཱ་ཧྨ་ཎ་ཀུ་ལེ ནི་བྦ་ཏྟི་ཏྭཱ ཨུ་པ་ཝཱ་ནོཏི ལ་དྡྷ་ནཱ་མོ ཝ་ཡ་པྤ་ཏྟོ ཛེ་ཏ་ཝ་ན་པ་ཊི་གྒ་ཧ་ཎེ བུ་དྡྷཱ་ནུ་བྷཱ་ཝཾ དི་སྭཱ པ་ཊི་ལ་དྡྷ་ས་དྡྷོ པ་བྦ་ཛི་ཏྭཱ ཝི་པ་སྶ་ནཱ་ཡ ཀ་མྨཾ ཀ་རོ་ནྟོ ཚ་ལ༹་བྷི་ཉྙོ ཨ་ཧོ་སི. ཨ་ཐཱ་ཡ་སྨཱ ཨུ་པ་ཝཱ་ནོ བྷ་ག་ཝ་ཏོ ཨུ་པ་ཊྛཱ་ཀོ ཨ་ཧོ་སི. ཏེ་ན ཙ ས་མ་ཡེ་ན བྷ་ག་ཝ་ཏོ ཝཱ་ཏཱ་བཱ་དྷོ ཨུ་པྤ་ཛྫི. ཐེ་ར་སྶ གི་ཧི་ས་ཧཱ་ཡོ དེ་ཝ་ཧི་ཏོ ནཱ་མ བྲཱ་ཧྨ་ཎོ སཱ་ཝ་ཏྠི་ཡཾ པ་ཊི་ཝ་ས་ཏི. སོ ཐེ་རཾ ཙ་ཏཱུ་ཧི པ་ཙྩ་ཡེ་ཧི པ་ཝཱ་རེ་སི. ཨ་ཐཱ་ཡ་སྨཱ ཨུ་པ་ཝཱ་ནོ ནི་ཝཱ་སེ་ཏྭཱ པ་ཏྟ་ཙཱི་ཝ་རཾ ག་ཧེ་ཏྭཱ ཏ་སྶ བྲཱ་ཧྨ་ཎ་སྶ ནི་ཝེ་ས་ནཾ ཨུ་པ་ག་ཉྪི. བྲཱ་ཧྨ་ཎོ ‘‘ཀེ་ན་ཙི མ་ཉྙེ པ་ཡོ་ཛ་ནེ་ན ཐེ་རོ ཨཱ་ག་ཏོ བྷ་ཝི་སྶ་ཏཱི’’ཏི ཉ་ཏྭཱ ‘‘ཝ་དེ་ཡྻཱ་ཐ, བྷ་ནྟེ, ཀེ་ན་ཏྠོ’’ཏི ཨཱ་ཧ. ཐེ་རོ ཏ་སྶ བྲཱ་ཧྨ་ཎ་སྶ པ་ཡོ་ཛ་ནཾ ཨཱ་ཙི་ཀྑ་ནྟོ –
‘‘ཨ་ར་ཧཾ སུ་ག་ཏོ ལོ་ཀེ, ཝཱ་ཏེ་ཧཱ་བཱ་དྷི་ཀོ མུ་ནི;
ས་ཙེ ཨུ་ཎྷོ་ད་ཀཾ ཨ་ཏྠི, མུ་ནི་ནོ དེ་ཧི བྲཱ་ཧྨ་ཎ.
‘‘པཱུ་ཛི་ཏོ པཱུ་ཛ་ནེ་ཡྻཱ་ནཾ, ས་ཀྐ་རེ་ཡྻཱ་ན ས་ཀྐ་ཏོ;
ཨ་པ་ཙི་ཏོ་པ་ཙེ་ཡྻཱ་ནཾ, ཏ་སྶ ཨི་ཙྪཱ་མི ཧཱ་ཏ་ཝེ’’ཏི. (ཐེ་ར་གཱ. ༡༨༥-༡༨༦) –
གཱ་ཐཱ་དྭ་ཡཾ ཨ་བྷཱ་སི.
ཏ་སྶ་ཏྠོ – ཡོ ཨི་མ་སྨིཾ ལོ་ཀེ པཱུ་ཛ་ནེ་ཡྻཱ་ནཾ པཱུ་ཛེ་ཏ་བྦེ་ཧི ས་ཀྐཱ་དཱི་ཧི དེ་ཝེ་ཧི མ་ཧཱ་བྲ་ཧྨཱ་དཱི་ཧི ཙ བྲ་ཧྨེ་ཧི པཱུ་ཛི་ཏོ, ས་ཀྐ་རེ་ཡྻཱ་ནཾ ས་ཀྐཱ་ཏ་བྦེ་ཧི བི་མྦི་སཱ་ར་ཀོ་ས་ལ་རཱ་ཛཱ་དཱི་ཧི ས་ཀྐ་ཏོ, ཨ་པ་ཙེ་ཡྻཱ་ནཾ ཨ་པ་ཙཱ་ཡི་ཏ་བྦེ་ཧི མ་ཧེ་སཱི་ཧི ཁཱི་ཎཱ་ས་ཝེ་ཧི ཨ་པ་ཙི་ཏོ, ཀི་ལེ་སེ་ཧི ཨཱ་ར་ཀ་ཏྟཱ་དི་ནཱ ཨ་ར་ཧཾ, སོ་བྷ་ན་ག་མ་ནཱ་དི་ནཱ སུ་ག་ཏོ ས་བྦ་ཉྙཱུ མུ་ནི མ་ཡ྄ཧཾ ས་ཏྠཱ དེ་ཝ་དེ་ཝོ ས་ཀྐཱ་ནཾ ཨ་ཏི་ས་ཀྐོ བྲ་ཧྨཱ་ནཾ ཨ་ཏི་བྲ་ཧྨཱ, སོ དཱ་ནི ཝཱ་ཏེ་ཧི ཝཱ་ཏ་ཧེ་ཏུ ཝཱ་ཏ་ཀྑོ་བྷ་ནི་མི་ཏྟཾ ཨཱ་བཱ་དྷི་ཀོ ཛཱ་ཏོ. ས་ཙེ, བྲཱ་ཧྨ་ཎ, ཨུ་ཎྷོ་ད་ཀཾ ཨ་ཏྠི, ཏ་སྶ ཝཱ་ཏཱ་བཱ་དྷ་ཝཱུ་པ་ས་མ་ན་ཏྠཾ ཏཾ ཧཱ་ཏ་ཝེ ཨུ་པ་ནེ་ཏུཾ ཨི་ཙྪཱ་མཱི་ཏི.
ཏཾ སུ་ཏྭཱ བྲཱ་ཧྨ་ཎོ ཨུ་ཎྷོ་ད་ཀཾ ཏ་ད་ནུ་རཱུ་པཾ ཝཱ་ཏ་ཧ་ར་ཉྩ བྷེ་ས་ཛྫཾ བྷ་ག་ཝ་ཏོ ཨུ་པ་ནཱ་མེ་སི. ཏེ་ན ཙ ས་ཏྠུ རོ་གོ ཝཱུ་པ་ས་མི. ཏ་སྶ བྷ་ག་ཝཱ ཨ་ནུ་མོ་ད་ནཾ ཨ་ཀཱ་སི.
༡༢༢. ཨ་ཐཱ་ཡ་སྨཱ ཨུ་པ་ཝཱ་ནོ ཨ་པ་ར་བྷཱ་གེ ཨ་ཏྟ་ནོ པུ་བྦ་ཀ་མྨཾ ས་རི་ཏྭཱ སོ་མ་ན་སྶ་ཛཱ་ཏོ པུ་བྦ་ཙ་རི་ཏཱ་པ་དཱ་ནཾ པ་ཀཱ་སེ་ནྟོ པ་དུ་མུ་ཏྟ་རོ ནཱ་མ ཛི་ནོཏི་ཨཱ་དི་མཱ་ཧ. ཏ་ཏྠ པ་དུ་མུ་ཏྟ་རོཏི་ཨཱ་དཱི་ནི པུ་བྦེ ཝུ་ཏྟ་ཏྠཱ་ནེ་ཝ.
༡༢༣. མ་ཧཱ་ཛ་ནཱ ས་མཱ་ག་མྨཱཏི ས་ཀ་ལ་ཛ་མྦུ་དཱི་པ་ཝཱ་སི་ནོ རཱ་སི་བྷཱུ་ཏཱ་ཏི ཨ་ཏྠོ. ཙི་ཏ་ཀཾ ཀ་ཏྭཱཏི ཡོ་ཛ་ནུ་བྦེ་དྷཾ ཙ་ནྡ་ན་རཱ་སི་ཙི་ཏ་ཀཾ ཀ་ཏྭཱ བྷ་ག་ཝ་ཏོ ས་རཱི་རཾ ཏ་ཏྠ ཨ་བྷི་རོ་པ་ཡིཾ་སཱུ་ཏི ས་མྦ་ནྡྷོ.
༡༢༤. ས་རཱི་ར་ཀི་ཙྩཾ ཀ་ཏྭཱ་ནཱཏི ཨཱ་ད་ཧ་ནཱ་ཏི ཨ་གྒི་ནཱ ད་ཧ་ན་ཀི་ཙྩཾ ཀ་ཏྭཱ་ཏི ཨ་ཏྠོ.
༡༢༧-༢༨. ཛ་ངྒྷཱ མ་ཎི་མ་ཡཱ ཨཱ་སཱིཏི མ་ནུ་སྶེ་ཧི ཀ་ཏ་ཐཱུ་པེ ཛ་ངྒྷཱ པུ་པྥ་ཝཱ་ཧ་ཏྠཾ ཙ་རི་ཏ་ཊྛཱ་ནཾ མ་ཎི་མ་ཡཱ ཨི་ནྡ་ནཱི་ལ་མ་ཎི་ནཱ ཀ་ཏཱ་ཏི ཨ་ཏྠོ. མ་ཡ་མྤཱིཏི ས་བྦེ དེ་ཝཱ ཐཱུ་པཾ ཀ་རི་སྶཱ་མཱ་ཏི ཨ་ཏྠོ.
༡༢༩. དྷཱ་ཏུ ཨཱ་ཝེ་ཎི་ཀཱ ན་ཏྠཱིཏི དེ་ཝ་མ་ནུ་སྶེ་ཧི ཝི་སུཾ ཝི་སུཾ ཙེ་ཏི་ཡཾ ཀཱ་ཏུཾ ཨཱ་ཝེ་ཎི་ཀཱ ཝི་སུཾ དྷཱ་ཏུ ན་ཏྠི, ཏཾ ད་སྶེ་ནྟོ ས་རཱི་རཾ ཨེ་ཀ་པི་ཎྜི་ཏནྟི ཨཱ་ཧ. ཨ་དྷི་ཊྛཱ་ན་བ་ལེ་ན ས་ཀ་ལ་ས་རཱི་ར་དྷཱ་ཏུ ཨེ་ཀ་གྷ་ན་སི་ལཱ་མ་ཡ་པ་ཊི་མཱ ཝི་ཡ ཨེ་ཀ་མེ་ཝ ཨ་ཧོ་སཱི་ཏི ཨ་ཏྠོ. ཨི་མ་མྷི བུ་དྡྷ་ཐཱུ་པ་མྷཱིཏི ས་ཀ་ལ་ཛ་མྦུ་དཱི་པ་ཝཱ་སཱི་ཧི ཀ་ཏ་མྷི ཨི་མ་མྷི སུ་ཝ་ཎྞ་ཐཱུ་པ་མྷི མ་ཡཾ ས་བྦེ ས་མཱ་ག་ནྟྭཱ ཀ་ཉྩུ་ཀ་ཐཱུ་པཾ ཀ་རི་སྶཱ་མཱ་ཏི ཨ་ཏྠོ.
༡༣༣. ཨི་ནྡ་ནཱི་ལཾ མ་ཧཱ་ནཱི་ལནྟི ཨི་ནྡཱི་ཝ་ར་པུ་པྥ་ཝ་ཎྞཱ་བྷཾ མ་ཎི ཨི་ནྡ་ནཱི་ལ་མ་ཎི. ཏ་ཏོ ཨ་དྷི་ཀ་ཝ་ཎྞ་ཏཱ མ་ཧཱ་མ་ཎི ཨི་ནྡ་ནཱི་ལ་མ་ཎ་ཡོ ཙ མ་ཧཱ་ནཱི་ལ་མ་ཎ་ཡོ ཙ ཛོ་ཏི་ར་ས་མ་ཎི་ཛཱ་ཏི་ར་ངྒ་མ་ཎ་ཡོ ཙ ཨེ་ཀ་ཏོ ས་ནྣི་པཱ་ཏེ་ཏྭཱ རཱ་སཱི ཀ་ཏྭཱ སུ་ཝ་ཎྞ་ཐཱུ་པེ ཀ་ཉྩུ་ཀ་ཐཱུ་པཾ ཀ་ཏྭཱ ཨ་ཚཱ་ད་ཡུ་ནྟི ས་མྦ་ནྡྷོ.
༡༤༤. པ་ཙྩེ་ཀཾ བུ་དྡྷ་སེ་ཊྛ་སྶཱཏི བུ་དྡྷུ་ཏྟ་མ་སྶ པ་ཏི ཨེ་ཀཾ ཝི་སུཾ ཨུ་པ་རི་ཚ་ད་ནེ་ན ཐཱུ་པཾ ཨ་ཀཾ་སཱུ་ཏི ཨ་ཏྠོ.
༡༤༧. ཀུ་མྦྷ་ཎྜཱ གུ་ཡ྄ཧ་ཀཱ ཏ་ཐཱཏི ཀུ་མྦྷ་མ་ཏྟཱ་ནི ཨ་ཎྜཱ་ནི ཡེ་སཾ དེ་ཝཱ་ནཾ ཏེ ཀུ་མྦྷ་ཎྜཱ, པ་ཊི་ཙྪཱ་དེ་ཏྭཱ ནི་གུ་ཧི་ཏྭཱ པ་ཊི་ཙྪཱ་ད་ན་ཏོ ག་རུ་ལཱ༹ གུ་ཡ྄ཧ་ཀཱ ནཱ་མ ཛཱ་ཏཱ, ཏེ ཀུ་མྦྷ་ཎྜཱ གུ་ཡ྄ཧ་ཀཱ་པི ཐཱུ་པཾ ཨ་ཀཾ་སཱུ་ཏི ཨ་ཏྠོ.
༡༥༡. ཨ་ཏི་བྷོ་ནྟི ན ཏ་སྶཱ་བྷཱཏི ཏ་སྶ ཙེ་ཏི་ཡ་སྶ པ་བྷཾ ཙ་ནྡ་སཱུ་རི་ཡ་ཏཱ་ར་ཀཱ་ནཾ པ་བྷཱ ན ཨ་ཏི་བྷོ་ནྟི, ན ཨ་ཛ྄ཛྷོ་ཏྠ་ར་ནྟཱི་ཏི ཨ་ཏྠོ.
༡༥༨. ཨ་ཧ་མྤི ཀཱ་རཾ ཀ་སྶཱ་མཱིཏི ཏཱ་དི་ནོ ལོ་ཀ་ནཱ་ཐ་སྶ ཐཱུ་པ་སྨིཾ ཨ་ཧ་མྤི ཀཱ་རཾ པུ་ཉྙ་ཀི་རི་ཡཾ ཀུ་ས་ལ་ཀ་མྨཾ དྷ་ཛ་པ་ཊཱ་ཀ་པཱུ་ཛཾ ཀ་རི་སྶཱ་མཱི་ཏི ཨ་ཏྠོ.
ཨུ་པ་ཝཱ་ན་ཏྠེ་ར་ཨ་པ་དཱ་ན་ཝ་ཎྞ་ནཱ ས་མ་ཏྟཱ.