༩. ཝ་ན་ཝ་ཙྪ་ཏྠེ་ར་ཨ་པ་དཱ་ན་ཝ་ཎྞ་ནཱ

ན་ཝ་མཱ་པ་དཱ་ནེ ཨི་མ་མྷི བྷ་དྡ་ཀེ ཀ་པྤེཏི་ཨཱ་དི་ཀཾ ཨཱ་ཡ་སྨ་ཏོ ཝ་ན་ཝ་ཙྪ་ཏྠེ་ར་སྶ ཨ་པ་དཱ་ནཾ. ཨ་ཡ་མྤི པུ་རི་མ་བུ་དྡྷེ་སུ ཀ་ཏཱ་དྷི་ཀཱ་རོ ཏ་ཏྠ ཏ་ཏྠ བྷ་ཝེ ཝི་ཝ་ཊྚཱུ་པ་ནི་སྶ་ཡཱ་ནི པུ་ཉྙཱ་ནི ཨུ་པ་ཙི་ན་ནྟོ ཀ་སྶ་པ་སྶ བྷ་ག་ཝ་ཏོ ཀཱ་ལེ ཀུ་ལ་གེ་ཧེ ནི་བྦ་ཏྟོ ཝི་ཉྙུ་ཏཾ པ་ཏྭཱ ས་ཏྠུ དྷ་མྨ་དེ་ས་ནཾ སུ་ཏྭཱ ས་དྡྷཱ་ཛཱ་ཏོ པ་བྦ་ཛི་ཏྭཱ པ་རི་སུ་དྡྷཾ བྲ་ཧྨ་ཙ་རི་ཡཾ ཙ་རི་ཏྭཱ ཏ་ཏོ ཙུ་ཏོ དེ་ཝ་ལོ་ཀེ ནི་བྦ་ཏྟོ, ཏ་ཏོ ཙུ་ཏོ ཨ་ར་ཉྙཱ་ཡ་ཏ་ནེ བྷི་ཀྑཱུ་ནཾ ས་མཱི་པེ ཀ་པོ་ཏ་ཡོ་ནི་ཡཾ ནི་བྦ་ཏྟོ. ཏེ་སུ མེ་ཏྟ་ཙི་ཏྟོ དྷ་མྨཾ སུ་ཏྭཱ ཏ་ཏོ ཙུ་ཏོ དེ་ཝ་མ་ནུ་སྶེ་སུ སཾ་ས་ར་ནྟོ ཨི་མ་སྨིཾ བུ་དྡྷུ་པྤཱ་དེ ཀ་པི་ལ་ཝ་ཏྠུ་སྨིཾ བྲཱ་ཧྨ་ཎ་ཀུ་ལེ ནི་བྦ་ཏྟི. ཏ་སྶ མཱ་ཏུ་ཀུ་ཙྪི་ག་ཏ་ཀཱ་ལེ་ཡེ་ཝ མཱ་ཏུ དོ་ཧ་ལོ༹ ཨུ་ད་པཱ་དི ཝ་ནེ ཝ་སི་ཏུཾ ཝ་ནེ ཝི་ཛཱ་ཡི་ཏུཾ. ཏ་ཏོ ཨི་ཙྪཱ་ནུ་རཱུ་པ་ཝ་སེ་ན ཝ་ནེ ཝ་ས་ནྟི་ཡཱ ག་བྦྷ་ཝུ་ཊྛཱ་ནཾ ཨ་ཧོ་སི. ག་བྦྷ་ཏོ ནི་ཀྑ་ནྟ་ཉྩ ནཾ ཀཱ་སཱ་ཝ་ཁ་ཎྜེ་ན པ་ཊི་གྒ་ཧེ་སུཾ. ཏ་དཱ བོ་དྷི་ས་ཏྟ་སྶ ཨུ་པྤ་ནྣ་ཀཱ་ལོ, རཱ་ཛཱ ཏཾ ཀུ་མཱ་རཾ ཨཱ་ཧ་རཱ་པེ་ཏྭཱ ས་ཧེ་ཝ པོ་སེ་སི. ཨ་ཐ བོ་དྷི་ས་ཏྟོ མ་ཧཱ་བྷི་ནི་ཀྑ་མ་ནཾ ནི་ཀྑ་མི་ཏྭཱ པ་བྦ་ཛི་ཏྭཱ ཚ་བྦ་སཱ་ནི དུ་ཀྐ་ར་ཀཱ་རི་ཀཾ ཀ་ཏྭཱ བུ་དྡྷེ ཛཱ་ཏེ སོ མ་ཧཱ་ཀ་སྶ་པ་སྶ ས་ནྟི་ཀཾ ག་ནྟྭཱ ཏ་སྶོ་ཝཱ་དེ པ་ས་ནྣོ ཏ་སྶ ས་ནྟི་ཀཱ བུ་དྡྷུ་པྤཱ་ད་བྷཱ་ཝཾ སུ་ཏྭཱ ས་ཏྠུ ས་ནྟི་ཀཾ ག་ནྟྭཱ དྷ་མྨཾ སུ་ཏྭཱ པ་བྦ་ཛི་ཏྭཱ ན་ཙི་ར་སྶེ་ཝ ཚ་ལ༹་བྷི་ཉྙོ ཨ་ར་ཧཱ ཨ་ཧོ་སི.

༢༥༡. སོ ཨ་ར་ཧ་ཏྟཾ པ་ཏྭཱ ཨ་ཏྟ་ནོ པུ་བྦ་ཀ་མྨཾ ས་རི་ཏྭཱ སོ་མ་ན་སྶ་ཛཱ་ཏོ པུ་བྦ་ཙ་རི་ཏཱ་པ་དཱ་ནཾ པ་ཀཱ་སེ་ནྟོ ཨི་མ་མྷི བྷ་དྡ་ཀེ ཀ་པྤེཏི་ཨཱ་དི་མཱ་ཧ. ཏ་ཏྠ བྲ་ཧྨ་བ་ནྡྷུ མ་ཧཱ་ཡ་སོཏི ཨེ་ཏྠ བྲཱ་ཧྨ་ཎཱ་ནཾ བ་ནྡྷུ ཉཱ་ཏ་ཀོ་ཏི བྲཱ་ཧྨ་ཎ་བ་ནྡྷཱུ་ཏི ཝ་ཏྟ་བྦེ གཱ་ཐཱ་བ་ནྡྷ་སུ་ཁ་ཏྠཾ ‘‘བྲ་ཧྨ་བ་ནྡྷཱུ’’ཏི ཝུ་ཏྟ་ནྟི ཝེ་དི་ཏ་བྦཾ. ལོ་ཀ་ཏྟ་ཡ་བྱཱ་པ་ཀ་ཡ་ས་ཏྟཱ མ་ཧཱ་ཡ་སོ. སེ་སཾ ས་བྦཾ སུ་ཝི་ཉྙེ་ཡྻ་མེ་ཝཱ་ཏི.

ཝ་ན་ཝ་ཙྪ་ཏྠེ་ར་ཨ་པ་དཱ་ན་ཝ་ཎྞ་ནཱ ས་མ་ཏྟཱ.