༡༠. ཙཱུ་ལ༹་སུ་ག་ནྡྷ་ཏྠེ་ར་ཨ་པ་དཱ་ན་ཝ་ཎྞ་ནཱ

ད་ས་མཱ་པ་དཱ་ནེ ཨི་མ་མྷི བྷ་དྡ་ཀེ ཀ་པྤེཏི་ཨཱ་དི་ཀཾ ཨཱ་ཡ་སྨ་ཏོ སུ་ག་ནྡྷ་ཏྠེ་ར་སྶ ཨ་པ་དཱ་ནཾ. ཨ་ཡ་མྤི པུ་རི་མ་བུ་དྡྷེ་སུ ཀ་ཏཱ་དྷི་ཀཱ་རོ ཏ་ཏྠ ཏ་ཏྠ བྷ་ཝེ ཝི་ཝ་ཊྚཱུ་པ་ནི་སྶ་ཡཱ་ནི པུ་ཉྙཱ་ནི ཨུ་པ་ཙི་ན་ནྟོ ཀ་སྶ་པ་ས་མྨཱ་ས་མྦུ་དྡྷ་ཀཱ་ལེ བཱ་རཱ་ཎ་སི་ཡཾ ཝི་བྷ་ཝ་ས་མྤ་ནྣེ ཀུ་ལེ ནི་བྦ་ཏྟོ ཝི་ཉྙུ་ཏཾ པ་ཏྭཱ ས་ཏྠུ ས་ནྟི་ཀེ དྷ་མྨཾ སུ་ཏྭཱ ས་བྦ་དཱ ན་མ་སྶ་མཱ་ནོ མ་ཧཱ་དཱ་ནཾ ད་ད་མཱ་ནོ མཱ་ས་སྶ ས་ཏྟ་ཀྑ་ཏྟུཾ བྷ་ག་ཝ་ཏོ ག་ནྡྷ་ཀུ་ཊི་ཡཱ ཙ་ཏུ་ཛྫཱ་ཏི་ག་ནྡྷེ་ན ཝི་ལི་མྤེ་སི. ‘‘མ་མ ནི་བྦ་ཏྟ་ནི་བྦ་ཏྟ་ཊྛཱ་ནེ ས་རཱི་ར་ཏོ སུ་ག་ནྡྷ་ག་ནྡྷོ ནི་བྦ་ཏྟ་ཏཱུ’’ཏི པ་ཏྠ་ནཾ ཨ་ཀཱ་སི. བྷ་ག་ཝཱ ཏཾ བྱཱ་ཀཱ་སི. སོ ཡཱ་ཝ་ཏཱ་ཡུ་ཀཾ ཋ་ཏྭཱ པུ་ཉྙཱ་ནི ཀ་རོ་ནྟོ ཏ་ཏོ ཙུ་ཏོ དེ་ཝ་ལོ་ཀེ ནི་བྦ་ཏྟོ ཀཱ་མཱ་ཝ་ཙ་ར་ལོ་ཀཾ ས་རཱི་ར་ག་ནྡྷེ་ན སུ་ག་ནྡྷཾ ཀུ་རུ་མཱ་ནོ སུ་ག་ནྡྷ་དེ་ཝ་པུ་ཏྟོཏི པཱ་ཀ་ཊོ ཨ་ཧོ་སི. སོ དེ་ཝ་ལོ་ཀ་ས་མྤ་ཏྟི་ཡོ ཨ་ནུ་བྷ་ཝི་ཏྭཱ ཏ་ཏོ ཙུ་ཏོ ཨི་མ་སྨིཾ བུ་དྡྷུ་པྤཱ་དེ མ་ཧཱ་བྷོ་ག་ཀུ་ལེ ནི་བྦ་ཏྟི, ཏ་སྶ མཱ་ཏུ་ཀུ་ཙྪི་ག་ཏ་སྶེ་ཝ མཱ་ཏུ་ཡཱ ས་རཱི་ར་ག་ནྡྷེ་ན ས་ཀ་ལ་གེ་ཧཾ ས་ཀ་ལ་ན་ག་ར་ཉྩ སུ་ག་ནྡྷེ་ན ཨེ་ཀ་ག་ནྡྷཾ ཨ་ཧོ་སི, ཛཱ་ཏ་ཀྑ་ཎེ ས་ཀ་ལཾ སཱ་ཝ་ཏྠི་ན་ག་རཾ སུ་ག་ནྡྷ་ཀ་ར་ཎྜ་ཀོ ཝི་ཡ ཨ་ཧོ་སི, ཏེ་ན་སྶ སུ་ག་ནྡྷོཏི ནཱ་མཾ ཀ་རིཾ་སུ. སོ ཝུ་དྡྷིཾ ཨ་ག་མཱ་སི. ཏ་དཱ ས་ཏྠཱ སཱ་ཝ་ཏྠི་ཡཾ པ་ཏྭཱ ཛེ་ཏ་ཝ་ན་མ་ཧཱ་ཝི་ཧཱ་རཾ པ་ཊི་གྒ་ཧེ་སི, ཏཾ དི་སྭཱ པ་ས་ནྣ་མཱ་ན་སོ བྷ་ག་ཝ་ཏོ ས་ནྟི་ཀེ པ་བྦ་ཛི་ཏྭཱ ན་ཙི་ར་སྶེ་ཝ ས་ཧ པ་ཊི་ས་མྦྷི་དཱ་ཧི ཨ་ར་ཧ་ཏྟཾ པཱ་པུ་ཎི. ཏ་སྶ ཨུ་པྤ་ནྣ་དི་ཝ་ས་ཏོ པ་ཊྛཱ་ཡ ཡཱ་ཝ པ་རི་ནི་བྦཱ་ནཱ ཨེ་ཏྠ་ནྟ་རེ ནི་པ་ནྣ་ཊྛཱ་ནཱ་དཱི་སུ སུ་ག་ནྡྷ་མེ་ཝ ཝཱ་ཡི. དེ་ཝཱ་པི དི་བྦ་ཙུ་ཎྞ་དི་བྦ་ག་ནྡྷ་པུ་པྥཱ་ནི ཨོ་ཀི་ར་ནྟི.

༢༧༢. སོ་པི ཐེ་རོ ཨ་ར་ཧ་ཏྟཾ པ་ཏྭཱ ཨ་ཏྟ་ནོ པུ་བྦ་ཀ་མྨཾ ས་རི་ཏྭཱ སོ་མ་ན་སྶ་ཛཱ་ཏོ པུ་བྦ་ཙ་རི་ཏཱ་པ་དཱ་ནཾ པ་ཀཱ་སེ་ནྟོ ཨི་མ་མྷི བྷ་དྡ་ཀེ ཀ་པྤེཏི་ཨཱ་དི་མཱ་ཧ. ཏཾ ས་བྦཾ ཧེ་ཊྛཱ ཝུ་ཏྟ་ན་ཡ་ཏྟཱ ཨུ་ཏྟཱ་ན་ཏྠ་ཏྟཱ ཙ སུ་ཝི་ཉྙེ་ཡྻ་མེ་ཝ, ཀེ་ཝ་ལཾ པུ་ཉྙ་ནཱ་ན་ཏྟཾ ནཱ་མ་ནཱ་ན་ཏྟ་ཉྩ ཝི་སེ་སོ.

ཙཱུ་ལ༹་སུ་ག་ནྡྷ་ཏྠེ་ར་ཨ་པ་དཱ་ན་ཝ་ཎྞ་ནཱ ས་མ་ཏྟཱ.

པ་ཉྩ་པ་ཉྙཱ་ས་མ་ཝ་གྒ་ཝ་ཎྞ་ནཱ ས་མ་ཏྟཱ.